Pasalṭha Chawngvawra

                        Bung-54

         Khuangsih pasalţha Rozika leh a hote chuan Tatzawl tlangvalte chu an that deuh vek mai a. Ţhenkhat erawh thu zawh fiah atan tiin an dam thung. Rozika leh a hote chuan thlang lama Vawra leg Tatzawl pasalţha Ngamtawna inchai thla chu an ring fan dawk dawk chungin an lo en a. Tlangval pakhat chuan," Kan zuk pui dawn em ni ang" a rawn ti a. Rozika chuan," Vawra khuan puih ngai hmel a pulo in ka hria. Lo en mah rawh u. A tukzal thuai ang" alo ti sam et a. Chutihlai mek chuan kawng thlang lama an lal Rumvunga zuanthlak pui tute pawg anlo in ban chho ve mek a. Vawra leh Ngamtawna erawh Ţhang hmunah chuan chak zawk nih tumin anla in chai thial thial mai a. Vawra chuan Ngamtawna chu Ţhang pikah chuan nawr betin an hnek leh siah siah mai a. Ngamtawna hmai chu a thi sung tawh mai a. Inpek mai erawh ala duh bik lo a. Mahse a tawpah chuan Ngamtawna chuan," Ka tlawm e" harsa ti tak chung chuan a rawn ti ta a. Vawra chuan Ngamtawna chu thawhchhuah puiin Kawng lam chu a panpui ta a. Kawng an han thlen chhoh chuan Rozika chuan,"In hmel te chu ava sawi ber bur ve" nui chung hian alo ti a. Vawra chuan," Rin aiin han lum meuh chuan Ţhang hmun pawh alo chang tho mai" a han ti a. Khuangsih lal Rumvunga chuan Vawra hnenah chuan," Tlangval khawi lam khual nge maw inih le?" alo ti var a. Vawran a chhan hma chuan Rozika chuan Vawra chanchin tlangpui leh khua a alo luh chhan te ahan sawi a. Vawra ani tih a hriat veleh chuan lal Rumvunga chuan,"Pasalţha Vawra maw inih. I chanchin kalo hre fo tawh asin. I chungah hian ka awm hle mai" alo ti thuai a. An mi thah ruangte an senghawi hnu chuan an lute laksakin a dam panga la awmte nen chuan khaw lam panin an kal ta nghal a . Kawtchhuah pawh an thlen hma chuan an khaw tlangval dang khaw lam aţanga lokalte nen chuan an intawk ta a. Khuangsih tlangvalte chuan an lal him taka an hmuh leh avang chuan an hlim kher mai. Kawtchhuah an han thlen chuan khaw mipui tamtak an lo awm sup sup mai a. Khuangsih upate pawh an lo awm vek a. An lal ber him taka an hmuh takah chuan an lal chu khaw lam panin an zawn hawng ta a...

           Khuangsih lal inah chuan Tatzawl khaw tlangval ala dam awmchhunte chu an pasalţha Ngamtawna hoin an ţhinţhi ţhap mai a. Lal Rumvunga chuan,"Tunah hian in nunna hi ka kuta awm ani tih inhria em? Engvanga min rawn luchilh ngawt nge innih?" tiin a han zawt a. An pasalţha Ngamtawna a ţawng hma chuan tlangval pakhat chuan,"Phuba lak kan duh ani. Kan hlawhtling hman ţhelh nghe nghe anih kha" a rawn ti a. Lal Rumvunga chuan,"I va han ţawnghuai salh salh ve. Engvanga ka chunga phuba lak tum ngawt nge innih? " tiina han zawt leh a. Tatzawl tlangvalho chu an ngawi ta reng mai a. Khuangsih lal Rumvunga thinrim chuan,"In ţawng dawnlo amaw" tih pahin Tatzawl tlangval pakhat beng chu an hleh thlaksak hlawk mai a. Kal zui zel atum lai chuan a upate chuan an rawn dang hman hlauh a. Khuangsih pasalţha Rozika chuan,"Engmah in sawi dawnlo anih chuan kan tan ţangkaina in nei tawhlo a. Kan tihhlum ve mai che u angai dawn ani. Thil awmzia in sawi erawh chuan kan lal in rawn man chhan a zirin kan dam hlauh theih che u" a han ti a. Tatzaw tlangval pakhat Lal in a beng a hlehsak pa chuan a beng hup ngawih ngawih pah chuan,"Kan lal thupek anga lokal mai kan ni" a rawn ti a. Tlangval bawk chuan,"Ţhi leh dar tamtak inneih thu kha kan lal in alo hriatin neih theih dan angaihtuah ta ani" a han ti a. Rozika chuan," Tunge kan lal ro chungchangah chu hria a,lal hnena sawitu chu?" a han ti a. Tlangval chuan a bula ţhingţhi ve tho tlangval pakhat en pah chuan,"Ani hian a hre vek ani. In lal ro chungchang pawh. A pa hian lal hnenah in hausak zia a sawi ani" a han ti a. Chutah Rozika chuan Tatzawl tlangval pakhat chu an hnek thal tawp a," Tunge inih,kan lal chungah eng hem nge thlak in tum a?" a ti ta chher chher mai. Tlangval chhuatah let reng chu lo tho chhuakin a hmai hup chung chuan," In hre duh amaw? Engkim ka hrilh vek ang che u. He khaw mi leh sa ngei hi kan ni ţhin a. Ka pa chu Sawntuala ani. He khua aţanag hmingchhe taka hnawhchhuah kan nih vanga phuba lakn tuma lokal kan ni. In lal kha thah ka duh a. Mahse kan pasalţhate chuan kutthlak an remti silo ani. Hmingchhe taka min umchhuah rah chu in seng ni ala awm khawp ang" a rawn ti ta phiar phiar mai a. Khuangsih lal chuan dam duai hian," Tunah chuan engkim a chiang ta. Sawntuala fapa maw inih a. Ka khua min tih hmingchhiat avang leh run katawh phah thelh avanga hnawtchhuak che u ka ni asin. In nunna ka zuah mah kha lawm ta che u" a han ti a. Chutah Sawntuala fapa chuan," I khua leh tuite pawh i hum ngamlo anih kha. Kan unaute thiltih avanga kan vaia ram pa lailenga vakvai tura min hnawhchhuah kha a ţul kher em ni?" a rawn ti a. Lal Rumvunga chuan," A ţula ka hnawtchhuak cheu anih kha. Pawisawilo kutthlak tur leh mi ro chhuhsak duh mi tenawm te chennan ka khua hi ka phal reng reng hlei nem" a han ti a. Sawntula fapa chuan," Ka unaute thattu kha min hrilh thei em. He khaw tlangval tupawh ka unaute thattu kha chu damin ka chhuah hauhlo ang" a han tive salh salh a. Sawntuala te hi a fapa ten Vawra u Ramlianate Hliappui lal fapa ral tur an kal lai khan lo lambunin Ramliana tihloh midangho zawng kha an that vek a. Kha thil avang khan Khuangsih lal hian a khua aţangin a hnawtchhuak ta ani. Sawntuala te chhungkua hi Tatzawl lamah lut rawihin an in bengbel a. Khuangsih khaw chunga phuba lak theih dan an zawng ru reng a. A tawpah chuan Tatzawl lal hnenah Khuangsih lal in ro angah ziate sawiin Tatzawl lal chuan Khuangsih lal ro chu a awt ru ta riau mai a. A pasalţhate tirin Khuangsih lal ro chu va chuhsak turin a ti ta ani. Sawntuala fapa pawh hi huaisen ve tak niin a u te avanga Khuangsih lal in a hnawtchhak kha a tuar dam thei hauhlo mai a. Phuba lak ngei tuma lokal ve ani.

           Thil awmzia an hriat vek hnu chuan Khuangsih lal leh upate bakah an pasalţhate chu an thinrim ta em em a. Tatzawl khaw run tura an tlangvalate tirh mai chu an duh rum rum mai a. Mahse lal chuan hna ţul lai anih avang leh fur ruahtui tlak lai anih avangin Favang awllena ngaihtuah ţhat mai chu a duh ta zawk a. Lal Rumvunga chuan Sawntuala fapa hnenah chuan," Tunah chuan nungdama zuah na chhan tur che ka nei talo. Sawi duh dangte ila nei em" a han ti a. Sawntuala fapa chuan," Ka unaupa thattu kha a hmel min hmuh tir teh khai. Chil tal ka han chhak khum ange" a han ti phiar phiar mai a. Lal chuan,"I u leh a ţhiante thhatu kha kan khaw mi leh sa anilo asin. Mahse vawiinah hian kan zingah alo tel hlauh mai a" tihpahin Vawra chu a han en a. Vawra chuan Sawntuala fapa Neihlala hnenah chuan," Tlangval i ute thattu chu keimah ngei hi ka ni e. I u leh a ţhiante kha ka thah vek chu annilo a. Anmahni leh anmahin an in itsik avang khan pahnih lai khan an in that ve bawk ani" a han ti a. Neihlala chuan Vawra chu chil chhak khum ţhawt pah hian," Thi tlak ini,phuar in awmlo ila zawng ka sat sawm vek ang che" a ti ta phiar phiar mai a. Vawra chuan," I ute phuba lak i duh avanga i nunna i hloh ve kher a ţul love" a lo ti mai a. Chutah Lal Rumvunga chuan Neihlala hnenah chuan," Tunah chuan kha i hmu ta maw. I lung a awi tawk em" a han ti leh a. Neihlala chuan," Lalpa,khawngaihn ka u thattu beih theihna hun ţha min siamsak turin ka ngen che ani. Ka lo chak ta anih pawhin ka lu chu in la tho dawn a. Thlamuang takin ka thi thei dawn ani" a rawn ti a. Lal chuan," Duhthlang thei dinhmunah i din loh kha. I chunga ka rorelna tur hi lawm takin pawm la a tawk mai e" a han ti a. Mahse Vawra chuan," Lal pa,a nunna i laksak dawn tho chuan a duhzawng chu pe hram mai ta che. Min hmachhawn a chak anih chuan ka inpeih reng alawm" a lo ti a. Lal chuan," Vawra,i chiang maw. He thil avanga i boral anih ngat chuan i thisen mawh ka phur ngam hauhlo ang" a han ti a. Vawra chuan," Lal pa,min ngaihtuah suh" alo ti sap a. Chutiang anih takah chuan Lal Rumvunga chuan Neihlala hnenah chuan," A ţha e. I duh ang chu i hmu thei dawn ta anih hi. Theihtawp i chhuah ani ang chu" a han ti a. Tichuan Vawra leh Neihlala chu lal tual zawlah chuan an inbei dawn ta a. Neihlala chuan Phaw leb Fei hmanga inbeih a ngen avangin Vawra leh Neihlala chu Khuangsih tlangvalte chuan Phaw leh Fei an han pe ve ve a. An inbeih dawn chuan lal chuan," Hemi te chungchangah hian ka kut ka sil e. An duhthlanna ngeia inbei anni tih min hriatpui tu chu ka pasalţha leh ka khaw mipuite inni" a han ti a. An inbeih hma chuan Hranghrima chu lokalin Vawra hnenah," Vawra,hetiang thil itih kher hi a ţul lo ania" a rawn ti a. Vawra chuan," Ka pa Hrang,min ngaihtuah suh" tihpahin lal in tual lam chu a pan ta a.

           Khuangsih lal in tualah chuan Mipui an tlim hmur mai a. Vawrate inbei tur chu a chak zawk tur anlo inrin siak laih laih mai a. Vawra leh Neihlala chu Phaw leh Fei kengin lal in tualah chuan inhmachhawn zawngin an ding ta ran mai a. Vawra chuan Neihlala hnenah chuan," Tlangval, he thil hi kan tih kher a ţullo ania. Ka chunga thil tisualtu nilo chu tumah kutthlak ka duh lo ani" a han ti a. Neihlala chuan," Ka ute kha an inringlo lai ikap hlum vek ani awm a. Tunah chuan ka inring lai ngei hi min thah han tum chhin ta se. Ka thah hma che chuan ka chawl dawnlo ani" a han ti salh salh mai a. Vawra chuan,"Anih chuan ka duhloh ber thil ka tih angai dawn anih chu. Lo inring rawh l" tihpahin Neihlala chu a pan phei ta ţhem ţhem mai a. Chutah Neihlala chuan," Kha mi dawihzep pa" tihpahin Feia Vawra chhun fuh ngei tum chuan a rawn bawhphei ve ta. Vawra chuan Fei chu Phawa lo khak perin Neihlala kaihza thlep hnawk khawp chuan feiin an hlap sak ta pawp mai a. Neihlala chu a ţhinţhi hnawk a. Rang taka lo tho lehnghalin Vawra chu a rawn beih chhunzawm leh a. Neihlala chuan Vawra chu chhun tum ni awm tak hin Fei chu an rawn lek phei a. An in hnaih tawh viau maw tihah chuan rawn bawh phei thutin Vawra chu a Phaw ken chuan a rawn nawr chilh rawp a. Vawra pawh hnung lamah a petek dawr mai a. Chumi hun remchang chuh chuan Neihlal chuan Vawra chu rawn chhun tlang pawrh tumin a rawn zuan zui a. Mahse Vawra chuan Fei chu lo bumin a na thei ang ber tur hian Neihlala chu Phaw in an lo nek bur mai a. Neihlala chu a tlu khu luih nghal a. Vawra chuan," Tlangval,a tawk tawh viau ani. I nunna i hlut anih chuan inpe mai rawh" a han ti leh a. Neihlala chuan inpe mahsela a thi tho dawn tih a hriatchian em avangin Vawra chu a la rawn beih chhun zawm ta zel tho a. Vawra lah chuan a kut zala a pawi khawih miahlo tu han tihhlum chu a duhloh avangin inveng pahin alo bei ve mai mai a . Thinrim lutuk,phuba lak chakna a khah avanga huaisen leh chak ta riaua inngai Neihlala tan chuan Vawra chu beih mi ani lo ani. Chutia a tlawm zawk nih tumlo an inbeih char char hnu chuan Neihlala chu a thi sung tawh mai a. A chauh pawh a chau tawh hle ani. Vawra chuan a tawp nan ti niawm takin," Tlangval hei bak chu insaseng na hun ka siamsak dawn lo che nia aw" a han ti leh a. Mahse Neihlala chuan Vawra chu a rawn beih chhunzawm ta zel tho a. Neihlala beidawn chuan a tha tawp hian Vawra chu thah ngei tumin a fei ken chu a rawn khawh phei thut mai a. Vawra pawh a chesual deuh ngei mai. Fei chu phaw in lo dang tleu hman hlauh lo sela zawng a dul nemah Fei a bur zawk ngei ang. Neihlala chuan phaw chiah a keng tawh a. Vawra pawh chuan a Fei ken chu paihin Neihala chu Phaw nen a pan phei hriau hriau a. Vawilehkhatah Neihlala chu bawh thutin Phaw leh Phaw chu a inkhak ri pawp mai a. Neihlala chu hnunglamah a tlu thal phei dawrh a. A rawn sutu thapek a nat em avang leh a lo chauh tawh em avangin thawh pawh tho zo talo chuan a a tal tap tap mai a. Vawra pawh chuan bei zui tawh lemlo in lal hnenah chuan," Lal pa,ka chunga thi tisual tu pawh nilo hnuk chu ka chhat theilo ani. In duhangin a chungah i ti mai ani ang chu" a han ti a. Lal pawh chuan alo bu nghut a. Neihlala tlu thal reng chu Khuangsih tlangvalte chuan an va kai sawn ta a.

            Mahse mipui awmna lama Vawra a luh phei dawn lai tak chuan Leikapuia an phuar mek Tatzawl pasalţha Ngamtawna chuan," Mahni tum tawkte hriat ve deuh tur alawm" a rawn ti kauh mai a. Vawran a chhan hma chuan Khuangsih pasalţha Rozika chuan,"I ngam anih chuan kei ka awm e" alo ti nghal vat a. Mahse Ngamtawna chuan ," Lal pa, amah saw beihna hun min siamsak ve ta che" Vawra lam hawi chung chuan a han ti a. Lal chuan," I duhthlanna alawm. Engtia han hmachhawn nge i duh a" alo ti ve mai a. Ngamtawna chuan," Mipa leh mipa chu Chemsen ngatin le" alo ti thuai a. Lal chuan Vawra lam chu a han en a. Vawra chuan a pawm tih hriat nan a lu alo bu nghut a. A ral beihdan an hmuh vek tawh avangin Khuangsih lal hian Vawra chu chak zawk turin a ngai nghal tho ani. Tichuan Khuangsih tlangvalte chuan Ngamtawna chu lal in tualah an kaithla a. A kut phuarnate phelh sakin Chempui an han pe ta a. Vawra pawh chuan a Phaw ken lai chu dah thlain a Chempui chu a han phawrh a. Tatzawl pasalţha Ngamtawna hmachhawn tur chuan a rawn phei leh ta a. Ngamtawna chuan," Tlangval,mahni aia chaklo zawk i beih ang ngawt kha chu ani dawnlo ania aw. Ka inringlo lai minlo bawh thutin min hneh ani mai a. Tunah chuan Chemsen nen tunge dingchang zawk i han en teh ang aw" alo ti salh salh mai a. Vawra chuan,"A chang chuan kan nun humhim nan leh hun ţha zawk kan hmuh theihnan kan tlanchhe zawk ţhin a. Tunah pawh hian i duh chuan i in saseng thei ang. Kha i hmaite a vung luk a. Mi hliam tawh hnu hmachhawn chu ka duh hauhlo mai a" a han ti a. Ngamtawna chuan," Tatzawl Sakei hliam hlauhawm zia kan hrilh ang che. Kha lo inring tawh" tihpahin Vawra chu sah hlum ngei tumin a rawn zuan nghal a. A chem chu ding leh vei hawi zawngin a rawn vai phei a. Vawra chu alo tawlh hnung zel a. Ngamtawna chuan," I huaisen viau emaw ka tia. In tawlh tak duai duai mai chu le. Pasalţha Chemsen chu i tawn ngam meuh nange" a han ti leh a. Mahse Vawra chuang engah mah ngailo ni awm tak hian ala tawlh sawn zauh zauh zel a. A duh anga Vawra a sah fuh theih mai loh takah chuan Ngamtawna chu a thinrim ta hle mai a . Vawra chu sah tum leh niawm tak hian a Chem chu an lek kang a. Vawra zuan sawn a tum leh lai tak chuan a bawhin a bawh phei ta rup mai a. Lal in tualah chuan an tlu rup mai a. Chem an la ken ve ve avang chuan an Chem kenna ban chu an in vawn sak tawn ve ve a. An in elh ta ngiang ngiang mai a. Chutah Vawra chuan a ke tawm chhoin Ngamtawna dulah tak chuan an rapa a. A theih ang tawk anain an tlawh pawp mai a. Ngamtawna chu hnung lamah a tlu phei dawrha a. Vawra chu a zuangtho nghal a. Ngamtawna pawh alo inring nghal mai a. Tuala chirh chu an kai luai mai a. Vawra chuan a chem hum nghet sauh sauh pah chuan," Kha le aw" tihpahin Ngamtawna lamah chuan a han tlan phei a. A chempui chu a han vai kual deuh pup pup mai a. Ngamtawna chu a tawlh ve zel a. Vawra chuan a Chem vai chu ahan chawl thut a. Chu veleh Ngamtawna chuan a rawn zuan nghal a. Chumi hun tak chu Vawra lo chan chu ani. Ngamtawnan amah sah hlum ngei tuma a rawn zuan chiah tihah chuan Vawra chu lo per sawn zauhin a Chempui chu an vai ve nghal pawp a. Ngamtawna chu a khek ţhawt mai a, a dar vei lam chu Vawra chuan a sat kau hawk mai a. Ngamtawna na ti lutuk chu a ţhen tlawk tlawk a. Vawra chuan rawn zuan lehnghalin a tha tawp chuan Ngamtawna chu a han sat leh a. Ngamtawna chuan a Chempui chuan alo dang hman hram a. Mahse a sattu thapek anat em avangin Ngamtawna chuan a Chempui thlauhin hnung lamah a petek dawr maia a. A insiam rem leh hma chuan Vawra chuan Ngamtawna chu a rawn tlawh thal leh tawp mai a. Lal in tuala chirhdiak chu a deng per sawk a. Ngamtawna chu a rawn in dawm tho leh ţawk ţawk a. A chempui chu chharin Vawra chu a rawn bawh phei leh ta a. Thih leh thih tiin Vawra sahhlum ngei tum chuan a Chempui chu a rawn vai phei leh a. Vawra chuan lo bum zauhin Ngamtawna nak thler hawk chuan an lo sat leh ta a. Ngamtawna chu thisenin a bual zui tawh mai a. Chetsawn pawh tum tawhlo chuan a ding khur char char a. A dar leh anaka hliam aţang chuan thisen alo chhuak zur zur bawk a. A ban vei lam chu hman theih tawhloh tih hriat tak hian a uai hnuo a. A kut dinglam chuan a Chempui ken lai chu ala hum reng thung. Mipui chu an ngawi ţhup mai a. Vawra pawh chuan Ngamtawna chu kutthlakzui tum tawh lemlo in chet alo thawh leh palh takah tiina a hmachhawn zawngin a la ding ran a . A tawpah chuan Ngamtawna chuan," Thih thlengin aw niang" tihpahin Vawra sat tum chuan Vawra lam chu a pan phei leh ta a. Vawra sah tuma a Chempui a vai leh chiah tihah chuan Vawra chu lo per sawn leh zauhin Vawra chuan Ngamtawna ban chu Chempui hriamlo lam chuan an lo sat vak mai a. Ngamtawna chuan a chempui chu a thlauh nghal rawk a. Chutih rual chuan Vawra chuan Ngamtawna chu a sir zawngin a nak thawlah chuan ahan tlawh nghek a. Ngamtawna chu a lai intualah chun atlu ri leh thlawrh mai a. Tho leh chi ziazang ani talo. Vawra chuan lal dinna lam chu pan nghalin lal hnenah chuan," Lal pa, an nunna em chu ka laksak theilo ani. A thih leh dam chu i rel turah ka dah e" a han ti a. Lal Rumvunga chuan Neihlala leh Ngamtawna chu an damchhuak zo dawn chuanglo a a rin avangin a tlangvalte chu an lu laksak mai turin a han ti a. Tatzawl tlangval la dam awmchhun pathumte hnenah chuan lal Rumvunga chuan,"Tunah hian in nun ka zuahsak dawn che u a. Kal vang vang ula. In lal hnenah chuan thil awmzia zawng zawng hi va hrilhin Khuangsih lal pawikhawihtu nih pawi zia han hrilh bawk ang che u. In lal chuan amah bumtu te avang a ka khaw lam hawia kut alo lek leh anih vaih zawngin a khua chu ka chimih ţhak tawh dawn ani. Tunah kal nghal rawh u" a han ti a. Tatzawl tlangval pathumte chuan engmah pawh sawi zui tawhlo chuan an khaw lam pan tur chuan an kal ta nghal a. Khuangsih mipuite chuan anlo au el dur dur mai a. Lunga lo vawm tawk lah bo lo.

            Mipuite lal in a ţin tir hnu chuan lal chuan Vawra chu a ina leng rih turin a han sawm a. Lal ina ahan luh chuan lal Rumvunga chuan," Tlangval, ka upate leh ka pasalţhate aţangin min chhanchhuah dan tura i ruahmanna siam zawng zawng kalo hre tawh a. I chungah hian ka lawm em em ani. I chanchi hi mi sawi kalo hre fo tawh a. Vawiin in inbei lai ka hmuh khan engkim ka awih thei chauh ani" a han ti a. Vawr chuan," Lal pa lawmthu sawi angai reng reng lo e. Ka vanneih hlauh anih kha. A landan chuan an rawn beih chhan cheuah khan keimahni thiltih tamtak a awm ve a. A pawi ta ti tak meuh meuh ani. Tunah pawh an lo kir leh lo ang tih a sawi theihloh a. Chutiang hunah pawh chuan puih che u ka inhuam reng ani" a han ti a. Lal chuan,"Tlangval, Suartui khua a din laia thil thleng chu i mawhah la duh tawh suh. Thil ţhalo titute kan hrem a,khua aţangte a hnawtchhuakin an nunna hial kan laksak ani. Kha thil ka ti kha ka inchhir hauhlo a. Dikna ţan tur chuan ka ding ngam reng ani. I sawi ang khan an lo let leh pawh ani thei. Mahse chumi hunah chuan inpeih sain kanlo awm tawh ang" a han ti a. Vawr a chuan," Suartui khaw tlangval suamtute kha an thi vek ani tih anlo hre ve ani ngei anga maw. Phuba lak tumna rilru an pu pawh ka thiamlo hranlo e" a han ti a. Lal chuan," Nia,engthil mah hi thup bo theih anilo ani. An unaute an dam thu an hriat miauloh chuan thiturah an ruat nghal loh. Kan thiltihsual ngeiah pawh thiam chan tuma kan la han bei ţawk ţawk ţhin hi zawng amak mange" a han ti a. Lal bawk chuan," Naktuk lamah chuan hnehna kan chan lawmnan khawtlangin ruai kan ţheh dawn a. Min la cham pui ve ani ang chu" a han ti leh a. Vawra chuan," Lal pa,min hrethiam la. Hliappui lama kan chhungte hian minlo nghak rei lutuk dawn a. Ka pa Hranga phei chu a thi bo hial turah anlo ruat tawh ang. Muang hman kan ni tawhlo ani" tiin alo hnar a. Lal pa pawh chuan hrethiam takin chelh zui chu a tum ta biklo a. Rei fe an titi leh hnu chuan Vawra chu an thlen in lam panin a kal ta a.

            A haw kawngah chuan Vawra chu amah ngaisanga lo chibaitu an tam hle mai a. Ţhenkhatin zu no te anlo pek bakah ţhenkhatin chaweiah te an lo sawm thul. A thlenin ava luh chuan a pa Hrangkima leh inneitute chu anlo awm khap a. Zaluta chuan ," Pasalţha Vawra" tihpahin a lo chibai nghal a. Zaluta bawk chuan,"Kan khaw mipui chuan i huaisen zia hi kan sawi bang dawnlo anih hi. Mi sawi hriat mai aiin a taka han hmu meuh chu a dan a dang hle mai. Pasalţha dik tak ini" a han ti a. Hranghrima pawh chuan," Vawra, miin an sawi dan che ai daih hian ilo huaisen ani. Vawiin chu i che pui riap riap hle mai" alo tive bawk a. Vawra chuan,"Ka vannei hlauh anih kha. Min sat bung rumlo hlauh kha ka nihlawh e" alo ti a. Zaluta chuan,"Khang ho khan a khawih pawh an khawih fuh theilo che nih kha maw" alo ti leh a. Vawra chuan," Thudang sawi teh ang u. Ril te pawh a ţam tawh ania" nui chung chuan a han ti a. Zaluta chuan," E khai,kan lal chuan chaweiah a sawm na che nge. A va ti mak ve" alo ti hlut a. Vawra chuan," Zanriah kilpuiah min sawm kha maw. A in lamah kan riah nghal angai bawk dawn ani" a han ti a. Tichuan Vawra chawei tur chu an thlen innu chuan siamsak nghalin Vawra pawhin a bar zui mawlh mawlh a. Zan lamah chuan lal in lamah an thawmhnaw zawng zawng nen an phei dawn tak avangin an thlenin te chungah chuan lawmthu sawiin an mangţha a. Lal in lamah zanriah te kilin zan rei thlengin an inkawm ho a. Lal chuan chelh zui duh viau mahse Vawraten an hnial tlat avangin a chelh thei talo a . Chumi zan chuan lal inah riakin a tuk lamah Hliappui khua chu an pan dawn ani..

                     Bung-55

           Zing Varţianah thovin Vawra leh Hrangkima chu Hliappui lam pan turin an insiam nghal sawk sawk mai a. Khuangsih lal Rumvunga chuan Vawra chu Silai zen leh a mu ţhahnemtak chu a han thehchhuah sak a. Vawra chuan lawmthu te sawiin a lo kir leh lamah a rawn tlawh haw leh tur thu te a sawi hnuah Hliappui lam pan tur chuan an kal chhuak ta nghal a. Chawhma ţha zet an kal hnu chuan tukţhuan buatsaih pahin kawrte kamah hian an han chawl rih a. Vawra chuan kawr kama Rawnal pum chu an sat zung zung a. Mau bur te siamin an ţhuah fai sawk sawk a. Hrangkima chuan mei te lo nunin thing alo fawm ve bawk a. An buhfai ken te chu Maubur chuan chhumin chawhmeh atan an sarep ken leh Tumbu chu an han chhum pawlh a. A hmin hun nghah pahin an titi zui ta a.

            Vaibel pak khuk tual tual pah chuan Vawra chuan," Pa Hrang,kan lal Lianvunga te chhungkua hi enge an chanchin ni zui ta zel le. Pasalţha Darchhawka chungchangte kha i hrezui ta em?" tiin a han zawt a. Hrangkima chuan," Kan lal Lianvunga hi ahma anglo takin a khawsa zia pawh a danglam teh asin. Tunah chuan mi inngaitlawm tak leh kawm nuam tak ani tawh nghe nghe a. Pasalţha Darchhawka leh kan lal fanu Darchawii pawh intuahrem tawhin Hliappui khuaah hian pasalţha Darchhawkate chu an rawn in bengbel nghe nghe a. Thil hi alo inthlak danglam chak ngei mai. I hmuh meuh hunah zawng i awihlo hial ang" a han ti dap dap a. Vawra chuan,"Pasalţha Darchhawka leh lal fanu Darchawii an intuahrem thei ta chu a lawmawm mange. Mahse kan lal Lianvunga inthlak danglam zawng ka awih zawng ani hauhlo mai. Tunah chuan lal anih tawhloh avangin in la lian thei ani lo hrim hrim a. Lal la ni reng se zawng a mize ngai ala pu tho in ania ka rin ni. Kan dinhmun azir hian kan in her rem zel alawm" a han ti a. Hrangkima chuan,"Anih pawh ani zawk mahna. Tuna kan lal Hratliana hi lal fel tak mai ani a. A unaupa Lianvunga pawh hi a inchhungah chentirin a rorelna engkimah a thu lakna a ni deuh ber mai. Khua kan han lut anga. Thil awmzia chu i hrethiam ve mai turah ngai ang" a han ti a. Vawra chuan," Ni e,a sawi a sawi hi zawngin engmah hi a chiang zo tak tak ţhin lova. A enga pawh chu lo nise. Tun anga kan kal zel chuan nihnih hnu velah in khua chu kan thleng hman in ka ringa.khaw en lai chuan khua lut lo hram ila a ţha ange. Mi hian minlo hmu tam vaklo sela ka ti ani" a ha ti a. Hrangkima chuan," Chu zawng i duh dan dan ani mai" alo ti thuai a. Vawra chuan," Anih leh ka ţhianpa Vanzauate chhungkua kha enge an an tak zel le" tiin a han zawt a.. Hrangkima chuan," Vanneihthlak takin Vanzauate chhungkua kha kim biaiin an inhmu khawm thei hlauh mai a. Ngaihtuah awmin an awmlo e. Hliappui khua a lo cheng nghet tawhsa te hi an fel hlawm em atin ani " a han ti a. Vawra chuan," Anmahni ngaihven tura ka kal vat theilo hi ka inthiam lo khawp mai. Hmuh thuai thuai ka chak hle ni. Tin,Suartui khaw mi leh sa tlanchhuah takloh tamtak an awm ni khan i sawi a. Khang ho chungchangah khan engemaw han hriat belh te i nei em?" a han ti leh a. Hrangkima chuan," Engmah han hriatzui em em ka nei talo. Mahse kan lal khian engemaw tawk chu hriat aneiin ka ring ani. Khaw thlen hunah ila zawt fiah dawn nia. I lakah chuan engmah a zepin ka ringlo" a ti a. Rei vaklo an titi leh hnu chuan an chaw leh chawhmeh tur pawh a hmin fel tawh a. Tukţhuan puar taka an eizawh hnuah Hliappui khaw lam pan tur chuan an kal leh ta a.

           Nihnih lai mai an kal leh hnu tlai lam ni tlak dawn suarah chuan Vawrate chuan Hliappui khaw kawtchhuah chu an thleng dawn tawh a. Ala hma deuh avang leh mi feh kal hawng ilo an la tam dawn em avangin Vawra chuan khaw lam pana kal chhunzawm chu duhlo in ramhnuaiah an la ţhu khaw muanga. Hrangkima chuan,"Vawra,a enga khaw lai a luh duhlo tlat nge maw inih le?" tiin a han zawt a. Vawra chuan," Eng nilo e. Kan kal hah bawk sia. Kan thlen zan tal hi chuan hahdama awm ka duh ani. Mi tumahin min bawh buai lo sela ka duh deuh ani" a han ti a. Hrangkima chuan," Chu zawng thil theih pawh va ni suh. Kei lah duhaiin ka thang rei ta a. Ka chhungte hian mo an lo lawm daih tawh angem tih pawh a sawi theih tawhloh ani" a han ti a. Vawra chuan," Engvang ngawt chuan nge i tello in mo chu anlo hruai ngawt ang ni. I rilru hmanhmawh vang mai mai anih kha" alo ti mai a. Vawra bawk chuan," Kan mo tu chu engang mi nge ni reng reng a?" tiin ahan zawt a. Hrangkima chuan," Hliappui khua a lo cheng hlun tawh anni a. Chhungkaw pangngai tak anni. Man leh mual pawh an phut tam hauhlo mai a. Mahse keini pawh pem lut thar mai kan nih avangin an phut ang zat pawh kan pe tlak thei talo a. Chuti chung pawh chuan min hrethiam ta tho a. Inneih chu kan puitlin thei dawn ta ani. Ka pa hian in chhungkaw hmel hmuh hrim hrim aduh avangin kan lo kal ta vang vang ani" a han ti a. Vawra chuan," Min rawn ngaih pawimawh avangin kan lawm hle nia. Khua a i awmlai khan ka pa te khan engmah an hrilh duhlo che a. Kan thilpek i lak duhloh an rin avangin. Ka nu leh pa khan in mo lawm na atan Ţhi tlemazawng chu min phurh tir ania" a han ti a. Hrangkima mak tih hmel taka Vawra eng chung chuan," Vawra,engemaw beisei avanga lo kal ka nih in ring em ni. He thil hi chu kan in unauna a ngheh lehzual nan a kan tih ani" a han ti a. Vawra chuan," Pa Hrang, kan thilpek tur che u hian kan in unauna a tichhe dawn hlei nem . Anih na takah chuan keimahni hi nangmahni ngaihven tura lo kal hmasa zawk awm tak kan ni asin. Thilpek tam tham pawh anilo a. Ngai kawi lo hram ang che u . Ka pu te hnenah pawh ţha takin min sawi sak dawn nia aw" tiin ahan ngen a. A tawpah chuan Hrangkima pawh chuan hrethiam takin," Vawra,ka pa te chu an va lawm dawn em. An mittui a tla hial in ania ka rin ni. Hawh teh i hawng thuai thuai teh ang" a han ti a. Khua pawh a thimzui tak avangin Vawrate pawh khaw chhung lam pan tur chuan an kal leh ta a.

           Khua an va luh chuan a thim hle tawh a. Fur lai anih avangin khawlai chu a diak em em a. Vawrate chuan a pa Hrangkimate in lam chu an pan ding nghal vang vang mai a. Kalkawngah chuan mi an tawk zeuh zeuh a. Mahse Vawra han hmelhriattu erawh an tawk fuh loh hlauh. Hrangkimate in an han thlen chuan Zanriah kil turin an lo inbuatsaih mek hi alo ni a. Inchhung an han luh chuan Vawra pa Zawlpa pu Hrangkapa te chhungkua chu mak tihna in an khat a. An lawm lutuk chu zanriah pawh kil zui ta lem lo chuan an ri laih laih mai a. Hrangkima pa Hrangkapa chuan," Vawra, kan lo beisei reng che u asin. I hmel kan hmu thei hi kan lawm em em ani" a han ti a. Vawra chuan,"Pu ,rawn ngaihven hmasa tur awm tak cheu ka ni zawk a. Hetia nangmahniin min rawn zawngchhuak hmasa ta mai hi pawi kan ti em em a. Min ngaidam hram dawn nia" tiin ngaihdam a han dil a. Pu Hrangkapa chuan,"Vawra,chutiang ani lo e. Theihtawp in chhuah tih kan hria alawm. Sal a hruai vek kan ni a. In ngaihven zui ngaihna kha a awm biklo atin ani. In thiamlo duh reng reng suh u" tiin alo ţawng thlamuan a. Vawra chuan,"Pu,hei ka pa ten in mo lawm na atan tiin min ken tur anih hi. Tam phei chu ani lo a" tihpahin a ipte aţang chuan thilfun pakhat lian vaklo hi a han phawrh chhuak a. Chhuatah chuan dah thlain a han phelh darh a. Ţhi fun hi alo ni reng mai a. Pu Hrangkapa chuan a fapa Hrangkima hnenah chuan,"Hrangkim,hetiang hi rawn la lo turin ka ti che nih kha" a han ti hluk a. Hrangkima chuan,"Ka pa,engmah min hrilh bik hleinem. Khua kan rawn luh dawnin min hrilh ve chauh a. Tihngaihna awm tawh heklo i" alo ti nghal a. Pu Hrangkapa chuan," Vawra,hei chu kan la thei lo ang. I hawn let leh dawn nia" tihpahin Vawra chu pek let ahan tum a. Vawra chuan,"Pu,ka nu leh pa in hei hi an thawn che u ani. In beisei an rin vang anilo a. Kan in unauna tinghet zual tur leh in mo neih tur kan lawmpuina che u anih hi. Ka pa nena in inţhianţhatna avang tal pawn hei hi chu i lak angai ani" tiin a han ngen a. Rei fe an inhnawn hnu chuan pu Hrangkapa te nupa chuan mittui tla zawih zawih chungin Vawra te thil pek chu an la a. Pu Hrangkapa lawm lutuk chuan," Vawra,kan chunga in ţhatna hi engtikah mah kan theihnghilh tawhlo ang. Ti hi chuan man leh mual pawh kan intlak thei dawn zu nia" a han ti a. Pu Hrangkapa te chhungkua chu an hlim tlang hle mai. Nupui nei tur ber Khamliana phei chu a lawm vangin a ţap hial ani. Ni e,pem thar leh sal tang chhuak hlim tan chuan chutiang thil ţha beisei phak ani lo ani. An beisei ber Vawrate an lo thlen takah chuan hlim takin zanriah chu an kil ho ta a.

           Zanriah eikhamah chuan Vawra chuan a pa Hrangkima hnenah chuan," Ka pa Hrang,kan thleng hlim chauh ni mahsela Vanzauate in lama lenchhuah ka va duh ve le" ahan ti a. Hrangkima chuan,"E khai,inthlahrunna tur a awmlo e. Zuk tlawh vat la a ţha ange. Veng mawng lam deuhah khuan an awm a. Hei kei lah han chhuak.hman chi ka ni tawhlo a. Ka fapa hian a zuk kawh hmuh thei ang che" alo ti vat a. Tichuan Vawra chu Vanzauate in lam pan tur chuan Hrangkima fapa nen chuan an chhuak ta nghal a. Vanzauate in an zuk thlen chuan Hrangkima fapa chuan," Hei hi anih hi" tiin a han kawk a. Vawra chuan," Naupang fel tak ini,lo han haw tawh rawh aw" a han ti a. Hrangkima fapa pawh chu a tlan haw nghal nal nal mai a. Vawra chu a ţhianpa Vanzauate kawmchhakah chuan an ding deuh vang vang a. Inchhung lamah chuan mei a eng teng teng a. Vawra chuan hmeichhe pahnih titi thawm niawm tak chu a han hre thei a. Tichuan kawmchhak aţang chuan,"In awm em?" a han ti a. Inchhung lam aţang chuan Vanzaua nu pi Rozami chuan," Awm e,lo leng rawh u khai" alo ti nghal a. Vanzauate ina Vawra a han lut chiah chuan Vanzaua nau tleirawl Chhuanthangi chuan," Awi u Vawra" alo ti nghal a. Chutah Vanzaua nu pi Rozami pawh chuan," Vawra,a va mak ngai ve. Hmuh leh che kan in beisei hauhlo asin. Lo ţhu teh khai" alo ti var a. Vawra chuan," Pi Zam in lo dam maw. Khaw kar te ahlat takah chuan tum angin kalo ngaihven vat hman talo che u ani" ahan ti a. Vawra bawk chuan," Khawge Vanzaua hre hraw pawh hi. Nula a rim kual leh tawh em ni?" a han ti a. Chu thil a han zawh chuan pi Rozami leh a fanu Chhuanthangi chu an ngawi ta reng a. An biangah cguan mittui alo luang zawih zawih a. Vawra ngaihţhalo chuan," Pi Zam,ka ţhianpa chungah chuan eng thil nge thleng a" tiin a han zawt a. Pi Rozami chuan harsa ti tak chung hian," Vawra,i ţhianp chu Vantei zawng turin nithum kal ta vel khan a chhuak ani. Dan kan tum ngial pawhin kan dang thei si lova" a han ti ta a. Vawra chu angawi vang vang a. Pi Rozami bawk chuan," Vawra,i ţhianpa khan ilo lan thuai kha beiseiin alo nghak reng ţhin che a. Mahse i hmel hmuh ni kan nei thei ta silo a. Vantei chanchin pawh engmah kan hriat takloh avangin amah pawh khan a vei zui em em lova. Mahse hmanni lawk khan sal tang chhuak ţhenkhat ka aţangin Vantei chu ala dam thu alo hre hlauh mai . Kan dang zo ta nganglo ani" a han ti chuai raih mai a. Vawra chuan," Pi Zam ,ka thiamloh vek ani. A tir khan engkim chingfel hmasa tur ka ni asin. Ka ţhiante ka thlahthlam hma lutuk vang ani. Ka ţhianpa Vanzaua chu aw. Khawi ram lamah chuan nge maw akal tak ang ni" a han ti a. Pi Rozami chuan," Vawra,a kalna lam tur engmah a sawilo a. Mahse sal tang lo tlanchhuak ho hnen aţangin Vantei awmna khua chu i hriat theih ka ring. Vawra,ngen tak meuhin ka ngen ache. I ţhianpa tello hi chuan kan dam zo dawnlo ani" a rawn ti a. Vawra pawh chu anhnuk a ulh ţeuh mai a. A ţhiante a ngaihven har ta lutuk chu a in thiamlo em em a. Vantei pawh ala dam anih ngat chuan Zalawma pawh alo la dam mial thei a. Vanzau ringawt tan chuan va chhanchhuah chu thil theih ani dawn lo ani. Vawra ngaituahna chu a buai hle mai a. Pi Rozami hnenah chuan," Pi Zam,ka ţhianpa chu ala dam anih phawt chuan ka zawng hmu ngei ang tih ka tiam ache. Mahse tun thut thutah chuan ka kal nghal theilo ani. Ka pu Hrangkapa te mo lawm hi han zo phawt sela. Vanzaute zawng tur chuan ka kal nghal dawn ani" a han ti dap dap a. Pi Rozami chuan," Vawra,ţawng mawilo nilo se. I ţhianpa kha i chungah hian a vui thei khawp mai a. In inţhen tak hnu khan ilo lan kha alo beisei ţhin lutuk ani. Tuna kan awmna khuaa kan va kira kan inhmuh khawm ni pawh khan i chanchin hi a sawi banglo asin. Tuhnai deuhah phei kha chuan i lakah a lungawilo em em a. Kan michhiat em avanga min thlahthlam taah angai hmin hmiah ani. Vantei a dam thu a hriat hnu a kal a tum pawh khan a hnenah nangmah rawn pun hmasa phawt tur chein ka rawn a. Mahse ani chuan nangmah rawn zar buai zel che kha nuam atilo a,mahni in alo kal ta mai ani" a han ti a. Chu thu Vawran ahan hriat leh phei chuan a rilru ana ta em em mai a. Pi Rozami hnenah chuan," Pi Zam,ka thiamloh vek ani e. Ka ţhiante hi la zawng chhuak em em ang. Ka zawng hmu zolo anih pawhin haihchhamin in awm hauhlo ang. Chu chu ka tiam che u ani" a han ti a. Pi Rozamia te nufa pawh chu an thlamuang ta deuh a. Vawra pawh chuan a tuk lama a lo len leh tur thu hrilhin a chhuahsan ta a. Vanzaua te ina a chhuah hnu chuan Vawra chu a ruak huai mai hian a in hria a. A ţhianten an mamawh em em laia engmah a tih chhunzawm talo chu a inchhir em em a. Insehruh ţeuh chungin a thlenin lam chu a pan ta a.

          Hrangkimate in a han thlen chuan mo lawm tur chungchang vel sawihoin an chhungkhat laina hnai deuhte an lo leng khawm a. Suartui khaw mi leh sa deuh vek anlo ni mai a. Vawra hmel an han hmuh thut chuan a ţhen phei chu insum zo loin an kun tlawk tlawk mai ani. Hrangkima chuan Vawra lokal chhan te chu an sawi zung zung a. Suartui khaw mi leh sa lo ni ţhinte chuan an pasalţha chu zah takin chibai an lo buk sap sap a. An chhungkaw chanchinte sawiho in an ri hlut mai a. Zan te alo rei deuh takah chuan Vawra chuan," Pa Hrang,Zawlbuk min va kai pui dawn em ni ang. Mahni chauha kai zawng ka zuam lo deuh mange" tiin Hrangkima chu Zawlbuk kai pui tur chuan a han sawm a. Hrangkima pawh chuan hnial hran lemlo in Zawlbuk lam pan tur chuan an kal ta a. Zawlbuk an va thlen chuan alo reh deuh ţhap tawh a . Meipui erawh la alh hlat hlatin tlangval ţhenkhat pawh an lo la meng a. Hliappui khaw Zawlbuk bawhbel an han bawh liam rual chuan Hrangkima chuan," Hei Lungchuan khaw lam aţangin Zawlbuk min rrawn ţawm tur an awm e" a han ti a. Val upa pakhat chuan," E khai,khual ţha ani ang maw. Tlangvalte u in puanhlap kha han thehkhawm sak rawh u. Zan te a rei ta deuh a. I buan rih lo mai teh ang aw" a han ti a. Tlangvalte chuan an puan hlap chu an han theh khawm sap sap a. Val upa pakhatin Vawra hmel an hmuh chian chuan mak tih hmel tak hian," Uai,Suartui pasalţha hmingthang Vawra lah ni reng che in. I hmel kan hmu thei chu kan va lawm em" alo ti hlut a. Vawra chuan," Pasalţha a han chhiar tham pawh ka ni lo e. In Zawlbuk kai ve min phalsak avangin ka lawm e" a han ti a. A mutna tur hmun anlo siamsak na lai pan a tum lai tak chuan kil khat aţang hian," Suartui pasalţha ,a khuate pawh chhanhim zolo kha maw. Ka buan hma chuan Zawlbukah hian a riah a rem velo ang" rawn ti ta a. Vawra chuan," Keizawng buan tham ka nilo e. Min hrethiam teh khai" a han ti thuai a. Chutianga Vawra rawn ţawngkhumtu chu Hliappui pasalţha chhuan tawlawl leh Hliappui buan chak ber Kairuma hi alo ni a. An val upate pawh chuan anlo khap sap sap a. Mahse Kairuma chuan,"Suartui khaw ho mai mai kan buhzem ringa nung an nia lawm. Khawnge buan khat tal a daih em kan en chhin reng reng ange" tihpah chuan a rawn ding chhuak ta hruau mai a. Vawra chuan," Ekhai,Hliappui pasalţha hmaa ding tlak ka ni love. Min hrethiam teh khai" a han tih leh pawh chuan Kairuma chuan a awih chuanglo a . A tawpah chuan val upate chuan," Vawra,han buan ta mai che" an rawn ti a. Vawra pawh chuan chuti tak maia amah thamlo tu leh Suartui mi leh sate pawh lo hmusit tu chu na lua awmlo a vawrh bin pawp pawp chu a tum ta a. A puanven te sawichhingin Kairuma hmachhawn zawng chuan an ding ve ta a. Tlangvalte chuan hmuhnawm a awm dawn tih hriain meipui chu an lo chhawm sauh sauh a. Chutah Kairuma chuan," Suartui tlangval ka buan tawk ka la hmu hauhlo a. Khawnge an pasalţha chhuanawr,tlanchhe du du a chu kan buan ve chhin ange" a ti lung lung a. Vawra erawh a ngawi reng thung . Chutah Val upa pakhat chuan," Khai le,ţan rawh ule" a han ti a. Vawra leh Kairuma chu an puan ven tlang ve ve ah chuan an han indawm nghal chat a. Vawra chu a ţhianpa Vanzau chanchin avanga a thinrimna leh Hliappui pasalţha Kairuma ţawng dan avang a thinrimna chuan pawisak engmah a neih tir talo. An han indawm nghet chah tihah chuan Vawra chuan,"Khaih aw" tihpahin Kairuma ţan khaw ţhat hma chuan Zawlbuk chhuat ri dup khawp chuan Kairuma chu an vawrh thalta huang mai a. Zawlbuk tlangval ho chu an ngawi ţhup a. Tlanhvalho zingah chuan Suartui khaw hlui an awmve nual a. Mahse Vawra ţan zawnga aw chhuah ngam an awmlo ani. Kairuma thinrim zak bawk si chu rawn tho leh nghalin Vawra puan ven rawn dawm leh nghal pah chuan,"Tunah chuan keimah ve thung aw. Ka insiamrem hma in min vawrh mai mai anih kha" a han ti a. Val upa pakhat chuan," Khai le ,ţan leh tawh rawh u le" a rawn ti tuarh a. Chu veleh Kairuma chuan Vawra chu vawrh bin pawp tumin a tha tawp chuan chawi a han tum a. Vawra erawh a kang chhin eih lo. Chutah Vawra chuan,"Tunah kei ve thung aw. Suartui pasalţha dawihzep tak ka ni" tih pah chuan Kairuma chu an phawi vawk a,la duhtawk mai lovin Zawlbuk bang deng dawt chuan an vawrh tha ta ruah mai a. Hliappui tlangval leh val upate mak ti lutuk chu an ka ho mai a. Kairuma chu thei leh theilo hian a rawn dingchhuak leh ţalh ţalh a. Val upate chuan an pasalţha chu a thinrim mai hlauin thin phu dep dep in anlo thlir a. Mahse an rinloh tak maiin Kairuma chu bai sulh sulh chunga Vawra lam lo panin Vawra dinna lai alo thlen chuan,"Vawra,ka hneh nganglo che ani. Ka lo ţawngkhum dan che avang khan min ngaidam dawn nia" tiin ngaihdam a rawn dih ta tlat. Chutah Vawra chuan,"Nia,na chu ka tive khawp mai. Ka thin pawh a rim em em ani. Engpawh huamin ka theihtawp ka chhuah ta mai anih kha. Khatiang em em kha chuan vawrh che pawh ka tum lo a" alo ti ve mai a. Kairuma chuan," Keima thiamloh vek ani. I in ngaidam tawn teh ang" a han ti a. Chutah meuh chuan zawlbuk thawm chuna ţha ngei mai. Tlangvalte chu an kut au dur dur mai a. Vawra leh Kairuma pawh ţhataka in ngaidam tawnin an inchibai a. A tawpah chuan val upa chuan," Tlawm zawk nih chang a awm anga. Chak zawk nih chang pawh a awm ang. Chung hunah chuan kam chan tawkah lungawi dan kan thiam angai ani. Kan pasalţhate chungah lawmthu kan sawi e. Tui takin i mu tawh ang u khai" a rawn tih takah chuan Zawlbuka riak.tlangvalte pawh chuan thawm nei zui tawh lovin mut hmun chu an rem ta a.

          A tukah chuan Vawra chu zing takah thoin a pu Hrangkapa te in lam chu a pan nghal a. A zuk thlen chuan a pu te chhungkua chu an lo tho vek tawh mai a . A tuk maia mo lawm tur an nih avang chuan kut awl bik reng an awmlo. Pu Hrangkapan Vawra alo hmuh chuan," Vawra,kan Zawlbuk chu enge an?" alo tivar a. Vawra chuan," A nuam khawp mai. In tlangvalte pawh an fel na rawh e" tiin a han chhang a. Eng enge maw sawi zui pahin Vawra leh Hrangkima chuan luhka leh Leikapui chhe lai deuh chu an han thawm ţha mawlh mawlh a. Chutia an mahni hna ţheuh thawk an buai laih laih lai chuan Suartui khaw mi leh sa lo ni ţhin Vawra chanchin lo hre hmasa te chu an lo kal sap sap mai a. Vawra an han hmuh chuan an lungte pawh a chhe tharin an hnuk a ulh ţeuh mai a. Vawra chuan thil kal tawh chu theihnghilh tur leh a hnual zawnga thil lak loh hram a ţhat thuin alo hnem ve mawlh mawlh a. An hnathawh pawh chhunzawm ta lo chuan inleng kawm chuan an buai leh ta thung a. An hlim tlang bawk a,an han nui leh dar dar ţhin a. Chutia hlim taka an awm lai chuan an khaw tlangau chu alo lang ve hlawl mai a. Pu Hrangkapa chuan tlangaupa hnenah chuan," Ekhai,pu Letthanga lah ni rengin. Enge ni ta a" alo ti var a. Tlangaupa Letthanga chuan,"E pu Hrang,eng ni lah lo e. Kan lal in in mikhual pa hi lengah a sawm ani" a rawn ti ta mai a. Pu Hrangkapa pawh chuan hrethiam takin," Vawra,lal in a hmu duh che anih chu. Han kal thuai tawh" a han ti a. Vawra pawh chuan Hliappui tlangaupa chu a zui chho ve ta nghal a.

          Hliappui lal in an han luh chuan Hliappui lal Hratliana leh aupate bakah Suartui lal ni ţhin Lianvunga pawh alo ţhu ve a. Vawra hmel an han hmuh veleh chuan lal Hratliana chuan," Vawra,kan lo beisei reng tawh che a. Ka khuaa ilo zin chuan min rawn hriattir hmasak tur che nia. Thlenin nuam deuh pawh ka lo siamsak ang che nga" alo ti var a. Vawra chuan," Lal pa,min ngaidam la. Ka pu te an awm tho avangin an in lamah ka innghat ta mai ani. Vawiin lama lo lan chho kha a ţha zawkin ka hre deuh atin alawm" tiin a han chhang a. Lal chuan ," Enga pawh chu lo nise. Sawi tur tam tak ka ei ani. Hei ka nau Lianvunga pawh hian sawi tur a pui angah ang. Tuk khata han sawi vek sen pawh ani lovange. Eng ti tura lo zin reng reng nge maw inih le?" tiin a han zawt a. Vawra chuan," Lal pa , mo lawm tur lo zin ka ni a. Tin ,ka ţhiante zawng tura lokal ka ni tel bawk" a han ti a. Lal chuan," Anih tak chu. I ţhiante chu in khaw hlui ami te kha anni anga maw?" alo ti var a. Vawra chuan," Aw,lal pa ni e" a han ti leh a. Lal chuan," Vawra,hei ka nau Lianvunga nen hian i chanchin hi kan lo sawi fo a. Amah phei chuan i lakah hian ngaihdam dil che a duh ani. Ka nau hi i ngaihdam theih ngei ka beisei" a rawn ti a. Lianvunga pawh chuan," Vawra,engkim hre vek tu ini a. Ngaihdam han dil che pawh hi a zahthlak ka ti em em a. Mahse in chhungkaw chunga ka thiltih avang hian min ngaihdam theih ngei ka beisei ani" a rawn ti a. Vawra chuan," Lal pa,engmah ngaihdam dilna tur a awmlo ve. Thil kal tawh chu theihnghilh i tum zawk.teh ang u" a han ti a. Hliappui lal chuan," Pasalţha ţawngkam zawng a fing na rawh e. Nizan lama Zawlbuk boruak avang pawb khan min ngaidam dawn nia" a rawn ti leh a. Vawra chuan," Lal pa,khatiang te zawng khaw tin dan alawm. Ngaih huat tur engmah a awm love" a han ti a. Tichuan hlim takin an inkawm ho a. Hliappui lal chuan Vawra chu zu tw a han zuk a. An ti ti malh malh lai chuan Vawra chuan," Lal pa,ka lo kal chhan tak zawk chu Suartui khua leh tui sala hruaia awmte chungchangah khan ani a. An chanchin in hre zui reng reng em?" tiin a han zawt a. Lal Hratliana chuan," I khaw hlui mi leh sate chu ila hmangaih hle mai maw. Kan theih ang ang kha chu kan han tlan ve na a. Mahse an vai maia tlan tur kha chuan kan neihin a tlin bik talo ani. Hmanni mai khan sal ţhenkhat anlo tlanchuak hlawl mai a. An sawidan chuan sal la dam tamtak chu khawdangah an hralh zui ni aw tak ani. Hualtu lal Zangama unaute khua aţanga lo tlanchhuak anni awm a. Kan tlanchhuah bak kha chu ţhenkhat an thi a. Ţhenkhat chu an hralh ani awm e" a han ti a. Vawra chuan," Lal pa ,anmahni hmuh let leh ngei ka duh ani. Helama kalo kal chhan pawh an chanchin chiang zawka hriat ka duh vang ani deuh ber a. Tlema zawng chu hruailet theih ka inbeisei ani" a han ti a. Lal chuan," Vawra,i thiltumah chuan ka dang hauhlo ang che. Mahse beisei chu a tlem tawh khawp mai. A enga pawh chu nise,tuţhuan ei kham lamah sal tang tlanchhuakte kha koin thuchiang zawk hriat kan tum dawn nia" a han ti a. Vawra pawh chuan hrethiam takin,"Lal pa,min ko sak theih dawn chuan chu tluka ka tana lawmawm a awm chuang love" a han ti a. Rei vaklo an inkawm leh hnu chuan Vawra chu a pu te in lam pan tur chuan a chhuak ta a.

         Lal in kawt ava thlen chuan Thanghniagi(Suartui lal fanu) puanbu phur chunga lal in lam lo pan mek nen an in tawk ta hlauh ami a. Thanghniangin Vawra a han hmuh chuan,"A u Vawr,ilo zin elo" mak tih hmel tak hian a lo ti a. Vawra chuan," Thanghniangi lah ni rengi. Ilo hmelţha ta lutuk a ka hai ţhelh che lawm. I dam ţhin amaw?" ahan ti a. Thanghniangi chuan,"Kan dam tlan lai tak ani. Hei nizanah ka u Darchawii te inah puan kan bang a,ka riak zui alawm mawle. An hmu chak ve tawh ngawt chein ka ring. Zanin lamah va leng la. Kan inhmu dawn nia aw" a han ti a. Vawra chuan," Nang berin i tih tlat chuan ni hmiang chu. U Darchhawka awmlai ani em? " a han ti zui a. Thanghniangi chuan," Aw,an awm kim lai tak ani e. U Vawr,lo leng ngei ngei rawh aw. Hrilh tur che ka ngah teh mai ania. Kan ngai ţhin lutuk che asin" a han ti leh a. Vawra chuan,"Lo leng tuk e,ka la cham rei dawn alawm" a han ti a. Tichuan an kalna lam tur ve ve pan chuan an inţhen ta a.

                        Bung-56

        Tukţhuan eikhamah chuan Vawra chuan a pu Hrangkapa hnenah chuan," Pu,lal in lamah reilote ka han chuangkai lawk ange. Chawhnu lamah kalo pui hman ang che u" a han ti a. Pu Hrangkapa chuan,"Ni e,han kal tak rawh. Buai zualpui chuna reh tawh hi. Engvak han thawh tur a awm tawhlo e" tiin alo chhang a. Vawra a chhuah dawn lai chuan a pa Hrangkima chuan," Vawra,kan lal Lianvunga chu enge a an hmel a i hriat?" tiin alo zawt a. Vawra chuan," Ngaihdam te kha minlo dil vei luam a. Awi tak tak tur nge ka hre biklo e. A thutak hmel phian leh nghal. A mizie diktak chu lal anga a awm leh theih hunah chauh a hriat theih ang" tiin alo chhang thuai a..Hrangkima chuan," I ngaisual laklawh mai mai anih kha. Ţha theilo tawp turah i ruat niin ka hria" a ti leh a. Vawra chuan," A ni deuh ber mai. Chuti maia han inthlak danglam chiah ka ruat lo deuh ani. Engpawh nise, reilote atana a danglam pawh hi a ţha tho e. Engemaw zir belh a neih phah ve mahna" a han ti a. Lal in lam pan chuan a chhuak zui ta nghal a.

          Lal in a han thlen chuan Hliappui lal leh upate bakah sal tang tlanchhuak tlangval pahnih Aivela leh Khupchina chu an lo awm ve bawk a. Vawra a lo thlen takah cuan Hiappui lal Hratliana chuan,"Vawra,heng tlangvalte hi sal tang lo tanchhuak ta te chu an ni a. An lak aţanga hriat duh i neih apiang chu i zawt thei ang" alo ti nghal a. Vawra chuan," Lal pa ngenna te min pawmsak avangin ka lawm e" a han ti a. Vawra chuan a thil hriat duh zawng zawng chu midang hriat vek chi ni a a hriat loh avangin Lal inah chuan zawhna tlemte bak siamsak a tumlo a. An khaw hlui tlangvalte annih tho avangin lal hriatloha a ruka biak chu a tum ta zawk a. Tichuan Vawra chuan Aivela leh Khupchina te hnenah chuan an sal tanna khua chu eng khua ber nge ani tih leh sal tang te chu engzah vel nge la dam tihte bakah enkawl ţhat annih leh nihlohte a han zawt a. Aivela zawk chuan rawn chhangin," Rin ai tak chuan min enkawl ţha phian a. Mahse sal dinhmun chu a nuam chuanglo ani. Chuvang tak chuan ania kanlo tlanchhuah. Kan tanna kha Samtual khua ani a,an lal chu Zahunga ani nghe nghe. Kan rawn tlanchhiat hma hret khan a tam zawk chu khawdang lal hnenah a hralh ani. Eng khua te nge annih erawh kan hrelo a. Samtual khaw lal Zahunga tan khan enkawl kan harsa deuh ani ange. Tin sal tam zawk chu Samtual khaw lamah min hruai vek ani. Kan chanchinte duh angin kan in hriat pawh thei talo a. Ka sawi tak ang khan khaw dang lal hnenah ţhenkhat chu an hralh a,ţhenkhat thung chu a pekin an pe mai ani" ahan ti a. Vawra chuan a ţhiante chanchin chu han zawh a chak viau nang a,a remchanglo riaua a hriat avangin zan lamah an khaw hlui tlangval pahnihte chu biak a tum ta zawk a. Tichuan Vawra chuan," Ka lawm lutuk e. Samtual lal chuan engkim a hrechiang turah ngai ila. Minlo thleng duh em ang chu maw" a han ti a. Chu veleh Hliappui lal Hratliana chuan," Samtual khaw lama va kal zawng a hlauhawm viauin ania ka rin ni. Khual ţha ang chuan anlo thleng duh hauh chein ka ringlo ani" a lo ti vat a. Vawra chuan," Nia,chu pawh chu hlauhawm tak ani. A ruk a rala chet angai dawn ani" a tive mai a. An thil hriatduh berte an han hriat takah chuan lal chuan Sal tang chhuakte chu a hawn tir a. Am chhuah hnu chuan lal chuan," Vawra,kal chu i tum lui tho a maw?" tiin a han zawt a. Vawra chuan," Lal pa,kal ngei chu ka tum alawm . Beisei tihbo nan tal pawh ani ang chu" tiin alo chhang a. Lal bawk chuan,"Engtikah nge chhuah i tum deuh a?" tiin a han zawt leh a. Vawra chuan," Ka pute mo lawm ni hi han liam sela. Khawmual ţhate kan hmuh leh Samtual lamah chuan liam nghal mai ka tum ani" a ti a. Lal chuan," Anih tak chu. I kal dawn zanah minlo tlawh leh dawn nia aw. Tihtheih engemawte ka nei ve mahna chu" a han ti a. Vawra pawh chuan lawmthu te sawiin lal in chu a chhuahsan leh ta a.

          Lal in a chhuahsan hnu chuan Vawra chuan a u ţhianpa pasalţha Darchhawka hmuh a duh avangin pa pakhat chu Darchhawka te in awmna lai a han zawta . Mual veng lama an awm thu a hriat hnu chuan Vawra chu Mual veng lam panin a kal ta nghal a. Mual veng ava thlen chuan a hmuh remchan apiang mai chu Darchhawkate in awmna lai chu a han zawt zel a. An lo kawhhmuh hnu chuan lawmthu te sawiin a kal phei leh a. Darchhawkate in a va thlen chuan Darchhawka chuan leikapuiah Em hnang alo hlai zat zat mai a. A thiltih ringawta a rilru a pek avang chuan Vawra lokal hmel reng reng chu a hmulo a. Chutah Vawra chuan kawmchhak lam aţang chuan," U Dar,va buai awm malh malh ve" a han ti thut mai a. Darchhawka chu lo dakchhuakin Vawra a han hmuh chuan ," E Khai,Vawra lah ni reng che in. Thanghniangi khan a hmuh thu che a sawi tak a. Len pawh kalo la leng hmanlo anih hi. Pasalţha huaisen chu bengvarah pawh kan phaklo che anih hi maw" alo ti var a. Vawra an hriat chuan inchhung lama Darchawii leh Thanghniangi puan bang mek pawh an buan bqn te dahin Darchawii chu alo chhuak a. Vawra a han hmuh chuan," Vawra, in hmuh ava khat ve. I hmel han hmuh meuh chuan lung tepawh a chhe lek lek dawn alawm. Lo lut rawh khai" a han ti a. Darchhawka pawh chuan a hnang hlai chu dahin inchhung lamah chuan an inzui lut ta a. Chhuat laiah chuan mipa naupang kumhnih mi awm vel hi alo muhil bam mai a. Vawra chuan,"Khai ,hei ava lian tawh ve. A nu leh pa a chhun anga a hmelţhain ava huaisen dawn em" a han ti a. Darchawii chuan," Vawra,him taka a awm theihna hi nangmah vang liau liau asin" a han ti a. Vawra chuan," Kha lamah chuan i lut kual lo teh ang u. Thudang sawi tura lokal ka nih hi" nui hak hak chung chuan a han ti a. Darchhawka chuan," Nia,helai meuh lo thlenna tur chuan chhan ţha tak angai ngei ngei ang" a han ti a. Vawra chuan,"Hei Thangi hi ka rawn rim dawn e ka tia" nui chung chuan ahan ti a. Thanghniangi chuan puan ban mawlh mawlh pah chuan," U Vawra ţhin hi a. Kan khuaa kan awmlai pawhin zankhat te mah ilo len duhloh kha" alo ti vat a. Vawra chuan,"Khang hunlai te chuan naupang i la ni a. Tunah chuan hei pasal nei rual ini tawh alwm" a han tih chuan Thanghniagi chu a nui ar ar mai a. Thanghniangi bawk chuan,"Chu min hruai haw nghal i tum em ni" nui sen sen chung chuan a han ti a. Vawra chuan,"I duh athu niang chu" alo ti sam et a. Darchawii chuan," Thutak sawi ve teh u khai. Midang pawh kan awm ve hi" alo ti vat a. An han nui leh ţhin a. Darchhawka chuan," Vawra,enge he lamah i rawn beisei deuha?" tiin ahan zawt a. Vawra chuan," A hming chuan ka pu te mo lawmna a tel tura lokal ka ni a. Mahse ka tum ber chu Suartui khuaa kan awmlaia ka ţhiante zawnchhuah ani. Tunah hian Samtual khaw lamah an la tang mek ani awm a. Mo lawm zawh lamah hian kal chhuah nghal mai ka tum asin" a han ti a. Darchhawka chuan,"Ka rin dan chiah ani. In rial rei khan ka ringlo rengah. Mahse beisei chu a bo khawp mai" a han ti a. Vawra a ţawng leh hma chuan Thanghniangi chuan," U Vawr,Dengi chanchin i hria em?" a rawn tu zauh mai a. Vawra chuan a aw thian kharh kharh pah hian," Ani zawng Dampui lamah khan an hruai a. Dampui lal khan Hmunzau lamah a khaw mipui zawng zawng nen a insuan pui vek a. Hmunzauah chuan vanduaithlak tak maiin hripui a leng hlauh mai a. Suartui khua sala mana awm zawng zawng kha an thi deuh vek ani. Dengi pawh kan va nang hman na a,a damchhuak zo talo ani" a han tichuai raih a. Thanghniangi chuan alo zawt ta kher chu a inchhir hle mai a. Zawi sap chuan," A van pawi tak em. Nula fel tak ani asin. Inrun reng hi zawng a pawi ani. Chhungkaw tam tak min kai ţhentu ani si a" a rawn ti a.. Vawra chuan," Ni ngawt mai. Mahse engmah siamţhat theih anih takloh hi. Tuna nungdama la awmte hi kan pawimawh ta ber ani" a han ti a. Darchhawka chuan,"I ţhiante chu an la damin i ring amaw?" a han ti a. Vawra chuan ," Dam tur chuan ka la beisei ani" a lo ti a. Darchhawka bawk chuan," Puih theihna che ka neih chuan engmah sawi hreh hauh suh ang che aw" a han ti a. Vawra chuan," Tehreng mai,min pui thei tu ber pawh i nia lawm" alo ti mai a. Vawra bawk chuan," Kan lal hian khaw thar kai te hi a tumlo em ni?" a han ti a. Darchhawka chuan," Tunah rih chuan ala harsa rih ani. Khaw thar kai khawp kan awm meuh tawhlo anih hi" alo ti a. Tichuan rei tak an titi ho a. An inhmuhlohna a rei tawh em avang chuan sawi tur an ngah hle mai a. Chhun chaw fak hun velah chuan Vawra chuan," E khai,kan ţawng kan ţawg zawnhin duhtawk sawi ahar dawn em mai. Ka pute pui turin ka va phei ange. Naktuk lamah mo lawmnaah kan inhmu dawn nia" a han ti a. Thanghniangi chuan," U Vawr,mo lawmnaa tel lo khan ilo leng kual dawr dawr ange aw" nui chung chuan a rawn ti a. Vawra chuan," Ilo kal dawn chuan kan leng bo phal nang" alo ti sam et a. Tichuan a tuk lama mo lawmna a inhmu tura in tiamin Vawra chu a pu e in lamah chuan a phei ta nghal a.

            Ni lenga a pute mo nei tur puia a buai hnu chuan Vawra chuan zan lampang chu sal tlanchhuak pahnih te biak tum chuan a inbuatsaih a. Chhungkaw rorel lam pawn ngaihtuah hmanlo in zan lamah chuan Aivela leh Khupchina hmun danga an chhuah hma ngeia biak chu a duh ta a. A pa Hrangkima hnenah chuan," Pa Hrang,ka khaw tlangval Aivela leh Khupchinate kha tu inah nge an innghah a? Biak lawk ka va han duh ve" tiin a han zawtna. Hrangkima chuan," Veng hmawra lama hmeithai pi Ngunliani te inah an innghah kha maw" alo ti vara . Tichuan Vawra chu pi Ngunliani te in lam pan tur chuan a chhuak ta a. Vawng hmawr lam chu pan zelin mi a tawh remchan a piang chu pi Ngunliani te in awmna an zawt zel a. Pi Ngunliani te in ava thlen chuan kawmchhak aţangin,"In awm em?" a han ti hmasa a. An awm thu a hriat chian hnu chuan inchhungah chuan a lut ta a. Vawra ava luh chuan Aivela leh Khupchina chuan anlo be nghal mawlh mawlh a. Vawra hmel an hmuh avanga mak antih thu leh an lawmziate chu anlo sawi ve a. Aivela chuan,"Vawra,Hualtu khuaa kan khaw mi leh sate in chhanchhuak tih kha kan lo hria a. In lo tlang phei mai kha kanlo beisei viau che u sin" a han ti a. Vawra chuan,"Hualtu lal khan a unaute hnenah an sal man te chhuah tur a a rawn tur thu a sawi avangin Dampui khaw lamah kan kal leh a. Mahse Hmunzau lamah anlo in suan vek a. Hun remchang dang beiseiin kan kirsan ta rih ani" a han ti a. Vawra vek chuan,"Engvanga chhuah ta mailo che u nge maw annih le aw?" tiin a han zawt let a. Khupchina chuan,"Samtual lal khan min chhuah mai chu a tum alawm. Mahse Hliappui lam kha tlanna sum kengin anlo lang leh ta si a. Khatianga thil a inher leh takah chuan Samtual lal Zahunga khan tlanna sum tlemte tal a hmuh belh beiseiin min chhuah duh talo ani. Hliappui lam kha a khat tawk chuan anlo lang reng a. Mahse kan vaia min tlanchhuah ngaihna a awm ta silo a. Tlanchhuah bang zawng kha chu lal dang hnenah te pein ţhenkhat erawh an chhawr zui thung ani" a han ti dap dap a. Vawra chuan," Samtual lamah khan Zalawma leh Vantei an awm ve em?" tiin a han zawt leh a. Khupchina chuan," Kan rawn chhuah hma hret khan Vantei chu khawdang lal hnenah an hlanchhawng a..zalawma erawh Samtual khuaah ala awm ani. Ani kha zawng a mantute khan an chhawrzui dawn ni awm tak ani" a ti a. Khupchina bawk chuan,"Samtual lal khan tlanna sum aphut tamlo asin le" a han ti zui a. Vawra chuan," Khawi lam lal hnenah nge sal te chu an hlanchhawn in hre thei em?" a han ti leh a. Aivela chuan," Chuzawng kan hre hauhlo ani. Lal pakhat hnenah chauh chuan a ni lo tawp ang" alo ti a. Vawra chuan,"Ka pute mo lawm zawh veleh hian Samtual khaw lamah chuan ka va kal phawt anga. Theih ang anga kan mi tangte lakchhuah dan ka va zawng dawn ani. Hliappui lal hi chuan kan mi leh sate hi a tlanchhuak duh tawh hauhlo ang. A khaw mi leh sa pawh nilo,a laichin hnaite pawh ni tawhlo te tana a ro thehchhuah chu thil theih anilo ani,a demawm hran love" a han ti a. Aivela chuan," Samtual lal chuan alo lawm hauh chein ka ringlo ani" alo ti var a. Vawra chuan," Lawm taka minlo mikhual theih dan ngaihtuah angai ani mai" a han ti sap a. A thil hriat duh ber a hriat takah chuan Vawra pawh Zawlbuk lam panin a chhuak ta a.Chumi zan chuan Vawra chu a mut hmunah nasatakin a in ngaihtuah a. A ţhiante chu kim takin a hmu leh theilo ang tih chu a hlau hle mai a. Tin,Samtual lal in ţha taka alo biak theih nan Hualtu lal Zangama hnen a kal hmasak phawt chu a tum ta a.

         A tuk ni leng chuan Vawra chu a pu te mo lawmnaah a buai char char a. Khawtlang mipui an hrai theiloh avangin an ţhenrual ţhate bakah lal leh a khawnbawlte chu mo lawmna ruai kilpui atan an sawm ve a. A mo neitu e tilo chuan Vawra chu fatu ah ţangin a vir buai hle mai a. Tlai lamah chuan a pute in leh a chhehvelah chuan hluite siamin ruai chu an buatsaih ta a . Suartui khaw lal Lianvunga leh a fate pawh anlo tel ve a. Vawra chuan an lal hlui te chu a sa ţhalai lai duhsak takin an suah sak a. Ruai ţheh zawhah chuan Vawra chuan a thil ruahman chu a pu Hrangkapa hrilh mai chu ţhain a hre ta a. Tichuan a pu Hrangkapa chu a ruk deuh hlek hian a han bi a. Vawra chuan," Pu,hei hmanni lama Samtual khua aţanga kan khawhlui mi leh sa lo tlanchhuakte khan ka ţhian Zalawma leh Vantei an la dam thu min hrilh mauh mai a. Rem itih chuan Naktuk lamah khian Samtual khaw lama kal mai ka duh ani. Mak min ti viau chuan ka ring a. In mo neih hi ka lawmpui lo che u ani lo a. Mahse tunah chuan ka ţhiante nunna hi ka ngaih pawimawh hmasak angai ani" a han ti dap dap a. Pu Hrangkapa chuan a khabe hmul zut hliam hliam pah chuan," Vawra,min ngaihpawimawh zia a takin ka hmu tawh alawm. I sawi ang khan i ţhiante nunna chu a pawimawh hmasa ber chu ani. Keini lah hian han pui theihna che kan nei silo a. Kal thuai chu a ţha ber chu ania lawm. Fimkhur takin va kal ta la.. I ţhiante pawh dam takin ilo hruai let dawn nia" a han ti a. Vawra pawh chuan a pu chu lawmthu a han hrilh mawlh mawlh a. Zan lamah chuan mo hruaina lamah pawh tel lo chuan lal in lamah a chuangkai ta zawk a.

          Hliappui lal inah chuan Vawra leh lal Hratliana chu khunkhan takin an inkawm a. Lal chuan,"Vawra,ka tlangvalten an zui thei reng che a. Mahni chauha kal zawng itan a himlo ange" a han ti a. Vawra chuan," Lal pa,i zahawm viau na a tuna kal kal chhan hi mimal thil deuh anih avangin midang han tihbuai kha a remlo ani. Bakah eng thil nge kan va tawh dawn a hriatloh a. Chuvangin ka mimal buainaa midang hnuh luh ka duhlo ani" a han ti a. Lal chuan,"Han dan luih theihna che ka neilo a. Mahse mamawh ineih chuan hreh hauhlo in min han hrilh ta che" a han ti a. Vawra chuan," Lal pa, a theih chuan Silai mu leh a zen tlemazawng min pe thei angem?" a han ti a. Lal chuan nui chung hian,"Vawra,khawkhat do tur em chuan i va kal lo ang chu maw. Silai zen leh a mu zawng ka ngah zawng tak ania lawm" a han ti a. Lal bawk chuan ,"Pasalţha ini a. Ţul lemloah chuan thal i thlah mai lo turah ngai ila. Khua leh khua in hmelmakna thlen thei thil va tihloh hram tum ang che" a han ti leh a. Vawra pawh chuan," Fimkhur thilah inralrin ve deuh kan duh mai ania. Ka thiltih tur hi ralpui phiar taka phiar chu pawh va ni suh" a han ti a. Lal chuan a rapchung sanga Silai mu leh Zen chu an lak thlak tirin Vawran chu an pe a. Thil pawimawh leh ţul ni a a hriat a sawi zawh hnu chuan Vawra chuan lal in chu a chhuahsan ta a.

           Lal in a chhuahsan hnu chuan Zawlbuk lama kal ta mai lovin a pu te in lamah chuan a zuk kal leh ta phawt a. A zuk thlen chuan mo pawh an lo hruai fel diam tawh a. A khaw pa fel deuh ţhenkhatin zu bel te rawn pu lutin kum upa lam deuhte chu an lo ri deuh bung bung mai a. Vawra chuan ina lut ta mai lo chuan naupang pakhat tirin a pa Hrangkima chu an ko chhuah tir a. Hrangkima alo chhuah chuan Vawra chuan a thil tum zawng zawng chu a han hrilh fai ta kelh mai a. Hrangkima chuan," Vawra,ka pa khan naktuk maia i chhuah dawn thu min hrilh tak asin. I la cham rih chu duh viau mahila han in ui beh reng theih a ni silo a. Inlengte an ţin fel hnuah i insiam mai ani ang chu" a han ti a. Vawra chuan," Ni mai e,an leng rei lutuklo turah ngai ang. La han cham rih pawh duh viau mahila a ngaihna a awm talo anih hi" a han ti chuai raih a. Chutia an titi malh malh lai chuan Suartui lal fanu Thanghniangi chu inchhung aţangin alo chhuak hlawl mai a. Hrangkima chuan,"Thangi lah ni reng che in. I hawng daih tawh emaw ka ti mai asin" alo ti thuai a. Thanghniangi chuan," Ka pa ka la nghak deuh e ka tia. Hei a rei ta phian a. Ka lo hawng mai ang chu ka ti " a han ti a. Vawra chuan,"Thangi,hawh teh ka han thlah ang che" a han ti a. Tichuan Vawra leh Thanghniangi te chu lal in lamah chuan an kal ta nghal a. Kalkawngah chuan Vawra chuan," Thangi , hrehawm iti em. Nuamsa taka awm ţhin kha tunah hetiang dinhmunah hian in ding ta si a?" tiin a han zawt ta chawt mai a. Thanghniangi chuan,"U Vawr,a chang hi chuan hrehawm ka ti ţhin. Mahse ka patea te chhungkua hi an felin min ngaihsak em em a. Mahse mahni in ang taka en chu a har ani. Lehlamah chuan mi pangngai angin zalen takin ka awmthei a ,a nuam ka ti zawk phian mai" a ti reuh a. Vawra chuan,"Ni e,i hriat ngailoh thil tamtak pawh i hriat belh ang chu. Hei naktuk zing lamah ka chhuak tawh dawn a. Zanin bak hi chu kan inhmu tawhlo ani thei a. I chhungte kha minlo biak dawn nia" a han ti a. Thanghniangi chuan," U Vawr,nang ang vek hi chu ni ila tunah pawh hian kan khuaah khan kan la awm reng awm sia. Khuaa in awmlai chu nise zawng Suartui khua kha ala ding reng awm sia" a han ti a. Vawra chuan," Thangi,thil ţhenkhat hi chu tih danglam theih anilo . Kan awm leh awmloh khan kawngro a su lo e. Nula hmelţhatak ini a,pasal ţhatak neiin lal nu ila ni thuai dawn alawm" a han ti leh a. Thanghniangi chuan," U Vawr,lal chhungkaw dinhmuna din hi ka tum tawh hauhlo mai. Kei zawng mi pangngai nun a nun ve mai hi nuam ka ti tawh zawk ani" a han ti a. An ţawng an ţawng lai chuan lal in chu an lo thleng dawn ta der mai a. Vawra chuan," Hei in in pawh kan thlen tawh hi. Dam takin lo awm la,kan inhmu leh thuai dawn nia" a han ti a. Thanghniangi chuan," U Vawra,lo zin leh ngei ngei ang che aw. I hmel ka hmuh hian ka hlim em em tih min hriatsak dawn nia" a han ti a. Vawra chuan," Khuanun zaha ngai anga. Kan inhmu leh em em ang. Dam takin le" tiin Thanghniangi chu a han mangţha ta a. Vawra chu a pu te in lamah let leh nghalin an inleng te an ţin hnu chuan a pa Hrangkima nen chuan a mamawh tur ang ang an han siam sawk sawk a. An zawh fel hnu chuan Zawlbuk lama riak turin a kal leh ta nghal . A tuk zing varţianah Vawra chu a tho a. A mutbu te thlep felin a pu te in lam chu a pan nghal a. In a zuk thlen chuan Hrangkima chu alo tho tawh a. Vawra chuan chawţhing awm ang ang leh Chawhmeh ţhingte chu an bar sawk sawk a. A kham hnu chuan Hualtu khaw lam pan turin a chhuak zui ta nghal a.

            Ruah a sur buan buan mai a. Vawra pawh nithum lai ram pa lailenga a kal hnu chuan Hualtu khua chu a hnaih tawh hle mai a. Ruah a sur nasat em avang chuan a huh zawr vek tawh mai a. A vawt ti lutuk chu a sikhlim te pawh a bawl tiar tawh a. Kawl a phe zuai zuai a. Khua a thim fel tawh maw tihah chuan Hualtu khua chu a lut ta a. Hualtu lal chuan alo ngaihsak duhlo mai ang tih chu a hlau em em mai a. Mahse Hualtu lal biak chu angaih tho si avangin lal in lam chu a pan ding nghal ta char char mai a. Lal in kawt a han thlen chuan thawm ngaithlain an ding deuh vang vang a. A ruk tak chuan Hualtu lal in a luh chu a hreh em em tawh ani. Mahse a ţhiante chanchin engemaw tal hriat belh theihna leh Samtual khaw lal hnena ngampa taka a kal theih nan Hualtu lal chu a biak ngei a ngai thung si a. Tichuan phur lem lo tak chuan lal in a luh chu ahan dil ta a. Lal in lam aţang chuan chhanna a hmu mai lo a. Mahse rei vaklo ah chuan an tlangau ni ngei tur chu lo chhuakin tunge anih tih leh khawilam khual nge anih tihte a rawn zawt a. Vawra chuan a hming leh a lokalna khuate a hrilh hnu chuan tlangaupa chu lal inah chuan ahan lut leh a. Reiloteah chuan lo chhuak lehin Vawra chu lal ina lut tur chuan a rawn ko ta a. Vawra pawh a thaw huai mai.

          Lal ina a han luh dawn chuan a thawmhnawte ahuh vek avangin Sumhmunah chuan an ding rih phawt a. Chutia a din reng lai chuan a beiseiloh tak maiin Hualtu lal fanu Rengpuii chuan a puanven thlakna tur a rawn pe a. Engmah sawi lemlo chuan a kalsan leh ta mai a. Vawra pawhin a puanven hun vek tawh hnu a thlak zawh chuan lal in chhungah chuan a lut ta a. Hualtu lal Zangaman Vawra alo hmuh veleh chuan," E khai Vawra,tun ţuma ilokal chu ka khua rawn run tur chu ini tawh emlo ang chu maw" a lo ti nghal mai a. Vawra chuan," Lal pa, i ţanpuina dil tura lokal ka ni e" a han ti a. Lal Zangama chuan," Ilo kalna a hla awm sia. Kha i chhawl hal dawm nan zu no te hi ha dawm ve phawt la mawle" tihpahin zu no chu a rawn pe a. Vawra chuan tlemte lo dawt zauhin Hualtu lal zu chu ahan fak a. Ţhuthmunte a rem fel hnu chuan Lal Zangama chuan,"Vawra,a fur khawchhe kara pasalţha meuh ka ina ilo lan takah chuan engemaw thil pawimawh chu a awm ani phawt anga. A ţha lam thu ani em ang chu maw?" a lo ti var a. Vawra chuan," Lal pa, Suartui khua in rawn run laia in sal man ţhenkhat la dam,i unaute khaw lamin an la kawl mekte ka tlanchhuah theih takmialin ti a lokal ka ni a. Tin,chumi kawnga Samtual khaw lama ţha taka minlo mikhual theihnana i ţanpuina dil tura lokal ka ni" a han ti a. Hualtu lal Zangama chu an ngawi deuh vang vang a. A vaibel pak khu tual tual pah chuan," Ani maw. I unaute chu i la rawn hre rei hle mai . Ka nau Zahunga khua Samtual lam khan sal atana kan man tamtak kha chu an kawl nual mai a. Ţhenkhat chu Hliappui khaw lal khan a rawn tlanchhuak a. Ka nau hnenah khan a bak zawng chu chhuah mai tur khan kan.ti deuh a. Mahse khawkhat lal ani ve a. Ka thu a kip a kawi a zawm tur chuan ka tilui thei talo ani. Kei chuan eng thu chiang mah ka hre tawh biklo a. Samtual khaw lal hnenah chuan i va zawhfiah mai angai tawh dawn ani. Eng tia han puih che nge i duh a" a han ti dap dap a. Vawra chuan," Lal pa, Samtual khaw lal hnena min kalpui turin i tlangval pakhat tal min zui tit thei angem. I hriatpuina a kal ka nih zawngin minlo ngaihsak deuh mahna" tiin a han ngen a. Hualtu lal chuan," Thei tuk e a. Sal a kan hruai zingah hian i chhungte an tel em ni" a han ti a. Vawra chuan," Tel hran lo e. Tlanchhuah thei ka neih takin ti a lokal mai ka ni" a ahan ti leh a. Lal chuan," Ka rin aiin i rilru a lo ţha daih mai. Ka khua in rawn run lai kha chuan lainatna nei hmel pawh i pu hauh silo a" a rawn ti a. Vawra chuan,"Ni e Lal pa,thinrim lai hi chuan pawisak engmah hi kan nei ngailo ani" a han ti a. Lal bawk chuan," A enga pawh chu nise. Naktuk khawvar lamah kan la sawi tlang leh dawn nia. I lokalna te a hla tham si a. Zawlbukah pawh riak loin ka inah hian i thleng mai dawn nia" a han ti a. Lal bawk chuan a fanu hnenah chuan," Rengpui,Vawra hi chawei va siam tawh,a rilte pawh a ţam ange" a ti zawm leh nghal a. Vawra chuan," Lal pa ka lawm lutuk e. Chawei siam buai chu a ngailo ang . Ka ril aţamlo e" tiin ahan chhang a. Mahse Rengpuii chuan Vawra chawei tur chu a rawn siamsak ta tho a. Lal chuan," Vawra,ilo kalna ngaihtuahin ril ţamlo chi i ni nem. Hnial buailo khan ei mai rawh" alo ti hlut a. Vawra pawh chuan hnial buai ta lemlo chuan chaw chu a bar ta mial mial mai a.

            Lenghawn Ar a khuan meuh chuan ruah pawh han tawhin mak tak maiin thla a eng no ruih mai a. Lal inchhung lama lal leh upate an inkawm avangin Vawra chu pawnah chhuakin leikapuiah chuan an ding vang vanga. Thlaeng hnuaiah chuan Hualtu khua chu a lanh hnim ruih mai a. Vawra chuan Hualtu lal in a lo mikhual dan chu mak atiin a ringhlel deuh rum rum a.. Chutia ngawi renga a din lai chuan lal in sumhmun chu alo ri rak a. Vawra chuan upa ho zun ram thiar tur mai mai annih ringin alo ngaihsak lem lo a. Hnung lam aţang chuan,"Lungleng awm vung vung ve mawle" tih ri hi a hre ta thut mai a. Vawra chu leh hawi nghalin luhkaa Rengpuii lo ding reng chu ava hmu thuai a. Thla eng no ruih hnuaiah chuan a hmelţhatna chu a zual ngei mai. Vawra chuan," Rengpuii lah ni rengin. Lunglen changte chu awm ve bawk e mawle" a han ti a. Rengpuii chuan leikapuia lo din phei pah chuan," Pasalţhate zawng in lung leng ve thei tak tak emawni le" a han ti a. Vawra chuan," Thei ve bawk e. Mihring ve tho kan nia lawm" a han ti a. Vawra bawk chuan," Rengpui,a hmaa kan khaw kar boruak zawng zawng ngaihtuah chuan ţha taka minlo thlen kha ka beisei hauhlo a. Amak ka tiin in chungah ka lawm takzet ani" a han ti a. Rengpuii chuan nui sen sen pah hian,"Khang thilte kha keini chuan theihnghilh kan tum tawh asin . Bakah i thinchhe viau nain in thuhnuaia kan awmlai pawh khan zah takin min enkawl ţhin a. Khang thilte kha kan theihnghilh ngai hlei nem. Ka pa pawh hi sual viau angin a lang na a,lainatna hi chu anghah ve teh ania" a rawn ti a. Vawra chuan,"Eng thil mah ka tihsak cheu phei zawng ka hrelo a. Ka chunga in ţhatna hi rulh let theih hun ka la nei em ang chu" a han ti leh a. Rengpuii chuan," Kha lam chu i duhtawk teh ang. Kan khuaa i lokal lai khan nula pakhat i zawng nasa viau an tih thu ka lo hria a. I mi duh chu ila zawng hmulo em ni tun thleng thlenga ila chawlh hahdam duh hauhloh ni?" a rawn ti ta phawng mai a. Vawra chu an ngawi vang vang a. Chutah nui sang chung hian," Ka hmu tawh alawm. Mahse tunah chuan pialral aţangin min thlir reng tawh mahna. Duh ang zawng zawng hi a neih theihloh anih hi" a han ti a. Rengpuii chuan,"Pawi ka ti takzet ani. Mahse thil pakhat,tunah hian engvanga sal tangte rawn umzui reng nge inih le. Ka pa hnenah khan i chhungte an telloh thu i sawi si a. I tan enge an pawimawh viau na?" a rawn ti leh a. Vawra chuan,"Sal nih hrehawm zia ngaihtuah la,an zalen hun tur an suangtuah nasat ţhin dan tur nen" alo ti mai a. Rengpuii chuan nui hak hak pah hian," Chu zawng Suartui khuaa min man lai aţang khan ka hrethiam tawhin ka hria" a han ti a. Thu dang dang an sawi hnu chuan Vawra chuan," Rengpui,hei nula puitling zet ini tawh a. Pasal neihte hi i tum hnai em?" tiina han zawt thut mai a . Rengpuii hlim hmel chu lungngaihna in a rawn thlak nghal a. Ţawng pawh ţawng chhunzawm talo chuan a ngawi reng mai a. Vawra inthiamlo chuan," Rengi ka tihpalh ani. I pawi ka sawi anih chuan min ngaidam rawh" a han ti a. Chutah Rengpuii chuan," U Vawr,lal chhungkua a in piang velo hi lawm hle ang che u. Ka pa te chuan tun favanv chho ah hian kan khaw ţhenawm lal fapa nei tura min tirh an tum a. Mahse ka hmangaih silo a. Ka theilo ani,ka duhloh thu ka sawi lahin an pawm silo" beidawn hmel tak chuan a han ti a. Chutah Vawra lah chuan nui chung hian," Tunah chuan i chungah a thleng ve dawn ta maw. Kan lal fanu Darchawii pawh khan i u kha a hmangaih hauhlo a. Mahse a pa te thu angin anei mai ani. Mahse nang zawng hmangaih em em ila neilo anga. Darchawii dinhmun ai chuan ala zia hret dawn anih chu" a lo ti sam et a. Rengpuii chuan rum taka Vawra melh pah chuan,"Farnute inei ve ngei anga. An duhloh chung chuan tirlui ve hauh suh ang che. Ni e,hmangaih em em chu ka nei lo a. Mahse ka rilrua thi thei miahlo mi pakhat chu an awm alawm. Amah kha neithei dawn ila chuan engkim chan pawh ka huam ang. Ka thihni thlengin ka theihnghilhin ka ringlo" a han ti a. Vawra chu a nuih a za tulh tulh mai a. Mahse han nuih vak arem silo a.. Nuihza insum tak chung chuan," Rengpuii,i pate rilru pawh a inthlak thut mahna. Han dil nawn leh chhin reng reng la. Mahse kan nu leh pate thu hi chu a fing zawk fo ani a . Tin,farnu chu pahnih ka nei a. Tumah an duhloh zawngah kan tir lui ngailo" a han ti a. Rengpuii chuan,"I khawsa zia aţang hi chuan farnute han hau buan buan chi chu inilo alawm. Lal fapa te lo ni la ţha tur hi nia" nui lui tih hriat tak chung chuan a rawn ti a. Vawra chuan,"Anih lal fapa niin lo rim ta che ila engtin nge minlo chhan ang" a han ti fiam a. Rengpuii chuan,"Ka lo hawi san khum viau ang che. Ka pawnfen suk i inhuam leh huamloh ani mai" nui ar ar pah chuan a rawn ti a. Vawra chuan," Suk a ţul te chuan kan su lawp lawp mai ani ang chu. Ka thaibawih deuh dawn ani mai a" a han ti a. Rengpuii chuan,"I nupui ni thei chu an vannei dawn mange" a han ti sap a. Vawra chuan,"A nungchang a zir ani ang chu" alo ti mai a. Thu dang dang sawiin zan rei tak thlengin an titi dun a. Mut te alo hun takah chuan Rengpuii chuan Vawra mutna turte phah sakin Vawra pawh thlamuang takin a muhil ta a.

                     Bung-58

          Zing khua alo var a. Zan lama ruahsur avang chuan lal in tual chu a diak chap mai a. Vawk rilţamte chuan an kuang chu an han nawr khup leh thawk thawk ţhin a. Naupang hawk lak ţhenkhat chu khawlaia tui tling ahte chuan anlo infiam ve a. Fur khawthiang tak kara zing nichhuak chu a mawi danglam bik ngei mai. Zing ni lum ai pah chuan Vawra leg Hualtu lal Zangama chu lal in leikapuiah chuan an ţhu a. Hualtu lal chuan a Sechal chu Chi an pe,a Sechal chuan tuiti tak hian a liak hlup hlup mai a. Lal chuan a Sechal chul heuh heuh pah chuan," Vawra,nikhat tal chu la awm hahdam deuh la mawle. A enga chuti taka hmanhmawh chu nge maw inih. Samtual khua lah chu nikhat kal awrh choh ani a. Reilote ila chawlh chhung chuan eng thil danglam mah a thleng hman hauhlo ang" a han ti a.. Vawra chuan,"Lal pa,min duhsakna chu alawmawm viau na a. Han chawlh khawmuan chu chak via mah ila ka ţhianten hrehawm an tawrh laia nuamsa taka lo awm bik zawng ka duhlo e" tiin alo chhang a. Lal chuan," I thurual pui tur tlangval pahnih ka han ko tir kha. Tukţhuan ei khamah in chhuak nghal thei ang" ahan ti leh a. Vawra chuan,"Lal pa,tunhnai deuhah mikhual tlangval i khaw paltlang an awm reng reng em?" tiin a han zawt. Lal chuan,"Tunhnaiah chuan mikhual veivak an vang khawp mai. Chutiang awm reng reng chu kalo hre hauhlo mai. Mahse mikhual zawng zawng hian khua hi an paltlang kherlo a. Han hriat vek ngaihna a awmlo ani" alo ti a . Tui taka an titi malh malh lai chuan khawnbawl upa ţhenkhatte pawh lal in lamah an lo chuangkai ve mek a. Lal chuan," Vawra,tikhan khuate kha lo han chuan vel la. Inchhung lamah ka upate ka han kawm ange" a han ti a. Tichuan Hualtu lal chuan Vawra chu inchhungah a luhsan a.

         Chutia Vawra mahni chauha leikapuia a din reng lai chuan lal fanu Rengpuii chu Thingek turin Hreipui nen alo chhuak a. Vawran a lo hmuh chuan,"Hmelţha apiang hi an fel mai anih hi maw" alo ti var a. Rengpuii chuan," Chutiang anih zawngin i sual bikin ka ringlo" a lo tive mai a. Rengpuii chuan Thing ui pum tiah vel a lian tur bang hrula an tun te chu lei hul lai deuhah chuan thehchhuakin an ek ta karh karh mai a. Vawra chuan uluk taka lo en pah hian," Nula a pumpa thingte chu eh sa diama phurh tur che nia. Kha ţul lovah hna i insiam ţeuh anih kha" nui var var pah chuan a han ti a. Rengpuii chuan a thing eh lai chhunzawm mawlh mawlh pah chuan,"Ka ţhiante lova ka feh ni a ka phurh annih hlawm hi. Hreipui ka keng remchang mai silo a. Khatia ţawng zuah zuah lo khan minlo pui ve la mawle. Min en rei thei ka ti mange" alo ti hluk a. Vawra pawh chuan hrethiam takin leikapui aţang chuan an chhuk a. Rengpuii thing ehna kianga din pah chuan," Chuti taka mi tha han it mai chu. Khawnge kiang rawh kalo eh darh sak vek ang che" nui huah huah chung chuan a han ti a. Rengpuii chuan a Hreipui ken Vawra pek pah chuan," Thing eh te i thiam ve tak tak emawni le. Han ek chhin ve reng reng la. I ek ther fur maiang tih ka hlau hlel love" a han ti a. Vawra chuan Hreipui chu lain thing tum chu a han ek nghal zat zat a. Reilote ah chuan phur khat chu a ek zo nghal ta mai. Thing an eh zawh veleh chuan Rengpuii chuan," Ka rin aiin i eh thiam chu le. I patling dawn riauin ka hria. Pasal atan i tlak viau dawn hi" a han tifiam a. Vawra lah chuan,"I tan te chuan phur sang tam pawh kan ek peih ang chu mawle. Khawnge a dang ala awm em?" a han ti zawm zat a. Rengpuii chuan nui sen sen pah hian,"Han hnial hneh chi lah nilo che a. I ţawngthei zeh zuah sia. Kha a dang pawh ala tam ania" tih pahin pawn bang hrula thingtum an tun sate chu a rawn theh phei ta mial mial mai a. Vawra chuan nui tet tet pah hian," Min chhawr hlum chu i tum ani em lo maw" alo ti thuai a. Rengpuii chuan," Pasalţha tana han chauh na tham anih loh kha" alo ti sam et a. Vawra pawh chuan Thing chu a ek leh ta nghal mial mial a. Reiloteah chuan azo leh mai a. An thing eh sate an rem fel mawlh mawlh lai chuan lal nu cu pawnah alo chhuak a. Chutia a fanu leh an mikhual tlangval thing rema lo pu mawlh mawlh a han hmuh chuan ring deuh tak hian," Rengpuii ţhin hi aw. Kan mikhualte khatin kan chhawr ngailo" a rawn ti a. Rengpuii chuan," Ka nu ngaihtuah duh suh. A chak lutuk,hei ka zing hna tur min zawhpui der mai. Chhawr man a awm teh ania" alo ti mai a. Vawra pawh chuan," Ka pi ahahthlak hlei nem,nula puhte chu ka nuam tihzawng tak ania lawm" alo ti vat a. Rengpuii bawk chuan,"Ka nu kha i hmu maw. A ţawng chak ang bawk hian a thawk chak reuh ania" nui hak hak chung chuan a rawn ti a. Lal nu chuan," In zawhfel hunah tukţhuan kan kil nghal dawn nia. Kan tlangval kha a hmanhmawh hmel si a" tihpahin inchhung lamah a luhsan ta daih a. Rengpuii chuan," U Vawr kan khaw lamah ilo let leh angem?" tiin Vawra chu a han zawt a. Vawra chuan," Ka hre hauhlo mai. Samtual khaw lama ka mi duhte an awm anih chuan ka lo tlawh leh ang che u. An awmlo anih erawh chuan kalo kir leh ka ring tawhlo ani" a han ti a. Rengpuii chuan thawk lak hak ph chuan,"Ilo zin ve chhunah lah i cham reilo sia. Hei aia rei han inkawm thei ila ţha tur. Min run tur tal pawhin ilo kal leh ani ani ang chu" nui chung chuan ahan ti a. Vawra chuan ,"In khaw lamah hi chuan ka kut ka lek tawhin ka ringlo. Ka lo tlawh hawng talo cheu anih pawhin a hranpa in kalo la zin em em ang" a han ti a. Rengpuii chuan," Ka pasal neih hma vawikhat tal lo zin leh ngei ngei ang che aw. Pasal ka neih hnuah zawng tiang hian kan inkawm thei tawh awm silo a" a ti chuai raih mai a. Vawra chuan," Nang berin itih chuan kan lo zinlo phal nang" nui var var pah chuan a han ti a. Tichuan in chhung lamah an lut zui a.

         Tukţhuan ei khama chuan Hualtu tlangval pahnih Vawra zui tura ko tepawh lal i an lo thleng tawh a. Vawra pawh engkim in peihsa veka awmin kal chhuak mai thei turin a inrinng tawh ani. An kal dawn chuan lal chuan," Vawra,ka unaupa hi thiam taka i va biak angai dawn ani. A sal man chungchangah pawh fimkhur takin va dawr ang che. Ka tlangvalte hi chuan an va dah ringawt ang che nga,an lo kir leh mai dawn ani. Lal sual tak chu ani bik hauhlo a. Mahse a huat zawnga i awm vaih zawngin zahngaihna a lan tir hauhlo ang" tiin Vawra chu a han chah a. Vawra chuan," Lal pa,i thu min chah chu kalo vawng reng ange" a han ti a. Lal bawk chuan," Ka unaupa kutthlaklo turin fimkhur ang che. Chungah thil ţhalo a thleng anih vaih chuan hmelmaah kan insiam ani nghal mai. A pasalţhate chungah kut ilo lek anih pawhin ka unaupa kha i kut hmawr pawhin tawk hauh suh ang che" a han ti dap dap a. Vawra chuan," Lal pa,i unaupa chungah chuan engthil ţhalo mah ka thlentir lo ang. Mahse kutthlak a ţul anih ngat chuan ka tihtur chu ka ti mai dawn ani" a han ti ve a. Lal bawk chuan," Ka thupek hmua kal inih chuan ţhatakin alo dawr ngei ang che. Hlauhthawn tur a awmin ka ringlo e" a han ti a. Thil pawimawh ţul dang an sawi zawh hnu chuan Vawrate chu Samtual khaw lam pan turin an chhuak ta a. An kal liam tur chu Rengpuii chuan a thlir zui vawng vawng a. "Engtikah tak tawng leh ang che i maw" a ti sap a.

         Hualtu leh Samtual inkara an kal lai chuan Vawra chuan a kalpui tlangval pahnih Chinthanga leh Pazawna hnenah chuan,"Samtual khaw chungchang hi hriat in nei ve reng reng em. In inhnaih viau si a" tiin ahan zawt a. Pazawna zawk chuan,"Thu tam hriat chu ka neilo a. Mahse kan upa pakhat sawi danin sal tlanchhuahna rosum ţhenkhat chu Samtual lal hian a u hi a rawn hlan chhawng ţhin ani awm e. Kan lal hi an unau zinga upa ber anih avang hian an zah em ani" a rawn ti var a. Vawra chuan," Chu zawng thil awmlo anih loh chu maw. Samtual lam hian pasalţha an ngah viau em?" tiin ahan zawt leh a. Pazawna bawk chuan," Khawlian lutuk anilo nangin an lal ho hian an kawlhrawng hrep mai a. Pasalţha tiha chhiar theih tur pawh an awm nual mai" alo ti leh a. Vawra chuan,"Engtik hun awm velah nge kan thlen phak a inrin?" a han ti leh a. Chinthanga chuan," Hetianga kan kal reng chuan thim hma in khua kan lut hman ang. Kan khaw kar kawng hi kan zawh bel ve riau a. Kawng pawh a zal nuam khawp mai" alo ti thuai a. Tichuan hmanhmawh deuh tak chuan Samtual lam chu an han pan ta zel a.

        Ni a liam dawn a,losul haw te pawh kawtchhuahah chuan an chawl sap sap a. Naupang an nu leh pa te feh hawng hmuak turte pawh kawtchhuah lam panin an in um kawi zar zar mai a. Ţhenkhat erawh an nu leh pate phura Fanghma tuai ngenin an lo ţap ve par bawk a. An nu leh pate chuan an fate ipte ah leh an Emte phurhah te chuan Fanghma leh Vaimin tlemte an han dah sak ve a. Naupangte tan chuan hlimna tawk a tling em em a. An nu leh pate chhawk viauah in ngaiin khaw lam panin hlim takin an kal ve hnak hnak mai ani. Chutih lai mek chuan Vawrate pawh Samtual khaw kawtchhuah ah chuan an ding vang tawh a. Rei pawh chawl khawmuang talo chuan Samtual khaw lam chu an pan zui nghal a. Khawchhung an va luh chan ni pawh ala tla fel lo a. Vawrate chuan lal in lam chu an han pan ding nghal vang vang a. Lal in tual an han thlen chuan lal in kianga rip chhungah chuan tlangval pakhat chauh hmel tak mai hi rip bang nghengin alo mutthlu lawp lawp mai a. Kut a tuar ve nual ani tih hriat tak mai hian a hmai te chu a vung cher chur mai a. Vawra chuan mi tang chu chiang deuh tak hian an en a. Tunge anih a hriat meuh chuan a sa nghal phat mai. Rip chhunga an khung mek chu tudang mah nilovin a ţhianpa Vanzaua ngei mai alo ni a. Thawh lawk a tana rip chu sahchhiata han hnuh chhuah nghal mai chu a nap a. Mahse chutianga chet alak chuan a tan leh a ţhianpa tan ngei pawh a hlauhawm dawn a hriat avangin a insum ţawk ţawk mai a. A rilru chuan," Vanzau,lo tuar hram hram rawh. I tang reilo ang" a ti mawlh mawlh a. Rip kianga a ding reng avang chuan Pazawna chuan," Vawra,i hmelhriat ani em?" a rawn ti zauh a. Vawra chuan," Ni tehreng mai. An sawisa nasa viau anih dawn hi" alo tisap a. Pazawna chuan," Insum rih phawt kha a ţha ania. Samtual lal hi han be phawt ila,ţawngkama sawifel dan i ngaihtuah dawn nia" a rawn ti a. Vawra pawh chuan lal chu biak phawt a ngai tih a hriat avangin lal in lam chu a pan zui a.

         Vawrate Samtual lal ina an va luh chuan Samtual lal Zahunga leh a upa ţhenkhatte chu an lo ţhu ţhap mai a. An tlangaupa chuan an mikhualte chu Hualtu khaw tlangvalte annih thu an sawi nghal zung zung a. Chutah lal Zahunga chuan,"Hualtu lam chu ka hre chiang viau tawhin ka hria. Mahse hei tlangval pakhat hi khawilam mi ngei annih ve le" alo ti nghal a. Vawra chuan," Lal pa,Vankhupa khua Lungchuan khua leh tui ka ni e" a han ti a. Chu veleh lal chuan,"Lungchuan khua maw inih a. Engti tura helai thlenga lokal ngei maw inih le?" alo ti hlut a. Vawra chuan," Lal pa, i khawngaihna dil tura Hualtu lal hriatpuinaa lokal ka ni e. I sal kawl te zingah hian ka chhungkhat laina te an awm ve a. Chung mi te tlan chhuak tura lokal ka ni a. Rem min tihsak hram ka beisei ani" a han ti a. Samtual lal Zahunga chu an ngawi deuh vang vang a. Chutah a vaibel ek khawn thlak kerh kerh pah chuan," Val a,sal tihtham kan kawl tawhlo asin. Ka unaupa hriatpuina a lokal inih chuan a ţha e. Tlanna sum atan chuan enge i rawn fehchhuah pui ni?" a rawn ti a. Vawra chuan," Lal pa, thil hlu tham tak chu ani lova. Mahse mi pangngai tlanna tawk tur Ţhi tlemazawng ka rawn keng ani" a han ti a. Lal chuan," I thil rawn kente chu han phawrh phawt la. I duh i hmu thei dawn em kan en ang chu" alo ti a. Vawra chuan a iptepui aţanga chuan Ţhi fun chu an phawrh a,Samtual lal hmaah chuan a phelh ta a. Samtual lalin Vawra thil ken a han hmuh chuan a lawm hle mai a. Nui vur vur chung chuan," Tlangval,sal zinga i duh zat zat chu i hawn thei ang. Duh leh an vai pawhin i hruai haw thei ang" tih pah chuan Vawra Ţhi rawn ken te chu an khai kual vel a. Chutah lal bawk chuan," Tlangval,sal tamzawk chu kan lo hralh hman tawh a. Tunah chuan tlangval sawm vel chauh kan kawl tawh ani. An vai chuan i hruai hawng vek thei ang" a han ti a. Vawra chuan," Lal pa,ka ngenna te min pawmsak avangin ka lawm e. Sal dang ho chu khawi lamah nge in hralh min hrilh thei angem?" a han ti leh a. Lal chuan," Nula ho zawng kha chu Thingdawn khaw lal hnenah inrem siamna ni pahfawmin ka hlan ta anih kha. Tlangval ho erawh khaw hran hranah kan hralh kual ani" a han ti a. Chu thu a hriat meuh chuan Vawra chu a beidawng ru ta hle mai. Thingdawn khaw thlen nan chuan aloh berah ni nga lai an mamawh dawn si a. Chumi chhung chuan an khaw hlui nulate chu an lo suan darh hman an tih a hlau em em ani. Chet vat vat angai tih hriain Vawra chuan," Lal pa,sal te chu zanin ngei hian chhuahpui hman kan duh a. A theih hram chuan lal in lamah hian min ko sak thei angem?" tiin ahan ngen a. Chutah lal chuan," Thei tuk e,khawnge ka tlangau kan tir nghal ange" a han ti a. Tichuan an sal man, a khawnbawlten a kawl te ko tur chuan tlangaupa chu a han tir ta nghal a.

            Rei vakloah chuan Samtual khua a sal tang la awmchhun te chu lal inah chuan an rawn lut khawm ţak ţak mai a. Vawran Zalawma hmel a han hmuh chuan insum zo lovin Zalawma chu a va kuah chung chung mai a. Zalawma chuan," U Vawr,min theihnghilh hman tawh emaw kalo ti mai asin" ţah aw ţuau chuan alo ti a. Vawra chuan,"Min ngaidam rawh,ka lo hmanhmawh theilo ani" a han ti a. Vawra chuan an khaw hlui tlangval dangte pawh chu an be luam hlawm a. Chutah Samtual lal chuan," Tunah chuan kan la kawl ho zawng chu an kim tawh e. Hengho hi hruaiin i duh hun hunah ka khua hi i chhuahsan thei ang" a rawn ti a. Vawra chuan,"Lal pa,ka chunga i ţhatna avang hian lawmthu ka sawi e. Thil pakhat ngen duh che ka la nei a. Min ngaihthlaksak lawk thei angem?" a han ti a. Lal chuan," I duh zawng i hmuh tawh ahnu enge i la beisei cheu ni. Sal dang an awm tawhlo e" a ti nghut mai a. Vawra chuan," Lal pa,zahngai hram a. Tual laia Rip chhunga i khunga pawh khu min hruai tel tirve ta che" tiin a han ngen a. Chu veleh Samtual lal chuan,"Khu tlangval khu thi tura a chungthu rel ani tawh. Kei leh ka upate ngei pawh min zahlo in a ruk a ralin min rawn bei a. Kan sal te tlanchhuahpui a tumna lamah kan man ta anih kha. Ani zawng in hruai theilo ang" a ti ta chhur chhur mai le. Vawra bawk chuan," Lal pa,min khawngaih la,ani tlan nan chuan ka Silai pawh hi ka pe mai ang che. Min hruai tel tir hram teh khai" a han ti leh hram a. Samtual lal chu a thinrim ta hle mai a. Lal in chhunga vei nghut nghut pah chuan," I dil zawng chu ka pe che ni lawm ni. Khang ho zawng kha hruaiin ka khua hi chhuahsan nghal rawh u. Anih loh chuan tumah hi damin in chhuak hauhlo ang" a ti ta riap riap mai a. Vawra tan pawh han tihzui vak ngaihna a awmloh avangin lal in chhuahsan a,a ţhiapa Vanzaua chu thi tura an tlansan mai a ţul dawn ta ani.

         Vawra leh Suartui khaw tlangval sawm lai maite chu beidawng ru takin Samtual khawdaiah chuan an ţhu khawm far mai a. Hualtu lam tlangval pahnihte erawhin an kal san tawh a. Vawra chuan a Silai chul heuh heuh pah chuan," Vanzaua kha kan kalsan theilo ang. An mut reh hun kan nghak anga. Kan hruai chhuak tho tho dawn ani" a han ti a. Zalawma chuan," U Vawr,zan lamah chuan vengtu an indah in ka ring hauhlo mai" a rawn ti sa sa a. Suartui tlangval pakhat chuan," Vawra,min rawn hruaichhuak hi kan lawm khawp mai a. Mahse chhungte han belh tur takngial pawh kan nei silova. Ka tan chuan khawi lam nge pan tur tih hriat a har ani" a rawn ti chuai raih mai a. Chutah Vawra chuan," Chu zawng tuna ngaihtuah buai a ngai rih lo e. Tunah chuan Vanzaua chhanchhuah dan chiah kan ngaihtuah phawt ang" a han ti a. Vawra bawk chuan,"An mut reh hun kan nghak anga. Thawm chhuah palh a hlauhawm avangin a khungna Rip chawp khian ram lamah kan zawn lut dawn ani. Rip kha mi pakhat tanna tur chauha siam ani a . Awlsam takin kan zawn thei mai ang. Tunah chuan an mut reh hun nghakin kan ţhu rih dawn ani" a han ti a. Tichuan Vanzaua an chhanchhuah theih nan Samtual khaw ho mut reh hun chu an nghak ta a.

          Lenghawn Ar khuan hun awm velah chuan ruah a sur leh ta tluk tluk mai a. Samtual lal inah chuan lal leh a upate chuan an Ţhi neih thar chu lawmin zu an inho a. An ri luih luih mai a. Pawn lama Rip chhunga an khung tlangval lam reng reng an ngaihsak lo. Rip chhunga awm Vanzaua erawh ruah in a nan tluk tluk avang chuan vawt a tiin a khur hlawk hlawk mai a. A taksa khawilai mai pawh chu a na lo lai a awmlo a. Samtual khua aluh zan Suartui tlangval pakhat a hmuh tlanbo pui nghal mai an tumte kha pawi a ti hle mai a. A ngaihtuahna fim taka a hmang lo kha tuna a tanna chhan pawh hi ani miau si a. Mahse a rilru chu a ti beidawng duh bik hauhlo a. Huaisen taka a hma hun hmachhawn mai chu a tum ani.

         Khuan hmasa khuan hun awm velah pawh chuan ruah chu a la tla reng mai a. Vanzaua chu vawt atih em avang leh ataksa a chauh em avangin nikhaw hreloin Rip chhungah chuan a tawm ngak mai a. Ruah a sur reng avang chuan khua chu a thim chhah em em a. Chutih lai chuan Vawrate chu Samtual lal in lam panin kawng dapchawp tak meuhin an kal ţhem ţhem a. Ruah a sur reng avang chuan thawm dim vak angailo a. Mahse an khaw hmuh a tawi en avang chuan a changin an han tawlhthlu leh ţhin a. Lal in tual zawl an thlenchhoh chuan an han in be ru sar sar a. Vawra tihloh midang zawng chuan Vanzaua tanna Rip chu an zawn anga. Vawra chuan alo veng ve thung dawn ani. Vanzaua tanna zawn lai vel an va thlen chuan an han innghak khawm te te . Chutah Rip chu kil tinah vuanin an han chawi dawn ta. An Rip siam chu Thing ui pum tiat tiat ,a kar lakah mihring len theihlohna tura kil li neia nghet taka ţawn beh ani a. A chhunga tang te tan chuan han din mar emaw,han mut zal emaw theih hauhloh tura duan ani a. An mi tangte tan chuan ţhut tawm reng angai ani. Rip chhunga an khungte hi an phuar hlawm tlangpui a. Vanzaua erawh a chauh deuh em avangin an phuar duh lemlo ani. Vawrate chuan rip chu an han zawn ţan ta a. An rin ai daih chuan alo rit mai a. Chumai ala nilo,a ban ang deuhin Thing ţhenkhat chu leiah alo inphum a. A chawia han chawi sawn mai theih chi anih takloh ah chuan Vawrate chuan a ţawnna hruite chu thawm dim thei ang berin an han zai chat ta pheuh pheuh a. An phuar nasat em avangin hun a duh rei phian mai a. Chutia Rip hawn tuma an buai laih laih lai chuan lal in kawnkhar chu a rawn inhawng rawk mai a. Vawrate chu chechang lovin an awm ngaiin an awm ta reng a. Lal in aţang chuan mi pakhat rawn chhuakin a rawn zung ri tur tur mai a. Vanneihthlak takin a zun zawh veleh inah alut leh nghal a. Vawrate pawh chuan an hna chu an chhunzawm nghal mawlh mawlh a. Reife an beih hnu chuan Vanzaua chu an la chhuak thei ta a. Vanzaua chu a khawng vek a,engmah a hre tawhlo a. Vawra chuan a mar te a han dek a,alo la phu ve det det a. Tichuan hmanhmawh takin ramhnuai lamah chuan an pawm phei ta. Ramhnuaia an va luh hnu chuan tawm hulna tur an han zawng a. Thim zingah chuan han vah kual vak ngaihna awm heklo le. Thingbuk hnuaiah hian an tawm khawm ta tawp mai a. An theih ang ang chuan Vanzaua taksa chu tihlum tumin an han buaipui a. Ruah far tlemna lai deuhah chuan tlangval pakhat chuan pawmin an ţhutpui a. Midang chuan a taksa khawng vek tawh chu an lo hmet nawk nawk mai a. An vanneih a siamin ruah chu a han ta hlauh mai a. Vanzaua pawh la harh chiahlo mahse a a mar tepawh a pangngai deuh tawh a. Khawvar lam te a hnaih takah chuan chulai hmuna awm reng chu an tan a himlo ani tih an hria a. Chutah Vawra chuan," Kan kal vat loh chuan min rawn nangching hman ngei ngei dawn a. Tunah chuan ka rawn kalna lama let lovin Samtual khua aţanga Hliappui panna lamah kan kal dawn nia. I hmanhmawh teh ang u" a han ti a. Tichuan hah pawh sawi lovin Hliappui lam panna kawng ni awma an hriat lamah chuan an kal ta nghal a.

        Zing khua alo var a,Samtual khaw lalin a mi hren a bo tih ahan hriat chuan a thinrim hle mai a. A upate leh a pasalţhate chu a ko khawm nghal chuk chuk a. Lal Zahunga chuan apasalţhate chu ami hren ru chhuaktute hnu chhui zui tur chuan a han ti a. A pasalţhaten Vawrate hnu an han chhui tak zelah chuan Hlaippui lam panna kawng ruh chu an zawh tih an hre thei ta a. Hmanhmawh takin lal hnenah chuan an han thlen nghal a. Chutah zet zawng Samtual lal thinrim chu lal in ah chuan avei kual thauh thauh a. A Vaibel dawn sehkeh rap rap pah chuan," Kan mi tenawm ho chu aw. An duh an hmu dawnlo mange. Ka lak aţang hian thui an tlanchhiat theih an inring reng emawni le. Ka man vaih chuan an va chak dawn lo rua em" a han ti a. Lal bawk chuan," Tunah hian tlangval sawmhnih rualin ka pasalţha Tawnluia hoin in um zui nghal anga. Silai fung khat chiah an kawl avangin hlauhawm tham anni dawn lova. Chumai bakah hliam buaipui tur an la neih bawk avangin umphak an harsa dawnlo ani. Han in ko khawm zung zung ula. Rang takin um zui nghal ang che u. A nung chung ngeia rawn man tum ula. A hrehawm thei ang berin kan sawisa hlum dawn ani" a han ti dap dap a. Tichuan Samtual pasalţha Tawnluia chuan amah zui tur tlangval an thlangchhuak zung zung a. Kalkawnga an mamawh turte an siam fel hnu chuan Vawrate um turin an kal chhuak ta nghal a. An tum anga awlsamin an lal pawikhawih tute chu an va man thei angem le.

                        Bung-58

         Khua a hnim ruih mai a. Chhum a zing luk bawk a. Vawrate chuan hmanhmawh takin Hliappui lam chu an pan sauh sauh a. An damlo ber Vanzaua chu an inpuak chhawk zel a. La harh chiahlo mahse a taksa chu a pangngai chho ve tawh viau mai. Chutia hmanhmawh taka an kal lai chuan Vanzaua chu a rawn ţawngvai chhen ta mai le. Vawra chuan hmun rualrem deuh laiah chuan chawlh an rawt ta a. An chawlh lai chuan tlangval pakhat chuan," Vawra,tunah chuan Vanzaua kan ru bo tih hi an hre daih tawh anga. Min rawn umzui turin an tlangvalte an rawn tir ngei anga. Keini lah hei ralthuam engmah chhuantlak kan keng bawk silo a. Hliappui khua lah kan la hlat nasa mai a. Engtia han tihchi nge ni dawn le" a han ti a. Vawra chuan," Hliappui khua kan thlen hma hian khaw hnaivai deuh han pan mai tur hria kan awm em?" tiin a ţhiante chu a han zawt a. Zalawma chuan,"Hliappui khaw panna lam aţang hian peng ta ila,chawhma ţha zet kan kal hnuah kawng kan bo loh chuan Sialchhip khua kan pawh thei ang. Mahse kawng mumal a awm dawn hauhlo ania" a rawn ti a. Vawra chuan," Tun dinhmunah chuan a ţha zawk han thlang thei pawh kan nih loh hi. Sialchhip khaw lam chu pan phawt ila nimai. Hmanhawh tak khan Vanzaua hi kal pui ta ula. Min rawn umzui an awm leh awmloh ngaihven pahin hnung ka rawn dawl ange" a han ti a. Tichuan rei pawh chawl khawmuang talo chuan Sialchhip khaw awmna zawn ni a an rin lam chu an pan ta nghal a.

          Ramngaw hnuaiah chuan chhum lei vak anasa hle mai a. Kaw hmuh a ti fiahlo in hma lam pawh thui tak a thlir theih hek lo. Vawra chuan a ţhiante kalna hnuhma chu a theih ang angin an thup a. Ruahtuiin lei a tihnem vek avangin an hnuhma thup bo ţhak ngaihna a awm silo a. Amah chuan mihring tamtak kalna hnuhma angin khan pakhatah te chuan an kal kual deuh chhen mai a. A ţhiante hlat lutuk lo tawk leh hnunglam ngaihven pah reng chuan a kal ta zel a. Chutia hmanhmawh taka an kal mek lai chuan Thing hmun ngaw chhah zet maiah hian an lut ta hlawl mai a. Ngaw hnuaiah chuan ramsa hnuhma a tam khawp mai a. Mahse sapel tura kal annih miau loh avangin an ngaihtuah hman lem lo ani. Ramsa chettlatna mual anih avangin Vangvat lah chu duhthusama tam a awm a. An inthian senglo chu ani ber e. Chutia a ţhiante hnu thup paha a kal zel lai chuan Vawra chuan an hnunglama ring deuh taka ţawng lang lang thawm a hre ta tlat mai le. Chiang deuh zawka an ngaihthlak hnu chuan mi tuemaw chuan an rawn umzui ngei ani tih a hre ta. A ţhiante chu amah aiin mual khat vel laiin kal hma deuh tawh mahse reiloteah an in nangching dawn tih chu hai rual ani talo. Tunah chuan mi engzat chiah nge annih tih hriat chian phawt a ţul avangin Vawra chuan anmahni rawn umzui tute thawm neihna lam pan chuan a kir leh ta nghal a.

           Ngaw hnuaiah chuan Chhum ala zing deuh chuk mai a. Vawra tan pawh thui tak han hmuh theihna khua kaw bik heklo le,anmahni rawn um tute hnaih thei ang bera a kal angai a. A nunna atan a hlauhawm thei tih hre mahse a ţhiante damkhawchhuah na kawng anih dawn phawt chuan theihtawp chhuaha lo beih a tum ani. Chutia fimkhur taka a kal lai chuan a hma lam hnai deuh takah chuan mihring ţawng thawm a hre leh ta a. An inhnaih chilh tawh em avang chuan enge an sawi pawh a hre thei hial tawh a. An mahni rawn um tute chu an hniak zawngin an buai hle tih a hre thei mai a. A in au lauh lauh thawm aţang chuan hnuhma zawngin an insemdarh tih a hre ta a. Chhum lei vak zing chuk karah chuan mittlin tawk a thuilo em em a. Chu tak chu Vawra chuan hman ţangkai a tum hle mai . Tlema tawlh chhak hret hretin anmahni rawn um tute chu hnunglam aţanga a hnufual fal deuhte beih chu a tum ta a. Thui deuh tak a kal chho leh deuh hnu chuan anmahni rawn umtute nghah chhuah pahin Thingzungthlar phenah a biru ta a. Rei vaklo anghah hnu chuan a mah hnaih deuh takah chuan tlangval Silai keng pakhat hi alo lang hlawl mai a. Chupa chuan a hmalam chu ngun taka en chung hian a Silai chu a lekkawh va mai le. Vawra chuan uluk takin a lo thlir reng a. A thlang lam hla deuah pawh chuan midang anlo chhuak phei ve a. A hma hruaitute chuan Silai an keng deuh vek mai a. Vawran a rin ai daih chuan anmahni rawn umtute chu an tam tlat mai. An insemdarh tho nain thawm inhriattawn theihna tawk chauha hlain an in sem darh a. An hmahruaitu chuan," An hniak hi thup an tum ve hle nangin hetiang khawhnuaiah hi chuan tihvak ngaihna a awmlo anih hi . Ralthuam kenglo anni bawk a,awlsam takin kan hup barh theih ang. Zan lamah chuan kan umpha thei mai ang" a han ti sa sa. Vawra chuan nui tet tet chungin alo thlir reng a. A nawlpuiin an kal pelh hnu chuan a hnukhawi deuh tlangval pahnih hi kawng laka an ei tur phur bawr luk chungin an rawn titi dun a. Hma lama kal te nen chuan an in hlatin Chhum a zin nasat deuh avangin an inhmu tawn theilo ani. Vawra chuan a Silai chu tungin a Chempui chu an phawrh chhuak zal zal a. Chu mite pahnih chu thawm awmlo thei ang bera sah chhawk hmawk hmawk chu a tum ta a. Samtual tlangval pahnihte lah chu engmah hrelo chuan an titi mawlh mawlh a. Vawra bihrukna lai an kal pelh hnu chuan Vawra chu a bihrukna aţang chuan a tho chhuak ţhem ţhem a. Thawm dim thei ang berin Samtual tlangval pahnihte chu a rukin a zui phei ta a. Hnahthel ro te ruahtuiin a nan huh vek avang chuan thawm dim taka kal a harsa hauhlo mai . Ngaw hnuaia Samtual tlangval pahnihte chu Vawra chuan a hnaih phei zel a. Hlam thum vel bawr a hnaih phei ta tihah chuan Vawra chu tlan dawk phei zawkin Samtual tlangval a hnung zawk a kal chu an chhiptlak ngheng mai le. Samtual tlangval chu a awp nghal rawp a. Chutih rual chuan tlangval pakhat zawk chu rak chel chul chungin hma lam panin a tlan ta mai le. Vawra chuan hmanhmawh taka umzui nghalin thui pawh a tlan hma chuan hnung lam aţangin Samtual tlangval chu an sat chhawk hmawk mai a. A mi thahte ruang pawh ngaihsak zui talo chuan hmanhmawh takin Vawra chu hnunglama a tlan let leh nghal a. A Silai tunna lai a va thlen chuan a Silai chu la nghal vatin tlema hla deuh hlekah chuan an thawm ngaichang pahin a biru leh ta a.

          Rei vakloah chuan Samtual tlangval ţhenkhatte chuan an ţhiante chu an rawn au lauh lauh mai a. Vawra chuan an thawm chu alo ngaithla reng a. A hnu rei vakloah chuan thinrim inhrosa thawm leh hnunglam pana lo tlan phei nghal rawk rawk thawm hriat tur a awm ta nghal mai. Vawra chuan a awmna chu a him tawklo tih hriain hmanhmawh takin tlema chhak deuh hret aţang chuan hma lam panin a kal ve leh ta thung a. Samtual tlangvalte chuan an tlangval pahnih ngawt mai ruang let reng chu an bawisawm mawlh mawlh mai a. Hnung lama tlan let tepawh lo kir lehin engmah an hmuhloh thu an rawn sawi a. Samtual pasalţha Tawnluia chu a thinrim hle mai a. A tlangvalte hnenah chuan," Tumah a fal lutuk a kal tawhloh tur. Tuna kan um mekte zingah hian pasalţha an awm ani ngat mai. Kan fimkhurloh luatah kan chesual ta anih hi. Hnunglamah min leh beih ang tih ngaihtuah na chang reng reng ka hre lo" a han ti a. Tlangval pakhat chuan,"Kan hma lam chauh kan lo ngaihtuah lutuk atin ani. Bakah min bei ngam an awm kha ka ring hauhlo a" alo ti ve a. Tawnluia chuan,"Sal ho rawn tlanchhuaktu kha tunge anih reng reng le. Alo hmu leh hriate in awm em?" tiin a tlangvalte chu a han zawt a. Tlangval pakhat chuan,"Ka pa in a sawi dan chuan Suartui khaw pasalţha ani awm e. A hma deuha Hualtu khua runa bei vaktu kha niin a sawi ani" ahan ti a. Chu veleh Tawnluia chuan," Kan lo ring sual deuh ani maw. Engang mi pawh nise,kan chhuah hauhlo ang. Inhnaih te te in kal ila. Kan ţhiante ruang erawh kan phum rih dawn nia. Kan kalsan mai angai dawn ani" a han ti a. Tichuan Samtual tlangvalte chuan an ţhiante ruang chu lei lai khuarin an han phum a. An phum fel hnu chuan hma lam panin fimkhur takin an kal ta a. Inveng renga kal angaih tawh avangin an duh ang pawhin an hmanhmawh theilo ani.

          Chhum zing pawh a kiang deuh tawh a. Mahse Ni eng hmuh tur erawh ala awm lo. Vawra chuan Samtual tlangvalte chu a him chin aţangin a zui ru zel a. An rilru lak pen dan a ngaihtuah ta a. Chutia an kal zel chuan a ţhiante kha an va nangching mai ang tih a hlau hle mai a. Tichuan an zinga pakhat chu kah thluk tawp mai chu a duh ta zawk a. A rilru te a siam fel hnu chuan Samtual tlangval ho chu an hnaih phei hret hret a. Silai kah nuam tawk vela hla aţang chuan a hnungdawltu deuh Silai keng pakhat chu an kap thal tawp mai a. Chu veleh Samtual tlangval ho chu an darh hak a,an biru nghal sap sap mai a. An biru fel ta maw tihah chuan Vawra awmna lam hawi chuan Silai an rawn kap puak ta ţhuai ţhuai mai le. Vawra chu thlang lamah tawlh liam zelin Samtual tlangvalte chu ahlat hret hret zel a. A him chin tur awma a rin a thlen hnu chuan hma lamah hmanhmawh taka tlanin a ţhiante chu va pawh phawt a tum ta ani.

          Samtual tlangvalte chuan Silai lo puahna lam chu an thlir ţhap mai a. An pasalţha Tawnluia thinrim leh tlawmngai lutuk chuan,"Min lo veng ula. Ka va luhchhuah teh ang" tih leh Silai puahna lam pana tlan chu a rual ta mai a. Mahse a va thlen phei meuh chuan tumah hmuh tur an awm tawhlo ani. Tawnluia chuan Silaia rawn kaptu hnuhma chu an en chiang thuak thuak a. Thlang lam panga Vawra tawlh thlakna chu a hmu thei ta . Han umzui mai chu duh viau mahsela a um phak tawh dawn chuangloa ahriat avangin a hote chu an kokhawm leh phawt a. An ţhian thi ta ruang bulah chuan an ding far mai a. Tawnluia chuan," Kan mi dawizep pa hian min thlahthlam a tum hauhlo mai anih hi. Tunah pawh hian khawi lam kil aţang emaw chuan minlo en reng ngei anga. A duh hun hunah min rawn phil zel tawh mai dawn ani. Chuvangin tunah chuan hmanhmawh takin hma lam kan pan anga. Kan mi umte hi a hma thei ang bera nanchin kan tum ang" a han ti dap dap a. Tlangval pakhat chuan," Silai a nei tih kan hre tawh a. Tunah chuan a duh hun hunah minlo sai thlu nghauh nghauh tawh mai dawn ani. Umzui tawhlo mai ila aţhalo maw" a rawn ti a. Tawnluia chuan,"A enga mi dawihzep ţawng a i ţawng le. Min rawn beitu hi pakhat chauh ani tih kan hre tawh a. Tunah chuan Silai a rawn rik leh chiahah Silai puahna lamah kan tlan huk tawh ang. Tichuan amah chauh chu kan chhuizui tawh dawn ani. Vawikhat Silai a kah puah tawh chuan Silai zen a sawh muk leh hmain kan nangching thei dawn ani" a han ti a. An ţhianpa ruang an phum fel leh hnu chuan hma lam panin an kal leh ta a. Samtual tlangval dawi deuh te chu an thlaphang ru hle tawh a. A thi hmasa nih hlauin an thin a phu dep dep tawh mai ani.

          Samtual khaw tlangvala ho chuan fimkhur takin hmalam an pan zel a. Chutih lai mek chuan Vawra pawh a ţhiante umphak vat tumin hmanhmawh takin atlan hlawk hlawk mai a. A ţhiante hniak chu a chhui zui zel a. Rin ai tak mai chuan anlo kal chak a. Silai puak ri an lo hre pha ni ngei tur ani. An hniak awmdanah chuan hmanhmawh taka tlan an ni ti a hriat theih maim Tichuan Vawra chuan a hnu pawh thup tum tawh lemlo in a ţhiante chu a umzui ta zel a. Mualhnih lai a lawm liam hnu chuan a ţhiante chu kawr kama an lo hah chawl lai ava nang fuh ta a. Vawra hmel an han hmuh chuan a ţhiante chu an lo lawm hle mai . Vawra alo thlen chuan Zalawma chuan," U Vawr,Silai ri kan hriat khan hmanhmawh takin kan tlan ta mai ani. Dama kan hmuh che pawh kan ring tawhlo hial asin " alo ti var a. Vawra chuan," Tunah chuan kan la dam rih a. Mahse naktuk khawvar kan hmu angem tih chu zawhna lian tak ani. Mi sawmpasarih vel lai maiin kan hnunglamah sawn min rawn um ani. I kal thuai teh ang u" a han ti a. Tichuan ţhut pawh ţhu khawmuang talo chuan an kal leh ta nghal a.

          Behliang mun hun velah chuan Vawrate chu an tlan hah avangin an chau tawh hle mai a . An hmelmate chuan an rawn hnaih tawh hle tih hriat takin ralkhat aţang chuan a khat tawka in au khawm thawm an hre ta zauh zauh mai a. Vawrate chau lutuk tawh chu Hmunphiah hmun zawl angreng deuhah hian an han ţhu chawl ta a. Vanzaua pawh rawn harh ve tawhin a khat tawk chuan a ţawng peih ve zeuh zeuh tawh ani. Vawra chuan damlo kalpui reng chung chuan thui an tlanchhe thei tawh dawn lo tih a hrechiang em em a. An kal ngaia an kal reng chuan an hmelmate chuan an rawn umphak thuai dawn ani tih a hre chiang em em ani. An dinhmun a chhiat deuh takah chuan Vawra chuan,"Tunah chuan kan hmelmate hian min rawn hnaih viau tawh anga. Hetiang renga kan kal chuan min rawn nangching thuai dawn ani. Chuvangin a theih anga hmanhmawh in Sialchhip khaw lam chu lo pan vang vang ta ula. Keiman ka theihtawpa lo dan chah ka tum dawn ani. Mi pakhat chauh tana han dan hneh rual anni lova . Mahse in tlanchhiatna hun tur ka siamsak thei ang che u. Sialchhip khaw lal inah in han tlu lut tawp dawn nia" a han ti dap dap a. Tlangval pakhat chuan," Vawra,tlanchhiat ringawt zawng a hneawm ta deuh ani. Tunah hian damin chhuak ta pawh ni ila han belh tur em em ka neilo bawk a. I kiangah kalo ding ve ange" a rawn ti ta a. Chu veleh midang pawh chuan an hmelmate lo beih mai chu an duh ta ţheuh mai le. Vawra chuan,"Nilo e,in thi dawn hlei nem. Tunah hian hmanhmawh taka kalin in him thei ani" a han tih pawh chuan tlangvalte chuan tlanchhiat reng chu an duh bik ta hauhlo mai . A tawpah chuan Vawra chuan," Awle,ka thu in hnial dawn anih si chuan kan hmelmate chu kanlo lambun mai angai dawn ani. Tunah hian Chempui Paruk leh Silai pakhat kan nei a. Kan piah deuha Mau khi kan han sat anga. A hmawr zumin fei angin kan hmang dawn ani. Kan hmelmate anlo lan veleh Mau fei keng zawngin an zinga Silai kengte kha inlo khawh anga. A bak chuan Chempui nen kan pawmchilh dawn ani. Tin Zalawma hi a piah deuh ah sawn biru in Silai i vuan anga. Awmhmun aţangin ilo sai dap dap dawn ani" tiin an hmelmate anlo beih dan tur chu an rel zung zung a. Tichuan Vawrate chuan an piah deuha Mau changa ţha deuh deuh te chu han satin Mau fei engemawzat an siam a. An vai mai chuan an keng ţheuh a. Vawra chuan,"Hmunphiah bul phenah hian kan biru anga. Kan hmelmate chu a khawha khawh lovin kan lo chhun hlum zawk dawn nia. Kan intam hleih deuh dawn a. Theihtawp kan chhuah angai dawn ani" a han ti a. Vawra bawk chuan," Zalawma hian a hmahruaitu kha Silaiin a rawn kap phawt anga. Silai a rik rual chiahin kan bihrukna zawn ţheuha kan hmelmate kha an dul nemah Mau fei hian kan chhun thut dawn nia" a han ti leh a. Tichuan an channa hmun turte insemin a langlo thei ang ber tur chuan an Biru ta a. Zalawma chu a hmalam hla deuh hlekah cuan Vanzaua nen biru in amah chuan Silaiin hmelmate chu alo kap ve thung dawn ani.

         Vawrate an inbuatsaih fel hnu reilote ah chuan an hmelmate chuan an awmna lam panin thawm an rawn nei zui deuh nghal mai a. Thawm lah chu an rawn dimlo phian mai lehnghal. Samtual tlangval pahnih Silai keng ve ve te chuan hma rawn hruaiin an rawn inzui diah diah mai a. Vawrate awmna Hmunphiah hmunah chuan an rawn lut phei zel a. Hmunphiah bulin a hliah hneh em avangin Vawrate chu an hmu thei lo ani. Vawrate chan khan chhungah chuan lo lut zelin a hnung lamah chuan an pasalţha Tawnluia chuan hnung a rawn dawl a. Chutia hma lam pana an kal zel lai chuan Vawilehkhatah Silai alo puak dur mai a. Samtual khaw tlangval pakhat chu a thal tawp a. Silai a rik zawh rual cuan Vawrate chuan anmahni hmazawn ţheuha awmte chu an Mau fei siam hmawr zum ver vawr chuan an rawn chhun ta siah siah mai le. Hmelma lam lah lo inring hman heklo i, pasarih lai mai chu an dul nem laia Mau feibur vu avang chuan an tlu nghal a. Chutih lai chuan Silai vawihnih a puak rual leh ţhawt a. Vawrate lam chu pahnih lai an thal ve ta nghal a. Tichuan Samtual tlangvalte leh Vawrate chu Hmunphiah hmun zawl laiah chuan an in pawm chilh ta riap riap mai le. Vawra chuan ," Theihtawp i chhuah ang u aw" ti aau lauh lauh pahin a Chempui chuan Samtual khaw tlangvalte chu a sam phei miah miah mai a. Zalawma pawh a bihrukna aţanga lo tlanchhuakin Samtual tlangval pakhat Silai zen lo sawh mawlh mawlh mai chu a rawn kap thal tawp mai a. Samtual lam pawhin Silai lam buaipui tawhloin an Chempuite phawrhin chulai hmunah chuan an inphek sual ta chiam mai le. Samtual pasalţha Tawnluia pawh chuan a Vawrate lam chu a hma tiamin a rawn sat thlu phei nghauh nghauh mai a. Mahse alo lambun tu zawk chu an chan a ţha ta hret hret a. Ţhenkhat anlo insah siah siah laiin ţhenkhat erawh anlo in bawh bet ve ngar ngar a. A tawpah phei chuan Samtual pasalţha Tawnluia chiah chu Vawrate hmaa ding thei chu a awm ta. Vawra chuan Tawnluia lam chu pan nghalin a ţhiante chu lo kiang turin a han ti a. Chulai Hmunphiah hmun zawlah chuan Samtual pasalţha chhuanvawr Tawnluia leh Lungchuan pasalţha Vawrate chu an inhmachhawn ta ran mai le. Tawnluia chuan,"Tlangval tunge inih, i hmachhawn tur hi i hrechiang em" a rawn ti a . Chutih lai chuan hnung lam aţangin Zalawma chuan," U Vawr,ka rawn kap thal tawp nang a" a rawn ti lang lang a. Vawra chuan,"Kap rih lo e. Hei chu keima chanpual anih hi" a han ti a. Vawra bawk chuan," Tunge inih ka hrelo a. Mahse in lal duham rah chu in seng dawn ta anih hi" a han ti a. Tawnluia chuan,"Khawng mipa leh mipa chu tlanchhe chung ni lovin i han in hma chhawn ang hmiang. Kha lo inring rawh le" tihpahin Vawra sah tum chuan a Chempui a rawn vai phei ta fua fua mai le. Vawra chu hnung lamag tawlh sawn zelin Tawnluia Chem vai chu alo inbum zel a. Tawnluian Vawra sah fuh ngei tuma zak kau hawka a Chempui a rawn vai leh lai tak chuan Vawra chuan Tawnluia chu an bawhphei ve thut mai a. Chem leh Chem a inkhak ri chhawk a . Tawnluia chuan a Chem rawn vai chhuak lehnghalin Vawra Beng veilam chu a rawn sat thawi thuak mai a. Vawra kha tlemin lo inher hmanlo se zawnga lu a hek huam ngei ang. Tawnluia Chem vai zo a insiam rem leh hma chiah chuan Vawra chuan Tawnluia nak thawlah tak mai chuan Chempui tlum deuh thawih chuan a sat ta mai le. Tawnluia chu a ţe ţhawt a. Mahse Vawra rin loh tak maii a Chempui chua rawn vai chhuak ve leh nghal a. Vawra chu a lo tawlh hnung hman deuh na a a awm ti chu a thler duai hman tho mai. Tawnluia chuan anak hliam aţanga thisen lo chhuak chu a han hup vag vang a. Chempui a luh thuk em a vang chuan thisen chu a put zur zur mai a. Chuti chung pawh chuan nati awm hmel pawh pu hauhlo in Vawra chu a rawn veh leh than than mai a. Mahse a hliam chuan a tha chu a ti ţhumin a che vel pawh a khawr ta ţut mai. Chu chu remchangah hmangi Vawra chuan Tawnluia chu an sat pawp pawp mai a. Tawnluia chu a theih ang anga tawlh hnung ve zelin alo in veng ţawk ţawk a. A nak hliam aţang chuan thisen tharlam a chhuak zut zut reng a. Vawra awm hliam erawh a ti ţhatna lai anih avangin thisen a chhuak tam lemlo thung. Rei ngial an inbeih leh hnu chuan Tawnluia taksa chu a thler dei duai tawh mai a. A thisen a hloh hnem tawh deuh avangin a lu te chu a hai chhulh tawh mai a. Chutah meuh chuan Vawra tan beih tham a awm talo. A tawpah phei chuan Tawnluia chua a tlu bawkkhup ta thlawrh mai a. Thei leh theilo a rawn in nem kang pahin Vawra hnenah chuan," Tlangval,min tihlum tawh mai ta che. Vawiin zawng i vanneih ni ani ange" a han ti a. Vawra chu a ding ngawi reng a. Chutah Tawnluia bawk chuan," Tlangval intihtur chunti thuai teh. Pasalţha in sa hliam an dam tir reng ngai love. Ka Chempui ngei hian ka lu la ang che" a han ti leh a. Vawra chuan Tawnluia Chempui lak pah chuan," Pialralah kan intawng leh dawn nia" tih pahin Tawnluia nghawng chu an chhawk zawk mai a. Chu veleh Vawra ţhiante chu an lo au dur dur mai a.

           Inbeihnate a zawh fel meuh chuan Sialchhip khaw ram chhung Hmunphiah zawlah chuan ruang a let phung mai a. A lo lambuntu zawk mah nise a thuam nei ţhalo zawk annih avangin Vawrate lam pawh chu paruk lai mai an inhloh a. Midang erawh hliam na lutuk tuar an awmlo hlauh ani. Vawrate chuan an ţhianten ruang chu hmunkhata an phum vek a. An hmelmate ruang erawh phum lemloin hmun khatah an dah khawm a. Zah takin puan leh chhawl in an khuh thung. An rinloh tak maia hnehna an chan tak avang chuan an lawm hle mai a. An ţhian boral tate avang erawh chuan an lungngai hle thung a. An taksa hliam te an tuam fel hnu chuan an hmelmate Silai panga chu kengin Sialchhip khaw lam pan turin an inbuatsaih leh ta nghal a. Vanzaua chu an zinga hliam tuar velo awmchhun Zalawma kutah chuan a awm deuh ani tawp mai. Thui vaklo an kal leh hnu chuan ralkhat hla vaklo a khaw pakhat lo lang chu an hmu thei ta a. Tichuan hlim rilru tak chungin muangchangin an kal ta zel a.

          An inbeihna mual aţanga mual dang pakai tura kawr pakhat an kan dawn lai tak chuan an chhak lam aţang hian Silai alo puak dur a. Vawrate awmna kianga lungpui chu a khemsawk maia. Vawrate chu kawr kamah tlan lut nghalin an bawk ţhapa . An silaite kente chu an han lekkawh ve far mai a. Chutih lai chuan chhak lam aţang chuan," Sialchhip khaw tlangvalte kan ni e. In inpek loh chuan kan kap hlum vek ang che u. Hual beh vek inni tawh" a rawn ti lang lang mai a. Vawra chuan,"Hmelma kan nilo e. Hliappui khua leh tui kan ni e" a han ti let a. Chhak lam aţang bawk chuan," In Silaite kha thehthla in ban chung lamah pharin dingchhuak rawh u. Anih loh chuan kan kap nghal ang che u" a rawn ti leh a. Zalawma chuan," U Vawr,engtin nge kan tih dawn?" a raw ti var a. Vawra chuan,"Tunah chuan kan inpek mai angai ani. Mi engzat nge annih tih kan hriatloh bakah tunah rih chuan ral bei thei chi ziazang kan nih loh hi. Kan lu em chu kan hloh em nang" a han ti a. Chutah Vawra bawk chuan,"Kan inpe e" ti a au chungin ahan dingchhuak a. Midang pawh chuan an rawn zawm ve a. Chu veleh an chhak lam leh thlang lam aţang chuan Sialchhip khaw tlangval Sawmnga rual vel zet te chu Vawrate Silaia tin reng chungin anlo chhuak ta sup sup mai a. Vawrate kiang anlo thlen chuan an hruaitu ber ni awm tak chuan Vawrate Silai chu anaute an khawm tir nghal a. Vanzaua leia amu reng chu tlangval pakhat chuan a han chhir zawt mai le. Vawra chuan rang tak hian," Khawngaihin zahngai rawh u. A damlo anih kha" alo ti nghal a. Sialchhip khaw pa pawh chu a in saseng nghal a . Sialchhip khaw tlangvalte chuan Vawrate chu an phuar mawlh mawlh mai a. Anmahni rawn ho tu ber an val upa Semzanga chuan," Hliappui khua leh tui inni tak meuha maw. Eng ti tura helaia lokal nge innih. In thuam famkim nen lehnghal" a rawn ti a. Vawra chuan,"Samtual khua aţanga Hliappui pan tura kal kan ni a. Sialchhip khua hmuh ve hrim hrim tumin he lamah hian kan lo peng kawi ta ani. Mahse kawng lakah beih tawkin kan zinga mi paruk lai mai kan inhloh ani" tiin a han chhang a. Sialchhip Val upa Semzanga chuan,"Silai ri kha kan lo hre ngei a. Kan khaw tlangval he lama ramvak an awmloh avangin enge anih tih chian turin kan lo thawk ta ani. Inhliamte han en reng reng chuan beih in tawk chu ani ngei mai a. Mahse ka tlangvalte a fiah turin ka va tir phawt anga. Chumi hnuah in awmdan tur kan sawi ang" a han ti a. Tichuan Sialchhip khaw tlangval ţhenkhatte chu Vawrate lokalna lamah chuan an let leh ta a .

          Sialchhip tlangvalte anlo kir leh meuh chuan khua pawh a thim chiang hle tawh a. Sialchhip tlangvalte chuan an thil hmuh ang ang te chu an val upa hnenah chuan an han sawi zung zung a. Chutah val upa Semzanga chuan Vawrate lam hawi pah chuan,"Tunah chuan engmah thuchiang kan hrelo a. Hmelma innih leh nihloh pawh kan hre heklo. Kan lal hnenah kan thlen phawt ang che u a. Anin o alo rel sak ang che u" a han ti a. Vawra chuan," Ka pu,hmelma kan nilo a. Beih kan tawk ani" a han ti leh hram a. Semzanga chuan,"Ruang Sawmpasarih lai mai hmunkhatah in dahkhawm a. Beih tawk chu in anglo deuhin ka hria. Nangmahni zawk hian midang inlo lambun pawh ani thei tho a. Silai lah chu paruk lai in kawl lehnghal a. Suamhmang inni loang tih tunge sawi thei" a rawn ti leh charh charh a. Vawra chuan," Ruang zingah khan kan ţhiante pawh an awm ve tho ani" alo ti vat a. Semzanga chuan,"Kan lal hnenah engkim inla sawi dawn nia. A ram chhunga in chetdan avang hian a lungawi vakin ka ringlo ani" a han ti leh a. Tichuan Sialchhip khaw tlangvalte chuan Vawrate chu an khaw lam an panpui ta a. Vanzaua chu hlang siama zawnin Vawrate erawh phuar sa in an hruai thung.

                      Bung-59

          Sialchhip khua hi in zahnih bawr vel niin an lal hi Rorelliana ani. Khatia an khaw hnai maia Silai puak dur dur ri an lo hriat khan fimkhur thilah tiin a tlangval sawmnga rual lai mai kha va chian turin a tir ta ani. Vawraten Sialchhip khua an luh chuan leng len hun awm vel ani tawh a. Meichher nena inzui duah duah annih avang chuan khaw mipuite chuan anlo en duh hle mai a. Vawrate chu Sialchhip tlangvalte chuan lal in lam an pan pui nghal a. Khaw mipui ţhenkhat chuan thil awmzia hriat tumin an tlangvalte chu anlo be buai ve chhen mai a. Tlangvalte pawh chuan thilawmze tlangpui hrilhin lal in lam pan buai lo tur chuan anlo ti hlawm a. Lal in an han thlen chuan Sialchhip val upa Semzanga chuan Vawrate chu lal inchhungah a luhpui ta nghal a. Tlangval dangte erawh pawn lamah anlo ding ţhap thung.

           Sialchhip lal inah chuan Rorelliana leh a upate chu anlo ţhu ţhap mai a. Val upa Semzanga chuan Vawrate chu lal in chhuatah chuan an din tir a. Vanzaua erawh in kil lamah chuan an muttir thung ani. Sialchhip lal chuan thil awmzia a val upa a han zawt ta a. Semzanga chuan Vawrate an va hmuh dan leh ruang chung chang zawng zawng chun an lal hnenah chuan chipchiar takin an sawi zung zung a. A sawi zawh chuan lal Rorelliana chuan Vawrate chu a han en vang vang a. Chutah ţhu turin thu ahan pe a. Vawrate an ţhut fel hnu chuan lal chuan,"Hliappui tlangvalte maw innih a. Kan khaw ramchhungah rawn lutin buaina engemaw in tawk ani awm a. Engvanga mi chuti zozai chu that ta mai nge innih. In mi thahte khan an bei hmasa che u em?" a rawn ti a. Vawra chuan,"Lal pa,bei hmasa lo e. Mahse min thah tuma min rawn umzui zel avangin kan lo lambun ta mai ani. Keimahni pawh paruk lai kan inhloh nghe nghe a. Tin heng kan Silai ken zinga panga hi kan mithah takte Silai ani nghe nghe " alo ti a. Lal Rorelliana chuan,"A landan chuan Samtual khaw lam aţangin in lokal ani ngei anga. Samtual khaw lal pawi khawihin inlo tlanchhiate hi ani lo maw?" a rawn ti leh a. Vawrate chu an ngawi reng a,dawt han sawi mai lah an hreh si a. Chutah lal bawk chuan,"Hmm,ka rindan hi a dik ani chiah mai. Naktuk lamah Samtual khaw lamah ka tlangvalte ka va tir anga. Misual innihloh takzet chuan ka chhuah zalen ang che u. Chumi hma zawng chu ka hreng rih dawn che u ani. Ka khaw tan pawha mi hlauhawm inni thei tlat mai" a ti ta a. Chung thil lalin a han sawi takah chuan Vawra chu a hlauthawng ru ta hle mai a. Samtual lalin a pasalţha leh tlangvalte an thi tih a hriat phei chuan an tan damchhuah a beisei awmloh hle dawn ani. Chuvangin Vawra chuan thil awmdan zawng zawng chu Sialchhip lal hnena sawi mai ţhain a hre ta a.

          Aw then kharh kharh pah chuan Vawra chuan," Lal pa i laka dawt kan sawi vangin min ngaidam la. Keini hi Hliappui tlangval dik tak kan ni lova. Suartui khaw mi leh sa niin Samtual lam hian kan khua an rawn run khan sal atan min hruai a. Tunah hian kan sahimna zawngin kan lo tlanchhe ta ani. Min rawn umzui tih kan hriat khan lo lambunin theihtawpin kan lo bei a. Kan vanneih a siamin a chak zawkah kan ţang hlauha. Tichuan inkhaw lam panin kan lo tlan leh nghal ani" a han ti dap dap mai a. Chu thu an han hriat veleh chuan Sialchhip lal leh upate chu an hlauthawng ta hle mai a. Samtual lal Zahunga chuan a tlangvalte an thi tih a hriat hunah chuan a tlangvalte mai bakah a u leh naute khaw lam a pun ngeiin an ring a. Samtual lam thinrimna chu an tuar zoin an ringlo a. Sialchhip lal chuan aw vin deuh hlar hian,"Sal innih chuan sal anga awm in zir mai tur ani. Samtual lal nen hian khaw inrem tak mai kan ni a. Chuvangin Samtual khaw hmelmate chu ka hmelmate anni mai. Kei chuan ka hum thei dawnlo che u a. Nangmahni avanga ka khaw mipuiten an tawrh hi ka phal dawnlo ani . Tunah hian ka tlangvalten Samtual khaw lamah an va dahkir leh ang che u. In chungah hian kut kan lek dawn lo a. Mahse Samtual khua nena inţhianţha tak kan nih avangin an duhzawng kan tihsak dawn ani" a han ti ta tlat mai le. Chutah Vawra thinrim chuan,"Lal pa,i duh chuan min hlan kir leh thei alawm. Kei pawh hi Hliappui lal thupek anga sal tang tlanchhuak tura tirh ka ni a. Sal man ka tlak vek tawh hnuah Samtual lam hi lungawilo in min rawn umzui leh a. An chan tawk an hmu ani mai. Samtual lal hnena min hlan kir leh anih ngat chuan kan lal Hratliana pawh i chungah alawmlo hle ang. A unaupa Suartui lal Lianvunga mi leh sate thlavang chu a rawn hauh viau dawn ani. Tin keipawh hi Suartui pasalţha Vawra ka ni a,ka unaute pawh phuba la turin an lo kal ngei bawk ang tih ka tiam ache" a han ti ve ta piap piap mai a. Chu thu an han hriat leh meuh chuan Sialchhip lal leh upate chu an buai zual sauh mai a. Hliappui khaw lal thinrim chu an er hneh dawn hauh silo a. An aia khaw lian daih anih bakah pasalţha tamtak an nei bawk nen. Samtual khaw lal thinrim ai chuan an hlauhawm fe zawk dawn ani.

           Sialchhip lal leh upate chu an han inrawn ho leh nak nak a. Thutlukna siam har an ti ta hle mai. A tawpah chuan lal Rorelliana chuan,"Awle ,tunah hian in nunna chunga thu neitu ka ni tih hria ang che u. Eng khaw mi leh sa pawh ni ula. In diklohnaah chuan ka dim hauh dawnlo che u ani. Tunah hian Samtual lamah hlan let thei che u ka ni a. Chutih rualin ka chhuah zalen thei bawk che u ani. Amaherawhchu khua leh khua in hmelmak hi ka thil duhloh tawp ani a. Tunah hian ka chhuah zalen dawn che u a. Mahse he khuaa in rawn lut ani tih hi tumahin an hre tur anilo. Zanin la la hian ka khua hi in chhuahsan anga. Lo kir leh tawh ngai hauh suh ang che u" a han ti dap dap a. Vawrate chu an thu hriat avang chuan an thaw hawk mai a. An him dawn ta nia ngaiin lal hnenah chuan Vawra chuan," Lal pa,kan nunna min zuahsak thei te anih ngai chuan kan duhthusam ani alawm. I khaw tan buaina kan rawn siam tawh hauhlo ang" a han ti a. Sialchhip lal chuan," Zanin la la hian ka khua hi in chhuahsan anga. Silai pathum erawh hi chu keiman kalo kawl rih dawn ani. Tunah huan Hliappui lam panin kal nghal ang che u" a han ti leh a. Vawra chuan," Lal pa,chaw kaw puar pawh hmulo a rei tak awm kan nih tawh avangin kawng laka kan eichawp tur buhfai tal min thehchhuahsak thei angem?" tiin ahan ngen a. Lal chuan," Chu zawng thil harsa ani nem. In duhtawk buhfai chu in keng thei ang" a han ti a. Vawra chuan," Lal pa,kan ţhianpa damlo tan pawh hian i Bawlpu min ko sak thei angem?" tiin a han ngen leh a. Mahse lal Rorelliana chuan," Chu zawng ka tihsak theilo ang che u. Kha,a harh tawh viau kha maw. In ţhianpa damlo enkawl tur ka nilo e" aloti hmuk a. Vawra tan pawh han nawr luih vak ngaihna awm heklo le. Lal khawnbawl ţhenkhat chuan Hliappui kal kawng te chu an han kawhhmuh a. Vawra chuan Thingdawn khaw panna kawng te chu zawt lehin Sialchhip upa pakhat chuan a kal khan leh Thingdawn luh hmaa khaw awmte chu chiang takin an hrilh ta vek a. Lal fairela buhfai chu tlangaupa in a rawn ruh sak hnuin Vawrate chuan Sialchhip khua chu an chhuahsan leh ta ani.

          Zan thim chhah tak hnuaiah chuan Vawrate chuan Meichher eng hnuaiah Sialchhip khua chu chhuahsanin Hliappui khaw panna lamah chuan an kal ta a. Khua aţanga thui tak an ka tawh hnu chuan Vanzaua muhil chu rawn harhin Vawrate chuan an han chawlh pui ta a. Vanzaua chu zan dang anglo tak maiin a mitmeng pawh a fiah tawh hle mai a. A ţhiante enkual pah chuan,"U Vawra chu kalo beisei ngam tawhlo che asin. Min theihnghilh ta emaw ka lo ti hmana " a rawn ti a. Vawra chuan," Theihnghilh lo e. Hun remchang ka hmu mai theilo ani. Khaw kar te a hla bawk si nen" a han ti a. Vanzaua chuan," U Vawr,Vantei te chu Thingdawn lamah an hruai ani awm e. Kei lah chu hei ral han bei chi ziazang ka ni tawh silo a. Duh zawng apiang bawh buan buan hi zawng a pawi anih hi" a han ti chuai raih a. Vawra chuan,"Vanzau,beidawng mah ta che. Ka la thawk ţek ţek chhung chuan Vantei chu ka zawng zel dawn ani. Beisei tur ala awm alawm" tiin a han hnem a. Vawra bawk chuan," Hawh teh u kawrte kam deuh hleka chawlhna tur i dap teh ang u. Chaw kan ei lohna pawh a rei tawh a. Kan buhfaite hi chhumin chawhmeh atan Lairawk leh Chakai vakchhuak ilo pawh kan man mial mahna" a han ti a . Tichuan kawrte hnaivai an hmuh thuai beiseiin an kal leh ta nghal a.

Thui vaklo an va kal leh hnu chuan kawrte tui luang ri her her chu an hre thei a. Kawrte an zuk pawh hnu chuan kawr kama Lung phek duai chungah chuan an innghat a. Meite chhemin kawr kama Mau chu eirel nan an han sat zung zung a. Vawra chuan Tumbu veh pahin kawrte chu Meichher nen an zawh thla a. Tlema thlang deuha a zuk chhukthlak chuan Rul thi ruang Chakai in anlo bawm sap sap hi a zuk hmu fuh hlauh mai le. Phur takin Chakai ,Rul thi lo bawmtu te chu an man nghauh nghauha,a iptepuiah a thun zel a. Chumi hnuah chuan kawr kama Changel vui pathum vel chu la lehin a ţhiante awmna lamah chuan a chho ta a. A han thlen chhoh chuan a ţhiante chuan Mau theiin chaw anlo chhum mek a. Vawra chuan a Chakai man te chu phawrhin Mau bur lian deuh pali velah chuan thunin Tumbu nen chuan a chhumpawlh ta a. An chaw leh chawhmehte a hmin hnu chuan Changel hnahah an han thur chhuak a. An ril a ţam tawh bawk nen ngawi hle hlein chaw leh chawhmeh chu an beng mawlh mawlh mai ani.

         Chaw puar leng lawng a an ei hnu chuan an taksa te pawh lo chak thar leh ta huai hian an hria a. Lungpui chungah te ţhu hahdamin an dul an zut an zut mai a. An thiltawn te sawiho in an titi siam siam a. Thingdawn lama an nula ţhenkhat hruaia awmte chhanchhuah dan tur te chu an sawi ho a. Vawra chuan,"Sialchhip upa in a sawi hmang kha chuan Hliappui lama kal kual lo hian Thingdawn khua hi kan lut rang zawk dawn a. Thingdawn leh Sialchhip inkarah hian khaw pakhat a awm a. Thingdawn thlen nan hian niruk vel kan mamawh dawn ani. Hliappui lama kan la kal kual leh anih chuan hun kan khawh ral hnem mai mai dawn ani. Chuvangin kei leh Zalawma hi Hliappui lama lo kal buai tawhlo in Thingdawn lam chu kan lo pan vang vang anga. Midang zawngin Vanzaua hi Hliappui lamah inlo va hawn pui dawn nia" tiin a ruahmanna chu a han sawi ta a. Mahse midangho chuan Hliappui lama kal bik chu an duh ta hauhlo mai le. Vanzaua meuh pawh chuan a kal theih tawh thu leh Thingdawn lama kal ngei chu a tum ta tlat mai a. Mahse Vawra chuan," Kan vai chuan kan kal theilo ani. Hliappui khuaah khan inlo va let leh thuai anga. Pasalţha Darchhawka hnenah khan thil awmdan zawng zawngte in va hrilh anga. Amah ngei khan min puih theih reng thu a sawi avangin Thingdawn khawdaiah kan lo nghak dawn ani. Tunah hian Ţhi pathum vel chiah ka kawl tawh a. Kan nulate zawng zawng chu kan tlanchhuak zo dawnlo ani. Thingdawn lal chu kan va be hmasa phawt anga. Kan thu dawn a zirin hmalak dan tur chu kan la rel leh dawn nia" a han ti a. Vawra bawk chuan,"Vanzau nang pawh uluk takin lova in enkawl la. I nu leh i farnu an thlaphang tawh lutuk ani. Tunah hian Hliappui khua chu nihnih hnuah in thleng emaw ani anga. Pasalţha Darchhawka chu hmanhmawh taka lokal turin in han hrilh dawn nia" tiin an awmdan tur chu an rel ta zung zung mai a. Vanzauate chuan hreh hle mahsela Hliappui lam pan hmasa tura Vawran a tih tlat avang chuan an kal mai chu angai dawn ta ani. Tichuan an buhfai neih ang angte chu an han insem a. Vanzauate chuan Silai pakhat kengin Hliappui lam chu an pan ta a. Vawra leh Zalawma erawh chuan Thingdawn lam an pan thung ani.

           Nihnih lai mai an kal hnu chuan Vanzauate chu Hliappui khaw kawtchhuahah chuan an ţhu vang tawh a. Vanzaua pawh a taksa chau deuh mahse a rilru a paukhauh ve em avangin a ţhiante a zui ve thei zel ani. Hliappui khaw kawtchhuah an thlen chuan khua a thim dawn ruai tawh a. Vanzauate chu hmanhmawh takin khaw lam pan chuan an kal nghal hlawk hlawk a. Khua an va thlen chuan khawidang maha kal tawhlo in pasalţha Darchhawkate in lam panin an kal ding ta nghal vang vang a. Darchhawkate in an va thlen chuan Darchhawka leh a nupui Darchawii chu tapchhakah anlo titi malh malh a. Vanzauate an va luh chuan Darchhawka te nupa chu anlo meng phawk hra mai a. Darchhawka chuan," Zaua te lah nirengin, in rawn chhuak vek thei ta em?" alo ti thuai a. Vanzauate chuan ţhut hmun rem pahin Vawran a rawn tlanchhuah dan leh kawng laka an thil tawn zawng zawng chu an ham sawi ta vek a . An sawi zawh chuan Darchhawka chuan," Ramlianate unau hi zawng han el phak rual anni love. Vawra hian a ute hi a khum hle mai" a han ti sap a. Vanzaua chuan," U Dar,U Vawra chuan i puihna a beisei deuh ani. Kan nulate kha Thingdawn lamah an hruai vek a. Chu lam pan chuan Vawra leh Zalawma chu an kal tawh a. U Vawra chuan i puihna a beisei ani. U Vawra thu kenga lo kal kan ni e" a han ti a. Chu veleh Darchhawka chuan," Anih chuan kan kal chhuah vat angai dawn anih chu. Mahse kan chhuah hmain lal in lamah in thil hriatte hi kan han thlen phawt anga. Tichuan kan lal hriatpuina ngeiin Thingdawn lamah chuan kan kal dawn nia" a han ti leh a. Darchhawka vek chuan a nupui Darchhawii hnenah chuan,"Kal kawnga kan mamawh tur buhfai leh chiseh ilo kha ka iptepuiah lo siam ang che. Lal in lamah kan han kal lawk ange" tih leh chhuah a rual a. Vanzauate nen chuan lal in lam pan chuan an kal ta a.

          Lal in an han thlen chuan Hliappui lal Hratlianate chuan zanriah anlo kil mek a. Thu hmanhmawhthlak anih avang chuan Darchhawkate chu an lut ta tho a. Mahse lal chuan an chaweikham lo nghak rih tura atih avangin pawn lamah an lo ding khawmuang rih a . Rei vakloah chuan lal chuan Darchhawka te chu inchhunga lut tur chuan an ko a. Darchhawkate lal ina an va luh chuan lal chuan," Dara,eng thuah chuan nge min han biak duh ni?" alo ti var a. Darchhawka chuan," Lal pa,ka tlangval rawn hruaite hi Vawran Samtual khaw lal hnena ava tlanchhuahte anni a. Anmahni hian thil awmzia han sawi sela a ţha ange" a han ti a. Tichuan Vanzauate chuan thil awmdan zawng zawng chu lal hnenah chuan an han sawi ta vek a. An sawi zawh chuan lal chuan ," Ka rinloh lam daihin thil a kal ta mai ka ti. Thisen a luan em kha chu ka lo ringlo asin. A engapawh chu lo ni se. Vawra pui tura kal chu in tum tihna em ni?" a han ti a. Darchhawka chuan,"Lal pa,kan tum dan chu ania lawm. Vawra pawhin kan puih ngei chu a rawn beisei ani" a han ti a. Lal Hratliana chuan,"Thingdawn khua thleng thlenga ka tlangvalte tirh chu thil atthlak tak ani ang . Mahse Vawrate chu kan puih ngei an ngaih si avangin Ka tlangval sawmthum nen in kal ka phalsak ang che u" a han ti a. Lal bawk chuan," Thil hmanhmawhthlak anih tawh avangin zanin la la hian chhuah hman tum ula. Tin,Darchhawk,ka rin zawh em avang chein ka tlangvalte i kutah ka dah dawn a. Hlawhchhamin lo kir hauh suh ang che. Tin, khawdang pawikhawihlo zawnga chet in va thawh hram ka duh ani" a han ti a. Lal chuan sawi chhunzawmin,"Tunah hian Zawlbuk lamah zuk kal ta ula. Ka thupek hi in zuk sawichhawng dawn nia. Tumah ka tir lui dawnlo a. Tlawmngaih chhuah thei an awm chuan an rawn zui mai dawn che u ani" a han ti leh a. Darchhawka pawh chuan lal hnenah chuan lawmthu a han sawi mawlh mawlh a. Tichuan Zawlbuk lamah chuan lal thupek kengin an kal ta nghal a.

            Zawlbuk an zuk thlen chuan Darchhawka chuan lal thupek chu a han sawi chhawng ta a. Suartui khua leh tui lo ni tawh ţhin ten an han hriat chuan kal ngei chu an tum ta ţheuh a. Hliappui khaw mihlun ţhenkhat pawh chuan tlawmngaih chhuahin an kal ve tur thu an sawi ta a. A tawpah phei chuan an duhaia tam mah chu Thingdawn lama kal tum an awm ta mai a. Darchhawka chuan Suartui khaw mi leh sa Hliappui lama pem lutte chu an duhsak deuh bik a. A kal tur an inthlan fel hnu chuan an mamawh ang ang la khawm turin tlangvalte chu an in lam panin an tlan haw sang sang a. Lenghawn ar khuan hun awm velah chuan Thingdawn lama kal tum Hliappui khaw tlangvalte chu Zawlbuk kawtah an awm ţhup tawh mai a. An hmanraw neih ang ang bakah midang Silaite hawhin an rawn inlek chhuak fur mai a. Darchhawka chuan an kal dan tur leh an va kal chhante chu an sawi leh zung zung a. Chumi hnu chuan lal in lamah kal leh in lal chuan a tlangval Thingdawn lama kal turte chu a vai liam ta a. Vanzaua pawh a taksa la chak tawk lo mahse a hmangaih Vantei chhanchhuahna kawnga awl bik nih chu a tum hauhlo ani.

          Hun leh ni a liam a. Thlipui leh Ruahpui karah pawh chawlh hahdamna hun insiam ngamlo a niruk lai an kal hnu chuan chhun pachangah hian Vawrate chuan Thingdawn khaw zaupui an lut thleng ta hlawl mai a. Kal kawnga an buhfai ken chhun an eizawh hma deuh avangin Thlawhlaia Fanghma tuai te chu a hawng nen lam an han keih nghal bawrh bawrh mai a. Mi ramkalin an hmuh mai loh nan vau hrul deuhah chuan an han tawm rih a. Rei vaklo an ţhut hnu chuan Vawra chuan an awmna aţanga Thlam hnai bera mei khu chhuak ngiai ngiai chu a han hmu thei ta a. Zalawma hnenah chuan," Hawh teh i va pawh rawih mai teh ang. Hetiang ringawt chuan kan ţam hlum thei mai dawn anih hi" a han ti a. Zalawma chuan," U Vawr,ral angah min ngaiin minlo bei mai lovang maw" a rawn ti a. Vawra chuan,"Ramvak kawngbo angin kan insawi mai dawn nia. Eng kan ti em lovang chu" tih leh Thlam lam pana kal chua rual ta mai a. Zalawma pawh chuan a zui ve nghal mai bawk a.

          Thlam an va thlen chuan Nupa rek hi chawchhun tur buatsaihin an lo buai mawlh mawlh a. Thlam kawngka a han dak thut pahin Vawra chuan," Ka pu hei hi eng khaw ram nge ni" a han ti thut mai a. Thlama nupa rek lo awmte chu an phu zawk nghe nghe ani. Thlama lo awm pa zawk chuan," Thingdawn zau ani e. Engmah neih kan neilo ania. Min nun hram rawh u" alo ti ta mai a. Vawra chuan," Ral kan nilo e. Ramvak kawngbo satliah kan ni e. Kan rilţam lutukin Thlam hi kan rawn pan ta rawih mai ani" a han ti a. Mahse Thlama lo awm nupate chuan Vawrate thawmhnaw inbel leh an Silai ken te avang chuan Ramvak satliah annih an ring thei hauhlo ani ang e. Thlam kil lamah chuan hlauh hmel takin an ding reng mai a. Vawra bawk chuan," Ka pu,hlauhawm kan awm love. Khawngaihin pang ngai takin i titi tlang teh ang u. Kan rilţam lutukin Thlam hi kan rawn pan mai ani. In chungah engmah a thleng lo ang" a han ti leh a. Chutianga a han tih takah chuan Thlama lo awm nupa tepawh chu ngampa ta deuh a. Thlama lo awm pa chuan,"Ngurhrima ka ni a. Hei hi ka nupui anih hi. Tun kumah inneiin inhrang kan chang ve a. Hei lo pawh a hrangin kan han nei ţan ve anih hi. Chaw hi kan lo fun tam vaklo a. Nangmahin in in ei mai dawn nia" a han ti a. Vawra chuan," Kei hi Vawra ka ni a ,ka ţhianpa hi Zalawma ani" a han ti ve a. Vawra bawk chuan," Chaw kha chu nangmahniin ei rawh u. Keini zawng Vaimim hi kan chhum mai ange. Kan riahbuk thlen hma chuan kan ţamchhawl hmanlo ang" a han ti a. Vawran a hming ahan sawi chiah chuan Ngurhrima leh a nupui chu an tawlh sawn rawk rawk mai a. Ngurhrima chuan," Vawra maw inih a. Kan khaw tlangvalten Lenchim an run ţuma kan tlangvalte lo that chiam tu kha ini chiah mai. Khawngaihin kan chungah zah ngai hram rawh u" tiin a rawn ngen ta a. An nupa chuan hlauh hmel takin an ding khawng reng mai a. Vawra chuan," Pu Ngur,i sawi Vawra chu ka ni ngei alawm. Mahse tunah chuan nangmahni bei tura lokal kan ni lo. Min hlau duh suh u. In chungah engmah a thleng lovang" a han ti mawlh mawlh a. Ngurhrimate nupa pawh chu an awmdan a pangngai leh ta deuh a. A khat tawkin Vawrate chu an en leh zauh zauh ţhin a. Ngurhrima chuan," Engti tura lokal nge innih a. Ramvak satliah chu innih hmel siloha" a rawn ti a. Vawra chuan," Kan khaw mi leh sa ţhenkhat Samtual khaw hoin salah hruaiin in khaw lal hnenah anlo hralh ani awm a. Chung mite tlanchhuak.tura lokal kan ni . In lal chuan tlanchhuah aphal em ang chu maw" a han ti a. Ngurhrima chuan," Phal loh tur thu chu a awmlo a. Mahae tunhnaia sal a anlo hruai tamzawk hi chu kan pasalţhaten an kawl vek a. Tlanchhuah hi an phal angemaw chu" alo ti var a. Vawra chuan,"Ani maw,in lal chu a pasalţhate hmin tura biak thiam viau angai dawn anih chu" a han ti leha. Vawra leh Ngurhrima an titi mawlh mawlh lai chuan Zalawma chuan thlawhlaia Vaimim alo kek mawlh mawlh thung a. Chhun chawhmeh turte an siam zawh hnu chuan Vawrate chuan Vaimim an han chhum a. Ngurhrimate chawfun han ţawm erawh an duh lo ani. Chawchhun fak zawhah chuan Ngurhrima te nupa chu an thlamuang chiahlo ngeni haw nghal mai an tum ta a . An haw dawn chuan Vawra chuan," Pu Ngur,kan lokal thu hi tuma hnenah lo sawi rih suh ang che. Anih loh chuan i chungah thil ţhalo tak kan thlen tir ngei ngei ang" tiin a han chah a. Ngurhrima te pawh chuan an sawichhuah loh tur thu intiamin khaw lam panin an kal ta thung a.