Pasalṭha Chawngvawra 46

Bung-46

           Lungchuan khua chuan a vanglai a tawng mek a. Khual kai khawp a pasalţha pawh an kat nuk ani. Kut ni vang thla alo thlen chângte hian lal nopui dawm thei khawpa huaisen leh tlawmngai ,chawimawi tur hi an haihchham ngailo. Lungchuan lal Vankhupa hian nupui pangngai mai bakah hmei pakhat anei a. Sal nula leh tlangval a rawngbawlsak tur pawh a kawl nual bawk ani. A nupui pangngai lakah hian fa pahih neiin a hmei lakah erawh fa aneilo thung. Vankhupa fapa hi Vanzika niin tlangval hmelţha leh hleitling zet mai hi ani a. A huaisen bakah a chak pawh a chak viau a,mahse a chapo ngailo thung. Lal fapa anih avangin a chang chuan alo intivei ve deuh ţhin a. Mahse mi mit tikham khawp erawh ani ngai meuhlo. Lungchuan lal hian fanu hmelţha zet mai,khual kai phak hat khawpa hmelţha Ngurpuii a nei bawk a. Khawdang lal fapa tepawhin an rawn rim fo a. Mahse hmel duh zawng ala neih loh mai bakah a pa chuan an khua ngeia pasal nei tura a tih deuh avangin ala hmu zolo len ve mai mai a. An khaw tlangvalte lah a duh zawng an awm mai bawk silo. Nula zaidam leh ngilnei tak hi ani reuh a. Lal in a chhuahsan ve changte hian mi mit fukna leh mi fak rawn ani fo ţhin ani.

            Tuk khat chu lal leh a khawnbawlte chu ni lum ai pahin leikapuiah an ţhu far mai a. Lal Vankhupa chuan,"Kan tlangvalte Sairamchhuak hlawhchham in an lo hawng ta si a. A hranpaa fur sarep tur zawn pahin ramchhuah kan rawt leh dawn em ni ang" tiin a upate chu a han rawn a. Upa Keiluaia chuan,"Lal pa,chutia i han sawi takah chuan keipawh furpui lo thlen hmaa ramchhuah leh ngei chu ţhain la hria ni. Hei buhtuhte kan zo fel ta bawk a. Hnuh lak hma ngei hian ni thei sela" a rawn ti a. Upa dang pawh chuan ramchhuah rel chu ţha anti tlang hle mai. Vankhupa bawk chuan," Chutia ka upaten rem intih tlan theih chuan kan Val upate kan hrilhhriat dawn em ni ang. Ngen mu tur suan lung lah kan nghah nasa a. Hlawhtling ngei turin beisei teh ang" a han ti a. Lal vêk chuan,"Thudang alai chuan hei kan khuaah pasalţha chhungkua an lo pem hlauh mai a. Sa lah chu an la thei phian mai lehnghal a. Anniho hi kan tlangvalte ho turin kan ring ngam angemaw chu?" tiin a upate chu a han zawt a. Upa Bualthanga chuan,"Nia,Lal pa i han sawi takah chuan hei khawtlangah pawh a tlawmngai pawl leh mi chung en anni chho der mai a. An taima in an nun a ngil a. Mahsela ka han ti teh ang,kan tlangvalte kai hruai tur chuan kan pasalţha neih sate hi an ţha tawk viauin ka ring ani. Kan pawngpaw rin lutuk chuan an inuling hlauh dah ange" a rawn ti a. Chutah upa Tawnluia lo ţawngin,"Ni e Lalpa,upa Buala sawi ang deuh khan kan pasalţha kan khaw tana theihtawp chhuaha bei ţhin tute hi i ngaipawimawh hmasa teh ang. Ramliana te unau pawh an huaisen lo e kan tilo a. Mahse kum avei chauha , kan rin lutuk cuan kan pasalţhate kan tu lungawilo dah ange. Tin,tun ţumah hi chuan an naupang ber Chawngvawra khu ramchhuak zingah tel ve ngei sela ka ti ani. Amah te reuh khu sa ala thei phian mai lehnghal a" a rawn ti a. Lal chuan,"Nia,sachhiah pawh an rawm dah zing narawh e. Tu kah ber nge phei chu kalo zawt si se ngai hlei lova. An naupang ber Chawngvawra an tih phei khu chu lal inah hian alo la chuangkai ngai hauhlo in ka hria" a rawn ti leh a. Upa pakhat chuan," Lal pa,amah khu chu ram lamah hian a inkulh deuh chawt mai ani awm a. Khawchhungah pawh hian hmuh tur a tamlo khawp mai. Hnatlan ni khuaah leh chhiattawh changte hian a lo lang vei leh nawlh ţhin a. Kan tlangvalte sawidan phei chuan nula pawh a rim ngai lemlo ani awm e. Ţhenkhat phei chuan Lasi a zawl ani ange an ti hial asin. Zawlbukah lah val upate titi ngaithlain a ţhu zankhua peih e an tia lawm" nui hak hak pah chuan a rawn ti a. Lal chuan," Ekhai a,Lasi zawlah an lo puhthlu leh ringawt ange. Mihring hi chu ze hran nei ţheuh kan ni a. Mi zinga telve chak lemloh chhante pawh anei ani mahna. A ute khu chuan nupui an nei vek tawh in ka hria a. Lengah te pawb la sawm hial chi anih dawn chu. Amah ngei lo kal sela aţha ange" a han ti a. Tichuan lal leh upate chuan ramchhuah chu an rel ta a . Valupate leh pasalţhate chu an han hriattir nghal a. Vawra ngei alo kal theih nan an tlangaupa chu Vawrate in lamah chuan an tir nghal bawk a.

           Lungchuan khuaa an in benbel hnh hian Vawra hi a chhuak tam lo hle mai a. A hun tam zawk chu ram lamah a hmang a. Ţhian han kawm bik em em pawh nei chuanglo in khuaa a awmleh a ute inah a leng a,ram lamah lah a ute nen bawk an in zui a. A farnu pasal la neilo zawk Ţuahpuii nen hian an inthlawp nitin mai ani. Nula inah han len ve zeuh chang nei ţhin mahse a meieng chhim phalo tawk velah hian a awm mai ţhin a. Rama a riah apiang deuh thaw hian sa lu hi a rawn khai haw ve ziah bawk a. Khawtlangin harsatna an tawh chang leh hnatlan nikhuaah erawh chuan a tlawmngai ber ber ani leh lawi si. Mi tamtak chuan mi pangngai phak zan lo deuhah an ruat hial tawh ani. Chung chu hre reng mahse Vawra chuan a hmalam hun atana nasataka inbuatsaih a duh avangin chung thilte chu engah mah angai lemlo. A ute pawhin an hrethiam em em ani. A ram riahnaah hian a ute nen nunchan an zir ho fo ţhin a. Vawra tan chuan hmasawnna nasatak ani ngei ang le.

          Nikhat chu Vawra pawh buhtuhte a zawh fel tawh avangin khaw lama haw chu a tum ta a. Therhlo kah tur an awm takmialin tiin a haw pah chuan an vau a ramngaw chu ahrut chho ta a. Ramngaw a a luh thuk deuh hnu chuan a chhak deuha Bungbutuairam kunga Zawngrual in um kual zak zak chu a hmu fuh hlauh mai le. Fimkhur tak chuan a veh chho ta a. Bungbutuairam kung chu alo sang fu mai a. Mahse chu chuan Vawra tan vanneihna siamin Zawng rual chuan an hnuai lama anmahni veh mektu chu an hmu lo hlauh ani. Zawngrual awmna thing hnuai a han thlen chuan Vawra chu an dak chho vang vang a. Zawngchal lian ţha zet mai, a rual dangte ngai theilo ni awm taka lo umkual mek tu chu a Silai chuan an tin vang vang a. Bungbutuairam kakpuia a ţhu chawl chiah tihah chuan an sai ta dur mai le. Zawngchal chu a hlawm awk a. Thing kung aţang chuan arawn tla thla nul nul a,a tla thum awk maia. Zawng rual dang chu khek ruai ruai chungin an tlandarh vek thung. Vawra chuan a zawng kah chu ava chhar thuai a. A dul nemah kapin a hnug lamah silai mu chuan a hawrh tlang hial ani. Vawra chuan Zawngchal chu a iptepuiah a han ak ta a. Zawngchal chu alo lian ţha hle mai a,Vawra iptepui aţang chuan a la dak va va thei ani. A beisei aia hmaa a hlawhtlin takah chuan khaw lam pan chuan a kal leh ta nghal a. A u Ţuahpuiin pangpar a lawm theih em avangin Vawra chuan kalkawnga pangpar a hmuh ţhenkhatte chu an thliak hawng a. Hlawhtling in ti takin khua chu a pan ta a.

          Behliang mun hun velah chuan Vawra chuan an khaw kawtchhuah a thleng dawn tawh a. Kawtchhuah ava thlen chuan nula leh tlangval bakah nutling leh patling ţhenkhat feh kal hawng pawh an lo chawl ve a. Vawra kawtchhuah a han luh chuan alo chawl hmasate chuan anlo en duh hle mai a. Ţhenkhat chuan chawl ve rih turin anlo ti a. Vawra pawh chuan a iptepui te hlang thlain ţhuthmun an rem ve a. Kawtchhuaha lo chawl ve pa pakhat chuan," Kha tlangval,i Zawngchal kah chu ava len hme ve" alo ti a. Vawra chuan,"Nia,hei a lian ţha khawp mai. Ka vanneihin haw kawngah ka rawn tawng fuh hlauh ani" tiin a chhanga . Chupa bawk chuan," Tlangval,khuaah hian hmuh tur i vang riau mai a. A eng hmuh ţha nge maw i zuk hmuh bik le" nui huah huah chung chuan a rawn ti a. Midang pawh chu anlo nui ve dar dar a. Vawra chuan," Khawi lam hmuh ţha mah hmuhtur an awmlo e. Zawng hmaisen leh Sauak hmelchhe zet bak hmuh tur an awmlo. Khaw lamah hian hmuh ţhat tur an tam deuh ringin ka rawn zuangchhuak ta hlawl anih hi" nui chung chuan a han ti ve a. Chutih lai chuan a sira lo ţhu ve nuthlawi pakhat hian," Hei min ha en la,hmuh ţha chu i hmu nghal ani mai . I pangpar hawn kha min han pe nghal bawk la" a rawn tih hnu phei chuan a thutak peih an awm ta mang lo a. Vawra chuan," Kha han tawn teh,i mawipui viauin ka ring ani" tiin a pangpar hawn pakhat chu a han pe a. Nuthlawi nu chuan Vawra pangpar pek chu tawn pahin," Tunah zawng,Ngurpuii hlimthla ang mai ka ni ta e" a han ti reuh a. An nui dar dar hlawm a. Hlim taka titi hoin an buhtuh an zawh tak avanga an hlim zia te. Hlo a har an rin thute. An buh tuh Sava in an ei nasat thute an sawi ho dar dar a. Tichuan hlim takin khaw lamah chuan an inzui hawng ta a. Kawtchhuaha lo chawl ve te chuan chuti tak maia Vawra a ţawng duh chu mak anti em em maia. A hma zawngin an lo be ţha ngam ngai silo. Nula ho pawh chuan a hma ai chuan an ngaina zual ta sawt a. Vawra hlim nui hmel an hmuh meuh chuan an tuiral lo chauh ani.

            Khua an thlen chuan an han in mangţha sap sap a. An mahni in lam pan tur chuan an peng kawi ta sap sap a. Vawra pawh an in lam pan tur chuan a kal ta a. Chutia an in lam pana a kal bek bek lai chuan kalkawngah hian hmeichhe naupang pakhat hi alo ţap ruah ruah mai a. A u tleirawlte hian in lama haw tur hian alo kai a. Ani hawng duhlo,a ţhiante nena infiam la chak lutuk chu ţah a tlak a. Tuallaih chuan ţhuin a ţap ruah ruah a,a ke te chu an per ang laih laih a. A ţhiante chuan an thiltihlai chawlhsanin an en ţhap a. A u lah chuan,"A nu in lo haw rawh ati nia.Ilo haw vat loh chuan a vaw dawn che" tiin anau chu alo hau ve a. An awmna kianga Vawra a zuk thlen chuan Vawra chuan naupang mittui tla pur a lo ţap hnenah chuan," Nula an ţap ngailo e. I ţah chuan i hmel a chhe vek mai ang" a han ti a. Vawran chutianga an tih chuan naupangte chu bang nghalin Vawra chu a lo en kar mai a. Naupang dang lo awmve te chuan,"A ţah belh em anih kha. Kan velh pawh anilo a" an lo ti sap sap a. Vawra chuan naupang chu an kai tho a. A iptepuia pangpar pakhat chu han pek pahin," Ţah tawh miahloh tur aw. Ute thuawih tur anih kha. Kha pangpar hi,i fel.viau chuan a dang pawh kalo hawn sak leh dawn che nia" a han ti a. Naupangte chuan pangpar chu lawm taka la in a u chu a zui hawng ta a. Hmeichhe naupang lo awmve te chuam Vawra pangpar ken chu anlo dil ve sap sap a. Vawra chuan tlemte te chuan an sem ve a. Tichuan Vawra chu an in lamah chuan a kal leh ta nghal a. Naupang ţap a thlem lai leh pangpar a sem kual lai hmuhnawm ti taka lo thir reng tu an awm tih reng a hrelo.

          An in a zuk thlen chuan mak tak maiin a u mipate an lo awm vek mai a. Vawra lo haw a han hmuh chuan Ţuahpuii chuan," Vawra,khawnge ka pangpar tur chu" alo ti var a. Vawra chu a pangpar hawn chu a han pe a. Ţuahpuii chuan," A va'n tlem ve" a ti leh nghal a. Vawra chuan," Naupang ţap thlem nan ka rawn hmang ţhen alawm" tiin alo chhang mai a. Vawra ute chua Vawra Zawng kah chu an han puah nghal a. Vawra chuan insilfai pah hian,"Eng thil pawi emaw a thleng em ni. Zanin taka inlo awm khawm ţhap chu ni" a han ti a. Vawra pa chuan," I ute khan i sa kha han puah zo phawt sela,kan sawiho dawn nia" alo ti maia. Zawngchal an puah zawh hnu chuan Vawra bawk chuan,"Ka pa,eng thil nge sawiho tur chu" tiin a han zawt a. Ramliana chuan lo chhangin,"Vawra,kan lal in a huhoa ramchhuah a rel a. Kan chhungkua aţangin nangmah ngei i kal ve a phut ani" a rawn ti a. Vawra chuan," Kan la chu ava timak ve. Keimah ber kher chu,mahse lo lam hna te kan awl rih ta bawk a. Kal chu ka hnial hran lo e" a han ti a. Chutah Sawivela lo ţawngin," Vawra,khawchhung lamah hian i awm tam deuh angai tawh ani. Mi pawhin i awmdan hi mak antih thu min hrilh fo ania. Mi pangngai pha zan loah an chhiar tawh hial mahna che" a rawn ti a. Vawmai pawhin," Ni e,Ţhenkhat phei chuan zawl neiah an ruat hial tawh che nia. Nulate pawh rim ve ţhin tawhla. Zanin aţang chuan Ka ute in lamah pawh i len an phal tawh dawnlo nia" nui hak hak chung hian a rawn ti a. Vawra chuan," U te berin in tih chuan kan hnial ngam nang. Ram lama ka awm tam lutuk vang emawni khuaah hian ka mikhual ruih mai" a han ti a. Ramliana chuan," A ni tawh vel ang. Tunah pawh hei lal thupek angin ramchhuak turin i kal dawn anni a. Va fimkhr hle la,ţul lovah i tha va hmang hauh suh ang che. Val upate leh Pasalţhate zai ngaia chet ţhin tur " tiin a nau chu an fuih mawlh mawlh a. Vawra pawh chuan a ute thusawi chu ngun takin a ngaithla kar a. An titi zawh hnu chuan Vawra Zawngchal kah chu zanriah hmeh atan buatsaihin Ramliana leh Sawivela ten an chawbel an rawn chawi phei a. Hlim takin zanriah an kil tlang ta a.

          Zanriah eikhamah chuan Vawra chu reilote an ţhu khaw muang a. Chumi hnu chuan Zawlbuk a riak turin a chhuak ta nghal a. Zawlbuk ahan thleng ţep tihah chuan tlangval rualkhat nula rima kal tur nen an in tawk hlauh mai a . Vawra an han hmuh chuan an zinga hruaitu deuh ber Saithanga chuan," E he,Vawra,Zawlbukah i tal zankhua thei biklo ang. Hawh teh min zui rawh,kan khaw nula hmelţha kan rim pui ang che. A hmuh pawh i la hmulo hial lo maw. I hmel te hi a tluak phia n a , i vannei zui maithei nia" a lo ti vat a. Midangho pawh chuan Vawra chu anmahni zui tur chuan an sawm ve nghal a. Vawra a ţawng ve hmain an kalna ur lamah chuan an nawr phei ta nghal rawk rawk mai a. Vawra pawh chuan phur takin a zui ve ta mai bawk a. Lungchuan nula chhuanvawr Hrilkhumi te in an va thlen chuan Saithanga chuan," Vawra,nang hma han hruai teh" a han ti nghal mai a. Vawra chuan,"Ni love,nangmah zawk" an ti ve a. Saithanga chuan," Anih leh khawi kei man aw" tihpahin ring leng lawng hian," In awm em. Vawra ka nia" a han ti lung lung a. Vawra lah lo zam bik hek suh,"Sai ka ni e. Kan lo leng thei angem" alo ti zawm ve zat a. Chutah inchhung aţang chuan," Lo leng mawlh teh u" Khumi chuan alo ti a. Inchhung an han luh chun midang pawh anlo awmve nual mai a. Vawrate kawngka bulah chuan an ţhu a. Vawra lo leng ve ta hlawl an han hmuh chuan tlangval dang ho chuan mak an ti em em a. Tlangval phawk deuh pakhat hian," Ehe,Vawra chu nula rim nachangte i hre ve tawh ani maw?" alo ti a. Vawran a chhan hma chuan Saithanga chuan," Hre teh suh ei. Zawlbuka lawi tur kan rawn chhawm anih hi. Zanin aţang chuan hei Khumi ţhatzia a hmu tawh a. Zanleh aţanga chuan Kelphung tapchim hmu ang mai ani tawh ang" nui var var chung hian alo ti a. Midangho pawh chu anlo nui dar dar a. Vawra chuan ,"Nula rim kha ka tum deuh ta reng reng a. Kan khaw nula hmelţha han hmuh meuh chuan kalo chan hnem viau in ka in hre ta" a rawn ti ve a. An vai nuih dar dar a. Khumi chuan la hlum zat zat pah chuan," Keini hmel ve zawngin tu khawkha lung mah a kuai zo hlei lawng e. Min fak Arek zo ange" alo ti var a. A khat tawk chuan Vawra chu an melh leh zauh ţhin a. Vawra erawh fiamthu thawhin a nui bawrh bawrh a. An nula rim lam reng reng a ngaihtuah lo. An nuih dar dar lai chuan Saithanga bawk chuan," Taka,kan lalin ramchhuah a rel ani awm a. Tun ţum chu kan hlawhtling tawh em ang chu maw" a rawn tichhuak hlawl mai a. Tlangval pakhat chuan,"Kan val upate khan Sazuk leh Sanghal vel an beisei deuh berin ka hria. Kan hlawhtling em em ang. Sai ramchhuah zawng hlawhtlin a har em mai" alo ti a. Khumi chuan,"In kal apianga in hlawhtlin zawngin inleng tur ka nei tawh nang" a rawn ti a. Saithanga chuan," Khumi,lo ngai tak rawh,Zukchal ki hreu bem buma ka rawn den meuh che zawngin min hnar min hnar tawhlo ang" a rawn ti a. An vai nuih dar dar a. Chutah Khumi chuan," U Saia ţhin hi a. Vengchhak nula in alo hr reu reu ang e " a rawn ti a. Chutah Vawra chuan ," Saia chu leh,to bik vai vai mang tak e" nui ţhaw chung chuan ahan ti a,an nui leh dar dar ţhin a. Lenghawn Ar khuan hma chuan Vawra chuan," Keizawng vawiin lama ka ramkal chau deuh nen. Ka lo va hawng tawh ange" tih pahin a han tho hlut a. Saithanga chuan," Khaih khaih khaih,kan ţawng tui dawn chauha. Ala hma em hi" alo ti thuai a. Khumi pawh chuan," Vawra chu aw. Kan titi tui dawn chauh a. I lung kan kuai zo meuh nange" a lo ti ve a . Vawra chuan,"Kan nula hmelţha zunah hiam kan uai palh reu reu ange. Phuloh zuan uai zawng ana dawn em mai" tih pah chuan a chhuak ta mai a. Vawra a chhuah hnu chuan Saithanga chuan," Vawra hi ka rin ang ani hauhlo mai. A mizia tak tak kalo hriat loh vang nge. Khatiang em em a kawm nuam kha anih ka ring ngailo reng reng" a rawn ti a. Tlangval pakhat chuan," Mi fel chhungkua anni mawle. Kan kawmthlang maiah an awm a. An zarah sa tuihang kan hawp ta fo mai. Amah ber hi ram lamah hian a inkulh reng mai a. Zanin zet chu ka ngaihdan a thlak danglam vek mai" alo tive a. Tlangval dangho pawh chuan Vawra mizia an han hriat chian meuh chuan mak an ti em em a. Hrilkhumi pawhin Vawra chu a vei ru em em mai a. Tlai lama naupang ţap a thlem lai leh pangpar a sem kual dan dan a hmuh aţang khan a thinlungah a cham veng veng mai a. A rilru tak chuan chhuah a tum hauhlo ani..

Nithum lai an inbuatsaih hnu chuan

           Lungchuan tlangval sawmli rual zet mai te chu Sazel ngaw lama ramchhuak tur chuan an inzuichhuak ta duah duah mai a. Tlangvalte chuan sa lu hawn ngei an tum ţheuh mai a. Hlawhtling taka haw a,chawimawia awm chu an chak ber ani. Chumi ni vek chuan Lungchuan khaw nula hmelţha Hrilkhumi leh aţhiannu Samthangi chu an thingphurh tur la khawm pahin an titi malh malh a. Khumi chuan,"Thangi,kum hmasa lama rawn pem thar Vawra saw engangin nge i ngaih ve" an ti phawng mai a. Thangi chuan,"Tlangval ţha tak chu anih hmel. I ngaihven deuh tihna em ni"?" alo ti var a. Khumi chuan," Ngaihven pawh ni chuanglo e. Hman zanah alo leng a . A mizia kha a dang ta lutuk a kan ti mawle" a han ti a. Thangi chuan," An sawi tak kha maw. Mahse nghah deuh rih aţha in ka hria. A nihna dik tak hriat nan chuan ala hma mah mah ani" a han ti a. Khumi chuan," Ani ngawt tak mai. Mi ţha tak ni turah ngai phawt ila" a han ti a. Thangi chuan," Ţhiani chu ,engemaw a awm chiah mai" alo ti var a. Khumi chuan," Engmah chu awm lem love. Hriatchian kan duh mai ani" a han ti a. Khumi bawk chuan,"Misual chu ani hauhlo ang. Rin ngam tak tur niin ka hria" a han ti leh a. Thangi chuan," Uai,a zunin alo phuar ta che elo. A mak ka ti hran lo e. Nula tamtak pawh ani ve tho alwm" nui ar ar pah chuan a han ti a . Vawra chanchin chu sawi chhunzawm zelin an phur te an peih fel hnu chuan an hawng ta a. Khumi chuan amah chauh nilo,nula dang pawhin Vawra chu an lo mitmei ve tih a hriat chuan a chan mai a hlau ru hle a. Vawran nula pakhat bak a thinlungah a dah theilo tih hria se zawng alo beisei velo tur.

                      Bung-47

          Sazel ngaw chhung chu chhun engah pawh a thim deuh ruih mai a. Thinghmun thelh nuam tak niin sa chi tinreng hnuhma chu a chiar dup mai. Lungchuan val rualte pawh bûk zâr na tur remchang zawngin an kal zel a. A khat tawkin Ramar leh Vahrit ramtla an ţhawng tlan zeuh zeuh a. Ralkhata Sakhi huk thawm leh Zawngrual khek thâwm hruattur lah bo lo. Thui vaklo an kal leh hnu chuan hmun zawl nuam deuh hlekah hian an chhuak hlawl mai a. Tuichawina tur a hlat em em loh bawk avangin riahbuk sualna atan Val upate chuan an thlang ta a. Ala hma deuh avangin buk zara an buai malh malh lai chuan val upa Kawla chuan," Vawra,nang kit hmuiah buk chawhmeh tur ilo va dap dawn em ni ang. Kut awl kan tam mai mai dawn e" a rawn ti a. Vawra chuan,"Ekhai,chutia kei ber min rin ngam a thu ani ang chu. Ka va vakchhuak ve reng reng ange" tihpahin buk chawhmeh zawng tur chuan a isiamta a. Saithanga chuan ," Vawra ka zui dawn che nia. Buk pawh kan zar zo ţêp tawh tho a" alo ti a. Vawra pawh chuan hnial lemlo in Saithanga nen chuan buk chawhmeh tur zawngin an chhuak ta a.

Vawra leh Saithanga chu an buk sakna mual chu lawn liamin a piah tlang chhengchhe ve zet lam pan chuan an kal zel a. Thui fe an kal hnu chuan ralkhat aţangin awih pang laia eng sa emaw,lang sen zeuh zeuh hi an hmu ta. Saza emaw,Sakhi emaw anih ngei ringin hmanhmawh takin an pan phei a. An va hnaih ta viau maw tihah chuan an thil hmuh chu Sakhi ngei ani tih an hre thei ta a. Vawra chuan ngun takin an en a. Sakhi rai phuar , kham ko deuha kai tum,kai so silo chu a han hmu thei a. Saithanga chuan," Vawra,ka kap dawn nge i kap dawn?" a rawn ti a . Vawra chuan,"Ngawi lawk teh ,i han belchiang deuh teh ang" tihpahin Sakhi awmna lam chu a han pan ta a. Sakhi chuan Vawrate ama lam pana lokal ahmuh chuan chhak lamah kai tur chuan an bei nasa zual sauh a. Mahse a note pai a hram deuh tawh avangin a kai zo talo a. Thlang lamah lah Vawrate an awm bawk nen,beidawng tak chuan chhak lam awih panga kai tum chuan an inhai leh tak tak ţhin a. Lung ţhil a hai tla ur ur a,a tawlh thla leh ţhin a. Vawra chuan," Saia,ka Silai hi lo han vuan lawk ta che" tihpahin a Silai ken chu Saithanga hmeh bel rawkin Sakhi awmna lamah chuan a han lawn chho a. Sakhi chuan lo hlau teh mahse atan tlanchhiatna kawng awm tawh heklo le. Vawra chu alo en tawp a. A tawp nan ti niawm takin ko chhak lama kai chu a han tum leh a. A ke hmalam chu a hlang thei mai a. Mahse hnunglam erawh a hlag kai theilo thung. Vawra chuan han nangchingin Sakhi rai puar ul tawh mai chu a mawngah dawmin chhak lam koah chuan an nawr kai ta a a. Koah a kai theih chiah tihah chuan Sakhi chu baklengin a tlanchhe nghal a. Vawra chuan nui sen sen chungin a thlir liam a. A chhuk leh hnu chuan Saithanga chuan ka ho hian alo en mai a. Saithanga chuan," Vawra,Sakhi kha i man dawn emaw kalo ti mai asin. Kan sa tur kan hloh daih zu nia" alo ti a. Vawra chuan,"Man teh suh ei. A rai lai thleng thlega beisei zawng a nunrawn thlak deuh em mai. Haw teh kham ko lai khian Sathar kah tur an awmin ka ring ani. I han chho thuai teh ang" a ti sam et a. Saithanga chuan,"A rai lai sa pawh atui tho asin le. A chek han dan pawh a pangngai reng a" a ti nang nang a. Vawra chuan,"I kal thuai teh ang. Sa chek chaka tlak rual pawh inih tawhloh kha" a ti vat a. Tichuan kham ko sang lam deuha Sathar beiseiin an inzui chho ta a.

          Tlema an lawn san leh deuh hrat hnu chuan an piah lawka kham chhengchhe lai aţanga lung ţhil tla er er thawm chu an hre ta a. Uluk takin an han en a. Kham kara hnim hnah no chu Sathar rualkhat hian anlo pet mawlh mawlh mai a. Vawra chuan," Ka beisei aia kan tawn hma chu le. Pakhat ve ve in kan kap dawn nia" a han ti a. Saithanga chuan," A rai lai an awm leh awmloh chian phawt iduh em" nui chung chuan a rawn ti a. Vawra chuan,"Uluk takin han en la. A chal ki ţha zet zet mai an awm saw. Thlang lampang zawk ami saw i kap anga. Keiin tlema a chhak deuh hreta awm saw ka kap thung ang. Tlemin kal hnaih leh deuh ila,a rualin kan kap dawn nia" a han ti leh a. Tichuan tlemin Sathar awmna lamah chuan an han tawlh hnai leh deuh a. Chutah Saithanga chuan," Kah ţhelh palh a hlauhawm mange" a rawn ti a. Vawra chuan," Qn chetsawn loh chuan kan kap fuh thei mai ang. Tlemin in hnaih leh teh ang" a han ti a. Tlema an tawlh hnaih lh deuh hnu chuan an sa kah turte pawh an langchiang ta hle mai a. An rawn hmu hmasa mai ang tihpawh hlauhawm zawk tak ani. Vawra leh Saithanga chuan an chanpual ve ve chu uluk takin an han tin vang vang a. Vawilehkhatah a rualin an sai ta dur mai le. Sathar chal pahnih chu ngen mu denna avang chuan kham panga an vir thla chawi chawi mai. A rual dang chu kham pangah chuan an per darh sang sang mai a. Reiloteah chuan an bo nghal diak mai. Saithanga chuan,"Ka kap fuh nia. A tla hlawm chai chai mai" phur deuh chuan a rawn ti a. Vawra chuan,"An per bo ran zia kha i hmu em" a rawn tive thung a. Saithanga chuan," Sathar ka vawikhat kahna ani. Kham ah khan an lum thlak ţeuh kalo ring asin" a rawn ti a. Tichuan an sa kah chhar tur chuan kham hnuai lam chu an pan ta nghal a. Kham hnuai an zuk thlen chuan an sa kah ruang chu an han zawng ta a. Rei vakloah chuan kham hnuai lama an lo tlu thal der chu an zuk hmu ta a. Saithanga chuan phur tak mai hian," Vawra en teh,Kelchal tiah zet mai anni ka ti. Ka rin ai daihin an lian mai a" nui ver ver chung chuan a han ti a. Vawra chuan,"Saia,tlawmah la lo la,sa engzah nge i kah tawh reng reng?" tiin ahan zawt phawng mai a. Saithanga chuan,"Sakhi hi ka kah len ber ala ni. Ka ute hian Silai chelek an phal vaklona. Tun ţum chu ka zui char char dawn che nia. Zukchal kah ka duh ania" alo ti ham ham a. Vawra chuan aţhianpa chu hrethiam takin," Min zui peih athu ani ang chu. Kan hlawhtling ta bawka. Muangchangin buk lam i pan teh ang" a han ti a. Tichuan an sakah chu paw bahlatin an riahbuk sualna lam pan chuan an kal ta nghal a.

          Bûk an va thlen chuan khua pawh a thim dawn ruai tawh a. Pasalţha dang ram chinchang hriat tuma vak ho pawh anlo haw ve mek a. Vawra chuan an sakah lian zawk chu Saithanga put tirin hma a hruai tir a. Buk an va thlen chuan tlangvalho chuan," Ekhai,Saia,Sathar kah fuh dan te i thiam ve elo. Khawi teh kan lo chawi ang che" tihpahin an lo hlan thlak sak a. Saithanga lah pek chuan," Lasi zawl tan zawng kah remlo reng a awmlo e. Kutzungchalin kan han tina. An thal phengphung zel mai" nui huah huah chung chuan a han ti a. Pasalţha Darnama chuan," A khawi lai Lasi mahin an zawl peihlo ang che. Vawra kah sa i rawn pu haw mai mai nilo maw" nui chung chuan a han tive a. Saithanga chuan," Ka kap ngei alawm. Ka han tin vang vang a. Ka kah hma khan a lo thal hmanin ka hria" alo ti sam et a. Val upate chuan Vawra leh Saithanga chu an fak mawlh mawlh a. Saithanga chuan chutia buk sa la tu ber nih chu nuam ati em em maia. A ţhenţhaw reng mai ani. Vawrate sakah chu tlangval dang ho chuan a vun te lipin an han puah mawlh mawlh a. Zanriah chawhmeh atan an buatsaih ta nghal a. Rei vaklo an ţhut hnu chuan Vawra chu daikal turin ramngaw lamah chuan a lut phei ta a. Vawra a kal bo hlan chuan an val upate hnenah Saithang chuan,"Vawra hi Lasi a zawl ani lo maw. Vawiinah khan Sakhi rai lai kham ko a kai zolo kan hmu a. Kah ka tum laiin ani chuan a han dawm kai daih mai" a han ti sa sa a. Val upa Vuta chuan nui huah huah chungin," Khawi lam Lasi mah a zawl lo ang e. Pasalţha diktak tihdan anih chu. Pasalţha chuan an sa hmuh apiang an kap mai ngailo a. An mamawh tawk tur bak sa an la ngai heklo. A hnung i zui thei tur hi vannei inti hle ang che" alo ti a. Val upa Kawla pawh chuan,"Saia,nui liam mai mai lo hian thutak deuha awm hi tume tawh teh" nui ver ver chung hian alo ti a. Saithanga chuan,"Kei te chu nep tak kani. Vawra hi inla hrechianglo anih kha. Nual rimnaah pawh min hnial dang ziah" alo ti bai bai a. An han nui leh hak hak ţhin a. Zanriahte an eikham hnu chuan Val upate leh pasalţhate chu a tuk lama an vah chhuah dan tur rel ho in buk pakhatah chuan an ţhu khawm a. Val upate chuan Vawra chu ho hran neia vah tir ngei an tum ta a. Zan a rei tak tak hma chuan a tuk lama ramvak turte annih avangin mut zai an rel t a. Sapui iloin an buk a rawn hel loh nan an buk sir velah chuan Tuibur al te an han theh kual a,Sawhthing zai lep te an dah bawk a. A tuk lama an hmabak tur suangtuah chungin an muhil ta siai siai mai a.

         Zanlai peh hreta chuan kawl alo phe zuai zuai a,thli thaw vuk vukin khawpui a ri dur dur mai a. Bûk vela thing hnahte chu thliin a rawn chhem ri ta sung sung mai le. Lungchuan tlangvalte chu an han thochhuak sang sang a. Thlipui te alo thawh thut palh tak leh tiin an bûk zar sa chu an han tinghet leh deuh a. Reilote ah chuan ruah fang liang deuh deuh hi khat phurhin alo tla ţan ta a. Chumi hnu lawk chuan ruah tam mangkheng lo surin Rial alo tla ţuk ţuk mai bawk a. Rial chuan buk chung chu a rawn deng ri ţuk ţuk mai a. Ruah lah chu a sur duh em em mai lehnghal a. Reiloteah chuan an meipui chheh pawh a nan mit ta vek mai a. Bûk chhunga tui lo lutin tu tan mah tui taka han mut theih ni heklo le. Tlangvalte chuan an Silai hlote chu ruahin a nan huh palh mai hlauin an iptepui chu an dawm far mai a. Bûk chung lah a hming maia an zar ve anih avangin a phui lo nasa mai si a. Rial te chuan a rawn deng tlang leh zawk zawk ţhin bawk nen. Chutia rei fe a sur hnu chuan Ruah pawh chu a han ve ta a. Khawpui erawh la ri dur durin kawl tepawh ala phe zuaih zuaih a. An mutbute a huh vek avang chuan tui taka han mut ngaihna a awm tawh lemlo ani. Buk pawnah lah chuan rial la tuiral lo chu alo darh var suau mai a. Tlangvalte chuan meipui chu chheh ţhat tumin an meitalh chu an han talh ri leh khak khak ţhin a. Rei ngial an beih hnu chuan mei pawh an nun leh thei tawh a. Thing pum te chu ek phelin an han thel hil zung zung a. Meiah chuan an han vawmlut zel a. Meipui a alh leh hluah hluah takah chuan Tlangvalte chuan an puan ven hem hul pahin meipui chu an hual ţhap mai a. Sawmli rual lai annih avangin meipui pawh hmunli laiah an chhep a. Beiseiloh tak maia ruahin anan tak hrepah chuan Meipui hnaihah chuan an in hem khu rem rum mai ani. Bûk chhung a huh vek avang chuan ţhenkhatin a lei chung lang hnawng deuh chu anlo rit khawk mawlh mawlh a. Men khawvar ngaihna awmheklo le. Huh deuh chuap chung chuan mut hmun chu an rem leh ta a.

         A tuk zing khua alo var chuan Lungchuan tlangvalho chu Tukţhuan tur buatsaihin an phu leh sang sang tawh a. Zan lam ruahsur chuan tlang leh mualte chu a bual fai vek ni awm tak hian a lang fai nghulh mai a. Ni zung engmawi tak hnuaiah chuan thinghnahte chu rangkachak phochhuah ang maiin an lang de sep sep mai a. Tlang leh mual romeiin a bawm chuai ţhinte pawh chu fiah takin a lang hring nghulh tawh a. Tlangte chuan chhumpui a chhipchhuan deuh lurh mai bawk nen. Nungcha tinrengte pawhin chu ni thar chu an lawm a. Hram thiam va tinrengte pawh hlim takin an ţe chelchul mai ani. Lungchuan val upa leh Pasalţhate chu zan lama ruahsur nghek avang chuan hlawhchham palh hlau takin an vah chhuah dan tur an sawi ho nak nak a. Tukţhuante an eikham hnu chuan Val upate chuan tlangvalte chu hmun ngaah ţhenin an vahna mual tur ţheuh chu an sem ta a. Val upate chuan fimkhur tur leh sa lian thamah chauh thal thlah turin an inchah mawlh mawlh a. Val upate chuan Vawra chu ho hran neih tirin Saithanga leh tlangval dang pahnih in zuiin an riahbûk hmar lam ngawah chuan an vak dawn ani. An vah dan turte an sawi zawh hnu chuan Bùk nghak tur tleirawl deuh paruk dahin midang zawng chuan an vahna tur mual ţheuh chu an pan ta a.

         Vawrate chu an riahbuk hmar lamah chuan uluk taka sahnu chhui chungin an vak phei zel a. Vawra leh Saithanga chauh chuan Silai an keng a. Chhun lai thlenga an vah hnu pawh chuan duhthusama ţha sahniak han chhui zui tur an la hmu hauhlo mai a. Chutia sa hnu chhuia an an kal bek bek lai chuan Vawra chuan Sazuk rual khat hnu hi a la fuh ta hlauh mai le. Vawra chuan a ţhiante chu an au khawm a. An vai mai chuan Sazuk hniak chu an chhui ta a. An chhui ţanna mual an pelh hnu mual dang nena a infinna hmun zawl deuh laiah chuan thawm ri leh rak rak ţhin hi an hre ta a. Vawra chuan an Sa chhui chu an hnaih tawh hle tih hriain Silai kenglo tlangval pahnih chu lo din tirin Saithanga nen chuam thawm lo chhuahna lam chu an pan ta a. Thawm lo chhuahna lai an va hnaih viau tawh tihah chuan anmahni hnaih deuh tak maia Zukchal,a ki pawh zar ţha ve panngai tawh tak mai luang no lo pet zat zat chu an va hmu ta a. A piah deuhah chuan Sazuk dang pawh an awm ve a. Mahse an va hnaih chilh lutuk chuan an tih tlan palh a hlauh avangin Vawra chuan a ţhianpa chu Zukchal kap tur chuan an zaizir ta a. Saithanga chuan mak tih hmel tak hian kah pawh tum lemlo in Vawra chu a rawn en ho mai a. Vawra hmanhmawh lutuk,Sazuk te an tlan palh mai ang tih hlau bawk si chuan Saithanga zaizir pah chuan ri loa hmui phunin," Kap vat rawh" an ti a. Saithanga phur lutuk,chutianga sa lian la hmu ngai heklo chua kut te a sai ta dar dar mai a. Kah ţhelh hlau tak chung chuan an tin vang vang a. A thawri te chu a ri hulh hulh ni hian a hria a. A kut a la khur zui bawn nen. Uluk thei ang ber chuan an tin a,a kap ta dur mai le. Sazuk chu a zuang zawka,a tlan leh ta daih mai le. Sazuk dang lo awmve tepawh chu an lim nghal puat puat a. Saithanga leg Vawra chu an tlan phei nghal vat a. Thisen chu alo baw ve nuai a,mahse a Sazuk ber a tlu silo a. Saithanga chuan," Vawra,nangman kap mai la chuan kan chhuah lo tur hi nia. Khatianga sa lian tham kha ramah kala hmu ngai miahlo a. Ka kut te a khur vek alawm" pawi tih hmel tak hian a rawn ti a. Vawra chuan," Saia,kan la chhuah hlei nem. Hei i kapfuh tih a chiang alawm,a thisen te abuak nuaih hi . Thui akal tawp lo ang. Kan chhuizui anga. Kan kap leh mai dawn alawm" tiin alo hnem a. An ţhiante anlo thlen hnu chuan thil awmzia te hrilhin Sazuk hnu chu an chhui leh ta a.

         Ni tlak dawn ruai thlenga an chhui hnu pawh chuan Sazuk hliam chu an la hmu phak hauhlo mai a. Saithanga beidawng tawh lutuk chuan," Vawra,ilo kap mai lo nia aw. Lo kap la zawng a thi ngei awm sia" a han ti leh ţhin a. Vawra lah chuan," Ngawi reng khan chhui vat vat la nimai. Kan man pha ţep ania" alo ti mai zel a. Thui vaklo an kal leh hnu chuan thisen thar lam deuh hi alo baw nuaiha. Vawra chuan," A chau tawh hle ni hi. A bawk zeuh zeuh ta mai. Kan man thei ţep tawh ang. I hmanhmawh ang u. Kan thawm hriain ala kal ţawk ţawk anih hi" a han ti a. Hmanhmawh tak chuan an kal zel a. Saithanga thil ngaihtuah muk lutuk chu lei nalah chuan an tawlh leh zauh ţhin a. Thui fe an kal leh hnu chuan Zukchal chau tawh tak mai chuan a hliam chu kal pui zo tawhlo in Ţhang hmunah hian alo bawk tawp mai a. Ama lam pana lo kal mek Vawrate chu alo en hru hru a,a ka aţang chuan chilthli a tla duah duah tawh a. A beng te chu alo la vai ve lap lap a. An hnaih deuh hnu chuan Vawra chuan,"Le Saia,han kap hlum tawh ta che. Na tawrh rei tir tur ani ngailo e" a han ti a. Saithanga chuan phur tak mai hian Sazuk hliam kal thei tawhlo chu an kap leh dur mai a. Sazuk pawh chu a chatthla zui ve nghal a. Vawra chuan," Saia,hlado han chham ta che" a han ti a. Saithanga chuan Sazuk chu a ke a rapin,

"Hreu Ngen e,phai kip tlan e,

Tlang nem kal mawi fungki ţial e,

Lung thulh e,lo var pam e,

Thlang pai e,buan bang ari ngai e,."

A han ti vang vang a. Chutah Vawra chuan silai alo kap puak dur mai a. Saithanga chu a ding ngaiin ala ding reng a. A mittui a sur zung zung mai a. Vawra chuan nui tet tet chung hian," Kan pasalţha chu Sazuk hmulin i kehphah chang zet kha a lo chhun na emaw ni chu. In ţah tak kuang kuang mai" alo ti. Saithanga chuan Vawra rawn en pah chuan," Vawra,ka lawm e. Nang awmlo la chuan hetiang sa liantham hi ka kap hauhlo ang" a rawn ti a. Vawra chuan," Leh mai mai ţhin a. Hrilkhumi kianga Sazuk ruang chungah pawh i zun ngaiin Saithanga a ţap e" ka ti mai tur sin" nui chung chuan a rawn ti a. Saithanga chuan,"Tunah chuan Silai ka pu chhuak ve ziah tawh ang. Ka zui ngun viau dawn che nia" hlim hmel tak chuan a rawn ti a. Vawra chuan," I uten an phal ngut ange maw chu. Tunah chuan Zukchal ki nen nula i lem thei tawh anga. I to sawt dawn zu nia" ahan ti leh a. Tichuan hlim takin Zukchal sa chu an chandarha,an pali maia han ken zawh thu awm heklo le. Bûk lamah tlangval pahnih chu midang pun turin an han kal vang vang a. An lo kir leh hnu chuan Zukchal sa chu phurin hlim takin buk lam chu an pan ta a. pali maia han ken zawh thu awm heklo le. Bûk lamah tlangval pahnih chu midang pun turin an han kal vang vang a. An lo kir leh hnu chuan Zukchal sa chu phurin hlim takin buk lam chu an pan ta a. Bûk an va thlen hnu chuan Saithanga chu a khi vun vun reng mai a. Tlangval dangho chuan an fiam zui bawrh bawrh a. Saithanga Sazuk kah chu an hlim pui em em a. Amah lah alo phawk ve bawk nen. An nui ham ham reng mai a. Val upate pawh chuan an han fak vel ţhin a. Saithanga erawh chuan a thinlung takin Vawra chu a ngaisangin a zah ru em em thunga. Engmah hrelo ang maia a awm theite chu mak ati em em a. Mahni hmasial hauhlo a atan a kah rem zawk an kian duh maite kha mak a ti em em ani.

           Zan hnih dang an riah leh hnu chuan sa pawh an kap nual tawh a. Mahse an tum anga sa lian tham erawh kah tur an hmu mai lo a. Ruah a sur ve zeuh zeuh avangin ramvah a hahthlakin sahnu chhui a ti har duh viau mai lehnghal. An vah tawp ber ni turah chuan Vawra leh Saithanga bakah tlangval dang pali lai mai chu ngaw hnuaiah chuan Sahnu chhuiin an vak kual leh ţan tawh a. Vawra chu mahni chauha kal hrangin a ţhiante vah lo na lam mualah chuan sahnu thar zawngin a kal zel a. Chawhnu her bawihah chuan Nghalrual hniak chiar dup kara hniak lian fal bik nalh mai chu a hmu ta hlauh mai a. An emchian nak chuan Nghalchang hniak ngei niin a hre ta a. A la thar deuh avang chuan a tawnfuh tak mialin tihthuah an chhui ta zel a. Mual hnih vel a kal liam leh hnu chuan ni pawh a thlang her bawih tawh a. A Nghalchang hnu chhui pawh a hnai hle tawh tih hriat tak hian a pang thak a nawhna thinga tuithli luang ngaih ngaih tepawh a hmu ta zeuh zeuh mai a. Chutia fimkhur tak mai a a chhui phei zel hnu chuan a sa hnu chhui chua a hniak a thlepin a hnu rulchuk ta tlat mai. Vawra chuan fimkhur angai tih hriain a a Chempui chu an phawrh a.. Fimkhur taka sa hniak chhuahn lai a zawn mek lai chuan vawilehkhatah Luang buk hnuai aţanga chuan Nghalchang lian zet mai hian hawk hrut hrut chung hian Vawra chu a rawn phin phei ta thut mai le. Vawra chu alo zuang sawn dawrh a. Mahse Nghalchang chuan a chawn a tai thler duai hman tho mai. Thlang lam awih pangah chuan a tawlh thla hret a. Ranga taka tho leh nghalin ama lam pana Nghalchang lo dawk thla leh zawk chu alo sat siah mai a. A vanduai ni tur nge,Nghalchang vunpui chu a sat chat pha ţawk ani. Nghalchang chuan a ke a lei phiat zauh zauh in Vawra chu rawn beih leh nghal tumin a rawn lim phei leh puat a. Chutah erawh pasalţha ţuan chu ramsa ţuan chuan a pha talo. Silai a puak dur a,Nghalchang chu a ngek ţhawta,a tlan liam zui nghal a. Vawra chuan a chawn hliam pawh ngaihtuah lemlo in Silai hlo an sawh leh mawlh mawlh a. Silaimu te a thun fel leh hnu chuan Nghalchang hliam chu a chhui leh ta a. Thisen chu a baw phei zul mai a. Thui vaklo a chhui phei leh hnu chuan kawrkama lungpui ngheng hian Vawra hnungchhawn zawngin Nghalchang chu alo uipui ţhut vung mai a. Vawra chuan an thlek deuh vang vang a. Nghalchang chu a che tawh hauhlo mai a. Vawra chuan a thi chiang nge chianglo tih fiah nan lung lian vaklo hian an vawm ri kuk mai le. Nghalchang chu a che sawn chuang lem hleilo a. Silaimu a ren ve deuh avangin a Chempui chu phawrhin Nghalchang awmna lam chu ava pan phei ta a. A va enchian nak chuan Nghalchang chu alo thi fel der tawh a. Vawra kha a dar hmalam akapin a kawchhung hawrh zawngin Silai mu chu alo kal hi ani. Vawra chuan Nghalchang chu kaithluin a paw rim anam loh nan a til bawr chu an hlep nghal a. Nghalchang chu an teh kual thuak thuak a. Sumsarih zet mai hi alo ni a. A ngho veilam hi a chanbe velah a bung tawh nghe nghe a. Nghalchang dar vun chhah laiah chuan Silai mu hi alo tang tut mai bawk a. Vawra chuan a rilru tete in chu Nghalchang chu midangin anlo hliam tawh ngei ani tih a ring nghal mai. Amah maia a put zawh dawnloh avangin a sa kah chu an chhawl chhin leh tete a. A ţhiante pun turin a kal ta nghal a. Thui pawh a kal hma chuan Saithanga leh tlangval panga lai mai chu alam panin anlo kuk phei chuah chuah mai a. Vawra chuan lo chhawn vatin an lo thlen phei hun chu alo nghak a. Saithangate anlo thlen chuan Saithanga chuan," Vawra,kap lian bawk em" a rawn ti a. Vawra chuan," Nghalrual sumthum vel lek hian min rawn nawr min rawm nawr a,kan kap thawr mai anih kha maw. A puma in hmuh duh takin ka tia kalo nghak che u" alo ti a. Saithanga chuan," Awihawmloh lutuk mai. Khawnge i sa kah pawh chu" a lo ti thuai a. Vawra chuan a sa kahna lamah chuan a kalpui ta a. An va thlen chuan Saithanga leh tlangval dangte chuan Nghalchang chu lian an ti em em mai a. An teh kual chhen mai ani. Saithanga chuan," Hei hi maw sumthum lek chu. I sum ava lian awm ve. Ka sum sarih lai anih hi. Nghalphusen an sawi fo pawh hi hei ai hi chuan a lian tam pui lovang. A ngho ţha zawk hi han en la. Tawng a phaklohna chu tlemte ani" tiin Vawra sa kah chu an fak a. Vawra chuan a ke hliam tuam mawlh mawlh pah chuan," Min lo nawr hlum ţhelh alawm. A fing zek mai lehnghal. Ka chesual lo chauh ani" a han ti a. Saithanga chuan," Anih tak kha mawle. I vanneih ni ani ange" alo tive mai a. Tichuan Nghalchang sum sarih zet mai chu ţhian dang pun belh lova zawn phei mai an tum ta a. A ke hmalam pahnih leh hnunglam pahnih te chu an ţawn kawp ve ve a. Thingtuai rawlh tlangin a hma lamah tlangval pathum an ţanga,a hnung lamah tlangval pathum bawk. Tichuan rit ti deuh chung si chuan an zawn phei ta a. Vawra chuan a ţhiante iptepui leh an Silaite chu a keng ve thung a. An rin ai daiha alo rih avang chuan an chawl phei chhen mai a. Midang pun erawh an tum bau lo. Kalkawgah chuan Saithanga chuan," Vawra,nagmahin pu mai la chuan kan hahdam ni mai tur hi nia" nui ţhaw chung chuan a rawn ti a. Vawra chuan," Nula nise zawng kha aia lian pawh kan pu zo mahna" alo ti sam et a. Hah viau e tilo chuan an nui ho leh dar dar ţhin a. Muangchanga zawn phei zelin zanriah ei hun velah chuan buk chu an thlenpui thei ta ţawk mai.

          Buk an va thlen chuan an hlim dar dar hle mai a. Saithanga leh tlangval dang Nghalchang zawntute chu chauh luat avangin zah pawh sawiloin an mu thal uau uau a,an thaw hlawp hlawp mai a. Val upate chuan an lo zilh mawlh mawlh a. Val upa Vuta chuan,"Hei zet zawng,an sawi Nghalphusen ai pawhin a te tampui lovang. Ka Nghalchang hmuh tawha la lian ber ani. Vawra nge nge,innghahna tlak ila nih dawn hi" a han ti a. Vawra chuan,"Mi kah hliam sa ka va tawng fuh mai mai alawm. Min vawrh nek leh nghal" a han ti a. Midangho pawh chuan Vawra chu an han fak sap sap a. Val upate chuan Sa lian tham an kah ni chuan buk lama awmte pun mai ţhin turin an han chah mawlh mawlh a. Saithanga lah pek chuan," A zawn haw tu ni in chak ve vang maia. A rit pawh a ti nek love" nui ţhaw chung chuan a han ti a. Vawra chuan,"Khaih khaih khaih,kalkawngah i phun char char kha aw" alo ti thuai a. An han nui leh dar dar ţhin a. Tichuan Nghalchang sa chu an han rep far thluah thluah a. A tuk maia haw tur annih avangin ţhenkhatin Bawmrangte anlo tah ve thung a. Zanriahte puar taka an kil hnu chuan sarepte ur ţha lehin mut zai an rel ta a. Atuk khua alo var chuan hma takah thoin tukţhuan tur an buatsaih sang sang a. Tukţhuan ei khamah chuan hlim takin khaw lam pan turin an kal chhuak ta a.

          Lungchuan lamah ve thung chuan lal fapa Vanzika chu lal fanu hmelţha hmingthang Sialsawmpari , Lungsum lal Lalchungnunga fanu rim tur chuan alo inbuatsaih ve mek a. An zinna tur hi a hlat deuh avang leh khaw hran hran lal fapate pawh Sialsawmpari beiseia an kal ve dawn avangin an inbuatsaih uluk hle mai a. An khaw buanchak leh an khaw fiamthu thiam bakah pasalţha dangte nena kal chu an tum ta a. Vanzika hian Vawra telve a phut deuh tlat avang leh pasalţha ţhenkhat ramchhuak ve te pawh an kal angaih avangin Vawrate ramchhuak haw hun chu anlo nghak deuha. Vanzika hian Lungsum lal fanu hi vawikhat lo va rim tawhin a hmel duhzawng tak mai ani a. Tun ţumah hi chuan va sawi rem paha in en chianna neih pui theih mai a beisei tawh ani. Sialsawmpari hi nula hmelţha leh tlawntlai ţha zet mai hi ani a. A hmelţhatna chu pangpar mawi chitinreng nena khaikhin ani fo ţhin ani.

                       Bung-48

        Ni kawlah a liam fel awrh tihah chuan Lungchuan val rualte chu an khaw kawtchhuaha an ngir khup tawh mai a. Tlema a hnukhawi deuh te nghah pah chuan Vaibel an pak khu tual tual mai a. Ţhenkhatin tuisik anlo in khawlh khawlh bawk a. Val upa Vuta chuan,"Vawiin zawng,nauten Hlado han chham hmasa sela. Saithanga khan bul han ţan sela mawle" a rawn ti a. Chutah Saithanga chuan phur fe hian," Chutiang anih ahnu khawnge hma chu kan hruai poh ani ang chu" tihpahin a rawn pen chhuak a. Lungdawh pakhata a ke nghat chungin a Silai chu an lekkawh va mai a. Chutah ring leng lawng hian,

"Hreu ngen e,phai kip tlan e

Tlang nem kal mawi fungki ţial e,

Lungthulh e,lo var pam e,

Thlangpai e,buan ban aringai e"

A han ti vang vang a. Chutah Silai ken chu van lam hawiin an kap puak dur a. Midangho chuan lo zawm ve nghalin silai chu an awn dut dut mai le. Silai ri a reh fel chiah tihah chuan val upa Vuta chuan,

"Kawlrawn e,changse lian e

Hreungen,Bualdim kimna hlah maw,

Khuanun e i tuah se law

Hmingţha vuitum si leh pei e"

A han ti ve leh vang vang a. Silai chu an awn leh dut dut a. Tichuan hlim takin khaw lam pan chuan an kal leh ta a. Khua an va thlen chuan Naupang rual salu zawn tumte chu an lo tlan phei sup sup a. Val upate chuan Salu chu zawn tirin lal thupeka ramchhuak annih avangin lal mual lam chu an pan ta a. Khaw mipui hlado chham ri hria apiang chuan lal mual lam chu an rawn pan khawm zel a. Lal mualah chuan mipui an pung khawm tuau mai a. Lal leh upate pawh leikapuiah chuan an ding vang tawh a. Ramchhuakte sakah lu chu tual laiah chuan dah khawmin an hual tuau mai bawk a. Nulate chuan an tlangvalte chhawlhal dawm nan tiin tuisik bakah ţhenkhat chuan zu tuitlingte an lo tulh ve mek bawk a. Vawra chu tleirawlte pakhat hian mau thei hian tuisik a rawn pe ve a. Vawra chuan," Ka lawm e. Hah a dam sawng sawng mai. Nula fel tak ini" alo tisap a. Tleirawlte chu a nui sen senna,a kal ve leh mai a. Val upaten an ramchhuah chanchin mipui hriat tura an sawi lai mek chuan Saithanga chuan an lal fanu Ngurpuii awmna lam hawi pah chuan," Vawra enteh,kan lal fanu sawn min rawn zai leh ţhin niin ka hria. Thim zingah pawh sawn a paw heu mai ka ti" a rawn ti sa sa a. Vawra pawh chuan lal fanu awmna lam chu an hawi phei a. Lal fanu Ngurpuii chu alo nui sen sen mai le. Vawra chuan," Anih tak saw mawle. Saia,chhuah hauh suh ang che. Enteh saw,a rawn nuih sen sen che nia. A heh te lah chul zozam ang maia senno zuk ni a mawle" a han ti a. Saia chuan amah a en emaw tiin," Chheiraw,Tumpang ka kah niah phei zawng ,an zu tui tling nen minlo hmuak tawh ngei ang" a han ti leh a . Vawra chuan," Duh tawk rih teh. Hrilkhumi lai itina zo ange" a han tifiama. Saithanga chuan,"A ni tak e. Lal nula meuh zawng kan chhai ngam leh tak tak awm silo a" a lo tive mai bawk a. Val upaten thu an sawi zawh chuan lal chuan thu tlem ahan sawi leh a. Ramchhuakte sa phurh chu sem rualin mahni in lamah an haw leh ta ţheuh a. Vawra pawhin a Nghalchang kah lu zawntu naupangte chu a zui hawng a. In an zuk thlen chuan a chhungte chu anlo awm kim ţhap tawh a. Vawra phurte chu lo hlan thlaksakin chhawlh hal dawm nan zufangte an lo chhawp sak bawk a. Vawmaia chuan a nau sakah lu tuai vut vut pah chuan," Vawra,engtia i kah ţhin bik nge ni. A ngho te lah a sei narawh e" alo ti var a. Vawra chuan a sa kah dante chu an sawi zung zung a. Midang sa lu lawm tur anlo kal tak tak hmain zanriahte an han kil hmasa a. Zanriah ei khamah chuan Salu lawm tur an lo luh zut tawh avangin Vawra pawh lengchhuak lemloin kil khatah a ţhu ve ran mai . A mawi tawk vel a ţhut hnu chuan Zawlbuk lama kai turin a chhuak ta a.

          Zawlbuk ahan thlen chuan tlangval ţhenkhat la nau deuh leh Val upate an lo awm a. Vawran Bawhbel a rawn bawh liam an han hmuh chuan val upa pakhat chuan," E Khai,kan pasalţha lah ni rengin. Lengi runah i lawi ang chu tih naklaia" alo tivar a. Vawra chuan," Keini ang bel vala val ve mai mai tan zawng nula mitmei hmuh a har deuh ani ange. Zawlbukah hian mawng paw hrutin tawlh tawlh ila ani mai e" a han ti a. Meipui hnaih deuhah chuan an ţhu ve a. Val upate chuan titi hrang hrang an han chhep a. A chang leh annui ho leh dar dar ţhim bawk a. Val upa Khama chuan," Tita daih ila. Kan lal fapa nupui tur Sialsawmpari an tih hi hmuh achakawm narawh e. A hmelţhatzia hlir mai hi an sawi a" a rawn ti chhuak phawng mai a. Val upa pakhat chuan," Nupui tur han tih ngawt theih chi chu ala nilo nanga . Kan vangkhuaah zawng a rawn lawilut ngei dawn anih hmel a. Kan lal fanu Ngurpuii nen kan khua zawng an mawi dawn mange" a rawn tive a. Val upa Vuta chuan,"Lungsum lal hi a zaidam tehchiamlo ani awm a. A thinthawk thut hian a mikhualte pawh a vaw darh fo ani awm e. Kan lal hian afapa zui ve turin min ti ngei mai a . Ka phur tehchiamlo mai ka ti" a rawn ti a. Chutah Val upa Khuma bawk chuan," Nia,an sawi ţhin tak kha maw. An khua pawh a ropuiin an ni thlah ho saw an hrohrang a ţha angreng a . Biak thiam viau chu an ngai dawn ani. Va fimkhur viau ula a ţha ange. Naktip mai khian in chhuah hmel a. A ţha lam kan beisei phawt ani ang chu" a rawn ti leh a. Chutih lai tak chuan Saithanga chuan Zawlbuk bawhbel a rawn bawh liam ve chiah a. Vawra meipui hnungpuaka lo ţhu hnur a han hmuh chuan ring leng lawng hian," Hetah ilo awmreng ani maw. Nula rim nachangte hi hre ve teh. Hlauh nei apui hi i anga" a rawn ti bawrh bawrh a. Vawra chuan,"Zanin chu i va duhtawk hma ve. Mitmei i hmu ţha vak nage" alo ti thuai a. Saithanga chuan," Hmu ţha teh suh ei. Khawnge i ţhianpa Vawra tih hlir mawle. Ka tui tawh nek love" a rawn ti nang nang a. Midangho chu anlo nui dar dar a. Zan te a rei tak deuhah chuan mut zai an rel ta a.

           Lal in leikapuiah chuan lal fanu hmelţha Ngurpuii chu sal nula pahnih hian a Hrik anlo vam sak mawlh mawlh mai a. Ngurpuii lah chu a mawi leh mawilo pawh ngaihtuahlo hian a lu an khawih avanga nuam ti mutchhuak chu alo muthlu lawp lawp mai a. A mutchhuak insumzo hek lo le. Vawi khat phei chu a thal ţep hial a,sal nulate chuan lo dawm hman lo se zawng a lu chu leikapui chhuatah chuan a vaw chawrh ngei ang. Chutiang taka amut an chhuak mai chu amah pawh a nuih a za letling ni ngei tur ani. A sal nulate nen chuan anla nui ho dar dar a. Chutih lai chuan lal fanu Ngurpuii chuan amah nui sanga lo thlirtu tlangval hmelţha leh hleitling zet,zan hmasa lama ramchhuak lo haw te zinga a mit la em em tu chu a hmu ta hlauh mai le. A zak lutuk ai chhe bawksi chuan a sal nulate chu an chum taih taih a,a kun ta daih mai a. Mahse a tlangval duhzawng tak mai chu a kun san reng thei biklo,a khat tawk chuan a rawn dak chhuak ve zeuh zeuh ţhin a.. Vawra lah chuan lal fanu hmelţha chutianga han lai chhe vel chu hmuhnawm a ti phian mai a. Mahse rei ding khawmuang ta lo chuan inchhung lamah aluh san ta a.

           Vawra lal ina ahan luh chuan Lal leh a upate bakah a pasalţhate leh val upate chu anlo awm ţhap mai a. Lal fapa Vanzika pawh kilkhatah chuan alo ţhu kar bawk a. Vawra lo lut ahan hmuh chuan lal Vankhupa chuan," Ekhai,Vawra kan lo nghak reng tawh che asin . A remchang lai laiah khan lo ţhu teh khai" alo tivar a . Vawra chuan," Lal pa,ka rawn tlai avangin min ngaidam dawn nia" tiin thupha a han chawi a. Lal chuan," Khaih khaih khaih,engmah kan lo sawi hman chuanglo e. A hun takah i lo thleng ani" alo ti thuai a. Midang sawm bika awmte an lo thlen kim hnu chuan lal chuan an inkohkhawm chhan zawng zawng chu an sawi ta a. Lal Vankhupa chuan,"Awle hei ka fapa nupui tur a ţha leh ţhalo tur ngaihtuah chunghangah ka mi rin deuh deuh ka han ko khawm che u ani a. Naktukah hian Lungsum khaw lamah ka fapa hi in va ţawiawm dawn ani. Ka fapa nupui apiang hi in lalnu tur anih dawn avangin uluk taka va thlithlai turin ka ngen duh che u a. In va kal hunah chuan Lungsum lal fanu chu a hriselna a ţha leh ţhatlohte. Mi nunchhe tak leh mahni nihna hmachhuana midang chaldelh ching anih leh nihloh te. Kutkem nei ani em tihte,a taksaah kutchuk engemaw a awm leh awmloh thlengin en ula ka duh ani. Tin,a ram kalnaah te zui ru in a thingfak a intiah leh tiahloh te, a zaidam leh zaidamloh te in en thla anga. A la deh a dik leh diklohte ,a kut a dik leh diklohte pawh in en fel tur ani. Tunah chuan engkim kan sawi rihlo anga. Ka upaten kalkawngah in tihtur ţheuh an tuk dawn che u a. Nangni pawhin kan upate thupek chu ka thupek ani tih hriain in zawm hram hram tur ani" a han ti dap dap a. Lal bawk chuan,"Ka fapa hi in venhimna hnuaia kal tur ani a. Thil ţhalo ber athleng ta anih pawhin min venhimsak hram turin ka ngen che u ani. Ka upate pawhin sawi tur anneih ka ring a . Han sawi ve sela" a han ti a. Upa Bualthanga chuan,"Kan va kalna tur khua hi kan khua ai maha lian zawk hi ani a. Khualkai khawp pasalţha pawh an kawl nual mai. Tin an lal hi thin butut nei ani a. Kan tlangvalte pawh in ţawngkam leh cheziaah in fimkhur hle angai dawn ani. Tin khawdang lal fapa tepawhin kan nula beisei hi an rawn ngaihven ve tho dawn a. Chuvangin khua leh khua in hmelmakna thlen thei thil lakah in va fimkhur hle dawn nia. Infiam hunah chuan infiammi thinlung puin in bei anga,in nunna atana beih aţul anih pawhin huaisen takin in bei tur ani" a han ti a . Upa dang ho pawh chuan an thil hriat ang ang leh a pawimawh tur anga an ngaihte chu an han sawi ve a. A tawpah chuan lal chuan,"Awle,thil pawimawh tur ang ang chu kan inhrilhhriat tawh a. Tunah chuan in kal thei tawh ang. Naktuk zing varţianah lal mualah in nghah khawm tur ani a . Tumah tlai bik nih tumloh tur ani" a han ti a . Midang an chhuah deuh vek hnu chuan lal chuan Vawra chu la awm hnufual rih tura atih avangin Vawra chu lal inah chuan ala ţhu khaw muang rih a. Lal chuan," Vawra,hei mi sawi ka hriat aţang leh mit ngeia hmutute ka ngei aţanga ka hriat danin pasalţha huaisen tak ini a. Tun ţuma ka fapa zui tura ka ruat chhan che chu a kaihza veng zo ber tura ka ngaih vang che ani. Ka pasalţha dangte hi an huaisen lo ka tihna anilo a. Mahse ka fapa hian engpawh lo tawk sela,him taka ka hnen minlo thlensak leh ngei turin ka duh che ani" a han ti ta dap dap mai le. Vawra chuan," Lal pa,midang laka chungnun bikna nei ka nilo a. A chhe ber thleng kan lo tawk ta anih pawhin i fapa chu i hnen kalo hruai thleng leh ngei ngei ang. Ka thei talo anih erawh chuan kei ngei pawh hi lo let tur ka awm dawnlo tihna ani" a han tive a. Lal chuan,"Mihring tih theih bak thil chu a awm tehmeuh mai a. Chung aliam chu ti turin ka phut lo che a. Mahse theihtawp chu min va chhuah sak dawn nia" a han ti a. Vawra pawh chuan theihtawp chhuah intiamin lal in chu a chhuahsan ta a.

          Chhun lamah chuan Vawra chuan awm mai mai aiah tiin daihnai ngawah Arbawm ilo tahna tur Rawnal tuai put tumin a chhuak ta a. Silai pawh keng lemlo chuan Sairawkherh chu run dalah a keng ve ta mai mai a. A mau putna tur hmun ava thlen chuan mau hmun zawlah hian Vahrit rual hi anlo tla sap sap mai a. Vawra chuan dimtea veh pheiin a Vahrit pachal pakhat chu an perh thal tawp mai a. A Sairawkherh chu kuai bial leh nghal pawin Vahrit patuai tlan liam tur pakhat chu an perh thlu leh hman hram a. Vahrit dang chu an mawng phe pawh hmuh tur a awm tawhlo. Vawra chuan hlawhtling inti takin a Vahrit perh thlukte chu a iptepuiah chuan an thun a. A duhang tawk mau no a sah hnu chuan hlai awlsam turin an phel a,a dil te thel faiin awlsam taka hnanga hlai mai theih tura siam zawh hnu chuan khaw lam panin a kal ta nghal a. An khaw kawtchhuah ava thlen chuan mi ramkal ţhenkhat pawh anlo chawl ve a. Kawtchhuah sir lam deuhah chuan hmeichhe tleirawl pakhat leh a nau ni awm tak hi midang ţhutna laiah pawh ţhu ngam velo chuan an lo ţhu dun a. An lo titi ve malh malh a. Vawra chuan tleirawlte hmel a han en chuan aţhiannu Vantei a hrechhuak zawk mai a. Tleirawlte chawlhna lamah chuan pheiin an kiangah chuan ava ţhu ta a. Tleirawlte leh anau chuan Vawra chu an lo en leh zauh zauh ţhin a. An kianga a rawn ţhut meuh chuan melh pawh an melh ngam tawhlo a. Vawra chuan hmeichhe tleirawl hnenah chuan," Nula loah in feh em ni. In va chau awm ve" a han ti a. Tleirawlte chuan,"Kan chul hlui lamah chawhmeh zawngin ka nau nen hian kan kal a. Kan han ţhu chawl ve rih ani" alo ti mai a. Vawra chuan," Vawra ka ni a,kan khuaah hian kan awmna ala rei vaklo a. In hmingte min hrilh thei em" ahan ti a. Tleirawlte chuan,"Nubawihi ka ni a. Ka nau hi Thandanga ani. Veng mawng lamah ka nu hoin kan awm a" zak tih hriat tak chuan ahan ti a. Vawra chuan biak tlangnel hram hram an tum a. An thlawhhma chungchangte leh an chhungkaw chanchinte an zawt zel a. Nubawihi te unau pawh chuan chuti tak mai a an khaw pasalţhain an biak mawlh mawlh takah chuan an tlangnel ve ta sawt a. Vawra chuan a Vahrit chal perh thluk chu phawrhin," Hei Vahrit chal ka perh thlu hlauh mai a. Pahnih lai ani lehnghal a. Hei hi lo hawn ve rawh u" tihpahin Nubawihi em phurhah chuan an thun ta mai a. Nubawihi chuan," U Vawr, angailo e . Nangman hawn zawk rawh" tiin Vawra chu pek kir leh an tum a. Thandanga chuan Vahrit chu lo la vatin," U Vawr,avan lian ve. Kan lawm lutuk aw" a han ti reuh a. Nubawihi chuan anau chu an hau ve deuh a. Vawra chuan," Nubawih,in thlahrunna tur a awm miahlo nia. Zan lamah in inah kalo leng ange. I haw tawh ang u" a han ti a. Tichuan an haw rual ta a. Kawtchhuah a lo chawl ve te chuan Vawra ngilneihzia chu mak an tiin an ngaisang em em a. Vawrate kal liam hnu chuan Vawra chanchin chu an sawi sap sap a. Kalkawngah chuan Vawra chu a ngaihtuahna a kal din hle mai a. A ţhian Vantei ,Vanzaua leh Zalawma te an ngaihtuaha. An chanchin engmah hrelo a awm leh anmahni ngaihven zui talo a a awm chu a inthiamlo ta em em mai a. Tunah hian mi salah hrehawm taka awmin tlanchhuaktu tur pawh neiloin an awm pawh ani thei a. Vanzaua kha chu Hliappui lamah a kal ngei a. Mahse midang chanchin kha a hrezui ta silo. Amah leh amah chu a inthiamlo ngawih ngawih mai a. A chhungte chanchin ngawt ngaihtuaha a buai maite chu a inchhir rum rum a. Remchang hmasa bera a ţhiante zawng tura kal ngei chu a tum ta bur ma ani.

          Zanriah ei khamah chuan Vawra chu a tuk maia an lal fapa zui tur anih avang chuan kalkawnga a mamawh tur ang ang te chu a han lakhaw a. A inpeih fel hnu chuan Nubawihite in lama va len zawk chu a tum ta a. Kalkawnga ami tawhte chu Nubawihi te in awmna an zawt phei zel a. A tawpah chuan veng hmawra in tereuhte lo ding laih chu a han hmu thei a. Pawna ţang chuan ," In awm em?" a han ti a. Inchhung aţang chuan,"Awm e,lo leng rawh u" tiin an lo chhawn a. Inchhunga Vawra ahan luh chuan Nubawihi te chhung chuan mak anlo ti hle mai a. Nubawihi chuan," U Vawr,ilo leng duh tak tak a" alo ti ringawt a. Nubawihi nu pi Ngailiani pawh chuan mak tih hmel tak hian,"Kan pasalţha chu. Keini ang michhe inah te ilo leng duh a. Ka faten i chanchin an lo sawi nasa a. I chungah hian kan lawm tak tak ani" alo ti thuai a. Vawra chuan,"Ekhai,engmah tham anih loh kha. Ka tualchhuak lo lutuk a,tumah reng hriat pawh ka neilo. Ka lo leng lut ve rawih mai anih hi" a han ti a. Tichuan hlim takin an inkawm ho a. Nubawihite unau chuan Vawra chu an ngaina em em mai a. Nubawihi te rapah chuan Vahrit puah sa a phel lehlam chu a inrep tal mai a. Vawra chuan a lainat ru hle a. Theihtawp chhuaha puih ngei chu a tum ruh hle ani. Reife a ţhut khawmuan hnu chuan zawlbuk lama lawi turin a chhuahsan ta a.

           Zawlbuk a han thlen chuan a ţhianpa Saithanga chu alo la awm hauhlo mai a. Biak lawk a duh avangin Saithanga zawng tur chuan a chhuak leh ta rih a. Hrilkhumi te inah a len leh ngei ringin a pan ding ta chawt mai a. Hrilkhumi te kawmchhak a thlen chuan a rin ang ngeiin Saithanga chu alo ri leh lung lung tawh a. Vawra chuan kawmchhak aţang chuan," In awm em" a han ti a. Saithanga ngei mai chuan," Vawra,lo lut thuai teh. Kan awm tih i hriat reng hi" a lo ti zat zat a. Vawra pawh chu a lut ve nghal mai bawk a. Inleng dang anlo awm ve nual avangin tuium hunna kiangah chuan a ţhu a. Hrilkhumi chuan," Kan pasalţha chu,khawilam thlichhia in nge rawn chhem lut che ni. Kan inah te ilo len ve takmiala" alo ti vat a. Vawra chuan,"Nula hmelţha in kalkawng chu tu tlangvalin nge han hai bik tehlul ang ni. Thlichhia nilovin,nula hmelţha zunin min phuar anih deuh ber hi maw" a han ti a. Hrilkhumi chuan,"U Vawra ţhin hi a. Atak emaw kan lo ti reu reu ange" alo ti leh a. In biak fal reng theih ni heklo le. Thu dang dang sawiin an hlim dar dar hle mai a. Vawra chuan Saithanga chu kheuh ru zauh pahin," Pawnah inbe lawk ang hmiang" a han ti sa sa a. Saithanga pawh chuan thil pawimawhtak a awm anih ringin din hluai pah chuan," Ekhai,keini zawng kan lo va ţin tan'ge" a han ti a. Vawra pawh chu a ding ve nghal mai a. Hrilkhumi chuan," U Saia te zawng inti awm anglo thei em mai. Lenghawn Ar pawh ala khuang em lova" a han ti a. Saithanga chuan,"Zan dangah kan lo leng leh fo dawn alawm" alo ti mai a. Hrilkhumi chuan," U Vawra lah hi tuibur hmuamda em pawh i ţhu hman ngailo chu nia. I lung hi kan tiawi zo meuhlo chu ani ang maw" a han ti a. Vawra chuan,"Len rei lutuk zawng,lung a leng mai mai e. Kan lo leng zantin dawn alawm. Mangtha tak mang rawh u" tihpahin an chhuak dun ta a. Pawnah chuan Saithanga chuan," Vawra engthil nge ni ta?" tiin a kohchhuah chhan chu ahan zawt a. Vawra chuan ," Engdang ni lah love. Naktuk hian lal fapa zuiin ka zin bo dawn a. Chumi hma chuan hmeithai pi Ngailiani te chanchin khu ka hre duh ani" a han ti ta phawng mai a. Saithanga chuan ner nung nung chung hian,"Nula rimna aţanga in koh chhuah nan chuan ava nep deuh ve. Mahse kan sawi hrim anga. An pa kha in rawn pem hma deuh khan ral kuta a boral hlauh mai a . Pasalţha huaisen tak ani nghe nghe asin. A pasal a thih takah chuan i hmuh ang zawng khu anni ta mai ani. An pa zarah Lal buhzem ringin an nung ve ţawk ţawk ani" a han ti a. Vawra chuan," Kan hre chiang chak mai mai alawm mawle. Hawh teh Zawlbuk lamah i chho teh ang. Han zinchhuah dawn meuh chuan i ngaihawm ve chu mawle" a han ti a. Saithanga chuan," Chu zawng chu maw. I va han ho tak e aw" a lu hiat sut sut pah chuan a han ti a. Tichuan Vawra chuan pi Ngailiani te puih a duh dang zawng zawngte chu an hrilh a. Saithanga chuan," Vawra,i lak aţang hian zir tur ka ngah hle mai. Ka pa hi lal khawnbawl ani a. Retheih awmzia pawh ka hre hauhlo ani maithei. Mahse min dem lem lo la. Mahse mi harsa zawkte ţanpui tura ka ke kalo pen ngaih hauhlo hi chu min dem thei ang. Mahse tunah chuan i hnungzuiin mi harsa zawkte ţanpui zel hi ka tum ani" a han ti charh charh a. Vawra chuan," Ni e,kan dinhmun a tlak chiahloh hi chuan engmah hi kan hrethiam thei ţhinlo ani. Mahse midangte ţanpui tur hian an dinhmun a va din kher angai lo a. An harsatna va hriatthiampui a,theih ang anga va puih mai kha a tawk ani" a han ti a.

Saithanga pawh chuan a ţhianpa chu thlahthlam a tum hauhlo a,an hmabak tur te sawi dun zelin Zawlbuk lam chu an pan ta a.

         A tuk zing varţianah chuan lal fapa nupui ngaihvena kal tur zawng zawngte chu lal inah an kim ţhap tawh a. An vai chuan Sawmhnih lai mai anni a. Lal leh upate chuan fuihna thu chi hrang hrangte sawiin fimkhur turin an chah lawm lawm bawk a.Lal chuan," Heu tunah in chhuak tawh dawn ani a. Khual khuaa awmdan mawi kha va theihnghilh lo ula. Tin,kan khaw ti hminghliau zawnga in va che anih ngat chuan he khuaah hian in tan hmun aawm tawhlo tih hria ang che u. Dam takin va kal ta ula. Hlawhtlinna ropui tak nen inlo kir leh ngei dawn nia" a han ti dap dap a. An inpeih fel hnu chuan Lungsum lam pan tur chuan an inzui chhuak ta diah diah mai a. Lal leh upate chuan an kal liam hnu thleng chuan leikapui aţang chuan an thlir a.

                    Bung-49

          Lungsum khua hi khaw lian tak mai ani a. In zathum chuang lai mai anni hial awm e. Lungsum lal Lalchungnunga hi lal sual tak anilo naa mi thinram tak leh thinbutut nei anih avang erawh chuan a khaw mipuite ngei pawhin an hlau ru hle ţhin a. Chutihlai erawh chuan a khaw mite ţhatna tur leh hlimna tur ngaihtuah erawh a thiam hle thung. Fa nula pathum lai mai aneih bakah fapa pahnih a nei tel bawk a. Sialsawmpari,Lungchuan lal fapa Vanzikaten an beisei mek hi a fanute zinga upa ber leh hmelţha ber ani hial awm e. Lalchungnunga pawh hian a chhuangin miten a fanu hmelţhat zia an han sawite hian a hlim em em ţhin ani. Lalchungnunga pawh hian Lungchuan lamin a fanu hi an rawn beisei dawn tih anlo len hmasak ţum khan a hre tawh a . Lungchuan lal fapa hi a fanu tan hian a iai bik hauhlo a. A rimtu zinga lal fapa dang inrawlh zingah a mittlung an awm lemloh vang pawh ani deuh ani. Sialsawmpari pawh hian Vanzika hi a hmelduh ve deuh chu ani awm e.

          Lungsum pana nili lai an kal hnu chuan Lungchuan val rualte pawh losul hawn hun velah chuan Lungsum khua chu an lut dawn tawh a. Khua a lut nghal mai lo chuan khaw daih hmun fal deuhah chuan an hna chanpual ţheuh chu an han sawi nawn leh a. Vawra chu lal fanu zing daikal zui ru tur leh a Ektum a khal ţhat leh ţhatloh en tura ruat ani a. Chumai bakah lal fanu thingphur tur zui ru a achezia thlithlai tura ruat ani . A chanpual tur an sawi nawn lai chuan Vawra nuih za lutuk insum zolo chu alo ţhen leh sun sun ţhin a. An lal fapa Vanzikan alo hmuh chuan," Vawra,i chanpual tur chuan a ti tuitang vak na che nge khatia i nuih put put mai" a rawn ti thut a. Vawra tihngaihna hrelo chuan,"Lal fapa,ka tihpalh ani. Nula daileng tlangval a pumpa ina han bihthlak duk duk mai zawng thil tih chakawm tak zawng anilo alawm" a han ti a. Vanzika chuan nuih huah huah pahin," A Ektum kha a khal ţha nge ţhalo chhin nan hmawlha i hawlh ngei angai dawn nia. A rim a dik leh dikloh pawh i hriat angai ani" a han tih meuh chuan an vai nuih ta tliar tliar mai a. Val upa Vuta chuan,"Fiamthu chu i duhtawk teh ang u. Vawra,nangpawh lal fanu timualpholo zawngin i che tur ani. A in paihthawl lai a va bih duk duk kher kha a ţul lemlo ang. A zawhfel hnuaha i va en mai dawn nia. Tin ,i enthla tih a hre tur anilo a. A hriat vaih zawngin kan mualpho let der dawn ani. Hlawhchhamin kan haw palh theih tih hre reng chungin fimkhur takin kan hna chanpual kan hlen ţheuh tur ani. Lal chuan ţha takin minlo mikhual ngei anga. Tumah mahni lu leh mawng pawh hrehranglo khawpa ruih loh tur ani. Lal in zu minlo zuk ngei dawn a. Mahni zawh tawk hriat tur ani" ahan ti a. Thu pawimawh dang an sawi zawh hnu chuan khuaa lut turin an inbuatsaih ta a . Khua a an luh hma chuan tlangval pahnih Lungsum lal hnena anlo thlen thu lo va hrilh turin an han tur hmasa bawk a.

         Lungsum khua an han luh chuan Lungsum upa leh tlangval ţhenkhat hi anmahni hmuak tur chuan Lungsum lal chuan a rawn tir a. Tlangvalte chuan an phurte rawn chhawkin lal in lam chu an pan ta nghal a. Lungsum lal chuan a mikhual te chu leikapuiah dingin alo hmuak ve a. Lungsum lal leh upate chuan anlo lawm thiam hle mai a. Chibaite inbukin lal inah chuan an lut ta a. Lungsum lal chuan lal in chhuatlaia ding vuah chung hian,"Lungchuan khuate u. Lungsum khuate hian kan lo lawm takzet che u ani. Khawnge ka zupui ka han zuk teh ang che u" tihpah chuan tlangaupa in Seki khat puma Zu tuitling a rawn suah chu la in a mikhualte hnenah chuan a han pe a. Lungchuan lam chuan tlemte te a hmuam diat diat in Lungsum lal zu chu an han fak liam liam a. Zu no te an dawm fel hnu chuam Lalchungunga chuan," Awle,hei inlo kalnate ahla tham si a. Inlo kal chhante min han hrilh dawn em ni ang" a han ti a. Lungchuan upa Keiluaia chuan," Lal pa,ţha taka minlo mikhual avangin kan lawm em em a. I fanu hmelţhatzia leh fel zia hi kan lo ralkhat hriat tawh a. Hma deuh lai khan kan lal Fapa ngei pawh lo kalin kan duhzia kan rawn tilang ta a. Lungsum khaw ropui tak nena kan in unaunate alo ţhat zawk theihnan tiin i fanu leh kan lal fapa tuahrem theih beiseiin kan lo tlu lut rawih mai ani e" tiin an kal chhan chu a han sawi a. Lalchungnunga chuan," Chutia Lungchuan khaw lal meuhin chhungkhata insiam a duha min rawn bia anih zawngin keini hnial theih va awm suh ei. Amaherawhchu ka upate leh ka laichin lal dangte han biak rawn ve phawt ka duh dawn a. Min la nghah theih a thu ani ang chu. Man leh mual thuah pawh han inbiak tlan ve phawt kan mamawh dawn ani" a han ti a. Lungchuan upa Keiluaia chuan," Lal pa, chutiang ani zawngin nghah theihloh thu a awm love. I fanu kan neih theihna tur anih phawt chuan kumsul vei thleng pawhin kan nghak mai ta lawng" a han tive a. Chutah Lungsum lal chuan,"Chuti anih chuan ka laichinte khuaah pawh lamkal ka han tir nghal ange. Rei nghah kan ngailo ang. Amaherawhchu in duh anga thutlukna kan siam thei talo anih pawhin lunglohah min laksako hram dawn nia" a han ti leh a. Lal bawk chuan," Tunah chuan chawlh hahdamte pawh in mamawh tawh ange. Ka tlangvalte hian in thlen in turah an dah thei ang che u. Tin ,khuaah hian in thlen duhna hmun in duh chuan in thlang thei bawk ang. Mahni khua angah ngaiin tlangnel takin awm ula. Ka mit tikham zawnga in awm erawh zawngin khua hi in chhuahsan nghal ang" a han ti a. Tichuan Lungchuan lam chuan lawmthute sawiin lal in chu an chhuahsan ta a. Lungsum tlangvalte chuan an thlenin turah chuan an dah kual a. Lal thupek angin lal in hnaivaiah vek chuan an dah a. Vawra pawh chuan an val upate thu hnial bikloin lal khawnbawl inah chuan a innghat ve ta a.

         An mikhualte an chhuah fel hnu chuan Lungsum lal chuan a upate hnenah,"Hei kan hmuh leh kan hriat angin Lungchuan lam chuan an lal fapa nupui atan ka fanu Sialsawmpari an rawn beisei ani a. Engtia lo han chhan tur nge ni a in hriat le" tiin a upate chu a han rawn a. Lungsum lal upa min Sawmthanga chuan," Lal pa, keia ngaihdan chuan Lungchuan lama kan fanu kal tir hi a pawi hauhin ka ringlo ani. Lungchuan lal pawh lal fel tak ani a. Pasalţha pawh tamtak anei ani. Anni khua nena unaua kan insiamthei anih ngat zawngin a thlamuanthlak dawm em mai" a rawn ti a. Upa dangho pawh chuan an upa min ngaihdan chu an pawmpui vek hlawm a. Lal chuan," Chutia ka upa te berin min pawmpui theih chuan kan fanu chu kan kaltir ve mai ta lawng. Mahse ka unaute hi ngaihdan han hriatve phawt ka duh a. Lamkal intir nghal ila aţha ange. Lungchuan lam pawh khan min nghah chu an inhuam viau kha maw. Mahni maia thu lo keuhthluk zawng u leh naute an zahawm em mai" a han ti a. Tichuan lal chuan a u leh naute ngaihdan la turin a upa pahnih leh a tlangvalte chu a unaute khaw lamah chuan a kal tir ve ta nghal a. Lam kal an intirh hnu chuan lal chuan," Khawnge Lungchuan buanchak leh Lungsum buanchak tunge dingchang zawk i en teh ang u. Zaninah hian Zawlbuk tlangval tumah in kan mikhualte hi lo buan lo sela. Naktuk lamah khawtlang huapin ennawm en tur kan nei dawn zu nia. Kan tlangvalte i hrilhhriat vat teh ang u khai. Khaw mipuite pawh naktuk ah zawng tumah ram kal lo se. Ka mikhualte lawmna ni pahfawmin khawtlang pawh ka hrai mai ta lawng" a han ti a. Tichuan tlangau pawh an tirchhuak ta nghal a. Zawlbuk lam lo bengvar turin upa pakhat a liam ve nghal

bawk a.

         Zanriah ei khamah chuan Vawra chu athlen in,Lungsum lal khawnbawl Challianate inah chuan titi khawchang sawiin a ţhu vel mai mai a. A thlenin nula pahnihte nen chuan inkawmin an hlim dar dar hle mai. An val upa Vuta nen a thleng dun niin val upa Vuta lah an lal fapate thlen in lamah a leng daih a. A thlen in nula pahnih Hausiami leh Rualchhingite hi nula hmelţha pangngai tak anni a. Lal khawnbawl fate mah nise an chhungkua an zau a,inleng pawh an khat ve hmar ţhin ani. Chutia a thlen in nulate kawma tui taka a titi siam siam lai chuan val upa Vuta leng chu a lo hawng a. Vawra hnenah chuan," Vawra,kan pasalţhaten Lungsum nula hmelţha lenpuiah an sawm che nia. Ilo kal ve dawn em" a rawn ti a. Vawra chuan," Zanin zawng thlenin nula lamin lung an kuai zawk tlat mai. Minlo va kalsan tawh u. Zan danga tan ka khek zawk ange" nui var var pah hian alo ti a . Val upa Vuta chuan," Anih ka kalsan dawn che nia" tih leh chhuah a rual a. Chutih lai chuan tlangval nula rim tur pawh anlo lut ve nak nak tawh a. Vawra chu tapchhaka ţhuin Vawkchawbel a vil hluah hluah mai a. Tlangval lo leng ve te chuan Vawra chu an en duh hle mai a. Rualchhingite unau chuan an mikhual anih thu an lo sawi zel a. Tui taka an titi lai chuan Lungsum tlangval pakhat chuan Vawra hnenah chuan,"Ţhianpa,Lungchuan khua inih chuan Suartui khua Hualtu lal leh a thurualpuiten an chimih ţhak thu kha i hre ngei anga tiraw. Engvanga kha ti taka indo ta mai nge annih le" a rawn ti ta kauh mai le. Vawra sawi chak loh zawng tak mai ani a. Han sawi loh chi lah ni heklo. Muang fan raih hian,"An buaina laimu tak zawng ka va hrelo a. A hma deuh khan Hualtu lam kha Suartui khuaten an va run ani awm e. Hualtu lal pawh kha an man hial a. An va tlanchhuah leh hnuin Hualtu lal khan a u leh naute sawm khawmin phuba lak nan an va run ani awm e" a han ti a. Lungsum tlangval chuan,"In run hi chu a ţhalo mange aw. Ral muang taka awm nawm bik zia hi" a han ti a. Lungsum tlangval pakhat chuan,"Lungchuan lal fanu Ngurpuii hmelţhatzia hi an sawi fo mai a. Eng ang chiaha hmelţha nge maw anih le" a rawn ti a. Vawra chuan,"Ţhat zawng a ţha narawh e. Ţha tihzawngte hi a inanglo a. Hei ka thlenin nulate ang hi ani mai" a han tih chuan tlangval ho chu an nui dar dar a. Rualchhingi chuan," U Vawr ,i ti anglo em mai" nui var var pah chuan a lo tive a. Hlim takin an nui ho dar dar mai a. Rei tawk fang a ţhut ve hnu chuan Vawra chuan,"Kei zawng ka mawng akham ta deuh mange. Zawlbuk lamah kalo va mu zal ange" tihpah chuan a Vawkchawbel vil chu hnehsawh takin an suan thla thawr mai a. A nghahna tur lamah tlangval anlo ţhut avang chuan an la lek kang deuh vu vu zui a. A thlenin nulate leh a rimtu tlangvalte chuan ka ho hian anlo en mai a. Vawran Vawkchawbel a dahthlak hnu chuan tlangval pakhat chuan,"Rualchhingi te Vawkchawbel hi tlangval pahnihin kan chawi thla ziah asin" mak tih hmel tak hian alo ti a. Vawra chuan ," A khat ţha tawklo anih kha. A phai em alawm. Mangţha tak mang rawh u" tihpahin a chhuak ta daih mai a. A chhuah hnu chuan tlangval pakhat chuan," Chhingi,in mikhual tlangval kha engti tura lo zin nge anih le. Pasalţha ani ngat mai. A awma ser te kha inlo hmu em. A taksa ah pawh hliam hnuhma a awm thluah kha" a rawn ti a. Rualchhingi chuan,"Pasalţha anih leh nihloh phei zawng ka hrelo a. An lal fapa kaihzavenga lokal ani awm e. Mi pangngai khawsakin a khawsa ve mai asin. Chutia pasalţha mizia pu vak pawhin kalo hre hleinem" a lo tive mai a. Tlangval bawk chuan," Pasalţhate chuan an nihna an thup thei viau asin. In Vawkchawbel pawh kha tlangval pahnihin kan chawithla zo ţawk ţawk tih hriase zawng mahni chauh chuan a chawi duh hauhlo ang" alo tive bawk a. Vawra chanchin chu an sawi zui nak nak a. Rualchhingi pawh chuan an mikhual tlangval chu mi dang aia chungnung ani tih a hmuh tirh aţang khan alo ring sa daih tawh ani. Vawra zawlbuk a va thlen phei hma chuan an khaw pasalţha Renga nen an intawk hlawl mai a. Renga chuan," Vawra,naktuk zinga i hna tur kha aw. Thawh hma angai deuh dawn nia" nui vur vur chung chuan alo ti a. Vawra pawh chuan," Phur takin kan kal ani mai ang chu" alo tive mai a. Tichuan an pahnihin Zawlbukah chuan an lut dun ta nghala . Zawlbuk a an va luh chuan Lungsum val upate leh tlangvalte chuan anlo be nghal bawrh bawrh mai a. An lal thupek angin atuk lama infiamna a awm dawn avangin tumahin inbuan lam chu an lo sawi ri lemlo a. An puanhlapte theh khawmin mikhualte mutna tur chu an han siam saka. Zante alo rei deuh takah chuan Vawra pawh a tuk lama a hmabak ngaihtuah neuh neuh chungin a muhil ta a.

         A tuk zing khawvar hma chuan Vawra chu a tho vat a. A mutbu te thlep felin Zawlbuk chu a chhuahsan ta nghal a. Lungsum lal fanu zing daikal tur chang chuan lal in lan phakna si. Hmun inthup deuhna laiah chuan a ţhu kar mai a. Khawfing chah hma chuan Lungsum lal sal nula ţhenkhatte chu zing tuichawi turin an chhuak nak nak a. Lal fanu naupang zawkte pahnih pawh chu tuichawi tur chuan an kal ve bawk a. Vawran a duh ber Sialsawmpari lah chu khawvar fel hnu pawh chuan a hmel a lo la lang reng renglo mai le. Vawra tan lah han bihruk reng ngaihna a awm silo a. Tual laiah chuan a vei kual thauh thauh mai a. Rei vaklo a nghah leh hnu chuan Lal fanu Sialsawmpari ngei mai chu lal in kawngkaah chuan arawn lang var paw phet mai le. Lal in tualah chuan rawn chhuakin hmawlh sei vaklo hi a rawn hum chhuak va mai a. Vawra chuan,"Hmm.. Tunah zawng a hun a thleng ta anih chek hi" a ti sap a. Sialsawmpari(Pari) kal na lam chu a thlir zui nghal a. A liam chiah maw tihah chuan midang hmuh veloh turin dai lamah chuan a lut ru ve ta a. Vawra chuan Sialsawmpari in paihthawlna lai awm vel chu an thlir ru ta vang vang a. A hawi kual fe hnu chuan hla vaklo Sialsawmparin daikal paha a hmawlh ken hmanga a bul vela hnim a lo vuak chet lai laih lai chu a va hmu ta a . A awmna lai chu a chhinchhiah fel hnuin khawdang hawisanin an inzawh hun a nghak ta a. Rei fe anghah hnu chuan Lal fanu pawh a tihtur a zo fel tih hriat tak hian zai ret ret pahin khaw lam chu a pan ta a. Lal fanu aliam fel hnu chuan Vawra chu lal fanu daikalna lamah chuan va kal pheiin an enchiang ta. Hmawlha hawlh let nawk nawk pah chuan,"Hmm..a khal ţhat khawp hi. A len pawh alian ţha na rawh e" tiin hlawhtling in ti tak chuan khaw lam chu a pan ta nghal a. Khua ava luh hnu chuan an lal fapate thlen in lam pan chuan a kal ta nghal a. An lal fapa Vanzika te thlenin a va luh chuan an val upate leh an pasalţhate chu an lo awm khap mai a. Vawra an han hmuh chuan Vanzika chuan nui sang hian," Vawra,enge kan an hmel" alo ti nghal a. Vawra chuan," A khal ţha a len pawh a lian ţha narawh e. Nghahrei angai mai pawh a" nui chung hian a han ti a. An upa hruai ve awmchun upa Keiluaia chuan," Vawra, vawikhat mai a tawklo ania. Naktukah chuan Hnahthelin rawn fun hawng tawh ang che" alo ti ta. Vawra nuihza lutuk chuan,"A ni em em tawhlo in ti em. Nangmahni ngei va kal tawh ula a ţha ange. In duhkhirh em mai" nui chung hian a han ti a. Val upa Vuta chuan," Vawra,fiamthu anilo nia" a han ti leh a. Vawra chuan tuiloh hmel tak hian," Kan kal leh poh ani ang chu. Ka rin aiin a buaithlak phian mai" a han ti a. An nui dar dar hlawm a. Chutah Val upa Vuta chuan," Vawiin lam chu kan khaw buanchak Rochuha leh Lungsum buan chak an infiam dawn anih hmel a. Lungsum lal pawhin kan vai hian kan lan a beisei dawn a. Tin kan pual liau liauin ruai pawh a ţheh dawn ani awm e. Tumah khawdang hawi loin tukţhuan ei khamah lal mual lam kan pan khawm dawn nia" a han ti a. Tichuan mahni thlenin lam pan chuan an kal darh leh ta a.

         Tukţhuan eikhamah chuan Lungsum lal in leh a chhehvelah chuan mipui an zi nuaih nuaih tawh a. Mual sir lamah chuan fatu hoin ruaipuia siam tur Sialsa leh Vawksa chu anlo chan mawlh mawlh bawk a. Vawra pawh lal in lam pan chuan chhuak ve nghalin an upa leh an lal fapa lal in leikapui lama an lo ding va tawh chu a han hmu thei a. Lal in sir lam deuhah chuan an val upate leh an pasalţhate chu an lo ding ve a. An val upate awmna lam pan chuan a kal ta nghal a. A va thlen phei cuan pasalţha Renga chuan," Vawra,i va rawn che chawhnu ve" nui var var chung chuan alo ti a. Vawra chuan," Tukin lama ka thil tawnin zir mawlh heklo. Chawbar khat lem pawh a har phah vek zu nia" nui ţhaw chung chuan a han ti a. Midangho chu an lo nui dar dar a. Rochuha chuan,"Vawra,an khaw buanchak hi ka hnehloh chuan rawn buan ve chhin reng reng ang che aw" alo ti a. Vawra chuan," Hneh tuk e a. I hnehloh val chu kei ni ang sa ţha pangngai tana han hneh bik thu a awmlo e. Favai bar huang khawpin han vawrh ang che" a lo ti sam et a. Rochuha hian Vawra chakzia hi a hrechiang em em a. Zawlbuk a a buan pui ţum pawh khan a hneh lo lek lek ani tih a hre ran a. Vawra khan a fiam mai mai emaw a ti hial anih kha. Lal mual lai takah chuan Favai an han chhung pawng thur mai a. Khawkhat buan chak ve ve te inbuanna tur chuan an han hai rual leh a. Mipui chuan an khaw buan chak Thangvunga leh mikhual tlangval inbuan tur chu hmuh loh hlauin a hma lama awm chu an inchuh nak nak a.

             Mipui so ri mur mur chu Lalchungnunga chuan leikapui aţang chuan ngawi turin ahan ti a. Mipui chu an ngawi ţhuap a. Chutah Lalchungnunga chuan,"Lungsum khua leh tuite u,vawiin ka ko khawm na chhan che u hi in hrelo mai thei a. Nimin lam khan Lungchuan khaw lam aţangin khual zahawm kan thleng hlauh mai a. Lungchuan lal fapa leh a pasalţhate in unauna ţha zawk kan neih theihnan ka khuaah an lo zin a. Anmahni kan lo lawm zia entirnan vawiinah hian khawtlangin ruai kan ţheh dawn ani. Chumai bakah cuan Lungchuan buanchak leh Lungsum buanchak zingah tunge dingchang zawk kan en bawk dawn ani" an tih chuan mipui chu an au dur dur a. Chutah lal bawk chuan,"Vawiina kan infiamna hian in unauna ţha zawk thlen sela. A chaklo zawka kan ţanga nih pawhin tumahin lungloha lak tur anilo ang" a han ti leh dap dap a. Lal bawk chuan," Infiamna chu i ţan tawh ang ule" ahan ti tuarh a.. Mipui chu an au dur dur mai a. Lungchuan lal fanu Sialsawmpari leh Vanzika chu inhnaih deuh tak mai hian an ding a. Lal fanu dangte erawh an ţhiante ho nen mipui zingah chuan an awm thung.

           Infiamna chu an han ţan dawn ta a. Lungsum tlangau pa chu lo dingchhuakin Lungchuan leh Lungsum aţang chuan an tlangval buanchakte bakah tlangval dan pathum zel thlangchhuak tur chuan a rawn ti a. Lungchuan khaw lam aţang chuan Rochuha,Vawra,Renga leh Chhunga anlo ding chhuak a. Lungsum lam aţang pawhin an khaw buan chak Thangvunga leh tlangval dang pathum chu anlo ding chhuak ve a. Inbuan chu an han ţan tak tak ta a. Vawra chu dingchhuak hmasa berin a tumpui Lungsum tlangval chu a hneh ţawk ţawk a. Mipui chu an au dur dur a. Lungchuan lal fapa Vanzika pawh chuan a tlangvalte chu alo fuih ve sauh sauh a. Lungsum lal pawh a ngawi bik chuanglo. Vawra hnungah chuan Renga leh Chhunga chu an chhuak ve leh a. Renga chuan atumpui pa hnehlo in a tlawm a. Chhunga erawh chuan ahneh ve thung. A tlangvalte an tlawm tak zeuh zeuhah chuan Lalchungnunga chuan ring lenglawng hian," Lungsum tlangvalte kha mikhual tlangval lakah in tlawm mai dawn em ni. Khawnge ka mi chhuanvawr Thangvunga kha. Mikhual tlangvalte hi han buan teh se" a rawn ti lung lung a. Chutah Thangvunga chu buanzawlah chuan alo pen chhuak thur thurh a. A palian in a sa a ţha nelh nawlh hle mai a. A hmel en ringawt pawh chuan huphurh awm tham chu ani tawh hrim hrim. Lungchuan lam aţanvg chuan Rochuha chu lo dingchhuak ve nghalin a ţhiante chuan anlo au phur ve sauh sauh a. Chutah Lalchungnunga chuan,"Ka khaw buanchak Thangvunga kha,i chak anih chuan ka Dar bu i hawn thei ang" alo ti lung lung a. Lungchuan lal fapa Vanzika pawh chuan," Rochuh,Lungchuan val hi enge kan nih han entir teh aw. Se chalin a nghak reng che nia" alo tive bawk a. Buanzawlah chuan khaw khat buanchak ve ve chu inhmachhawn zawngin an ding kak teu mai a. Chutah tlangau chuan,"Ţan rawh ule" a han ti tuarh a. Mipui chu an au dur dur a. Khawkhat chhuanvawr pahnih te chu an puan ven kawngah an indawm chat mai a. Khawkhat chhuanvawr ve ve anni bawk a ,chak zawk nih ngei tumin an han vir kula ta that that mai le. A kang bik an awm thei mailo a. A tawpah chuan Lungsum buanchak Thangvunga chuan Rochuha chu a pawm kang va vu vu mai le. Lungsum mipuite chu," Thanhvunga,Thangvunga" tiin an au dur dur mai a. A thawh hnihna an han ţan leh chuan Thangvunga chu a kang ve leh ta thung a. A thawh thumna an han ţan leh chiah tihah chuan Thangvunga chuan Rochuha chu Favai bar huang khawpin a vawrh ta mai le. Mipui chu lawmin an au dur dur a. Lalchungnunga pawh chuan," Ka tlangval chhuanvawra anih kha. Khawnge nulate u,zu tuitling kha han tulh teh u" a han ti lung lung a. Rochuha chu a rawn tho leh ţaih ţaih a. Thangvunga chu chibai pahin," Lungsum tlangval nge nge. Ka chelh lo deuh che ani e. I chak khawp mai" a han ti a. Thangvunga pawh chuan nui sang hian,"Min buan dan tawk i thiam hle mai. Mualphoa min siamloh avangin ka lawm e" a han ti a. Thangvunga mipui zinga luh a tum mai lai chuan Lalchungnunga chuan," Khawnge Lungchuan tlangval kha ka mi chak chhuanvawr buan tur in awm tawh nange" nui huah huah chung chuan a rawn ti a. Rochuha chuan," Vawra,va buan ve reng reng teh. Kan mualpho lutuk dah ange" a han ti a. Vawra pawh chuan u zawkte thu chu hnial lem loin buanzawla chhuah phei pah chuan," Khawnge a tikim tuah kan buan ve reng reng ange. A hneh phei chu kan hneh lem hlei lo anga" a rawn ti a. Mipui chu an nui dur dur a. Vawra leh Thangvunga han ding dun chu an sa a in ţhat hleih deuh ani. Mahse Vawra erawh a sa a phiar fat mai a. Thangvunga erawh a chum buang chi ani thung. Tlangaupa chuan," Le,han ţan leh tawh u" a han ti a. Vawra leh Thangvunga chu an in pawm nghal chat a. Thangvunga chuan Vawra chu awlsam te ahan keuh thluk mai a tum a. Mahse a rin ai daihin a nghet ve tlat a. Vawra erawhin phawi kan pawh tum lemlo chuan a inher kual pui chhen mai a. Rei ngial an beih hnu pawh chuan a kang zawk an awm thei ta miahlo mai a. Mipui makti chu an ngawi deuh ţhup tawh a. Thangvunga chu a tlawmngai ru ngang mai a. Mahse Vawra lah a kang duh der silo. Chutia a kang zawk pawh awm lemlo a an inchai reng lal in a han hmuh chuan," E khai,kan tlangvalte an chau tawh ange. I duhtawk rih ang u" tiin a rawn titawp ta a. Thangvunga chuan," Tlangval,min chawi i tum ve miahlo tiraw" ahan ti a. Vawra chuan," Ka theihtawp chu ka chhuah alawm. Ka phawi thei nganglo che ni. Ilo chak hle mai" a han ti a. Tichuan ţha taka inbiain an ţhiante awmna lamah ve ve chuan an kal ta a. Inbuan te an zawh fel takah chuan lal chuan mipuite chu ţin tirin tlai lama ruai kil tura kal ţheuh turin an chah a. Mipuite an ţin darh hnu chuan Lungsum lal chuan Lungchuan lam chu lal ina awm rih turin a sawm a. Tichuan lal in lamah chuan an lut khawm ve leh ta thung a.

          Ruai kil zawh hnu chuan Lungchuan khaw lam chu rorelin an ţhu khawm leh ţhap tawh a. Upa Keiluaia chuan," Hei tun chinah chuan kan la hlawhtling rih zel mai a. Lungsum lal pawh hian min haw lemlo chuan ahriat a. Naktuk aţangin nasa lehzualin kan lal nu tur hi kan en thlithlai dawn ani. Val upa Vuta leh keimah hian chhun lamah lal ina leng pahin lal fanu la deh thiam leh thiamloh kan en ang a. Vawra hian a thingphura a chhuah hun changin ilo enthla bawk dawn nia" a han ti a. An rorelte an zawh fel hnu chuan mahni thlen in lam ţheuh chu an pan ta a. Zan lamah chuan Lungchuan upa leh val upate chu Lungsum lal inah an chuangkai a. Lungsum lal chuan Vawra chanchin chu alo zawt chik hle mai a. Lungchuan lam chuan a mawi tawk hrilhin Vawra chu pasalţha pangngai mai anih thu an hrilh a. Vawra erawh a thlenin nulate kiangah chuan fiamthu thawhin a nui khi leh vun vun tawh a. Rualchhingi chuan," U Vawr,vawiin lam chu kan nulate mit iti tlai teh asin. A lo beisei ru deuh tu che pawh an awm ania" a han ti a. Vawra chuan," Chu leng se min va ti awm ve" a lo ti sam et a. Rualchhingi chuan,"Ti lah love, kan ina i thleng hi min thik ru viau tu an tam palh ang tih thuah mawle" nui ar ar pah chuan a han ti a. Hausiami chuan,"Mawiah khawiah mah leng duh suh. Kan inkawm hlima,a nawm em hi" a lo ti ve mai a. Vawra pawh chuan hmundanga len tum lemlo in a thleninah chuan chumi zankhat chu a tling tla leh ta phawt a.

Nithum aliam leh hnu chuan an hmalak tawh dante sawiho in Lungchuan lam chu an ţhu khawm leh ţhap tawh a. Upa Keiluai chuan,"Hei kan lal nu tur chu tehfung chi hrang hranga kan tehkual hnuah pawh a tlinlohna lai reng reng kan hmu talo a. Kan lal nu atan chuan a ţha ta ber dawn anih hi. A hrisel ţhain a chak ţha a,a la deh pawh a dikin a chezia reng a fel fai mai a. Tunah chuan hmabak pahnih chiah kan nei tawh a. Pakhat zawk chu Lungsum lal thutlukna nghah tawp ani mai a. Pahnihnaah chuan Lungsum lalin a fanu hi kan tan a phal tih a sawi hnu a kan lal fapa leh Lungsum lal fanu te tih tur ani tawh thung ang" a han ti charh charh a . Val upa Vuta chuan,"Zanin thlengin khawchhunga che mawilo leh buaina siam kan la awmlo a. Hei hi kan chhawm nung zel dawn nia. Tunah chuan lal in lamah lal thu tlukna ngaichangin kan han leng chho anga. Kan inbiak dan chu naktuk lamah kan inhrilh dawn nia" a han ti a. Tichuan Lungchuan upa leh Val upate chu Lungsum lal in pan chuan an kal.ta a. Midangho erawh nula rim turin an chhuak thung a.

           Lungsum lal inah chuan Lungsum lal leh a upate bakah Lungchuan upa leh val upate chu an ţhu ţhap a. Lungsum lal Lalchungnunga chuan," Awle,hei kan khualţha tepawhin min nghak rei ta bawk a. In dawhtheihnaah lawmthu ka sawi a. Ka fanu pasal neihtur chungchangah hian ka u leh naute ka han rawn a. Anni lam pawhin Lungchuan khaw lal fapa makpa a han neih chu an lo hnial hauhlo mai a. Tunah chuan kan fate pahnih kar hi ani tawh dawn ani. Naktukah khian an pahnih hian lal inah kan koh anga. Uluk taka an in belhchian hnu a an in pawm thei ve ve anih chuan kan inremna hi kan nemnghet tawh dawn ani" a han ti a. Chu thu an han hriat meuh chuan Lungchuan lam chu an hlim ta em em mai a. Lungchuan upa Keiluaia chuan," Lalpa,kan dilna tlawmte te min pawmsaka kan lal fapa leh i fanu suihzawma in unauna ţha zawk siamthei tura kn han awm ta mai hi kan lawm em em ani" tiin lawmthu a han sawi luam a. Lalchungnunga chuan," Lawmthu sawi angai lo e. Tunah chuan unau kan ni tawh a. Ka fanu man atan chuan kan thlahtute aţanga kan lo chhawmnun tawh sa ringin Sialsawm in rawn kai dawn nia" a han ti a. Lungchuan upa Keiluaia chuan,"Lal pa,i fanu kan neih theihna tur anih phawt chuan engpawh pek kan huam ani" alo tive bawk a. Chutia an inrem theih takah chuan hlim taka zu te in hoin zan hun chu an hmangral ta a.

           A tukah chuan a ngaite bawkin Lungsum lal leh upate bakah Lungchuan lam palaite chu Lungsum lal inah chuan an kim leh ţhap tawh a. Sialsawmpari leh Vanzika pawh lal inah chuan an awm ve bawk a. Khawnbawl upate chuan Vazika leh Sialsawmpari chu an tihtur thil pawimawh tak mai chu an han hrilh ta a. Vanzika leh Sialsawmpari chu an vawikhat thil tawn na ve ve anih avangin an huphurh ru hle mai a. An in en tawn leh zauh zauh ţhin a. Chutah lal leh upate remruatna ang chuan Vanzika leh Sialsawmpari chu lal in pindan chhungrilah chuan an pahnih chauh chuan an luh tir ta a. Chutah chuan kumkhuaa an kawppui turte chu an pawm chiang thei angem tih hre turin a ngial a nganin an in bihchiang dawn ani. Lal in pindanah chuan Vanzika leh Sialsawmpari chuan zak ru tak chung siin an thuamhnawte a hlip mawlh mawlh mai a. A tawpah chuan thup engmah awmloin an neih zawng zawng chu an inhmuh tawn sak ta vek a. Kumkhuaa an kawppui tur te taksa ah chuan an lungawi tawk leh tawkloh chu an in ensak ta a. Sawisel tur leh engemaw mihring taksa a awmlo tur leh pangngailo deuh a awm anih chuan an innei thei dawnlo ani. Lal ţhenkhat chuan lal chhungkaw zinga ruat bikte an hmang ţhina,lal ţhenkhat erawh chuan a innei tura te kha an tihtir mai ţhin thung. Lal leh a upate bakah Lungchuan khaw palaite chu lal inah chuan an ţhu ngawi ţhap mai a. Lal in pindanp chhungah erawh Vanzika leh Sialsawmpari chu in nuih tet tet chungin an ding dun a. An taksa ah chuan han sawisel tur lai leh pangngailohna pakhat mah an inhmuh tawn sakloh takah chuan an thawmhnaw te chu an han inbel ţha leh te te a. An inhak fel hnu chuan an chhuak dun ta a. Hmanlai lal te kha an fate nupui pasal neih tur chungchangah an duh fir hle mai a. Pianphunga mi an phak zan leh zanloh te. Pangtichawr leh taksa ruangam ti mawilo thei thil nei te chu an fate nupui emaw,pasal atan emaw an pawm duh ngailo ani. Pindan aţanga an chhuah chiah chuan Vanzikate chu an lai dun khawp mai a. Vanzika chuan zawite hian,"Engmah harsatna a awmlo e. Ka nupui atan ka pawm e" a han ti a. Sialsawmpari pawh chuan zak sen ţawn ţawn chung hian," Keipawhin ka pasal atan ka pawm e"a han ti ve a. Chu thu an han hriat chiah chuan Lalchungnuga chuan," Tunah chuan engkim a fel ta e. Khawnge ka makpa thar tur chu kan kuah nghe nghe teh ang" tihpahin Vanzika chu ahan kuah a. Lal bawk chuan," Engkim kan zo fel ta bawk a. Tunah chuan man inhlanna nei pahin kan fanu hi inlo hruai thei tawh ang" a han ti a. Lungchuan lam chuan lawmthute an sawi mawlh mawlh a. Vanzika leh Sialsawmpari pawh chu an hlim na rawh e. An inrem theih takah chuan nileng in zu leh sa nen an ri bung bung mai a. Zanriah kil hun thleng pawh chuan lal inah chuan an la ri bung bung mai ani.

            Chutia an beisei ber a hlawhtlin takah chuan Lungchuan lam chuan man leh mualte in hlan felna neih thuai anih theih nan an khaw lama a rang lama haw chu an tum ta a. Zanriah ei khamah chuan Lungsum lal in lamah an han chuangkai leh ta a. Lalchungnunga chuan," Ekhai,lo kal teh chu. Khawvar ţhak thlengin lam i thai teh ang u" alo ti a. Lungchuan upa Keiluaia chuan," Lal pa,ţha taka minlo mikhualin kan dilna te minlo pawmsak tawh a. Tunah chuan man leh mual te inhlan fela kan fanu thar tur lo hruai vat kan duh dawn avangin naktuk lamah hian kan khaw lama haw phawt kan rel ani" a han ti a. Lalchungnunga chu an ngawi vang vanga , a ruih ala reh lo bawk nen ring leng lung hian,"Ani lah tak emaw. Inremna te kan siam takah chuan furpuiin min nan hmain kan inhruai vat chu angai ngei dawn a. In khaw lama in haw thuai pawh chu a ţha e. Mahse thil pakhat,ka fanu nihna zawng zawng leh a engkim in rawn belchiang tawh a. Tunah chuan ka fanu pawhin Lungchuan lal fapa pasalah anei dawn tih tlang hriat ani tawh a. Inlo kir leh ngei theih nan engemaw in dahkham angai ani" a ti ta tlat mai le. Lungchuan upa Keiluaia chuan," Lal pa,kan lo kir leh ngei ngei ang tih ka tiam a che. Tunah hian dahkham tur rohlu engmah kan neilo a. Kan Silaite hi i pawm thei dawn anih chuan kan dahkham thei ang" a han ti a. Lalchungnunga chuan," Chu zawng anep mah mah ani. In pasalţhate zinga pakhat hi in tlansan tur ani. Eng hrehawm mah kan tawrh tir dawnlo a. Mahse nakinah in rilru te thlakin ka fanu hi in rawn hruai lehlo hlauh dah ange" a ti ta tlat mai a. Lugchuan lamin an rawn hruai ngei dawn thu leh an tih mai mai loh thu an sawi hnu pawh chuan Lalchungnunga chuan pasalţha pakhat an hnuhchhiah chu a phut ta tlat mai a. Lungchuan lam chu lal in aţanga chhuakin an han inrawn khawm a. Tu ber chu nge Lungsum khuaah chuan awm hnufual ta ang tiin an in rawn a. Vawra chuan an lal hnenah thutiam alo lak tawh avangin an val upate an buai laih laih lai chuan," Keimah ka awm hnufual mai ange. Lal in min pawm theih chuan . Kan pasalţha dangte zawng nupui fanau nei vek anni tawha. Engpawh tawk ila,ngaihtuah tur ka neilo berin ka hria. Bakah eng em kan tawklo turah ngai ila. Inlo kir leh vat dawn nia" tiin a ngaihdan chu a rawn sawi a. Vanzika chuan," Vawra,Lungsum lama lo awm chu i huam chiah maw. Kei zawng nupui la neih hrihloh mai pawh ka duh e. Tihian i hawng mai ang u. A inzahloh thlak em mai" a rawn ti a. Vawra chuan," Lal fapa,thil harsa ani hleinem,inlo kir leh thuai dawn alawm. Ka chhungte kiangah khan thil awmzia ţha takin inlo sawi mai dawn nia. Kei hi a awm hnufual thei ber tur chu ka ni" a rawn ti leh a. A tawpah chuan Lungsum khaw lama awm rih tura Vawra inpekna chu an pawm tlang ta a. An thu tlukna Lungsum lal hnena an han thlen chuan Lal chuan," Ka rawtna min ngaih pawimawh sak avangin ka lawm e. Lal sual tak angah min ngai maithei a,mahse he thil hi ka fanu himna atan ka tihve angai ani. In pasalţha chu ngaihtuah hauh suh ang che u. Him takin alo awm dawn ani" a han ti a. Tichuan Lungchuan lam chuan lungawi vaklo chungchuan lal in chu an chhuahsan ta a. Lal in an chhuahsan hnu chuan upa Keiluaia chuan,"Min han ringhlel ta tlat mai kha amak hle mai" a rawn tichhuak a. Vawra chuan," Lal kha a ruih em vang anih ka ring ani. Naktuk zing lamah chuan aţha ve tawh mahna" alo ti thuai a. Tichuan a tuk lama kalchhuak tur annih avang chuan mahni thlenin ţheuh chu an pan leh ta a.

           A tukah chuan Lungsum lal sawmna angin lal in lamah an phurte siamfel sa thlapa kengin tukţhuan an kil tlânga. Vawra erawh a thlenin lamah a thawmhnaw ala dah vek thung. Tukţhuante an eikham hnu chuan Lungchuan lam chu haw turin an inbuatsaih ta a. An kal dawn chuan Vanzika chuan," Vawra,ka chunga i thiltih avang hian ka theihnghilh tawh hauhlo ang che. Ka lawm lutuk ania" ahan ti a. Vawra chuan," Lawmthu sawi angai lo e. Lal tana kan tih theih tawk alawm" a lo ti ve mai a. Tichuan a ţhiante hawng tur chu Lungsum lal leh upate hoin kawtchhuah thlengin an va thlah ta a. A ţhiante an kal liam vek hnu chuan Vawra chu a ruak huai hian a in hria a. A lungte a leng rum rum a. Kawtchhuahah chuan a han ding vang vang a. Lungsum lal chuan," Tlangval lungngai mah ta che. Dam takin in inhmu leh dawn alawm. I chungah eng thil ţhalo mah a thleng lo ang tih ka tiam ache" a han ti a. Tichuan Lungsum lam panin an kir leh ta a.

                   Bung-50

          Lungsum lama an let leh hnu chuan Vawra hnenah Lalchungnunga chuan,"Tlangval,khuaah hian zalen takin i awmthei ang. Harsatna engmah kan siam dawnlo che a. Mahse in khaw palaite hmel ka hmu lehlo anih chuan i chungchang thu hi ka upate hoin kan ngaihtuah leh dawn ani. Tunah chuan i thlen in lamah thlamuang takin i hawng thei tawh anga. Ramvah i duh anih pawhin khaw mi leh sa pakhat tal i hruai tel ka phut dawn ani" a han ti a. Vawra chuan," Lal pa,i remruatna ang chuan ni rawh se. Buaina siam zawng chuan ka che hauhlo ang. Kan lal mitirhte pawh anlo let leh thuai ang. An lal pawh a thutiamah chuan a dinglo ngailo e" a han ti a. Lal mual an thlen chuan Vawra chu a thlen in lamah chuan a let leh ta a .

A thlenin a zuk thlen chuan Rualchhingite unau feh kal tur chu an lo insiam vel mek a. Vawra lo lut an han hmuh chuan an upa ber Saikapa chuan," Vawra,ilo va let rang ve. An hawn san vek si che a,nuamlo iti viau ang a" alo ti a. Vawra chuan," Nuamlo ti lahlo e,hei in ka nei tho alawm" nui sang chungchuan a han ti a. Saikapa chuan," Ni e,i in angah i ngai dawn nia. Hei vawiin lam chu daihnaia ka Sahdal leh Beai kam te en pahin hmer hnang tur ka va la ange. Inah khan hahdamin ilo awm dawn nia" tihpahin ram lama kal tur chuan a chhuahsan ta nghal a. Saikapa chhuah hnu chuan Rualchhingi chuan," U Vawr,lo lamah anhnah ilo dap khawmin kan kal dawn a. Inah mahni chauha awm aiah minlo zui ta mai che" tiin ahan sawm a. Hausiami pawh chuan," Nia,lokal ve rawh,hawi khathawn pah ani mai. Hei ka nu in nghak tur a awm tho hi" alo tive bawk a. Vawran a chhan hma chuan Rualchhingi nu pi Zamliani chuan," Chhingi te unau lah hi aw. A khua te pawh a har anga. Awm mai mai a duh ang chu" alo ti a. Rualchhingi chuan," A khawhar kan rin vangin alawm kan sawm. Ka nu ţhin hi chu aw. U Vawr ilo kal dawn em" a han ti zawm zat a. Vawra chuan,"Ka phur zawng tak ania lawm. Khawnge kan insiam ange aw" tihpahin a iptepui leh Chem velte chu an lakhawm a. A insiam malh malh lai chuan Rualchhingi bawk chuan," U Vawr kan zauah Sakhi an tam teh ania. Ka u ve lah hi Silai hawl chhuah nachang lah a hrelo . A tlaw ve sia. Silai pu be mai mai ta che" alo ti reuh a. Pi Zamliani chuan," Kan Rualchhingi ţhin hi chu aw. Mi duh leh duhloh pawh sawilo hian rilrua awm ang ang hi sawi leh phawng phawng ţhin a. A zahthlak ţhin mang tak e" a lo ti thuai a. Vawra chuan," Ka pi,lo lama kan kal dawn chuan Silai put chhuah kalo tum tho alawm. Mipa ramkal tur kan nih hi" a han ti a. Vawra a insiam fel hnu chuan Rualchhingite lo lam pan tur chuan an kal ta a.

         Rualchhingi te lo an zuk thlen chuan Thlamah an han ţhu hahdam phawt a. Chhingite chuan Buh an tuh hma deuh avangin an buh tepawh kutphah chen vel hi alo ni tawh a. Thlifimin a chhem zawng pawhin a awn ve dial dial thei tawh ani. Hnuh lak an la ţan loh deuh avangin a hnim ve bam tawh mai a. Vawra chuan," Chhingi hei Buh ţo in nei ţha khawp mai . Thlawhhma hi in la zau viau ang a?" a han ti a. Chhingi chuan," Nia,rin ai tak chuan hei a ţo ţha phian a. Ka pa hian daihnai lam a chuh ve duh miahlo lehnghal a. Lal upa ve lem hi mi duhloh lai lai hi kan nei kual ani mai. A hnathawk a buai ho hi min ngaihtuahlo lutuk a" a ti nang nang a. Hausiami pawh chuan,"Heu tuna kan lo pawh hi han en la. Hmun nuam lai deuh pawh a awmloh hi. Ka pa hi chu a thu a duh leh lutuk ţhin a. Ka u lah hian alo thlawp vei zar zar lehnghal a. Hmeichhe thu lak hi an hreh khawp a" alo tive bawk a. Vawra chuan nui sang pah hian," I pa hi zawng mi ţha tak anih dawn hi. A ţhalai chang zo lo mah ula mi ţhate chu khuanu malsawmna pawh an dawng nge nge an tia lawm. Khamkhawp thar loh lai pawh inneih ka ring hauhlo mai" alo ti a. Rualchhingi chuan,"Nia,Hreiha zawn chu kan la thar ve deuh ziah a. Mahse kan hahpui thung alawm. Lam hnai deuahte nei ve ila zawng kan tan pawh a awlsam deuh tur hi nia" a han ti leh a. Vawra chuan," Taima taka in thawhchhuah bak a hlu a awm chuang dawn em ni" alo ti thuai a . Rei vaklo an chawlh hnu chuan Rualchhingite unau chu Maian leh Thurte ,Uiluvun tihvel dapkhawm turin an chhuak a. Vawra pawh Therhlo kah tur zawngin lo mawng lamah chuan a chhuk thla ta a. Maian sik mawlh mawlh pah chuan Rualchhingi chuan," Ka u,U Vawra hi tlangval fel tak anih chiah mai. A nei thei tu zawng an vannei dawn mange" a han ti a. Hausiami chuan," Chu a zunah ilo uai der elo" nui hak hak pah chuan a han ti a. Rualchhingi chuan," Nih pawh ani vel tawh ang. A haw hun tur hi ka huphurh lawk riau mai lehnghal a" a han ti leh a. Hausiami chuan," Khatin mikhual tlangval zunah an uai kur dup ngailo e . Engang mi nge annih pawh hriat va ni suh. Lo vei vak lo la a ţha zawk ange" a han ti thuai a. Rualchhingi chuan," Mikhual tlangval mah nise an fel phawt ahnu. Tunah pawh lo ngai mah rawh. Sa kan phur hawng ngei ngei ang" a han ti vei sa sa a. Anhnah chu an lak khawm chhunzawm mawlh mawlh a.

         Vawra pawh lo mawng lama ngaw chhungah chuan a lut thla zel a. A ram a la chang ţhain Nghalrual hnuhma phei chu a chiar dup mai a. Vawra chuan sa liantham kah pawh tum lemlo in Sakhi hniak a zawng ta a. Lo aţanga hla fe a vah hnu chuan Sakhi hnu tharlam tak mai chu a hmu ta hlauh mai a. Sakhi hniak chu a chhui zel a. Rei fe a chhui hnu chuan Thlanvawng hmunah hian a chhui lut ta a. Vawra chuan Thlanvawng rah tla chu Sakhiin an tlan ngei anih tih ahmu thei ta a. Fimkhur lehzual chuan a mit an len kual a . A sa chhui chuan alo hmuh hmasak palh hlauh chuan atan kah ngaihna a awm dawnlo ani. Hnim buk phenah te chuan biru phei zelin a ke vawikhat a pen chhuah apiangin an chawl leh det ţhin a. Thui vaklo akal leh hnu chuan Sakhiin a Thlanvawng rah a tep ri chap chap ri chu a hre thei tawh a. A ke a per leh zauh ţhin tih pawh a thawm aţang chuan a hre thei ta. Thawm lo chhuah a lam chu ngun takin an veh phei zel a. A hnaih phei zel hnu chuan hla vaklo a Sakhi patuaiin duh thawh taka Thlanvawng rah a lo ei mawlh mawlh lai chu a va hmu ta . Vawra chuan uluk takin an tin vang vang a , Silai chu an hmet puak ta dur mai le. Sakhi patuai chu a zuang zawk a,a piah deuh Thlanvawng kung pakhat kiangah chuan tlu pheiin a leng awt awt mai a. Vawra chuan Silai zen pawh sawh ta lemlo chuan a pan phei ta nghal a. Sakhi chu alo la leng at at a. A lei chhuahin a thaw hrawk hrawk a. Mahse a zakdawh taka Vawran a kahn a avang chuan reiloteah chuan a chatthla ta a. Vawra chuan Sakhi taksaa Silai luhna hnuhma chu hnahthelin an hnawh a. Tichuan hlim takin a Sakhi kah chu puin lo lam chu a panpui ta a.

          Rualchhingite unau chuan Silai ri an hriat khan an lo phur tawh hle mai a. Thlamah ţhuin Vawra lo thlen hun mawlh chu an nghakhlel tawh a. A helhawlh chu thlam namthlakah te chua an han ding leh uk ţhin a. Chutia nghakhlel taka an awm lai chuan lo mawng lam aţanga Vawra a Sakhi kah nen a lo chho mek chu an han hmu ta a. An khek chul mai a. Rualchhingi chuan," Ka u en teh,ka rin dan chiah anih khu" a ti chul mai a. Vawra Thlam alo thlenchhoh chuan Rualchhingi chuan,"U Vawr,a van lian em em ve. Khawi kalo chawi ang che" tihpahin Vawra Sakhi put chu alo ban ve sek mai a. Vawra chuan a Sakhi put chu Thlam namthlakah chuan an dah thlana. Hausiami chuan," Pasalţha nge nge ,i zarah sa tuihang kan hawp dawn zu nia" hlim hmel tak chua alo ti ve a. Rualchhingi chuan," U Vawr,Sakhi hi keiman ka phur anga. A kaptu chu an awl ţhin kha" phur tak mai chuan a rawn ti a. Vawra chuan,"Keiman ka pu hawng mai dawn lawm. I hah lutuk ange" alo ti thuai a. Nula tan chuan lam hla aţanga Sakhi patuia han phurh haw chu a tihchi vakloh ani. Reilote an ţhutkhawmuan leh hnu chuan hlim takin khaw lam chu an pan leh ta a.

          Rin aia an hlawhtlin hma avang chuan khaw kawtchhuah an thlen pawhin ni chu ala sang hle mai a. Behliang mun hun vel ani awm e. Kawtchhuahah chuan an han chawl rih phawt a. Midang lo chawl ve te chuan Vawra Sakhi kah chu an lo lawm pui ve a. A chek a tui dawn ziate chu an sawi chamchi mai a. Rei tawk fang an chawlh hnu chuan khaw lam panin an kal leh ta nghal a. Khua an va luh chuan mi anlo vang hle mai a. Vawra chu a ngaih a ţhat chiahloh avangin hmanhmawh takin Rualchhingi te unau chu a kal pui hlawk hlawk a. Lal mual an han thlen chuan mipui an lo tlim hmur mai a. Lal in kiangah chuan Sial engemawzah leh a kaitu ni awm tak tlangval sawm rual vel chu anlo ding a. Mual laiah chuan tlangval lian ve thek thawk pakhat hi alo in hrosa tun tun mai a. Vawra chuan," Chhingi,Sakhi hi phur thlain in lamah lo chhuk tawh u" tiin a Sakhi puak chu Chhingi phurah chuan an hlang a. Chhingi chuan," U Vawr,fimkhur rawh aw" a han tisap a. Vawra chuan alu lo bu nghauhin thil chiang zawk hriat tum chuan lal in lam chu a pan ta nghal a.

          Lal muala tlangval lo ding chuan," Lal pa kha lo chhuah tir rawh u. Hetiang ringawt chuan min hawn tir theilo ang" alo ti lung lung a. Tlangval pakhat chuan,"Ralman ,duh tawk teh. A mualpho thlak lutuk,i haw teh ang" tiin lo khap a han tuma. Ralmana chuan," Tumahin minlo dang suh u. Lungsum lal ka biak hma chuan ka lungawi dawn lo. Lo chhuah tir rawh u" a ti chhur chhur mai a. Lungsum lal lah chu lal inah chuan a tawm tlat a. Pawn lamah chuan a tlangvalte chuan an veng bawk a . Vawra chuan a kiang mai a patling ding chu thilawmzia a han zawt a. Patling chuan,"Chhawchhun fak hun velah khan kan khaw ţhenawm Vawngkawt khaw lal fapa leh a pasalţhate kan lal fanu beiseiin anlo kal ani awm a. Man le mual tur thlengin an rawn inring lawk vek a. Mahse kan lal khan Lungchuan khaw palai te nen remna alo siam tawh avangin Vawngkawt khaw palai te chu lo hnarin thil awmzia alo hrilh a. Vawngkawt khaw lam chuan Lungchuan kan lal fanu man atan chuan Ţhi leh Dar tamtak an rawn keng bawk a. Mahse kan lal chuan alo pawm sak duh ta silo a. Vawngkawt khaw lam chu an thinrim deuh hle mai a. Khaw inţhenawm mai kannih avangin kan lal fanu kha an chan theih an in beisei deuh ani. An duh anga thil akal taklohah chuan lal inah thlengin buaina an siam ta mai a. Kan lal chuan a be duh talo a. Lal in aţangin ahnawtchhuak zui a. Saw Vawngkawt pasalţha thinrim ,lungawi theilo saw a inhrosa ta vak vak mai ani. An lal fapa meuhin dan a tum pawhin a dang theilo ani" a han ti a. Vawra chuan,"Engatinge Lungsum tlangvalhoin an dan mai loh" a han ti leh a. Patling chuan," Kan lal in kutthlak rihlo tura a tih avang ani. Kan lal chuan a fanu vanga thisen chhuah chu a duhlo ani. Lal ina a luh loh nan an dang mai a. Kan tlangvalte pawhin han khawih deuh chu an chak ve thova . Mahse lal thupek angin tumahin kut anla thlak ngamlo anih saw" a han ti a. Chutih lai mek chuan Lalchungnunga chu lal in aţang chuan a rawn chhuak ta a. A tlangvalte chuan din hualin an veng a. Chutah lal chuan," Vawngkawt khaw palaite khan minlo hrethiam ula. Ka fanu chungchangah chuan ka lo sawi tawh ang khan Lungchuan khaw lam nen inremna kan lo siam vek tawh a . Ka fanu man atan chuan in inhuam zau viau ani thei e. Mahse rosum vangin kan inrem tawhna chu ka tidanglam dawn lo ani. Buaina siamlo zawngin kan inţhen thei maiang chu tihnak laia a pawngpawrh zawnga in rawn che ta mai hi mim zahlo hle mai. Tunah hian duh chuan ka chimih ţhak thei che u. Ka ngaihdan ka thlak hma hian in tlangval hi hruaiin ka khua hi chhuahsan thuai rawh u" a rawn ti ta a. Vawngkawt pasalţha Ralmana chuan," Lal pa,khaw inţhenawm mai kan ni a. Vawi tamtak pawh kan inpui tawn ţhin a. Kan lal fapa tana in fanu pek chu thil harsa ani em ni. Khawnge Lungchuan khua remna i siampui te chu an awm a. An mahni chawp chuan ka phil vek thei ang che u" ala ti rap rap mai a. A kaihza vengtu niawm takin akiangah chuan tlangval pahnih an ding ve bawk a. Vawngkawt lal fapa leh a upa hruaite lah chuan an pasalţha tawrawt zet mai chu an dang ngam silo a. Lungsum lal bawk chuan," Ka inremna siampui Lungchuan thlenga i hmer tel angai lo e. Tunah khan khua hi chhuahsan nghal rawh u. Anih loh chuan nungdamin in chhuak hauhlo ang" a han ti leh a. Vawngkawt pasalţha Ralmana chuan,"In remna i siampui ngei ani tih anmahni ka ngei aţangin ka hre duh ani. Ka hriat hunah ka lungawi thei mahna" a han ti leh a. Chutih lai tak chuan Vawra chu mual laiah rawn chhuakin," Kei hi Lungchuan khaw tlangval ka ni e. Lungsum lal Lalchungnunga hian a fanu chu kan lal fapa nen a inneihtir a remti tawh ani. I lung a awi tawh em" a rawn ti chang fal mai le. Ralmana chuan Vawra chu an en vang vang a. Chutah nuihzat hmel fe hian,"A tirah khan khawnge ilo bihruka. Thudik rawn sawi vat la zawng hetiang buaina hi kan tawk lo tur" tihpah chuan a Chempui chu a iptepuiah an thun a. Vawra lama lo kal hnai pah chuan," Kan khaw chanpual minlo lak khalh avang hian kan ngawi renglo ang tih lo hria ang che" a han ti a. Vawra chuan," Ani maw,kalo hre reng ange. Tunah chua i kal thei tawh ang" a han ti let ve kauh a. Ralmana chuan," Ka kal leh kalloh chu nangma lo rel tur a awmlo e. Duh leh he khuaah pawh hian ka awm kumkhua ţhak ang chu" a han ti leh. Mipui leh lal chuan ngawi rengin an lo thlir ţhup a. Ralmana chu a kal mai dawn emaw an tih lai chuan a tlam thut a," Khawnge Lungchuan tlangval chu kan herhtliak law law teh ang" tihpahin Vawra chu a rawn bawh thut mai a. Mipui chu an ţe tuarh a. Vawra lah a lo inring hman narawh e. Amah rawn bawh thluk tawp tumtu Ralmana chu a kawngah lo man chatin na lua awmlo tur hian a lo vawrh thal tawp mai a. Ralmana tlu thal huang mai chua Lungsum tlangvalte chuan rawn khawih zui mai an tuma . Mahse Lalchungnunga chuan,". A tawk tawh e. Vawra nang pawh insum rawh. Tumah che tawh suh u. Vawngkawt lam pawh kha in pasalţha hruaiin kir leh mai tawh rawh u. Thil awmzia sawi turin ka palaite kalo tir ange. Vawra nangpawh ka khawchhung buaina ah hi chuan lo inrawlh rihlo la a ţha ang" a rawn tih takah chuan Lungsum tlangvalte pawh chuan Ralmana chu an khawih ta lova. Ralmana chu lo thochhuakin Vawra chu a melh khui a. Chutah ring leng lawng hian," Tunah chuan kan kal ang. Mahse Lungsum lal in heti maia min kaltir erawh ka theihnghilh ngai tawhlo ang" tih pah chuan a in her vut a. A hote nen chuan an kal ta nul nul mai a. Vawngkawt upate leh lal fapa chuan Lungsum lal hnenah chuan ngaihdam an dil mawlh mawlh a. Lungsum lal chuan hrethiam takin angaihdam thu leh a fanu midang laka alo pek tak avanga pawi atih thu a han sawi a. Tichuan Vawngkawt khaw lal fapa leh a zuitu te chu an khaw lam pan chuan an in kai hawng leh ta a.

          Mipui an ţin darh hnu chuan Vawra chu lal in a in lama leng lawk tur chuan a sawm a. Lal in a han luh chuan Lal chuan," Vawra, i huaisen hle mai. Ka lo dan che avang khan min hrethiam la. Lal ka nih angin tuma tana pawilo tur zawnga ro ka rel angai ani. Engvangin nge kha tlangval kha nungdamin i chhuah iti mai thei a. Mahse ka hrilh ang che. Kha tlangval kha ka khaw pasalţhate lo thah tir ngawt ila. Kha aia buaina nasa zawk kha kan tawk ngei dawn ani. Vawngkawt khuate zawng keini aia khaw te daih anni a. A hlauha zawng chuan hlauh tur an awm lova. Mahse indo a chhuah palh chuan hnehna changtu zawk pawhin kan tuar nasa em em ţhin a. Chuvangin atheih chinah chuan inremna siam zel hi a ţha ani" tiin thil awmzia ahan hrilh a. Vawra pawh chan hrethiam takin," Ni e Lalpa,ka hrethiam alawm. I rorel dan a felin a fing khawp mai. Khatia tlangval lo inhrosa kuk kuk ka hmuh khan abei ngam an awm talo emaw kalo ti hman deuh alawm mawle" a han ti a. Lal chuan nui huah huah pahin ," Awm tehreng e a. Nunna hi a hlu a. Kan inzah sak hram hram tur ani" a han ti a. Thil engemaw an sawi dun hnu chuan Vawra pawh a thlenin lam panin a kal leh ta a. Rualchhingite in a zuk thlen chuan Saikapa chuan Vawra Sakhi kah chu alo puah mawlh mawlh a. Vawra lo haw a han hmuh chuan Saikapa chuan," Vawra, ilo haw tawh ani maw. Hei i zarah sa tuihang kan hawp dawn zu nia" alo ti var a. Vawra chuan,"Ka vannein ka tawng fuh hlauh anih kha. Khawnge kan pui ang che" tihpahin Saikapa Sakhi puah lai chu an pui nghal mawp mawp a. Sakhi an puah fel hnu chuan insil faiin an titi dun a. Rualchhingite chu ei relin an buai hle thunga. Zanriah eikhamah chuan Vawra chu a thlninah chuan an ţhu khawmuang deuh a. Saikapa chuan nula rimpuiah a sawm tlat avangin a zui chhuak ta nge nge a.

           Nula in pana an kal mek lai chuan Saikapa chuan," Zanin chu kan khaw nula hmelţha kan rim pui ve reng reng ang che" a han ti a. Tichuan Lungsum khaw nula hmelţha Liansangi rim tur chuan an kal ta a. Liansangite in an va thlen chuan in leng anlo khat deuh ţhap mai a . Chutia khawnbawl fapa leh Vawra lo leng lut an han hmuh chuan ţhutna an lo kian sap sap a. Mahse Saikapa chuan Vawra chu kawngka bul lamah chuan a ţhutpui thunga. Liansangi chuan," U Sai,khawilam tlangval nge ilo hruai tak ni" alo ti var a. Saia chuan,"Hman zana lo lenpui rawh itih ngeia kha mawle. In hriatloh der vel chu" nui huah huah chung chuan a han ti a. Liansangi chuan," U Saia ţhin hi aw. Iti zahthlak thei em mai" nui sen sen chungchuan a han ti a. Tlangval pakhat chuan," Kan nula hmelţha zawng zawngin khiang min awihsan vek zawngin lunglen vangin kan thi thei mai dawn asin" a rawn ti a. Liansangi chuan,"Khiangawi lah lo e. Kan tlangvalte lo thlan tur dang reng ka hrelo mai. In zara muang leh hlim taka awm thei kan nih hi maw" alo ti thuai a. Thudang sawiin an titi chho zel a. Chhun lama an khaw boruak vel leh an lal rorel thiam ziate . Vawran hnehsawh taka Ralmana a vawrh thal ta mai mak an tihthu te chu an sawi liam liam a. Liansangi chuan Vawra chu a melh no thei khawp mai a. Vawra erawh engmah hrelo ang maiin a anui huah huah reng a. Tlangval pakhat chuan," Kan khual tlangvalin Vawngkawt pasalţha tawrawt Ralmana an theh thal mai kha chu chawh kalo ti vai vai asin. Ching phar lawp lawp se nia ka tih" a rawn ti chhuak hlawl mai a. Tlangval pakhat lo ţawng ve lehin," Ka lo hlauhthawnpui hman viau a. Mahse hei kan khual tlangval hi rin ai daihin alo che rangin alo chak mai a. Han vawrh nawn leh sela kalo ti khawp a" a rawn tive a. Vawra chuan,"Min rawn bawh ţhelh palh hlauh anih kha maw. Chuti nilo se zawng nula ina nui khi vun vun tur pawh kan awm tawh hlei lawng e" a rawn ti ve a. Rei ngial an len hnu chuan midang haw hmain Saikapa leh Vawra chu Zawlbuk lamah an lawi ta a.

          A tuk fehrehsan bawr velah chuan naupang rual sava veh chuan an khawdaia ruang lubung sa let reng mai chu an va hmu ta hlauh mai a. Hmanhmawh taka tlangvalte hrilhin lungsum tlangvalte chuan lal an hriattir ve leh nghal a. Tlangvalten mitthi ruang an va en chian nak chuan an khaw tlangval Selţhuama ani tih an hre thei ta tlat mai. Lal leh upate chu lal inah lut khawm nghalin hmalak dan tur an sawiho ta a. Lalchungnunga chuan,"Hei rinloh tak maiin kan khaw tlangval Selţhuama zing sava veh tura kal chu tu tih hriatloh ten thatin alu an lo tan sak zui a. Engtia hma han lak chi nge ni dawn le" tiin a upate chu ahan rawn a. Lal upa pakhat chuan," Lal pa,kan tlangvalte hian min rawn bei tute hnu hi chhui phawt sela. An kalna lam a zirin rin zawn tur pawh an awm thei ang" a rawn ti a. Upa Challiana chuan," Lal pa,keizawng kan nimin boruak aţang reng khan rin tur awm ang chu a chiang kuar maiin ka hria. Kan tlangvalte hi tirhchhuah a umzui nghal a ţha mai lo maw" a rawn ti a. Chutah Lalchungnunga chuan," Ni e,kan tlangvalte tirha umzui nghal mai chu thil tih awm tak ani. Tlangaupa,kan tlangvalte chu lal muala kalkhawm vek turin kokhawm ta che" a han ti a. Tlangaupa chu chhuak nghalin khawchhung thlertinah chuan," Tlangval zawng zawng lal muala kal khawm vek tur " tiin a au lauh lauh maina. Reiloteah chuan tlangvalte chu lal in lamah chuan an rawn kal khawm ţuk ţuk a. Lalchungnunga chu lal in leikapuiah dingin a tlangvalte hnenah chuan," Lungsum tlangval chhuanawm tak tak te u. Vawiinah hian kan beiseiloh tak maiin kan khaw tlangval Selţhuama chu ral kut tuarin a thi hlauh mai a. He thihna hi lal leh upate chuan pawi kan ti em em a. Kan tlangval hetiang tak maia lo kut lo thlak duh tu chungah hian phuba lak ngei kan duh ani. Kan tlangval thattu hi tupawh lo ni rawh se,eng khawmi leh sa pawh lo ni rawh se. Hrem lohin kan chhuah hauh tur ani lova. A ţul anih chuan khua pawh kan run mai tur ani" ahan tih chuan tlangvalte chu an au dur dur mai a. Lal bawk chuan," Vawiin la la hian kan tlangval thattu te hi kan umzui nghal anga. Kut thlawn kan tuar tur anilo ang" a han ti leh a. Lal in thu a sawi zawh chuan val upate chuan an hnuchhui dan tur chu an han sawi ta a. An khaw pasalţha hovin mi sawmhnihin hnu chu an chhui.hmasa phawt anga. Thil awmdan a zirin a nawlpui chu an thawk chhuak dawn ani. Val upaten tlangval sawmhnih an thlanchhuah hnu chuan Vawra chu kal ve a tum ta tlat mai a. Val upate chuan lo dangin a kal ve chu an phalsak talo a. Lal in alo hriat chuan Vawra chu kohin Vawra hnenah chuan," Tlangval,inhuaisenin ka khaw tana i inpekna hi a ropui lutuk. I chungah pawh hian ka lawm em em ani. Mahse tunah chuan i kal ve theilo ang. Ral kutah lo va thiin emaw,hliampui tuarin emaw lo va awm ta la in lal hnenah eng thu nge ka sawi tak ang. Him taka an hmu leh lo che anih chuan hei aia thil ţhalo zawk hi a thleng dawn ani" ahan ti a. Mahse Vawra chuan," Lal pa,minlo hrethiamla. He thil hi nimin lama ka thiltih vang pawh ani thei a. Ka kal ve ngei hi a ţulin ka hria ani. Tunah hian engthil nge kan va tawn dawn chu ka hrelo a. Mahse nungdama kalo haw leh ngei hi ka ring tlat ani.

Ka lo thi ta anih pawhin kan khaw ho hnenah chuan huaisen takin ral kuta a thi e minlo tihsak dawn nia. Min dan tum mah la ka kal tho dawn ani" a han ti leh a. Lal chuan," Tlangval,buaina irhchhuah chhan hi thil hote ani ţhin ania . In khaw lalin a pasalţha ka hum zolo tih a hriat hunah chuan min rawn beih a duh hial ngei anga. Chung hunah chuan engmah siam ţhat theih ani tawhlo ang. I khaw lal hnenah chuan i pasalţha chu a duhthlanna ngeiin akal ani lo ti pawh ni ila. Tu khaw kha in nge min awih sak ang. Chuvangin tlangval,buaina dang tawh belh ka duhlo e. He thil hi zawng ka tlangvalten an chingfel thei ang" a han ti a. Lal meuhin a khap tak tlatah chuan Vawra chuan a hmahruaitute chu a zui ve talo a. A nawl pui khaw lama lo awmho zingah chuan a awmve ta zawk a. Lal in phal lemlo mahse a ruk a kal ve chu a tum ruh hle ani.

           Selţhuama an thahna lai aţanga hnu chu chhui ţanin Lungsum tlangvalte chu nilengin ram pa lailengah chuan an vak kual a. A tawpah chuan an hnuchhui chuan Vawngkawt khaw lam chu a pan ngei ani tih an hre ta. An thil hmuh leh hriat ang ang te chu lal hnenah chuan an rawn thlen ta a. Lal chuan," Ka rin ang ngeiin Vawngkawt lam an lo nih dawn chu le. Tunah hian kan khaw tlangval za rual zet te Vawngkawt khaw lama kal turin inbuatsaih nghal sela. Mahse khua in luh hmain thil awmzia zawtfiah turin Vawngkawt khaw lal inah in han kal phawt tur ani. He thil hi ama hriatpuia tih alo nih chuan khua chu in la nghal anga. Ama hriatpui loh anih erawh chuan a titu chu zawngchhuakin hremna in pe tur ani. Tin ka tlangval an lo thah aiah lei an chawi angai bawk ang" a han ti a. Lal bawk chuan," Fimkhur takin va kal ta ula. Kan tlangval phuba chu va la ngei ang che u. Kan tlangval thattu te hi Vawngkawt khua anlo nilo anih chuan eng pawi mah in va khawih tur anilo" a han ti leha. Tichuan Lungsum tlangval za rual zet te chu Vawngkawt khaw lam pan chuan an kal ta nghal a. An chhuah hnu chuan lal chuan Vawra chu an zawn tir a. Mahse khuaah chuan alo awm ta hauhlo mai a. Lalchungnunga chuan Vawra a dang zo lo chu pawi a tiin ral kuta ava thih mai chu a hlauthawng ru hle ani.

          Vawngkawt hi lal Zamlova lalna khua niin in zahnih vel zet chu anni awm e. Lungsum aţang hian nileng kal vel awrh chauh ani a. Khaw inhnai tak annih avang hian an in pawh viau nghe nghe a. Chuvangin Lungsum lal pawh hian khua va run hmaa palai tirh phawt kha a duh ani. Lungsum tlangvalte chu zankhuaa an kal hnuin varţianah Vawngkawt khaw daiah an ţhu fel der tawh mai a. An val upa Liansuama leh an pasalţha hovin mi sawm vel lai mai chu khuaah chuan an lut hmasa phawt dawn ani. Val upa Liansuama chuan Vawra chu anmahni zui ve tura a duh avangin Vawra pawh khuaa lut tur chuan a inbuatsaih ta a. Khua avar fel ta maw tihah chuan Vawrate chu Vawngkawt khaw l pan chuan an kal ta a. Khua an han luh chuan eng thil danglam mah an hmu lova. Khaw mipuite pawh chuan rinhhlelh hmel pu pawhin an lo melh chuang lem hlei lo a. Ţhenkhat erawh chuan chutia tlangval puitling ţhiau an ralthuam kenga lal in lam pana an kal chu mak tih hmel takin anlo thlir thung. Lal in tual an han thlen chuan Vawngkawt lal leh uapate chu leikapuiah an lo titi mam mam a. Chutia tlangval sawm rual vel lal in lam pana lokal an han hmuh chuan an lo thlir ţhap a. Lal in tual an rawn thlen chhoh chuan lal Zamlova chuan,"Lungsum khaw pasaţhate lah ni reng che u in. Hawh teh u inchhungah i lut ang u" alo ti thuai a. Tichuan lal inah chuan an lut ta a. Lal ina an luh fel hnu chuan lal Zamlova chuan,"E khai, in hmel hmuh kan lo beisei reng tawh a. Nimin piah lama kan tlangvalten in lung an lo tiawilo deuh ani awm a. Mawilo taka an rawn chet avangin in mi ngaihdamna ka han dil nghal ni sela. Lei chawi angai anih pawhin kan chawi mai ani ang chu" a han ti dap dap a. Lungsum val upa Liansuama chuan,"Ni e lal pa,i tlangvalte chu mawilo tak chuan an rawn che ngei a. Lal inchhung ngeiah pawh buaina an rawn siam bawk ani. Mahse kan lal chuan zangaihna lan tirin in pasalţha Ralmana tihloh kha chu tumah reng kut kan thlak lova. Him takin kan lo kal tir leh ani. Mahse kha buaina kha kan rawn kal chhan ani lova. Nimin zing lamah kan khaw tlangval pakhat lubungin khawdaiah alo let reng mai a. A thattu te hnuhma kan han chhui zui takah chuan in khaw lam a pan ngei tih kan hria a. Thil awmzia hriat tumin kan lo kal nghal nal nal ani. He thilah hian lal hi a inrawlh loh ngei ka beisei" a han tih chuan Vawngkawt lal leh upate chu an ka ho mai a. Lal upa pakhat chuan," Kan mi tirthte chu tluang takin anlo kir leh ngei a. Mahse chutiang thil reng reng kan lal hriatpuina a tih a awm lo ani. Engmah kan lal hian a hriatpui lo" a rawn ti a. Lal pawh chuan," In khuaah buaina kan siam tih chu kan pawm ngei a. Mahse in khaw tlangval a ruk a rala that tur khawpa phuba lak chak leh dawihzep chu kan ni biklo ania" a rawn ti leh a. Chutah Liansuama chuan,"Kan hnuchhui khan in khaw lam a pan ngei si alawm. Chu a chhapah i pasalţha Ralmana ţawng duhdan aţang phei chuan nangmahni lo tumah he thila in rawlh hi an awm kan ringlo ani" a han ti leh a. Lal chuan," Kan diklohna chu kan pawm a. Mahse dawt a min puhna erawh thudiklo anih avangin sawi tur kan nei love. Ka khuaah lokalin in duh dan dana ro rel in rawn tum amaw" thinrim hmel tak chuan a han ti a. Val upa Liansuama chuan," Lal pa, i khuaah hian ro rel kan tum hauhlo a. Mahse thudik hai chhuah nan chuan kan thisen far tawp thleng rakin kan bei ang. Tunah chuan kan sawi duh kan sawi zo ta a. Kan kal tawh ange. I khua hi kan rawn run ta anih pawhin min dem.theilo ang" a han ti ta piap piap mai a. Vawngkawt lal leh upate chuan Lungsum khua nena han indo em chu an ngam silo a. A tawpab chuan lal chuan," Thil pakhat ka tihsak thei ang che u. In tlangvalte that tur chuan tuma ka tir hauhlo a. Amaherawh chu ka fapa in khuaa rawn zui ve tute chu ka kohsak thei ang che u" a han tih chuan Lungsum lampang pawh chuan an pawm thei ta a.

Reiloteah chuan Lungsum lama an lal fapa zuitu tlangval an koh te chu an lokal khawm ţak ţak . Mahse Ralmana hmel reng reng alo lang talo mai a. Lal chuan a upa ,Ralmana pa hnenah chuan," Mana pa, fapa hi inah a awm nange?" tiin a han zawt a. Ralmana pa chuan," Zingah kha chuan awm ngei kha mawle" alo ti vat a. Lal Zamlova chuan Ralmana ko tur chuan a khaw tlangval pahnihte chu ahan tir nghal a. Reiloteah chuan tlangval pahnihte chu anlo tlan kir nghal a. Lal hnenah chuan," Lal pa ,Ralmana chu inah a awm ngei a. Mahse a lokal duh hauhlo mai" an rawn ti ta a. Lal chuan a tlangvalte hnenah chuan," Zuk kal leh ta ula. Lal in lo chho ngei ngei rawh se ati e han ti ang che u" a ti leh a. Tlangvalte chu an kal leh ta nghal a. Reiloteah chuan angaite bawkin Ralmana tello chuan anlo chho leh a. A tawpah chun lal chuan a tlangvalte chu Ralmana hruai lui tur chuan a tir ta tawp mai a. Mahse tlangvalten Ralmanate in an zuk thlen chuan Ralmana chu inchhungah in kalh hnanin ţan alo khawh tlat mai a. Thil awmzia chu lal hnenah an han thlen leh ta a. Lal chuan Ralmana pa hnenah chuan," Mana pa,i fapa hi nimin lamahte chhuah vahna a nei reng reng em?" tiin a han zawt a. Ralmana pa chuan,"Lal pa,ka fapa chu kan mi tirhte ruala lo haw loin nizan lamah khan khua alo lut ve chauh ani" a han ti a. Chutah tlangval lal fapa zui vetu pakhat chuan," Lal pa,kan pasalţha chu kan rualin alo haw velo ani. Engtik laiin nge a pen bo kan hrelo" a han ti a. Chu thu ahan hriat meuh chuan lal Zamlova chu a thinrim ta em em a. Lal ina vei kual thauh thauh pah chuan," Ralmana chu i zuk hruai lui dawn teh ang u" tih leh chhuah a rual ta mai a. A tlangvalte chuan an rawn zui ve nghal a. Vawrate pawh chuan engmah sawi set set loin an zui ve ta mai bawk a.

       Ralmana te in an zuk thlen chuan in chu a chhung lam aţangin alo inkalh vek a. Lal Zamlova chuan," Ralman ,a enga kha tia tawm bo reng nge maw inih le. Thu han zawh fiah lawk che ka duh mai ania. Lo chhuak la,i chungah eng pawi mah a thleng lo ang" a han ti a. Chutah inchhung aţang chuan Ralmana chuan," He khaw tan hian theihtawp chhuahin ka bei a. Ka thlavang pawh i hauh ngamlo amaw? Lal ni tlak pawh inih hrep loh hi. A ngam chuan min rawn luhchhuak rawh se" a han ti a. Chutah lal chuan,"I thlavang chu ka hauh na rawh e. Thu zawhfiah duh che ka nei mai ani a. I dik anih chuan i chungah engthil mah a thleng lo anga. Mahse ilo diklo ta anih chuan hremna chu i pumpelh hauhlo ang" a han ti leh a. Ralmana chuan," Lungsum khuate khan mualpho takin min siam asin. An laka phuba lak ngei kha ka tih makmawh ani. An ngam anih chuan an tlangval lu hi rawn la rawh se" a rawn ti ta mai le. Chutah meuh chuan thudik chu alang chiang ta. Lungsum lam chuan va bawhchilh mai an duh tawh a. Mahse val upa Liansuama chuan," A thah em chu kan that tur anilo. Pasalţha ani a,thih a duh anih leh a duh kan thlan tir dawn nia" a han ti a. Vawngkawt lal cuan Lungmam khua te hnenah chuan," Tunah chuan thudik in hre ta a. In kuta awm ani tawh e. Mahse khawchhungah erawh thisen in luan tir tur anilo" a han ti a. Lungsum khaw lam tan pawh han man nghal ngaihna a awm biklo a.Pawn lamah chuan alo chhuah hun nghakin an ding ţhap ringawt mai a. Rei fe an nghah hnu pawh chuan Ralmana chu alo chhuak duh ta reng reng lo mai a. A tawpah chuan Vawra ning lutuk chuan Sevun chhah ţha lai aţanga siam Phaw kengin luhchhuah a tum ta mai le. A kut veilama Phaw kengin lehlamin Chempui a hum thunga . Midangin an dan beh hma chuan rang zet mai hian Luhkaah a zuang kai zawk mai a. Chutih rual chiah chuan inchhung lam aţangin Silai alo puak ţhuai a. Mipui lo awmve te chu ţe chungin an tlan darh chum chum a. Vawra pawh chu Luhka aţang chuan a tla thla tawp mai a. Mahse a vanneih a siamin Silai mu kha phaw khan alo dang pial deuh niin Vawra phaw ken pawh chu a khi phawk mai a. Vawra chuan hmanhmawh angai tih hriain Luhkaah zuangkai lehnghalin sumhmun ah zuang lut zuiin Kawngkapui chu an phih thla ţhuai mai a.. Kawngkapui a aphih thlak rual chiah chuan fei alo dawk zawk a,Vawra nak nem chu rawn su thawiin a thler phei diai nghal a. Chutih rual deuh thaw chuan Ralmana chuan Chempui nen Vawra chu a rawn bawh phei ta a. Vawra pawh lo in veng nghalin Ralmana chuan Kawngka biangte chu a rawn sat ri pawp pawp mai a. Midang tan han luh belh ngaihna vak awm heklo leh. Inchhung lamah chuan an ri ta bur bur mai a. Pawn lama awm Lungsum tlangvalte chuan an bawr huk chuan an inhliam ţeuh ang tih an hlauh avangin pawn lamah chuan an ding ţhup mai a . Inchhung lama thawm chu anasa hle mai a . Bang te chu an rawn sat tlang leh pawp pawp ţhin a.Ralmanan Vawra sah chhawk hmawk tum a rawn vai leh chiah tihah chuan Vawra chuan a Chempui hriam lo lam chuan Ralmana ban chu alo sat nghek mai a. Ralmana chuan a Chempui chu a thlauh rawk a . Chutih rual chuan Vawra chuan Ralmana chu a bawh thal tawp mai a. An han in chai tak tak chuan in chu a sawi lawp lawp a,a ri dup dup mai a. A tawpah chuan Vawra chuan Ralmana chu a rek bet ta tlat mai a. Ralmana tan chet ngaihna awm tawh heklo le. Vawra chun ring tak mai hian," Ka chelh bet tawh e" a han ti a. Lungsum tlangvalte chu an rawn lut nghal sap sap a. Va upa Liansuama chuan," Vawra,i hneh kan ring tho a. Kan rawn pui ta lo che anih kha" nui var var pah chuan a rawn ti a. Vawra chuan,"Min ngaihsak vak lo ni maw. Ka lu ka hloh lo chauh alawm mawle" nui ţhaw chung chuan alo tive a. Tichuan Ralmana chu phuar chungin an chhuahpui ta a. Ralmana mi thah lu,a iptepuia alo la dah reng pawh chu an la nghal a. Pawna an chhuah hnu val upa Liansuama chuan Vawngkawt lal hnenah chuan," Lal pa, i pasalţha hi a thih leh dam.thu kan rel tur ani lova. Kan khaw lamah kan hruai hawng dawn ani. Kan lal leh a mi thah chhungten an ngaihdam theih chuan damin kan lo chhuah leh ang. Mahe lei chu in chawi angai tho dawn ani" a han ti a. Lal Zamlova chuan," Tunah chuan in kuta awm ani tawh alawm. In duh ang chuan va rel ang che u. In sawi ang chuan lei chu kan chawi poh ani ang chu" a lo ti thuai a. Tichuan Lungsum tlangval an lo thah sak avang chuan Ralmana pa chuan Sial pathum a chawin angai ta a. Ralmana erawh Lungsum lama rorel saka awm turin an kai phei ta ani...

                      Bung-51

            Vawngkawt khaw pasalţha Ralmana chu Lungsum khaw lal in kawt Rip chhungah chuan kawl bun chungin a ţhu kun ngal mai a. Vawra nena an insualna vel avang khan a hmai pawh a vung luk mai a. A taksa hmun ţhenkhat chu a khem neng nung bawk a. Lungsum khaw naupang ho chuan hmuhnawm an ti em em mai a. Ţhenkhat chuan Lungte in anlo vawm noh noh a. Hmawlha lo hawl tawk lah bolo. Rual u zawkte chuan an han hau leh rih ţhin a. Lal inchhungah chuam Lalchungnunga leh Ralmanan a thah tak Lungsum tlangval Selţhuama chhungkhat lainate chu an inkawm a. Lal chuan," Tunah chuan hei in duh ang ngeiin in fapa lu latu chu ka man sak ta che u a. A chunga thutawp siam tur hian ka phut dawn che u ani. Tunah chuan in kuta awm ani tawh a. Tihhlum in duh anih pawhin kan tihlum mai anga. In duh talo anih leh chhuah zalenin Sial pathum hi in kai hawng thei ang" a han ti dap dap a. Selţhuama pa chuan," Lal pa,i chungah hian kan lawm em em a. Kan fapa thih chungchangah hian pahnam kan han inko khawm a. Kan fapa thattu chunga thutawp hi min siamsak mai turin kan duh che ani. I thutlukna chu engpawh nise kan pawm vek ang" a han ti a. Lal chuan," In duh anga thutlukna siam tur ka nilo a. Dik taka rorel tur ka ni tih hria ang che u. Chuvangin in duhloh zawnha thutlukna ka siam anih pawhin ka lakah in vui thei lovang" a han ti leh a. Selţhuama chhungkhat laina te chua lal thutlukna eng pawh an pawm theih tur thu an sawi ta a. A tawpah chuan lal chuan a upate chu a han kokhawm leh ta a. Lal chuan a upate hnenah chuan," Hei kan tlangval Selţhuama thih chungchangah amah thattu chunga thutawp siam turin Selţhuama pa te hian min rawn ti mauh mai a. Engtia han tih chi nge ni ang?" tiin a upate chu a han rawn a. Upa Challiana chuan," Lal pa, ka ngaihdan chuan tihhlum anih loh pawhin ana thei ang berq hrem ni se ka va han ti em. Misual hi kan thlah zalen anih ngat chuan nidangah pawh a rawn pawngpawrh deuh deuh lovang tih a sawi theih lo ani" a rawn ti a. Upa pakhat chuan," Lal pa,Ralmana hi pasalţha ani a. Vawi tamtak kan tlangvalte nen pawh ral an lo bei ho tawh a. Selţhuama nunna hi ka ngainep lam nilo sela. Sial pathum kan chawi tir tho tawh avangin thutiam lak tir a nungdama chhuah mai aţhalo maw" a rawn tive a. Upa dangho pawh chuan an ngaihdan an rawn sawi ve nak nak a. Ralmana chungchangah chuan an ngaihdan a inkalh ta nuaih mai a. A tawpah chuan lal chuan," Awle,ka kua leh tuite tana ţha ber turin ro ka rel mai dawn ani. Ka khua leh tui laka pawi khawihtu nih a pawi zia midangin anlo hriat theih nan Ralmana hi kan tihlum ngei tur ani . Mahsela pasalţha anih angin hrehawm takin kan sawisa tur anilo a. A duhthlanna ngei hmangin kan tihlum ang. Tin a ruang pawh a chhungte hnenah kan hlan let leh dawn nia. Ralmana chu han hruai tawh u" a han ti a. Rei vaklo ah chuan Ralmana chu kawl bung chung hian tlangval pahnihin an rawn kai lut a. Lal chuan Ralmana hnenah chuan," Ralman,hi ka lakah pawi nasatak i khawih a. Ka inah buaina siamin chu pawh duhtawk talo chuan ka tlangval ilo that leh bawk a. Tunah hian enge sawi duh ila neih le" tiin a han zawt a . Ralmana chuan," Ni e Lalpa,ka thil tihsual chu ka pawm e. Thi tlak ka ni lawm. I duh chuan tunah hian min that thei ang" a ti salh salh mai a. Lal chuan," Pasalţha inih angin i duh i thlang thei ang" a han ti leh a. Ralmana chuan," Ka thihdan chungchangah chuan enge buaina tur awm. In duh ang ang in min tihlum thei alawm. Duh han thlang theia zia pawh ka nih loh hi" a han ti a. Lal chuan ," Awle,i thiltih ah hian inchirna te inei em"?" a han ti leh a. Ralmana chuan nui chung hian,"Ka inchhir lehna tur thi ka ti ngailo e" a han ti a. Tichuan lal chuan a pasalţhate a han koh a. A pasalţhate hnenah chuan lal chuan," Khua aţanga hla deuh taka in hruai anga. Tah chuan in tihlum.dawn nia. Tumahin diriam takin in sawisa tur ani lovang. A lu in la anga,a chhungte kiangah in thlen nghal bawk tur ani. In tihlum lai hi khaw mipuiten an hmu tur anilo. Tunah khan a kawl bun kha phelh ula. In tih tur chu va tithuai rawh u" a han ti a. Tichuan Lungsum pasalţhate chuan Ralmana chu a kawl bun te hlih sakin ram lamah chuan an hruai ta a. Pasalţha anih angin ama rallak chem ngei chuan a lu tan sakin Ralmana lu chu an khaw lama a chhungte pek turin an kal pui leh ta nghal a.

          Vawngkawt khuaa Vawra chet dan zawng zawng avang chuan lal chuan Vawra chu a ko leh ta a. Vawra lal ina a han thlen chuan lal chuan," Vawra,ka thupek awihlo in Vawngkawt khaw lamah ilo va kal a. I nunna i va chan lo chauh lehnghala . Tunah hian ka khua leh tui ni ngat la chuan ka hrem ngei ngei ang che. Vawngkawt khuaah khan lo va boral ta nila chuan in lal lakah ka inpha mar thei hauh dawnlo a. Kan kar boruak a chhe zui bawk dawn ani. Tunah chuan ka tlangvalten an enthla reng tawh ang che. I huaisenna leh kan khaw tan i inpekna kha ka ngainep anilo a. Mahse tunah chuan nungdama i awm hi a ngai ani" a han ti a. Vawra pawh chuan lal hnenah ngaihdamte dilin a thupek a zawm tawh tur thu te a tiam a. Tichuan lal in chu a chhuahsan leh ta nghal a. Lungsum khuaah chuan Vawra huaisen zia leh Ralmana a beih dan chu titi tui ber ani ta mai a. Vawra pawh a tlangnel phahin nuam a ti em em a . Mahse tunhma angin nula lamah erawh a ţuan duh ta hauhlo thung.

           Ni chu a liam zel a. Lungsum khua pawhin buaina dang engmah a tawk chhunzawm talo a. Nikhat chu mikhual pahnih hi lal in lamah anlo lang hlawl mai a. Lungchuan khaw tlangvalte anlo ni a. Mikhualte chuan lal fanu hruaitura an lo kal thu leh Lungchuan khaw mi leh sa engemawzah chu kawtchhuah lamah an awm tawh thu an rawn thlen a. Lungsum lal Lalchungnunga chuan khua alo lut thuai turin a han chah a. Tlangval pahnihte an kir hnu chuan Lungsum lal chuan a upate an koh khawm nghal zung zung a. Lungchuan khaw mi leh sate hmuak tur chuan an chhuak ta nghal a. Lungsum lal in Lungchuan khaw mi te ahan hmuh chuan a lawm hle mai a. Kawtchhuah aţang chuan an ri phei hut hut mai . Lungsum lal in an han thlen chuan Lalchungnunga chuan,"Awle,hei in thutiam ang ngeiin ka fanu hruai tur chuan inlo let leh ta a. A man tura ka bituk zat pawh in rawn keng ngei anga maw" a han ti a. Lungchuan khawnbawl upa Keiluaia chuan," Lal pa, engkim a nih dan tur ang thlapin kan rawn keng e. Mahse man leh mual kan inhlan fel hmain kan pasalţha kan kalsan tak Vawra hmel hmuh phawt kan duh ani" a han ti charh charh mai a. Chutah Lungsum lal chuan," E,ni tuk e. Saia pa Vawra kha inah a awm ang chu maw" tiin Vawra thlenin pa upa Challiana chu a han bia a. Upa Challiana chuan," Tukin khan Saia nen Vengthlang hmeithai in thawm ţha turin an chhuak anih kha maw" alo ti var a. Lal chuan a tlangvalte chu Vawra ko turin an ti nghal a. Lalchungnunga chuan," Vawra lo thleng phawt sela. Engkim kan sawi fel dawn nia" a han ti a. Vawra ko tura an tirh tlangvalten Vengthlang hmeithainu in an zuk thlen chuan Vawra leh Saikapa chu hmeithainu inchung chih ţha in anlo bung mawlh mawlh a. Lal tirh tlangval chuan," Sai a,in mikhual kha lal in a mamawh e. Lungchuan khaw lam mo hruai tur pawh anlo kal tawh ani" a han ti a. Saikapa chuan,"Vawra,i kal mai a va ngaih hmel ve. Keimah pawhin ka rawn zo thei tawh ange. Han kal thuai rawh" a han ti a. Vawra pawh chuan hnial hran lemloin inchung aţang chuan an chhuka ,lal mi tirhte chu a zui chho nghal a.

Lal ina Vawra a han thlen chho chuan an khaw tlangval ho chuan anlo chibai sap sap mai a. Lal in alo hmuh veleh chuan,"Hei Vawra pawh kan lo enkawl ţha khawp ania. In tlangval huaisen hi kawl hlen dan kalo ngaihtuah mek asin. Ka khaw nula te lah chuan a lung an kuai zo ngang silo a" a han ti a. Lungsum upa Keiluaia chuan," Ani hi zawng nula lam hi a ngaihsak lem hlei lova. A rilru puthmang lah hriat theih va nih suh. A enga pawh chu lo nise hei dam taka a hmel kan hmu leh thei hi a lawmawm reng reng e" a han ti a. Vawra dam taka an han hmuh leh taka chuan man leh mual te chu an inhlan ta nghal a. Lungchuan lamin sial an rawn kaihte chu Lungsum lal sehuangah chuan an khal lut ta nghal a. Sial mai bakah Lungchuan lal Vankhupa chuan Lungsum lal hnena lawmthu sawi nan Ţhi tlem a zawng chu a han thawn bawk a. Man te an in tlak fel hnu chuan lal chuan hah zu te lo zuki lal inah chuan hlim takin an ri beng bung mai ani.

          A tukah chua Lungsum lal chuan a fanu thlahna ni pahfawmin Sial leh Vawk talhin khawtlang chu a hrai ta a. Khaw mipuite chu an hlim hle mai a. Sialsawmpari pawh a hlim berte zinga mi ani awm e. Ruaite an ţheh fel hnu chuan lal in lamah chuan Lungchuan palaite le Lungsum lal le upate chu an inkawm ho a. Lalchungnunga chuan," Awle,hei ka fanu leh in fapa chu suihremin unauah kan insiam ta ani a. Ka fanu hi duat taka inlo enkawl ka beisei dawn ani. Ho lam taka in rawn ma emaw,mawilo taka in rawn hnawtkir anih ngat chuan leido khua kan ni nghal dawn ani tih hria ang che u. Ka fanu hian nungchang mawilo tak pu a lal chhungkua a timualpho anih erawh chuan a chunga rorel tu turte inni a. Zah taka minlo enkawl sak ka phut dawn ani" a han ti dap dap a. Lungchuan upa Keiluaia chuan," Lal pa,i fanu hi kan duh em avanga rawn bia che u kan ni a. Chumai bakah kan lal fapa hian a hmangaih em em bawk a. Duat takin kan enkawl ang tih ka tiam ache. Chu chu kan lal duh dan pawh ani. Engemawtia harsatna a awm anih pawhin keimahni ngei hian i hnen kan lo thlen leh ang tih ka tiam ache" a han ti a. Tichuan hlim takin zu an in ho a. Zan lai thleng pawh chuan an ri teng tung mai ani. A tuk khua alo var chuan Lungchuan lam chuan an khaw lam pan zai an rel dawn ta a. An kal hma chuan Lungsum lal chuan a fanu chu a han koh a. A darah vuanin,"Ka fanu,khuanun i chungah zahngai sela. Fanau tamtak chawiin i thlahte chuan huaisenna leh ropuina khumin khuavel hi deng chhuak mawlh rawh se" tiin mal a han sawm a. Lal nu leh Sialsawmpari unaute pawh chuan ţap pur chung hian an u chu an rawn kuah lawm lawm mai a. An han inţhen dawn meuh chuan harsa an ti tlang hle mai. Lal nu chun afanu puanbu te chu rawn phawrhin puanhlap ţha ţha te chu a chhawm atan a rawn kai chhuak a. Lal fanu meuh pasal neia chhuak tur chu khaw mipui zawng zawng chuan an rawn thlah a. Lo ţap hawm hawm tawk lah bo lo. Engtikah nge an inhmuh leh ang tihpawh hriat ni silo le. A tawpah chuan Lungsum khuate chuan an fanu hmelţha Sialsawmpari chu ui tak chunga an thlah alo ngai ta si a. Lungchuan tlangvalte chuan Sialsawmpari chu an khaw lam panin an zawn hawng ta a. Lungsum lal leh mipuite chuan kawtchhuah thlenga thlahin Lungsum upa ţhenkhat leh tlangvalten an zui ve bawk a. Sialsawmparin Lungsum khua a chhuahsan meuh chuan Lungsum khua chu a reh ruih a,a ngui ruai mai ani.

          Sialsawmpari Lungchuan khuaa a luh zan chuan kawtchhuah aţangin khuang leh ri thei chi hrang hrang nen Lungchuan khaw mipui chuan an lo hmuak a. Tlangvalte chuan lal in lam pana rawn zawnin mipui chuan haw haw chungin an zui a. Lal leh a upate bakah Vanzika ngei pawh chuan leikapuia ding chungin anlo hmuak ve a. Lal in an thlenchhoh chuan tlangvalte chuan Sialsawmpari chu leikapuiah chuan an han hlang chho ta a. Lal pa leh lal nu chuan an fanu thar tur chu an lo lawm hle maia. Mipui ri so hulh hulh chu lal chuan ngawi turin an zap a. Chutah lal Vankhupa chuan,"Vawiin hi Lungchuan khaw tan chuan hriatreng tlak ava ni dawn em. Kan fanu thar hi kan lo lawm em em a. Lungsum lal leh a mipuite chungah pawh lawmthu kan sawi tak meuh ani" a han ti dap dap a. Lal in thu a sawi zawh chuan Sadawt an han ko chhuak a. Ani chuan Vanzika leh Sialsawmpari chu leikapuiah chuan inhnaihte hian a han din tir a. Sadawt chuan Khawnthiang a han dawntira. An pahniha an sam zai nga vel ve ve thlangchhuakin chhampual chungin an suihkaihlihsaka. Chumi zawhah chhampual chung bawkin a suihkaihlih chu an phelh sak leh a. Chumi zawhah chuan mipa Ar leh hmeichhe lam Ar chu an la a. Chhampual chungin an zangah Buhtlei hmangin a vaw hlum ve ve a. Pakhat chu Rem-ar atan ani a,pakhat chua ," Arzangtuak" a ni thung. Rem-ar talh chuan inremna tur a entir a. Arzangtuak chuan malsawmna a entir thung. Inremna leh malsawmna chu Rem -ar talh chhan ber ani. Serh leh sangte an zawh fel chuan Vanzika leh Sialsawmpari chu nupa,pumkhat anlo ni ta a. Chumi lawm nan chuan mipui chu an au dur dur a. Lungchuan lal Vankhupan a tuk lama mo lawmna atana Sial leh Vawk talha khaw tlang a hrai tur thu a sawi hnu phei chuan mipui chu an sa hawk nasa ngei mai. Mipuite chuan an mo thar hmelţhatzia mawlh mai chu hmuhnawm tiin an en tlawk tlawk a. Lal fanu Ngurpuii mit erawh Vawra chungah a fu ran thung. Mipui a ţin tir hnu chuan Vankhupa chuan Lungsum lama kal a upate leh tlangvalte chu hah zu ahan zuk a. Vankhupa chuan midang awmlai chuan Vawra chungah chuan lawmthu an sawi mawlh mawlh a. Lal tana a inpek zawhna leh a nunna hial a thap ngam chu a fak mawlh mawlh a. A tawpah phei chuan lal chuan," Vawra,i duh duh min dil thei ang" a ti ta hial maia. Vawra erawh chuan," Lal pa,i khua leh tui ka nih angin ka lal tana ka tihtur ka hlenchhuak mai ani. Engmah ka duh reng reng lo" a ti ta tlat a. Lal pawh chuan a tilui thei ta biklo a. Vanzika chuan nui tet tet chung hian," Vawra,tun aţang chuan enthlak chi tawhloh ang aw" a rawn ti a. Vawra chuan ,"Ngaia neih a awl dawn riauin ka hria" alo ti sam et a. An pahnih chuan an nui kiah kiah mai a. An sawi awmzia hrethiam pha ve lemlote chuan ka ho hian anlo en a. Lal chuan nui tet tet chung hian," A tawk e. Fiamthu thawh hun anih loh hi" a rawn tih takah chuan Vawrate pawh chu an nui zui ta bik lo a. Lal inah chuan Zanriahte kil nghalin zanriah eikhamah chuan Vawra chu an in lam panin a hawng leh ta nghal a.

          Lal fapa nupui neih aţang chuan karkhat lai a liam leh tawh a. Hnuh lak te alo hun tak avangin mitin mai chu anmahni lo ţheuhah hlo thloin an feh nitin mai a. Vawra pawh lo lama riak turin a in pu lut leh tawh a. A ute nupa leh a farnu chuan lehlangin an thlawh pui thung a. Fur ruahtuite alo tlak zui tak avang leh hlo thloa an ţul tak em avang chuan Vawra tan pawh ramvah na hun ţha a awm thei ta meuhlo mai a. Lo lama a inkulh deuh reng avang chuan khaw lamah chuan hmuh tur a awm hman meuhlo ani. A ţhian kawm ber Saithanga chuan an lawm ho zinga tel ve tur hian a rawn sawm leh zauh zauh ţhin a. Vawra erawh chuan mawihnai takin alo hnar thei zel a. Thawkawm chhungkua an nih tho avangin lawm nei lemloa awm chu ţha ati deuh zawk ani. Hnuh lak ţul lai tak chuan zankhat chu an khaw tlangval Duhmanga feh kal chu alo haw ta hauhlo mai a. A chhungkhat lainate in punin zankhat chu an han zawng ta a. An hmuh tak mai lohah chuan lal hnenah thlenin lal chuan khawchhunga tlangval awm zawng zawng chu ko khawmin Duhmanga chu an phek zawn ta a. Nilenga an zawn hnuin Duhmanga Iptepui an khaw chawlhmun thlang thinga in bang chu an hmu ta hlauh mai a. An bul vel an han enkual chuan Sapui hnu alo chiar dup mai lehnghal. Tlangvalte chuan uluk takin an han zawng kual zel a. Duhmanga puan ven ţet hrep hruap a lo awm leh a taksa them lo kai nuaih mai chu an han hmu ta a. Chutah zet chuan Duhmanga chu Sapuiin a kamram ani tih rin hlelh rual ani talo. Rei ngial an han zawn hnu pawh chuan Duhmanga taksa bung ţhenkhat bak chu an hmu talo a. Chutah val upate chuan rorelin lal hnena thlen phawt chu an rel ta a. Hetih lai hian Vawra erawh lo lamah a riak daih thung . Duhmanga chawlhhmun thlang ngaw a adaikal Sapuiin a seh tih leh a ruang hlawm tur pawh awmlo a a ei zawh vek thu an han hriat chuan Lungchuan khaw mipuite chu an thlabar ta em em mai a. Lal leh upate chuan thil awmdan an han enin hlo thlawh ţul lai alo ni bawk nen Sapui chu tihhlum thuai angai ani tih an hrethiam mai. Lal chuan tlangval ramriak zawng zawng ko haw vek turin thupek a chhuah ta a..

          Lal thupek an hriat rual chuan Vawra ramriak ko hawng turin Vawmaia leh Ramliana chu a zan a zanin Vawrate lo lam panin an kal ta nghal vang vang a. Lo an zuk thlen chuan Thlamah chua mei alo la de va va a. Vawra chuan a ute an lo feh loh avang chuan nilengin mahni chauhin alo bung a. An ri te pawh fehkal an awm loh avang chuan ngaihţhalo tak chunga a zanriah chawhmeh tur Maian hik pahin Thlam namthlakah chuan alo ţhu a. Chutia Maian a hik mawlh mawlh lai chuan zau chhak lama meichher eng chu ahan hmu thei ta a. Chhiat tawk an awm ani mawh ti rilru chungin anlo thlen hun chu alo nghak ta a . Rei vakloah chuan thlam chhak lamah ke pen thawm alo ri thla tlat tlat . Vawra chu rang takin an dak chhuak nghal a. Meichher engah chuan a ute pahnih lokal chu a han hmu thei ta a. Thlam an lo luh chuan Vawra chuan a ute hnenah chuan," Engthil nge ni ta. A zan zana inlo lan tak thut mai" alo ti var a. Ramliana chuan,"Duhmanga feh haw chawlhmun thlanga a daikal Sapuiin alo kamram alawm mawle. Lal in ramriak zawng zawng ko haw tur atih avangin kan lo kal nghal vang vang ani" a lo ti thuai a. Vawra chuan," A va zialo tak ve mawle. Ka chawhmeh siam lai a laklawh sia. Zanriah eikhamah kan kal mai ani ang chu" alo ti a. Vawmaia chuan," Ni e,hmanhmawh lutuk ngai pawhin ka hrelo. Khawchhung lamah tlangval an tam thawkhat tho a. Hahdamin kan hawng dawn nia" a han ti a. Tichuan Vawra chuan a Maiain sih chu chhun lama Pasawntlung la parh ţha vaklo a pawh nen chuan an bai pawlh ta a. A chawhmeh siamte a hmin hnu chuan chaw chu Changel hnah phahin an khawrh khu luih mai a. A laiah chuan a chawhmeh siam chu an thur chhuak a. A ute pawh sawm lem lo chuan an bar nghal mial mial a. Vawmaia chuan eng sawi set set lo chuan a rawn kil ve mai a. Ramliana pawh a insum thei ta biklo. Tichuan an zavai mai chuan an kil tlang ta a. Vawra chuan," Chawei sa a inlo kal ka ring deuh alawm mawle" nui tet tet chung hian a han ti a. Vawmaia chuan,"Chawei sa a lokal ni ila tun ang hunah kanlo thlen i ring ami" alo ti hluk a. Tichuan tuiti takin an kil tlang ta a. Mi pakhat eu tur puitling ţhah pathumin an han khel takah chuan an chawbel leh chawhmeh bel chu an fai hneh na rawh e. Zanriah te an eikham hnu chuan reilote la ţhu khawmuangin khaw lam pan turin an chhuak ta a.

          Vawraten khua an lut dawn ţep tihah chuan an khaw mawng lama Silai puak ri dur mai chu an han hre ta a. Vawra chuan," Uai,kan thlen ve hmain anlo zo fel der dawn zu nia. Lo lama let leh mai ka nap e a" a han ti a. A sawi zawh rual deuh thaw chuan Silai vawikhat a puak leh ta dur mai le. Ramliana chuan," I tlan thuai teh ang u. Kan pasalţhate an che fuhlo deuh a ang ka ti mange" a han ti a. Tichuan hmanhmawh takin khaw lam pan chuan an tlan ta hlawk hlawk mai a . Silai rikna zawn lai vel an zuk thlen chuan Mipui an lo tlim hmur mai a. Ramhnuai lamah chuan val upa pakhatin tlangvalte fimkhur tura a au lauh lauh ri chu a hriat theih bawk a. Vawrate unau chu ram lamah chuan meichher nen an tlan thla ve nghal a. An pasalţhate lo awmna lai an zuk thlen thlak meuh chuan engkim anih tur ang alo ni vek tawh a. Ramliana chuan anmahni hnaih tu ber tlangval chu thil awmdan a han zawt a. Tlangval chuan," Zanriah ei hun hma hret khan vengthlang lam nula Rozami daikal chu Sapuiin alo seh a. A ruang an zuk hmuh meuh chuan laktlak pawh alo awm tawh hauhlo ani. Sapui chu a inthiar fihlim mai tur kan ngaih laiin hei Zanlai pelh hretah khan pu Kairuma te Vawk a rawn la leh a. Kan pasalţhaten an kap hman na a a sahuatah an kap fuh talo ani" a lo ti a. Vawrate chuan an tlai ta lutuk chu pawi an ti hle mai a. Thlang lam deuhah chuan Vawra u Sawivela pawh alo awm ve a. A Sakei ber a awm taksiloh ah chuan Vawk ruang chu zawn hawngin khaw lam an pan pui ta a. Khua an luh chuan Vawrate pawh an in lam panin an kal rih phawt a. A unau chuan Vawrate inah chuan an han lut rih a. Ramliana chuan," Vela,eng thil chiah nge thlenga. Silai ri vawihnih lai mai kan rawn hre hman si a" tiin Sawivela chu thil thlendan a ahan zawt a. Sawivela chuan," Zantir lama Rozami a seh lai khan eng thawm mah kan hrelo a. A daikal alo hawn har tak em avanga a chhungte ngaihţhalo in an zuk en nak chuan a puan bih thisen kai hnuang chauh chu an zuk hmu a. Thil awmzia kan hriat veleh kan zuk ngaihven nghal a. Sapui chuan Rozami ruang kha alo ei zo vek hman ani. A kut leh ke bung ţhenkhat bakah a taksa them bak hmuh tur a lo awm tawhlo a. Kan val upate ruat angin khaw hmawr lamah tlangval kan indah vek a. Mahse zan te alo rei takah khan alo muhil tawk anlo awm ani awm e. Pu Kairuma te vawk kha a rawn phihchhuak leh a. Vawk ngek rawng rawng thawm kan hriat veleh kan tlankhawm nghal a. Tlema lo tlan hmasa deuh ho khan Silai chu an hmet puak na a kan bengtawia chu a relh ru hman leh ta tho ani" a han ti dap dap a. Vawra chuan," A chetdan a huatthlala awm ngei mai a. Engtiat vela lian nge anih ang?" a han ti a. Sawivela chuan,"A hmutute sawi dan chuan sumsarih bawr chu ani awm e. A hniak aţang ringawt pawhin alian hle ani tih chu a hriat mai. A la che rang phian lehnghal a. A kaptute pawh khan kah rem turin a awm duh hauhlo e an tia lawm" a han ti leh a. Ramliana chuan,"Hei keini chu pem mai kan la ni a. A ţul tawp anih loh chuan Sapui hnukchhat tu nih kan tumlo hram dawn nia. Kan pasalţhat dangte hma hruaina hnuaiah zel aw. Fimkhur takin,mahni inveng reng chungin kan bei dawn nia" a han ti a. Tichuan an val upate rawtna angin khua chu an veng chhunzawm ta a.

          A tuk zing lam aţang chuan a vanduai hri hri in ruah a sur ta tluk tluk mai a. Lungchuan khua chu a ralmuan takloh em avangin tumah pawnchhuak pawh an awm manglo a. Lal leh upate chu beidawng rilru takin lal inah chuan an ţhu khawm laih mai a. Lal chuan,"Ruah lah chu tla reng mai si a. Engtia hma han lak chi nge ni ang le. Heti ringawt chuan reiloteah zun leh ekin kan inchiahpiah nuaih dawn ani. Ka pasalţhate hian eng ang ruahmanna nge anneih reng ni" a han ti a. Khawnbawl pakhat chuan," Lal pa, tunah chuan khua la ven rih phawt hi an tihtheih awmchhun chu ani. Kan Bengtawia hi han chhui zui dawnin ruah a tla reng bawk si a. Kan in chan belh palh mai a hlauhawm ani" a rawn ti a. Lal chuan," Engpawh nise. Kan pasalţhate zai i han ngai rih phawt mai ang u. Mihring lu thlengin kan hloh ta mai a. Tumahin khua hi chhuahsan rihloh phawt tur ni rawh se" a han ti a. Tichuan lal thupekin tlangau chuan tumah khua chhuahsan lova in lama tawm rih tur tih thu chu ahan puang ta a. Chumi nileng chuan Lungchuan pasalţhate chuan ruahsur hnuaiah Sapui hniak chu an chhui a. Mahse ruah a tlak tam em avang chuan hmasawnna erawh a tam lo khawp mai . An Silaite lah chu a huh dup tawh mai a. Kah tlawlh palh mai pawh hlauhawm tak tur ani. Nilenga Sapui hnu an chhui hnu pawh chuan a thawm riva reng reng an hrelo mai a. Tlai lamah chuan val upate leh pasalţhate chu Zawlbukah hmalak zel dan tur sawiin an titi ho a. Val upa Khama chuan,"Kan Sapui beihdan turah hian kan pasalţhate khan rawtna te innei em. Engtianga hma han lak hmasak tur nge ni ang" a han ti a. Pasalţha Chungthanga chuan,"Tunah rih chuan alo lan leh hun nghah tawp ani rih mai. Khua in min bumro ta sia. Han chhuizui vak ngaihna a awmlo ani" a rawn ti a. Val upa Vuta chuan,"Zanin lamah chuan khaw hmawr lama intinah tlangval kan indah vek anga. Zankhuaa nghah angaih dawn avangin in inmutchhawk mai dawn nia. Sapui thawm lo chhuahna hmasa berah kan tlankhawm vat zel dawn nia" a rawn ti a. Tichuan tlangvalte chu Zawlbuk aţang chuan an chhuak ta sap sap a.

          Chumi zan chuan eng thawm riva mah hriat tur a awm hauhlo mai a. Ruah pawh han tawhin khua pawh a thiang leh ţan tawh a. Zing lamah chuan nula tuichawi turte tlangvalin an veng a. Daikal tur thlenga in nghah zel chu angai ta mai a. Tlangvalte chu an hah em em mai ani. Khaw mipuite chu in lamah an tawm deuh chawt mai a. Sapui thawm lah a reh tlawk tlawk mai si. Tuţhuan ei hun velah chuan pu Phalliana hi Zawlbuk lam panin alo kal hlawk hlawk mai a. Zawlbuk alo thlen chuan val upate hnenah chuan,"Nizan lamah ka sehuang ka khar theihnghilh a. Ka sepatuai pakhat alo chhuak bo daih mai ka ti. A kalna chin reng reng lah ka hrelo mai" tiin a beidawn thu a rawn thlen a. Val upa pakhat chuan," Pu Phal,tlai lama alo lawi leh lawi loh kan ngaichang phawt dawn em ni ang" a lo ti thuai a. Pu Phalliana chuan inthlahrung tak chuan,"Ka fapa nupui man tura ka khek liau liau ania. A thih palh mai ka hlau ani" a han ti a. Val upate chuan thilawm dan chu an hrethiam mai a. Chutah val upa Khama chuan," Awle,thlamuang tak khan va hawng la. I Sepatuai ngaihven tur chuan kan tlangvalte kan lo tur ange aw" a han ti a. Phalliana chuan lawmthu te sawiin a Serual tlat ţhinna hmunte chu an hrilh ta a. Tichuan val upate chuan tlangvalte chu an han ko khawm a. Pu Phalliana Sepatuai ngaihven tur chuan tlangval sawmhnih an tir ta a. Tlangvalte chu pasalţha Renga hoin an chhuak ta diah diah a. Vawra leh a ţhianpa Saithanga pawh an tel ve ani.

          Pu Phallianan a Sialte tlat duhna hmun ni a a sawi mual an va thlen chuan pasalţha Renga chuan," Fimkhur taka kalin mual hi kan tuam anga. Pahnih zela inzuiin thawm inhriat tawn phakna lai zelah kan awm dawn nia. Sapui kan tawng palh thei a,chiai lutuk avangin tumahin Silai pawngpaw hmeh puah ngawt tur anilo.Kan duh kan hmuh veleh kan in aukhawm dawn nia" a han ti a. Tichan Sepatuai zawng tur chuan an vak darh ta a. Vawra leh Saithanga pawh chu mual sir lam luang hmun lamah an kal a. Thui vaklo an kal hnu chuan Vawra chuan Sial hnu tharlam angreng tak hi a hmu ta hlauh mai a. Sialin a luangno a peh na hnuhmate pawh hmuh tur a awm a. Vawra chuan,"Saia i fimkhur deuh reng reng teh ang. Sapui pawh kan tawng thut thei ania" a han ti sa sa a. Tichuan an Silaite kah mai theih tura inring sa in fimkhur takin Sial hnu chu an chhui phei ta a. Rei fe an chhui hnu chuan Sial hniak an chhui mek chu Sapui hnuin a chilh ta zeuh zeuh mai le. Vawra leh Saithanga chuan hnung lam leh hmalam hawi tawn zak zakin an chhui phei zel a. Tuibur hmuamda vel an chhui leh hnu chuan Luang hmun zawl laia Sepatuai lo let reng chu an han hmu ta a. An va hnaih chilh hma chuan Sapui a hnai em tih ngahvenin an han ding leh vang vang a. Hlauhawm a awmlo tih an chian hnu chuan an va hnaihchilh ta a. Sepatuai ruang chu Sakei chuan alo ei hek huam tawh a. A la ei leh duh ani tih hriat nan alo chhawlchhin ve thlap bawk a. Vawra chuan," Kan Bengtawia chu aw. Rin aiin a nghal hrep mai" ahan ti a. Saithanga chuan," A te chhe hauhlo ang. A vawikhat chaw lak a tam em mai" a han ti a. Sepatuai ber an hmuh takah chuan an ţhiante chu an han au khawm ta a. Midang anlo thlen kim hnu chuan pasalţha Renga chuan," Hei kan beisei ber lah heti hi ani ta si a. Sapui hian a saseh hi alo kan leh ngei dawn a. Chuvangin kar kan kam hnan dawn nia" a rawn ti ta a. Chutah Vawra chuan," U Reng,min lo hrwthiam la. Kar kam hnan lo hian chang ta mai ila a ţha zawk lo ang maw?" a han ti a. Renga chuan,"Ruah a sur duh sia. Silai kan inkap puak zo loang tih kan hlau deuh mawle. Mahse in duh chuan in chang thei ang" a rawn ti ta a. Renga bawk chuan," Tamtakina kan chan kha a rem dawnlo a. Vawra leh Saithanga nen kan chang anga. Midang zawng hi thawm hriatphakna turah in lo awm dawn ani. Kan tam lutuk chuan Sapui hi alo chhuak ngam dawnlo a. Kan chhak hla deuh takah khian minlo nghak anga . Silai ri in hriat veleh inlo tlan nghal dawn nia" a han ti a. Tichuan Vawrate chu Sapui lo chhuah hun chang turin an awm hnufual ta rih a. Midang zawng chu chhak lamah chuan an chho ta a. Tlangval dang an kal liam vek hnu chuan Vawrate chuan an chetna hnuhma te chu an han tireh deuh zung zung a. Chutah Renga chuan," Hmun khat aţanga kan chan vek a rem dawnlo a. Kil thum aţangin kan chang anga. Kan kah rawn dawn nia" tiin ruahmanna a rawn siam ta a. Tichuan an pathum chuan inţhen darhin luang pikah chuan an lut a. Sakei lo chhuah hun tur chu an chang ta tawp mai a.

          Rei pawh an la ţhulo tihah chuan ruah a rawn sur leh ta buan buan mai a. Vawra chuan a Silai zen a huh mai ahlauh avangin a iptepui chuan a Silai chu an tuam a. A hmawrah tawt deuh tak hian hnahin a hnawh bawk a. A Silai chu ruahin a far loh nan a awmah chuan pawm betin a kun ta daih a. Ruah chu a sur duh hle mai a. Thli a thaw vuk vuk bawk a. Sapui beihna atan chuan hun duhawm tak anilo chiang hle mai. Chutiang ruahsur hnuaiah chuan Sakei pawh chu a rawn chhuak duhin a rinawmloh ani. Tlai lamah chuan ruah pawh han tawhin ni pawh a rawn lang leh tawh a. An sa channa hmun chu luang pik kar anih avangin a nuam fahran hauhlo ang. Thosi lah chu a duhthusamin an tam a. An keah te chuan Vangvat Saiţial a bet fur mai a. A khat tawkin Chempuiin an han thel thla leh zeuh ţhin a. Thosi leh vangvat karah pawh chuan ngawi renga chechang manglo chuan an ţhu kar mai a. Ni a liam dawn thleng pawh chuan Sapui thawm reng reng hriat tur ala awmlo a . Vawrate pawh an beidawng deuh rum rum tawh a. An ke te chu a khamin a mu chum chum tawh mai a. Han din mar dawn lahin an sa chan ber chuan a rawn hmu hmasa ang tih an hlau ve si. Chutia hrehawm pawh pawisa lo a an ţhut reng chhung chuan ni pawh aliam dawn tawh a. Luang hmuna awm annih avang chuan an hma zawn chu fiah takin anla hmu thei a. Rei vakloah chuan ni chu kawlah a liam ta nge nge a. Sepatuai ruang chu fiahlo ruaiin a lang thei a. Chutih lai tak chuan Vawra channa hnung lam aţang chuan thawm alo ri chhuak ta dat dat mai le. Thawm chu a changin an reh leh vang vang ţhin a. Vawra chuan a Silai chuan Sepatuai ruang awmna lam chu uluk takin an tin vang vang a. A Chempui chu leiah chuan lak mai theih turin a dah bawk a. Thawm chu alo hnai zel a. Tho mitchhaih leh vaihmite pawh an so noh noh tawh a. Vawra hnung deuh chiah ah chuan thawm chu a tawp ta chaih mai. Vawra chuan Sapui thaw ri te chu a hre pha hial tawh ani. Sapui chuan a rawn bawh hmasa mai ang tih chu a hlau rum rum a. Han inher kual ngaihna awm tawhsilo le. Thawk pawh thaw ţha ngamlo chuan a awm ngaiin a awm ta renga. Vawra chu a hlauh vang ni miahloin a insum nasat em avang chuan thlanin a bual zawih zawih mai a. Chutah Sakei chuan a saseh lam chu a pan phei ta hlauh mai le. Vawra pawh a thaw hawk ngei ang. Sakei chuan Sepatuai sa chu a keih ri bawp bawp mai a. Vawra chuan han kah mai a tum laiin Sakei chu amah hnungchhawn zawngin a awm tlat bakah khua athim deuh tawh avangin a lang chiang vak theilo a.. A ţhianten an rawn kap mai lo chu Vawra chuan mak ati em em mai a. Rei vaklo ah chuan Sakei chu a tho thurh a ,a hnar a len hru hru mai a. A Saseh ruang chu an kal hual ţhem ţhem a. Chutih lai tak chuan Vawra Silai chu a puak dur a. Sakei chu huk dawtin a per sawn nalh a. Chutah ngur chhur chhur chung hian Silai rikna lam chu a rawn bawh phei ta buan buan mai le. Vawra chuan a Chempui leia a dah chu a la vat a. A lam pana Sakei lo tlan phei mek chu alo hmachhawn ta a. Sakei chuan Vawra awmna Luang bul chu a rawn bawh phei rawk mai a. Vawra pawh hnung lamah a tludawrhin a Chempui chu an vai kual vel a. Sakei lah chu a sat fuh lem hlei lo a. Sakei chu luang pik karah chuan duhangin a che thei bik hauhlo mai a. Chutih lai chan pasalţha Renga pawh," Vawra lo zam suh" ti chungin a rawn tlan phei nghal a . Sakei chuan Vawra chu Luang pik karah chuan luang behchhanin a bawh bet tlat mai a. Sakei chuan han ham an tum ţhin a,Luang kung chuan a lo dang zel a. Chutih lai chuan Vawra chuan Luang bul kar aţang chuan Sakei luah tak chuan an sat siah siah mai a. Sakei pawh chu a huk ţhawt ţhawt a. Chutah luang pik ,Vawra aawmna lai chu Sakei chuan a hai ta vak vak mai a. Vawra awmna lai a hai thlen hma chuan Vawra chuan Sakei ke ah chuan alo sat leh ta nghek nghek a. Chutih lai chuan Renga chuan Sakei chu hnung lam aţangin a rawn sat ve leh a. Sakei chu a leh hawi thurh a. Renga chu a beng thal tawp mai a. Vawra chu lo tlanchhuak nghalin Sakei ke hnunglam chu an sat auh hmawk mai a. Chutah Sakei rawn inher leh tur lai tak chu Vawra chuan a ngum ruh tak maiah chuan an sat leh ta siah siah mai a. A sattu kutthlak anat mai bakah Sakei pawh Silaia kah hliam anih tawh avangin a ţang rei thei ta bik lo a. A awp ta rup mai a. Vawra lah chuan a rem lai laiah a sat ta nghek nghek reng mai a. A tawpah chuan Sakei chu a chatthla ta nge nge a. Vawra hah lutuk chu a thaw hlawp hlawp mai a. Renga lo tlu thal reng lam chu va panin an sawi nawk nawk a. Renga pawh chu vanneihthlak takin Sakei khan alo beng thawi thuak chauh alo ni a. Mahse a hmai erawh a rang nuaih thung a. Vawra chuan," Saia lo chhuak thuai teh" a han ti a. Renga hmai chu a puanven kaithlerin an hruk sak a. Renga chuan thei leh theilo hian," Vawra,a thi fel tawh maw. A inher thut kha ka ringlo deuh alawm. Khawnge Saithanga hi" a han ti a. Renga bawk chuan," Ka hmai hi chu kalo buaipui thei mai ang. Meichher han siam thuai teh khai" ahan ti a. Vawra chuan meichher chu a han buatsaih zung zunga. A peih fel hnu chuan ţhang hnah ro hnawng deuh chuap chu vawmkhawmin an dep kai a. A alh ţha duh hauhlo leh nghal. Chutih lai chuan an ţhiante chhaklama awmho pawh anlo ri thla chiah chiah tawh a. Vawra chuan mei a nun zawh chuan Saithanga chu a va zawng ta a. Saithang awmna ava thlen chuan Saia chu alo ding zum zut mai a. Vawra chuan," Saia,i ţha maw" a han ti a. Saithanga chuan khur deuh dar dar chung hian," Vawra,tu hnenah mah sawi suh aw. Ka sa chan vawikhatna ania. Sapui thawm khan ka thauah aman tlat alawm" ao ti a. Vawra chuan hrethiam takin ," Lo chhuak tawh. Sapui pawh a hnuk a chat fel tawh e" a han ti a. Saia lo phei Rengan alo hmuh chuan a hmai lehlam hup chung chuan," Saia,Sakei channa a ilo tel ngam ve reng reng kha mak ka ti reng ani. Lehpekah chuan i kap ngam tawh ang" a lo ti var. Saia chuan," U Reng,ka dawihzep vang vek ani" inthlahrung tak chuan ahan ti a. Renga chuan,"Inthiamlo duh suh. I ţhianpa in a awl hneh em mai che. Bakah Sapui thawm i hriat vawikhatna ani bawk anih kha" alo ti thuai a. Chutih lai chuan an ţhian dang ho pawh chu an lo thleng tawh a. An rawn tlan nasat avang chuan an thaw hlawi hlawi mai a. Sakei ruang lo let reng leh an pasalţha hmai khem nunga lo ţhu an han hmuh chuan thil awmzia tur chu an hrethiam deuh ruak mai. Tlangval pakhat chuan," U Reng,Silai puak ri kan hriat khan kan rawn tlan nghal a. Kan awmna ahla deuh ani" a rawn ti a. Renga chuan," Hei kan lo chingfel der tawh alawm. Vawra zarah kan tihlum thei hlauh anih hi" alo ti thuai a. An Sakei kah chu an han belchianga,sumsarih lai maia lian hi ani a. Sakei tar lam niin a ketin pawh a bul vek tawh nghe nghe ani. Meienga an han enchian chuan a hmai leh a ke te,a ngum vel te chu Chempuia sahna hnuhmain a akhat deuh vek mai a. Vawra khan a nak thawlah a kap fuh alo ni a. Sakei kha thi nghal mai lovin Vawra kha a rawn beizui a. Vawra khan alo sat hlum ta ani. Vawra chuan," U Reng,Silai kha in rawn kap ta silo a" a han ti a. Renga chuan,"A eng hri nge mawni. Ka Silai hmawr hnawh loin kalo awm chu mawle. Kah kan tum veleh khana ri khep ringawta. Ka silai zen alo huh vek ani ang" a han ti a. Chutah Renga bawk chuan," A taksa kha han enchiang leh deuh te u. Kah hliamna hnuhma dang a awm em?" ahan ti a. An han enchian nak chuan a mawngbawr veilama Silai mu in a fuh thawina chu an han hmu ta a. Chutah Renga chuan,"Hman zana kan kah ngei kha anih dawn hi. Tunah chuan thlamuang takin kan awm tawh dawn e" a han ti a. Renga bawk chuan,"A zawnna tur han siam zung zung ula. A tlaichhiat hmain i haw thuai teh ang u. Khaw lama mite kan ti mangang lutuk ange" a han ti a. Tlangvalte chu Sakei zawnna tur buaipuiin an phe nghal sap sap a. Vawra chuan zawite hian," U Reng,Sakei hi i sahhlum angin sawi mai ila" a han ti sa sa a. Renga chuan nui chung hian," Vawra,mi kuta thi chuhpui tur awm lekah min ngai em ni. Ka hliam zawk ngei mai a. Mahse nangma thah anih hi. Tikhan vawikhatmah titawh ngai suh ang che. Pasalţha ve tho ka nih hi" a lo ti ta mai a. Vawra chuan,"Ka tihpalh ani. Nangma kut zala thi ni sela ka tih vang ania" a han ti leh a. Chutah Renga chuan," Vawra,ka hrethiam lutuk che lawm. In awmna ala reilo a. Midangin anlo thik palh che i hlau ani ang maw. Lungngai suh,i lama ţang kan awm hi" alo ti thuai a. Hlang te an siam zawh takah chuan Sakei chu zawnin khaw lam an panpui ta a. Renga pawh a hliam anat loh avangin zawn a duh biklo a. Vawra erawh khaw luh dawn a zawn luhah an khek ta rih a.

                        Bung-52

          Vawrate chuan hmanhmawh tak leh hlim tak mai chuan an khaw lam chu an pan zel a. Kawtchhuah an thlen chuan pasalţha Renga chuan Sakei hlado chu an chham ta vang vang a. Chutah midang chuan Silai an lawn ut ut mai a. Khua alo awmte chuan an.pasalţhaten Sakei an that ta ani.tih hriain anmahni hmuak tur chuan an kal ta nghal sup sup mai. Khua an va luh chuan Vawra chu Sakei ruang chungah chuan a ţhu vang mai a. Tlangvalte chuan haw haw chungin an rawn zawn phei a. Khaw mipuite chuan Sakei thattu chu hrilh ngaio in an hre ţheuh ani. Sakei chu lal mual lamah zawn chho ta a. Sakei ruang chu tual lai takah chuan dahin Vawra leh Sakei zawntute chu a kiang maiah chuan an ding thung. Lal leh upate pawh Sakei ruang en tur leh an pasalţhate hmuak tur chuan leikapuiah an rawn ding chhuak a. Lungchuan pasalţha leh val upate chuan an Sakei thah tak chu an khaw mi leh sa lo kamram tu kha ani leh nihloh an han chian ta a. Val upa Vuta chuan," Renga,hei hi ani ngei tih kan chiang ngam ang maw" tiin a han zawt a. Renga chuan,"Chiang turah ka ngai. Kha hmanzana a mawng biang kan kahna hmuamhma pawh ala thar ţhat viau kha" alo ti thuai a. Val upa te leh pasalţha dangte chuan Sakei ruang chu an han kai phar vel a. A tawpah chuan an Sakei huai beihlai ngei mai ani tih chu an chiang ta a. Chutah val upa pakhat chu lal hnenah han chhovin thil awmdan chu a han hrilh ta a. Chutah lal chuan mipui so hut hut chu an zap dai a. Chutah ring lenglawng hian,"Lungchuan khua leh tuite u. Zaninah hian kan khua min ti thlabar tu leh kan unaute min thahsak tu Sapui ngei mai chu ka pasalţhaten an rawn tihlum ta a. Ka tlangvalte hi kq chhuangin an inpekna hi a ropui ta ti em em a. Chuvangin kan Sapui thah lu hi keimah ngeiin ka ai dawn ani" a han tih chuan Mipuite chu an au dur dur a. Chutah lal chuan," Ka pasaţhate chuan engtiang chiahin nge Sapui chu an va thah tak tih kan hre chak ţheuh anga. Sapui bei tu zinga mi khan kimchang takin min lo sawi sak sela" a han ti a. Chutah Renga chuan," Vawra,nang han kal tawh. Keizawng ţawng tam vak chi ka nilo e" a han ti a. Vawra chuan," U Reng,mahni chanchin han sawi vak zawng amawi lo e. Tlemte chauh i han sawi mai dawn nia" a ti tlat mai a. Chutah Renga chu a biang lehlam hup chungin lalin leikapuiah chuan a chho ta a.

         Pasalţha Renga chuan an Sakei beih dan zawng zawng leh Vawra huaisen zia chu uar tak mai chuan a han sawi ta vek mai a. Mipuite chuan Vawra chu an en ţhup mai a . Renga thusawi zo lo chhuk leh chu Vawra chuan," U Reng,ka rin aiin i hliam kha ana lo ani maw. A sawi reng i sawi hnem mai" alo ti hluk a. Renga chuan," Vawra,a bak pawh ka la sawi ťeuh thei ang chu" nui chung chuan alo ti a. Lungchuan lal chuan Vawra chu leikapuia ding tur chuan an ko chho . Chutah lal chuan," Lungchuan khua leh tuite u. Zaninah hian kan khaw tana mi inpezo leh tlangval huaisen kan neih belh leh ta. Kei in lal ngei pawh hian chawmawi ka duh a. A hun leh hmun chu ni lemlo mahsela zaninah hian chawmawina nopui ka dawm tir dawn ani" a han tih chuan mipui chu an au dur dur mai. Lal chuan Seki lian ţha tak mai khat hian zu tuitling a rawn suakchhuakna. Vawra hnenah chuan an hlan ta. Vawra chuan zu chu tlem lo inin lal pa hnenah chuan a hlan kir leh ta a. Chu chawimawina nopui chu Vawran a dawn hmasak ber ani a . Pasalţha chawimawina nopui dawm thei zinga chhiar tel ani tawh dawn ani. Mipui an ţin hnu chuan Sakei mei chu pasalţha Renga chuan an sat thla ta a. A tuk maia Sakei lu ai tur annih avangin Sakei kaptu leh a mei satthlatu chu an meng tlaivar zak dawn ani. Chumi zan chuan lal inah Sadawt chuan Arhnuaichhiah talh tur la in thiam hla a han chham a

,"Kei kawng chungah ka kal leh

Nang kawng hnuaiah.

Chhimhlei ang ka hnuaichhiah che.

Thangvan ang ka chungnung e.

Khuavangin min hual anga.

Ka kal leh mi hual zel ang"

Tihpahin a Arhnuaichhiah nghawng chu Maihunah an khu hnana. A chil hlum zui ta a. Chumi zan chuan zankhuain zu an zu a. A khat tawkin Darkhuang an tum vu vu a. Darbu,Darmang leh Khuangte an tum bawk a. Darbu hla," Chhimbuk leh peng peng intu intu. Alu lam kawng alu lam kawng" tihte chu an tum a.

           A tuk khua alo var chuan Sakei lu aih ni anih avangin tumah ram kal an awm lova. Sakei lu aih ni a ramkal chu Sakeiiin a seh duh an tih avangin nula tuichawi tura kal takngial pawh tlangvalten an veng ani. Tukţhuan eikhamaha chuan lal in tualah chuan Sakei chu thinga do kawkalhin an dintir a. A tak ang thei ber turin an hnawh puam bawk a. Mipui te chu an lo kal khawm leh sup sup tawh a. Lal chuan Salu aih nan Sial,Vawk,Kel,Ui leh Ar chu a talh a. Tlai lamah khawtlangin ruai an ţheh dawn ani.

           Mipui an lo punkhawm ţeuh hnu chuan Vawra leh tlangval dang paruk vel chu lal in aţangin hmeichhe thuama imthuamin anlo inzui chhuak a. Kawrchei an ha a,puarin an sin a,puan an khum bawk a. Empai phurin puan an bih a. Tuibur a ţul huna ham khuk theih tura vut bengkhat chu an zu bawk a. Vawra chuan hmuithlur kengin Sakei chu a chhaih vel a. Chutah lal in aţang chuan nuihzasiamthiam rawn chhuakin fiamthu a rawn thawh a. Mipuite chu an nui dur dur a. Vawrate erawh an nuih a thiang lo thung. Vawra chuan Sakuh kuh zakzehin a nuih palh pawhin Sakuh anuih ani an ti dawn ani. Vawra chuan Hmuithlurin la a thlur der duah duah a. Chutah Darkhuang leh Darbu ilo te tumin Sakei lu aih hal pui ber" Chhimbuk leh......lam kawng" tih chu an tum a. A mual rumin an rum hluah hluah mai ani.

           Vawra leh a hnungzuitu te chuan Sakei ruang chu diriam taka chhaihin an lam hual vel a. Hmuithlur chu thlur pah zelin Sakei ruang chu an va khak leh zauh ţhin . A khat tawkin Tuibur a vut chu an ham khi chum chum a. Chumi hnuah Vawrate chu inchhungah lut lehin anlo chhuah leh hnu chuan pasalţha thuam famkimin an rawn inthuam tawh a. Vawra chuan Diarţial khimin Vakul chang a tawn nghauh a. Ngunhnam paiin Fungki a ah bakah Silai a pu bawk a. Artui chhum hmin sa leh Sailungvar chu kengin Sakei hmaah chuan an dinga. Sakei chu Sailungvar barhin amah chuan Artui chu an hmawm a. Chutah diriam tak hian," Kha nangin Sailungvar hi ei la keiin Artui hi ka ei ang. A lem hnuhnung zawk dawih zawkah. Ka eizo tawh asin ila eizo nage. ......Kei kawng chungah,nang kawng hnuaiah. Nang chhim kun aţangin ilo thawk anga kei hmar khawsang aţangin.Nang Chhim mihuai ni la kei hmar mihuai ka ni ang" tihpahin Sakei luah chuan vawithum an sat a. Silai amu tello a zen hlang ringawt chuam kapin an kal hual a. A ţhiante chuan an rawn zui bawk a. Sakei chu mi lo seh hlum tawh anih avangin amit mu chu kherchhuah sakin a paih daih a. Tuchuan lal inah an lut ta a. Sakei ruang chu upa ţhenkhatin zawnin dai lamah an va paih ta daiha . Sakei aih ni chuan zu leh sa a tam em em a. Mipui chu an tlai hle ani. Ruai ţheh zawhah chuan an Sakei aih ngei mai vun chu a tak ang taka hnawh puarin a lu zawnah chuan Sakei luruh khel.fai vel tawh chu dahin muallaiah an din tir a(Khaw ţhenkhatah chuan mi pali velin an zawn kual ţhin). Tichuan ni leng ţhakin an mual lam ta ani.

          Sakei an aih ni aţanga nihnih aliam leh hnu chuan Vawrate unau pawh an hlo thlawh hmabak thlo zo turin an feh a. An unau thum bakah an monu nena mawngkawtha nen meuha an han thlawh tak tak chuan an thlawh bak tlemte chu chawhma ţha pawh anih hmain an zo fel ta der mai. An zawh fel hnu chuan Vawra chuan a ute hnenah," Tikhan lo han haw tawh u. Pi Ngalianite kalo pui hawng lawk ange" a han ti a. Vawmaia chuan," Chuti anih Thangi lo han hawng ta ula. Vawra nen pi Ngailiani te chu kan rawn pui ange" a han ti a. Chutah Vawra u Ţuahpuii chuan," Hmeichhe khat chauha lo hawn bik zawng a thlamuanthlak loh em mai. Kanlo kal ve ange" a ti ta tlat mai a. Tichua an vai mai chuan hmeithai pi Ngailiani te lo lamah chuan an inzui phei ta a. Pi Ngailiani te lo an va thlen chuan . Pi Ngailiani leh a fanu Nubawihi chu hlo thloin an lo bung mawlh mawlh a. Thawkmawh chhungkua tih takah an ţul hle mai lehnghal. Vawrate chuan pi Ngailiani te Bekte zarah chuan an phur te nghatin an han ţhu chawl phawt a. Chutah an Tuthlawh kengin pi Ngailiani te nufa hlo thlawhna lam chu an pan ta a. An zuk thlen chuan pi Ngailiani te chu din pawh ding hman lo hian ţhahnemngai takin an lo bung mial mial a. Vawra chuan," Nubawih,in buh chu a va ţha ve. Kan pil thei mai dawn alawm" a han ti thut mai a. Nubawihte chu anlo ding chhuak rang ngei mai . Chutah pi Ngailiani chuan," Keini buhte zawng a budelh an sawi ang mai hi ani reuh a. Kha khawilam kal.tur nge ni che u a" alo ti thuai a. Vawra chuan,'" Khawi lamah mah kal dawn lo e. Kan lo thlawhpui mai mai ang che u kan tia. Hei fanu nulate i nei sia" nui chung chuan ahan ti a . Pi Ngailianite nufa chuan chutiang chu anlo beisei hauhlo mai a. Chutah Nubawihi chuan," U Vawr,inti zahthlak em mai. Nithum thlawh vel bak anih tawhlo hi. In hah lutuk ange" a han ti a. Vawrate chuan ngawi rengin hlo thlawh chu an ţan nghal mawlh mawlh mai a . Nubawihi te nufa chuan lawmthu an sawi mawlh mawlh a. Tichuan hlim taka titi siam siam chungin an bung zui mawlh mawlh a. Vawra leh a u Vawmaia hlo thlo an han ţang tak tak mai chu an hmazawn chu a kuak hian a kaw zung zung mai a. An hmeichhe hruai tepawh chuan an umphak lo nasa mai. Vawra leh Vawmaia chuan an hmeichhate chu karchehin Vawmaia chu a sawn zel a,Vawran a hlen zel thung a. Tlai ni her bawih thleng an thawh hnu chuan an hmeichhiate chu an chau ţan tawh hle mai a. Chutah Vawmaia chuan," Nubawih,tuisik lem pahin lo han chawl tawh u. Vawra nen kan hmabak hi kan rawn hlen ange" a han ti a. Tichuan hmeichhe ho zawng chu Bekte lamah an lo han ţhu chawl a. Vawrate pawh an hmabak an hlen hnu chuan Bekte lamah chuan an chho leh ta a. Pi Ngailiani te lo chu an thlo zo ţep mai a. Bekte zawn tlemte chauh chu thlawhbak a awm tawh a. Pi Ngailiani chuan," Vawra,inchunga lawmthu han sawi dan tur pawh ka hrelo ani. Hei min rawn zawh pui titih mai a. Kan nufq pawhim chawhma bungah kan zo thei tawh mai dawn anih hi" a han ti a. Vawra chuan,"Lawmthu sawi angailo e. Kan hlo thlo kan zo hma deuha. Khuaa haw mai aiin kan rawn kal ta mai anih hi" a han ti a. Vawmaia chuan," Ka pi,Vawra hi zawng nula tuaitir awmna hi a hre theiteh mai ania" nui huah huah chung chuan ahan ti a. Nubawihi chuan," U Vawra chu khuaa nula hoin an sawi nasa thei teh ania" alo ti var a. Vawra chuan," Anih nang ve" alo ti vat a. Nubawihi chu zak tih hriat takin a sen ap ap a. Midangho chu an nui dar dar a. Ala hma deuh avang chuan Vawra chuan," Ka u,lo han hawng ula. Kei chu Sava zanriak tur zawngin kalo vak chho ange" a han ti a. Tichuan a Silai puin vau lama lut tur chuan a kal ta nghal a. Vawmaia tepawh chuan Nubawihite chawhmeh lakhawm an nghah zawhin an vai mai chuan khaw lam panin an hawng ta a. Vawra u leh an monu chuan Nubawihi chu an be bawrh bawrh a. La hlum a neih loh changa an in ami rawn lam mai ţhin turte leh puan ban pui tur aneih loh pawha rawn ko mai turin an han hrilh a. Nubawihi chu a hlim hle mai a. Vawmaia pawh chuan pi Ngailiani hnenah chuan harsatna anneih changa rawn ban hrehlo turin an chah mawlh mawlh a. Hlim takin khaw lam chu an pan ta a.

          Vawra erawh ramhnuaiah chuan Sava kah tur zawngin a vak kual a. A rilruah thil tamtak angaih tuah a. Lenchim khaw nula Chhawnkimi, amah ngei pawhin Bekte hnuaia sir alo sawn pui tawhte chu an ngaihtuah vang vang a. Tunah chuan an kar a hla ta sia. An unaua hmuh leh chu a chak em em mai a. Chutih lai chuan Suartuia a awmlai a a ţhian kawm ngeih em em Zalawm a leh Vanzaua bakah Vantei te chu a rilruah an lo lang uarh uarh a. Buhlak zawh pawltlak huna an mahni zawng tur kal chhuah ngei chu a tum ruh ta hle mai. Chutia a ngaihtuahnate kawm chunga a avah kual mek lai chuan a chhak lam ngaw a Sakhi huk thawm a hre ta hlauh mai le. Vawra chu a suangtuahna ram aţanga harhchhuak zawkin Sakhi huk na lam pan chuan a kal ta nghal a. An hnaih chho zel chuan Sakhi chu pakhat mai mi lovin a rual khat anni tih an huk thawm aţang chuan a hre thei ta nghal a. Sakhite chu inhlat deuh tak aţang hian an inhuk chhawk chhen mai a. Engemawnti ralkheltu an awm anih ringin Vawra chuan fimkhur takin a veh phei zel a. A va hnaih viau ta maw tihah chuan a chhak lama Keite ngur chher chher thawm hi a hre ta a. A han enchian nak chuan Keite chuan Sakhi la pakhat hi sehhlumin Thingse kungah hian alo ţhutpui vang mai a. Vawra alo hmuh chuan a lo inhrosa nasa ve mai a. Vawra pawh chuan tihbuai chhunzawm tum lemloin Sakhi dang veh tur chuan a kal sawn ta nghal a. A tum angin Sakhi rual chu a um pha thei reng renglo mai a. Ni lah chu a liam dawn tawh a. Sakhite chu a khat tawkin anla huk zeuh zeuh a. Vawra pawh beidawng lo a kal zelin rei vaklo ah chuan kawr kama Mau hmun zawlah chuan Sakhite chu ava nangching ta a. Silai kah nuam tawk vela hla aţanga chuan Vawra chuan sakhi chal ,a ki pawh sei ţha ve tawh tak mai chu an tin vang vang a. Chutah Silai chu hmet puak durin ngaw chu a khawk rum rum a. Sakhi dang ho chu an tlan bo nghal vek mai a. Vawra a Sakhi kahna hmun a va thlen phei chuan Sakhi chal puitling lian ţha zet mai hi alo let reng mai a. Vawra chuan a Silai kahna hmuamhmate chu hnaha hnawhin a ke te an ţawn khawm a. A iptepui hruiah Sakhi ke chu phuar betin khaw lam pan chuan a phur hawng ta a.

          Kawtchhuah a thlen chuan khua a thim fel der tawh mai a. A hah deuh avang chuan an ţhu khaw muang rih a. Rei tawk fang a chawlh hnu chuan muang changin khaw lam pan chuan a kal leh ta a. Khua ava luh chuan zanriah kil hunlai tak ani a. Khawlaia leng vak pawh an vang pharh mai. In a zuk thlen chuan a chhungte chuan zanriah anlo kil mek a. Vawra chuan a Sakhi kah chu luhka ah dimtea nghatin inchhungah chuan a lut a. A chhungte chuan a Sakhi phurh chu an hmulo a. Zan dang anglo takin Saithanga chu an bangthlang lam nghengin alo ţhu a.. A lo titi zuah zuah a. Vawra pa chuan," Vawr,i va rei angreng ve. Khawi lam mualah nge i rawn vah chho a" alo ti thuai a..vawra chuan ," Rawsih ngaw lam kha ka rawn hrut chho e ka tia. Duh aiin ka hlawhtling har deuh alawm mawle" a han ti a. A u Vawmaia chuan," Khawnge i iptepui " alo ti hlut a. Vawra chuan," Sakhi patuai ka rawn ak hawng alawm mawle" lo ti var a. Chutah Saithanga chuan," I va zep thei ve. Khaw maw i Sakhi kah chu" tih leh kawngkapui aţanga rawn chhuah chu a rual ta a. Luhkapuia Sakhi chal lianzet mai a han hmuh chuan Saithanga chuan," Ka rei. A patuai anih awzawng loh hi. Ka Sakhi hmuh tawh azawnga lian ber ala ni ang. Khawnge kan puah nghal ange" phur tak chuan a han ti a. Midang chawei a laklawh em avangin Vawra leh Saithanga chuan Sakhi chu an puah dun mawlh mawlh a. Sakhi an puah mawlh mawlh lai chuan Saithanga chuan," Vawra,kan lal fanu Ngurpuiin lengah min sawm ania. Chuvang ania hmanhmawh takin kalo kal" a han ti sa sa a. Vawra chuan," Leng turin nangmah a sawm che a. Kei kalo kal ve thu a awm love. Bakah lal ina chuan kai meuh zawng a inthlahrun thlak deuh ani" a han ti a. Saithanga chuan,"Lal inag ani dawn hlei nem. Kan khawnbawl upa Keiluaia te inah zawk. Lal fanu Ngurpuii leh upa Keiluaia fanu Sangkimin la an kai dun dawn ani awm e" a han ti sa sa a. Vawra chuan," Chuti anih zawngin ka lokal ngam ve mahna. Hawh teh in puah thuai thuai teh ang" a han ti a. An puah zawh meuh chuan alo tlai deuh tawh a. Vawra chuan chawte a eikham hnuin an insilfaia. Upa Keiluaiate ina leng tur chuan an inzuichhuak ta a.

         Upa Keiluaiate in an va thlen chuan Lal fanu leh Sangkimi chauh chu anlo awm a. Tapa mei eng ring chuan la an lo kai a. Vawrate an va luh chuan Saithanga chuan," Ngurpui hei ka lo hruai ania" an ti nghal thawt thawt a. Ngurpuii lah lo zam bik hek suh. Nui sen sen pah chuan," In va rei angreng ve. Ka lo haw hman ţep asin " alo ti var a. Sangkimi chuan," U Vawr lo leng ţhu rawh u. Kan ina i vawikhat rawn lenna ani hial ang a. Mi hi i tlawh serh ve deuh emawni" alo ti zat zat a. Vawra chuan," Ka tualchhuak lo lutuk ani e. Bakah in lamah hun ka hmang tamlo bawk nen" a han ti a. Vawrate chu lal fanute la kaihna kiangah chuan an ţhu a. Sangkimi chuan,"Kan mualveng nula hmelţha inah chuan in leng zantin ani lawm ni" nui chung chuan alo tive a. Vawra lahpek chuan,"Saithanga zarah kan va dak pha ve ţawk ţawk ani. Mi kam liamah kan va nui puat puat a ani mai e" a han ti a. Saithanga lah pek chuan,"Mawiah nula kianga ţhu hnai thei ber anih hi. A daw kual vel mai mai nih kha" alo ti sam et a. An han nui leh dar dar ţhin a. Tichuan zan rei deuh thlengin an inkawm a. Eng thu pawimawh mah phei chu an sawi lemlo a. Leng hawn Arkhuan hma deuh chuan Ngurpuii chuan," Hei kan hlim tlang em tak na a. Kalo han haw mai teh ang. Nakzan lamah chuan kan in lamah inkawm tlang tawhila a ţha ange. U Vawr nangpawh kan lo beisei tawh dawn che nia" a han ti a. Chhuah a tum mai lai chuan Vawra chuan," Khawiteh ka han thlah ang che" tihpahin a zuichhuak ta a. Kalkawngah chuan Vawra chuan," Ngurpui,min minlo hmu palh reu reu ange aw. Ţhenkhat huatthu a tling viau thei ania" a han ti a. Ngurpuii chuan," Tu huatthu mah va tling suh ei. Inleng aram pawh kan neih phak veloh hi maw" a lo ti ve mai a. Vawra chuan,"Nangni zawng khawi lam lal fapa emawni rim tur innia lawm. Khawtual tlangval laka khiangawi mai tur chuan in pamhmai deuh ani" a han ti a. Ngurpuii chuan," Kei zawng Khukhuaa pasal neih ai chuan khawmhmun ami ngei neih theih hi ka duh ani" a han ti a. An titi reng lai chuan lal in chu an thleng dawn tawh a . Vawra chuan," Khai hei in in kan thleng dawn der mai. He lai thleng hi kalo kal ange. Mangţha tak han mang ang che" a han ti a. Ngurpuii chuan," U Vawr zan dangah pawh kan inkawm leh fo ang chu tiraw" a han ti a. Vawra chuan," I thu vek ani mai. Lal fanu inia lawm" nui var var chung chuan a han ti a. Ngurpuii chuan," Ka hming pangngaiin min ko ve mai theilo em ni" alo ti chang fal mai a. Vawra chuan," Ka tihpalh ani. Tun aţang chuan Ngurpuii ini tawh e" a han ti a. Ngurpuii chuan nui sen sen chung hian," Anih ka lawm e. Mangţha tak han mang ang che" tihpah chuan lal in lam chu a pan ta a. Vawra pawh an lenna in lam pan chuan khawdang hawi tawhlo in a kal nghal char char a. A kal liam tur uluk taka thlir vawng vawng tu an awm tih reng a hrelo. Sangkimite in a zuk thlen chuan Saithanga chuan," Uai,iva lo haw hma si ve" alo ti hlut a. Vawra chuan,"Lal inte chu hlak hek lo i. Engti fakaua rei nge awm turin min duh a" alo ti sam et a. Saithanga chuan," Vawra,engmah hi i hrethiam velo ani maw" a han ti a. Vawra chuan," Enge hriatthiam tur awm a" a lo ti thuai a. Chutah Sangkimi chuan,"U Vawr,kan lal fanu hian a vei deuh tlut mai che ani. Chuvangin ania zaninah pawh leng tura kan sawm che u" a han ti a. Vawra chu an ngawi vang vang a. Engmah a sawi takloh ah chuan Saithanga chuan,"Vawra,kan lal fanu hi kan lal hian khawdanga pasal neih tir a tum hlei nem. Nang baka phu tur an awmlo ani" a han ti leh a. Chutah Vawra chuan," Ţhiante u,min duhsaknaah chuan ka lawm e. Kan lal fanu hi chu ka cho rual anilo ani. A lakah hian ka rilru pek ka tumlo ani" a han ti ta a. Chutah Sangkimi chuan," U Vawr,man leh mualah buaina a awmlo ang. Nangpawh pasalţha Nopui dawm thei ngat ini a. Kan lal pawh hian a iai hauhlo ang che" a han ti leh a. Lal fanu chungchang hlir an sawi pui takah chuan Vawra chuan nula dangin amah chu an lo beisei maiang tih ahlauh vangin a tawpah chuan," Kei chuan hmangaih pakhat ka nei a. Midang lakah ka rilru ka pe thei tawhlo ani. Chuvangin hmangaihna dik tak a ka hmangaih theihloh turte lakah chuan beiseiawma awm hi ka duhlo ani. Kan lal fanu hi ţha ka tilo ani biklo a. Mahse ani aia hmangaih dang hi ka nei tawh ani. Mi hrehawmna siamsak hi ka duhlo ani" a han ti charh charh mai a. Saithanga leh Sangkimi chu an ngawi ta reng a. Chutah Sangkimi chuan,"Ka lo hrilh ange. Engtin tak ngai ang maw" a han tisap a. Leng hawn Arte alo khuan takah chuan Vawrate pawh zawlbuk lam panin an haw ta a. An kal liam hnu chuan Sangkimi chuan," Vawra hmangaih chu tutak ni ang maw. Nula nihlawh tak ava ni dawn em" a ti sap a.

          Hun leh nite chu danruallohin aiam zel a. Lungchuan khua pawh chuan harsatna engmah an tawh chhunzawm ta lemlo a. Fur ruahtui tlak hnu lai anih avangin Vawra pawh ramvakin a kal khat ta hle mai . Lo lamah chuan a riak deuh reng thung a. Nikhat chu Fanghma,Dawnfawh leh Vaimim bakah thlai rah ilo dang chu Tlam em khat deuh thaw a phurin khaw lamah a hawn ta a. Chawlhhmun hla zawk ava thlen chuan an khaw nula hmelţha Hrilkhumi leh a lawmte chu anlo chawl dial mai a. Vawra phur an han hmuh chuan mak an ti em em a. Vawra chu chak an ti em em mai a. Chawl ve tura an tih avang chuan a phurte chu an nghata. Chawlh pah chuan Fanghmate velin an han keih hlawk hlawk mai a. Hrilkhumi chuan," U Vawr,lawm te hi i nei ve meuh nange. Mahni a bun tlut tlut zawng a hahthlak viau lo maw?" alo ti var a. Vawra chuan," Nia, vengthlang lam a awm pi Ngailiani fanu Nubawihi leh Saithanga te nen hian kan inpui zeuh zeuh a. Lawm dang han neih em em ngaiin ka hrelo ani" alo ti mai a. Hrilkhumi chuan," Kan zingah te hian lo tel ve mai la ti nia" a han ti a. Midang pawh chuan an lo sawm ve sap sap a. Vawra chuan,"A lawmawm viau nanga ,buh lak hun lamah lo zawm ve che u ka tum zawk mai ange" a han ti a. Rei vaklo an chawlh hnu chuan khaw lam panin an inchhawm chho leh ta a. Khua an thlen chuan zan lama lengahte insawmin an inţhen ta hlawm a. An in a zuk thlen chuan a u Vawmaia tihloh chu an lo awm kim ţhap a. Vawra an han hmu thut chu a u Ţuahpuii chuan," Vawra,ilo haw ni maw. A mak teh thut ve. Kha i va phur rit em em ve" alo ti thuai a. Vawra phur han chawi thlak mai a tum chu a zo ta silo a. Chhuatah chuan an in bun ta rum mai a. An chhungkua chuan za lua awmlo hian an nui ta kiah kiah mai a. Vawra chuan," A enga lo chawi nghal thawt thawt nge maw inih le. I zawh i ring reng em ni" nui hak hak chung chuan ahan ti a. Ţuahpuii chuan,"I tha i thlah nghal chuk chuk anih kha mawle. Khawi teh i chhar khawm thuai teh ang u" a han ti a. Tichuan Chhutalaia Vawra thilphurh darh nuaih mai chu an han chhar khawm ta a . Vawra pa chuan," Heti zat zat vawikhata phurh tur ani ngailo. I inti silawng mai ang" tiin a han hau deuh a. Vawra chu a nui tet tet a. A u Vawmaia a hmuh mailoh takah chuan Vawra chuan,"Khawnge ka u Vawmaia hi" a han ti a. A u nupui Neihthangi chuan,"Lal in lamah lalin a koh ani awm e" alo ti thuai a. Reiloteah chuan a u Vawmaia lal in kal pawh alo hawng a. Vawra chuan," Ka u,engthilah chuan nge maw lal in akoh che ni?" alo ti nghal a. Vawmaia chuan," Hmeichhe ho hriata sawi chi anilo e. Nakinah ka la hrilh ang che " alo ti sam et a.

          Zanriah eikhamah chuan Vawra leh Vawmaia chu leikapuiah ţhuin an titi a. Vawra chuan,"Ka u,eng thil chiah maw lal chuan alo hrilh che" tiin ahan zawt a. Vawmaia chuan," Vengchhaka pu Dohlira nupui khi an pa zinbo hlanin vengchhak pathlawi Aichhinga khian Lawithlem alo tum zantin ani awm e. A dik ngei em tih hriat anih loh avangin zaninah hian lal chuan enthla turin min ruat ani" a han ti a. Chutah Vawra chuan,"A va tenawmve mawle. Mi nu te thleng thleng chuan. Nula tamtak an awm lai a. A hmeichhia khian a zir deuh ani lo maw" a han ti a. Vawmaia chuan," A vau bet deuh ţhin ani awm e. Ţhatakin ava thlem a. Mi bula a sawichhuah chuan thahah a vau ani awm e. Lal hnenah a rukin nu pakhatin alo thlen a. Zaninah minlo zui ve dawn nia" a han ti a. Zan lamah chuan Vawrate chu Zawlbukah chuan an mu mengkar mai a. Pathlawi Aichhinga chet thawh hun chu an nghal kar a. Zanlai arkhuan hma hret chuan Aichhinga chu Zawlbuk aţang chuan a chhuak ta da da mai a. Vawrate chu an tho sap sap nghal a. An kal hma chuan Val upa Khuma chuan," Tumahin kutthlak loh tur. Mi dang hriatloh theih ang ber turin chinfel kan tum dawn nia" a han ti a. Tichuan Vawrate chu an val upa hoin Vengchhak lam pan chuan meichher pawh chhi ngamlo in an inzui chho ţhem ţhem a. Vengchhak pu Dohlirate in an han thlen chuan an val upahoin inhnuaiah chuan an biru ta a. Thawm engamah an hre zui lo a. Aichhinga lah an hmu heklo. Aichhinga chu inah lut in Khumpui a kai ta hial emaw an ti hman a. Mahse Rei vaklo an bihruk hnu chuan pu Dohlirate in lam pan chuan mi pakhat hi alo pen phei chhat chhat mai a. Hetih lai hian pu Dohlira nupui leh a fa kumhnih bawr vel chauh chu inah an awm a. Pu Dohlira hi khaw ţhenawm nikhat kal vela a pu damlo kan tura kal ani. Ke pen thawm chu lo hnai zelin pu Dohlirate inah chuan a lut ta a. Kawngkapui chu zawi te te a ben pah hian Aichhinga chuan,"Khuangi kawngka lo hawng tawh" zawi te hian a han ti a. Kawngka chu a inhawn mai loh avangin Aichhinga chuan," Ilo hawn vatloh chuan ka timualpho dawn che nia. A thah pawh ka that duh hial ang che" a han ti a. A tawpah chua Dohlira nupui Khuangi chuan kawngka chu a rawn hawng ta nge nge a. Vawra leh Vawmaia chu inhnuai aţanga chhuakin kawmchhak lamah an ding ran tawh a. Chutih lai chuan inchhungah chuan mei an rawn nun ta a. Aichhinga chuan Khuangi chu a thlem a thlem ta mai a. Ţhi mawi tak pek ta an tiam a. Mahse Khuangi chu inkilah a fapa pawmin a tawm chawih chawih a. Aichhinga chuan a chang leh an vau titih ţhin a. A tawpah chuan Aichhinga chuan Khuangi chu sual luih a tum ta mai a. Khuangi hlau thla bar chu a ţap hlawp hlawp a. Aichhinga lah chuan thawm chhuahlo turin a vau reng bawk a. Aichhingan Khuangi puanbih pawh thlak a tum lai tak chuan Kawngkapuiah chuan Vawra chu zuanglut zawk a. Aichhinga chu kawmthlang bang deng dawt chuan an theh thal tawp mai a. Vawmaia leh Val upa Khuma bakah midang pahnih chu anlo lut zawm nghal a. Aichhinga chu chhuatah chuan a thal huang mai a. A mipatna lah alo tho vu hman lehnghal. Val upa Khuma chuan bang kial Khuangi lo inhnit feih feih chu panin," Hlauh tur a awm tawhlo e. Lal in lamah i kal ang u" a han ti a. Vawrate chuan Aichhinga chu kaithoin Lal in lamah chuan an kal pui ta a. Lal in an va thlen chuan Lal leh upate chu an lo la meng vek mai a. Lal in an va luh chuan lal chuan,"In lo thleng ta maw. Thil awmzia han sawi tawh u" alo ti a. Val upa Khuma chuan thil awmdan zawng zawng chu a han sawi ta a. Chutah lal chuan ," Khuangi,Aichhinga hian a khawih hman che em?" tiin a han zawt a. Khuangi chuan," Lal pa,a khawih em chu min khawi hmanlo. Mahse zantin lokalin khumpui kai puiah min sawm a. Ţhi leh Bengbeh te alo keng ţhin a. Pawmlai nei ka ni ka tih pawhin min vau bet zel a. Mahse ţan ka khawh ve tlat avangin min khawih theilo a. Zanin kha chuan min sual luih atum ani" inhnit faih faih chung chuan a han hi a. Chutah lal bawk chuan,"Vawi engzah nge alo kal tawh. Engah nge i chhungte pawh i hrilh loh" a han ti leh a. Khuangi chuan,"Zanli lai chu ani tawh ang. Thah ah min vau zel tin ani" a han ti leh a. Chutah lal chuan ," Anih nang Aichhing,Khuangi sawi chu a dik em?" ahan ti a. Aichhinga chuan zam map lo hian," Lal pa amahnin mitmei min hmuh hmasa anih kha. Chuti nilo se zawng mi khumpui kai tumin ka kal zantin lo ange" a han ti a. Khuangi chuan," Mitmei ka hmuh ngai reng reng lo che. Mi tenawmpa" alo ti hlawk hlawk a. Lal chuan," Khuangi lo ngawi rawh. Anih leh anin mitmei ahmuh che anih si chuan engtin nge i hlawhtlinloh zantin theih?" tiin Aichhinga chu ahan zawt ta a. Aichhinga chuan," Lal pa,han tih tak tak dawnin a ngam leh ţhin silo alawm" a han ti ta deuh deuh a. Chutah lal chuan," Ani maw. Mi nupuite lawithlem tumin i um duk duk a. Chutah pawh i la zak miah nange. Ka val upate leh ka tlangvalten thil engkim an rawn hmu vek tawh a. Tunah chuan kan dan angin i Beng emaw,i Hnar emaw kan hlep anga. Lei i chawi bawk ang" a han ti ta a. Chutah zet chuan Aichhinga chu a hlauthawng ta,"Lal pa,ka tihsual chu ka pawm e. Khawngaihin lei chu ka chawi mai anga. Mahse ka taksa erawh min hlehsak lo hram rawh u" tiin a ngen ta chiam mai a. Mahse lal chuan," Tunah chuan pawmlai nei beisei a pawizia i hre ta maw. A chhungte han ko tawh u" ahan ti a. Tlangbval pahnih chu Aichhinga chhungte ko tur chuan an kal ta nghal a. Aichhinga nu leh pa an lo thlen chuan lal chuan," Hei in fapa hian mi nupui lawithlem tumin a lo veh zantin mai a. In dang ngai miah nange?" A han ti a. Aichhinga pa chuan," Lal pa,kan fapa hian hetiang thil ati duh ang tih kan ring ngailo reng reng ani" alo ti thuai a. Lal pa chuan thil awm dan an hrilhta vek a. Aichhinga nu leh pate chu an zak em em mai a. A tawpah chuan lal chuan a tlangval te chu Thlathi siam turin ahan ti a. An siam zawh chan tlangvalte chuan Aichhinga chu dawm betin khawnbawl upa pakhat chuan Thlathi hmang chuan Aichhinga Hnar chu a hlep hek ta huam mai le.Aichhinga na ti lutuk chu a ţhen tlawk tlawk a. Lal chuan," Kha kha i chan tawk anih kha. He thil avanga ilo la tibuai zui anih chuan khua aţang hian ka hnawtchhuak ang che" a ti zui a. Aichhinga tan chan mualphona tawpkhawk ani ngei anga. Nupui a hmuh zo lo hial thei ani. An zawh fel hnu chuan Vawrate chuan Khuangi chu an in lamah an han dah chho a. Zawlbuk lam an pan lai chuan Vawra chuan," Aichhinga te chhungkaw tan chuan a mualpho thlak dawn mange" a han ti sap a. Val upa Khuma chuan," Hetiang thil a thlen tawh hi chuan an pem zui tlangpui. Khuaa awmzui reng ngam ani tawhlo. Miin an hre tam anga. An zak tulh tulh dawn ani" a han ti a.

          A tuk khua alo var chuan Vawra chu hma takah thovin an in lam a pan thla ta nghal a. In a zuk thlen chuan an tapchhakah a pa leh pa pakhat hi an lo inkawm a. Vawra lo thleng a han hmuh chuan Vawra pa chuan," Vawra,hei i pa Hrangkima Hliappui khua ami anih hi. Ni zan lamah alo thleng a" alo ti var a. Hrangkima hi Vawra pa ţhianţha ber leh azawlpa Hrangkapa fapa ani a. Suartui khua Hualtu lamin an run chiam ţuma sala hruai zinga mi kha niin tunah chuan chhuah zalena awmin Hliappui lam an bel ta ani. Vawra chuan,"Ekhai,inhmuhlohna a rei ta lutuk a. Ka hre mai theilo che alawm. In dam tlang maw pa kim?" ahan ti a. Hrangkima chuan," Dam tlan lai tak ani e. Hei fapa pasalţha huaisen tak mai ka lo nei reng che zu nia. I ute ho hi chu ka hrechiang khawp a. Tunah chuan kan khuaah phei chuan i hming kan sawi banglo asin" a han ti a. Vawra chuan,"Pa Hrang,Hliappui lamah chuan Suartui khaw mi leh sa engzah chiah nge awm ang. Sala hruaia awm te kha tlanchhuah vek inni em?" tiin a han zawt a. Hrangkima chuan,"Hualtu khua a i chhanchhuah takte tihloh khaw danga awmho kha chu a hranpa a va tlanchhuah an awm ta hauhlo mai a. Hliappui lal khan tlem azawng chu ava tlanchhuak nanga,tlanna sum an phut tam theih tak em avangin a tamzawk chu tlanchhuah lohin an awm ani" ahan ti a. Vawra chuan,"Anih tak chu maw. Nangni in chhungkua in kim thei ta em?" a han ti leh a. Hrangkima chuan," Aw,keini zawng tlanchhuah hmasak ho zingah kan tel hlauh ani" a han ti leh a. Vawra chuan Hliappui lam chu hriat chian a chak ta deuh deuh mai a. Chutah Vawra chuan," Ka ţhian Vanzaua kha adam bawk maw?. Zalawma leh Vanteite chhungkua enge an an?" a han ti leh a. Hrangkima chuan," Vanzauate chhungkua chu Hliappui lamah an awm ngei mai a. Mahse Vantei te kha chu tlanchhuah lo pawlah khan an tel a. Zalawmate chanchin erawh ka hrezui talo ani" a han tih chuan Vawra chu a ngui nghal riai mai a . Engemaw sawi leh atum lai tak chuan Vawra pa chuam," Vawra,hei i pa Hrangkima te hian mo lawm turin min rawn sawm vang vang ani a. Thil dang kha chu nakina zawh atan khek teh ang. Hna kan awl laite anih bakah keini kan chak tawh silo a. Nang tal hi Hliappui lamah chuan i va kal ani ang chu" a han ti a. Vawra chuan," Ka pa,ka kal tak tak dawn em" phur hmel fe chuan a han ti a. Vawrapa chuan,"kal tuk e. A tlawngawl ber ini tawh alawm "alo ti sam et a.

          Tukţhuan ei khamah chuan Vawra leh Hrangkima chu leikapuiah ţhuin an titi malh malh a. Vawra chuan,"Pa Hrang,Suartui lal kha enge a chanchin ni ta zel. Hliappuiah ala awmve reng em ni" a han ti a. Hrangkima chuan," Awm tehreng e. Tunah chuan Hlaippui chu khawlian tak ani tawh a. Kan lal Lianvunga pawh a unaupa chuan a lo lawm thiam khawp mai. A khaw mite pawh an fel na rawh e" a han ti a . Vawra chuan," Kan zin bo hlana kan khua anlo hal vek kha chu kan hrilh ahai teh asin. Theihtawp chu kan rawn chhuah ve a. Mahse Dampui lama kal ho kha chu damchhuak.mang an awmlo ani" ahan ti a. Hrangkima chuan," Kan lal pawh hian in hming ala lam fo reng asin. Tunah chuan engkim anih tur ang ani zo vek tawh a. Theihnghilh i tum tawh teh ang. Kan khuaa ilokal hunah chuan lo lawm tur che an tam ngawtin ka ring ani" ahan ti a. Vawra chuan," Ka ţhiante zawngchhuak turin ania kalo kal dawn ni" a ti sap a.

                     Bung-53

           Fur ruahtui tlak hun lai ani a. Khua a chen chhunzawm tak avangin Vawra Hliappui khaw lama mo lawm tura kal tum pawh duh ang hunah a chhuak thei talo a. Vawrate ai mah chua Hrangkima chu a hmanhmawh tawh a. Mo lawm tura an inbuatsaih buai dawn tehreng nena duhaia rei a cham tak avang chuan a awm hle hle thei ta a hauhlo mai a. Vawra chuan a pa Hrangkima hmanhmawh zia hriatpuilo niawm tak chuan," Pa Hrang,a enga Favang awllen hun pawh nghak zolo a mo lawm in rawt chuk chuk ni" a han ti a. Hrangkima chuan," An lo puk lawk deuh alawm mawle. Kan kal thuai loh chuan ka chhungte ngaih a ţha hauhlo ang. Kan khaw kar hi ni tamtak kal ani si a" a han ti a. Vawra pawh chuan hrethiam takin," Naktuk lamah khua a an deuh chuan kan kal mai ani ang chu" a han ti a. Tichuan a tuk lama Hliappui pan tur ang chuan an insiam ta a. Zan lamah chuan Vawra chu nula rim a chhuak lovin a nu leh pa nen chuan an titi a. Vawra chuan," Ka pa,hei Hliappui lamah ka kal dawn rau rau anih chuan ka ţhiante Hualtu khaw lamin sala an man takte kha ka zawng chhunzawm nghal duh dawn ani. Ka remruatna hi min pawmpui hram ka beisei ani" a han ti a. Vawra nu leh pa chuan an han ngaihtua neuh neuh a. Vawra chu dan tum teh mahsela a kal lui dawn tho a an hriat avangin Vawrapa chuan,"Vawra,puitling ini ve tawh a. Nangmaha thutlukna siam thei rual ini tawh alawm . I thiltumah chuan kan dang hauhlo ang che. Mahse sal i tlanchhuak dawn anih chuan tlanna sum i ken angai ngei dawnna. Kan Ţhi dahţhatte hi tlemazawng i ken dawn nia. Mi naran tlan nan chuan a tawk viauin ka ring ani" a han ti a. Vawra chuan," Ka pa,ngaihtuahawmin ka awm hauh dawnlo a. Ka nunna atana pawi thei thil chu ka khawih hauh dawnlo ani. Ţhi dahţhatte hi tlemazawng i keng dawn nia. Mi naran tlan nan chuan a tawk viauin ka ring ani" a han ti a. Vawra chuan," Ka pa,ngaihtuahawmin ka awm hauh dawnlo a. Ka nunna atana pawi thei thil chu ka khawih hauh dawnlo ani. Lo lam chu ka uten an hneh thoin a rinawma. Favang kawl alo en thlenga ka lo kir talo anih chuan ka chanchin in rawn nghaihven dawn nia " a han ti a. Vawra bawk chuan,"Naktuk lamah kal chhuahna khuate a kuak tak hlauhin ka u Rama te in lamah ka va leng phei lawk ange" a han ti leh a. Tichuan a u Ramlianate in lam pan chuan a kal ta nghal a.

          A u Ramlianate in ava thlen chuan Ramliana chuan a fate ei atan tiin thuka meilum ai pahim Vaimim alo rawh puak ţuk ţuk mai a. Vawra a va luh chuan Ramliana fate chuan anlo bawh nghal nak nak a. Ramliana nupui chuan ţhutna tur alo pe a. A ţhut fel hnu chuan Vawra chuan," Ka u,i Vaimim rawh kha hem na lo deuh la ti nia. I rawh puak ang ţuk ţuk a. Hmin pawh a hmin ţha nek lo ange" nui ţhaw chungchuan ahan ti a. Ramliana chuan,"I fa te hi an hmanhmawh em alawm. Muang mara han rawh na hman awm heklo i. A hmin hmasa sa an ei zo nghal zel a" a han ti a. Ramliana nupui chuan La hlum mawlh mawlh pah hian," Vawra,i u hi chu fate han enkawl tir deuh leh tlawmah ala tlat zel a. Kha a Vaimim rawh pawh thinrim chungin thukah a nawr phum vel mai mai nih kha" nui chung hian alo ti a. Ramliana erawh a ngawi reng a. Vaimin fang chu sik thla zauh zauhin a khat tawkin an hmawm leh zauh ţhin a. Ramliana fate lah chuan a nu la hlum sate chu anlo kai phelh leh ţhin a. A Vaimim rawh let kual mawlh mawlh pah chuan Ramliana chuan,"Vawra,nula rim nachangte hi hre ve deuh teh. An ina i len beiseia kan fate lo duat tawk an kat nuk ania" a rawn ti a. Vawra chuan,"Suartui kan chhuahsan aţang hian nula lam reng reng ka melh peih talo mai" a han ti a. Vawra bawk chuan," Ka u,naktuk lamah hian Hliappui lam pana chhuah kan tum deuh asin. Ka hrilh tawh che ang khan ka ţhiante zawn nghal chu ka tum tlang ta ani. Zin mai mai hi a harsa ţhin si a" a han ti a. Ramliana chuan,"Kan tellova i kal tur hi ka ngai ngam hauhlo mai a. Mahse kan tello pawhin vawi tamtak sa leh ral ilo bei tawh ţhin a. Va fimkhur la,khuanu venna zarah i ţhiante pawh chu i va hmu leh mahna le" a ti a. Ramliana chuan Vawra chu an fuih sauh sauh a. Reife a ţhut hnu chuan Vawra chu a u Sawivela te in lamah kal lehin chumi hnuah zawlbuk lam pan turin a chhuak leh ta a.

            Vawra Zawlbuk a han thlen dawn chuan Saithanga nen an in tawk ta hlauh mai a. Saithanga chuan," Vawra khawnge i bik bo char char a. Ka zawng zankhua ţhak dawn che emaw ka ti hman asin" a han ti a. Vawra chuan," Ka u te kan kual e ka tia lawm mawle. A enga khatia min melh khui khui ni. Hawh teh Zawlbuk i kai thuai teh ang" a han ti a. Saithanga chuan,"Zawlbuk Zawlbuk ti zantin mai. Min tih hah zia hi i hria em. Lokal thuai teh "tihpah chuan Sangkimite in lam pan chuan a kaiphei ta daih mai a. Sangkimi te in an va thlen chuan Sangkimi leh Ngurpuii chu tapchhakah anlo inkawm a. Vawra leh Saithanga rawn lut an han hmuh chuan Sangkimi chuan," Kha iva zawng hmu meimawh. Khawi lam nula inah nge alo tawm sen kuk ni" alo ti var a. Saithanga chuan,"Khawi lam nula in chu sawiloh. Zawlbuk lamah ka va hmuh leh tak kha maw" alo tivar a. Ngurpuii erawh hnuai lam bihin a ngawi reng thung a. Vawra chuan ţhut hmun rem pah chuan,"Naktuk lamah zinchhuah ka tum deuh a..Ka u te in lamah ka han lengkual alawm mawle . In va thutak hmel hlawm ve a" nui chung chuan a han ti a. Ngurpuii chuan," U Vawr,hun tlemte min pek theih takin ka ti mai ania. Ka tibuai che anih chuan min ngaidam dawn nia" zawi sap hian alo ti a. Vawra chu an ngawi vang vang a. A ţawngchhuah hma chuam Saithanga chuan," Vawra,kan thu ngai bawkah kan lut leh dawn anih hi. Zan dangah pawh kan lo sawi fo tawh a. Zanin chu thutlukna i siam angai tawh ani. Hawh teh Sangkim pawn lamah ilo va ţhuchhuak teh ang. Inchhung zawng a boruak a uap em mai" a han ti zui a. Saithanga leh Sangkimi chu an chhuak ta nghal a. Vawra leh Ngurpuii chu tapchhakah ţhuin bul han ţan tu bik nih hlau niawm fahran chuan an ţhu ngawi kar mai a. Atawpah chuan Vawra chuan," Ngurpui, eng thu nge sawi duh i neih a" a ti ta hlawl mai a. Ngurpuii chuan," U Vawr,a hma ami ang bawk kha ani mai. Sawi belh vak tur awm tawhlo ani. I rilru i thlak thei lo anih pawhin zanin bak chu ka tibuai tawhlo ang che" a han ti sa sa a. Vawra chuan," Ngurpui,lal fanu i ni a . Kan ina lawi tur chuan i sang mah mah . Bakah tlang takin ka sawi tawh mai anga. Tunah mai chuan tu nula chungah mah ka rilru kala pe theilo ani" a han ti a. Vawra chuan a nunhluite Ngurpuii chuan hre ve reng reng sela a duhna pawh a reh mai ringin Dengi nena an chanchin zawng zawng te chu an hrilh ta vek mai a. A sawih zawh chuan Vawra chuan," Tunah chuan ka rilru hi tu chungah mah ala fu theilo ani. Ngurpui,hmangaih miah silo che a hmangaih che anga lan kha ka theilo ani. Min ngaidam la, min nghah chhung hian khua i tlai mai mai ange" a han ti ta a. Ma tak maiin Ngurpuii chu a nui ta sen sen mai a. Vawra ngaihna hrelo chuan,"A eng chu nge i nuih pui a?" ahan ti hluk a. Ngurpuii chuan," U Vawr,ka duhna che a zual deuh deuhin ka hria. Midang lakah ka rilru ka pe thei dawn chuanglo a. Tihian in nghah pahin pangngai deuhin inkawm ila. I rilrute pawh i la thlak ve mahna. Ka nghak rei thei phian dawn nia" a han ti ta reuh a. Vawra pawhin sawi mai tur a hre lo. Lal fanu chu puitling ati ru ta riau mai a. Vaibel ek khawng thla karh karh pah chuan," Ngurpui ,ka rin ai daihin i puitling mai ka ti. Ka vanglai kha chu nise zawng ka chhuah hauhlo ang che" nui chung chuan ahan ti a. Ngurpuii chuan nui ham ham pah hian,"Tun hi i vanglai tak niin ka hria" alo ti ham ham a. Ngurpuii bawk chuan," I zin haw chuan nupui chu i rawn hawn em lovang chu tiraw. Chutiang hun reilote chhunga duhzawng tak va hmu hmel chu i pu hauhlo in ka hria" nui hak hak pah chuan a han ti a. An titi chho zel a,an nui dun ta char mai a. Pawn lama Sangkimi leh Saithanga ngaihna hrelo chun enge an sawi tih hriat tumin an han ngaihthla ngun deuh ţhin a. Vawra leh Ngurpuii chuan an tunhma chanchin nuizatthlak tak tak te chu an lo sawi vel mai mai hi alo ni a. Saithang leh Sangkimi chu mak tih hmel tak hian inah chuan an va lut ta a. Inchhung an va luh chuan Vawra leh Ngurpuii chu an lo hlim hle mai a. Vawra chuan," Ekhai Saia,zanin zet chu a hlimawm ngei mai" alo ti hlut a. Sangkimi chuan ," In sawi fel thei ta em ni?" a han ti a. Ngurpuii chuan," Ţhianţhaah kan inchhuah thei hram ani" nui chung hian alo ti a. Saithanga leh Sangkimi chu an hawihai hle mai a. Vawra leh Ngurpuii lah chuan an ţhiante hawihai lutuk chu an han nuih leh a. Tichuan hlim taka inkawmho in lenghawn Arkhuan hnu chuan Vawra chuan Ngurpuii chu an in thlenga han thlahin dam taka inhmuh leh turin an in mangţha ta a. Vawran Ngurpuii a thlah zawh chuan Saithanga nen chuan Zawlbuk lam an pan ta a. Saithanga chuan,"Vawra,amak hi ka tia. A enga lal fanu hi hnar char char nge maw inih le?" a han ti a. Vawra lah chuan," Ka zin haw hunah kan la sawi dawn nia" a ti duh chauh a. Tichuan Zawlbuka riak tur chuan Bawhbel chu an bawhliam ta a.

           Zing khua alo var chuan nidang anglo takin ruah a sur lo a. Khua lah chu a thiang phian mai a. Hrangkima chu a phur surh surh hle mai a. Vawra Zawlbuk kai alo haw veleh chuan Hrangkima chuan," Vawra,i chhuak thuai thuai teh ang. Khua in min bumro hma hian" a han ti a. Vawrate pawh chuan hrethiam takin an han inbuatsaih nghal sawk sawk a. Tukţhuan chu hma takah an ei ta a. Tukţhuan ei khamah chuan Vawrate chu Hliappui khaw lam pan tur chuan an kal dawn ta a. Vawra nu chuan Thu mawnga a Ţhi dah that te rawn phawrhin Vawra chu a ahan pe a. Vawra pa chuan,"Vawra,tluang tak khan va kal ta ula. Nangpawh i ţhiante va zawng hmu ngei ang che. Pasalţha inih angin fimkhur takin va che la. Engthil mah va bawh buan buan suh ang che" a han ti a. Tichuan Vawrate leh Hrangkima chu Hliappui khaw lam pan tur chuan an kal ta a . Lal in zawn an han thlen chuan lal fanu Ngurpuii chu leikapuiah lo dingin nui sen sen chung hian a ban alo vai lauh lauh mai a. Vawra chuan han nuih letin a ban a han vai ve a. Ţhian ţha tak chu ani phawt mai. An kal liam dawn thleng chuan Ngurpuii chuan ala thlir reng a. Vawra pawh a rawn hawi let ve zauh zauh ţhin a. Vawmaia chuan Vawrate chu khaw kawtchhuah thleng thlahin a hawsan a. Vawrate pawh Hliappui lam pan tur chuan an kal ta nghal vang vang a.

          Lungchuan khua aţanga nithum lai an kal hnu chuan Vawrate pawh chuan an khaw hlui,rauhsana awm tawh Suartui khua chu an lut tawh a. An khawhlui ,khawthleng mumal pawh hmuh theihloh khawpa thing leh mau leh phulpikin a bawh chuk mai an thlen chuan Vawra chuan," Pa Hrang,i han chawl rih lawk teh ang. Khua te pawh han chuan ila" a han ti a. Hranga chuan ," Ni e,chhawl te pawh ahal tawh alawm" alo tive mai a. Vawra chuan an khawhlui ram vek tawh chu an thlir vang vang a. Dengi nena hlim taka an lo tualchai tawhna hmunte chu phulpikin a bawh vek tawh mai si a. A lungte a leng thar em em mai a. Hmuh duh nei niawm takte chuan an hawi vel ruai a. Mahse khaw ram tawh ah chuan engmah hmuh tur a awm silo. Rei tawk fang an chawlh hnu chuan Hliappui lam pan chuan an kal leh ta nghal a. Hliappui anthlen hma hian Khuangsih khua an luh angai dawn a. Mahse Hrangkima chuan khua a lut khaw muang lo a kal tlang mai a duh a. Tichuan khua hel chu an tum ta a. Suartui khawhlui aţanga nithum vel an kal leh hnu chuan Khuangsih khua chu an hnaih tawh hle mai a. Khua a luh a tum lemloh avang chuan khaw lu lam aţanga hel an tum ta a. Mahse an beiseiloh tak maiin Khuangsih khua an hel tumni chuan ruahpui vanawn a sur ta hrep mai a. Vawrate chu leipui pakhata Bekte an zar hnuaiah chuan huh hluam chung hian an lut tawp a. Ruah la chu a sur tam tulh tulh mai a. Hrangkima chuan,"Kan khawmual chu a. A va han huatthlala awm tak em. Kan mutbu thlengin min nan zawr ta hnep sia. Khuaah kan luh mai angai dawn anih hi. Duhaiin kan thang rei tawh mah mah ani" beidawn hmel tak chuan a rawn ti a. Vawra chuan," Han nghak deuh ila. A han veleh mai ang. Khua a riah kher angai lo ang" a han ti a. Hrangkima chuan,"Khuaah chuan kan luh ngei angai ang. Huh zawr hnep chunga khawkar kawng kal zawng ka thei hauhlo ang'" a han ti a. Tichuan ruah han hun chu an nghak ta a. Ruah lah chu a sur duh deuh deh mai a. Thlichhia a thaw vuk vuk a. Khua lah chu a thim dawn ruai tawh a.Vawilehkhatah an Bekte chu thliin a rawn chhem thal ta daih mai a. Vawrate chu an in en a,an nui ringawt a. Tih theih dang awm heklo le . Ruahsur hnuaiah chuan Khuangsih khuaa luh a zankhat riah mai chu an tum ta a.

          Khuangsih khua an va luh chuan khua a thim fel tawh a. Ruah a tlak reng vang chuan khawchhung chu alo reh ţhap tawh a. Vawrate chuan tawm hul vat an duh avangin khaw hmawra in lo awm hmasa ber chu an pan ta nghal a. An va thlen phei chuan Vawra chuan in chhak aţang chuan," Mikhual in thleng thei angem" a han ti a. Tumah rengin an rawn chhang lova. Vawra chuan,"Min thleng theilo anih dawn hi. Hawh teh in dang i.zawng thuai teh ang" tihpaha kal mai a tum lai chuan inchhung aţangin patling aw hian," Tute nge innih. Khawi khua nge innih?" a rawn ti ta a. Vawra chuan," Lungchuan khaw tlangval kan ni e. Hliappui lama kal tum kan ni a. Ruah a sur nasat avangin khuaah kan lo lut ta mai ani" a han ti leh a. Inchhung aţang chuan," Lo lut tawh u" a rawn ti a. Vawra leh Hrangkima chu inah chua an han lut nghal a. In an han luh veleh chuan patling pakhat hi fei keng chung hian inring takin alo ding teu mai a. A hnungah chuan a nupui ni ngei tur nausen pawm chungin alo ding ve bawk a. Vawra chuan,"Ka pu,hlauh tur kan awm love. Kei hi Lungchuan khaw tlangval Vawra ka ni a. Hei hi ka pa Hrangkima, hliappui khua ani e" a han ti a. Chutah inneiupa chuan mak tih hmel tak hian,"Pasalţha Vawra maw inih a" a han ti a. Vawra chuan," Pasalţha tiha han chhiar tlak em chu ka nilo e" a lo ti thuai a. Inneitu pawh chuan a Fei ken te dahthlain ," Zaluta kanni a. Kan lo hmuah dan che u avang khan min ngaidam ula. In thawmhnaw te kha han inthlak ula. Thil awmzia kan sawi dawn nia. Nui puan hlap kha han theh thlak sak tawh" a han ti a. Vawrate pawh chuan an phur te nghatin an han inhru hul vel a. Zaluta nupuiin puan ven tur a rawn theh thlaksak chuan an puan ven huh vel tawh chu an han thlak a . An in zawh fel hnu chuan Tapchhakah chuan mei lum ai pahin an ţhu a. Hrangkima chuan Zaluta hnenah chuan,"Enge thil awmzia ni a. Khua hina ralmuanglo viau em ni?" tiin a han zawt a. Zaluta chuan,"Tunlai tak chuan a ralmuang hranlo khawp mai. Nimin piah zan khan tlangval sawmhnih rual velin zanlaiah kan lal in an rawn luhchilh thut mai a. Kan lal chhungkua chu in phen nan an hmang a. Kan pasalţha leh tlangvalte chuan lal in hualin mikhual tlangvalte chu inpe turin an han ti a . Mahse mikhual lam chuan engah mah an ngailo a. Lal in chhung aţang chuan an duh duh an rawn sai thal tawp zel mai a. Kan pasalţhate pawhin han tihvak ngaihna an hrelo ani. Lal in han zim huk dawnin kan lal te chungah kut an lek ang tih kan hlau si a. Lal in chu pawn lam aţangin an veng ani deuh ber mai" a han ti ta a. Chutah Vawra chuan,"Khawi lam khaw mi leh sa nge annih tih in hre thei em?" tiin a han zawt a. Zaluta chuan,"An sawidan chuan kan khua aţanga hla tak mai Tatzawl khua aţanga lokal anni awm e. Kan lal ro leh a thil neih zawng zawng rawn laksak tuma lokal anni" a han ti leh . Vawra chuan,"Anih in lal chuan engvanga a ro te chu pe mailo nge anih?" tiin ahan zawt leh a. Zaluta chuan," Kan lal pa ro zawng zawng mai bakah kan khawnbawlte ro thlenga an pek tawh hnu pawhin anla lungawi chuanglo a. Nimin lam khan kalchhuah an tum a. Mahse ruah a sur tak tluk.tluk avangin an chhuak thei ta rihlo ani. Naktuk lamah khi chuan an chhuak tawh ang. Mahse an chhuah pawhin kan tlangvalten an beih ngamloh man kan lal hruai tel an tum ani" a han ti leh a. Vawra bawk chuan,"Pa Hrang hetah lo awmla. Zawlbuk lamah ka va kai phei reng reng ange" a han ti a. Tichuan Hrangkima chu an thlen inah chuan lo awmin Vawra chu Zaluta chuan ruahsur hnuaiah Zawlbuk a panpui ta a.

          Zawlbuk an va thlen hma chuan kawng lakah tlangval pahnih hian anlo tiding a. Zaluta chuan thil awmdan chu a han hrilh zung zunga. Tlangval pahnihte chuan Vawra chu Zawlbuk lamah hruai phei nghalin Zaluta erawh in lamah a hawng thung. Zawlbuk an va thlen chuan Val upa ţhenkhat leh an pasalţhate bakah tlangval engemawzat an lo awm a. Tumah mut hmun remlo in anlo ţhu far mai a. Mikhual hmel an han hmuh takah chuan val upate chuan," Kha khawilam tlangval nge in rawn hruai " anlo ti a. Vawra hruaitute chuan Vawra an rawn hruai chhan chu an han sawi ta a. Tlangvalten an sawi zawh chuan Val upa Manţhianga chuan," Vawra maw inih a. I u Ramlianate an dam ţha maw. I hmel han hmuh chuan an sawi ang ai daihin ilo lian zawk anih hi. Engti tura helaia lokal nge inih?" alo tivar a. Vawra chuan,"Hliappui khaw lama mo lawm tura kal tum ka ni a. Kawng lakah ruahpuivanawnin min nan takah chuan khawchhung kan lo lut ta mai ani. Hliappui khaw pa pakhat nena lokal kan ni e" a han ti a. Val upa Manţhianga chuan,"Kan khaw boruak chu ilo hre nual tawh thoin ka ring a. Tatzawl khaw pasalţhate chuan kan lal rawn luhchilhin an hreng zui a. An chhuah duh bik tlat loh avangin lal in kan veng ta tawp rih ani" a han ti a. Chutah Vawra chuan," Engvanga in khaw lal chu rawn bei mai nge annih le?" alo ti thuai a. Khuangsih pasalţha Rozika chuan,"Ţhi leh Dar an rawn beisei ani awm e. Ruah a sir zuiloh chuan naktuk lamah khi chuan kan lal chu an chhuahpui mai tawh dawn ani" a lo ti a. Vawra chuan," Ka sawi ve phak aawm lo nangin engtia hma han lak nge im tum ni?" tiin a han zawt a. Rozika chuan,"Kan lal khi nungdama a awm theihna tur anih chuan kan kal tur mai angai dawn ni. Lal in kan zim hnaih deuh leh kan la thah an tum a. Anni lah chuan lal inchhung aţangin Silai an duh hun hunah an rawn hmetpuak a. Han luhchhuah ania ka chak ni" a han ti phiar phiar mai a .Val upa pakhat chuan,"Silai keng tak chu panga vel chauh anni a. Mahse kan lal chhungkua an kawl tlat khi min ti mangang tu ber chu ani ta ani" a han ti a. An han ngawi vang vang a. Pasalţha Rozika chuan Vawra hnenah,"Pasalţha ve tho ini a. Ruahmanna min chhawpchhuahsak turte inei em?" a rawn ti hlawm mai a. Vawra chuan,"Keiaia pasalţha hauisen zawkte pawhina tih ngaihna in hriat loh chu kei a han chinfel theih a awm bikin ka ringlo" alo ti thuai a. Val upa Manţhianga chuan," Ngaihdan sawi zawng athiang alawm. Han sawi ve reng reng la" alo ti a. Chutah Vawra chuan," Chutia nangni berin in tih tlat chuan ka ngaihdan kan sawi ange. Naktukah chuan khua hi an chhuahsan turah ngai ta ila. Khua aţanga hla deuh khan remchang deuha kan lo lambun thei ang. Lal chu an chelhbet rengin a rinawmloh a. Kah rema an awm veleh kan lo kap thlu phiar mai dawn ani" tiin a ngaihdan chu a han sawi ta a. Mahse val upa pakhat chuan," Chuzawng a tihchiloh ang. An vaia kahthluk vek chu thil harsa tak ani dawn a. Kan lal nunna in a tuar phah thei ani" tiin Vawra rawtna chu a rawn hnawl a. Chutah Vawra chuan,"Anih chuan thil pakhat chiah kan sawi leh hram ange. Kawng lakah chuan kan lo chang tho anga. Mahse lo kap mawl tawp lovin anmahi tawk zawngin kei leh tlangval pahnih dang kan kal anga. Khualzin Bellam zuar angin kan inphur bawr luk anga. In lal an hruai tak chelh tute nen kan inkal pelh dawn chiahah tlangval pahnihte chuan in lal chu man thutin kawng thlang lamah an liam thlakpui anga. Chutih rual chuan in rawn kap nghal anga. Keiin a rem rem kalo sat siah siah mai dawn ni" a han ti ta a. Khuangsih val upate leh an pasalţhate chu an han ngawi vang vang a. An in entawn hrek hrek hnu chuan val upa Manţhianga chuan,"Rawtna pawm nahawm tak ani. Mahse i nunna i thap ngai lovin kan pasalţhate an kal zawk thung ang" a rawn ti a. Vawra chuan,"In pasalţhate chu an hmel an hmu nual tawh awm si a. An hriatchhuah palh hlauh zawngin kan ruahmanna hi engmahloah a chang thei ani" a han ti a. An han sawi tlan nak nak hnu chuan Vawra rawtna anga kal chu an rel thlu ta a. Tichuan a zan azan chuan ruahaur hnuaiah hlum bel an han la khawm sawk sawk a. Bellam zuar hoin an phurh dan anga phur theih turin an han ţawn bawra. Tichuan pasalţha Rozika hovin an lo lambunna tur hmun an khaw luh khan chhim lam kawngah chuan an tlan ta nghal a. Khua aţanga hla vaklo ah hian awih pang deuh,Ţhang hmun hi a awm a. Kawngruh chuan Ţhang hmun chu a paltlang raih a. Kawngchhak leh kawngthlang lam chu Ţhang hmun chhah ţha zet mai hi ani a. Chutah chuan anlo lam bun dawn ani. An awmna tur an enfel chhung chuan an vanneih asiamin ruah pawh a han tawh a. Meichher eng ţha tak hnuaihah an ţan hmun tur chu an han en kuala. Vawra leh Khuangsih tlangval pahnihte chu khuaah pawh let tawhlo in an Bel phurh tur nen chuan an lo lambunna tur hmun ah chuan an awm tlang nghal a.

          Zing khua alo var a. Khuangsih tlangvalte chu lal in chheh vel,lal in hlat deuh taksi ah chuan an awm a. Ruah a sur chhunzawm taklohah chuan khua pawh a thiang ţha hle mai a. Khuangsih lal in kawngka chu a rawn in theh hawng ţhuai a. Tatzawl khaw pasalţha Ngamtawna chu Khuangsih lal Rumvunga kai chungin alo pen chhuah thauh thauh mai le . Lal in leikapuiah chuan rawn dingchhuakin an hawi valh valh a. A hnung lamah chuan tlangval pahnih hian Khuangsih lal chu Silaii anlo tin ve mek bawk a. Ngamtawna chuan ring leng lawng hian,"Khuangsih upate kha lo hnai teh u" a han ti tuarh a. Khuangsih upate chu tlangvalho zing aţanga lo chhuak sap sapin lal in lam chu an pan phei ta a. Ngamtawna chuan,"Vawiinah hian in lal hi a ro zawng zawng nen Tatzawl khaw lamah kan hruai dawn a. Hnung lam aţanga fin khekrek chhuaha min rawn beihzui tum in awm anih chuan in lal hi in chan ang. Tin,in lal hi thah kan tum hauhlo a. Kan kal aţanga nihnih liam hnuah tlanna sum kengin in lo kal thei ang. In lal tlan nan chuan Sial sawmhnih in rawn kai tur ani" a han ti dap dap a. Khawnbawl upa pakhat chuan," Tlangval,Sial sawmhnih chu a tam mah mah lo maw. Kan ro zawng zawng min laksak vek tawh bawk nen Sial sawmah in tla thei mai lovem ni" a han ti dek dek a Ngamtawna chuan,"Sial sawmhnih chu Sial sawmhnih ani mai" a ti ta bur mai a. Chutih lai mek chuan Tatzawl khaw tlangval ho chu lal in aţang chuan an rawn chhuak sap sap a. A ţhenin Darkhuang an pua a. A ţhenin Darbu an awrh bakah Ţhi leh ro thil dang ak puar luk chung chuan an rawn chhuak hlawm a. Khuangsih tlangvalte chuan lal in lam chu an rawn hnai hret hret mai a. Ngamtawnan alo hmu chuan a Silai cheng kau rap pahin," In lal hi in la duh chuan rawn tawlh hnai tawh suh ang che u" a han ti a.Khuangsih lal Rumvunga lah chuan," Tlangvalte u,hlau suh u. Han sat sawm vek ta che u" alo ti riap riap mai a. Tlangvalte chuan a ruala bawh huk mai an duh a. Mahse upate chuan an lal nunna atan apawi thei dawn tih an hriat avang leh khawdai lama lo bei tur an inruat tho avangin an tlangvalte chu an dang hram hram a. Tatzawl khaw tlangval hote chuan Khuangsih lal chu hruaiin lal in chu an chhuahsan ta a. Lal nu leh a fanu chu an ţap hawm hawm mai a. Khuangsih lal fapa chuan a nu leh a farnu chu alo dawm bet ţang ţang mai a. Khuangsih khaw tlangvalho chuan an lal chu kawtchhuah thlengin an va zui a. Khuangsih lal Rumvunga chuan," Ka tlangvalte u. Min rawn ngaihtuah suh u. Ka tel lo pawhin Tatzawl khua chu in rawn hal darh vek thei tho ang" a han ti salh salh a. Silai cheng kau sa a an tin reng avang chuan a tlangvalte chuan an bei zui ngam silo a. Tichuan Ngamtawna leh a hote chuan Khuansih lal leh a ro zawng zawng chu Tatzawl lam panpui tur chuan an kal pui ta a.

           Khuangsih pasalţha Rozika leh a hote tlangval sawmhnih lai maite chu Silai kah inpeih sa diamin Ţhang hmun awih pang deuh kawngchhak lamah chuan an bawk ţhap tawh a. Rozika chuan," Tumahin Silai mu athlawna kahchhuah loh tur. Silai keng a lokal te kha in tum bik anga . Kan lal vengtu leh a a kalpui tute erawh kan lal sai palh a hlauhawm em avangin kan kap lovang. Silai a rik zawh rualin kan bawh nghal huk anga. An vai erawh chuan kan that lovang. Thu zawh fiah tur kan mawmawh dawn ani" a han ti dap dap . Vawra leh Khuangsih tlangval pahnihte pawh hlum Bel phur bawr luah chungin Ţhang hmunah chuan an ding ran tawh a. Am sam leh an iptepui bakah an puan vente chu zan lama ruah do tlaivar zak ang maiin a huh vek a. Am hmaite chu Bellam zur hmelpu takin a bal hle mai a. Vawra chuan a ţhiante hnenah chuan," Kan hmelmate kan tawh hunah lal chu a laiah anlo dah ngei anga. Kawngruh hi a zim em em a. Min kalpelh nghak niawm takin kawngsirah kan ding anga. Kan dinna zawna lal alo thlen chiahah le ka ti anga. Chumi rual chuan lal chu kawng thlang lamah in zuan thlakpui anga. Keiin a vengtute ka bitum tawh mai dawn ani" a han ti a. Chutih lai mek chuan Tatzawl tlangvalte chu hlawhtlin inti takin Khuangsih lal hnungkhirh chung leh a ro zawng zawngte phur chung chuan Ţhang hmun chu an rawn lut dawn tawh a. Vawrate pawh chuan Khuangsih pasalţha Rozika leh a hote awmna zawn vel laia an hmelmate tawh hman tumin an kal bek bek a. Tatzawl tlangval pahnih Silai keng chuan hma an rawn hruai a. A laiah chuan Tatzawl pasalţha Ngamtawna chuan Khuangsih lal chu a rawn chhawm a. A hnung dawl turin tlangval pahnih Silai keng an dah bawk a. Tlangval dang ho zawng chuan Fei hawlin Ţhi leh Dar an phurin an ak thung a. Ţhang hmun awih pang a kawngruh chu a zim deuh avangin an rawn inzui phei diah diah mai a. Vawrate nen an han in tawh tak thutah chuan Tatzawl tlangval hma hruaitute chuan,"In awm hmunah khan ding rawh u. Anih loh chuan kan kap ang che u" a rawn ti tuarh mai a. Vawra chuan thlaphan hmel tak hian," Ka pu,Bellam zuar mai kan ni e. Min hrethiam hram teh u" alo ti mawlh mawlh a. Chutah tlangval pakhat chuan Vawra hlum Bel phurh pakhat chhutkeh sak pah chuan,"Mi dawihzep chan tawk anih kha. In Bellam zawrh hi kan chhutkeh sak vek law law dawn che u mawni" a han ti vel a. Vawra chuan," Ka pu,min hrethiam la,kan damkhawchhuah nan kan bei ţawk ţawk ani. Min kal tir rawh u" a han ti a. Chutia an din khaw muan tak rengah chuan Ngamtawna chuan," Neiha,enge ni a. Hmanhmawh teh u" a rawn ti tuarh a. Neiha chuan," U Ngam,hei Bellam zuar kan tawk ania. Engtia han tih chi nge ni ang?" a ti lang lang a.Ngamtawna chuan," Khatiang mai mai buai hman kan nilo. Kawngsirah khan lo din tir ula. Kal thuai rawh u" a rawn ti a. Tichuan Vawrate chu kawngsirah chuan dingin Tatzawl tlangvalte chuan an kal pel ta nghauh nghauh mai a. A laia kal Khuangsih lal leh Ngamtawna an lo thlen phei chuan Ngamtawna chuan ding meuh hian Vawrate chu an thlek vang vang a. An thawmhnawte a huh vek avang chuan a ringhlel ta lemlo a. Ngamtawna chuan," Tunah chuan ka kal tir ang che u. Vawikhat mah ka kawng dal zawngin awm tawh suh ang che u. Khawnge in Bellam zawrhna man te chu" a han ti thut mai a. Khuangsih lal pawh chu Vawra te kiang maiah chuan a ding ve renga. Vawra chuan," Ka pu,zahngai hram la. Tam kan la hralh hmanlo ani. Hei chiah hi kan la hlawhchhuak a"tihpah chuan a iptepuia Ţhi pakhat zan lama alo phawrh hmaih chu an pe a. Ngamtawna chuan,"Ani maw ,kal thuai tawh u" tihpah chuan Vawra Ţhi pek chu an la a. A lak zawh rual chiah chuan Vawra chuan," Le" an ti tuarh a. Chutah tlangval pahnih chuan an Bellam phurh pawh ngaihtuah tawhlo in an lalpa chu Kawng thlang lamah an bawh thla rawk a. Vawra chuan Ngamtawna chu an bawh thal ve nghal tawp mai a. Chutih rual chuan Kawngchhak lam aţangin Silai alo puak nghal dawt dawt a . Tatzawl tlangval Silai keng te chu an thal nghal phawk phawk mai a. Vawra chuan Ngamtawna chu bawhbetin a hnek siah siah mai a. Chutih lai chuan Khuangsih tlangval kawngchhaka awmte chu Chempui nen haw haw chungin an lo zuang thla sup sup a. Tatzawl khaw tlangvalte tan chuan chet ngaihna a awm talo. An in phurh bawr em avang chuan an tan ţan han khawh a har deuh bawk a. Vawra leh Ngamtawna pawh anla inbuan chial chial mai a. Vawra Bel phurh tepawh a keh darh nuaih tawh a. Ngamtawna chuan a damchhuah theih tak mialin tih thuah Vawra chu Kawng thlang lamah chuan a lum thlak pui ta a.