Bung-40
Vawrate chu an khaw lam pan chuan hmanhmawh takin an kal zel a. Kalkawngah chuan Ramliana chuan an khua chu alo ram vek ani emaw,an chhungte anlo that vek anih pawhin mipa taka inti pachang hram hram turin anaute chu an fuih mawlh mawlh a. Khua an thlen huna ngaihtuahna fim pu turte leh ri nghal buan buan ringawt lo turin a nau te chu an fuih sauh sauh a. Kawngah chuan chawl khawmuang hauhlo in an kal char char a. A tuk tlai lam behliang mun hun velah an khaw luh khan hmar lam ,ral ven buk an sak ţhin nalai chu an thleng ta a. Thing leh hlo hnah ah te chuan thisen a kai sen zei zuaih a,. Ruang lubung leh lu vun hik sen duai mai tam tak alo let rem rum bawk a. Ramliana chuan," Inbeihna chun anasa hle anih dawn hi. Kan chhungte pawh dama hmuh an beiseiawm tawhlo mange. Han vak kual ila. Damchhuak an lo awm emaw i han zawng teh ang u" tiin a naute chu hliam damchhuak an awm leh awmloh zawng turin an ti a. Tuchuan Vawrate chu inbeihna lai velah chuan an vak kual ta. Uluk taka an zawn pawhin tumah reng nung dama awm hmel hmuh tur an awmlo. Damchhuak palh zawng chungchuan khawchhung thlengin an vak chho a.
Khua an han luh chuan ralkhata an ngaihdan ai mah chuan an khua chu alo chhe hneh a. In ding reng reng a awmlo a. Ban ril kang bang ţhenkhat erawh alo la ding ve pheuh pheuh a. Thingbung la kangral chiahlo te chu ala khu luk luk mai bawk. Khawchhungah chuan meikhu alo la zam chiai chiai a. Ruang tamtak lah senghawitu awmlo tih hriat takin alo let rem rum mai a. Tual laia ui ţhenkhat chu an lo bauh lauh lauh a. Ar an kawkawdak lauh lauh bawk a. Vawk leh Sial ral hoin an man bangte chu khawchhungah chuan anlo tei hrut hrut a. Vawrate hmel an han hmuh chuan an hnar len hru hru chungin an lo en ve bawk a. Vawrate chuan lal in la ding vang mai leh a chheh vela mihring vei noh noh chu an han hmu thei a. Tichuan hmanhmawh takin lal in lam chu an pan leh ta nghal a.
Lal ina n han thlen chuan ral ho in an hnutchhiahte leh ral man bang tlankhawmte chu an theih ang tawk tawka hliamte buaipuiin anlo hmanhlel hle mai. Vawrate lokal an han hmuh chuan mak an ti em em a. Chutia an pasalţhate an han hmu ta mai chu an lawmna leh an lungngaihna a inchen hial ta ve ang. Vawraten lal in an thlen chuan tumah reng chu alo be hmasa ngam an awm hauhlo mai. Ramliana chuan," A va pawi tak em" an ti ringawt a. Chutah nutling pakhat insum zolo chuan," Ramlian,khuaah hian awm ni ula zawng hetiang hi a thlenglo tur" tiin Ramliana chu a rawn ţah khum hawm hawm a. Chutih lai chuan hliam zinga harh deuh tlangval Thanruma chuan,"In lo thleng tlai hret ani. Tunah chuan engmah tih theih a awm tawhlo e" a lo ti ve a. Ramliana chuan," Tute nge annih?" tiin a han zawt let a . Thanruma chuan thil thlen dan zawng zawng chu chipchiar takin an sawi ta vek a. A sawi zawh chuan Vawra chuan," Kan chhungte chanchin in hre mial em"?. Khawi lamah nge an hruai. Tin,Dengi pawh inlo hmu mial lo maw"? " tiin alo zawt a. Chu zawhna chu tumahin an chhang thei ta hauhlo mai. Vawra chuan," Kan chhungte chu an thi nge dam.tih tal pawh min hrilh theilo em ni" a han ti leh a. Lal ina lo awmte chu an ngawi tlata,sawi hmasatu nih hlau niawm takin an in melh leh zauh zauh ţhin a. A tawpah chuan putar pakhat chuan," Indo na kha anasa em a. Tunge dama,tunge thi ta tih reng reng kan hrelo. Kan buai nuaih nuaih a. Tumah kan in ngaihsak hmanlo ani. In chhungte chanchin chu kan hre lo ani. Ral ho khan min um darh nasa em ani" tiin Vawrate chu dawt a hrilh ta mai le. Chutah zet chuan Vawrate thinrimna chu thup sen rual ani talo. Ramliana chuan," Khaw luh khan dang zawngah leh khawchhungah i zawng ţha leh ang u. Sawivela ruang pawh alo let reng ani thei a" a han ti a. Tichuan Vawrate chu an chhungte ruang ngaihven tur chuan an kal leh ta a.
Vawrate an kal hnu chuan Lal ina awmte chu an ngaihdan in milloh avangin an inhnial nak nak a. Thanruma chuan,"Thudik kan sawi loh chuan a let kan tuar ngam dawn em ni. An chhungte chu lal in a hnawhchhuah thu hrilh mai aţha in ka hria. Kan thup hlen thei chuang dawnlo ani" a ti a. Nu pakhat chuan," Kan hrilh chuan min pui duh hauh lo ang. Keimahni chauh chuan kan in enkawl seng dawnlo ani. I hrilh lo mai ang u. An hriatchhuah tak leh a let chu kan tuar tlang ani mai ang chu" a rawn ti a . Midang pawh chuan an lo pawm tlang hle mai a. Vawrate chu dawt hrilh mai chu ţhain an hre ta a. Thudik an hrilh a,Suartui lal in an chhungkua chu a hnawhchhuah thu an hriat chuan Vawraten an pui duhlo mai ang tih an hlau em em ani. Anmahni chauh lah chuan han in hai kaw chi ziazang anni silo.
Khawchhung leh dai vel an fan kual vek hnu pawh chuan Vawrate chuan an chhungte ruang reng reng an hmulo a. An beidawn tawp hnuah chuan lal in lamah bawk chuan an kir leh ta a. Ramliana chu a rilru a hah hle mai. A fate leh a nupui chu a ngaihtuah em em a. A hrang ţheuha an hruai anih ngat phei chuan a fate chan chu a chhe zual hle dawn ani. Lal in an thlen hnu chuan Vawmaia chuan ,"Hetah hian kan awm reng theilo ang. Ruang hi kan senghawi vek seng dawnlo a. Heta kan awmreng chuan hrichhia veiin kan thi vat mai ang. Khawdai hmun remchang deuhah kan insuan angai dawn ani" a han ti a. Putar pakhat chuan,"Hetiang chung chuan khawilai ram hla mah kan kal theilo ang. Hliam tamtak lah tlansan theih anni silo" a rawn ti a. Ramliana chuan," Kan khaw ţhenawm lalte hnenah ţanpuina kan dil mai angai dawn ani. Nunau leh tlangval hliam tamtak kan awma. Ţanpuina kan hmuh vat loh chuan kan inhloh nasa lutuk ange" a han ti a. Vawmaia chuan," Lungchuan khaw lamah hian ţanpuina zawngin ka va kal dawn em ni ang. Minlo pui thei mial mahna" a han ti a. Chu veleh putar pakhat chuan," Ralho zingah khan Lungchuan lampang pawh an telve niin an sawi a. Beisei ngam anni dawn em ni" tiin dawt muhlum a rawn sawi ta. Chu veleh Ramliana chuan," Lungchuan lam chu anlo tel hauhlo ang. An lal pawh ka hmelhriat ani a. Ka ţhian pasalţha tamtak an awm bawk a. Keimah ka va kal ange" a ti ta tlat mai le. Vawrate tihloh midang ho zawng chu an thin a phu dep dep mai a. Thudik han hrilh dawnin dawt an lo hrilh tawh nen an hlauthawng ru bawk si. Chutah Vawra chuan," Ka u, lo innghah lai lawkna tur remchang kan zawn vat angai ania. Zan lamah kan hmalak dan tur chu rel ho ila aţha zawklo maw" a rawn ti a. Ramliana pawh chuan,"Ni e,khua aţang hian kan inthiar chhuah vat angai ani" a rawn tive bawk a. Tichuan rem te han ruat zung zungin an khaw chhuah lam,Lungmam khaw hlui lama awm Damzawl an tih hmunah ah chuan an in thiar phei ta a.
Vawraten tlangval hliam zawng zawng an han zawn phei meuh chuan zan alo rei hman tawh hle mai a. An chau lutuk chu ngaw hnuaia hnahthel chungah chuan muin an thaw hlawi hlawi mai a. Nu ho chuan tuisik an lo pe ve a. An ţhut hahdam deuh hnu chuan zanriahte an han kil ve a. Hliam zingah chuan Thanruma chu a na lo pawl ani a. Zawn kual pawh ngailoin a kal thei tawh a. Zanriah ei khamah chuan Vawrate leh Thanruma chu an hmalak dan tur relin an ţhu khawm a. Ramliana chuan," Vawiina kan sawi tawh ang khan ţanpuina kan hmuh vat loh chuan kan inhloh leh nual dawn a. Tlang hrileng ilo fahran lakah pawh kan in veng zo awm silo a. Kan tlangvalte lah han kalsan chi anni heklo. Kei Lungchuan khaw lamah ţanpuina dil turin ka va kal anga. Vawmaia hi Kan lal Lianvunga unaupa Hauthanga khua Hliappui lamah va kal thung sela. Vawra hetah alo awm anga. Kan lo haw hunah hmalak zel dan tur kan relho dawn nia" a han ti dap dap a. Vawra chuan,"Inlo haw kan nghah chhung chuan kan chhungte anlo thi vek hman ang asin. Tunah hian anmahni chhanchhuak tur chuan engvangin nge kan kal mai loh ni" a rawn ti a. Ramliana chuan,"Tunah chuan midang han bei turin kan tlem lutuk ani. Kan nunna atan a hlauhawm thei a. Hliappui lal Hauthanga chuan min rawn pui ngei anga. Lungchuan lamah erawh beisei ka tisang ngam lo a. Ţanpuitu kan hmuh dan a zirin kan khaw mite chhanchhuak turin kan kal dawn ani" a han ti leh a. Vawmaia chuan," Lal buhzema buh saw engchen ei nge a daih ang" a han ti a. Thanruma chuan," Thlakhat dawn ei chu ani ang. Chumi chhung chuan inlo let hman dawn tho a. Chawhmeh tur lah a beidawn thlak loh a. Kan in chawm zo em em ang" alo ti bawk a. Tichuan a tuk lama ţanpuina zawnga chhuak tur chuan an in ruahman ta a.
A tuk khua alo var chuan Ramliana chu Lungchuan khaw lam panin a kal a,Vawmaia pawh Hliappui lam pan tur chuan a kal ta nghal a. Chumi ni chuan Vawra chuan Lal buhzema buh chu an buk lamah chuan a thiar phei tlauh tlauh mai a. Sum leh suk thlengin a thiar phei vek a. Chawhmeh atan Vawk leh Ar a man theih ang ang chu a man khawm bawk a. Sial lo tla mai maite chu hnim hring hmunah te thlungin hah pawh sawilo chuan a thawk tlauh tlauh mai a. Tar leh nu ho chuan an theih ang angin anlo pui bawk. Vawra chuan tuium tur te siamin an piah kawrteah chuan tuikhur tur te an hai a. Tlai lam ni tlak dawn ruai thlenga a buai hnu chuan a hah lutuk chu lal inah chuan a ţhu hnawk mai a. An khaw ram tawh chu an thlir vang vang a. Dengi nen a hlim taka an hun hman tawh zawng zawngte an ngaihtuah kir a. A lung a chhe lek lek mai . Dengi zawnchhuah ngei chu a tum bur mai ani. Lal in a chhuahsan dawn chuan rapchungah sarep ilo alo awm takin tiin rapa Bawmrang ung deuh khek khawk maite chu an dap kual a. Sarep tlemte alo awm bakah Silai mu chher sa sawm vel zet mai leh Silai Zen a hmuh fuh hlauh mai le. Chu thil chuan a ngaihtuahnaah ruahmanna thar a rawn tuh nghal a. Phur takin an buk lamah chuan a phei ta a.
Buk ava thlen chuan nu ho chuan zanriah tur anlo buatsaih mek a. Vawra chuan a sarep ken phei chu zanriah chawhmeh atan an pe a. Vawra chu buk sira lungpui ngheng chungchuan an ţhu thluang diai mai a. A chauh em avang chuan reiloteah chuan a muhil zui mai bawk a. Vawra muhil lai chu pitar leh putar te chuan lainat hmel takin an thlir ngawih ngawih mai a. Zanriah ei a hun dawn tawhah chuan Vawra chu nu pakhat hian a rawn sawi harha . Tichuan zanriah chu tuiti takin an kil ho ta a. Zanriah ei khamah chuan Vawra chuan Thanruma chu a ko hrang ta a. Thanruma hnenah chuan Vawra chuan,"Ruma,ngun takin lo ngaithla la. Vawiin lamah Silai zen leh a mu ka va hmuh belh ţeuh mai a . Naktuk zing khawvar rual hian Hualtu khaw lam panin ka kal dawn ani. Ka ute an lo thlen hunah chuan ţha takin lo sawi la. Min rawn ngaihtuah suh se. Khua chu kalo enthla mai mai anga. An rawn thlen veleh minlo zawm mai dawn nia" a han ti dap dap a. Thanruma chuan," I tum tlat chuan keia han dan rual lah ini silo a. Hei chakkhai min lam khawm sak vek tawh a. Buk min zar sak tawh bawk a. A bak hi chu kan lo tive thei tawh em em ang. Thei ni ila han zui ve che ka va han chak tak em" a ti vawng vawng mai a. Vawra chuan," Kan mite uluk taka ilo enkawl hian thil ropui tak iti ani dawn ani. Tin,khua a ruang te saw a rim a chhe ţan der tawh maia. Saw lamah saw chuan tumah chhuak tamlo ang che u" a han ti leh a. Vawra bawk chuan," Ral ho chu an tam viau em?" tiin a han zawt leh a. Thanruma chuan,' A tam zawk chu kan that ve hman a. Mahse a la dam ho pawh kha beih tham fe an la ni ang. Mahse Khaw hran hran aţanga lo kal anni a. Khaw khatah chuan tlangval tam chu damin an hawng biklo ang" tiin a hriat ang ang chu an hrilh ve a. Vawra chuan," Kan lal leh upate chu Hualtu lamah an hruai ngei anga. Chu chu ka kal hmasakna ber tur ani ang. Ka ute an lo thlen hunah pawh Hualtu lama ka kal thu ilo hrilh dawn nia" a han ti leh a. Tichuan a tuk lama Hualtu lam kal tur chuan Vawra chu a inbuatsaih ta a. A tuk zing khawfing chah ruala chhuak thei tur chuan a mamawh ang angte chu a iptepuiah chuan an thun khawm a.
Hmanhmawh taka nili lai mai a kal hnu tukţhuan kil hun velah Vawra chu Hualtu khawdaiah chuan a awm vang tawh mai. Hualtu khaw lan chian theih deuhna lai a ţang chuan khawchhung chu an thlir vang vang mai a. Hualtu khua an run hmasak lai ai daihin Hualtu khuaah chuan in ding alo tlem tawh zawk a. Hualtu khua hian Suartuiin an rawn run khan an tlangval tam zawk an hloh tawh bakah Suartui lam run tura an kal khan an tlangvalte leh an pasalţhate an va chan leh ţeuh bawk a. Tunah chuan tlangval ral han bei tak tak tham an awm tawh meuhlo a. A lu kima chhiarin tlangval puitling,raldo thei ţhiau za zet zawt bak an awm tawhlo ani. A khuaa cheng tam zawk chu hmeichhia leh naupang anni tawh a. Hualtu lal Zangama hi a nauten an khua zawm ve mai tura an tih pawhin a lal nihna chan a hlauh avangin a khua te hi ala pempui duhlo ani. Vawra chuan khawchhung chu uluk takin an thlek kual a. Lal in tual zawlah rip chhunga tlangval sawmthum rual vel kawl bun sa a awm chu an hmu thei a. An khaw tlangvalte ngei anni ang tih a ring nghal mai. Chumi ni chuan tu emaw thu zawh chian tur zawn atum ta a. Khawdaiah chuan mi ramvak tur emaw lokal tur changin a ţhu ta kar mai le.
Chhun pa chang thlenga a ngah hnu pawh chuan tumah reng reng khaw chhuahsan a a awmna lama lokal reng reng an awmlo. Thim hnuah lo chuan khua a han luh tawp a rem silo a. A tawpah chuan mi tuemaw han man mai tur an awm beiseiin khawdai chu a hrut kual ta a. Thui fe a kal hnu chuan khua aţanga hla vakloah chuan thing tuk ri kauh kauh thawm leh hmeichhe hlim nui ri hi a hre ta. Hmeichhia kher han vau beha thu han zawhfiah chu duhlo hle mahse a mi hmuh chhun te anni dawn anga alan tak siah chuan thawm a hriatna lam pan chuan a kal ta nghal a. A va hnaih phei zel hnu chuan hmun zawl lai deuha nula pahnihin thing an lo ek karh karh hi a va hmu thei ta. Amah hnungchhawn zawnga an awm tlat avang chuan tute nge annih a hre theilo. Vawra chuan thing an eh buai lai taka va ţhawn thut chu a duhloh avangin an thing eh zawh hun chu a nghak ta a. Thing an eh lai a nula pakhat lo hawi let zauh hmel a han hmuh chuan Vawra chuan chu nula chu Hualtu lal fanu Rengpuii ngei ani tih a hre ta. Lal fanu a man theih hlauh chuan a tan hmalak dan a awlsam dawn riauin a hria a. Tichuan an thing eh zawh hun chu a nghak ta rih a.
Nulate chuan thing an eh zawh hnu chuan an phur tur chu an han siam nghal a. An siam zawh chuan an phur chu thingfaka doin a sir deuhah chuan Tui in pahin an han ţhu rih a. An thlan te chu puan zeldam tura an ken chuan an han hru leh zauh zauh ţhin a. Chutia titi siam siam chunga ang ţhut lai chuan an hnung lama ţang chuan," In hah tawh viau ang maw" tih thawm an hre ta thut mai le. Rengpuiite chu an hawi let rual ţhawt a. An ţhutna chhak lawka tlangval anmahni lo en reng tu chu mak ti leh hlauh hmel tak chuan an en a. Rengpuii bula ding,Hualtu lal monu zawk chu au chhuah mai tum ni awm tak hian a ka ahan ang zuau a. Chutih lai chuan anmahni lama lo phei mek tlangval chuan," Au duh suh. I nunna in a tawrh phah ange" an tih takah chuan a thil tum chu a ţhulh ta a. Rengpuii chuan a Êma a Hreipui dah chu la chhuakin anmahni lama lokal mek tlangval hnenah chuan," Min rawn hnaih hauh suh ange che. Anih loh chuan ka chek sawm vek ang che. Tunge inih"? aw khur deuh dar dar chung chuan a han ti a. Tlangval chuan," Rengpui,ngun takin mi han en teh. Tunge ka nih ila hrechhuak thei emaw chu" a rawn ti ta. Rengpuii chuan anmahni lam pana lokal tlangval chu an en vang vang a chutah maktih hmel tak hian," Vawra,Suartui pasalţha thinchhe zet kha ini maw. Enge iduh a. Kan khu rawn run leh i tum em ni" a lo ti ve salh salh mai a. Vawra chu Rengpuii te awmna lai lo thleng phei tawhin Rengpuii te amah en chunga ding reng hnenah chuan," Han ţhu ve rih ila mawle. Ka thu in awihlo chuan ka dim dawn hauhlo che u nia" a han ti a. Rengpuiite tan han hnial ngam chi ni heklo le. A Hreipui chu dah thlain Vawra ţhutna sir deuhah chuan an ţhu ta a. Rengpuii chuan," Engtikah mah indona hi a tawp dawnlo. Tunah hian phuba la in hlawhtling takin lo haw leh ta pawh ni la. Ka pa te hian an lo bei leh tho tho ang che u. Anih loh pawhin ţhangthar ten phuba chu an la rawn la mai ang" an ti ve dap dap a. Vawra chuan thutak hmel fe a Rengpuii en ha pah chuan,"Tunah chuan phuba la tur awm tawh hauhlo khawpin kan that vek dawn che u ani. Chumi hunah chuan thlamuangtakin in awm thei ang" a han ti a. Rengpuii chuan," Hmeichhia leh naupang pawh in that vek anga maw. Chutiang tih ching pasalţha an awm ka hre ngailo e" zam miahlo chuan alo ti ve mai a. Vawra chuan," Tunah chuan pasalţha nih kher angaiin ka hrelo. A ţul apiang chu ka ti mai dawn ani" a han ti leh a. Rengpui chuan," In khaw mi leh sa pawh tamtak nungdamin duat takin kan enkawl asin. Hmeichhia leh naupang chungah tumahin kut an thlak lo" a rawn ti leh a. Vawra chuan," Duat takin rip chhungah in khung ani lawm ni. Tunah chuan mitthi ang reng inni tawh. Han haw ta ula. I pa hnenah chuan Suartui pasalţhate a lu la turin kan lokal ani tih han hrilh ang che. Nasa takin lo inbuatsaih sela. Tuna chinah chuan khawchhung chhuahsan apiang chu anmahni lu zuar anni mai. He thil avanga kan miten an tuar anih ngat chuan Hualtu khua a cheng a te ber aţanga a lian ber thlengin tumah kan zuah hauhlo ang. Han haw tawh rawh u" a han ti a. Rengpuii chuan," In run hi inti tawp thei mailo em ni. Engvanga inrem hi harsa ti viau nge maw innih leh. Remna siam hi pasalţha nihna ani ve tho lovem ni. Nunau pawisawilo in kan tawrh nasat zia hi i hmu thiamlo maw. Tunah hian min that law law mai rawh. Pawisawilo thisen luang ka hmu ngamlo e. Ka lu hi la la,ka pa hnenah chuan huaisen taka ka thih thu min lo hrilh sak thung ta che" tihpahin Vawra hmaah chuan a rawn ding ta teu mai. Nui sen sen pahin Vawra chuan," Lal fanu rilru lian tak,a mite thi ai pawha thi ngam ini maw. I pa hi hetiang ang mi ni ve sela chuan indona hi a awmlo tur. I huaisenin in zahawm viau na a. Tunah chuan i thih ala hun rihlo e" an ti ta a. Rengpuii chu Vawra hmaah chuan a ţhingţhi hnawk a. Vawra chiang taka en chung chuan," Khawngaih takin remna insiam theilo em ni. Ka pa hnenah pawh in phahhniam turin ka ngen thei alawm. In hmingţhatna tur chauh em ni in ngaihtuah" mittui tla zawih zawih chung chuan a han ti a. Vawra chuan," Remna siam nan a tlai lutuk tawh ani. Engkim rel fel ani tawh . Zahngaihnain hmun a chang dawn tawhlo e" a han ti a. Tichuan engmah sawi chhunzawm tawh lemloin Rengpuiite chuan an phur chu an siam sawk sawk a. An kal dawn chuan Rengpuii chuan,"Pasalţha inti tepawh hian chawimawina leh hmingţhatna chauh umin inlo bei ţhin anih hi maw. Kan khua in rawn run hunah chuan keimah hi min rawn that hmasa ber dawn nia" a ti chuai raih a. Tichuan ngui nghiai chungin an khaw lamah chuan an hawng ta a.
Rengpuiite chu hmanhmawh takin an khaw lamah chuan haw a. In an thlen chuan an thing phurhte chu an keuh sawk sawk a. Inah chuan an lut nghal a. Lal inah chuan lal leh a upate chu an hlawhtlinna lawmin an lo ri bung bung mai. Rengi chuan apa kianga ţhut pah chuan," Ka pa,thil pawimawh sawi tur ka nei ania" a han ti sa sa a . Lal Zangama chuan," Eng thuah nge min biak duh a. Tunah chuan ka bua rih anih hi" alo ti hluk a. Rengi chuan," Ka pa,thih leh dam thu ani" a han tih chuan lal chuan," Upate u,kq fanu hian sawiduh anei e. Ilo ngaihthla lawk qng u hmiang" tiin a upate ri bengchheng chu an khap a. Chutah Rengpuii chuan Suartui tlangval pakhat an khawdaia an hmuh thu leh a thilsawi zawng zawng chu an hrilh fai ta vek a. Chu thu an han hriat chuan lal leh a upate chu an nuih a za ta em em mai a. Upa pakhat chuan," Lal pa,kan fanu thusawi mah nise keizawng ka nuih ati za em mai. Suartui khua in min rawn run let an tum anga maw. An tlangvalte ka that deuh vek tawh a. A bang zawng lah kan kai darh vek bawk a. Khawi lai tlangval beidawng thusawi bak va nih suh. An ngam chuan rawn kal sela. Awmdan mawi kan lo zirtir ani ang chu" tihpahin a nui huau huau mai a. Lal chuan," Ka fanu, i thusawi chu i chiang maw. A hmuh chu i hmu ngei amaw" a han ti leh a. Rengpuii chua," Ka pa,ka hmu ngei alawm" alo ti vat a. Lal chuan," Khawnge Suartui lal kha han kaichhuak teh u. Engemaw zawh tur ka nei e" a han ti a. Tlangaupa chuan Suartui lal chu lal inah a rawn luhpui a. Hualtu lal Zangama chuan,"Ekhai,lo kal teh ,kha ka zu no hi han dawm ve teh" tih pahin Suartui lal Lianvunga chu a zu dawm lai chuan an theh ţhawt mai a. Midang chu anlo nui dur dur a. Hualtu lal chuan," A khaih aw. Lal ropuitak ini tih kha kalo theihnghilh alawm. Chibai leh lak zahawm" tihel tih hriat tak chuan a han ti a. A upate pawh chuan Chibai an lo buk der vel a. Chutah lal Zangama chuan,"I khuaa pasalţhate kha kan man vek tiraw" tiin a han zawt a. Lal Lianvunga chuan,"Man vek e" alo ti a. Hualtu lal chuan ,"Chuti anih chuan i kal thei. Han kai chhuak teh u" an ti leh a. Suartui lal an kaihchhuah hnu chuan Rengpuii chuan," Ka pa,dawt a sawi ani . Vawiin a ka hmuh pa kha man kannin ţuma min vengtura an ruat tlangval ngei kha ani" a rawn ti ta kauh mai le. Chu thu chuan lal Zangama chu a deng deuh ani ngei ang. An ngawi deuh vang vang a. Chutah lo ţawngchhuakin," A tu a pawh chu lo ni se. Ka pasalţhate han tum tawk tur chuan an nep mah mah ani. Fimkhur thu hlaah tlangval pahnih ka naute khaw lamah tlantir ila a ţha ange" a han ti a. Rengpuii chuan," Ka pa kan mi man te hi chhuahin inrem takin kan awm theilo em ni" a rawn ti a. Lal chuan," Chu zawng nanga lp sawi ve phak anilo e. Lo va kiang teh , rorel i dal dawn e" a han ti a. Rengpuii chu lunghnur tak chuan a chhuak ta a. A chhuah hnu chuan lal Zangama chuan," Ka sawi tawh ang khan fimkhur thu hlaah ka naute khaw lamah chuan lamkal kan tur dawn nia. Zaninah hian kal nghal sela. A bak chu an lo kir leh hunah kan rel ţha dawn nia. Han hlauh tur engvak awmin ka hrelo" a ti a. A upate pawh chuan an lal thutlukna chu ţha an tihphui ţheuh a. Tichuan an khaw ţhenawm lama lamkal intirh chu ţhain an hre ta a.
Zan lamah chuan Vawra chu khawchhung lut turin a inbuatsaih sauh sauh a. Chutih lai chuan lal in aţanga khawdai lam pana meichher chhi a mi pahnih kal hnak hnak chu a hmu ta hlauh mai le. Lal mi tirhte annih ngei ringin lo lambun chu a tum ta a. Tichuan hmanhmawh takin an kalna lam tur pan chuan a tlan ta nghal a. Khua aţanga hla deuh,thawm hriat phakloha tur awm vel a thlen chuan a mi chante lo thlen hun chu alo nghak ta a. Rei fe a nghah hnu chuan a awmna lam pana meichher lo eng phei vat vat chu a han hmu ta. Meichher eng chu alo hnai zel a. Vawra chuan tlangval pahnih anni tih leh Silai an keng lo tih chu a hmu chiang thei tawh a. A channa lai an lo thlen chuan Vawra chuan," Ding rawh u. Thawm in chhuah vaih chuan in thi nghal ang" Silaia tin chung chuan a han ti a. Tlangval pahnih chu an phawk hra mai a. An din na ngaiah chuan an ding reng a. Vawra chuan," Khawi lam kal tur nge innih. Eng thu nge in ken" a han ti a. Tlangval pakhat chuan," Tunge inih. Kan thu ken chungchangah sawi tur engmah i neilo e" alo ti ve khar khar a. Vawra chuan," Uai,i zamlo hle mai maw. Tunah hian ka duh chuan ka that thei che u tih in hria em?" a han ti leh a. Tlangval pakhat chuan," Thih hlau ni ila zawng hetah hian min hmu hauhlo ang le. I duh chuan min han kap ta che" ala rawn ti ve salh salh mai. Vawra chuan," I huaisenna chu a zahawm hle mai. Ka that ang che u,mahse nuamsa tak chuan in thi hauhlo ang" tihpahin a Silai chu an dah thla a. A Chempui phawrh pah chuan," Mipa leh mipa chu i han inbei ang hmiang. In ngam emaw chu" a han ti a. Hualtu tlangvalte pawh chua an meichher chu dahthlain an cho ve hle ani tih hriatnan an Chempui chu an han phawr ve a. Vawra chuan,"Kan khua in run avanga phuba lakna ani tih hria ang che u. Kha le aw,lo inring rawh u" tih pah chuan Hualtu tlangvalte lamah chuan a tlan phei ta a. Hualtu tlangval a hmasa zawk a lodingin Vawra lo tlan phei chu sah fuh ngei tumin a chem pui chu a lo vai pawp a. Vawra chuan lo bumin chupa hnungalamah chuan a bawh tlang phei pawp a. Hualtu tlangval pakhat zawk chu a bawh thal tawp mai. Chutah zuang sawn nghalin a ţanhmun an siamrem leh a. Hualtu tlangval tlu zawk chu alo tho leh ţuah ţuah a. Chutah an pahnih chuan Vawra chu rawn veh pheiin an rawn hual ta a. Vawra chuan a rawn hnaih hmasa tu zawk sah chhawk hmawk tum chuan a Chem chu ahan vai a. Chupa chu a Chempuia lo indangin thir leh thir chu a inkhak ţek chhawk mai le. Hualtu tlangval kut ata Chempui chu a per chhuak nawlh mai a. Chutih rual chuan Vawra chuan chupa chu an tlawh thal nghal tawp a. Chem alo phe vuaih a,Vawra ban veilam chu a thip nghal zawk a. Vawra chu rang taka per sawn ngalin amah sah nawn leh tuma Hualtu tlangvalin Chem a rawn vai leh chu lo bumin chupa dul nem tak mai chu a Chempui hriam tak mai chuan an zai thler phei duai mai a. Chupa chuan a dul chu a dawm nghal a. A rilte chu a rawn dawk deuh pur mai a. Chutih lai chuan Pakhat zawk pawh lo tho leh tawhin a Chempui pawh alo chhar leh tawh a." khawnge in zo fel law law teh ang aw" tihpahin Vawra chu a rawn bawh phei ta buan buan mai le. Vawra chuan chupa chem rawn vai leh tur lai tak chu va nangchingin a ban a chhawk sak ta hmawk mai a. Chupa na ti lutuk chu a ţhingţhi nghal rawp a. A kut a thisen chhuak tur hup beh pah chuan," A tawk ta e. Ka lu hi han la law law teh khai" a rawn ti a. Vawra chuan," Chuti maia ithih ka phal hlei nem. Engvanga kan khua kha rawn run nge innih reng reng a" tiin a han zawt a. Chu pa chuan," Tupawhin kan lalte thupek chu kan zawm vek ţhin ani lawm ni. Nang ngei pawh khan i zawm ve bawk ang chu" a lo ti a. Vawra chuan," Anih leh khuaah khian tlangval engzat chiah nge awm?" tiin a han zawt leh a. Chu pa chuan," Za vel zet ani mai. I tihtur chu ti vat teh" a rawn ti a. Vawra chuan," Chutia nang berin itih tlatte chuan ni hmiang chu" tihpahin Hualtu tlangval nghawng chu an sat chhum hmawk mai a. Tlangval pakhat ril dawk pur zawk chu alo la thi fel chiahlo a. Meng pual rulh rulh chung hian a lo la tal khur cher cher mai. Vawra chuan chupa lu pawh chu la ve nghalin Hualtu khaw lam chu a panpui leh ta a. Khaw kawtchhuah ah chuan a mi thahte lu bung chu a tar ta vu mai a.
Suartui khua a chhuahsan aţanga nihnih aliam hnu chuan Ramliana pawh Lungchuan khaw ramchhungah chuan a awm tawh a. Chutia hmanhmawh taka a kal hlawk hlawk lai chuan amah tawk zawnga ţawng nauh nauh thawm lokal chu a hre ta a. Tute tak ni ang maw tuchung chuan anlo thlen huna lo nghak ta a. Rei vaklo a nghah hnu chuan Lungchuan khaw pasalţha Chungthanga leh a nau Sawivela ngei mai chu tlangval sawm vel zet hruaiin alam pan chuan an lo phei mek a. Chutia anau Sawivela an hmuh thut mai mak ti lutuk chu Ramliana chu a ka ho mai a. Chungthanga chuan rawn hmu hmasa in," Sawia,saw i u Ramliana ani reng mai ka ti" a han ti a. Sawivela chuan hmanhmawh takin a u Ramliana dinna lam chu a pan phei ta a. Ramliana chuan," Vela,i tlanchhia em ni. I va him pel pual ve. Khawnge midang" alo ti hluka. Sawivela chuan,"Ka u,Sawi tur tamtak a awm ani. I han ţhu hahdam te te ila. Kan kan Kan kan kan
Bung-41
Zing khua alo var a. Naupang Sava veh tura kal ţhenkhat chu Hualtu khaw lamah chuan an rawn tlanphei hlawk hlawk a. Khua an rawn luh chuan putar rual ni lum ai paha pawn a lo ţhute chuan," Nau te u,engtizia a khati tak maia hmanhmawh nge maw innih le" anlo ti var a. Naupangte chuan," Kawtchhuah ah khian tlangval pakhat alo ţhu a. Khuaa in haw leh loh chuan ka that vek ang che u alo ti a. Kan rawn tlanchhe char char anih hi" an rawn ti reuh a. Putar lo awmte chua mak anti nasa mai a."Thil awmzia lal hnena thlen turin putar pakhat chu a kal ta nghal a.
Lal in a han thlen chuan tlangval ţhenkhat chu lal chawhmeh tur Vawk talhin anlo phe sang sang a. Tlangaupa pawh chu alo vir buai ve hle mai. Tlangaupa in lal in lama an khaw putar lokal a han hmuh chuan," E pu Dailova lah ni rengin. Enge i ngaihtuah a" alo tivar a. Pu Dailova chuan," Lal hnena thu pawimawh han hrilh lawk tur ka nei ani" tiin alo chhang a. Tlangaupa chuan lal inah a hruai lut ta nghal a. Lal ina an han luh chuan Tlangaupa chuan," Lal pa,hei pu Dailova hian i hnenah thu pawimawh sawi tur neiin niawmin a insawia. Kalo luh tir ta mai ani" a han ti a. Lal Zangama chuan," Ekhai,pu Dailo eng thu pawimawh nge min han hrilh duh ni" alo ti var a. Pu Dailova chuan,"Lal pa,tun mai khan naupang rual Sava veh tura kal ten kan khaw kawtchhuaha tlangval tu tih hriatloh an va hmu ani awm e. Chu tlangval chuan khua an let leh nghal loh chuan a thah vek tur thu alo sawi a. Naupangho hlau lutuk chu tlan hlirin anlo tlan thleng zak ani" a han ti a. Lal chuan," Naupang thusawi chu rintlak ani meuh ang maw?" alo ti leh a. Pu Dailova chuan," Lalpa,tunlaia kan boruak nen chuan a dik thei mai awm mange tiin i hnen kalo thlen ta rawih mai ani" a han ti leh a. Lal chuan," E khai pu Dailo, min rawn hrilh hriat hmasak avangin ka lawm e. Kawtchhuah lamah chuan ava chian turin ka tlangvalte ka han tir ange" tih pahin Tlangaupa chu tlangval ţhenkhat Kawtchhuan lama thil awmzia va chian tura tir nghal turin a ti a.
Tukţhuan kil hun awm velah chuan Hualtu tlangvalte chu beidawn hmel tak mai hian lal inah chuan an rawn lut a. Puanin thil engemaw hi an rawn fun haw bawk a. Lal Zangaman alo hmuh chuan,"Tlangvalte u,kawtchhuaha tlangval chu in va hmu ta em" alo ti thuai a. Tlangvalte chuan an mi lu fun chu lal in chhuata dimtea dah thla pah chuan," Lalpa,tumah kan va hmulo a. Mahse hei kan khaw tlangval pahnih lu bung hi kawtchhuaha Sahlamah khan alo in tar vung mai" an han tih meuh chuan Hualtu lal chu a thinrim ta em em a. A Vaibel dawn seh keh rap pah chuan," Tu pawh lo ni rawh se. Ka tlangvalte hetianga lo ti tu hi nuamsa in ka awmtir hauhlo ang. Ka pasalţha Zamuka han ko tawh u" thupe aw tak chuan a han ti a. Tlangvalte chu an pasalţha Zamuka ko tur chuan an kal ta nghal a. Hualtu lal chuan a upate hnenah," He thil hi nimina Rengpuii sawi nen khan inzawmna a nei thei angem. Suartui lam thiltihah kan puh thei angem?" a han ti a. Upa pakhat chuan," Lal pa, Suartui lam thiltih chu anih ka ring hauhlo mai a. Mahse kan fimkhur chu a ngai viau dawn ani. Mi engzah nge annih kan hrelo a. Kan khua hi anlo hual reng tawh pawh ani thei. Hei nimina kan mi tirhte lah kawng lakah an lo lambun tih a chianga. Lal in a lut leh chhuak thil engkim hi an hmu vek niin a lang ani" a rawn ti charh charh a. Lal chuan," Suartui lam thiltih anih ngat chuan an mi leh sa kan man zawng zawng hi kan tihlum vek ang. An lal ngei pawh hi an hmuh theih ngei na turah ka chhunhlum dawn ani" a han ti piap piap mai a. Chutah lal upa min chuan," Lal pa,tunah rih chuan kan mi mante kut thlak rihloh hi a him ber ani. Khua hi tumahin chhuahsan lo sela. Ralveng in dah bawk ila. Kan mi mante kan thah chuan hei ai hian an che na zual sauh dawn ani" tiin a ngaihdan a rawn sawi ve a. Chutih lai tak chuan an khaw pasalţha chhuanvawr Zamuka chu a rawn thleng ve chiah a. Zamuka chuan," Lal pa,enge thil awmzia" a rawn ti nghal a. Midangho chuan thil thlen dan chu an han hrilh zung zung a. Zamuka chuan," Lal pa, kan tlangvalte an thah nalai hi va chian phawt angai ani. Mi engzat nge annih tih kan rin thiam theihnan" a han ti a. Lal chuan," Ka pasalţhain ţha i tih ang chuan hma han la ta che. Hetiang thil kan chunga rawn ti duhtu te hi chu kan zuah hauh tur anilo. Hnuhma chian tur chuan va kal ta ula. Inlo thlen veleh kan tlangvalte phuba lak nan kan mi man pahnih lu kan tan ve nghal ang" a han ti leh a. Tichuan Zamuka chu tlangval pahnih hruaiin an khaw tlangvalte thah annih na lai vel va chian tur chuan an kal ta a. An kal dawn chuan Zamuka chuan," Lal pa,eng thil pawh thleng sela. Silai ri in hria emaw,thawm danglam in hria anih pawhin min rawn pui turin tumah rawn tir suh ang che. Khaw mipuite himna hi a pawimawh hmasa bera. He thil hi hmelmaho thangkam pawh ani thei ani" tiin an lal chu a han chah a. Tichuan an khaw tlangvalte ruang va chian tur chuan an kal ta a.
Zamuka te chu Vawran an tlangvalte a thahna hmun chu an va thleng tawh a. An awmna hmun hi khua aţanga hla deuh tak ani tawh ani. Zamuka chuan a Silai ken chu a tlangval hruai pakhat hnenah chuan pein ruang chu an bel chiang a. An inbeihna hnuhmate chu an enkual zel a. A tawpah chuan a ding hluai a,hawi kual zauh zauh pah chuan," Mi pakhat thiltih ani tlat mai. Helaiah hian nasa takin an inbei anih ngei hi. Kan hmelma pa hian alo lambun hauhlo mai" a han ti a. Tlangval pakhat chuan," Engtia han tihzui chi nge ni ang" tiin alo zawt a. Zamuka chuan," Tunah rih chuan kan umzui theilo ang. A thlen chin kan hrelo a. Minlo enthla reng pawh ani thei. Kan ţhiante ruang hi i senghawi phawt teh ang" a han ti a. Tichuan an ţhiante ruang chu lei lai khuarin an phum ta a. An zawh fel chuan Zamuka chuan," Khaw lamah hawng phawt ila. Hmalak dan tur lal leh upate hoin kan la rel dawn nia" a ti a. Tichuan khaw lam pan a kal zai an rel ta a.
Chutia khaw lam pan tura an kal chiah tihah chuan kawngchhak lam aţangin Silai alo puak thawr mai a. Zamuka te zinga mi tlangval Silai keng zawk chu kawng thlang lamah a Silai chawpin a hlawm thla nawk mai le. Zamuka leh tlangval pakhat chu kawng sirah an per lut nghal a. Thing bul phenah an biru ta nghal a. Zamuka chu a thinrim hle mai a. Thingbul phen aţang chuan," Tunge inih rawn inlan ta che. Mipa leh mipa chu hriam keng lo in i han in hmachhawn ang hmiang" tiin a han au a. Thawm riva engmah hriat zui tur a awmlo a. Zamuka te lah an awmhmun sawn ngam bik hek suh. Zamuka thinrim tlawmngai bawk si chuan ," Dawihzep pa,rawn in lan ta che. Mi inringlo lai bei ngam tawk chauh em ni innih le" ahan ti leh a. A sawi zawh rual deuh thaw chuan Silai vawikhat a rawn puak leh thawr a. Zamuka tlangval hruai pa chu a ţe ţhawt mai le. A malpuia Silai kahna avang chuan thlang lamah a vial thla tawp tawp mai a. Thih em zawng ala thi lo. Zamuka chuan chutia a awm reng chuan a thi dawn chiang tih a hria a. Chutah a Chempui phawrhin kawngah chuan an pen chhuak a. Kawngchhak lam en pahin," I duh chuan min han kap ta che. Kei hi Hualtu pasalţha Zamuka ka nih hi. In khua rawn runa hal tu kha ka ni. In mi leh sa tamtak ka that a,sal turin ka kawi duah duah bawk. I ngam anih chuan rawn inlan la. Mipa leh mipa chu i han innuai teh ang" a ti ta phiar phiar mai a. Chutia a sawi hnu rei vaklo ah chuan kawngchhak lam aţang chuan tlangval la naupan hmel tak. Mahse zuamawm hmel pu hauh silo hi alo chhuak ta hlawl mai le. Zamuka hma zawn hlam li vel ahlaah chuan dingin,"Hei hi phuba lakna ani tih hria ang che" a rawn ti chang fal mai. Zamuka chuan,"Uai,naupang mai ila nimaw. Ka thah hnu che a i chhungte ka hriat theih nan i hming tal mi han hrilh ta che" ti el deuh tak chuan a han ti a. Vawra chuan,"Ka hming i hre duh amaw. Suartui tlangval ,i tih thinrim tak Vawra ka ni e" a rawn ti a. Zamuka chuan," Suartui khuaah Vawra tih hming pu pasalţha reng ka hrelo. I chetlak dan aţang hian pasalţha inilo tih ka chiang ani" a han ti leh a. Vawra chuan," Pasalţha tia han chhal tlak chu ka ni lemlo. Mahse mi pakhat leh pathum inbeihnaa chak zawk tur hrethiam thei rual chu ka ni ve alawm" tiin alo chhang a. Zamuka chuan a tlangval hmachhawn mek chu tlangval satliah ani hauhlo tih hriain a beih awlsam dan ber tur a ngaihtuah ta a. Chutah nui deuh set chung hian,"Phuba lak nan chuan Ngen mu leh Chemsen zawng a nep lua e. I han inchai hlum ţhak ang hmiang" tiin Vawra chu awlsam taka a chai hlum mai theih a rin avangin rawtna a rawn siam a. Vawra chuan," Ngaihdan han siam thei dinhmunah pawh i dingin ka va hrelo ve. Ka duh chuan ka kap thal tawp nghal mai dawn che a. Mahse i huaisenna avang chauhin i duh ang chuan kan inbei ani ang chu" tihpahina Silai leh iptepui chu an dah thla a. Zamuka chuan,"In khua ka rawn lak lai khan hlaua khurin i tlanchhia a. Tunah vel nen huaisen lallukhum khum tumin tiang hian i rawn che leh si a maw. Khawnge hmanraw telloin eng ang chiah nge inih i han enchhin ang hmiang'" tih pahin Vawra chu a rawn bawh phei ta a. Vawra pawh inring penpawn sa ani bawk a. Chutia Zamuka ama lama lo phei mek chu uluk takin alo en ran a. Zamuka chuan Vawra chu hnek thal tawp tum hian a ban chu arawn vai pawp a. Vawra chuan lo bumin Zamuka nak thawlah tak mai chuan na lua awmlo hian an lo hnek pawp mai le. Zamuka chu a lo chhel ngang maia,na ti awm hmel pawh pu duh hauhlo in Vawra chu a rawn beih chhunzawm ta mial mial a. Pasalţha ve ve in bei anni bawk a,an han inhnek thle lawp lawp ţhin a. A tu zawk mah chuan tlawm zawk nih chu an tum baulo. Reilote ah chuan an hnar te a thi seng sung tawh mai a. An hmai te pawh a pawng cher chur tawh a. Reife a chak zawk pawh awm chuanglo a an inbeih hnu chuan an chau dun tawh hle mai a. Zamuka chuan a tawp nan ti niawm tak hian," Kha keimah Zamuka, Hualtu pasalţha,mi dawihzep lakah ka tlawm ngailo e" tihpah chuan Vawra chu a rawn bawh thal ta tawp mai. Kawngah chuan an han in elh dun ngiang ngiang mai a. Thisen leh thlantuiin a bual nal zuih tawh bawk nen an duh ang chuan an in man thei biklo. Vawra chuan chutia an inchai reng chuan a chan a chhe ve thei tih hriain thawh a han tum a. Chuti lai tak chuan Zamuka chuan Vawra kawngah rawn dawmin lei charah chuan an bawh thal leh tawp mai a. Vawra chu a hnang hman ţhelh ani. Chutah Vawra chuan," Kha keimah ve aw" tihpahin Zamuka chu an in her pui thut a. Zamuka kawngah manin a khup chen vel hian an thawhkan pui ta a. Zamuka chuan Vawra chu a rem lai laiah alo hnek ve siah siah mai. Vawra chuang engah mah ngai duhlo. Zamuka kawnga dawm bet chung chuan an thawh kan pui a. Chutah Zamuka chu chawi thutin a thal zawngin lei charah chuan an paih khu luih maile. Zamuka chu a thum awk a. A khuh kharh kharh a. Chutah lo tho chhuak leh in Vawra chu a rawn bawh leh nghal a. Chutia Zamukan Vawra a rawn bawh phei leh chiah chuan Vawra chu lo tawlh sawn zauhin Zamuka chu hnung lam aţangin a kawngah alo man chat a. Au tuarh pah hian an vawrh bin thawr mai le. Zamuka chu a tla thum leh awk a. A hnungzang a sawh nat em avang chuan a ze ţawlh ţawlh a. A ka leh a Hnar aţangin thisen alo chhuak ţhiam ţhiam a. Thawh leh mai a han tum a. Mahse a thei ta nganglo . Chutah thei leh theilo a Vawra rawn en chung hian," Tlangval,i chak ni rawh se. Tunah chuan min that thei tawh ang. Ka mi beih tawh azawnga dehkhirh ber ila ni" a han ti a. Vawra chuan," Chuti mai tur em ni. Thih ringawt hi in tan hian a tawklo deuh lo maw" a han ti a. Zamuka chuan," Chu zawng, i ngaihdan dan le" a rawn ti a. Zamuka chu leiah chuan a tlu thal uau mai a. A khat tawkin a khuh leh kharh kharh ţhin a. Vawra chuan," Tunah chuan i lu hi ka la anga. Ka chhungte minlo thahsak manah in khaw kawtchhuah ngeiah khian ka tar dawn ani" a han ti a. Zamuka chuan nui suk pah hian," Ka Chempui ngei sawm ka lu hi la ang che" ala rawn ti leh deuh deuh a. A tawpah chuan Vawra chuan Zamuka lu chu a lain a iptepuiah chuan an ak a. Zamuka tlangval hruai pakhat zawk chu alo la dam a. Mahse a malpuia Silaia kahna avanga a thisen ahloh hnem tawh em avangin alo dang bal tawh a. Vawra chuan ami thah lute chu lain ramhnuai lamah a lut leh ta a. Zamukaten Silai an rawn hawl chhuah pawh laksakin zan lama a chet chhunzawm dan tur chu a suangtuah neuh neuh a. Kawrte pakhat a zuk thlen thlak chuan tui te an in bawrh bawrh a. A hmai leh a taksa a hliamte chu an sil fai a. Kuttum a dawn hnem ve em avangin a lute chu a na bur mai a. Hahdam taka chawlh ngaihna awm heklo le. Hualtu khaw lan theihna tlang sang deuh lam pan chuan a kal leh ta a.
Hualtu khua chiang taka a thlir theihna lai a han thlen chhoh chuan Vawra chu an ţhu vang vang a. Chutih lai tak chuan khuaah chuan Silai apuak dur dur mai le. Vawra chuan mak a ti hle mai a,eng thil nge thleng tih en chian tumin thingkung pakhatah hian a han lawn a. An en nak chuan Suartui lal in kawtah chuan tlangval rual hian mipa pathum hi Se chaih hian an lo chaih a. Mipa pathumte chu hruia hling in an hnuk kual dawr dawr mai le. Chutih lai chuan lal chu leikapuiah a upate leh Suartui lal leh upate nen chuan an awm a. Suartui lam chu ţhingţhiin an kun tlawk tlawk mai a. Vawra chuan hmuh chian leh zual tumin khua chu an pan hnai deuh a. An au ri leh an sawite a hriat phakna tur hmun aţang chuan fimkhur takin an thlir leh ta a.Hualtu lal chu a au lauh lauh a," Suartui khu ka tlawm e. Ţhingţhi in chibai mi buk rawh se" a han ti a. Hualtu tlangvalte chuan an mi phuar pathumte chu an han kai thal tawp tawp a. Chutah Hualtu lal chuan,"Suartui tlangval phuba lak tum in awm em ni. Hei in tlangvalte hi in huaisen viau anih chuan rawn chhan ta che u" tiin an au lauh lauh a. Vawra chu a awmhmunah chuan a insehru ţeuh mai a. A chang leh Silai chuan an tin leh uaih ţhin a. A kah lah chuan midangin an tawrh belh zel a hlau tawh si. Tuna thil thleng pawh hi Hualtu tlangval alo thah avang anih angei a ring a. An tlangvalten an tawrh phah chu pawi a ti em em a. Hualtu lal chuan,"Suartui tlangvalte chu chhantu awmlo in fam khuaah an lawi dawn ta e" a han ti a . Chutah Hualtu tlangvalte chuan Suartui tlangval pathum an hnuhkualte chu feiin an han chhun thawih thawih mai a. Hualtu lal chu chapo takin a au lauh lauh reng a. Suartui lal leh upate bakah Suartui mi leh sa mana awmte chuan an tlangvalte thi tur chu lainat takin an thlir ngawih ngawih mai ani. A tawp nan ti niawm takin Silai chu van lamah an han kap puak leh dur dur a. Hualtu tlangvalte chuan Suartui tlangval pathumte chu an chhun hlum ta a. An lu tanin lal hmaah chuan an han dah a. Lal chuan Suartui lal hnenah chuan," Ka pawi sawi a hlauhawm zia hi han en teh le" tihel tak chung chuan a han ti a. Suartui lal erawh chu a ngawi reng thung. An tihtur ber an zawh takah chuan Hualtu lam pawh chu an ţin darha. Lal leh upate chu lal inah chuan an lut leh ta thung a. Vawra chuan an thil tihdan zawng zawng chu alo thlir renga. Va inlan sela a tan thih bak hmabak a awm silo. Zan lama phuba lak leh ngei tumin a rilruna siam fel ta a.
Khatia Hualtu pasalţha Zamuka leh tlangval pahnih an kal chhuah hnu khan lal Zangama chuan aupate hnenah," Ka tlangval thi tate sun nan Suartui tlangval kan ti hlum ngei tur ani" a tih avangin Suartui tlangval a man khawm zinga pakhat chu a kaihchhuah tir a. A tir chuan pakhat chauh thah kha a tum ani. Nimahsela khawdaia Silai puak ri an hriat hnu leh an pasalţha Zamukate chu an lo let leh talo tih an hriat khan lal chu a thinrim zual sawt a. A mi mante chungah a ţuan ta ani.
Chumi zan chuan Hualtu khua chu a reh ruih mai a. An khawchhung boruak chu a ralmuanglo em em ani. Khua a awm chu an tan a him tawhlo tih hre mahse chhuahsan lah thil hlauhawm tak ani lawi si. Hualtu lal leh upate chu lal inah an ţhu ţhapa. Chutih lai tak chuan tlangval pakhat hi alo lut hlawl mai a. Tlangval chuan," Lal pa, tun mai khan kan pasalţha Zamukate lu chu Sepui no hruai pakhat lo haw tlai deuh nghawngah an rawn ţawn bet ani" a rawn ti ta. Lal Zangama chu a thinrim em em a,tih theih lah anei silo. Lal ina vei kual thauh thauh pah chuan," Kan mi tenawm ho chu. An hmel in lan ngam silo in a him chin aţang chauhin maw min beih ngam a. Naktuk khua lo var rawh se. An hmuh lai ngeiin an mi leh sate hi rawng thei ang berin ka ti hlum dawn ani" a han ti a. Khawnbawl upate pawh chuan an thinrim zia chu anlo auchhuah pui ve bawk a . Thinrim eng ang mahse an ralte an hmuh theih miau loh avangin tihngaihna a awm silo. Lal Zangama chuan," Min rawn beih tum tute hi engzah chiah nge annih kan hrelo a. Fimkhur thilah ralveng indah nghal angai ani" a rawn ti a. Upa pakhat chuan," Lal pa,kan khaw pasalţhate heti em em a lo hnehsawh tu hi tunge maw anih ang le" a rawn ti ve a. Lal chuan," Mi pakhat thil tih ani hauhlo ang. In mal beih a ralah chuan Zamuka hneh thei tur ka hrelo. Alo beitu hi mi pakhat anih pawhin a lo lambun ani ngei ngei ang. Ka pasalţhate lu chu min han lak ula. Ralveng pawh kan in dah nghal tur ani" a han ti a. Tichuan tlangvalte chu lal thupek keng chuan an kal ta a.
Zanlai Ar khuan hun pelh hretah chun khaw mawng lama in pakhat chu a kang ta hluah hluah mai le. In neitute chuan ral ho hal ngei annih ringin," Ral ral ral" tiin an au vak vak a. Tlangval ral venga awmte chu in kang ţhelh mit tur chuan an tlan khawm ta sung sung mai . A in awmna hi khaw hmawr lam deuh ani a. In thlang lam chu ram vek ani tawh ani . In chu a kan nasat tawh em avangin ţhelh mih rual ani tawh lo a. Tu hal nge tih an inzawt kual sup sup a. Chutih lai tak chuan ram lam aţang chuan Silai alo puak pawp mai a. Tlangval pakhat chu a thal nghal a. Hualtu lam pang pawh chuan Silai ri lo chhuahna zawn lam chu an pawng kah chiam mai a. Mahse eng thawm mah hriat zui tur a awmlo. An ţhianpa thal reng chu an han bawisawm nghal a. Chutia an buai nak nak lai chuan an sir lam deuh aţangin Silai alo puak leh dur a. Tlangval pakhat chu a thal leh tawp a. Hualtu tlangvalho chu mei eng chuan an mit a ti vai vek a. Hla hmu thei heklo le,Silai lo rikna lam chu an pawngpaw kah leh ta chiam mai a. Eng thawm mah hriat zui tur a awm leh talo. Mei pawh a rem ţan lek lek tawh a. Silai a puah takah chuan khaw mipuite pawh tumah muhil thei reng an awm tawhlo. Run an tawk ngei ah ngaiin lal in lamah chuan an tlankhawm vek a. Chutih lai chuan Hualtu tlangvalte erawh in kang awmna lamah chuan an tlankhawm zel a. Meichherte siamin Silai lo rik chhuahna lam chu pan mai an han tum a. Val upa pakhat chuan," Tumah khua chhuahsan loh tur. Kan hmelmate hian kan chetdan zawng zawng an hmu vek a. Lu kan hloh belh mai mai zawk ange" a rawn ti a. Tlangval rual pawh chu thinrim hle mahsela an val upa thu chu an hnial ta biklo a. An ţhian thi tate ruang chu lal mual lamah chuan an zawnchho a. Ţhenkhatin Silai kah inring sa rengin ruang zawn tute chu an lo veng ve bawk a. Chutia khaw mawng lama an ţhiante ruang buaipuia an awm mek lai chuan Hualtu khaw hmar lama in pakhat chu a rawn kang kai leh ta tlat mai. Val upate chuan an tlangvalte chu in kang lam pana kal tawhlo turin leh lal mual lama ţan khawh mai turin an ti ta a. In kang chu a nasa tial tial a. A bul hnaia indang pakhat chu a kang kai ve leh a. Hualtu lam chuan khua a kan kai mai hlauthawng takin lal mual lam aţang chuan anlo thlir tawp mai a.
Hualtu lam hi kum hmasa lama run tawk tawh annih vang leh Suartui khua runa thawk chhuak zo hlim hlawl anni a. An tlangvalte leh patling tamtak an hloh a. An tlangvalte kaihruaitu ber an pasalţha Zamuka lah tu tih hriatlohten an lo thah sak tawh bawk nen. Hualtu tlangval la dam awmchhunte hi za rual zet bak anni tawhlo a. An pasalţha leh tlangval dang pali an khawdai maia an thih mai bawk si avangin tuna an khaw hal mek tute pawh hi an bawh buan buan ngamlo a. Lal mual lamah chuan khua an lo luh hun changin an lo in ralring ve tawp mai a. Mipui zawng zawng chu lal in leh a chheh velah chuan an tlim hmur a. Tlangvalte chu lal muala in ding chhehvelah chuan an in zar pharh thung.
Hualtu lal Zangama chu a beidawng ru riau tawh a..A sal man te chu thah vek law law mai te a duh rum rum a. Mahsela nungdama ala dah khan an tan inphenna remchang a siam sak ve thung bawk si. Lal inah chuan beidawng rilru tak chung chuan a vei kual a. A rilruah chuan remna siampui mai chu ţha a ti a. Mahse chuti maia han tlawm lah chu a hreh ve tho bawk si. Chutia a vei kual lai chuan a fanu Rengpuii chuan," Ka pa,engvangin nge remna kan siampui mai loh ang. Kan inrem tawh hnu chuan min that em nang" a rawn ti a. Lal pa thinrim beidawn bawk si chuan," Nanga hmeichhe lo inrawlhna tur a awmlo e. Lo ngawi mai mai rawh. In pek ai chuan kan thi vek anga nimai" alo ti ţeng tuarh a. Lal fanu chuan zam miahlo hian," Ka pa,nunau pawisawilo tamtak pawh an thi tel dawn asin. Remna siam hi dawihzep nihna ani hlei nem. Kan tlangvalte pawh an zahawm zozai tawh ani" a rawn ti leh a. Lalpa chuan chhang ta lemlo chuan a upate hnenah,"Khawvar thleng kan inveng thei tur ani. Tumah tlanchhiat loh tur. Helaiah hian a ţul chuan kan thi vek mai ang" a ti piap piap mai a. Lal upa pakhat chuan," Lal pa, dam khawchhuah dan dap mai hi aţulin ka hre tawh ani. Heti ringawt chuan kan mang ţhak thei dawn a. Nungdama ila awm chhung chuan i unaute tan pawh phuba lakna remchang a awm thei zel dawn a. Nang ber i thih chuan i unaute tan kan hmelmate beih chhan tur a awm nep sawt dawn ani" alo ti a. Hualtu lal chuan,"Kan inpe lovang. Tlangvalte saw tawlh hauhlo turin va fuih rawh u" a ti leh a. Tichuan an tlangvalte fuih phur tur chuan lal khawnbawl pakhat chu a chhuak ta a.
Chutih lai chuan khaw mawng lama in pakhat chu a rawn kang leh ta hluah hluah mai le. Tumah kang ţhelha kal thei an awm tawh silo a. Tlangval ţhenkhat thinrim bawk ,tlawmngai lutuk chuan khaw mawng lam chu an pan leh ta tho a. In kang chuan in dang a man zel loh nan a hnaih ber tu in chu an zuk ţhiat mawlh mawlh mai. An rinloh tak maiin ral ho thawm chu a reh ţhap mai. Chutia khaw mawng lama in ţhiata tllangval ţhenkhat an buai mawp mawp lai chuan lal mual sir lam thim chin aţang chuan Silai alo puak leh dur mai a. Hualtu tlangval Silai keng pakhat chu a thal leh tawp mai. Chu veleh Hualtu tlangvalho chu anlo inthurual lawk emaw tih tur ang hrimin haw haw chungin Silai puahna lamah chuan an tlan phei ta sup sup mai le. Ţhenkhatin an Silai ken chu an hmet puak pawp pawp a. Chuti teh thut a an rawn um chu a lo rin bikloh avangin Vawra pawh hmanhmawh bak lengin ram lam panin a tlan ta nghal a. Hualtu lam Silaimu chuan a rawn fuh thawi thuak thuak mai lehnghal. Hualtu tlangvalten Vawra awmna lai vel an lo thlen phei meuh chuan Vawra chu ram lamah amah rawn umzui fal an awm leh awmloh thlirin a lo ţhu ran tawh a. A thih teuh zia an ngaihtuah a,amah chauh chuan a nui ver ver mai a. Hualtu lam chuan tumah an hmuh loh avang chuan beidawng takin lal mual lam chu an pan khawm a. Zan khat lekah an tlangval pathum lai mai an hloh ta. Val upa pakhat thinur chuan anmahni rawn bei tute hriat ngei atan ti niawm tak hian," Dawihzep ho. In mi leh sate hi kan that vek dawn ani. In ngam chuan rawn inlan ta che u" a ti lauh lauh mai a. Vawra chu abihrukna ngaiah a la awm renga. Ama hriat tawk lek hian," Zanin atan chuan a tawk ta e" a ti sap a.
Suartui khaw dai a Damzawl lamah ve thung chuan Ramliana thirim chu a in hrosa nasa mai a. Vei kual thauh thauh pah chuan,"Kan puih loh che u in hlauh avangin dawt min hrilh amaw. Thudik hria ni ila chuan tunah hian Vawra pawh mahni chauha thi turin a kal bik tawp lo tur" a ti khur khur mai a. Suartui mi leh sa la dam awmchhun,an chhungte an thi vek tawha an rin thu lo hrilh tute chu an ngawi ţhap mai a. Ramliana bawk chuan," In lal Lianvunga chuan min duh tawhlo in min hnawt chhuak a. Mahse in tan a athim avar thlu lo a lo bei fotu ka nihna angin kan mi leh sate chhan chhuak tur chuan kan kal ang" a han ti a. Tichuan Ramliana chuan Sawivela leh Lungchuan pasalţha Chungthanga hnenah chuan," Tunah chuan Vawra chanchin engmah kan hrelo a. Ral kutah a thi tawh pawh ani thei. Sawivela nen hian kan va kal ang a. Midang zawng chuan Helai a awmte hi in lo enkawl dawn nia. Vawmaia lo thlen hunah thil awmzia ţha takin lo hrilh ula. HLliappui lal Hauthanga chuan a unaupa chhanchhuak tur chuan a tlangvalte a rawn tir ngei anga. Min rawn umzui dawn nia" a han ti a. Chungthanga chuan," Kei leh ka tlangvalte pawh kan lo kal ange. Ngaihtuah ngai an awmloh hi. Min dan tum buai duh suh ang che u" a rawn tive a. Rem te an ruat fel hnu chuan tlangval pahnih hnutchhiahin Ramlianate chu Vawra umzui tur chuan Hualtu lamah an kal liam ve ta nghal a. Lungchuan pasalţha Chungthanga leh a hote pariat laiin an zui ve bawk ani.
Bung-42
An zan lam thil tawnin zir mawlh heklo le. Hualtu Khaw mipui ho chu zing khawvar hnu thleng pawh chuan lal in tualah chuan an la tlim hmur mai a. Vawra lah chu khatia Hualtu khua ava beih hnu khan a him chin tura a rin lam panin akal nghal a. Khua aţanga hla deuh taka thingkung pakhatah thlamuang takin a mu heuh heuh mai si a. Lal in leh a vel chu zun ram thiarnana an hman miau avangin a hing uih hmuk tawh mai ani. Lal leh upate chuan chutiang reng chuan an awm thei dawnlo tih hriain mipuite chu an in lama haw turin an han ti a. Tlangvalho chuan vengin mahni in lam ţheuh panin an kal darh ta sang sang a. Reiloteah chuan khawchhung intin aţang chuan dan pangngaiin meikhute pawh a zam chhuak leh chiai chiai tawh a. Naupangho pawh tuallaiah infiamin an in um kual leh zawr zawr tawh mai.
Mipui an haw darh hnu chuan lal leh upate chu lal inah chuan rorelin an ţhu khawm laih mai a. Lal khawnbawl pakhat chuan," Lal pa,hei zanhnih lek chhungin kan tlangval pariat lai mai kan hloh tawh a. Kan hmelma ho lah chu tute nge annih pawh hriat theih silohin an bi bo hman zel mai a. Hetiang ringawt chuan an duh hun hunah min rawn phil mai dawn a. A tawpah chuan min hneh chhuah ngei ngei dawn ani. Chuvangin inremna siam mai hi aţha tawhlo maw. Kan tlangvalte pawh an hah lutuk tawh ani" tiin a ngaihdan arawn sawi a. Lal Zangama chuan tlawm mai zawng ala tum hauhlo. A Vaibel pak khu tual tual pah chuan," Mi dawihzep thusawi ang maia i sawi le. Vawiinah kan tlangvalte hmelma hnu chhui turin kan tirchhuak anga. Min rawn beitute hi kan um darh vek dawn ani. Tunah chuan phuba lak hun chiah ani. Ka tlangvalte chu hmun thumah in ţhenin zan lama ralin minlo beih ţanna aţang khan va chhuizui nghal rawh se" a han ti a. Lal thu hnial ngam ni heklo le. Lal upa pakhat chu Zawlbuk lama val upate be turin a kal chhuak ta nge nge a.
Lal thuchhuak an han hriat chuan Val upate leh tlangvalte chu an phun deuh mur mur a. Val upa pakhat chuan," Awle,a sawi chuan kan insawifel zo dawnin alang lo e . Kan lal duhang chuan tlangval sawmpanga kan thlangchhuak anga. Chungte chu panga zela hmun thuma inţhenin zan lama beih kan tawhna hmun ni awma kan hriat aţangin kan ral te hnuchhui chu kan ţan dawn ani" a han ti a. Tichuan tlangvalte chu panga nga in an han ţhen a. Mi pahnih zelin Silai an keng bawk a. An kal dan turte an rel fel hnu chuan khawdai lamah chuan an inzui chhuak ta a . Vawra chuan Hualtu tlangvalte ram lam pana kal mek chu ralkhat aţangin alo thlir reng a. A tan pawha beihna hun remchang a awm palh takin tiin lal in sir lam muala tlangval panga kal liamta te umzui tur chuan a liam ve ta nghal a.
Hualtu tlangval pangate chu an khaw pasalţha Sa kap thei ve deuh hlek pakhat Tlangkhuma hoin lal in mual sir a ramngaw hnuaiah chuan an hmelhmate chetna hnuhma zawngin an vak kual a. Vawra chuan alo thlir reng a. Khua ala hnaih em avangin han beihna chi ala ni silo a. Khua aţanga hla thei ang bera hruai chhuah phawt chu ţhain a hre ta a. Tichuan tlang pang awih deuh hlek,Hualtu ho awmna mual ep chiahah chuan akal chho a. Thui fe a kai chho hnu chuan a hmelmate hriat ngei turin mau an sat ri chhak chhak mai le. Hualtu tlangvalte chuan an ep chiah muala thil sat ri leh chhak chhak thawm an hriat chuan an hnuchhui lai chawlin thawm chu hriatchian leh zual tumin an beng an chhi kar mai a. Thil sat ri thawm chu a khat tawkin a ri leh chhak chhak ţhin a. Mau ler lam che laih laihte chu an hmu thei bawk a. Tlangkhuma chuan," Tu emaw chu an awm ani chiang mai. Kan khaw mi tumah chhuak vak an awmlo a. Kan hmelmate annih ngei hmel khi. Rin ai daihin an rawn ngampa mai ka ti. Tirawh u a rukin i veh chho ang u" tiin a naute chu an awmna ep mual mawng lama chhuk tur chuan a han ti a. Tlangval pakhat chuan,"Kan hmelmate hian min bum kual mai mai anilo maw. Tunah pawh hian minlo chang reng thei a" a rawn ti dek dek a Tlangkhuma chuan,"Kan chhuizui ngamloh an ring ani zawk ange. Thawm an dimlo em mai. Mi pakhat chauh thawm niin ka hria" a lo ti vat a. Tichuan tlang bawk lama ral ho thawm nia an hriat chhui tur chuan tlang bul ţhut aţangin an veh chho ta a.
Vawra chuan a awmna lam pana Hualtu tlangval lo chho mekte chu alo en reng a. An hriat phak ngei tur chuan a khat tawkin an khuh leh kharh kharh ţhin a. Tlema tlang pang chho ulh lai deuh hlek an lo thlen veleh ah lo kah chu a tum ta a. A Silai pakhat chu Thingbul pakhatah an tung phawt a. Silai pakhat zawk chu a piah thing dang bulah an tung ve leh thung a. A hmelmate kah nuam tawka an awm hunah thingbul pakhat aţang chuan lo kapin a Silai a kah ruah veleh lehlamah tlan pheiin Silai pakhat chuan a kap leh thei dawn ani. Hualtu tlangvalte chu muang changin anlo chho zel a. Silai keng pahnih chuan hma hruaiin tlema inhlat deuh hlekin an lo chho a. Midang pathum chu hnung lam deuhah an kal thung. Tlang pang awih deuh hlek lai,thing hmun hnuaia an rawn chho mek lai chuan Vawra chuan an hmahruaitu deuh ber mai Tlangkhuma chu anlo kap thawr mai a. Tlangkhuma chu hlawm nghal tawpin thlang lamah a lum thla zui a. Vawra chu a Silai dahna pakhat zawkah chuan a zuang phei nghal a. Chutih lai chuan thlang lam aţangin Silai alo puak ve dur a. Vawra awmna hmasa zawk thing chu a rawn deng khem hawk mai. Silai a puah zawh meuh chuan Hualtu lam pawh an sahimnan thing bul phenah an biru far mai a. Vawra pawh chuan kahna hun remchang a hmu thei mai biklo. Hualtu lam chuan anmahni rawn kaptu chu pakhat chauh ani tih an hria a. Mahse an hmuh theih mai bikloh avangin an bawhchilh ngam chuanglo a. Chutia a nghah reng chuan khawchhung lama Silai ri lo hre phak ten an rawn nangching hman dawn ani tih hriain Vawra chuan bihrukna sir deuha lung tum lian fe fe mai chu an tlawh lum ta a. Lungtumte chu thlang lamah chuan a lum thla rum rum mai a. Vawra chuan a him chin aţang chuan lung dang pawh a tlawh lir zel a. Lung tum lian fe fe mai hu a lum thla rum rum mai a. Hualtu ho bihrukna zawn a zuk thlen chuan tlangval pakhat chuan a dinhmun a himlo tih hriain an lo tlan sawn zawk a. Chutak chu Vawra chuan alo hmu kar mai. Thing dang phena bihruk tuma a tlan phei lai tak chuan Vawra chuan uluk taka tinin an kap leh thawr mai a. A kap ţhelh lo ani ti chiang turin Hualtu tlangval chu a ţe ţhawt a. Thlang lamah chuan a hlawm thla awk mai a. Vawra chu a bawkphek nghal a. Chuti nilo se zawng Hualtu lam Silai mu chuan a rawn ţhelh bik hauhlo ang. Vawra chuan in saseng hun ani tih hriain a Silai pahnih chu la in a tawlh chho hret hret a. Hualtu lam chu an awmna ngaiah an la awm renga. Vawra chuan an chezia ngaihchan pahin Silai hlo chu a sawh muk leh sauh sauh a. Silai rikna a rei deuh tawh avangin Vawra chuan Hualtu lamin an rawn hual bet thei tih hriain tlangah chuan a tawlh liam thla ta zawk a.
Hualtu tlangvalte awmlohna lamah chuan Vawra chu a tawlh liam thla zel a . Nakin deuhah chuan a awmna thlang lam aţang chuan thawm alo ri chho rak rak ta mai. Vawra chuan eng thawm nge anih tih chian tumin uluk takin thlang lam chu an thlir a. Nakin deuhah chuan a awmna lam pana Hualtu tlangvalho fimkhur taka lo chho ţhem ţhem chu a zuk hmu ta. Hualtu lam chuan hual beh an tum ngei ani tih Vawra chuan a hre thei ta. Khatia Lal mual sir lam ramngaw a Silai a puak tih an hriat khan Hualtu tlangval hnuchhui tura hmun danga kalho chu Silai rikna lamah chuan hmanhmawh takin an tlan nghal a. Silai puahna kha tlema a han san ve deuh avangin a tlang bul ţhut lam aţanga in sem darhin an hmelmate chu hual beha ,chimih barh an tum hi alo ni a. An vanneihni anilo nge ni,an hmelmapa Vawra chuan alo hmu hmasa hlauh si a.
Hualtu tlangvalte chu an lo hnaih chho zel a. Vawra chu in relhrukna tur zawngin a buai ta viau mai. An rawn hnaih chho tak tak hmaa a bikbo vat loh chuan an tan tlanchhuahna kawng a awm tawh dawlo tih a hria a. Hmanhmawh takin a piah deuh hleka awm kawrte lamah chuan a kal phei ta a. Kawrte a va thlen chuan a vanneih a siamin lungpui lian zet zet mai hi alo awm hlauh mai a. Mahse chung lungpuite phenah han bihruk chu a tan chuan a him chuanglo ani. Kawrte chu fimkhur takin a zawh thla ta a. A hniak an hmuh mai lohnan lung chungah zel a kal a. Chutia lui a zawh thlak zel lai chuan a lui zawh a vek chu Hualtu tlangval pahnih hian an rawn zawh chho ve ta tlat mai le. Kawrte kalsana hmun danga han kal na hun awm tawh heklo le. Kawrte kama changel leh Kangţhai hmun in pawlh nuai karah chuan a hnu hma lang theilo ang ber turin a kal phei a. Changel hnah ro uai duah karah chuan che miahlo a dingin a in hliah khuh thei ta hram a. Changel hnah ro chu an hainkhawm belh a.Changel bulah chuan a langlo thei ang ber turin a ding khawng ta at mai le. A rawn chhuitu te hian a rim an hre thei anih ngawt loh chuan an hmuh mai chu a rin awmloh ani. A duh ang thala a in hliahkhuh hnu chuan Hualtu tlangvalten an kal pelh hun chu a nghak ta tawp mai ani.Hualtu tlangvalte chu an lokal chho zel a. Vawra awmna zawn an rawn thlen hnu pawh chuan engmah hrelo niawm tak hian an kal tlang chho ta zel mai a. Vawra chuan pahnih chauh ni sela zawng a hlau hauhlo a. Mahsela in hnaih tete a lokal chho annih avangin pahnih a beih chhungin midang anlo pun belh thuai anga. A chan chuan Maian chan pawh a tluk dawn lo ani. Hualtu tlangvalten an kal pelh fel hnu chuan Vawra chu midang an awm leh awmloh ngai changin rei vaklo chu an la biru leh a. Thawm engmah a hriat zui taklohah chuan a bihrukna aţanga chhuakin fimkhur takin kawrte chu a zawh thlak chhunzawm ta a.
Hualtu tlangvalte leh an valupate chu tlang bawk hmun zawl deuh hlek laiah chuan an in tawk khawm ta rum mai a. Tumah rengin an ralte hmel an hmu hauh silo. A hmu hnai ber tute lah Vawran lung a lum khum hrep te kha anni a. Tlang bawk hmun nuam lai deuhaha chuan an ţhu khawm a. Mak an tih thu an sawi sap sap a. Chutih lai chuan Vawran a kahte zinga tlangval pakhat chuan," Min rawn beitu kha pakhat chauh ani. Mahse Silai chu pakhat aia tam chu a keng ngei ang. Minlo kah hmasak avangin kan tan chet ngaihna a awmlo a. Chu achhapah lung min lum hnan hrep lehnghala a. Mi pahnih kan inhloh phah ta reng ani. A pawi kati khawp mai" a rawn ti a. Val upa pakhat chuan," Pakhat mai ani tih i chiang maw" alo ti thuaiba. Tlangval chuan,"Chiang tehreng e" alo ti mai a. Val upa bawk chuan,"Tlang hi kan tuam chhuak vek ani sia. Tu emaw hmazawnah chuan a put chhuak ngei ani. Min bum fo tawh hauhlo ang. Khawnge a hniak in chhuizui leh reng reng ang u hmiang" a han ti a. Tichuan an hmelmapa hniak chu an han zawng a. An inkah nalai aţanga chhui zelin a tawpah chuan kawrte kam lungpui awm thluahna hmunah chuan a hniak chu an hloh ta a. Val upa pakhat chuan,"Kawrte ah hian kan chhuah anih hi. Kawrte hi a zawh thla ngei anga. Tunah chuan minlo thlir leh veng veng tawh zawk maithei ni. Khaw lamah i kir leh phawt ang u" a rawn ti a. Tlangval pahnih kawr rawn zawh chho tute chuan," Kawrah hian tumah kan hmulo ani. Kawrah lo chhuk nise kan in tawk ngei ang" alo ti thuai a. Val upa chuan,"In hmuh lai ngeiin a tlanchhiat in ring ami. Tunah chuan kan ţhiante ruang hlawmin khaw lamah kan let phawt ang" a rawn ti a. Tichuan Hualtu tlangvalte chuan an ţhian thi ta te ruang chu hlawmin an khaw lam pan chuan an kal leh ta a.
A tlangvalte hlawhchhamin anlo haw mai bakah ruang pahnih lai mai an lo zawn haw bawk avang chuan Hualtu lal Zangama chu a thinrim hle mai a. Lal inah chuan a in hrosa kuk kuk a. A sal man te chu thah mai a rilruk tawh a. Mahse a upate chuan an la dang thei hram hram ani. Zangama chuan,"Vawiin hian engkim kan chingfel tur ani. Ruahmanna fel tak siamin zaninah chuan kan rek chhuak tawh ang. Kan sal mante hi tawktarhah kan hmang anga. Vawikhat min rawn kah chuan a rulh let nan kan mi hrente hi kan kap hlum zel anga. Chuti chung pawha min la kap zel anih chuan an lal leh upate hi thahah kan vau mai dawn nia" a ti a. Val upa pakhat chuan," Lal pa,kan mi beih hi pakhat chauh ni maiin ka hria. Vawiin a kan hual pawh khan mi pakhat hnuhma chauh ani kan hmuh ni" a rawn ti a . Lal chuan," Chu mi pakhat hlauin meikhup zul zul in inlo tlanchhia ani maw. Keimah ngei hian bei tawh ila a ţha ange" alo tih khum a. Midangho chu an ngawi ţhap a. Lal vek chuan,"Ka sawi ang khan zaninah chuan kan mi man te hi kan that zel tawh ang. Tin, kan khaw mi lehsa te hi lal mual lam hnaih inah kan riah khawm tir anga. Khaw hmawr lama inah te chuan kan sal man te hi phuar hlawm chungin kan dah thung ang. Tichuan in an rawn hal apiangin an khaw mi leh sa an hal tel zel dawn ani" a rawn ti a. Midangho chuan an lal remruatna chu thil tihawm tak ni a hriain an lal chu an han fak luama.
An lal remruatna angin zanriah ei kham veleh chuan Hualtu tlangvalte chuan an khaw mi leh sate chu lal in hnaih lamah chuan an suan chhuak a. Suartui khaw mi leh sa an mante chu khaw hmawr lama inah te chuan phuar hlawm sa in an dah ta thung a. Lal Zangama chuan khaw hmawr lama in ţhenkhatah chuan Suartui tlangval a man sa te chu a phuar khawm tir a. Lal chapo ve tak ni mahse nunau engmah tithei hlei lote thlenga han tih hlum tel mai chu a duh bik lo ani. Tichuan Hualtu tlangvalte chuan Suartui tlangval an man khawm sa te chu in khatah pathum zelin phuar hlawm chungin an dah zel a. An auchhuah loh nan an ka an hnawh sak vek bawk a. Leng hawn Ar a khuan meuh chuan an lal remruatna ang chuan engkim an ti fel vek tawh a. Tlangvalte chu lal mual lamah chuan kal khawmin ral lo lan hun chu an nghak ta a. Lal Zangama chuan a remruatna chu fuh hle a a hriat avangin hlim takin lal inah chuan a upate nen zu an in ho a . An thiltih dan zawng zawng an hmelma pain alo hmu vek ani tih hria se zawng hlim takin a awm hauhlo ang le.
Zan lai arkhuan pelh hnu thleng pawh chuan eng thawm riva mah a awmlo a. Hualtu tlangvalte erawh inring takin lal mual lamab chuan an vei kual reng a. Chutih lai mek chuan Vawra pawh Hualtu khaw chhungah chuan a lut ţhem ţhem a. Hualtu tlangvalten Suartui tlangvalte khaw hmawr lam ina an khalh luh lai kha alo hmu reng mai a. Fimkhur taka kal zelin an khaw tlangval ho an dah khawmna in hmasa ber ah chuan a lut ta a. A thim vek avangin engmah a hmu theilo a . Inchhungah chuan vak pheiin an khaw tlangvalte awmna zawn awm vel chu a dap phei a. An dap phei zel hnu chuan bang kila tlangval lo inphuar hlawm te chu a va dap fuh ta a. A phelh hma chuan," Suartui tlangval Vawra ka ni e. Ka phelh dawn che u a. Tumahin thawm chhuah hauh suh ang che u" a han ti a. A phelh zawh chuan Vawra chuan,"Fimkhur takin chhuak ang ule" a han ti a. Vawra chuan an chhuah pah chuan Banglaia fei in thiat chu a han dap fuh a,Chempui pakhat lo awm nen chuan a la ta nghala. An chhuah hnu chuan Vawra chuan thil awmdan an hrilh fiah a. An khaw tlangval pathumte hnenah chuan," Khaw hmawr lama inah zel hian fimkhur takin lut ula. Kan ţhiante kha han chhanchhuak zel ula. Kan in chhanchhuah vek hnuah in hi kan hal daw nia. Tin,hmanraw awm ang ang kha rawn la zel bawk ula" a han ti a. Tichuan an vai chuan inţhendarhin an ţhiante chhanchhuak tur chuan an kal ta a.
Khuan hmasa a khuan meuh chuan Suartui tlangval sawmli rual vel zet mai chu Hualtu khawdaiah chuan an ding fur mai a. Suartui tlangval zingah chuan Vawra ţhianpa Vanzaua alo awm ve hlauh mai. Vawra chuan ," Zaua,dam a ka hmu leh thei che hi ka va lawm ve. Ka chhugte chanchin engemaw hriat inei em. An la dam ve em ang chu maw"?" tiin ahan zawt a. Vanzaua chu angawi reng a. Tlangval dang lo awmve tepawh chuan engmah sawi an tumlo. Vawra bawk chuan,"Zaua,engkim min hrilh rawh. Zep tur a awmlo e" a rawn tih leh takah chuan Vanzaua chuan," U Vawr, in zinchhuah hnu lawk khan kan lal chuan i chhungte kha a hnawtchhuak vek ani. A chhan engmah kan hrelo a. Mahse kan lal chuan chhuak turin a ti ta tlat mai si a. He lai i hmel ka hmuh khan mak ka ti em em a. Engmah ila hrelo em ni?" a han ti a. A chhungte Suartui lalin a hnawtchhuak daih tawh tih Vawran a hriat meuh chuan a thinrimna leh a lawmna chu a in zat vel awm e. Vawra chuan," Engkim min hrilh avangin ka lawm e. Tunah chuan Suartui lal tan niloin a mipuite tan ka bei dawn ani. Tin,Suartui lal hi engenaw zirtir hlek angai ani. Tlangval panga in khaw hmawr lama in te hi in rawn hal anga. A bak zawngin lal in hnung lam aţangin lal in khi kan luhchhuah dawn ani" a han ti a. Tlangval pakhat chuan," Vawra, tunah chuan engkim i hre tawh a. Ka tana ila bei duh hi a mak hle mai" a rawn ti a. Vawra chuan," Ka sawi tawh kha. Kei chu in lal chungah chiah hian ani ka ţuan dawn ni. Hun kan nei tamlo ania. Khaw hmawr lama in zawng zawng rawn dep kai vek ula. An lal kan man meuh chuan an inpe ve mai turah ngai ang. Silai pahnih chauh kan nei a. An lal man hi kan tum hmasak phawt angai ani. I kal tawh ang ule" a han ti a. Tichuan Suartui tlangvalte chu phuba la turin Hualtu khaw lamah chuan an let leh ta a.
Khawfing chah hma hret chuan Hualtu khaw hmawr lama in panga lai mai chu a rualin a rawn kang kai ta mai le . Hualtu lam chuan mak an ti ta em em em a. Hualtu lal Zangama pawhin mak ati ta hle mai a. A val upate chu koin,"Mi pakhat chetna hnuhma chauh kan hmu in ti ni lawm ni. Engtia a ruala in panga kang kai theih nge anih" hlauhthawn hmel tak chuan alo ti a. Val upate chuan," Lal pa,vawiin lama kan hmuh chu mi pakhat chetna hnuhma ngei chu ani a lawm. Engmah kan hrethiam bik lo ani" an lo ti a. Chutih lai chuan in dang chu alo kangkai chho ve zel a. Lal Zangama chuan," Tumah tlanchhiat loh tur. A tawp rak thlengin kan bei dawn ani. Suartui lal leh upate kha pawnah kai chhuak ula. Leikapuiah sawn din tlar tir ang che u. Ral ho anlo hnaih viau hunah kah hlumah kan vau dawn nia" a han ti a. Tichuan tlangvalte chuan Suartui lal leh upate chu lal in leikapuiah chuan an rawn hnukchhuak ta nghal a.
Suartui tlangvalte chuan in chu an hal darh zel a. Lal Zangama lah chuan," An duh leh hal zel rawh se. An mi lehsa ye an hal hlum zel ani mai. Kan tan thil ţha ani zawk ang" a lo ti vei ngut ngut a. In chu alo kang chho zel a. In hnaih te te a sak anih hlawm avang leh thing leh mau hmanga sak anih avang chuan a in man kai chak hle mai a. Reilote ah chuan lal mual pawh a rawn hnaih chho ta hle mai. Hualtu khaw mipuite pawh zan hmasa lam ang bawkin lal in lamah an rawn tlankhawm leh a. An tlangvalte erawh ral ho lo lan hun nghakin inring takin an lo awm thung. Mahse an beisei loh tak maiin ralho hmel reng reng alo lang lo . In zawng zawng a kang mai dawn a alan takah chuan tlangval ţhenkhat chu in kang zel tur vengin an kal a ngai leh ta. Chutia in kan na lam hlir ngaihtuaha an thlir mek lai chuan lal in hnung lam,a thim chinah chuan Suartui tlangval sawmthum rual zet mai chu Vawra hoin lal ina luh ruk tum chuan hun remchang nghakin an awm ţhup mai le..
Bung-43
Hualtu khua a in tam zawk chu mei chuan a man kai tawh a. In tam tak chu a kang sen zuaih zuaih mai le. Nu nau hlau thlabar mangang chu an khek chel chul mai a . Lal in tualah chuan an in hawr khawm zel a. Hualtu tlangvalte chuan khua a in zawng zawng chu a kang zo takngial dawna an hriat avangin in lo kang zelin a in dang a man kai tur chu an theih ang angin an veng a . Lal leh upate chu La in tualah chuan rawn dingchhuak vein an khaw in kang sen zuaih zuaih mai chu ngawi rengin an thlir tlawk tlawk mai. Lal Zangama meuh pawhin chutiang thil chu a beisei phakloh anih avangin engtia hma han lak zel tur nge tih pawh a ngaihtuah thei rihlo. A thinrim tihngaihna hre bawk silo chuan a tlangval leikapuia Suartui lal leh upate Silaia tin chunga ding reng te hnenah chuan," Khang mite kha rawn hruai thla rawh u. Tual lei harah hian ţhinţhit tir ula. Ka khaw kan ral rual hian an liam ve nghal tur ani" a han ti a. Tichuan tlangvalte chuan Suartui lal leh upate chu rawn hruai thlain lal in tual lei char ah chuan an ţhingţhit tir rawp a. Hualtu khaw kang mek lam chu an hawi tir a. Lal Zangama chuan,"En rawh u . Zanin hi in tan chuan zan tawp ber ani dawn ani. Ka khaw kang mektu Meipui mih rualin in liam ve nghal ang" a han tu leh a. Khawnbawl upate chuan khaw mipuite chu an lo thlamuan a. Hualtu tlangval tam zawk chu in kang zel tur veng chuan an buai a. Lal in veng tura an ruat tepawh in kanna lamah chuan an tlan thla zo a. An ralte lahin eng thawm mah an rawn neihzui loh avangin khaw hal ringawt chu an tum annih an ring tawh a. Mahse chu zawng an tisual chhiava ani.
In kang ringawt buaipuia an hmanhlel lai chuan tumahin lal in lampang lo ngaihsak em em hman heklo le. Suartui tlangvalte chu Lal in hnung lam aţangin lal inhnuaiah chuan an rawn vak lut sap sap a. Vawra chuan hma hruaiin an vai mai chuan Chempui an hum ţheuh a. An chetsual palh hlauh takin tiin thim chinah chuan Silai keng pahnihin anlo veng ve thung a. Hualtu lal leh a khawnbawlte chu lal in tualah,mipuite nena in chim buai siloin ,tlema lal in hnaih lamah chuan an ding ţhap a. Chutia inkang lampang hlir thlir a an din ţhap lai chuan vawilehkhatah lal in hnuai aţangin Suartui tlangvalte chu Chempui nen anlo dawk chhuak zawk zawk mai a. Hualtu lam lahin chutiang thil a thlen beisei heklo le. Vawrate chuan Hualtu lal leh upate chu Chempuia an nghawng chuktuah nghalin lal in lamah chuan a tawlh luh pui ta a. Lal in sumhmunah chuan dingin Vawra chuan,"Hualtu tlangvalte u,chet in thawh vaih chuan in lal leh upate hi in chan vek ang" tiin an au tuarh mai a. Hualtu lal leh upate mai bakah an tlangvalte chuan chutiang teh thuta thil a thlen tak avang chuan mak an ti hle mai a. Zan tir lama an tlangval phuar,mei in a kan hlum veka an rin tawhte ngei mai chuan tunah an lal leh upate Chempuiin an tin fur tawh mai si. Hualtu lam pawh an zam bik hauhlo a. A tam zawk annih avang leh Silai keng zawk annih avangin an chan a ţha zawk viau turah an ngai ani.
Vawra a au zo deuh chiah tihah chuan Hualtu Val upa pakhat chuan," Tlangval,kan lal leh upate kha thlah ula nungdamin kan chhuah ang che u. Anih loh chuan in lal leh upate chawp hian kan that fai phiar dawn che u ani" a rawn ti a. Chutih lai chuan lal fanu Rengpuii leh anu bakah a u leh a nupuite chu Suartui tlangvalte chuan lal in aţangin an rawn kai chhuak ve bawk a. Lal ina Silai pakhat awm chu an rawn hawl chhuak nghal bawk a. Vawra chuan," Tunah chuan kan kutah hian inpe zawk mai rawh u. Hual beh vek inni tawh. In tan tlanchhuahna kawng a awm tawhlo e" a han ti leh a. Hualtu lam chuan Vawrate lam hawi chuan Silai an lek kawh fur mai a. Kah thluk tawp duh mahsela an lal nunna in a tawrh phah an hlauh avangin an la kap ngam rihlo a. Hualtu val upa vek chuan," Chempui nen ringawt khan min rawn luhchhuah theih in ring amaw. Khawnge in upa pakhat hi kan talh chhin ange" tihpahin Suartui upa Kaihleia chu Silaia kah mai a han tum a. Chutih lai tak chuan lal in piah thim chin aţangin Silai a lo puak dur a. Hualtu val upa chu lal in tualah chuan ka pawh chhawn loin a chatthla zui nghal mai le.
Hualtu tlangvalho chu an phawk hra mai a. Hualbeh annih chu ring chiahlo mahsela thim chin aţanga Silai alo puah tak avang chuan engemaw hmuh tum niawm tak hian an hawi kual zauh zauh mai a. An pasalţha chhuanvawrte an thih deuh vek tawh avangin huaisen taka han ho ngam an awm vaklo ani. Chutihlai erawh chuan mipa puitlinng vek anni tawh a. An hmelma lam chu a tlem zawk anga an lan bawk si avangin lal in lam chu tlem tlemin an zim hnaih tial tial a. Vawilehkhata bawh huk an tum niawm tak ani. Hualtu mipuite erawh an darh deuh sang sang a. Inbeihna lai taka awm chu an tan a hlauhawm tih an hria ani chek ang chu. A tu amah chuan chet lak hmasak chu an phur teh chiamlo niawm tak ani. An din ngai chuan an han ding leh rih a. Chutih lai chuan Hualtu lal Zangama chuan," Ka tlangvalte u,in hmelmate hi heti mai hian in chhuah anga maw. An lal chawp khan that fai vek rawh u. Tumah damin chhuah hauh suh u" a rawn ti a. Chutih rual deuh thaw cuan Silai alo puak leh dur a. Hualtu tlangval Silai keng pakhat chu a thal leh ta der mai. Hualtu tlangvalte chu an hnung lam leh hma lam hawi tawni an Silaite pawh Vawrate lam hawi zawng veka tin tawhloin Silai ri lo chhuahna lamte chu an han tin ta a. Thim chin aţanga lo puak anih miau avangin engmah kah tur phei chu an hmulo ani.
Chutia an din reng chuan khua alo var anga,an chan a chhe deuh deuh dawn ani tih hriain Vawra chuan," Hualtu tlangvalte u. Hual beh vek inni tawh ka tih kha. Tunah hian in inpek thuai loh chuan nangmahni bakah in khaw mipui zawng zawng hi kan that fai phiar ang. Tunah chuan zah kan la ngai rih a. Kan kah chilh lo mai che u ani" a han ti leh a. Hualtu pasalţha ve deh pakhat Saikhama chuan," Tlangval,min bum theih i ring ami. Tunah khan kan lalte kha thlah ula,kan nun mahna che u. Chuti anih loh zawngin hei in lal leh upate thleng hian kan that fai phiar ang che u" a rawn tive salh salh a. A sawi zawh rual deuh thaw chuan Silai alo puak leh dur a. Hualtu pasalţha Saikhama chu a awma Silai mu den na avang chuan a thal leh nghal tawp mai. Hualtu lam chu an ţi dek tawh mai a. Mahse inpek mai erawh an la tum biklo. Silai ri lo chhuahna lam chu an han rin kah ve bawk na a,eng thawm riva mah hriat tur a awm silo. Vawraten Silai a lo veng tura an tih tlangval pahnihte lah khan Silai an kah puah zawh veleh an awmhmun an thlak zung zung si. Hualtu lam chuan hual beh anni tak takin an ring tawh a. Hualtu lal Zangama meuh pawg a beidawng ţan titih ta mai. A tlawm hmasa zawk nih chu a hreh ngang mai bawk si. Chutah Vawra bawk chuan,"In luhlul hle mai maw. Tunah chuan hun ţha ka pe tawhlo ang che u. Vawithum ka chhiar anga,chumi hmaa in inpe lo anih chuan in tlangval zinga pahnih kha in chan leh ang" a han ti a. Chumi rual chuan," Vawikhat" an ti tuarh a. Hualtu lam chu an din ngaiin an ding reng a. Vawra chuan," Vawihnih" an ti leh a,chutah pawh chuan Hualtu lam chu inpek anla tum chuanglo. Vawithum thleng a chhiar hnu pawh chuan tumah an chesawn hauhlo mai a. Chutah Vawra chuan," Le,tunah" an ti tuarh a. Hmun hrang ve ve aţangin Silai alo puak rual ţhawt a. Suartui lal leh upate Silaia tin tute zinga pahnih chu an thal leh ta tawp mai.
Hualtu tlangvalte chu an hamhaih vek tawh mai a. An hmelmate lahin thim chin aţangin an duh duh an rawn phil nghauh nghauh mai si ale. A dawt leh chu tunge ni ang tih an hre silo. Chutah tlangval pakhat chuan Suartui lal chu Silaia chuk tuah rawp pah hian,"In lal hi in hum zo bik hauhlo ang le" a rawn ti tawl mai a. A sawi zawh rual deuh thaw chuan Silai alo puak leh dur a. Chu tlangval pawh chu a ţhiante ang bawkin a chhatthla zui ve ta mai. Hualtu lal Zangam lo ţawngchhuakin," Kan khua in hal vek tawh a. Tunah hian eng thil nge beisei in la neih cheu ni. In lal leh upate hi hruai ula,kal bo nghal rawh u" a rawn ti a. Vawra chuan," Chuti mai zawng kan duh tawklo deuh ani. I tlangvalte hi an ralthuam dahthlak tir la. Tumah hi kan tina lo ang che u" a han ti a. Hualtu lal Zangama chuan an thi dawn tho tho hian a hria a. Chutah ring lenglawng hian,"Tlangvalte u kap ta che u" a han ti tuarh mai a. Mahse Hualtu tlangvalte erawh engmah hrelo ang maiin an ding ngawi reng a. Chutah lal Zangama beidawng chuan,"Min thatlo in salah min hruai mai ula. Ka unauten ka man tur tawk chu anlo dah thei mai ang. Ka khaw mipuite hi chu zuah hram ang che u" a rawn ti ta phawng mai. Vawra chuan,"I tlangvalte hi an ralthuam dah thlaktir phawt la ti nia" a han ti a. Hualtu lal Zangama chuan a tlangvalte chu an ralthuam dah thla turin an ti ta a. Hualtu lam chuan an Silai leh Fei bakah an Chempui kente chu an theh thla ţak ţak a. An theh thlak zawh chuan an hnung lam aţang hian tlangval panga lai mai an lo chhuak a. An ralthuamte chu an rawn la khawm zung zung mai le. Chutia tlangval panga lai mai an lo chhuah takah chuan Hualtu lam chuan hual beh vek annih chu an ring nghet ta nghal a. Suartui tlangvalte chuan an ralthuam lakkhawmte chu thim chinah chuan an kal bo pui leh ta diak a.
Vawra chuan ,"Awle, tunah chuan engkim aţha tawh e. Tumahin in nunna in chan belh tawhlo ang. Tunah chuan inrem taka awm dan kan zir tawh dawn ani. Tumah salah kan hruai lo ang che u. Khawvar rualin in khua hi kan chhuahsan anga. Min rawn umzui anih chuan in khuaah bawk lo let lehin kan rawn that chimit vek ang che u. Tin,kei hi Suartui khaw mi leh sa ka nilo a. Suartui khaw lal leh upate duhloh leh a hnawl hnu ka ni hi. Mahse ka u leh naute sala inlo hruai avangin in pasalţhate leh in tlangval tamtak ka thahsak che u a. Chumite thisen aiah chuan Suartui khaw lal leh upate hi chu in la kawl rih thei ang. Anmahni chhanchhuak tura lokal ka ni lo a. Nunau leh tlangval sala inlo hruai te nen kan haw dawn ani" an ti dap dap mai a. Suartui lal leh upate chu an thlaphang ta hle mai a. Suartui tlangvalte lahin anmahni chhanchhuaktu Vawra lamah chuan an ţang thung si. Vawra chuan Hualtu lal leh a chhungkuate bakah a upate chu lal inah chuan a hruai lut a. Suartui lal leh upate erawh pawn lamah an ding thung. Vawra chuan Hualtu lal hnenah chuan,"Lal pa,hei i khua rawn hal hi ka tum lawk ani hauhlo a. Mahse a ţulna in min nawr hneh ta em ani. Tunah hian i Se huanga i Sial zawng zawng hi kan kai haw vek dawn ani. I unaute chu ţha taki lo bia la. In run buai ngai kherlo a kan mi leh sate chu tlanchhuah min phalsak ka beisei ani. An lo phallo anih ngai chuan i khua thleng hian kan rawn vai hma vek tawh ang" a han ti a. Hualtu lal Zangama chuan," Tlangval,ka nunna min zuahsak avangin ka lawm a. Ka uanaute chuan an sal mante kha tlanchhuah leh an phal vek a. Mahse keimah hian sala chhawr kumkhua turin ka tilui ta hlawm ani. Lamkal kalo va tir anga. Tlanchhuah chu an phal em em ang" alo ti thuai a. Lal bawk chuan,"Ka pasalţha Zamuka kha i kaphlum em ni?" tiin a han zawt a. Vawra chuan ," Pasalţha huaisen tak ani. Zahawm takin a thi ta nih kha" a lo ti thuai a. Hualtu lal Zangam chuan a pasalţha Zamuka chu kah hlum ani lo tih hriain mak a ti ta em em mai ani.
Khua alo var meuh chuan Suartui khaw mi leh sa Hualtu khuain an man zawng zawngte chu Hualtu khaw chhuahsan tur chuan an in buatsaih sang sang a.Vawra chuan Dengi chu a zawng ruai mai a.A hmuh tak siloh ah chuan Dengi lo hmu an awm leh awmloh chu an zawt kual a. A tawpah chuan Dengi chu Dampui khaw lamah hruai ani tih a hre thei ta. Vawra chuan a ute hrilh hmasak phawta Dampui lama kal chu a tum ta a. A hmangaih Dengi chu dam taka hmuh leh ngei a in beisei ani.
Hualtu khaw chhuahsan tura an inbuatsaih sang sang lai chuan Suartui lal leh upate chu Vawra hnenah chuan lo kalin ngaihdam an rawn dil mawlh mawlh a. Suartui lal Lianvunga chuan," Vawra,in chunga ka thiltih avang hian ngaihdam tlak pawh ka nilo a. Nangni chuan ka khaw tan theihtawp chhuahin in bei ţhin a. Ka lo chapo lutuk deuh ani. Min ngaidam hram ang che" a rawn ti a. Vawra chuan," Ekhai, lal pa,tunah chuan i Ţhi leh Dar i roh em em te kha kan lo hawn leh vek tawh asin. I duh chuan chungte hmang chuan khua ila din leh anga. I duh duh ila hnawtchhuak leh dawn nia. Keini zawng i khua leh tuia cheng tlak kan ni tawhlo a. I lalna hnuai awmzui thei kan ni ta bawk heklo. Khuanun zah ngai sela,i thu hnuai intuklut leh tur em chuan kan awmin ka ring biklo e. I ro thilte chu Suartui khawdaiah midangin an awmpui tawh e" a han ti a. Chutab upa Khamvela chuan," Vawra,kan leh leh keini ngei pawh hi i ngaihdam kan ngai ani. Kan lo ngaihtuah chianglo ani" a rawn ti ve a. Vawra chuan," Pawi tu duh reng reng suh u. Engkim anih tur ang anih zawh vek tawh hnua ngaihdam dil hi a sawtin ka hre velo e. Ka chhungte in hnawtchhuah dawn kha ngaihtuah chian hunlai tak ani sia. Amaherawhchu nangni meuhin ngaihdam min dil chuan ka ngaidam che u. Tunah chuan kal a hun e" tihpahin a tho thurh a. Suartui tlangvalte chu kal tura in peih tawh turin a han au a. Tichuan Suartui khaw mi leh sa sala hruai a awmte chuan hlim takin Hualtu khua chu an chhuahsan dawn ta a. Tlangval sawm velin hma an hruaia. Mipuite chuan zuiin an hnungah lal leh upate chu an kal bawk a. A tawp berah chuan Vawra leh tlangvaldangte chuan Sial kawi duah duah chungin hnung an rawn dawl ve bawk a. An kal chhuah dawm chuan Hualtu lal Fanu Rengpuii chu Vawra awmna lamah chuan alo tlan phei a. Vawran alo hmuh chuan," Rengpui,tunah chuan i duh ang ngeiin kan inrem tawh a. I pa kha ţha takin lo kai hruai ang che" alo ti a. Rengpuii chuan Vawra chu ngun taka en chung hian," Mi huaisen tak ini, kan nunna min zuahsak avangin ka lawm e. Khawngaih takin nunna hlut zia hi hre nawn la ka duh a. Tin,remna siamtu nih hi mi dawihzep nihna anilo ania" a rawn ti a. Vawra chuan," Ka lo hrereng ange. Mahse a chang hi chuan a chhe ber thil tih a ţul hun hi a awm chawk ania" a han ti a. Rengpuii chuan," I thinchhiat aiin i rilru a ţha phian mai" nui sen sen chung hian a rawn ti ve leh a. Vawra chuan,"Chu zawng,kan hun tawn azir te ani ang chu. Dam takin lo awm la. Kan la inhmu leh dawn nia" a han ti leh a. Rengpuii chuan," Nangpawh dam takin le. Kan inhmuh leh thuai ka beisei" a ti a. Tichuan Vawrate chuan Hualtu khua chu an chhuahsan ta a.
Hualtu khua an chhuahsan aţanga nihnih hnuah chuan Vawrate chu a u Ramlianate nen chuan an in tawk ta hlawl mai le. Chutia Vawra nungdama an han hmu leh an khaw mi leh sa hruaiboa awm tate an han hmuh chuan Ramliante chu an lawm em em mai a. Vawrate unau thum an han hmuh chuan Suartui tlangvalte leh mipuite chu an hlim hle mai a. Suartui lal leh upate erawh zak tih hriat tak hian an kun tlawk tlawk thung. Suartui lal leh upate awmlohna lamah chuan Vawrate chu an hmabak tur sawihoin an ţhu khawm laih mai a. Vawra chuan Hualtu khua ava beihdan tlangpui chu a ute chu an hrilh a. Sawi tur awm ang deuha a hriat zawng zawng a sawi zawh hnu chuan Ramliana chuan,"Vawra,tunah chuan i rintlak tak tak tawh ani. Mahse i rilru hi a hmanhmawh mah mah ţhina . Tunah pawh hian Dengi chhanchhuak tura Dampui lama kal leh i rilruk nghal a. Mahse tunah thut thut chuan kan kal thei rihlo ang. Suartui lamah kan haw leh rih phawt anga. I u Vawmaia pawh Hliappui khaw tlangvalho nen an lo kal ngei turah ngai ila. Keimahni chauha bei loin tlem hahdam zawk deuhin a huhoin kan kal dawn nia" a han ti a. Vawra chuan,"U te berin in tihte chuan ni hmiang chu. Mahse kan hmanhmawh angai ania" a han ti a. Sawivela lo ţawngin," Vawra,i u Vawmaiate te hi nikhat hnuah chuan kan hmu pha tawh em em ang. Kan tlai loang" alo ti thuai a. Vawra chuan," Ka nu leh pate anlo la dam chu ka lawm khawp mai. Mahse Suartui lal hi zilh hlak chu a ţhain ka hria ni" a rawn ti a. Ramliana chuan," Vawra, kha lam kha chu theihnhilh rih teh khai. Kan lal chu keiman ka va bia ange. Thil ţhalo chu a ţhalo vekin kan rul tur ani ngai love" a han ti a. Tichuan Ramliana chu Suartui khaw lal leh upate be tur chuan a kal ta a.
Suartui lal awmna a va thlen chuan Ramliana chuan," E,lalpa ilo dam maw. Kan duhaiin kan rawn tlai deuha. Kan phur a rit deuh bawk nen. Minlo hrethiam ani ang chu" a han ti a. Lal leh upate chuan chhan mai ngaihna pawh an hre lo a. A tawpah chuan lal Lianvunga chuan," Rama,in chhungkaw chungchanga ka thiltih avang hian in hmel pawh hmu ngam tur ka nilo a. A theih hram chuan min ngaidam ula. Ka khuaah lo let leh hram ang ta che u" inthlahrun hmel tak chuan a han ti a. Ramliana chuan," Lalpa,ngaihdam dil angai reng renglo e. I tihtur dik tak iti mai ani. Mahse i khuaa lo let leh zawng kan thei lo ang. Suartui khaw mi leh sa kan ni tawhlo a. Duhloh paih kha kan ni miau a. Midangte tan hnawksak kan ni ange" a han ti a. Chutah lal chuan," In laka khawngaihna han dil tlak pawh ka nilo a. Tunah hei min rawn chhanchhuakin ka tan thil ropuitak min tihsaka. Ka Ţhi leh Dar in va lak zawng zawng kha min ngaihdam avanga lawmthu sawi naah min pawm sak dawn nia" a han ti a. Ramliana chuan," Lal pa,Ţhi leh Dar aia ngaih pawimaw hmasak tur tamtak hi a awm ani. Lal ini a,thil tamtak i hria ani thei e. Mahse ro thil ngawt uma i buai chhung chuan hetiang thil hi i tawk fo daw ani. Ro thil tamtakin a lei theihloh in lungrualna ţhate,hlimnate leh thildang tamtak hi kan ngaihtuah hmasa tur ani. Kan chhungkua chu min theihnghilh tawh dawn nia" a han ti a.Thu tam sawi tawhlo Ramliana chu a kal sawn leh ta nghal a.
Nikhat an kal leh hnu chuan Vawrate ho chu Vawmaiate ho nen chuan an in tawk ta nge nge a. Vawmaia chuan an chhungte chanchin an hriat meuh chuan a hlim ta em em a. Suartui lal chungah erawh a thinrim em em thung . Vawmaia chuan Suartui lal leh upate chu han sah sawk sawk mai hi a duh rum rum a. Mahse a chhungte ber an him tho avangin a inbengdai thei hram ani. Vawmaia chuan Hliappui khaw tlangval sawmli lai mai alo hruai tel a. Heng tlangvalte hi Hliappui lal Hratlianan a unaupa Lianvunga chhanchhuak tura a rawn tirhte anni a. An vai mai hian raldo thei turin an rawn in peih sa vek ani . Vawmaiate ber anlo thlen takah chuan Vawrate unau leh Suartui tlangvalte chu rorelin an ţhu khawm a. Hlaippui lam pasalţhate leh val upate bakah Lungchuan khaw tlangvalte pawh an awm ve a. Ramliana chuan," Awle,hei kan dinhmun chu kan hre ţheuh a. Tunah hian Dampui khaw lama kan mi leh sate chhanchhuak turin kan kal dawn ani a. Suartui khaw tlangval nilo zawng kha chu lo kal turin kan phut lo che u a. Amaherawh chu mipuite hi lo enkawl turin kan ngen che u ani. Vawiinah hian Suartui tlangval zawng chuan Dampui khaw lam kan pan ang" tiin thil kalhmang tur a rawn sawi a. Chutah Lungchuan khaw pasalţha Chungthanga chuan," KeinI Lungchuan khaw tlangvalte chuan Dampui lamah kan rawn zui dawm cheu ani. Min dang theilo ang" alo ti thui a. Hliappui val upa pawh chuan," Keini pawh Dampui lamah chuan kan lo kal ve dawn ani. Suartui khaw mipuite lo veng tur chuan kan tlangval ţhenhatte kan hnutchhiah thei ang" alo ti ve bawk a. Ramliana chuan an indang zo dawn chuanglo tih hriain a kal tur bik inruat mai chu ţhain a hre ta a. Tichuan Hliappui tlangval sawm leh Lungchuan tlangval pangate chuan Suartui khaw mipuite chu an lo enkawl anga. A bak zawng chu Dampui lamah chuan an kal dawn ani. An rorelte an zawh hnu chuan Ramliana chu lal hnenah chuan a va kal a. Ramliana chuan,"Lal pa,hei Dampui khaw lamah kan kal leh dawn ani a. Tunah hian Suartui khaw thlengah khan awmhmun in han khuar thei dawnlo a. Khawchhung kha ruang ţawih tawh hnua akhah vek avangin chenna tlak ani tawhlo a. Lungmam khaw lamah in kal mai angai dawn ani" tiin a han rawn a. Duh thlan tur dang awm heklo le. Lal pa chuan Ramliana remruatna ang ang chu a pawm angai ta a . Tlangval raldo a kal tur leh nunau te lo kilkawi tur an inthliar fel hnu chuan raldo a kal tur zawng chu Ramliana hoin Dampui lam pan chuan an kal ta a.
Bung-44
Vawrate chu Dampui khaw lam pan chuan kawng lakah pawh chawl khaw muang loin an kal char char mai a. Nikhat lai an kal hnu chuan Dampui khua chu an hnaih tawh hle mai. Dampui khaw mi leh sa ramkal iloin an hmuh palh loh nan kawng pangngaiah pawh kal loin ramhnuai aţangin Dampui khua chu an pan ta zel a. Khua an hnaih viau tawh hnu chuan Ramliana chuan Dampui khua an run hmasak a an innghahna Dampui khaw mawng lama ngawah bawk chuan awmhmun khuar chu a rawt ta a. Tichuan Dampui khaw mawng lam pan chuan an kal ta nghal a. An thlenthlak hnu chuan a khawchhung han en thlithlai turin Vawrate unau bakah Lungchuan pasalţhate chu an han kal ta a.
Dampui khua an han hnaih viau tawh hnu pawh chuan naupang tualchai thawm takngial pawh hriattur a awm hauhlo mai le. Vawrate chu an ngaih pawh a ţhalo lek lek tawh a. Khaw lan chian theihna lai an han thlen chuan Dampui khua chu an han thlir ta a. Dampui khua chu a reh ţhup maia. Khawlaia veivak hmuhtur takngial pawh an awmlo a. Makti taka an thlir reng lai chuan Ramliana chuan," En teh u. In pakhat aţang mah sawn meikhu a chhuak hauhlo a. Mihring tumah hmuh tur an awmlo a. A rehin a reh tlawk tlawk mai a. Khua hi an rauhsan ani mailo maw" a rawn tichhuak ta phawng mai a. Pasalţha Chungthanga chuan,"Kan run dawn tih an lo hre lawkte pawh ani thei a. Inbumna pawh ani thei bawk . Khua ah khian han lutin kan han chian mai angai dawn ani" a rawn ti a. Vawra chuan," A rukin ralveng anlo indah maithei sin. Reilote in ngaichang leh reng reng ang u. Heti tak maia an reh hi a ngaihţhatthlakloh khawp mai" a rawn tive a. Vawra rawtna ang chuan rei ngial chu an han nghak a. Mahse eng thawm mah hriattur a awmloh bakah mihring hmel reng reng hmuh tur a awm heklo . A tawpah chuan Ramliana chuan," Vawmai,nang kan ţhiante kha zuk pun la. Midang zawng hi khuaah sawn kan lo va lut ange. Minlo bei ta thut anih chuan hnunglam aţangin in rawn chimih ţhak dawn nia" a han tina. Vawmaia chu an inkulh na lam pan chuan a kal nghal a. Vawrate erawh Dampui khaw lamah chuan an kal thung.
Dampui khua an va luh chuan Vawrate chu an fimkhur khawp mai a. An Silai lekkawh va chungin an thle kual zak zak a. Khaw hmawr deuha in pakhat an thlen chuan in kawngkhar chu Thingfakin alo indo a. Vawra chu fimkhur takin inchhugah chuan a han lut a. Inchhung chu alo ruak huai mai a. Thukah chuan vut alo intiang pawng thur a. Mutbu leh hmanraw pawimawh engmah a awmlo a. Vawra chu pawn lamah chhuak leh nghalin a ute hnen ah chuan," Khua hi an rauhsan anih dawn hi. Inchhung hi a ruak vek a. Engmah a awmlo. Hei an Sum leh Suk te hi han en ila,buhdenna khak thar lam pawh a awmloh hi. Ar chhiar lah a ruak ţhak bawka" tii a thil hmuhdan a rawn sawi a. Sawivela chuan," Engpawh nise,fimkhur takin lal in lam i pan phawt teh ang u. Chutah chuan engkim a chiang vek mai ang" a rawn ti a. Tichuan lal in lam pan chuan an kal leh ta nghal a.
Dampui lal in an han thlen thleng pawh chuan tumah reng an hmulo a. Lal in chu alo in khar khap a. Vawrate chu lal inah chuan an han lut ta a. An in luh hmasakna ber ang bawkin lal in chu alo ruak huai mai . Lal in chhungah chuan eng thil hlu mah alo awm tawhlo. Vawrate chu an buai ta hle mai. Vawra chuan," Ka u,run an tawk ani thei angem?" tiin a han zawt a. Ramliana chuan,"Run tawk chu annih hmelloh. Khua hi an rauhsan anih dawn hi. Khawilam nge an pan hriat i han tum chhin ang u hmiang" a han ti a. Tichuan lal in chu chhuahsanin Dampui khua aţanga chhuak mihring hnuhma hmuh tum chuan khawdai lam an pan ta nghal a. Dampui khaw kawtchhuah lam an va thlen chuan mihring leh ran kalna hnuhma alo chiar dup mai le. Vawrate chu kawtchhuahah chuan an han ding vang vang a. Ramliana chuan," Kan tlai hret ani. Dampui lal hian a unaupa Hmunzau lal ava bel anih dawn hi. Tunah chuan tih theih kan nei talo" a han ti chuai raih a. Vawra chuan," Tunah hian umzuiin kawng lakah kan va nangching hman mial mahna" alo ti thuai a. Ramliana chuan," An hnuhma en hian an chhuahna a rei deuh tawh ani ngei anga. Hmunzau khua hi Dampui aţanga nikhat kal chauh ani a. Tunah chuan Hmunzau khuaah an awm tawh ngei anga. Umzui awmzia a awm tawhlo ani" alo ti chuai raih a. Vawra bawk chuan,"Hmunzau khua chu kan hal darh vek anga nimai lawm" alo ti sam et a. Sawivela lo ţawngchhuakin," Vawra,Hmunzau chu Suartui ai daiha khawlian zawk ani asin. Pasalţha pawh tamtak annei a. Keini ho zawng tan hi chuan beih mi anni lo ani. Keini ho tana Hmunzau hneh tum chu pialtlepa liluh tum ang vel kan ni mai ang" alo ti ta a. Chutihlai chuan Vawmaia leh tlangval dangho chu an rawn thleng ve chiah a. Thil awmdan mak an tih thu an rawn sawi sap sap a. Chutih lai chuan pasalţha Chungthanga chuan," Ramlian,engtia hma han lak chhunzawm chi nge ni ang. Kan umzui dawn nge kan haw mai dawn" a rawn ti a. Ramlianan a chhan hma chuan Vawra chuan," Hmunzau khua chu kan va belchiang reng reng dawn em ni" alo ti a. Ramliana chuan," Hliappui lam leh Lungchuan lamte kha lo hawng ta ula. Keini zawngin Hmunzau chu kan va thlithlai chhin reng reng ange" alo ti a. Hliappui khaw tlagval leh Lungchuan tlangvalte chuan haw bik nih chu anlo duh awzawnglo mai a. A tawpah chuan Hmunzau khaw lam panin an vai kal leh ta nge nge a ..
Nikhat an kal leh hnu chuan Vawrate chu Hmunzau khaw kiang maia ruam pakhatah chuan an awm tawh a. Vawra leh a ute chu Hmunzau khaw thlithlai tur chuan khawchhung hnaih deuhah chuan an han kal ta a. An beiseiloh tak maiin Hmunzau khua chu kulhin alo inhung chhuak vek mai le. Khawchhung luhna tura an siam zawnah chuan ralven buk a awm vek bawk a. Khua chu chuti maia beih chi ani hauhlo tih an hmuthei ta mai. Vawra chu a beidawng ta hle mai a. Awlsam taka a hmangaih Dengi lalet leh tura a inrin laia chutiang harsatna a lo awm leh avang chuan pawi a ti hle mai a. Hmunzau khua chu hneh dan ala awm a ring fan a. A ute hnenah chuan Vawra chuan,"Khaw kulh ah sawn luh ruk dan a awm mial lo maw. Khua saw a chhung lam aţangin bei ila. Kan hneh theih ka ring ani" a han ti a. Vawmaia chuan," Vawra,khua saw han en la. In awm zat te saw chhiar han tum chhin teh. Hmunzau khua hi Dampui lamin an va zawm hma pawh khan Suartui khua ai chuan a lian deuh reng reng a. Tunah chuan Dampui lamin an va fin zui bawk nen. Kan tan hneh ngaihna a awm dawnlo ani" alo ti a. Vawra chuan,"In hlau anih chuan keimah pawhin ka va bei mai ang" a han ti leh a. Ramliana chuan," Vawra,kan hlau ani reng reng lo. Mahse tunah hian va bei ngawt ta ila. Kan thi vek ngei ang. Kan vai hian sawmruk vel chauh kan ni a. An kulh sak dan te han en la. Anlo inralrin zia te nen sawn. Thlamuang taka lo awm nise zawng han beih tepawh an awlsam anga. Tunah saw chuan run thut hlauin an in ralring em em a. Hun ţha dang kan zawn mai angai dawn ani" a rawn ti a. Ramliana bawk chuan," Tunah hian va bei ta ang ila,kan thi vek emaw ani anga . A khawchhungah sawn tlangval Zanga dawn an awm emaw ani ang a. Tunah chuan haw phawt mai hi kan tan a ţha rih ani. Kan hmangaihte tana kan la dam angai ani" a han ti a. Vawra chuan," A khaw mi tu emaw biak tur kan zawn angai ani. Ilo chang chhin ang u" tiin rawtna a han siam a. Tichuan Hmunzau khaw mi leh sa ramkal man tur zawngin an in semdarh ta a.
Tlai ni tlak dawn ruaiah chuan Vawra channa khan lamah hian putar pakhat hi khaw lam panin alo kal hnak hnak a. Kuh phung lian zet mai hi iptepuia a chang lawr suau hian a rawn ak phei a. Vaibel a pak khu tual tual mai bawk . Vawra chu a bihrukna aţanga chhuak nghalin putar pa tawk zawng chuan a kal ta a. An in tawk dawn ţep tihah chuan putar pa chu a ding chat mai le. Vawra chu mak tih hmel tak hian alo en vung vung a. Putar kianga Vawra a va thlen phei chuan putar pa chuan," Tlangval khawi lam kal tur nge inih" tiin alo zawt a. Vawra chuan,"Ka pu,khawiah vak kal lo e. Helaiah hian ţhut hahdam pahin i titi dun lawk ang hmiang" a han ti a. Putar pawh chuan lo aw ve maiin kawngsira thing buk hnuaiah chuan an ţhu dun ta a. An ţhut fel hnu chuan putar chuan," Tlangval,kan khaw mi ini hauhlo mai" a han ti thawr mai a. Vawra chuan," Nia,in khaw mi zawng ka ni lo ngei mai a. In khaw hmelma pawh ka ni chuanglo a. Mahse khi in khua khi kulh nen in inhung khup mai a. Engtizia nge a.?"" tiin a han zawt a. Putar chuan,"Keini zawng engmah hi kan hre ve phak tak taklo a. An sawidan chuan kan lal unaupa khua Dampui mi tutih hriatloh ten run an tum ani awm e. Chumi avang chuan Dampui khua zawng zawng chu a pui a nawiin an rawn insuan phei vek a. Kan lalpa pawhin a hlauthawng deuh ani ange. Kulh te siamtirin ralveng e kan indah ta anih hi" ahan ti a. Vawra chuan," Dampui lam chuan mi phuar sa a rawn hruaite an nei em?" tiin a han zawt leh a. Putar chuan," Nei tuk e. An hmelmate khua an runna a an man khawm anni awm e. Nunau leh hmeichhia pawh an awm nual mai" a han ti leh a. Vawra chuan," Ka pu,in khuaah hian in engzat nge awm a,mihring in tam em?" a han ti leh a. Putar pa chuan," In zathum kan tling thuakin ania ka rin ni. Dampui lamin min rawn bel zui ta bawk nen. Tunah chuan mihring pawh kan tam e" a ti leh a. Vawra chuan a hriat duh thil ţhenkhatte a zawh leh hnu chuan putar chu a kalsan ta a. Chu zan zet zawng Vawra tan chuan lungngaihna zan ani ringawt ani. A hmangaih em em Dengi lah a chhanchhuak thei silo a. Hmunzau khua lah chu han beih ngawt chi anni silo. Tichuan hreh tak chungi hun remchang a awm huna kir leh thuai tura intiamin Hmunzau ram chu an chhuahsan ta a.
Suartui tlangvalte chu an chhungte an chhanchhuah theih takloh avang chuan beidawng takin an kir hlawm a. An chhungte chu dam chhung atana hmuh leh an beisei ngam hauhlo. Lungkimlo taka nihnih an kal leh hnu chuan Lungmam khua chu an lut leh tawh a. Khua an va thlen chuan lal in lamah an kal nghal a. Lungmam khua chu Suartui khaw ho chuan anlo chei bawl leh deuha. Lungmam mi leh sate Suartui lama an insuanphei laia an buh leh bal phurh bang te chu ringin an lo awmve naw naw mai ani. Lal inah chuan Hliappui tlangvalte leh Suartui tlangvalte chu an ţhu khup mai a. A tam zawk chu pawn lamah an awm thung . An dinhmun a chhiat tak em avang chuan an kal zel dan tur an rel ho ta a. An ngaihdan an sawiho nak nak hnu pawh chuan chupa ngaihdan chu a ţha e ti a han pawm tlan theih an nei ta hauhlo mai. A tawpah chuan Ramliana chuan," Minlo hrethiam ula. Suartui khaw mi leh sa chu ka nilo na a. Mahse ka ngaihdan kan sawi ve reng reng ange. Tunah hian Suartui mipui la dam zawngte nen hian Lungmam khua hi inchei ţha thei a. Amaherawhchu reiloteah eitur in tlachham thuai dawn ani. Tunah lah lohal hun pawh ala nilo a. Eitur awmlo chuan in dam rei hauhlo ang. Chuvangin Suartui mi leh sa ala dam awmchhunte hi chuan Hliappui khaw lam in pan mai aţhain ka hria. In chhungte sala hruai bo a la awm tamtak an awm a. Chungte erawh chu tlanchhuah dan an awmin ka ring ani. Tunah chuan mahni inveng thei tur khawpin in chak tawklo a. Chuvangin helai hmunah hi chuan in awm reng theilo ang" a rawn ti a. An han ngaihtuah tlan leh hnu chuan Ramliana ngaihdan a kal mai chu ţha anti tlang ta a. Suartui lal pawh chuan a lalna kalsana a unaupa lalna hnuaia Hliappui khuaa awm chu a pawm mai alo ţul ta ani. Vawrate erawh chu Lungchuan lamah an kal thung tawh ang.
A tuk khua alo var chuan Suartui khaw mi te chu an lal leh upate hoin Hlappuii lama kal tur chuan an inbuatsaih leh ta a . Khual khuaa baihvai taka va awm chu an hreh viau ngei ang . Mahse duhthlan tur dang annei silo. Suartui lal Lianvunga chuan Vawrate unau chu an ko a. Lal Lianvunga chuan," In chhungkaw chungah hian kalo tisual takzet ani. Ipa hnenah khan ngaihdam min han dil sak ula. Nangni pawhin min ngaidam hram ang che u" a han ti a. Ramliana chuan," Lal pa,kan haw reng reng lo che. Mahse hei i ro kan va phurh kha kan rawn keng tawh e" tihpahin an ro va phurh midang anlo enkawl tir chu lal hmaah chuan an han dah ta a.Lal Lianvunga chu a zak hle mai a. Inthlahrung tak chung chuan," Ekhai,hei zawng ka la theilo ang. Ka lawmthu sawinaah ngaiin min laksak mai teh u" a rawn ti a. Ramliana chuan,"Lalpa,heng thil hi kan mamawh lo e. Bakah i ta nia,nangmah ngeiin kawl la a ţhat ka ring. Chuti lo zawng kan hnung lamah min rawn chhu zui leh hrep dah ange" a han ti sak a. Lal Lianvunga chu a ngawi reng a. Ramliana bawk chuan," Lal pa,dam takin in kal dawn nia. Keini pawh kan khaw lam panin kan kal tawh ange" tih pahin lal in chu an chhuahsan ta a. Vawrate unau kal tur chu Suartui mipuite chuan mittui tla zawih zawih chungin Hliappui lama kal ve tur chuan an lo sawm mawlh mawlh a. Vawra ţhianpa Vanzaua pawh chuan Vawrate chu zui mai a duh rum rum a. Mahse a chhungte a ngaihtuah em avangin leh a unaute sala hruai an la awm avangin a zui ve thei talo ani . Tichuan chumi ni chuan Suartui leh a pasalţhate chu anlo inţhen taa. Suartui khua pawh a ram hlen dawn ta ani. Vawrate erawh an chhungte hmuh thuai beiseiin Lungchuan khaw lamah an kal ta ani.
Lungmam khua an kalsan aţanga nithum lai a liam hnu chuan Vawrate pawh Lungchuan kawtchhuahah chuan an ţhu vang tawh a . Kawng tluanin Vawra u te chuan Vawra chu an hnem phei char char a. Tlema a ralmuan deuh huna Dengi te tlanchhuak tura kal ngei chu an tiam ani. Kawtchhuaha rei fe an chawlh hnu chuan khawchhung lam panin an kal leh ta a. Khua an han luh chuan alo reh ţhap mai a. Lungchuan pasalţha Chungthanga chuan lal in lama kal hmasak phawt a rawt avangin lal in lam pan chuan an kal ta nghal a. Lal mual an han thlen chuan khaw mipui zawng zawng chuan kut ruai an lo ţheh mup mup mai le. Vawrate chuan an in lam pan mai an tum a. Chungthanga leh tlangval dang ho chuan an phal ta tlat lo mai. Chutia ruai ţheh lai tak mai a an khaw pasalţhate leh Vawrate unau lo kal an han hmuh chuan Lungchuan mipuite chuan mak tih hmel tak hian anlo en ţhu hlawm a. Lungchuan lal leh upate pawh chuan an pasalţhate lo haw an han hmuh chuan an chawhlui kilna lama kal tur chuan an han hui a. Vawrate pawh chuan Lungchuan tlangvalte chu an zui ve zel mai. Lungchuan lal Vankhupan Ramliana alo hmuh veleh chuan," Ekhai,Ramlian inlo thleng ta maw. Kan lo beisei ru reng tawh che u asin. Fatute u. Hlui kha han siam belh ula,kan tlangvalte hian kil ve nghal rawh se" a han ti lung lung a. Lal bawk chuan," Ramlian,zaninah in unau khan lal inah ka hmu duh che u nia. Ruai ţheh zawhah inlo lut nghal dawn nia. Ka pasalţha Chungthanga khan a rawn hruai thei ang che u" a han ti leh a. Fatuten hlui dang an siam belh leh hnu chuan Vawrate pawhin an kil zui ve ta nghala. Vawra nu leh pa leh a ute bakah a ute nupui fanaute pawhin Vawrate lokal kha anlo hmu renga. Mi tamtak zinga va tlanchhuah kha thil zahthlak anih avangin hlim takin an awmhmunah an lo awm a,an chawei pawh an hre changlo hial ani. Chu mai anilo. Lungchuan khaw nulate chuan Vawrate unau chu an en duh hle mai a. An khaw tlangval thar turte chu anlo ngaizawng ru em em a. Mittla lek lova lo thlir tawk lah bo lo. An lal fanu meuh pawh a bang bik hauhlo mai.
Ruai ţheh zawh veleh chuan Vawrate unau chu lal in lamah Lungchuan pasalţha Chungthanga hovin an an leng lut a. Lal chuan zu te lo zukin an titi vei luam a. Lal Vankhupa chuan," Ramlian,a hma pawhin kan khuaah ilo zin fova. Pasalţha unau inni tih reng reng i sawi ngailo . Ka khua leh tui ni tur hian ka lo lawm lut tak meuh meuh che u ani" a han ti a. Ramliana chuan," Lal pa,kan chhungkaw chunga i ţhatna zawng zawng hi kan theihnghilh ngailo ang. He khaw tan hian kan theihtawpin kan bei dawn ani. I khua leh tuia cheng ve tura minlo pawm avangin kan lawm em em ani" a han ti a . Lal chuan," Lawmthu sawi angailo e. Pasalţha ka neih belh ta a . Khua hi in ta angin in en ngei ka beisei ania. Harsatna in nei anih chuan ka hnenah lo thlen vat ţhin ang che u" a han ti leh a. Thu dang dang an sawi leh hnu chuan Vawrate unau chu an in lamah an haw ta a.
Vawraten an in thar an zuk thlen chuan an hlim lutuk chu an ri chel chul mai a. Ramliana leh Sawivela fate ve ve chuan an pate chu lo lawmin an lo bawh nghal that that a. Chu zan zet zawng Vawrate in chhung chu hlimna in khat ani ber awm e. Pem thar mai annih avangin in pakhatah an la cheng ho vek ani. An boruak ni deuh hut hut mai a reh deuh hnu chuan Vawrate unau mipa zawng leh apa chu an hmalam hun turte sawiin an titi a. Ramliana chuan an va zin chanchin zawng zawng leh an thiltih zawng zawngte chu an sawi zar zar a. Pu Doţhiaua chuan," Hei dam takin in lo hawng leh thei a,kan chhungkaw tan chuan ropui tak ani. Tunah chua kan hnunglama thilte kha chu theihnghilh tawh ila. Kan lal thar lakah hian rinawm takin kan awm dawn nia. Vawra pawh tlema boruak a ralmuan deuh hunah Dengi tlanchhuak tur chuan ţhi leh Dar kengin iva kal ngei dawn nia" a han ti a. Sawi chhunzawm lehin pu Doţhiaua chuan," In khata khawsa ho thei reng kan ni lova. In tur kan rel hmasa phawt dawn nia. In awmloh chhung khan kan lo tur chu tlangval tlawmngaiin min vahpui bakah Ţhi fangin kan thleng bawk a. Lo tur chu ngaihtuah buai a ngai lo anga. In thar pahnih kan rel dawn nia. Pem thar chauh kan nih avangin Zawlbuk leh nula rimna inah te awmdan tawk in thiam dawn nia. Alo hmusit tawk che u an awm ngei anga. Mahse ngawi mai mai rih ang che u." tiin a fate chu an fuih sauh sauh a. Tichuan chu zan chu hlim takin an hmang ho ta a.
Lungchuan khua an luh ni aţang chuan Vawrate chu in sa in an buai char char a. Ramvah ilo takngial pawh an hman lo ani. A u Ramliana leh Sawivela te chhungkua in turte an sak zawh meuh chuan lohal alo hun leh tawh a. Vawra pawh a duh anga hmain Dengi tlanchhuak tur chuan ala kal mai thei biklo ani. Lohal zawh mangkhawh leh Thlam sak an zawh fel chuan hun pawh alo kal ve diai tawh a. Vawrate unau chu an buai em avangin mi zingah pawh an in ther hman lo a. An chhungkaw mamawh ngaihtuah reng renga an buai avangin nula rimna hun mumal pawh annei theilo ani. Zankhat chu Vawrate unau chu Vawrate inah chuan an ţhu khawm ţhap mai a. Vawra chuan," Ka pa,hei lo lam pawh kan in zo fel tawh a. Ka u te in tur lah kan sa zo ta bawk a. Buh tuh hun hma ngei hian Dengi lam tura Hmunzau khaw lama kal chu ka va duh ve. Rem min tihpui hram teh u" a tichhuak phawng mai a. A beiseiloh takin a apa chuan," Ni e,a theih chuan furpuiin min nan hma ngeia va kal chu a ţha e. Hmunzau lam pawh anlo inhawng viau tawh mahna. Dengi leh a chhungte tlan nan kan Ţhi neih ang ang hi kengin in kal dawn nia. Mahse kan lalin Sai ramchhuah a rel a,in unaua kal tura tih innih avangin Hmunzau lamah chuan nangmah chauha ikal angai dawn ani. Kan lal thupek kan hnial thei silo a. Anih loh chuan ramchhuah haw hunah pawh in kal.thei tho a" a rawn ti a. Vawra chuan," Ka pa,ramchhuah hma chuan keimahin ka va kal mai ange. Ramchhuah haw hnu zawngin kan tlaichhe lutuk palh ang" a lo ti thuai a. Vawmaia chuan," Mahni chauha kal zawng a himlo em mai. Ramchhuak kan haw hunah kan kal dun dawn nia" alo ti a. Mahse Vawra chuan," Tlangval ka ni tawh a. Min ringzo ve tawh em em ula mawle" a han ti a. Mahse a ute chuan mahni chauha a kal chu an phal ta hauhlo mai a. Sai ramchhuahna a an kal zawh hnu a an vaia kal mai chu an rawt ta a. Vawra chuan pawmlo viau mahse a ute thu han hnial em chu a duh bik silo a.
Ni reilote hnuah chuan Lungchuan khaw tlangval sawmli rual zet mai te chu Sai ramchhuak turin an kal liam ta nghuah nghuah mai a. Mak tak maiin Vawra erawh a uten in nghak tura an tih tlat avangin in lamah a awm rih a. Phur lo deuhin a u Sawivelate Thlam tur a rel sak nitin mai a. A ute Thlam tur a sak zawh chuan zan khat chu Vawra chuan a pa hnenah,"Ka pa,Hmunzau lamah chuan ka va kal tawh teh ang. Ka u te lo haw hun tur lah a hriat siloh a. Kan tlai chhe lutuk palh ange" a han ti a. Vawra pa chuan," Vawra,mahi chauha kal chu i zuam tak tak amaw?" tiin a han zawt a. Vawra chuan," Ka pa,zuam tehreng e. Khaw hla lutuk pawh anilo a. Hlauhawm engmah a awm hlei nem" alo ti sam et a. Mahse a pa chuan," I ute chu ngah rih phawt a ţha zawk e" a ti ta tlat mai a. Tih theih dang nei heklo le Vawra chuan lungtlu lo zetin a ute lo haw hun anghah mai chu angai dawn ta a. Mahse nikhat chu a chhungte an awmloh hlanin Vawra chuan an Thul mawnga an ţhi dah ţha deuh deuh pathum chu la chhuakin Hmunzau lam pan tur chuan a insiam ta sawk sawk mai a. A chhuah dawn chuan an ţhenawmnu hnenah ," Ka pate khan minlo ngaihtuah suh se. Kalo haw leh vat ang. Min rawn umzui tur tumah rawn tir bawklo sela aw" tiin a han chah a. Tichuan Lungchuan khaw chhuahsanin a hmangaih Dengi zawng tur chuan a chhuak ta a.
Bung-45
An khua a chhuahsan aţanga ni nga lai aliam hnu chuan Vawra pawh Hmunzau khaw ram chinah chuan a awm tawh a. Vawra chu a in ngaihtuah nasa hle mai a. Dengi chu dam takin alo awm angem,sala man tuten nupuiah anlo nei lui mai angem?? Tlanchhuah chu anlo phal reng angem? Tihte ngaihtuahin a rilru a buai hle mai a. Hmunzau khaw lal chuan amah chu khualţha thlenin alo thleng thei angem tihte chu a ngaihtuah noh noh a. Khuaa luh chu a huphurh ru hle mai. Dengi hmuh thuai thuai chu a chak em em rualin nungdamin ava hmulo maiang tih pawh a hlau ru hle bawk. Chutia thil tamtak ngaihtuah chunga a kal boh boh lai chuan a rin aia hmain Hmunzau khaw kawtchhuah chu a thleng ta hlawl mai . Kawtchhuahah chuan Hmunzau khaw mi ţhenkhat feh kal hawng pawh anlo ţhu ve a. Chutia mikhual tlangval an han hmu thut mai chu ţhenkhat chuan mak tih hmel takin anlo en hrek hrek mai a. Han ţhut khawmuan ve deuh a duh avangin Vawra chu kawtchhuahah chuan an ţhu ve rih a. An ţhu fel deuh chiah tihah chuan tlangval pakhat hi a ţhutna lam pan chuan alo kal a. Vawra ţhutna lai alo thlen chuan tlangval chuan,"Ţhianpa,khawi lam khual nge maw innih le" tihpahin a kiangah chuan ţhuthmun a rawn rem ve a. Vawra chuan," Lungchuan khu aţanga lokal ka ni e. Ka chhungte tlawhchhuak tura lo zin ka ni" alo ti thuai a. Chu tlangval chuan,"A ni maw. Ilo kalna a hla hle mai a. I chhungte chu anlo dam ţha em ang chu maw" a han ti leh a. Vawra chuan," Khuanu ven na zarah dam taka an awm chu ka beisei. Inhmuhte pawh a khat a. Hmunzau khaw nawm zia an sawi nasa bawk nen han cham rei deuh pawh ka tum ani" a han ti a. Chu tlangval chuan," Khaw nuam tak zawng ani ţhin a. Mahse hei lo hal hma deuh aţang khan hripui chi khat alo leng hlauh mai a. Nunau leh hmeichhe awm nem zawkte phei chuan an la na hle mai lehnghal. Tamtak an thi a,a nasat zual lai phei kha chuan khua hi rauhsan kan tum hial asin. Tunah erawh chuan hripui chuan min kiansan deuh tawh a. A vei sa bak chu tumah an nat belh talo. Mahse damlo tamtak anla awm mek a. Nunna chan tawk paw kan la awm zeuh zeuh ani. Kan lalpa pawh amangang khawp mai" a rawn ti ta. Chu thu a hriat meuh chuan Vawra chu a hlauthawng ta em em maia. Dampui khaw ho sal man chungchang chu tlangval hnenah chuan han zawh mai a duh rum rum a. Mahse chu zawng thil tih chi ani silo. Vawra chuan," A va han zialo ve le aw. Thawi dam theih anni lo em ni" tiin a han zawt leh a. Tlangval chuan," Kan bawlpu te pawhin theihtawp tak meuh meuh an chhuah ani. Hridai te kan han theu ve bawk a. Mahse awmzia a awm tak tak lo a. Kan Ar vulh tepawh kan that zo titih mai. Naupang an thi nasa ber a. Chutah hmeichhia,mipa lam chu kutţang thliaka chhiar tham bak an thiin ka ringlo. Tunlai tak chuan kan khua hi a ngui ruai mai ani. I chhungte chu an dam tlan ngei ka beisei. Ka han kalsan tawh ang che" tihpahin a tho a,khaw lam panin a kal ta a. Vawra erawh kawtchhuahah chuan ala ţhu renga. Feh kal hawng ho zingah chuan Suartui khaw mi leh sa an awm leh awmloh alo mitmei ru deuh a. Mahse khaw thim dawn thleng pawh chuan a hmel duhang chu a hmu ta lo a. Khua a luh phawta engkim zawh chian chu a rilruk ta zawk a. Tichuan khaw lam pan chuan a kal ve ta a.
Hmunzau khua a han luh chuan an kal hmasak lai anglo takin ral veng anlo indah tawhlo a. Vawra chuan pan hmasak ber tur lam pawh a hre lem hlei lo a. Khaw luh tirh lai chuan an ding deuh vang vang mai a. Chutih lai tak chuan an kal hmasak laia a inbiak pui putar kha alo lang hlawl mai a. Tiang hawl chungin a khaw lam pan chuan a rawn hei ha phei dap dap mai a. Vawra lo ding reng a han hmuh chuan putar pa chuan," E khai vala,ka hmuh hnu ini chiah mai. Engatinge khatia i din reng a" a rawn ti a. Vawra chuan putar chu alo en thuaiin," E,ka pu,nangmah inia law. Hei inkhuaah lo zin ka tum a. Thlen in tur kalo ngaihtuah vel mek ani" alo ti thuai a. Putar chuan," Chuti ani maw. Thlenna tur dangte i hre lemlo anih chuan kan inah lo thleng mai ta che. Ka tupa nen chauha awm kan nia. Ei tur tuihnai tak erawh kan nei lemlo a" tiin Vawra chu an ina thleng turin a han sawm a. Vawra pawh chuan lawmthute sawiin putar pa chu a zui ta nghal a.
Vawrate chu khawchhungah chuan an kal zel a. Khaw dang anglo takin naupang tualchai an vang em em mai a. Khua chu a reh deuh ţhiap bawk. Khaw mawng lam deuh an thlen chuan in pakhatah hian an lut a. Mipa naupang pakhat hian leikapuiah chuan Saihlum alo hrual mawlh mawlh a. A pu lo haw a han hmuh chuan," Pu,i awk em. Khawi kalo en " tihpahin a pu iptepui ah lai chu a han la thlaa. Iptepuiah chuan Vahrit chal pahnih leh Varung bakah Hleikapsen hi alo awm. Naupang pa lawm lutuk chu a phul hlut mai a. Vahrit chal te chu pawna a ţhiante hmuh atan tiin an khai chhuak nalh nalh a. Putar chuan,"Thanga va rei lutuk lo la aw. I nu te kha han pe nghal bawk la" tiin a au zui a. Putar bawk chuan," Tlangval,ka hming sawi na chang kalo hre hauhlo mai a. Laichhawna ka nia,kan nu in min thihsan aţangin ka fanu fapa khan min rawn awmpui ta ani" a han ti a. Vawra pawh chuan a hmingte a han sawi ve a. Tichuan titi malh malh pahin Vawra chua pu Laichhawna sava leh Hleikapsen hawn chu an puah mawlh mawlh a. Zanriah hmeh atan Varung sa chu an han siam nghal a. Pu Laichhawna chuan phallo hle mahse Vawra chuan ei a rel ta vek mai a. Chutih lai chuan Thanga pawh a ţhianteho nen anlo lut a. Thanga chuan,"Pu, ka nu in chaw lo ei chho mai ula ati nia" a rawn ti lang lang a. Pu Laichawna chuan," Mikhual kan nei tih han hrilh tawh. Zan dangah kan ei chho zawk dawn nia" alo tithuai a. Thanga chuan,"Anih chaw minlo eisan miah su aw" tih pah chuan a tlanchhuak leh ta nghal a.
Zanriah ei khamah chuan Vawra leh pu Laimana chu tapchhaka mei lum ai pahin an ti ti a. Pu Laimana chuan," Vawra,kan khuaah hian lokal chhan i nei ngeiin ka ring a. A hma pawh khan kan inhmuh tawh kha. Ka hriat ve chi teh anih chuan ilokal chhan min han hrilh ta che. Puih theihna che pawh ka nei mahna" tiin a han zawt a. Vawra chuan alo kal chhan zawng zawng leh thil awmdan chu an hrilh ta vek mai a. A sawi zawh chuan pu Laichhawna chuan," Chuti alo ni maw. I chhungte chu i tlanchhuah theih ngei ka ring a. Mahse nungdamin anla awm angem tih erawh hriat harsa tak tur ani" a han ti a. Vawra chuan," Hripui vang chuan an thi vek em chuan ka ringlo ani" alo ti a. Pu Laichhawna chuan," Hripui vanga thi chu a tlem zawk anni ang chu. Khatia Dampui lamin min rawn zawm takah khan an sal mante nen a chawm vek alo harsa ta em em a. Chutihlai karah sal zinga ţhenkhat kha anlo damlo ţan a. Ei tur mumal dawng heklo le, an damlo ta sup sup mai a. A tawpah phei kha chuan kan khaw mi leh sate ngei pawh an rawn damlo chho ve ta zel a. Hripui chi khat chu aleng ani ta der mai. Sal zinga mite kha an thi hmasa ber a. A damlo hmasa berte annih bawk avangin kan lal chuan Hripui kenglut tuah sal te chu ngaiin a damlo hmasa tam zawk chu a tihhlum tir ani. Mahse ţhenkhat erawh an damchhuak tho a. Tuna la damlo mek tepawh anla awm a. Chung ho chu kan khaw mi leh sa damlo ve tho te nen khaw pawnah sawn an awmna tur bika siamah kan dah ani. Kan lal chuan anmahin nena in kalpawh a remtilo a,eitur erawh khawtlangin kan pe ţhin thung. In khaw mi leh sa hripui vei velo te erawh kan lal leh upate rawng bawlin an awm a. Hmeichhia leh naupang te erawh kha chu hripui khan a khawih nat em avangin a damchhuak an tlem hle mai. Ei tur mumal an hmulo bawk nen. A pawi tak tak ani" a han ti chuai raih a. Vawra chuan," Anih kapu,hri vei la damlo mekte awmnaah chuan min hruai thei angem?" a han ti a. Pu Laichhawna chuan," Kan lal hnena phalna lak hmasak phawt angai ani. Tumah anmahni tlawh pawhlo tura lalin a duh avangin an awmna lama kal luih tumte dang turin a tlangvalte a dah reng a. Kan chhungkhat lainate pawh an awm a. Mahse kan kan theilo. Lal chuan hri chu a darh leh mai a hlau ani. Ka nupui ngei pawh chutah chuan a thi ta ani" a han ti a. Vawra chuan,"An van mak ngai ve aw . Tunah hian lal chu han be chhin ta ila. Minlo chhang ţha duhin i ring em" a han ti a. Pu Laichhawna chuan," Chhang ţha duh tehreng e. Sal tepawh kha a unaupa Dampui lal hnenah khan chhuah vek turin a ti alawm. Mahse hri kha alo darh ta sia. A duh loh dan angin a chet a ngai ta ani" a han ti a. Tichuan Vawra chu a tlai hmain lal in lam pan chuan a kal ta nghal a.
Hmuzau lal in a han thlen chuan lal ina len luh chu a han dil a. Chutah tlangaupa lo chhuakin Vawra chun lal inah chuan a hruai lut ta a. Lal inah chuan Hmunzau lal leh upate bakah Dampui lal pawh alo awm ve a. Suartui khaw tlangval sala an chhawr pahnih an lo awm bawk a. Vawra an lo hmuh chuan Suartui tlangvalte chuan mak tih hmel takin anlo en ha mai a. Hmunzau khaw lal Rokhuma chuan," Tlangval,khawi lam khual ngei inih le. Engti tura ka khuaa lokal nge inih"aw ngaihno beilo fa hran chuan a rawn ti a. Vawra chuan," Lal pa,Lungchuan khua aţanga lokal ka ni a. Khual thuthang aţangin Dampui khua Hmunzau lama an insawn tak thu leh Suartui an run ţuma an sal mante pawh an chhawm zel thu kan lo hriaa. I salte zinga pakhat tlanchhuah ilo phal tak mialin tia i khawngaih dil tura lokal ka ni e" a han ti a. Rokhuma chu an ngawi vang vang a,a zu no dawm a tlak zawh chuan," Lungchuan khua leh tui maw inih a. I chhungte chu i rawn ngaihven tlai hret ani. Kan khuaa hripui leng vangin a tamzawk an thi tawh a. Tuna ala thi bang tepawh khawdai lamah an thih hun nghakin an awm chawt mai ani. Nunau leh hmeichhia an thi nasa em em a. Mipa lam erawh an him deuh thung a. A tir kha chuan chhuah vek mai ka rilruk a. Tunah erawh Suartui khua chenna tlak anih tak siloh ah chuan an tan haw lehin awmzia anei tawhlo ani" a rawn ti a. Vawra chuan,"Lal pa,min khawngaihla, ka mi duh chu tlanchhuah min phalsak hram ta che" a han ti leh a. Lal chuan," Phal tuk e. Khawchhunga sal kan kawl zingah hian i mi duh an awm leh awmloh i zawng anga. An awm chuan anmahni chu hruaiin i kal thei ang. Khawchhunga an awmlo anih chuan an thi tawh emaw,khawdaiah an awm emaw ani dawna. I duh chuan i va zawng zui thei ang. Mahse khawdaia awmho zinga iva kal chuan ka khuaa i luh leh ka phalsak dawnlo che ani. I mi duh hming chu han sawi ta che" a han ti zawm zat a. Vawra chuan," Lal pa,ka mi zawn chu nula ani a. A hming chu Dengi ani" a han ti a. Lal Rokhuma chuan," Hmeichhia maw,khuaah chuan a awm ka va han ring talo ve. Tlangaupa,nang ngalchakah sal zinga pakhat kha han ko ta che" a han ti a. Tlangaupa chu a chhuak nghal a. Lal bawk chuan," Tlangval,i mi duh chu hmeichhia ani a. Nungdama alo la awm anih chuan man awmlo in i hruai hawng thei ang. Hri vei zingah alo awm anih pawhin i duh chuan i hruai thei a. Hri chu len chhunzawm tawhlo mahse fimkhur thilah ka khua hi i rawn rah erawh ka phalsak tawhlo ang che" a han ti leh a. Chutih lai tak chuan tlangaupa leh sal tlangval pakhat hi an lo lut a. Sal tlangvalin Vawra a han hmuh chuan a hlim ru hle a. Mahse inbiakna chi ani silo. Lal chuan sal tlangval hnenah chuan," Hripui vei zingah Dengi tih hming pu an awm em. Nung damin ala awm em?" tiin alo zawt a . Sal tlangval chuan," Lal pa,kan va dahchhuah ni kha chuan Dengi chu ala awm ngei alawm. Tunah chuan a thi nge dam hriat ani tawhlo ani" alo ti thuai a. Lal chuan," Anih chuan a ţha e. I kal thei tawh ang" alo ti hluk a. Sal tlangval chu lal in aţang chuan a chhuak nghal a. A chhuah hnu chuan lal bawk chuan Vawra hnenah," I mi zawn chu khawdai lamah awm anih hmel a. Khawdaiah sawn ka khua leh tuite pawh thih nghaka awm tam tak an awm a. Kan buaipui chuan hri a leng leh ang tih kan hlau si a. Kan inven theihdan awmchhun ani bawk nen. Tunah chuan i mi duh awmna i hre tawh a. I duh chuan zanin la la hian i kal nghal thei ang. Ka tlangvalten kal phalna chin thleng an rawn thlah ang che. Tin,tlanna sum engmah angailo ang" a han ti a. Vawra chuan ,"Lal pa,ka chunga i ţhatna avangin ka lawm e.Zanin la la hian ka kal nghal mai ange" a han ti a. Lal chuan,"Kal lo tur chuan duh hle che mah ila dang lui thei che ka nilo a. I mi duh chu dam takin va hmu mawlh ang che" a ti a. Tichuan Vawra chu lal in aţangin a chhuak a. Amah thlah turin tlangval pakhatin a zui bawk a. Vawra chu a thlenin lamah pawh kal buai talo in khawdai lam chu a pan ta nghal a.
Vawrate chu khawdai lamah chuan an kal zel a. Khua chu kal pelin ramhnuaiah an lut phei a. Khua aţanga thui fe an kal hnu chuan Vawra hruaitu tlangval chuan," Helai thleng hi kalo kal theih chin ani. Helaiah hian ei leh in tur kan va dahsak ţhin a. Anmahni in anlo lam mai ţhin ani. Tunhnai teah phei chuan kan eitur dah pawh hi a ngai ngai hian a awm ta fo mai a. A khat tawk chauhin anlo lam tawh a. An chau zual deuh tawh ani ange. Kan lal thil tihdan hian khaw mipui tamtak,an chhungte hri veia awm ve te lung a tiawilo em em a. Mahse lal thupek anih bakah kan tana ţha zawk anih avangin harsa titakin kan chhungte chu thi turin kan dah bo ta mai ani. Tluang takin i kal dawn nia" tihpahin Vawra chu a meichher ken a han pe a,khaw lamah chuan a kirsan ta a.
Vawra chu akal zel a. Lal khan khawdai maiah atih avangin a thlen thuai a inbeisei deuh a. Mahse khua aţang chuan alo hla phian mai a. Rei fe akal hnu chuan hla vaklo a mei eng teng teng hi a hmu thei ta a. " Dengi lo tuar hram hram rawh" ti mawlh mawlh chungin hmanhmawh takin mei eng lo chhuahna lam pan chuan a kal ta hlawk hlawk a. Mei eng awmna lai ava thleng chuan ring tak mai hian," Dengi,Dengi,keimah Vawra kalo kal e" tiin a au tuarh tuarh mai a. Chutih lai chuan hmeichhe aw ngei mai hian," U Vawr,he lamah " a rawn ti sap mai a. Vawra chuan aw lo chhuahna lam chu a pan nghal a. Aw lo chhuahna lai ava thlen chuan nula pakhat hi mei lum aiin alo ţhu khur bauh bauh a. A kiang velah chuan hmeichhe dang an mu nual bawk a. Nula lo ţhu chuan Vawra chu alo en kar mai a. A hmel chu a dang bal mai a, meichher engah pawh chuan Vawra chuan tunge ani tih a hre thei mailo. A tawpah chuan an khaw nula Neihthangi ani tih a hre thei ta. Vawra chuan," Thangi,khawnge Dengi" tiin a han zawt a. Neihthangi chuan a ţhutna kianga nula mu chu an kawk mai a. Vawra chuan ava pan hnaih vat a. Mei bula Dengi lo mu bal chu a va kuah chawt mai a. Dengi erawh mitthi ang maiin a mut ngaiin amu reng a. Vawra chuan," Dengi lo tho teh,Nangmah lam turin kalo lal hi" a han ti a. Chutah Neihthangi chuan," U Vawr,"A taksa a chau tawh lutuk a. A muhil anih kha. Tunah chuan i tiharh rihlo teh ang" alo ti a. Vawra pawh chu harchhuak thut ni awm tak hian Dengi a kuahna chu an thlah riai riai a. Neihthangi kiangah chuan ţhuin thil awmzia a han zawt a. Neihthangi chuan," U Vawr,sawi dawn chuan a thui lutuk . Kei hi he laia awm zingah chuan a chak ţha ber ka ni tawh a. Tunah chuan chawei peih pawh an awm tawhlo ani. Dengi pawh hi a dam chhuah ka beisei hauhlo mai. I hming alam reng a. A beisei abo hnu deuh kha chuan chaw pawh a ei duh talo a. A chau ta deuh deuh ani" a han ti a. Vawra chuan," Ka rawn tlai lutuk ani. In awmna khua ber kha kan rawn hriatchhuah meuh chuan kan tlai zo tawh a. Tih theih a awm tasilo " a han ti chuai raih a. Neihthangi chuan," U Vawr,khaw mipui zawng zawng khan kan ngai em em che u asin. Awm ula chuan heti hi kan ni lo tur" tiin a ţap ta hawm hawm mai a. Vawra chuan," Thangi,insum teh khai" tihpahin Thangi chu an kuah a. Thangi chuan inhnit hlawp hlawp chung hian," U Vawr,en teh nangmah hmangaih em em tu che hi. A taksa pawh hmuh tlak a awm tawhloh hi. Ţhiannu lo harh teh,U Vawra alo thleng ania" tiin ţah hla han chham a. Vawra chuan hnemin a tawpah chuan Neihthangi pawh a bang ta a. Vawra chuan," Thangi,mitthi tamtak an awm awm sia. Ruang ţawih rim ka va hrelo ve" a han ti a. Neihthangi chuan," Kan thlang lawkah khuan kham sang tak a awma. Chutah chuan kan nawr liam mai ţhin ani" alo tivar a. Vawra chuan,"Muhil tawh rawh. Kalo veng ang che u" a han ti a. Neihthangi chu Dengi bul tetah chuan a mu a. Vawra chuan apuanhlap ken chuan an khuh a. Dengi muhil lai chul heuh heuh pah chuan," Ka hmangaih che asin" a tisap a. Tichuan thingbul nghengin a ţhu ta a.
A tuk zingah chuan Vawra chu hma takin atho a. Dengite chu an la muhil bam mai a. Vawra chuan an awmna vel chu an fang kual thuak thuak a. Tumah reng chechang peih an awm tawhlo tih a hmu thei mai. Chulai hmuna awm zawng zawng chu hmeichhia deuh vek anni a. Naupang tlem azawng an awm bawk a. Mipa erawh an awm mang lo. Ţhenkhat chu an natna in a sawp hneh em avangin an meng pual rulh rulh a,ţhenkhat anlo leng arh arh bawk a. A tam zawk erawh mitthi tawh ang maiin an lo tlu khawng a. Chutia Vawra a vah kual lai chuan Neihthangi chu a rawn harh a. Vawra chu a rawn au a. Vawra chu Neihthangi te awmna lamah chuan ava kal thuai a. A va thlen phei chuan Dengi chu alo ţhu chhuak hlawl hi alo ni a. Dengi hmel chu a hmuhtlak ani mang tawhlo,a hmai sen no chek te kha a dang bal tawh a,a hmui te lah a duk dum zo a. A mitmeng fim kak tepawh ramhuai mitmeng ang maia rapawm ani tawh ani. Vawra lo phei a han hmuh chuan Dengi chu a mit aţangin mittui alo luang zawih zawih mai a. Vawra ava thlen phei chuan Vawra chuan," Dengi,ka lo kal asin. Nagmah lam tur chein kalo kal asin" tihpahin Deng chu an kuah ngawih ngawih a. Dengi chuan thei leh theilo,"U Vawr,min theihghilh kha ka ring ngailo reng ani. Min hmangaih tiraw?" a rawn ti a. Vawra chuan," Dengi,khawvelah hian nangmah lo chu hmangaih dang ka neilo. Tunah chuan kan haw anga. Hlim takin kan awm tawh dawn alawm" a han ti a. Dengi chuan," U Vawr,min la nei duh angem. En teh ka taksate a chhiat tawh zia hi" a rawn ti leh sa sa a. Vawra chuan," Dengi,engtin pawh awm la,ka tan chuan i mawi ber ani" a han ti a. Dengi chuan ţawng chhuah leh ahan tum a,mahse a taksa achauh em avangin a muhil leh ta. Chutih lai chuan Neihthangi pawh tuium khata tui kengin alo thleng ve chiah a. Vawra chuan," Thangi,i ţha maw. Damlo hmel pawh i pu miahlo mai" a han ti a. Neihthangi chuan," U Vawr,ka damlo ve hlei nem. Ka rilru hah vangin ka cher chhe zo anih hi. Ka ţhiannu damlo kha ka lainat em avangin damlo angin ka awm ve mai mai alawm" alo ti reuh a. Vawra chuan,"Nula fel tak ini" a han ti ringawta.Neihthangi chuan chhan pawh chhang lemlo in a nuih liam mai a. Chutih lai tak chuan Vawra thlenin putar kha alo lang hlawl mai a. Vawra chuan maktih hmel takin," Ka pu,enge ni ta ngai" a lo ti a. Pu Laichhawna chuan," Tlangval heta ţang hian in chhuah vat angai ani. Kan lal chuan damlo thi bang zawng vawiina thah vek a rel a. Tunah pawh hian anlo kal mek tawh ang. Hmun him lamah tlanchhuak vat rawh u" a rawn ti ta. Vawra chuan Neihthangi chu an ko vat a. Pu Laichhawna hnenah chuan," Ka lawm lutuk e. Min chhanhim ani" a han ti a. Pu Laichhawna chuan,"Tluang takin kal ang che u. Hei kalkawnga in mamawh tur" tihpahin buhfai ip a rawn ken chu Vawra a han pe a. Tichuan lawmthu te inhrilh tawnin pu Laichhawna chu khaw lamah a let leh ta a. Vawra chuan," Thangi,in kal thei angem?" tiin a han zawt a. Neihthangi chuan," Thei mai ang,i kal thuai ang" alo ti a. Tichuan an mamawh tur ang ang te an lak khawm hnuin Vawra chuan Dengi chu an paw lawp a. Khaw hel zawng chuan a kal pui ta a. Neihthangi chuan an hnungah a rawn zui ve bawk a. Damlo dang awmve te erawh kawng kal thei hmel pu an awm tawhloh avangin thih mai chu an hmabak dawn ta ani.
Vawra chuan Dengi chu zo takin kal pui thei mahse Neihthangi chu a kal chak theilo a. Kalkawngah chuan a khat tawkin an chawl mai bakah remchangah chuan an mu hahdam leh ţhin a. Neihthangi hi hri kai velo mahse a ţhiannu a ngaihvenna lamah a hah em avangin a chau rau ve hle ani. Kawng lakah chuan Dengi chu a ţawng chhuak ve leh zauh ţhin a. A bak zawng chu mitthi tawh nen an danglamna a awm chuang awmlo e. Vawrate chuan an chawlh apiangin tui te an han tulh a. A taksa te sil faiin chaw te an han barh ve ţhin tak na a,a ni tel in a chau deuh deuh mai si. Dam ţha pangngaia kal ni heklo le. Hmunzau leh Lungmam inkar nihnih kal vel chu ni ruk hnuah an thleng pha chauh a. Lungmam khaw hlui an thlen chuan in rawp ve tawh tak lo la ding pakhatah chuan an han innghat a. Vawra chuan Dengi chu dimtein an muttir a. Neihthangi erawh hah viau mahse chaw mumal taka a ei avang leh thlamuang taka a awm theih tak avangin a chak sawt hle thung. Dengi dinhmun erawhin hniam lama pan zel a. Vawrate chuan an en tawp ani tawh mai. A khat tawk chuan arawn harh ve bawk ţhin tak na a. A muhil zui leh mai ţhin a. Chaw a ei theihloh avangin a cher chhe tawh takzet a. A ruh hlang ang mai ani tawh awm e. Lungmam khaw hluia an riah zan chuan Dengi chu a na zual ta hle mai a. A thaw hrawih hrawih a. Vawra leh Thangi chuan beidawng takin an en tawp mai a. Mak tak maiin Dengi chuan tui a rawn lam a,Vawra chuan tlemte ahan in tir a. Chutah Dengi chu lo mengin zawi sap hian," U Vawr,kan in chu ka thleng zo ve dawn talo anih hi. Min hmangaihna zawng zawng avang hian ka lawm em em ani. Chuan Thangi,i ţhiannu min thlahthlam lo a,min hmangaih avangin i chungah ka lawm em em bawk ani" a rawn ti a. Sawi zawm a tum leh lai chuan a hrawkah engemaw hian a rawn hnawh a. Vawra chuan hahdam turin an ti a. Mahse Dengi chu lo ţawngchhuak lehin," U Vawr,i nupui niha hlim taka awm kha ka chak ber ţhin asin. Tunah chuan ka kalsan dawn che a. Kei aia nula hmelţha leh duhsak phu zawk tawnga fanau maltluan chawia hlim taka awm turin ka duh che ani. Pialral aţangin kalo thlir reng ţhin dawn che nia. U Vawr,ka hmangaih ber reng fo ang che. Keimah min zawnga ilo kal leh ringawt pawh hi ka tan chuan a hlu asin. Ka hmagaih......" a sawi zo thei tawhlo. Dengi chu a thaw hrawk hrawk a. A meng pual ralh ralh a. Vawra chuan Dengi taksa khur dawt dawt bawh beh pah chuan," Dengi,ani theilo,min kalsan theilo ang" a ti chul mai a. Neihthangi erawh a ţhiannu pawh en ngamloin alo ţap zawih zawih mai a. Rei vaklo a chuan Dengi taksa khur hlawk hlawkte chu a rawn reh tial tial a. A thaw pawh muang tawh hle mai a. Vawra chuan Dengi chu a au lawm lawm a. Mahse chhawntu tur a awm tawhlo. Dengi taksa chu a zawi tial tial a,a tawpah chuan a hmangaih em em pialrala lo nghak turin a rauthla chuan a lei taksa chu a kalsan ta ani. Vawra insum zolo chu a ţap rawng rawng mai a. Dengi taksa vawt vek tawh chu a pawm vawng vawng a. Dengi chu a au vak vak a,kohkir rual ani tawh silo. Tih theih dang awm tawh heklo le,Vawra chuan hreh tak chungin Dengi chu a thlah angai ta si a. Lungmam khaw hluiah chuan a thlan tur laiin Dengi ruang chu an zalh ta a a. A thlan chhinchhiahna atan lung dahkhawmin mittui nen hreh tak chungin an kal san ta ani.
Vawrate an in an luh ni meuh chuan a nu leh a farnute chuan Vawra chu ruang ţah tak hian anlo ţah mai a. Vawra pawhin insum harsa chu a ti ngang mai. Mahse a mittui far chu a chhungten hmulo se a duh ani. Vawra ute chuan Vawra chu pa chang taka awm turin an fuih mawlh mawlh a. Vawra pawhin a ute fuihna chu zawm a tum hle mai. Neihthangi pawh Vawrate inah chuan awmin Vawrate chuan chhungkhat ang chiahin an en ve a. Vawmaia erawh chuan farnu angin a en theilo tlat thung a,Neihthangi zun chuan a phuar bet tlat mai ani. Vawra chuan Dengi chu ngai hle mahsela chu thihna avanga beidawn chu a tumlo bur ani.
Dengi thih hnu chuan Vawra chuan nula lam angaihsak zui peih talo a. Lungchuan khuaah chua lo duh ve tu awm ţhin mahse tumah rengin a rilru an la peng thei talo. Khawchhunga awm nuam a tilo a,ram lamah a inkulh deuh reng mai a. A u leh naute pawhin hauh enah pawh an en chuang lo a. Vawra chu loah a riak deuh reng mai a. Sa lah chu a la thei em em a. Ram a riah changte chuan sa a pelh loh leh ral beih dan te a zir kual ta ţhin a. A ute nen pawh nunchan an zir ho ta fo a. A ute chuan Vawra chu a chhe zawng nilo a ahmasawn zawnga a kal avangin an lawm ru hle ani.
Kum a vei leh meuh chuan Vawra u Vawmaia leh Neihthangi pawh anlo insuih rem ve der tawh a. Vawra u Hlirthangi pawh Lungchuan pasalţha Chungthanga nen an lo insuihrem ve bawk a. A uten nupui an han neih tak vekah chuan Vawra chu a amal ru ta riau mai a. Lungchuan khuaah chuan a khawsa thei pawl tak anni ve tawh a. A ute chuan Vawra chu nupui nei ve tawh mai turin an han tifiam ţhin a. Vawra erawh chuan a duh zawng a hmuhloh thuin a chhang mai zel a. Mahse a thinlung chhungril taka thi theilo,hmuh leh chak em em nula pakhat ,Dengi tihloha a hmangaih theih ber tura a rin chu a hual lawk ru ve kiau si a....
No comments:
Post a Comment