Bung-2
Thim rorelna hnuaia ta chhuah zalen chak niawm fahranin kawl eng tur nghakhlel taka thlir chungin hramthiamva tinrengte leh nungcha chi hrang hrang te awrawl chuan Zuksih ngawpui,a ngaw ţhat em avang a thim dur kuih thei hial khawp chu a rawn luah khat leh ţan ta a.Vawra pawh hma taka thoin mei te a han nun a.Sarep te a en fel zawh hnu chuan Kurung lui lamah chuan tuichawi turin a phei hnak hnak a.Luipui a va thleng dawn ţep tih ah chuan thil engemaw ri su su,amah rawn hnaih zawnga lo kal chu a hre ta thut mai a.Tuichawi tura kal anih avangin hmanrua engmah a keng silo a.Khua ala var chian vakloh avangin amah rawn pan mektu chu enge anih a hmuthei mailo a.Engpawh tawk thei ani tih inhriain a dinna kiang velah chuan hmanrua atana han hman theih mai tur awm thil a zawng vel ruaia.A vanneih a siamin thing bung ban puam tiat vel,hlam chen vel zeta sei hi a hmu fuh hloh a.Tichuan thingbung chu kengin inring tak chuam a hma a thil lo thleng tur atan chuan a lo inbuatsaih ta a.Thawm chu alo hnai zela , a dinna aţanga hlam nga bawr velah chuan Tupuisatang ţhankin tawh lian ţha zet mai hi alo bawk hru mai a.A inhrosa ve ham ham a.Chutah Vawra awmna lamah chuan alo vak phei leh ta hru hru a.Vawra chu Tuipuisatang lamah chuan zuang phei zawk pahin a thingbung ken chu a zak kau khawpin van lamah a han lek kang a.Lei a thlen rual chiah chuan Tuipuisatang ngum pawh chu a ri dup a.Vawra chuan a rang a rangin a vaw nawn nghal zawt zawt a.A ramsa vuak chu a thifel awm a a rin hnuah chuan an chawl ta rih a.Tuipuisatang chu a zal hneh hle mai .Vawra chuan tuium tuia a tihkhah hnu chuan a sa vuakhlum chu a meiah manin buk lamah chuan a kai phei ta a.Buk a va thlen chuan a u tepawh anlo tho vek tawh a.Vawra thil rawn ken an han hmuh chuan Vawmaia chuan,"Vawra,kha Tuipuisatang lah ni rengin .A engti tia rawn hawn ngawt nge maw inih chu le" a han ti a.Vawra chuan,"Ka u,min beih tumin alo inhrosa nasa mai a,ka vawhlum tamai ani" a ti a.Kawlkunga chuan,"E,kha i vawhlum lian khawp alawm,khawirawh kalo lip ange,tukţhuan hmeh a i hmang a u hmiang,a tui reuh phian ania " tih pahin Vawra Tuipuisatang ken chu an lip nghal zung zung a.Ramliana lo ţawng ve lehin,"Taite hetiang ramhla tham deuh a sapel a kan chhuah hi chuan sa ţawmkailo hi chu kan hel hram hram ţhin ani ngai e" alo ti charh charh a.Vawmaia chuan," A tui a phum lai iva nangching anih dawm kha,an hauh na ve teh ania" alo tive bawk a.Tichuan tukţhuan tur te an peih fel hnu chuan an kil zui nghal a.An kham fel ta maw tih ah chuan Ramliana chuan,"Hei Nihnih lai mai kan riak tawh a,Sazuk pahnih kan kap tawh bawk a.Vawiin chu luiral lam Tatkawng hmunah khian Sanghal kan han beisei leh phawt anga.Kan hlawhtlin hma dan a zirin khaw lamah kan hawng tawh dawn nia" an ti a.A unau dangte pawh chuan a remruatna chu an pawmpui tlang hle ni.Silai te an en fel mek lai chuan Vawmaia chuan,"Vawra vawiin chu Silai i lek ve kan phalsak ang che,.Sa han kap ve chhin reng reng la a ţha ang.I kut a dik dawn emaw chu han en ang hmiang" a rawn ti a.Vawra chu a phur khawp mai a,kal chhuah hlan mawlh chu a nghakhlel a.An inpeih fel hnu chuan luipui chu daikai in Tatkawng hmun lama ramvak tur chuan an inzui chho ta hnak hnak a.
Chuti lai mek chuan Suartui khaw ţhenawm,Suartui aţanga nikhat kal zetah chuan Suartui khua a hmeithai fapa Thangbawnga leh a ţhiante pathum pawh Thanbawnga nupui tur ruk chhuah dan anlo rel ve mek a.Thangbawnga hi hmeithai fa ani a.A pa hi Suartui khawnbawl upa Pu Khamvela ani thung.Amah hi pu Khamvela fa hmasa niin pu Khamvela sawn anih ber mai chu.Thangbawnga hi anu leh pi te nen a cheng ho anni a.Mahni hrin nge nge chu pu Khamvela pawh hian a nupui thar leh a fa dangte mit tikhamlo tawkin Thangbawnga te hi a pui fo ani.
Tun ţuma thangbawnga nupui tur zawnga an kal hi Thangbawngate ţhianho hian apa pu Khamvel a miţha nihna changchawiin an khaw ţhenawm Dampui khaw upa fanu Hlunchhingi anlo va veh thlem a.Suartui khaw upa Khamvelate hi mi awmthei chhungkua ngang annih avangin an khawh chheh velah chuan a lar ve hle ani.
Hlunchhingi pawh chuan pu Khamvela fapa anih avang chuan alo hnial hranpa lemlo a.Chumai bakah Thangbawnga pawh hi tlangval pianţha leh hmel fang ţha ve tak alo ni pah fawm bawk nen.Amaherawhchu Hlunchhingi pa leh a unaute hian an fanu leh farnu ni bawk chu Suartui lama lawi tur chuan anlo phal awzawng lo mai a.Chumi avang chuan thu mum awmlo in Thangbawnga te chu anlo hnial fithla ţhak mai a.Thangbawngate erawh an beidawng hauh lo.Hlungchhingi nen in remsiamin Hlunchhingi thingphur tur chu khawdaiah an lo nghak anga.Tichuan Suartui khaw lampanin an tlan mai dawn ani.
Tukţhuan ei hun velah chuan Thangbawnga te ţhianho pawh beiseina sang tak nen Dampui khawdaiah chuan an awm ţhap tawh a.Thangbawnga ţhianpa pakhat chuan," Bawnga,i thil tihtur hi i chiang meuh maw,.Chhingi hian hmeithai ina lawiluh hi alo duh chiah angem.Tunah lah pu Khamvela ina lawi tur niawm hrimin a hlim em em dawn si a" a ti a.Thangbawnga chuan,"Ţhiana,i hmeihchhe thu dawn em mai.Kan khua kan thlen hun meuh chuan engmah tak tak a ti thei dawn hlei nem.Bakah Chhingi pawh hian min ngaina in min hmangaih em em ve tho a.Chutiang chu a tiduh lo ang" tiin alo chhang a.Tlangval pakhat chuan," Ni e,sawlai thleng thleng kan thlen tawh hnuah chuan engmah thilpawi a thleng tawhlo turah ngai ang" tiin alo tuihnih ve bawk a.
Thangbawnga chu a za cheng tawh maia,a awm hle hle thei tawhlo.Hun te chu a kal muang hi an ti em em khawp a,a hui leh pap pap ţhin a.Chutia helhkham nei taka an din ţhap lai chuan Dampui khaw lam aţang chuan hmanhmawh taka pen thawm alo ri that that a.Mi pakhat mai pen thawm a alan loh avangin Thangbawnga leh a ţhiante pawh an phawk hra hlawm mai.Ngawi reng anlo thlir ţhap lai chuan chhingi leh a ţhiannu chu anlo lang hlawl mai a.Thangbawnga chuan hlim takin," E,kha Chhingbawih ,inlo thleng thei maw.Inlo kal thei dawnlo emaw kalo ti hman asin" a han ti a.Chhingi chuan hah vanga thaw hlawp hlawp pahin," U Thang,i tan chuan engkim ka huam tih hi min hriatsak la ka duh.Hei mualpho pawh dawnlo in kalo zui dawn che ani a.Nakinah min duhlo in min hnawl leh si ang tih ka hlau ani" tiin a chhang a.Thangbawnga chuan," Chutin sawi mah ta che.Keipawhin engkim huamin helai thleng hian i tan kalo kal alawm.Ka lawmna leh hlimna ber ,ka huaisenna leh chakna pawh ini e" ti chungin Chhingi chu a han kuah a..Aw then kharh kharh pahin Thangbawnga ţhianpa pakhat chuan," Bawnga,kha lam kha chu in lama sawiah i khek dawn teh ang.Hei lam hla lam kal tur kan la nia.Ka hma lamah enge thleng dawn pawh hriat va ni suh,i kal thuai teh ang u " an ti a.Thangbawnga chuan hrethiam takin," Ni e,tirawh Chhingi kan khaw lam i pan tawh ang u hmiang" tih pahin chhingi a vawnna chu an thlah a..Chhingi chuan a ţhiannu hnenah chuan," Ţhianni,heti hi kan ni ta sia.Ka chhungte hnenah khan thilthlen dan engkim hi kim takin ilo hrilh dawn nia.Min rawn ngaihtuah lo rawh se" a han ti a.A ţhiannu chuan," Thianni,lungngai reng reng suh,engkim a fel vek mai ang,ka ngai dawn hle mai che" tih pahin Chhingi chu a han kuah vang vang a.Tichuan an khaw lam panin a kir leh ta a.Thangbawnga tepawh an tum ber an hlawhtlin takah chuan an Suartui lam panin hmanhmawh takin an kal ta hlawk hlawk a.
Zuksih ngaw lamah ve thung chuan Vawra te unau pawh Sanghal hualin an buai hle mai a.An ui hruai te chuan han bih tawm ţhin tak mahse kah remin a awm duh reng reng lo mai a.Rei ngial an beih hnu chuan Sawivela thinin a tuar ta lo, Changel hmun pik laia sanghal tawm tlat mai chu luhchhuah tumin a tlanphei ta mai a.Sanghal pawh chuan a hlau ani chek ang chu,a rawn tlanchhuak zawk a,Sawivela awmlohna lam khanah chuan a lim pheu ta puat mai a. Chu taka chu Ramliana tan hun ţha niin Sanghal a chân khân lama lo phei chu alo kap dur mai a.Sanghal chu a ding chawih a.Thih mai la tumlo niawm fahranin muang changin Ramliana awmna lamah chuan a kal phei ta nghauh nghauha .Vawra te unau chu silai rikna lamah chuan tlankhawm nghalin Sanghal chu ala thilo tih an va hmu mai a.Mahse anmahni han bei let thei zia zang ani tawhlo.Vawmaia chuan a Silai chu Vawra hnenah pein Sanghal hnuk chu chhat turin an ti a.Vawra chuan Phur taka Silai chu lek kangin an tin vang vang a,a hmet puak ta dur mai a.Silai a rik rual chiah chuan Sanghal chu a awp rup a,Vawra pawh a vawikhat silai kahna ani a,rah chhan ţhatak zawn na chang lo hre hek lo i.Hnung lam thinghmun thelh hun maiah chuan a tlu thal ve ta huau mai a.A u te chuan anlo nuih dar dar a.Vawra chu ţhenţhaw chunga rawn thochhuakin a lu a tuai vat vat a.Ramliana chuan," Vawra,min nuih hlum tir thei dawn alawm.Rah chhan ţha tak lak na chang i hriat kalo ring a" a han ti a..An nui dar dar a.Vawmaia chuan," Ekhai,hei Vawra chu sa lu hnih ngawt a hawn dawn ani mai a,min hnuaichhiah thei der dawn zu nia" a han ti a.Vawra chuan," U te thlazar hnuai awm zawng alo thlamuan thlak mange" a han tive a.Tichuan Sanghal sa chu chan darhin buk lam panin an kal pui ta a.
Buk an va thlen chuan Ramliana chuan,"Naute u,hei chhun chawfak hun awrh choh ala ni a.Kan tum aia hma in kan hlawhtling tawh a.Hawn zai rel i tum ang u hmiang" an ti a.Kawlkunga chuan," Ni e,kan phurh zawh tawk aia tam thelh mai sa kan nei tawh .Duham viau tur pawh anilo e" a han ti a.Tichuan an phurh zawh tawk ţheuh an siam hnu chaun Zuksih ngaw chhuah sanin Suartui lam panin an inzui haw ta hnak hnak hlawm a.
No comments:
Post a Comment