Pasalṭha Chawngvawra. 1. Ziaktu - Chawnga Hmar

             Bung-1

        Ţhalvaekchar lai ani a...Tlâng leh mual tinte chu Romei in a zam hnan chûk a...Fartuah leh Vaube te an pâr vul chûk mai bawk a..Lui dung chu Sava tui tlân paha inchhaih thâwmin a luah khat bawk.Lo hâl hun a la nihloh avangin mitin mai chu an hunawl neihte hlâwk taka hman tumin an buai tlang hle mai..

        Lal Lianvunga khua Suartui hi khawlian ţha pangngai ve tak ani a...In 250 bawr vel zet chu anni awm e...A khawthleng a rem viau lo naa luh khân a tlem em avangin râl lakah an him phian thung a ni..Lianvunga hian Fapa pahnih leh fanu pahnih neiin a upa ber Raltâwna hi tlang hran changin Suartui aţanga chawhma kal vel lek Bungmual hmun nuam laiah Lungmam khua a din bawk a...Darchawii leh Thanghniangi te hi lal fanu niin khual kai khawpa hmelţha leh rîmrawn anni bawk...

        Zing khua alo var a,tuk dang ang bawkin Lal inah chuan Lal leh a upate chu an titi ho laih laih a...Lal Lianvunga chuan,"Upa Khamvel,mi huatthu chu kan va sawi em lo anga,tukţhuan hmeh atan vawkno thar lam ei a va chakawm ve mawle..Han man mai tur azeng lah ka hria ani silo,min han bengvar ta che" tiin beisei nei takin upa Khamvel a chu a han en a..."Venglai a Pu Tuţhiaua te vawkpui khan khawdai maiah no a nei thar e an tih kha maw..Tlangval rual kan va man tir dawn em ni ang" pu Khamvela chuan a han ti a..Lal chuan,"E.Pu Khama nge nge,i bengvar na rawh e..Tukin chu tukţhuan kan kiltlang ani ang chu.Nang Pu Kaihlei,zawlbuka tlangval sawm rual vel hoin vawkno chu in va man dawn em ni ang " ati a..Tichuan Upa Kaihleia leh tlangaupa chu Zawlbûk lam panin an chhuak nghala..Tlangval sawm rual zet khawmin Khawdaia vawkno man tur chuan an chhuak ho dam dam a..

         Khawdai an thlen chuan Vawkno man dawn a a pui lo nawr beh nan leh mahni lo inven nan thingtuai ban rek tiat vela lian, a hmawr lam a kak pathum vel awm chu an han la sang sang a..Upa Kaihlei a chuan Vawk chungchang chu sawi zung zungin,A pui ber chu hliam palh a hlauhawm thute,no enkawl lai anih avangin pem neih tir loh hram tum turte, a no chhan nan alo bei anih pawha lo nawr tawm mai turin tlangval te chu an chah mawlh mawlh a..Vawkpuiin a no neih nan a a thiam ang tawk a a bu chhep,tlema hmun zawl lai deuha mi chu an hual phei ta ţhem ţhem a..Ţhenkhatin a pui anlo chhaih buai laiin a ţhenin a no anlo laksak ve thung dawn ani..

          Muangchangin an veh phei a,an thleng dawn ţep tihah chuan Vawkpui chu a hawk dawt a,a hmasa ber a kal tlangval chu rawn hap tumin a rawn tlan phei ta chiam a..Lo inring lawk sa vek annih avangin Thing kak chuan anlo hawlh tawm nghala..Vawkpui chu hawk dut dutin alo ţangna thei phian mai lehnghal..Chutia amah hawlh bettu te a buaipui mek lai chuan midangin a bu chhep a ano chu anlo la chhuak mek bawk a..A no ngek rawg rawng thawm a hriat veleh chuan a no mantu te lamah chuan chak mangkhengin an tlanphei a..Mahse hringmi nge nge chu hnehchhuh theih va ni suh..Ano chu a ui hle ni tur ani,khaw thlen dawn thlengin a rawn umzui a..Tlangvalte chuan hnawtkiangin khawdai lamah chuan ngûk hrut hrut chungin a kir leh ta hnu hnu..(Hmanlai chuan vawkin a awm ngaihloh avangin Vawk hian khawdaiah te no annei mai ţhin a..Sanghal chi ve tho annih avangin bu an chhep ve ţhin ani..Anno ven nan chuan an ţang na ngam ve em em a..Lak an harsa ve hle ţhin ani..Hei hi ka pu min hrilh dan.) Tichuan Vawkno chu Lal in lam an panpui ta a..Chutih lai mêk chuan Zuksih ngaw,Kurung lui kamah chuan Upa Doţhiauva Fapate chuan Sazuk anlo hual ve mêk bawk a..Upa Doţhiauva hian fapa panga,Ramliana,Sawivela,Vawmaia,Kawlkunga leh Chawngvawra aneih bakah fanu pahnin Hlirthangi leh Ţuahpuii a nei a..Chawngvawra hi a naupang ber niin amah hi thingnawi fawm rual ani.A upa lam pahnih hian nupui fa nau neiin inhrang an chang tawh a..An vai mai hian Pasaltha huaisen tih a sawi theih anni vek a..Chawngvawra erawh a la nau deuh a.. A u te hian an hrual hneh em em a..Ral beih dan chikim,sahnu chhui dan leh inbuan dan thlengin an zirtir nasa em em ani.Chawngvawra(Vawra) lah hi tleirrawl phawk fe mai hi ani a.. A U te lo chu tumah a buan duhlo a,a inchai pui ngai heklo..Chuvangin a chakzia tuamahin an hrelo a..A ute hnung a zui zo dawnin a n hrelo hle nghe nghe..Naupang ber anih angin duat rawn a hlawh em em a..Ei ţha ţha ei na na na chu a pumrua a hleitlingin a hmel pawh a ţha na rawh e..

        Tun ţuma an ramchhuah hi Vawra ramchhuah vawikhatna ani a..A ute hian Silai a chelek an phal ve lo ani.Ui pahnih hruaiin Zukpuii an hual a.An Zukpui hual chu a fing phian mai a..A no puitling ve deuh tawh,la tlahrang chiahlo hian a zui ve bawk a..Vawra chu Silai kenglo anih avangin bûkah a ute zai ngaiin alo awm ve a..An buk hi Kurung li kam ţiauphoah an sak ani.Chutia buk kawt vela rilru helkham nei taka a vei a vei lai chuan buk chhaklam ngaw aţang chuan luipui lam panin thawm alo ri thla buan buan a..Vawra chuan a chempui chu ala nghal vata ..Enge anih tehreng tiin alo en kiau mai a..Thawklehkhata Sazuk patuai a ki tlem dawk tawh hi a rawn chhuak thut maia ..Lipuiah chuan a hleuh phei tamai a..Vawra lah Sazuk nunglai a vawikhat hmuhna alo ni nen..Sakhi emaw tiin,"Sakhi Sakhi" tiin a um a,luiah chuan a hleuh phei nghal a.Li pawnlang deuh a thlen chuan ava nangching hman a...A tui hleuh dawn khan Chempui kha vau kamah alo dah deih sia...Sazuk ke hnung lam pahnih ah chuan a man chat a..Tuiah chuan an in hnim leh bawrh ţhin a..Sazuk chu alo chak nangiang mai a..A ke chu an perh leh et ţhin a,Vawra pawh a chesual lek lek ta..A khûp leh a mal vel a pilh phung tawh mai a..Chutia a awmreng chuan a chelh hneh dawnlo ani tih hriain a aw rawl tawpin,"Ka u Ram Sakhi ka man ania,lo tlan ru " a han ti tuarh tuarh a..Rei fe a nghah hnuah chuan a u Sawivela chu a awmna lam pan chuan alo tlan hlawk hlawk a.." Vawra lo chelh bet tlat rawh" ti a au chungin a rawn tlan phei a..Liah chuan lut ve nghalin hmun leh hmunah Sazuk chu an kah chilh pawp mai a..Tichuan vaukamah an hnukchhuak a,Vawra chu a chauh em avangin a mu zangthal ta hial ani.

         Reilote ah chuan a ute ho pawh hmanhmawh baklenga tlan chungin an rawn thleng hlawm a..Silai a rik khan engemaw tak an besei deuh bawk nen.An thlen kim chuan Vawra chu an han en ţhap hlawm a..A mal vel leh a khûp Sazuk in a hliamna vel te chu Ramhmul damdawite an han hnawih a,an buapui nak nak a..Sazuk pawh chu sumnga ţha zet ani a..Buk lamah zawn pheiin an inchhawm phei ta hnak hnak a...

          Buk an thlen chuan an han ţhu thlandai tete a..Chutah an upa ber Ram a chuan Vawra hnenah chuan,"Taite hei ramchhuakin i la kal fo dawn a.Sazuk ,Saza leh Sakhi reng reng hi an ke hnung lamah a nung lai chu man loh tur ani.An ke hnunglam hi a chak ţha em em a..An han per tak tak hi chu fei khawh ang mai hi ani a..Mihring dulah te hian a tlum thawih thawih thei hial ang chu.Chuvangin a nung lai phei chu a ke hnung lamah man loh hram tur ani" a han ti charh charh a..Vawra chuan inthlahrung takin,"Ka u ka tihpalh ani,Sakhi emaw ka ti a,han reh hlum mai ka tum alawm le." A ti a..Chutah Kawlkunga chuan,"Taite,a pawi reng reng lo,hei i zarin Sazuk pakhat kan thal der tawh alawm,keini ve pakhat pawh kan la man loh hi" tiin a rawn ţawng thlamuan a..Chutah Ramliana bawk chuan," Ni e Taite,i hriatloh vang ani a,i thiamloh a awm reng reng lo." Tiin a rawn tuhnih ve bawk a.Amah vek chuan," Hei Silai te kan kap ri ta sia,tukin chu sa dang besei tawhlo in tukţhuante han ei kham ila,chawhnu lamah kan hual chhunzawm dawn nia" a n ti leh..Tichuan Sazuk te chu an han puah nghal a..Vawra erawh chu bûkah alo mu hle hle mai a..

         Tukţhuan an peih fel hnu chuan an kilho ta a.Vawmaia chuan," Kan Zukpui um hi rin aiin a fing daih mai a,khilai luang hmun zawl laiah khian a tlandan pangngailo deuhin thui fe fe in a zuang zawk zawk mai anih hmel a.Kan ui hruaite pawhin a hnu an hlauh lek lek mai .Rin aiin akn chhui rei phian dawn ani" a rawn ti a..Kawlkunga chuan," Vawiinah kan chhui fuhlo anih pawhin zan lamah a no a hlohna lai vel hi a rawn fang leh ngei anga,kan kahthluk theih mai chu ka ring ani" a ti a..Vawra chuan," Helai atang hian a tlanbo daih tawh ang chu kalo tia " a rawn tive a..Chutah Ramliana chuan," Taite,Sazuk te hian an no an hloh palh chuan an hlohna lai vel hi an chhuizui leh ţhin alawm," a han ti a..Tichuan puar takin tukţhuan an kil ho a..An kham hnu chuan an kamte ţhuah fai sawk sawkin an Silai te an han en fel leh te te a..

          Rei ngial an ţhut khaw muan hnu chuan chan insemin chhuan zai an rel ve leh ta a..Ramliana chuan ui pahnih hruaiin zing lama an sahnu hlohna lam panin a kal a..Vawmaia chuan tlang pangler,buk thlang lam chu changin chhak lamah chuan Kawlkunga a kal a,Sawivela chu Luipui kam lamah alo awm thung dawn ani...Ramliana leh a ui hruai te chuan Sazuk chu han luhchhuah an tum anga,tichuan midangho chuan a rawn tlanchhuahna khanah chuan lo changin anlo kap tawh mai dawn ani..

        Tui bur hmuam da velah chuan ui pahnih chu an bauh ta loh loh mai a.A chang leh tlang chu an han lawn liam a,reilote ah luipui hnaih lamah te an rawn bauh leh ţhin a..Chutiang reng reng a an in um kual chhung chuan ni a tla dawn suar ta mai a.Vawra chuan buk aţangin a ute chu an hlawhchham palh hlau takin alo hawi vel ruai maia..

        Thim thet thet ah chuan Sawivela chân khân lamah chuan Zukpui hrawl zet mai chu alo phei chhet chhet mai a..Sawivela chuan alo en reng a,.Kah rem hun nghak pahin a unaute an zai ve deuh bawk a..Sazuk chu ţiauphoah chuan a rawn phei zel a.Thui pawh rawn phei zui tawhlo in a ţhingţhi hnawk a,a bawk ta hle hle maia..Sawivela chuan Silaimu sen a ngai tawhlo tih hriain a unaute hriat tur chuan an kûk raih raih a..Tichuan Sazuk awmna lamah chuan a chempui phawrhin a a kal phei ta chhak chhak a..Zukpui chuan alu a lo len hru hru a,a lei te a dawk vek tawh a,tlan peih chi ziazang ani talo...

         Tuibur hmuamda vel a nghah hnu chuan a unaute pawh anlo thleng kim a.An ui hruai pahnih chuan Zukpui chu an han seh leh chat chat ţhin a..Ramliana chuan," Kan Sazuk chu a chau hle ani maw,a khawngaihthlak zawk mange..Sawivel nang a hmu hmasa tuah,a hnuk han chhahsak tache,na tuar tir reng zawng a ţha ngailo" an ti a..Chutia upa berina tihtak ah chuan Sawivela chuan Zukpui chal damah tak mai chuan an kap ta siah mai a...Zukpui chu a leng awt a,a zal ta riai riai a..

         Buk an thlen phei hnu chuan Vawra chuan mak tih hmel takin,"Silai a rih miah silo a,engtin nge zukpui kha chau em em in a awm theih le" tiin a u te chu an enkual dan dan a..Ramliana chuan," Sazuk te hi ui nen kan han hual tak tak chuan an chau ve thei hle mai a.. A rei deuh deuh a,an hniak te hi a pherh vun mai ţhin a.A tawpah phei chuan an hah lutuk,an kawchhung te hi a sa vek a,an thin te hi a hmin lek lek ţhin ani..Chutiang hunah chuan han tlan zui thei zia zang anni talo a,awlsam taka man theih ani ţhin ani" ati a..Vawra chuan mak ati em em a,Sazuk lu te chu ahan tuai a,chutianga sa lian chu chau chhe mai thei turin a ring lo ni..

An tum ber an tihhlawhtlin takah chuan sa chu an han ur ţan ta a..Chutah Vawra chuan," Ka u Ram ,sa hi ila thei viau mai a,.Lasi te hi ilo zawl reu reu lo maw" a han ti reuh a..Rama ," Keizawng Lasi tehi an awm tak tak pawh ka ring lo e..Mi huaisen leh taima ,hlawhtling tak tak te hi upate hian mi naran chunga leng ni a ngaiin,zawl nei ,engkim tithei ho ang nen a tehkhinin Lasi zawl ang ani an ti mai ţhin niin ka hria" a han ti a..Vawmaia chuan," Ni e taite,huaisenna,hlawhtlinna te hi taima taka thawha hlawhchhuah chi ani a..Sapel a sahnu chhui turte hian teirei peih angai em em mai a..Chutiang tithei te tan chuan hlawhtlinna hi banphak maiah a awm reng ani..Khawi lam Lasi mah va zawl angai lo ania" tiin a rawn tuihnih ve a..Kawlkunga ve thung chuan," Taite Lasi zawl te hi chu an awm nangiang mai,.Kan khaw ţhenawma pasalţha Hrangvela pawh saw Lasi zawl a sawi ani a..Zanah te hian nula rimin Ram lamah a chhuak fo mai lehnghal.Sa lah chu Daihnai mai mai ah pawh a kap fo mi..Taite,Lasi te chu hmelţha tak tak mai anni a,an zuna uai awl tak ani an ti..An mal te a mum ţha a,an hmel lah chu kan lal fanu Ţhahniangi chunga leng vek annia lawm" an ti a.Chutah Ramliana lahpek chuan," Taite i u Kawlkunga Lasi malno sawi vel kha chu maw,vengchhak nuthlawi Siampuii mal bak va ni suh..Alo keuh thlu vel mai mai lehnghal a" fiamthu titak hian a rawn tia..An vai nuih dar dar..An sa rep te chu ur ţha lehin meipuite an han chhep ţha a..Zan nga lai mai riak tura insiam annih avangin a tuk lama an ramchhuah na lam turte sawiho in zan mut zai an rel ta a..