SANGHAR KHAWTHLIR

Ṭhen-31

     Parbung khaw kawtchhuahah chuan Ngulate chu hrilhhai ang reng tak chuan an ding ngawi țhap mai a. An hruaitu ber pasalțha Chawna,Hmar hnam inlungrualna ngai pawimawh em em tu lah rilru nain a ding ngawi reng bawk nen. Chutia din reng ringawt chu a țha ber lo tih hriain Ngula chuan ,"Pa Chawn,engtin nge kan tih dawn? Zaruala lu hi lain kan hawng mai dawn em ni?" tiin a han zawt a. Pasalțha Chawna chu an ngawi vang vang a. Ngula lam hawi pah chuan ,"Kan pahnihin khuaah khian kan han lut anga. Parbung lal Tlangzakhuma kan han be dawn ani" a rawn ti ban charh mai a. Pasalțha Chawna bawk chuan a hote hnenah chuan,"Tunah hian Ngula nen khuaah kan han lut anga. Zaruala hi Parbung khaw tlangvalho thah ani chiah em tih kan han chian dawn ani. Midang zawng a khaw miten an hmuh mai theihlohna tur hmunah inlo biru anga.Lenglen arkhuan thlenga kan lo la letlo anih chuan kan khaw lamah im hawng vang vang anga. Kan upate kiangah thil awmzia zawng zawng hi hrilhin Parbung khaw run tur hian inlo kal dawn nia" a han ti dap dap mai a. Chawnga chuan sawi chhun zawm zelin,"Kan lo let leh lo anih chuan Zaruala chu Parbung khaw ho thah ngei ani tih fiahna ani ang" a han ti leh a. A sawi zawh chuan tlangval pakhat chuan,"Zaruala lu hi kan la nghal dawn em?" alo ti a. Chawna chuan,"Tunah khan la thla ula. uluk takin tuam ang che u. Khua in thlenpui ngei tur ani" tiin alo chhang a. Tlangvalte chuan Zaruala chu la thla nghalin uluk takin an tuam ta a. Chumi hnu chuan Ngula leh pasalțha Chawna chu Parbung khaw chhung lamah an kal ta nghâl a. Midang zawng erawh khawdaia ngaw hnuaiah anlo biru thung dawn ani.

     Ngula leh pasalțha Chawna chu Parbung khaw lamah chuan an kal zel a.Pasalțha Chawna a țawng duh vakloh avâng chuan an inbe manglo thung. Khua an han luh dawn țep ah chuan an hnung lam ațang hian Silai alo puak dur mai a. Ngula leh pasalțha Chawna chu an bawkphek nghal thlawrh mai a. Silai lo rikna lam chu an hawi nghal ve ve a. An han enchian nâk chuan tlangval panga vel lai mai hian Silaiin anlo tin reng tawh mai le. Ngulate tan han beih ngaihna a awm tawh silo a. Ngawi hle hle in an ding chhuak leh ta ringawt a. Chutih rual chan an chhak lam leh thlang lam ațangte chuan Parbung tlangvalte an lo chhuak noh noh zui lehnghal. Chutah pasalțha Chawn chuan,"Ral kan nilo e. Lungthulian lama in unaute kan nih hi" a han ti a. A sawi zawh rual deuh thaw chuan an hnung lam ațang hian,,"Chawna,unau chu kan la ni meuh maw. Helaia inlo kal chhan pawh kan hriat loh inring em ni?" a rawn ti a. Chawna chu an lehhawi a,Pabung pasalțha Lunzamanga lo ding a han hmuh chuan,"Lunzamang,engvanga kan khaw tlangval kha rawn that mai nge innih" a ti nghal a.Lunzamanga chuan,"Chu zawng kan lalin a hrilh thei ang che. In hmelh hmuh thuai kha alo beisei reng tawh a" a rawn ti leh a. Tichuan Parbung tlangvalte chuan Ngulate chu an Silai ken te laksakin an khaw lal hnena thlen tur chuan an hruai ta nghal a..

      Parbung khaw lal in an han thlen chuan lal Tlangzakhuma chuan chapo tak mai hian,"Pasațha Chawnhawitlura,kan inhmuhlohna pawh a rei ta e maw. Kha Chala fapa pawh ila kaihruai reng ani maw. Enge in duh a ka khuaah te inlo kal ve tak mial ni?" alo ti a. Chawna chuan,"A chhan awmlo a kan tlangval inlo thah avanga lokal kan ni. Engvanga lo that ngawt nge innih" a'n ti a. Parbung lal chuan,"Chawna,Hmar hnam inkungrualna kha i sawi țhin tiraw. Lal pakhat hnuaia khaw khata insuihkhawm te kha. Lusei hoin kan luah ram ațanga min umchhuah pawh kha ila hre reng ang tiraw" a rawn ti a. Chawna chuan,"Hria e,engkim kha nimin maia thil thleng ang maia chiangin ka la hre vek ani. Mahse chu chuan kan tlangval in thah chhan ala tifiah lo ani" a han ti a. Lal chuan,"Chawna,ka la sawi zo hlei nem. Luseiho khan ropuitaka kan lo awp tawh ram ațangin min petchhuak a. Kan ram la let leh tura nasataka kan inbuatsaih laiin nangni chuan Lusei ho nen remna inlo siam amaw. Tunah chuan ka lalna hnuaia Hmar hnam peng awm zawng zawngte hian phatsantuah kan ngai tawh che u ani" a han ti leh a. Chawna chuan,"Tlangzakhum ,Lusei ho nen remna kan siam reng reng lo. Anmahni hnehchhuah dan kawng dapin kan phi cheng zawk asin. Engmah i hrethiamlo ani" a'n ti piap piap mai a. Parbung lal chuan thinrim hmel fe hian,"Khatin min koh vei amaw. Lal ka nih hi,ka duh chuan zaninah hin i nunna ka laksak thei che asin. Luseiho nen inremna kan siamlo e i ti amaw. Khawlian lal Vanpuilala biak țhat tumin i zin fo ani lawm ni" a'n ti ve leh piap piap mai a. Chawna chuan,"Tunah chuan kan do hneh rual anni hlei nem . An chaklohna lai ka hriat angai ani" a lo ti vat a. Tlangzakhuma chuan,"Kan do lo anih pawhin anmahni nena inremna siam pui a țulna a awmlo e. Kan chipuite khua Leisen Khuangzanghoin an run țuma phuba in va lak pawhin Luseiho vangin in that chimit veklo ani kha. Khuangzang tlangval in man takte tlanna pawh Luseiho vang bawkin in tawlh ani lawm ni. Tunah chuan an thuhnuaiah in kun reng tawh zu nia" a han ti leh a. Chawna chuan,"Tlangzakhum,Luseiho nen inremna engmah kan siamlo . Chuvangin tunah hian min kal tir la. Țha takin i inthlahteh ang u. Unau indo a țha ngailo e" a han ti leh a. Mahse Tlangzakhuma chuan,"Nilo e,tunah zawng kan unaute inni tawhlo e. Phatsantu mai inni. Ka khua hi inchhuahsan tawhlo anga. In khaw mipuite lo thlen hun hetah hian inlo nghak dawn ani" a han ti ta mai a. Chawna chuan mak tih hmel fe hian,"Engvangin nge kan khaw mipuite chu hetah kan lo nghah ngawt ang?" a'n ti a. Tlangzakhuma chuan ,"E,ka la hrilh lo che u ni maw. In khaw tlangval kan rawn thah kha chu in rilru lak penna mai ani. A thattute kha i rawn umzui dawn tih kan hre sa vek a. Chuvangin ka tlangval tam zawkte chu i awmloh hlana in khua run turin ka tir alawm. Tunah ngat phei chuan in khua chu meivapah a chang hial tawhlo ang maw. Kei pawhin do cheu hi ka duh hlei nem. Mahse kan hmelma lian berte in thurualpui takah chuan tilo theilo dinhmunah ka ding ta anih hi" a rawn ti ta a. Pasalțha Chawna a țawng leh hma chuan lal bawk chuan,"Tlangvalte u,kan Hmar pasalțha Chawnhawitlurate hi kawmchar lamah khan ripah lo va khung teh u. An khaw mipuite lo thlen hma chuan uluk tak kha lo enkawl rawh u" a ti ta mai a. Tichuan Ngulate chu Parbung khaw tlangval ho chuan Lal in kawmchara rip ah chuan phuar sa in an khung ta a.

     Anmahni phuartu tlangvalte an kal sawn hnu chuan pasalțha Chawna chuan,"Tunah chuan keimahni leh keimahni kan insat buan buan dawn chu ani mai a. Kan chhehvela hnamdanghoin min va zuam dawn tak em. Tlangzakhuma bum mai maiin kan awm chu le" a ti nang nang mai a. Ngula chuan,"Pa Chawn,lal khân ka pa kha a hre tlat mai a. A hmain an lo inhmelhriat țhin reng reng em ni" a han ti a. Chawna chuan,"Ngula,i pa hi pasalțha ani ka tih tawh a. I nu boral ațangin a Silai thlengin lal kutah a dah vek a. Nangmah enkawl kha a hna pui ber ani ta ani. Parbung lal Tlangzakhuma leh kan lal Kamlova kha unau anni a. Tunhma chuan Khawzawl khuaah Tlangzakhuma pa Khawvelthanga lalna hnuaih kan awm țhin alawm. Luseiho an lo len tak em avang khan Hmar lam panin kan tawlh ta zela. Helaiah hian awmhmun kan bengbel ta ani. Kan lal Khawvelthanga a thih hnu khan Tlangzakhuma leh kan lal Kamlova khan a hranin khua an din ta a. Khang hunlai thleng khan i pa hi pasalțha,mi ngaihsan em em ani reng țhin alawm" a han ti a. Ngula chuan,"Ka pa hian emgmah min hrilh ngai hauhlo mai a. Tunah chuan dam takin kan inhmu leh angem tih pawh hriat va ni suh" a han ti chuai raih a. Chawna chuan,"I zam mai elo. Hei kan la thi em hlei nem. Parbung tlangvalho chuan kan khua chu an va la tawh emaw ani anga. Zanin lamah chuan anlo thleng hman hauhlo a. Chuvangin zankhuain in ngaihtuahna hun kan nei alawm" alo ti sam et a. Ngula chuan,"Khawdaia kan țhiante kha an la dam em ang chu maw" a'n ti a Chawna chuan,"Tun thleng chuan eng thawm mah kan la hriat loh hi. An lo haw ve mai turah ngai ila. Man annih loh hram beisei phawt ang" a han ti a. Tichuan an pahniha an hriat tawk lek chuan an phun ser ser reng a.

    Lenghawn ar khuan hun vel thleng pawh chuan Ngulate chuan Khawdai lama an țhian birute chanchin țhalo an hriat zui lemloh avang chuan him takin an khaw lam panin an kal turah an ngai a. Zan te alo rei takah chuan Parbung khua pawh chu a reh deuh țhap tawh a. Ngulate chu rip chhunga khung annih avang chuan tumahin an rawn ngaihsak lemlo a. Thlamang lai anih avângin khua lah chu ala thim chhah em em zui lehnghal. Ngulate pahnih chu zawite hian an țawng reng a. Lal inchhung lama lal leh upate zu in thawm bak chu hriattur engmah a awmlo ani. Chutia ngawi renga an țhut lai chuan thli alo thaw vuk vuk a. Kawl rawn phe zuaih zuaihin khawpui a rawn ria dur dur mai le. Ngulate chuan ruah leh thlipui a thawk dawn anih ringin an huphurh lawk hle mai le. Khawnbawl upa leh lal ina leng ve midangho pawh chu in lamah meichher nen an liam sang sang mai a. Ngula chuan zawite hian,"Pa Chawn,ruah leh thlipui han do hân țhak zawng a chakawm viau loh mange" a han ti a. Chawna chuan,"Ka chak vakloh vangin chhuah dan kawng ka dap char char anih hi. An phuarna che kha a tal pit theih mai loh maw. Kei zawng a nghet țha ngang mai"a han ti a. Ngula chuan,"Min phuarna hi a te nain a fei ngang mai. Hnahbial hrui ani ngei ngei ang. Nichin ațang tawh khan rip bangah ka theih ang angin nawh bun tumin ka bei a. Hei ka ban te pawh a pilh neng nung tawh mai. Hma sawnna erawh a tam lo" a han ti a. Khawpui ri a nasat em avang chuan an țawng thawm chu a khuh hneh viau a. Chuvangin pasalțha Chawna chuan,"Tun hi beih tak tak hun lai tak ani. Theihtawp chhuah ang aw" a han ti a. Tichuan an theih ang ang chuan an phuarna hrui chu phelh dan an ngaihtuah ta a. Rei ngial an beih hnu pawh chuan hmasawnna ala vang ngang mai a. Mahse vanneihthlak takin Khawpui ri leh thli thaw chu ala chhunzawm reng a. Ruah erawh ala sur lo thung. Chutianga rei ve an beih hnu chuan Zanlai arkhuan hnu hret hian Ngula chuan an phuarna hrui chu a tal pit thei ta hlauh mai le. Chu velhe fimkhur takin an phuarna dangte chu an phelh zung zung a. A phelh zawh hnu chuan pasalțha Chawna an phuarna chu an phelh sak leh a. Mahse an rip siam chu an lo siam țha ngang mai a. A phuar khawmna te lah chu hmer hnang fei zet zet hi ani reuh a. Ngula leh pasalțha Chawna kutzungțang thi pheng phunga thih tha meuha an han beih hnu chuan mihring leng tawk vel chu an tichhe thei hlauh mai le. An tihchhiat veleh chuan dimte hian an chhuak a. Lal in kiangah chuan dingin thawm an han ngaithla vang vang phawt a. Thipui ri leh Khawpuiri bak hriat tur a awmloh takah chuan Chawna chuan zawite hian,"Zawlbuk lamah kan kal ang" a rawn ti a. Ngula chuan,"Zawlbukah chuan enge kan tih ang" a han ti a. Chawna chuan,"Min rawn zui mai rawh. Parbung khawthleng hi chu ka hrechiang alawm" tihpahin a kal nhal a. Ngula pawh chuan zui ve nghalin Zawlbuk kam pan chuan an kal ta a.

     Kawlphe zuai zuai karah chuan an hma lam chu fiah deuh tak hian a rawn lang leh zauh țhin a. Zawlbuk tual an zuk thlen chuan Zawlbuk kawtah chuan meiling hi thliin alo chhem darh nuaih mai a. Chawna chuan zawite hian,"Heta thingthu nung pathum vel hi kan la anga. Khaw mawng lamah kan kal dawn nia" a han ti a. Ngula chuan,"Kan Silai te kha" a rawn ti a. Chawna chuan,"Tunah chuan nunna a pawimawh zawk. Zawlbuka an Silai dah lak ngaihna pawh a awmlo. Khawpui ri anasa sia. A harh tawk an awm ange. I kal thuai teh ang" tihpahin Zawlbuk tuala thingbung la lig vam ham mai chu an la a. Ngula pawhin pakhat la vein khaw mawng lam chu an pan ta a.

     Khaw mawng lam an thlen thlak thleng chuan vanneihthlak takin tuman an hmulo hlauh mai a Ngulate chu khaw mawng lama ngaw hnuaiah chuan an lut ta a. An luh veleh chuan pasalțha Chawna chuan,"Hei thli a tleh vuk vuk mai a. Khua hi kan hâl ang" a ti ta phawng mai a. Mahse Ngula chuan,"Khaw hal em em chu chi dawn em ni" a han ti a. Chawna chuan,"Chi e,tunah hian kan khua pawh a kang ve mek maithei sin. Kan indo ta rau rau anih chuan a chhe thei ang bera inchhuah hi a țha e. Tumah an thi lemlo ang. Mahse engemaw tal chu chân ve rawhse" a han ti a. Chawna bawk chuan,"Mahse hei meichher tur kan nei miahlo. Kalo ngaihtuah tel hauhlo a" a rawn ti leh a. Ngula chuan,"Keipawh ka lo ngaihtuah miah hlei nem. Mahse in tawp ber kawta Dap an pho ka hmuh kha ka han la lawk ange" tihpahin khaw mawng bera in ding lam chu a pan ta nghal a. A han thlen chhoh chuan pawna dap lo inpho chu patthum vel hi an la a. Kal leh mai a tum lai chuan Sumhmun ațangin ui alo bauh ta vak vak mai le. Chu veleh Ngula chu hmanhmawh bak lêngi ram lamah chuan a tlan lut leh ta nghala a. Ui chuan a rawn bauh zui al al reng a. Mahse an vanneih asiamin a neitute an țhawng harh lo hlauh thung.

     Ngawa aluh thlak leh hnu chuan Ngulate chuan Dap chu an han pawt thler zung zung a. Meichher tur pali lai siamin an siam zawh chuan an thingthu nung lakte chu dah khawmin hnahro zingah an han mut ta a. Reivakloah chuan meichher chu an chhi kai thei ta a. An chhit kai hnu chuan Chawna chuan,"Hei thli a tleh nasa bawk a,a kang duh viau dawn ani. Ruah hi la rawn sur mai lose a țha nimai. In thum velah meichher kan vawmkai anga. Kan tlanchhe nghal dawn nia" a han ti a. Tichuan meichher chhi eng hluah chungin khaw lam pan chuan n tlan chho a. Hmanhmawh taka tlan chungin an meichher ken te chu inchungah an han vawmkai nawlh nawlh a. A kan kai leh kailoh pawh en mumal hmanloin khaw mawng lam pan bawk chuan an tlanchhe leh ta nghal a.

      Khaw mawng an thlen chuan an han hawi chho leh a. An tum ang ngeiin in pathum chung Di chu alo kang kai țang mek a. Thli a thaw nasa bawk nen a kang țha duh viau dawn hian alang lehnghal. Chu veleh Chawna chuan,"Tunah chuan tlan nghal char char ila. Hla deuh hlek kan thlen hunah kan thlir dawn nia" a han ti a. Tichuan Parbung khaw hoin in kang an hriat hmain Ngulate chu hmanhmawh takin an tlan ta zar zar mai a.

     Parbung khua ațanga hla vaklo,Parbung khaw lan theihna lai an thlen chuan Ngulate chuan ding meuhin Parbung khaw kang mek chu an thlir dauh dauh mai a. Khawpui ri leh Kawlphei zuai zuaih karah chuan Parbung khaw mawng lama in te chu kang sen zuaih zuaih mai a. Thli a tam em avangin in dang a man kai chho zung zung lehnghal. Parbung khaw lal in Lungthulian lam rûn tura a tlangval tam zawk alo tirh tawh avangin Parbung khaw tlangvalte chu an indaihlo nasa mai a. Khawpui ri dur dur karah chuan nunau țap thawm leh tlangval au lauh lauh thawm chu a ri tel chuah chuah mai a. Chawna chuan uluk taka Parbung khaw kâng mek thlir pah chuan,"Kan indo tak tak ta e. Tunah chuan min rawn umzui thei pawh an awmlo ang. Khua kan lo hal ta kher chu ava pawi mange aw. Ka thinrim em atin alawm mawle" a rawn ti chhuak phawng mai a. Ngula chuan,"Pa Chawn,kan khua pawh a kang ral vek tawh maithei sin. Kan in rul tawk chiah ani mai lawm" a lo ti vat a. Mahse pasalțha Chawna chuan,"Ka unaute ngei ngei in leh lo ka hal hi chu ka damchhungin ka inthiam thei dawnlo anih hi. Mahse thilțha zawk a thlen theihna tur pawh ani mahna. Ti teh kan khaw lam pani i kal thuai teh ang. Unaute țap thawm ka ngaihthlak reng zawngin ka rilru ka thlak leh hlauh dah ange" a han ti a. Tichuan an Lungthulian lam panin an kal ta nghal a.

    Thui vaklo an kal hnu chuan ruah a rawn sur țan ta mai a . Chawna chuan,"Henglai ram hi zawng ka bel ve viau mai a. Mahse meichher awmlo a ram pa lailenga vah vah zawng tha a heh lutuk dawn a.Kawng ruh pangngai lamah i kal teh ang" a rawn ti a. Tichuan Parbung leh Lungthulian in kalpawhna kawng lam chu an va thleng ta a. Ruah la chu a sur nasa deuh deuh mai a. Kawngruh an va thlen meuh chuan an meichher ken pawh a mit vek tawh a. Kawphe zuai zuai chu kalkawng chin en nang an hmang ani ber e. Hmanhmawh taka an kal mawp mawp lai chuan Ngula chuan,"Parbung khua chu an vannei mang tak e. A khaw pumin a kang hman dawnlo ni maw" a 'n ti a. Chawna chuan,"Kang hman dawnlo nih kha. Tlangzakhuma chuan min thah a châk zek zek tawh dawn mange" a lo ti vat a. Ngula chuan,"Min rawn umzui mai lo maw" a han ti a. Chawna chuan,"Umzui lo e. Tunah chuan an khua kan hal avangin an buai tawk viau ang. I kal thuai thuai teh ang" a ti a. Tlan deuh hlawk hlawk chung chuan an khaw lam chu an pan ta zel a.

    An khaw lama an chhungte ngaihtuah anat em avang chuan Ngulate chu chawl lovin zan khawvarin an kal char char a. A tuk zing fehrehsan velah chuan an khaw zau chu an lut hlawl mai a. Zauah chu reh hian a reh tlawk tlawk mai a. Ngulate rilțam leh chau tawh bawksi chuan Thlam awm hmasa apiangah chuan eitur an han dap kual nghal rawk rawk a. An vanneih asiamin Thlam pakhatah chuan Buhfai chhumloh an pahniha an ei tawk aia tam lo awmin an han chhum nghal sawk sawk a. Chawhmeh pawh siam lemlo chuan an chaw chhum an hmin veleh thur chhuakin tui nen an beng tawn tawn mai a. Puar elha an ei hnuin an khaw lam pain an kal leh ta a. An hmelma lamin an lo hmuh hmasak an hlauh avangin kawng pangngaiah pawh kal lo in ngaw hnuai ațangin an khaw lam chu an pan ta a..

    Hmanhmawh taka kal zelin tlai lam behliang mun hun velah chuan an khawdai chu an thleng ta a. Fimkhur taka khaw lam pana kalin an khawchhung chiang taka a lan theihna hmun ațang chuan khua chu an han thlir vang vang a. An rin ang ngeiin khuaa in tam tak chu alo kang chhe vek a. Khaw mipuite erawh lalmualah an lo khalhkhawm vek thung . Chawna chuan uluk taka khawchhung lam thlir pah chuan,"Kan tlangvalte pawh an man khawm vek anih saw. Engzah tak thi ang maw" a rawn ti a. Ngula chuan,"Zamuangate hmel awm ka hmu hauhlo. Khua an lutlo ani ngei ngei ang" a han ti a Chawna chuan,"An la luhloh chuan khawiah emaw an biru ngei anga. Kan pahnih chauh lah chuan kan khaw mite hi kan chhan zo hauh dawnlo a. An awmna kan zawn hmuh angai ani" a lo ti a. Chutia a țawng mek lai chuan khawchhung lamah Silai a puak ta dur mai le. Ngulate chu hlauthawng takin an hawi phei nghal a. Lungthulian khaw mipui zawng zawng chu anlo ding țhup tawh mai a. Ngula chuan,"Khua an chhuahsan tawh dawn anih saw" a han ti a. Chawna chuan,"Nau nawi nen an ni a. An kal chak thei hauh dawnlo ani. Kan țhiante kha kan hmuh ngei ngei a ngai ania. Hawh teh nang khaw mawng lam ațangin lokal la. Kei khaw lu lam ațangin. An bihrukna tur awm zawng teh ang. Tuikhur vengah kan in nghak dawn nia. Kan khaw mite hi Parbung khua an luh hma ngeia kan chhanchhuah hman an ngai ani" a han ti.a. Tichuan Ngula chu Parbung khuaa an kalpui an țhiante zawng turin khaw mawng lamah a kal a. Pasalțha Chawna erawh khaw lu lamah a kal thung...

                     Ṭhen-32

      Ngula chu hmanhmawh taka kal zelin an khaw mawng lama ngaw chhung te chu an fang thuak thuak a. Uluk fahrana tlema hmun biru deuh a fan kual hnu pawh chuan an țhiante hnuhma engmah hmuh tur a awm ta hauhlo mai. Hlauthawng ru tak chung hian khaw dai vel chu an hrut kual zel a. Beidawng ru tak chunga ngaw hnuaia a tei rak rak lai chuan a kalna hmabak lam ațang Zamuanga aw ngei mai hian,"Ngula,heta hi kan awm e" a rawn ti lang lang a. Ngula chuan rang takin aw lo chhuahna lam chu a han en nghal a. Zamuanga leh midangte chu ngui nghiai hian anlo ding țhap mai a. Ngula chuan han pan nghalin an hnenah chuan,"Keini lo hi kan khaw mi lo inrelhru hman an awm em?" tiin a'n zawt a. Zamuanga chuan,"Khua kan thlen meuh chuan meivapah alo chang zo tawh a. Parbung khaw lama kal ho tihloh chu midang reng reng kan hmulo. Parbung tlangval ho khân khua hi an hual hneh viauin ka ring ani" a rawn ti a. Ngula chuan,"Engpawh nise. Tuikhur veng lamah i chho teh ang u. Pasalțha Chawna'nminlo nghak ang" a'n ti leh . Chutah tlangval pakhat chuan,"Kan pasalțha chu ala dam maw. Parbung khu chu va hal ve nghal ka duh ani" a rawn tin pang pang a. Tichuan tuikhur veng lamah an chho ta diah diah a.

      Khua an han luh chuan meikhu alo la zam chiai chiai a., hmun țhenkhatah thisen alo luang zel zul mai a. Ruang țhenkhat lu nei tawhlo alo thal phung bawk a. An khaw mite ngei chutiang taka suasam an han ni.ta mai chu an la nain țawng pawh an țawng țha peih meuhlo ani. Kawtthler ah chuan kal zelin Tuikhur veng an thlen chuan pasalțha Chawna chu tlangval pahnih nen hian an țhian thi tate ruang kiangah anlo ding a. An han inhmuh chuan Chawna chuan,"Zaruala ruang pawh an vui hmanlo ani. Lusun khawharte hnem tura an lenkhawm laiin khaw mawng lam ațangin an bei țan ani awm e. Mi sawmpanga vel lai chu an that hman a. An lu anla la vek zui lehnghal" alo ti a. Chawna bawk chuan,"Tunah hian chawl khaw muangloin kan umzui nghal anga. Kan mite khua an thlenpui hmain keini kan thleng hmasa tur ani. Khuaah khan tlangval tlemte chauh an awm a. Chuvangin Parbung khaw lal kha lo man hmasak dan kan ngaihtuah angai ani" a han ti zawm leh a. Ngula chuan,"An lal lo man ta ni ila. Kan mite kha an that vek duh mailo maw?" a rawn ti a. Chawna chuan,"Ni e,an that duh vek ngei ang. An lal kan manlo anih phei chuan an that vek ang. An lal Tlangzakhuma chuan kan mite pakhat mah an dam a remti hauhin ka ringlo ani" a rawn ti a. Tlangval pakhat chuan,"Min rawn beitute kha va um hmasa zawk ila a țha lo maw" alo tive a. Chawna chuan,"Kan mi te an kuta an awm reng laiin kn bei thei dawnlo ani. Hmun leh hmunah an sat duh mai ang" a han ti a. Chutia an kal dan tur te an rel fel hnu chuan an khaw rawn run tuten an mite Parbung khua an luhpui hma a Parbung khaw lal lo va man hmasak ngei tumin hmanhmawh takin Parbung khaw lam pan chuan an kal leh ta a.

       Khua an chhuahsan hnu chuan Parbung khaw lam panin an kal nghal char char a. Kawng chanve pawh an la kal hma chuan khuain a thim hnan ta tlat mai. An hma lawkah Parbung khaw hoin an khaw mipui an khalh mek avangin meichher han chhit laha rem silo a. Thim zingah chuan an kal zui zel a.A khat tawkin an tawlhthlu reng mai lehnghal. Hmanhmawh baklenga kal zelin Parbung khua nena an inrina lai an thlen hma hret,mual pharh zau zetah chuan an khaw mite chu an umpha ta tlat mai. Mual pharh lai deuaha chuan mei alo de chuah chuah a. Patling phun bul bul thawm leh naupang țap ri te chu chiang takin an hre thei tawh a. Mei eng hnuaia mihring che vel pawh chiang takin an hmu thei tawh bawk a. Chutah Tlangval pakhat chuan,"Tunah hian kan bei thut mai dawn em ni. Kan hneh thei ngei ngeiin ka ring. Anni hi kan tukzal tawh chuan an khua chu awlsam tein kan la thei dawn zu nia" a rawn ti a. Mahse pasalțha Chawna chuan,"Ni rihlo e. Kan chan a chhe lutuk dah ange. Kan mite an kawl vek a. Kan va pawng beih anih ngat chuan an ban phak apiang an sat duh mai ang. Chulo rengah kan in tam hleih lulai deuh ani. Tunah chuan hei an la chawlhpui lawk anih hi. I kal thuai teh ang u. Anni hi zawng muangchangin lokal teh se" a han ti a. Tichuan Parbung khaw lam panin an kal leh ta zel a.

      Hmanhmawh taka kal ani bawk nen Zanlai arkhuan hun velah chuan Ngulate chu Parbung khaw lu lam ngaw chinah chuan an ding țhap tawh a. Khua chu a reh tawh hle mai a. Parbung khaw tlangval tam zawk an awmloh bawk avangin nula rim haw tlai deuh thawm riva pawh hriat tur a awmlo . An chet chhuah vat angaih avangin pasalțha Chawna chuan,"Lal in lam kan bei hmasa anga. Tumahin a țul tawpah lo chuan Silai in hmetpuak tur anilo ang. Fei leh Chempui hmangin kan bawh dawn nia. An lal kan man thei anih phawt chuan midang chu an che ngam lo ang" a han ti a. Chawna bawk chuan,"Zan hmasa lamah an kut ațangin kan tlanchhuak mai bakah an khua hi kan hal zui a. Thinthi chuan an mu bik hauhlo ang. Ral veng pawh an lo indah mai thei . Chuvangin thawm dim thei ang berin khua hi kan lut dawn nia" a'n ti a. A sawi zawh chuan Parbung khua chu n lut ta a.

      Parbung khaw lal in chu khaw lu lam ațanga chhiara in panga na velah hian a ding ruau mai a. Ngula leh pasalțha Chawna chuan hma hruaiin inring tak mai hian lal in lam chu an pan zel a. Ngula chuan Fei lekchhuakin Chawna erawhin Chempui a hum ran thung a. An hnung lamah chuan Silai keng Sawm velin an rawn zui a. Chumite hnung leh hretah chuan Zamuanga leh midang sawmhnih zet mai chu Chempui leh Fei kengin anlo kal thung. Lal in an zuk hnaih tan viau maw tihah chuan Ngulate chu an ding chat a. Lal in tualah chuan tlangval pali lai mai hi mei lum ai pahin anlo ding far a. Silai an la keng vek zui lehnghal. Pasalțha Chawna chuan Parbung khuate chu an inralring hle ani tih a hre thei mai a. Ruahmanna dang han siam dawn lahin hun an nei tlem bawk si. A tawpah chuan Chawna chuan,"Ngula,Zawlbuk lamah zuk kal hmasa ta la. He lama mite tih phawklek nan hrim hrim hian Zawlbuk tuala mei kha Zawlbuk chungah i vawmkai mai dawn nia. A kang kai ta maw tihah khaw mawng lamah i tlan thla anga. Thawm inei zui dawn nia. An rawn umzui ngei ang che nga. Chumi hlan chuan an lal hi kan lo hup barh dawn ani" a han ti a. Ngula pawh chuan hnial lemlo lal in tuala mei engin a chhun phakloh lam ațang chuan Zawlbuk lam chu a pan thla ta a.

      Parbung khaw Zawlbuk a zuk thlen thlak chuan a beiseiloh tak maiin Zawlbuk tuala mei chu alo la nung țha hle mai a. Chu achhapah tlangval pakhat hi Silai nen mei kiang maiah chuan alo la țhu zui a. Mahse vanneihthlak tak maiin ralvenga lo awm pa chu alo mutthlu reng mai a. Țhu chung chuan alo chhing duar duar mai le. Ngula chuan hmanhmawh angai tih hriain ralveng pa hnung lam ațang chuan an veh dek dek a .. A hnaih viau ta mawh tihah chuan Ngula chuan a kut pahnih suihin chupa chu an chhiptlak ta ngheng mai le. A kutthlak ana bawk aniang,chupa chu thaw awk in Zawlbuk tualah chuan a let ta bal mai a. Chu veleh Ngula chuan Silai leh Fungk chu chhuh vatin Zawlbuk tuala thingthu nung pathum lai mai chu Zawlbuk chungah cuuan an vawm kai zung zung a. Hmanhmawh takin Zawlbuk thlang lam thim chinah chuan a biru ta a. Rei vakloah chuan Zawlbuk chung di chu a rawn kang sen ham ham a. Mahse zan hmasa lama ruah a sur nghek avangin a chhungril lam alo hnawng deuh nge ni a kangkai chaklo ta riau mai. Ngula rilru hmanhmawh lutuk chuan Zawlbuk tuala thinthu nung pakhat chu la lehin Zawlbuk Dithlifarfemah chuan an hliau ta a. A kang kai chiah tihah chuan thlang lamah bawk a tlan thla leh nghal a. Rei vakloah chuan Parbung khaw zawlbuk chung chu a alh sen ta zuaih zuaih mai le. Chu veleh Zawlbuk chhung lamah chuan thawm lo awm nghalin Parbung tlangval ho chu Silai leh Fei kengin Bawhbel an rawn bawh liam ta sang sang mai a. Zawlbuk kawta an khaw tlangval lo let reng an han hmuh chuan an hawi kual dak dak hlawm a . Zawlbuk lah chu a kang hluah hluah reng a. Chutia an buai lai tak chuan Ngula chuan a him chin ațangin Zawlbuk lam hawi chuan Silai an hmetpuak ta thawr mai le. Chu veleh Parbung tlangval ho chuan Ngula awmna lam hawi chuan Silai an rawn hmetpuak ta zat zat mai a. Ngula lah chu phen țha tawk lo nei sa anih avangin a him chinaha a Silai zen chu alo sawh mawlh mawlh a. Chutihlai chuan Parbung tlangvalte chuan meichher nen an rawn um thla zui nghal mai a. Ngula lah chuan Silai mu nei tawh heklo le hmanhmawh bakleng chuan khaw mawng lam panin a tlan thla a. A tlan pah chuan,"Parbung khaw Zawlbuk ka hal e" a ti thla zel a. Parbung khaw tlangval tam zawk lah chuan engmah hre hleilo hian an rawn um zui zel a. A khat tawkin Silaiin an kap reng a. Mahse an kah tur ber an hmuhloh avang chuan Ngula chu ala him zel thung. Khaw mawng lam an thlen thlak meuh chuan a khaw mipui thlabar pawh an in lum luah ngam lovin anlo tlanchhuak sung sung tawh a. Ngula chu ngaw hnuaiah lutin Parbung khaw tlangvalte ti phur tawk lek chuan Silai hlo hlang ringawt chu an kap puak leh dur mai a. Parbung khaw tlangvalte lahin an Zawlbuk rawn haltu chu man ngei tumin an rawn um ve bawk a. Mahse thim thama umzui zel chu thil tihchi anilo tih hriain Parbung khaw tlangvalte chuan Ngula chu ngawah an rawn luhchilh duh ta hauhlo mai a. Ngula lah chuan anmahni tih thirim nan hrim hrim hian,"Zan hmasa lamah pawh in khua kan hal ania. Min thah hma chuan ka hal zel dawn nia" tiin an au khum vel a. Parbung tlangvalte lah chu khaw mawng lamah chuan meichher nen an vei thuak thuak ringawt a. Chutia engmah tihvak ngaihna hrelo a an din lai chua tlangval pakhat hian,"Ekhai,ralin kan lalin an luah hman daih mai. Kan tlai lutuk ani e" a rawn ti lang lang a. Ngula chuan an thusawi chu alo ngaithla reng a. Chutah ring leng lawng hian,"In inpek loh chuan in khua hi kan hal vek ang. In lal pawh kan man tawh sia. Inpe mai rawh u" a han ti leh a. Parbung khaw pasalțha Lunzamanga thinrim lutuk chuan,"A tu phiangsen nge maw inih le. A him chin ațanga rawn rak rawn rak lo khan mipa inih chuan rawn in lan ta che" a rawn ti lang lang mai a. Ngula chuan a rul tawk lek hian,"Mipa inih chuan a him chin ațanga rawn rak rawn rak lo khan ngaw hnuaiah hian rawn lut ta che. Min rawn luhchhuah dawnlo em ni" a han ti let ve leh a. Lunzamanga chuan,"Tunge inih ka la hre chhuak khawp ang. Tunah chuan chan țha ila chang rih anih kha" a rawn ti leh a. Ngula chuan,"Zan hmasa lama in khaw haltute kha mawle. A phuar pawh min phuar ngheh zawhloh kha. Tunah chuan in lal han chhanchhuak tawh rawh u. Ka kalsan dawn che u" a'n ti let a. Parbung khaw tlangvalho tan han umzui ngaihna awm heklo le. Beiseina tlemte nen an lal in lam chu an pan chho ta a. Ngula erawh khuaa lut mai lovin khaw hmar lama ngawhnuai ațang chuan khaw lu lam panin a kal ve ta thung a.

      Ngula chu ngaw hnuaiah lut chho zelin lal in zawn vel ni a arin ațang chuan khua chu a lut ta a. Khaw mipuite chu anlo chiai nasa hle mai a. Tihtur bik pawh hrelo hian anlo vei kual suau suau a. A tam ber erawhin lal in lam an pan thung. Lal in ava thlen chuan lal in tualah mei alo in chhep eng hluah mai a. Lal in sir leh avelahte chuan Lungthulian tlangvalte anlo ding a. Lal in tual zawlah chuan Parbung khaw tlangvalte an lo ding ve thung a. A bak zawngah chuan mipui an lo awm ve țhap a. Lal in leikapuiah chuan pasalțha Chawna hi alo ding vang a. Mei chhemna kiangah chuan tlangval pali hi an mu zar a,thisen a baw nuaih bawk a. Parbung khaw pasalțha Lunzamanga chuan,"Chawnhawitlur,kan lal kha chhuah ula,tichuan damin kan chhuah tir ang che u" a han ti a. Chawna chuan,"Lunzamang ,chuti maiin kan khua rawn run tura ruahmanna siamtu chu ka kaltir phal mai i ring em ni. In ralthuamte kha dahthla ula. In ralthuamte kha dahthla ula. Tichuan in lal hi kan zuah ang" a lo tive bawk a. Midang chu an ngawi țhap mai a. Ngula pawh Parbung khaw mipui zingah chuan ala ding ve ran mai a. Lunzamanga bawk chuan,"Tunah hian in khaw mipuite chu kan tlangvalten kan khaw lam panin an rawn khalh mek tih i hria ang maw. An nunna chu i kutah a awm e. Tuna in insaseng nghal loh chuan kan that vek ang" a han ti leh a. Chawna chuan,"Chuti ani maw. Mahse in thih hmasak phawt angai dawn anih chu. Tlangvalte u,Parbung pasalțha ho hi han kap rawh u le" a ti ta mai a. Chu veleh Parbung khaw tlangvalte dinna hnung lam ațang chuan Silai alo puak dawt dawt a. Parbung khaw tlangval pathum lai mai chu an tlu nghal a.Mahse thihna khaw hliam erawh anilo. Parbung lam lahin han beihzui an ngam silo a. An en tawp mai a. Chu veleh Chawna bawk chuan,"Tunah chuan in dinhmun in hrechiang ang chu maw. In hmanruate kha dahthla rawh u. Anih loh chuan kan kaphlum vek ang che u. Silai a ri leh anih chuan in thihna ngei tur ani tawh ang" a han ti leh a. Parbung lam chuan an hnung lamah Lungthulian tlangval engzat chiah nge awm tih an hriatloh avang leh an lal an man bawk avangin an ralthuamte chu an thehthla ta phak phak mai a. Chu veleh Ngula chu Parbung tlangvalho awmna lamah chuan va kalin an Silai leh Fei te chu ava khawm zung zung mai a. Lunzamangan alo hmuh chuan,"Nang hi ini maw kan haw hal tu" alo ti hluk a. Ngula chuan,"I tih tlat chuan ni mai ang chu. Kan khua in hal hmasa miau alawm" a lo ti sam et a. An ralthuamte pawm bawr luk chung chuan lal in lamah a phei zui a. Chutah pasalțha Chawna chuan,"Tunah chuan unau leh unau kara thisen chhuah a țul tawhlo e. Zing lamah chuan in tlangvalte pawh kan mite hruaiin anlo thleng ve anga. Tichuan țha takin kan inbe dawn nia. Tlangval leh paho tihloh kha chu in lamah kal leh vek rawh u" a han ti a. Mipuite chu anmahni in lamah țheuh chuan an hawng ta a.Tlangval leh pa ho erawh lal in tualah Chawna chuan a țhuttir thunga. An khaw mite an lo thlen hun anlo nghak dawn ani.

     Parbung lal inchhung lamah chuan boruak a rit hle mai a. Parbung upa te an ngawih țhap laiin an khaw lal Tlangzakhuma erawhin pasalțha Chawna chu anchhe tinreng a lawh bawrh bawrh a. A upate leh a nupui fanauten insum tura an tih pawh chuan engahmah ngailoin an ang reng tho a. Pasalțha Chawna erawhin chhan tinah pawh a tin lemlo . Mahse chuti a an reng takah chuan Chawna chuan,"Tlangzakhum,lo ngaithla rawh. Kan in unauna tichhe tu hi nangmah ini asin. Tunah pawh hian a tirin engkim țhataka ti ni la chuan hetiang thil hi a thleng lo tur. I laka kan hel i rin vangin min rawn bei ngawt a. I rinthu mai mai kha atak ni turah i ruat ta ani a. I ngaihtuah tlem vang mai mai ani. Thil hrethiam rual ini tawh" a han ti a. Parbung lal Tlangzakhuma thinrim chuan,"A enga ngaihtuah tlemte min tih. Nang ang pasalțha satliah ai ngawt chuan ka ngaihtuah tam zawk ang a. Lo ngai tak rawh. Varțian velah chuan ka tlangvalte chu in khaw mite hruaiin khua hi an lo lut ngei anga. Man ka ni tih an hriat chuan in khaw mite chu an that mai dawn ani. Kan pasalțha Zochungan a rawn ho dawn ani" a la tih leh fan a. Chutah Chawna chuan,"Zochunga maw,tha pawh a nei tawh meuh emawni le. A hmel hmuh leh vat tepawh a chakawm chu. Tunah chuan engmah sawitur a awm rihlo e. Ti khan in duh le mu ula. In duh leh țhu tlaivar țhak ula nimai. Ka tlangvalte nen sawiho tur kan nei e" tiin a chhuahsan ta daih a. Tlangzakhuma chuan a an khum bawrh bawrh a.

     Pasalțha Chawna pawn lama ava chhuah chuan Ngula leh Zamuanga chuan Parbung khaw ho ralthuamte chu lal in leikapuiah anlo rem kual mek a . Chawna chuan,"Ngula, an kap fuhlo che chu i vannei hle mai " a han ti a. Ngula chuan,"Vannei tak ka ni. Ka puan ven hmawrah te khan Silai mu in a rawn fuh thawi thuak thuak niin ka hria. A tihfo chiloh ang" a lo ti a. Chawna chuan,"Kha chu abul țanna lek ala nih kha. Hei tunah chuan Silai kan kawl țeuh tawh mai a. Parbung khaw tlangvalten an khua an rawn luh hun chuan tumahin anlo hmuaklo anga. An lal kanlo man bawk nen an thinrim hle dawn a. Kan mite chu an sat duh mai dawn ani. Chuvangin nang leh tlangval dang sawmhnih hian Silai kengin lal in kianga in ding dangah te hian țanhmun inlo khawh anga. In awmna in neitute chu in chhuahtur tur anilo ang. Parbung khaw lamin kan mite an that dawn anga alan chuan in rawn kap mai dawn nia. Unau karah thisen chhuah duhlo mah ila,tunah zawng kan dinhmunin a zir ta ngang lo ani. Tunah midangte hrilh nghal la. In țanhmun tur va siam nghal rawh u. Engtiklai pawha lo thleng thei reng anni tawh ania" tiin a han hrilh a. Ngulate pawh chuan pasalțha Chawna hrilh ang chuan an țhian dangte chu an han hrilh chhawng sap sap a. Chutah Silai zen leh a mu awm ang ang an han la khawm nghal a. Chumi hnu chuan pasalțha Chawna chuan,"In pakhatah pahnih zel in awm dawn nia. Kawtchhuah lam ațanga lal in an rawn luh phei na lamah khan in zar phar ang che u. Tunah kal nghal rawh u" a han ti a. Tichuan Ngulate chu an kal va ta nghal a.

      Ngulate chu pahnih zela in țhenin lal in hnaih lam deuha in dingho ah chuan an lut zel a. Ngula leh Zamuanga pawh lal in thlang lama in ding pakhat,khawnbawk upa in ni awmtak ,lian țha ve deuh maiah hian an zuk lut dawn ta a. Kawmchhak lam ațang chuan thawm an han ngaithla a.In neitute chu anla mu hauhlo ani tih hriat tak mai hian an lo la țawng sar sar a. Ngulaten luhka an han rahrik rual chiah chuan inchhung lama thawm pawh a reh zui nghal mai a. Ngula chuan sumhmun ațang chuan,"Ka pi,kawngka min va hawn rawh u. Lungthulian tlangvalte kan ni e" a han ti a. Rei vaklo ah chua nu pakhat hian Kawngkapui chu a rawn nawrh tawlh a. Inchhung an va luh chuan tapchhakah mei alo la alh hlat hlata . Kawngka rawn hawngtu nu tar ve lampang deuh tawh bakah nula pahnih leh nau pawmlai nu pakhat hi anlo țhu ran mai a. An hmelah ațang chuan an hlauthawng hle tih a hriat a. Ngula te chu anlo en kar mai a. Ngula chuan tapchhaka mei chhawm țhat mawlh mawlh pah chuan,"Hlauh tur kan awmlo e. Mahse kan thu in awihloh chuan kan that duh mai ang che u" a han ti a. In neitute chu an ngawi kar mai a. Ngula bawk chuan,"Ka pi,hei kan rilte a țam tawh angreng sia. Chawțhingte innei mial em?" tiin a han zawt a. Pitar chuan,"Aw,a tam alawm. I duh tawk khan ei rawh u" alo ti mai a. Ngula chuan Chawbel leh chawhmeh bel chu an hawng rawk rawk a. Zamuanga hnenah chuan,"Kan thi dawn anih pawhin rilțam taka thih zawng ka duhlo e. Hawh teh i han bar mial mial mai teh ang" a'n ti a. Zamuanga chuan thinga siam Thlengpui chu rawn la chhuak pahin,"Chawbel zen tawp zawng amawi ngailo e. Thlengah hian in ei teh ang. Kan vankai chawte pawh ani mahna le" a rawn tive a. Tichuan an pahnih chuan chaw an ei ta mial mial mai a. Ina lo awmte chuan mit tla leklo hian anlo en a. An eikham chuan Ngula chuan chawthleng chu an sil mawlh mawlh a. Zamuanga chuan hmun alo phiat ve bawk a. An zawh fel chuan Ngula chuan,"Tunah chuan ka puar ta nalh mai. Engpawh thleng dawn se,ka inpeih ta at mai e" ahan ti a. Zamuanga chuan,"Rinloh tak maia buh changrum leh sa han nuai chu a dan a dang zar mai" alo tive bawk a. An chetvel dan zawng zawng chu ina lo awm hmeichho ho chuan mak tih hmel tak hian anlo en a. Ngula chuan hmeichhiate chuan an hlau tih hriain tih tlangnel tum hian,"Ka pi,hei keini chu bel vala val ve satliah kan nia. Hlauh tur vak kan awmlo e. Kei ni Ngula ka ni a,ka țhianpa hi Zamuanga anih hi. Kan lo thi ta hlauh anih pawhin kan hming tal chu in lo hre ve ani ang chu. In chawbel lah kan rawn rawk fai vek a" a han ti a. In neitunu chuan,"In khamloh chuan a dang kan chhum belh thei alawm" alo ti vat a. Mahse Ngula chuan,"Zanin atan chuan a tawk viau tawh e. Kan lawm hle mai. Mahse in sarep țhenkhat hi chu kan thuk phum nual maithei nia" alo ti zat a. Zamuanga chu alo nui ham ham mai a. Midang erawh chu an țhu ngawi țhap thung a. An țawng țhat duhloh em avang chuan Ngula leh Zamuanga chu an titi dun a. In a lo awmte lah chechang ngamloin an țhu ngawi reng a. A tawpah chuan Ngula chuan,"Ka pi,mut a hun daih tawh hi. Va mu hahdam rawh u. Tihian keini chu mei hi kan nun tlaivar țhak dawn nia. In men ve reng angailo ang" a han ti a. An hlauh luatah ina lo awmte chu khumpui lamah an kai dial mai a. Ngula leh Zamuanga chu tapchhakah chuan in kawmin sarep an pet zauh zauh reng a. In a lo awmho lah muhil thei bik heklo le,Ngula leh Zamuanga che vel chu anlo thlir dak dak reng bawk a.

     Ngula leh Zamuanga chu zing varțian thlengin an titi chhunzawm a. Chutia eng engemaw sawia an phul hlut lai chuan kawtchhuah lamah Silai a lo puak dur dur mai a. Bawh hla chham vang vang thawmin a rawn zui bawk a. Chu veleh Ngula chuan,"Chhei le,anlo thleng ta ngei mai. Hei khawvar pawh ahnai ta a. Khua anlo lut zui nghal dawn nia" a han ti a. Zamuanga chuan,"An unaute an thata a,Bawh hlate chu an la chham zui lehnghla. Lo kah thluk zawt zawt mai tur ani" a loi vat a. Ngula bawk chuan,"Silai hlo kha a tam thoin ka hria. Hawh teh Silai ilo rik ve teh ang. Chuti lo zawng khua an rawn lut duhlo dah ange" tihpahin a Silai mu thun sa chu an la chhuak nawk nawk a. Pawn lamah va chhuakin Silai chu a va kap ri dur mai a. Zamuanga pawhin rawn zawm ve nghalin a Silai chu a rawn rik ve ta a. Kawtchhuah lama awmten khawchhung lam ațanga Silai ri an han hriat chuan an phur zual sauh ni ngei tur ani. An thawm a ring țha ham ham kher mai. Lungthulian tlangval dangte pawhin thil awmzia lo man thiam vatin Ngulate tih ang chuan an rawn tive ta a. Chutia Rei vaklo Silai a rik hnu chuan khua a rawn eng țan tawh a. Kawtchhuah lam ațang chuan a hma aia nasa hian Silai rawn puak lehin khaw lam anlo hnaih zel mai a. Ngulate erawhin Silai kap puak tawhloin inchhung lamah ngawi rengin anlo țhu daih tawh mai a. Parbung khaw tlangval te hlawhtling inti taka khua rawn lutte chuan hmuaktu leh lo chiau au tu tumah an hauhlo mai le. Chu achhapah an khua a in țhenkhat leh an Zawlbuk ngei mai chu alo kang vek zui lehnghal. Parbung tlangvalte chu an hlauthawng ta a. Silai lo kap ri vetute kha tute nge annih tak ang tih an ngaihtuah a. Khua lah chu a reh țhiap mai si a. Chutah pasalțha Zochunga leh midang panga vel chu thil awmzia hriat tumin an lal in lam chu an pan ding ta nghal a.

     Parbung pasalțha Zochungaten an lal in an han thlen chuan an khaw tlangvalte chu lal in tualah anlo țhu țhap mai a. An sir velah chuan Lungthulian tlangval ten Silai nen anlo veng bawk a. Pasalțha Chawna chu lal in leikapuiah hian alo ding vang mai bawk a. Chawnan Zochunga hmel a han hmuh chuan,"Zochung kha i dam maw. Mahni unaute thatin Bawhhlate ila chham khum ngam ania. I a zo ta em ni?" alo ti a. Zochunga chuan mak tih hmel tak mai hian,"Chawna,eng thil nge thleng a. Engvanga kan tlangvalte hi hetia lo man nge innih. Khawnge kan khaw mipuite" a'n ti a. Chawna chuan,"Engthil nge ka tih min zawt amaw. E,kan khua i va run ang bawk khan in khua ka run ve anih hi. In lal pawh nung damin kan la kawl a. Mipui pawh an him e. Țha taka thu kan sawiho theih dawn chuan thisen a luan angai tawhlo ania" a rawn ti leh a. Zochunga chuan,"Kan lal ka hmu duh ani" alo ti leh a. Chutah tlangval pahnih hian Lungthulian lal Tlangzakhuma chu an rawn kai chhuak ta a. Tlangzakhuman an khaw pasalțha Zochunga a han hmuh chuan,"Zochung,Lungthulian ho kha that vek ang che. Tunah hian that vek turin thu ka pe che ani"a rawn ti nghal bawrh bawrh a. Pasalțha Chawna chuan,"Kha kha in lal duh dan ani. Mahse tunah hian țha takin thu i sawiho teh ang u. Unau karah thisen luang tawhlo lul rawhse" a rawn ti leh a. Mahse Tlangzakhuma chuan,"Kan unaute anni tawhlo. Phatsantu annih hi" a rawn ti lang lang mai a. Chutah Zochunga chuan,"Awle,in khaw mite chu khua ka rawn luhpui phawt anga. Kan lal kha kut lo thlak hauh suh ang che" a lo ti a. Parbung lal Tlangzakhuma thinrim chuan,"Zochung,ka thu i hnial amaw. I la inchhir viau ang" a rawn ti leh pang pang a. Mahse Zochunga chuan,"Lal pa,kan mite lu pakhat pawh hloh hi ka duh tawhlo ani" tihpahin a inher vut a. Khawdai lamah chuan a let thla leh ta a.

     Rei vakloah chuan Parbung khaw tlangvalte chuan Lungthulian khaw mite chu a pui a nawiin an rawn khal chho duah duah mai . Lal in tualah chuan an khat mup bawk a. An lo thlen kim hnu chuan Zochunga chuan,"Tunah chuan kan mite an him leh himlohnka hre duh ani" a rawn ti a. Chawna chuan a tlangvalte tirin Lungthulian khaw mite chu an kohkhawm tir ve ta a. Lal in mual lehlamah chuan Lungthulian khaw mite an ding khup a. Lehlamah chuan Parbung mipuite an ding ve bawk a. Chawna bawk chuan,"Tunah chuan inrem takin kan awm thei tawh ang chu maw" a han ti a. Zochunga chuan,"Khawnge kan upate" ala rawn ti țalh a. Lingthulian tlangvalte chuan Parbung khaw upate pawh chu an rawn hruai chhuak ta a. Chutia an buai mawp mawp lai chuan Tlangzakhuma chuan ring lenglawng hian,"Parbung pasalțha Zochunga a tlawm e. Khawnge Hauzika kha,Lungthulian mipuite kha that rawh u. Kan thuhnuaia awm sa annih kha" a rawn ti zauh mai a. Chu veleh Parbung lal duhsak bik deuh pasalțha Hauzika leh a hote chuan Lungthulian tlangval țhenkhat chu sah an tumnta mai a. Mahse an sah hma chuan lal in leh a chheh vela in ding ațangte chuan Silai alo puak nghal zawt zawt a. Hauzika leh tlangval țhenkhat chu an tlu nghal zawih zawih mai . Mipui chu an zi nuaih nuaih a. An inphek sual chu ani ta ber awm e. Parbung tlangval pakhat chuan lal in leikapuia ding pasalțha Chawna chu sai thluk tawp tumin a silai in a han tin vang vang a. Mahse a kap dawn chiah tiahah chuan Lungthulian tlangval pakhat hian a rawn su bur mai a. Silai erawh a puak hman ta tlat. A tum ber pasalțha Chawna fuhloin a kianga ding parbung lal Tlangzakhuma awmah tak chuan a han fuh ta ale. Tlangzakhuma chu a thal nghal tawp a. Chawna chuan a dawm nghal a. Silai lah apuah chhunzawm reng a. Parbung tlangvalte chu an thal phung tawh a.Mipuite chu an tlan darh chum chum a. Lal in tualah chuan Lungthulian tlangval leh Parbung tlangvalte chu an in bawh thal heng huang mai a. Ngulate pawhin an Silai mu kap ral tawhin Fei nen pawn lamah tlanchhuakin an hma zawna Parbung tlangval ding apiang chu an vaihma phei zel a. Chutia an inbeih mawlh mawlh lai chuan Parbung khaw upate leh Lungthulian khaw upate chu an tlangvalte zingah rawn tlan lutin,"A tawk tawh e. Zahngai rawh u. Zahngai rawh u. Thisen a luang hnem tawk tawh e" tiin ban a rawn phar ta hlawl mai le. Tlangval thirim tlawmngai ve laklawh te lah chu chawlh mai tum pawh hian an lang lo a. Mahsela tawpah chuan pasalțha Chawna leh Zochunga chuan an tlangvalte chu an bengdai thei ta hram ani.

     Inbeihna a zawh meuh chuan Parbung lal in leh a chheh vel chu thisenin a bual zui tawh a. Parbung upate leh Lungthulian upate pawi ti lutuk chu an indawm kung ngawih ngawih mai a,"Eng thil nge kan tih tak ni. Unau karah Chemsen kan lentir tak mai le" tiin mittui nen lal in tualah chuan an ding far hlawm a. Pasalțhate meuh pawh insum zo lovin an mittui a sur ani ber e. Parbung khuaah ngei mai chuan unau ,hnam khat ni bawkte chu an in mausama chiam ani. Mitthi ruang let pheng phung karah chuan hliam tuar lo țe rawng rawng tawk lah bo lo. Tlangvalte pawh chuan an țhian hliamte chu bawisawmin ngawi rengin ruangte chu an senghawi a. Tumah rengin chu chu ti rawh,kha kha tirawh tiin thupek an siamlo. Hmar hnam awp khawmtu Parbung lal Tlangzakhuma pawh ama leikapui ngeiah chuan a thi khawng reng tawh mai a. A upate leh Lungthulian upate chuan an bial laih mai a. Chu ni kher zawng Hmar hnam tan chuan ni duhawmlo tak ani ngei ang. Silai ri leh thir inkhak rite chu nunau țap thawmin a rawn zui a. Tual laia mahni pasal leh fate au a țap rawng rawng thawm chuan khua chu a fanchhuak ta ani ber e. Ngula leh Zamuanga pawh an chhungte zawngin an vak kual ve nghal a. Zamuanga chuan anu leh anaute chu him dam takin aava hmu hlauh a. Ngula erawhin apa chu rei ngial a zawn hnu pawhin a hmu ta hauhlo mai a. Hrilhhai tak chungin an khaw mite chu apa an lo hmuh leh hmuhloh a zawt kual zel a. Mahse tumahin thil thlen dan mumalin an lo hrelo a. Ngula pa pu Challiana awmna chin hria reng pawh an awmlo.

                       Ṭhen-33

      Lungthulian leh Parbung khaw tlangvalten an țhian thi tate ruang la khawm a hliamte an bawisawm mawlh lai chuan Ngula chuan a pa awmna tur awm chu an khaw ho an zawt kual zel a. Mahse tumah rengin pu Challiana awmna chin reng anlo hrelo tlat mai. Ngula beidawng hrilhhai bawk si chuan a țhian Zamuangate awmna lamah chuan va kal in,"Țhiana ka pa ka hmuzo ve hlek lo mai a.. Kan khaw ho lah hian a awmna chin awm an sawi thei reng renglo mai lehnghal a" ava ti . Zamuangan a chhan hma chuan a nau Laibati chuan,"Ka pu chu khua ațanga min khalh chhuah lai pawh khan ka hmu tawh miahlo mai. Kawng lakah khan hliam chau deuhte pawh kan rawn kalsan bawk a" alo tu reuh a. Chu veleh Ngula chuan,"Ka pa chu i hmu miahlo amaw. Alo tlanchhe hman ani ang a aw. Kan khaw lamah chuan ka kir leh vat angai ani" a'n ti a. Zamuanga chuan,"Ni e,i rualin kalo kal ve ang. Hei ka chhungte chu hliam pawh an tawrh loh hi" a lo ti a. Ngula chuan,"Lokal buai duh suh. He lamah buaipui tur atam em hi . Ka Silai ka han la anga. Ka kal nghal mai ang" tih pahin a inher vut a. Lal in lamah chuan a kal ta nghal a. Lal in tualah chuan pasalțha Chawna leh an khaw upate bakah Parbung khaw upate pawh anlo ding khawm far mai a. Ngula chuan pasalțha Chawna hnenah chuan,"Pa Chawn,ka pa ka hmu zo hauhlo mai. Kawng lakah te hian an rawn hnutchhiah palh te alo nih takin ka va zawng ange. Ka Silai khaw khawnge a awm ang le" a han ti nghal a. Chawna chuan,"A va mak ve mawle aw. Hei vawiin lamah chuan kan khaw lam kan pan hman hmel tawhloh a. Kawnglaka tangkhangte ngaihven tur erawh kan tir ang.I Silai chu lal in rapchungsangah khan a awm ang. I pa chu ala dam em em ang. Lungngai suh" alo ti var a. Ngula chuan chhan pawh chhang tawh lemlo hian lal inah chuan a han kai chho nghal a. Lal inchhungah chuan lal nu leh a fate bakah mi țhenkhat hian Parbung khaw lal Tlangzakhuma ruang chu anlo bial laih mai a. Ngula chu engmah sawilo hian ava lut nghal a. Rapchungsang lam chu ban nghal rawk rawkin a Silai,Saii ten an pek ngei mai chu lain a chhuak leh ta daih a. Lal in ațanga a chhuah hnu chuan an khaw tlangvalte hnenah Silai hlo leh a mu țhenkhat lain a pa zawng turin an khaw lam a pan zui ta a.

      Ngulan Parbung khua a chhuahsan chuan chhun chawfak hun vel hi ani tawh a.A pa chu kawng laka an tlansan ho zingah a telve ngei anih ringin uluk takin an khaw ho lokalna lam chu a hrut phei a. Chutia apa ringawt angaihtuah lai chuan luite kam hmun zawl diai maiah hian a chuang chhuak hlawl mai le. Chulai hmunah chuan an khawho chu Parbung lam ten an rawn chawlh pui ngei ani tih hriat tak hian a bel hun mai a. An meichhem tepawh la mit zo loin a la khu vat vat reng ani. Ngula chuan hmanhmawh takin chulai vel chu an fang kual nghâl a. Mahse apa hmel awm reng reng a hmu hauhlo mai. Beidawng rilru tak chung chuan chulai hmun chu kalsan mai han tum a. An khaw lam pana a kal leh dawn chiah tihah chuan zawl thlang lampang ațanga na tuar rumri hi a hre ta thut mai. Ngula chu hawi let nghâlin rumri lo chhuahna lam chu a zuk pan nghal a. Zawl thlang lam deuh a zuk thlenthlak a a thil hmuh chuan a thin a țhawng ngei mai. An khaw tlangval hliam tuar engemawzah chu anlo let khawm deuh rum mai a. A țhente phei chu a chet pawh an che peih tawhlo hial ani. Ngula hmel anlo hmuh chuan tlema la hrah deuhte chuan anlo be mawlh mawlh a. Ngula chuan ngawi reng hian an hliamte chu tihfai sakin puan awm ang ang chuan a tuam mawlh mawlh a. Chumi hnu chuan chhak hlama hmun rem laiah chuan an vai mai chuan a dah chho leh a. Hliam țhenkhat chu an damchhuak zo dawnlo ani tih a chiang reng mai lehnghal. Mahse Ngula chuan a theih ang tawka buaipui chu a tihtur ani tih hriain nisa laka an him nan Changel hnah a chunga hmangin buk an zar sak phawt a. An tuiin turte thal sakin mei te an nun leh te te a . A zawh fel hnu chuan an hnenah,"Awle,tunah chuan ka kalsan rih phawt ang che u. Parbung khua ațangin kan tlangvalte pawh anlo thleng thuai ang. Tunah chuan indona a tawp tawh e" a han ti a. Ngula vek chuan,"Ka pa inlo hmu mial lo maw?" tiin a zawt zui a. Mahse tlangvalte chuan Ngula pa hmel reng reng anlo hmu hauhlo mai a. A tawpah chuang Ngula chuan a pa a hmuh zawhloh thu leh a zawng tura a kal dawn thu te hrilhin an khaw lam pan tur chuan a kalsan ta a.

     Kalkawngah chuan Ngula chu nasatakin a in ngaihtuah a. A pa chu a chân mai ang tih a hlau em em mai a. A pa tello a a awmtheih a ring lo hial ani. Nimahsela mipa anih angin intipachang hram hramin hmanhmawh takin an khaw lam chu a pan zêl a. Hmanhmawh taka kal anih avang chuan zariah ei hun velah hian an khua chu a lut ta hlawl mai le. Khua ava luh chuan a reh hian a reh tlawk tlawk mai a. In la ding awmchhunte chu an ran vulhte chuan anlo bel nak nak hlawm a. Mihring hmel an han hmuh taka chuan an khaw ran vulh hote chu an hram chiah chiah hlawm a. Ui te ngat phei chuan Ngula chu anlo lawm tih hriat tak hian a bawh hian anlo bawh nawk nawk mai a. Ngula erawh chuan chutiang lam pawh buapui hmanlo in an in awmna lam a pan thla nghâl vang vang a. A hnung lamah chuan ui leh Sial țhenkhat hian an rawn zui ve dam dam bawk a. An in awmna lai a zuk thlen chuan in ding reng reng hmuh tur awmlo hian alo kâng fai vek mai le. Ngula rilru na lutuk chuan din vang vang pah hian ring deuh takin,"Ka pa i fapa Ngula kalo hawng e. Khawnge i awm" a'n ti tham țiak mai a. Mahse chhawntu reng an awmlo. Ngula rilru na lutuk chu an in kang vap vek tawh hnu kiangah chuan an țhu hnawk mai. A meichher chu a sirah dahin van lam an en vang vang a. A mit ațangin mittui alo luang chhuak țhiam țhiam bawk a. Chutia beidawng taka a awm lai chuan an ui vulh pahnih te khan bauh lauh lauh chung hian Ngula chu an rawn bawh nawk nawk mai le. Ngula chu harchhuak zawkin an uite chu alo be mawlh mawlh a. An uite hnenah chuan,"Khawnge in pu a awm" alo ti mawlh mawlh . An uite chuan hrethiam ni awm tak hian thlang lam panga tlanin an bauh lauh lauh mai le. Chu veleh Ngula chuan phur tak mai hian an uite chu a zui thla ta a. Ui te chu tlan zelin Ngula te kawmthlang a Hnahkiah bul chawrno kiangah chuan an ding ta chat mai a. Ngula a zuk thlen thlaka a thil.hmuh chuan a rilru a ti na ngang mai. A pa a hmangaih em em,khawvela a neihchhun chu hnahkiah bul nghengin thisen nen alo țhu thluang zar mai a. Ngula chuan a pa chu sawi nghal nawk nawkin,"Ka pa ka pa,i fapa ka lo hawng e" tiin an au tuarh tuarh a. Mahse apa chu lungtum biak ang mai hian a ngawi reng a. A taksa te vawt vek tawhin a a khawng vek tawh bawk a. A dul nem laia Silai kahna hliam chu tuarlo in alo chatthla hman alo ni. A hliam na lai phei chu alo țitek hman hial tawh ani.Ngula chuan apa chu sawi harh leh tum ni awm tak hian an sawi nawk nawk a. Sawi nat avanga harh leh tur nise zawng a harh chiang ngawt ang le. Mahse apa chu muhil satliah anilo,a taksa ah chuan nunna a awm tawhlo . Ngula rilru na lutuk chuan pa chu kuahin a țap hawm hawm mai a. Lungthulian khaw reh ruih mai chu tlangval a hringtupa aua țap thawmin a luah khat ani ber mai. Ngula tan chuan na lo tur zia ani nem. A sen tet ațanga amah lo chawiliantu leh a chhungkaw neih awmchhun ani miau a. A pa taksa khawng vek tawh chu kuahin a țap a țap ta mai a. Ngula tan chuan chu indona chu a thil tawn tawh azawnga thil rapthlak ber ani hial tave ang. Tumah han ven tur awm heklo le,zan rei tak thleng pawh chuan apa ruang chu ala kuah reng a. A taksa te alo chau deuh bawk nen apa ruang kuah chial chung chuan a muhil zui ve ta a.

      Zing khua alo var chuan Ngula chu a harh hlawl mai a. Pawn khaw vawta zankhuaa awm anih avang chuan a taksa te chu a hik vur mai lehnghal. A pa a kuahna chu thlahin an thochhuak a. Zan lama thilthleng zawng zawngte chu mang ang mai ni hian a hria a. A pa ruang chu an en leh a. A ruang lo awmna sir deuhah chuan an Thul chu alo let bal mai a. A pa chuan a lo thehchhuak hman ngei ni tur ani. Chutiang thil vel a han hmuh leh hnu phei chuan A rilru a na thar leh em em mai a. Mahse mipa tan han țah reng chi ni heklo le. A iptepui leh Silai chu a pa ruang awmna kiangah chuan an dah phawt a. Chumi hnu chuan an in chhak lama in la dingah chuan Țhulh han lain a pa phumna tur chu amah ngeiin a lai ta mai a. Rilru na tak chung chuan a pa thlan tur chu alai mawlh mawlh mai a. Fehrehsan velah chuan ama dung pil tawk vel chuan lei chu alai khuar tawh a. Tichuan thlan khur chhuatah chuan puan hlap pakhat phahin a pa ruang chu an zalh a.A chung lamah puan pakhat khuh lehin a hai vur ta a. A vur zawh hnu chuan apa thlan chungah chuan an ding a. A hmabak zel tur ngaihtuahin apa tello a nun han hman chu a huphurh hle ani tih ahriat mai. Rei ngial a din hnu chuan a iptepuite akin an khawchhung chu a han fangkual a. An khaw tlangval thah a awm tate ruangte chu alo rimchhe țan tawh hle mai a. Khua an luah leh dawn anih chuan senghawi vat angai tih hriain Ngula chuan Ruang te chu hmun rem lai deuhah a theih ang angin an hnuk khawm a. Ruang zawng zawng chu sawmpariat lai mai hi alo ni a. Ruangte chu thoin an bawm luai luai mai a. Mi pakhat tana han tihfel vek sen ni heklo le In pakhatah chuan lutin ei te an rel leh mawp mawp a. Tichuan chawlh hahdam pahin an khawho lo thlen hun chu alo nghak ta rih a.

      Tlai lam pang ,ni tlak hma si chuan Ngula muhil chu a harh hlawl mai a. A mutna in kawmchhak lama țawng lang lang thawm chu a hre zui a. Chu veleh thochhuakin pawn lamah a va chhuak ta a. A va chhuah chuan an khaw mite chu khuaah anlo lut țan tawh hi alo ni a. Ngula chuan pasalțha Chawna hmuh thuai tumin a chhuak ta nghal a. Mi a tawh apiang chu țha taka be zelin an khaw rorelna in lamah chuan a kal chho a. A han thlen chuan a rin ang ngeiin pasalțha Chawna leh an khaw upate chu anlo awm tawh a. Chawna Ngula hmel alo hmuh chuan,"Ngula,i pa chu a țha maw" alo ti var a. Ngula chuan zawite hian,"Ka chhan hman talo ani. Silai muin alo fuh palh hlauh ani ang e. Kan kawmthlangah ka phum nghal a" a han ti a. Pasalțha Chawna chuan pawi tih hmel tak hian,"A va zialo tak em ve aw. Kan in lamah i rawn awm chho mai dawn nia" a lo ti leh a. Mahse Ngula chuan,"Ngailo e,buk ka zar rih anga ni mai" a han ti a. Mahse Chawna chuan,"Ngula,kan in chu i in ania lawm. Tikhan lo zuk chhuk la. Hei khua te a tlai mai dawn a. Ruang senghawi dan tur kan han ngaihtuah ange" a han ti a. Ngula chuan chhan pawh chhang tawh lemlo hian an veng lamah chuan a chhuk leh hnak hnak a. Pasalțha Chawna te ina awm ai chuan Buk zar mai chu a duh zawk ani.

      Chutia baihvai angreng taka an veng lama a chhuk hnak hnak lai chuan a hnung lam ațang hian a țhianpa Zamuanga chuan,"Ngula ,Ngula, i pa chanchin i hre tawh em?" tihpah hian a lam panin alo kal a. Ngula chu ding nghalin Zamuanga hnenah chuan,"Ka pa zawng a awm talo" a ti chuai raih mai a. Zamuanga pawh a hrilhhai hle ani ang engmah sawi mai nachang a hrelo a. Ngula vek chuan,"Kan in lah hal zingah tel ve bawk si a. In thar kan rel hma zawng chuan Bukah kan khawsa mai ani ang chu" a ti leh a. Chu veleh Zamuanga chuan,"Ngula,vanneih thlak takin kan in a kang ve hlei nem. Hawh teh kan in lamah i va phei ang hmiang. Kan kiangah awmve rihla nimai" phur hmel tak chuan a rawn ti a. Ngula chuan,"Zamuang,engmah neih ka neih loh hi.Ka tirsa mai mai ang che u" tiin a hnial a. Mahse Zamuanga chuan an in lama kal tur chuan a kai ta tlat mai a. Chutia a țhianpa berin a in lama kal tura atih tlat avang leh chenna tur in aneih bawk siloh avang chuan Ngula tan han hnar vak ngaihna awm heklo le. A tawpah chuan Ngula chuan,"Awle,in in ațangin ka indang tawh anga nimai. Mahse kan in lamah i zuk kal leh lawk teh ang. Ka pa khan kan Thul kha alo thehchuuak hman hram a" a han ti a. Tichuan Zamuanga nen chuan an in awmna lam pan chuan an chhuk ta a. An zuk thlen chuan Hnahkiah kung bulah Thul chu alo la in tung ran mai a. Ngula chuan apa phumna kawh pah chuan,"Hetah hian ka pa chu ka phum ta mai ani. A ruang kha hmuh a hrehawm em a. Ka enrei ngam nganglo ani" a han ti a. Zamuanga chuan,"Ngula,hawh teh i phei thuai teh ang. In lamah engkim kan la sawi dawn nia" tihpahin Ngula te Thul chu an pu nawlh a. An in lam pan chuan a phei pui ta nghal a. Ngula pawh chuan engmah sawi zui loin a zui ve ta mai bawk a.

     Zamuangate in an va thlen chuan Zamuanga nu leh a unaute pahnih chu inchhung seng hawiin an lo buai mek a. Zamuangan Thul a rawn pu lang mai leh Ngula hmel ngui nghiai mai a han hmuh chuan Zamuanga nu pi Ngailiani chuan thil awmzia a man thiam nghal mai a. Inchhung an han luh chuan Zamuanga chuan,"Ka nu,pu Chala chu a awm tawhlo. Ngula hi kan hnenah a awm mai a ngai ani" a han ti a. Pi Ngailiani chuan țha aw țuau hian,"Ngula ava pawi tak em aw. In run a in thah fo mai hi zawng a tuartu tan a na țhin mange. Tunah chuan kan inah kan cheng ho dial dial ani ang chu" a rawn ti hlawl mai a. Ngula chuan,"Nu Ngai,in in ațangin in thar tur ka rel mai angai dawn anih hi. Ka rawn tibuai lutuk em lovang che chu maw?" a han ti a. Pi Ngaii chuan,,"Ngula,in thar rel angai hlei nem. Tunah chuan hei i in a nih tawh hi. Ti hian kan neih ang ang kan ințawm anga. Khuanu venna zarah kan nghei biklo ange" a rawn ti a. Ngula pawh chuan a iptepui te bangin a Silai te chu n dah thla a. Chumi hnu cuuan pawn lamah chhuakin leikapuiah a va țhu ngawi ta reng a. Zamuangate pawh chuan a pa thi atuar hle ani tih hriain an va be buai duh lo ani.

      Chumi zan chuan Lungthulian tlangval zawng zawng chu an upate chuan ko khawmin a zan a zanin ruang te chu an phum nghal vek a. Zanlai arkhuan hun velah chuan an in zo fel thei hram a. An țhiante an phum fel hnu chuan Zawlbuk lamah an kalkhawm leh vek a. Chutah pasalțha Chawna chuan,"Awle,hei tunah chuan kan dinhmun chhiat zia kan hre tlang vek anga. Veng mawng lama in tam zawk chu a kang ral vek a. Buh leh Bal tamtak kan chan ani. Kan țhian nunna chan tate kha chu kan kohkir thei tawhlo a. Mahse kan khua hi kan tundin leh angai dawn ani. In chauin in han hle ang tih chu ka ring a. Mahse naktuk lamah khian insak hnatlang kan koh angai dawn a. Varțian ațangin insakna hmanrua tur la khawm turin kan kal nghal dawn nia. Zanin lamah chuan khawhar ina riak turin kan inphut lo ang a. Hahdam takin in mu dawn nia" a han ti a. Thil pawimawh dang dang a sawi zawh hnu chuan tlangval ho chuan mutna tur an han phah sap sap a. Tumahin bengchheng siam zui loin an muhil tlang ta a.

      A tuk zing varțianga Lungthulian tlangvalho chu an tho sang sang a. In neilo te leh a neite pawh chu phur tak mai hian an hmanruate la turin an kal phawt a. Chumi hnu chuan Zawlbuk lamah bawk chhuak khawm lehin insakna hmanrua tur la khawm turin daihnai ngaw lamah an inzui liam ta a. Nileng țhaka tlangval zahnih rual zet mai an han phet tak sup supah chuan in tam zawk chu a chung chih mai theih turin an rel fel thei ta a. Ngula erawh chuan Zamuangate in lama la awm rih a duh avangin a in tur chu an rel sak ve lo a. In neilote chu a remchan dan ang angin midang inah an inhnawh khawm bakah Bukte te sain an awm nawl nawl a. An Buh leh Bal te a kan chhiat vek avangin khawtlang chuan phal takin ei leh in tur an chhawp sak thung. Chutianga nili vel zet mai insak hnatlang an neih hnu chuan an mamawh ang zat in chu an rel fel thei ta a.

     Lusunna avanga in dawm kun reng theih ni heklo le. Lungthulian khaw mite pawh chuan an buaina lampang pawh ngaihtuah chhunzawm hman lo lekin lo lamah an in phur liam leh ta zut zut mai a. Indona avanga an Buh leh bal zawng zawng chan vek te tan pawh midang han ban reng chu a zahthlak na chin alo awm a. Ram lama Bahra te leh hruizikte khehin an in hnangfak ve țawk țawk a. Mi tamtak chuan an ran vulh leh an thil hlu neih ang ang chu an khaw țhenawm Parvachawm lama Buh hum thleng nan an hmang zui bawk a. Furpui la hmachhawn tur annih avangin a khaw țama n țam mai loh nan upate pawh chuan khaw țhenawma pur chawk dan an ngaihtuah ve reng bawk ani.

      Ni te a liam a Ngula erawhin a pa boral ta chu a tuar ngang mai a. In lamah pawh awmloin lo lamah a riak deuh reng mai a. Zamuangate pawhin awm ang ang chuan an la en mawl ve tawp ani. Nimahsela Ngula.chuan Zamuangate inah awm reng thei dawnlo tih hriain insakna hmanrua turte a la khawm ve reng tho a. Lo lama hlo thlawh kar lakah chuan a ramvak zeuh zeuh bawk a. Mahsela khuaa a hawn apianga mai a midang ina an lawi ziah mai chu ni thei ngang hian hrelo a. Mahni a han awm reng lah a tan a buaithlak tho bawk nen a rilru a buai hle mai. A tawpah chuan in hran han khawsak phawt chu țha ber ni a a hriat avangin Zamuangate chhungkua an awm kim țhap lai chua Ngula chuan,"Hei nu Ngai,in hnenah rei tak ka awm tawh a. Chhungkua ang tak taka min en avangin ka lawm em em a. Ka pa boral avanga ka tawrhnate pawh min hriatthiampui bawk a. In chungah hian lawmthu sawi sen loh ka ba ani.Amaherawhchu tlangval ka ni a,nupui a chhia a țha pawh ka la nei ve chek anga. In hnena ka awmzui reng a remlohna chin a awm dawn avangin kan in hmunah bawk sawn ka chhenna in tur ka rel mai a ngai dawn ani. Min remtihpui hram ka beisei" a han ti phawng mai a. Pi Ngailiani pawh chuan hrethiam takin,"Ni e Ngula,kan hnenah i awm reng hi kan phal lutuk a. Mahse i sawi ang khan nupuite ila nei duh ngei anga. Ilo inbuatsaih pawh a țul ve bawk alawm. Hei tunah Hnuhpui kan tukchhuak lek lek tawh a. Kan tukchhuah veleh i in tur chu Zamuanga nen hian inrel dawn nia" a rawn ti a. Tichuan Hnuhpui an chhuah veleh a in sa țan thei tur chuan an in buatsaih ta a.

      Ninga vel hlo thlo a an bun leh ngar ngar hnu chuan Ngula te leh Zamuangate chuan Hnuhpui chu an thlo chhuak ta a. An zawh hnu chuan Ngula in tur chu an han rel țan nghal a. Ngulan a feh hawn apianga Thingtuai leh Mau alo put haw ziah avang chuan reiloteah in ruangam tur chu an rel vel ve der mai a. Țhenawm khawveng te leh Khawtlanga mi tlawmngaiten rawn pui bawkin ni reilote chhungin Ngula chenna in tur ,hmeithai in rual vel lek chu an rel zo ta a. An zawh fel hnu chuan mi țhenkhatin Ngula chu bungbel ilo te anlo vawm khawm sak bawk a. Pasalțha Chawna ten Buhhum tam tawk tak rawn pe bawkin Ngula chuan hun engemaw chen in a neihloh hnuah ama in ngeiah chuan a khawsa ve leh ta ani.

      Chutia mipa rek mahni chauha han awm chu buai ana duhin Ngula chuan hunawl a insiam thei mang der lo mai a. Vawk chu sawiloh,ui leh Ar Buaipui nan takngial pawh hun a duh rei ta hle mai. A feh hawn tlai deuh changin Zamuanga ten chaw anlo chhum kep zel a. A chang leh an kawmchhak nula Tawii ten ei an lo rel sak thul. Chutiang reng renga a buai nitin lai chuan zan khat chu Chemfawng tur a sui mawlh mawlh laiin pasalțha Chawna a rawn leng hlawl mai a. Ngula chuan lo be nghalin,"E ,pa Chawn,enge i ngaihtuah a ka inah te ilo len tak mial ni" alo ti vat a. Chawna chuan țhut hmun rem pah hian,"Ngula,hei ka rin aiin ilo puitling daih mai ka ti. I pa thi hnu hian kei ka lo buai ve bawk nen mumal taka in kawmna hun kan nei theilo a. Zanin chu thil sawipui duh che ka nei ani" a rawn ti hlawl mai a. Ngula chuan a thiltih lai dah fel pah chuan,"Eng thil nge ni ta a" alo ti var a. Chawna chuan,"Ngula,hei mahnj chauha khawsak reng ngaihna a awmlo a. I hahin i taksa pawhin a tuar vat dawn ani. Chuvangin in chhung lam chet alo awl tur tal chein nupui i neih vat angai ani" a rawn ti a. Ngula chuan,"Pa Chawn,ka pa thih ațang kha nula pawh mumalin ka la rim lo a. Bakah ngaihzawng pawh ka neilo. Chumai ala nilo,tu pa mahin an makpa atan min duh dawn lo ani. Hei min han en la,neih engmah ka neihloh hi" tiin alo hnial a. Mahse Chawna chuan,"Ngula,mi hian an chik viau che nia. Makpa atana it ru tu che tam tak an awm ani. Chung zingah chuan kan Tlangaupa te nupa ngei pawh khi an tel a. An fanu Tluangpuii pawh khian a iai lo tawp ang che" a'n ti a. Ngula chuan,"Ekhai,anni zawng ka cho rualloh anni e. Kum te han vei leh phawt sela. Keipawh ka theih ang angin kalo in hma khua ve anga. Chung hunah te chuan nupui tur pawh kan zawng ngam ve tawh mahna. Tun dinhmunah hi chuan ka la theilo ani. Ei tur mumal pawh neilo chunga nupui han neih ngawt zawng a zahthlak lutuk ange. Mi buhzem zen chunga nupui chawm zawng ka duhlo e a" a han ti a. Pasalțha Chawna pawh chuan awm atih tho avangin a sawi chhunzawm pui duh talo a. Titi dang te chhepin zan rei tak thlengin an inkawm a. Zawlbuk lamah an kai zui leh ta nghal bawk a.

      Fur ruahtui a haw țan tawh a. Hnuhpui an zawh tawh avangin Ngula chuan in lamah Em leh hmanraw dangte buaipuiin a buai hle reng a. Hunawl a neih chang apiangin a ramvak zeuh zeuh bawka. Sa alak theih em avangin țhenawm khawvengte lakah pawh a tla tlum viau mai lehnghal. A țhian Zamuanga nen chuan an in thlawp deuh chawt a. Zan lamah erawh nuthlawi Kungi te in lamah bawk an in zui lut le nge nge țhin a. Nikhat chu tual zawlah hian Ngula chuan Suk tur hi a lo sui mawlh mawlh a. Chhun chawfak hun velah chuan sui zovin leikapuiah chuan a țhu thluang diai mai a. Chutia a țhut ngawih reng lai chuan an kawmchhak lam ațang chuan tu emaw hian,"Ngula ilo dam maw?" a rawn ti thut mai a. Ngula chuan aw lo chhuahna lam chu a han en nghal a. Amah rawn betu chu tudang niloin Saii u Darzika ngei mai hi alo ni a. Ngula chuan mak tih hmel fe hian,"U Darzika lah ni rengin. Ka mitvai chu ani emlo maw" alo ti hlut a. Darzika chu leikapui lamah rawn kai chho ve pah hian,"Hei in tharte inlo sa a. Mahse a hma ai chuan a te hrat anih hi. Khawnge i pa hi" a rawn ti nghal a. Ngula chuan a pa a boral tawh thu leh thil awmdan chu kimchang takin an hrilh ta vek mai a. Chu veleh Darzika chuan,"Ngula,a va zialo mang tak e aw. Engmah tih theih lah a awm tawh silo. Kan khaw lamah lo pem la nimai" a rawn ti a. Mahse Ngula chuan,"Pem chu pem em love. Eng ti tura lokal nge inih reng reng le" alo tive . Darzika chuan,"Saii pasal neih tur thu hlaah mawle. Kan zinga in lo telve ngei kan duh avangin ka lokal vang vang ani" a han ti a. Ngula chuan,"Tun dinhmunah chuan zinchhuah ngaihna a awmloh hmel mange aw. Bakah u Saii pawh chu tu ang huna pasal neihte tum reng reng. Favangah te sawn mai sela" a han ti a. Darzika chuan,"Ni e mawle. Mahse an nghak thei ta ngang lo ani ange. Bakah tuna apasal tur hi a tleirawl chhuah lai ațanga a ngaihzawng ve kha nia. Pasal dang aneih hnu thleng pawhin anla in theihnghilh lo chu anih chek hi. I dinhmun en chuan lo kal ngei turin ka tur lui ngamlo che a. Mahse i tello a Saii hmel hmuh leh chu a huphurhawm dawn mange" a rawn ti a. Ngula chuan,"Ti rawh inchhung lamah lutin i sawi dun teh ang" tihpahin atho hlut a. In chhungah chuan an inzui lut ta a. An luh hnu chuan Ngula chuan,"U Saii hmel hmuh leh tepawh ka chak khawp mai. Hnuhpui te ka thlo chhuak ta tho bawk a. Ka ranvulhte minlo enkawl sak tur an awm dawn chuan lokal dan pawh a awm in ka ring ani. Zanin lamah kan leng kual phawt anga,thutlukna chu ka siam thei chauh ang" a ti a. Darzika chuan,"E khai,Ngula,man chawi tura lo enkawl peih an awm pawhin a pawi miahlo. Kan khua ațangin Țhi i hawn anga. An lo enkawlna lawmman atan i pe mai dawn nia" alo ti sam et a. Ngula chuan,"Chutiang a ngailo ang. Remchang dang a awm mai ang. Ka țhian Zamuanga te pawhin anlo enkawl theiin ka ring" a ti a. Tichuan zan lama a țhiante ina len phawt a,chumi hnua thutlukna siam mai chu țha an ti a.

                    Ṭhen-34

     Zanriah eikhamah chuan Ngula leh Darzika chu Zamuangate in lam panin an kal nghal a. An va thlen chuan Zamuanga mu pi Ngaii leh a nau Laibati chuan la anlo kai ham ham a. Pi Ngailiani chuan,"Kha Ngula,i rawn lang ve teh khiat a. Mamawhte inei em ni?" alo ti vat a. Ngula chuan țhut hmun rem pah hian,"Khawnge Zamuanga hi,hei u Saii u Darzika alo zin a. Zamuanga rawn hmuh kan tum deuh alawm mawle" a han ti a. Pi Ngaii chuan,"Ehe,i hmel kalo hrechiang tawhlo a. Saii chu a dam țha zel a maw?" tiin Darzika chu a be nghal vat a. Darzika chuan,"Dam țha e. Hei pasal neih a tum hnai deuh a. Ngulate pafa hian minlo telpui ngei se kan duh vangin kalo kal vang vang ani. Pu Chala lahin minlo peihloh san ta sia. Engtia han tihchi nge maw ni dawn ni" a ti chuai raih a. Pi Ngailiani chuan,"Pu Chala boral zet hi zawng a pawi ngawt mai. La dam ni selang chuan Saii pasal neihnaa lo lan ngei a duh awm sia. A thuhrimin Ngula ala awm a. Amah hi alo kal thei tho alawm" a rawn ti a. Darzika chuan,"Hei inchhung lam buaina a chhuanlam deuh anih hi mawle. Ka awmloh chuan ka ranvulhte an khawngaihthlak lutuk ange atia lawm" a lo ti nghal a. Ngula a țawng ve hma chuan pi Ngaii chuan,"Ngula mai mai țhin hi aw. Ui leh Ar mai mai ngaihtuah vang ringawta kal loh chi ani nang. Hei keini pawh kan awm a . Nanga ranvulh te lek lek chu kan lo enkawl hneh viau ang chu. Lo lam lah ngaihtuahawm anilo bawk nen. Va kal ngei ngei rawh" alo ti a. Ngula chuan,"Nu Ngai,ka tibuai tam tawh lutuk che u em mai. A inthlahrunthlak zozai tawh e" a han ti a. Mahse Pi Ngaii chuan,"I kal ngei angai ani" ati tlat mai a. A tawpah chuan Ngula chuan lawmthute sawiin a țhianpa Zamuanga zawng tur chuan an chhuak leh ta a.

      Ngula chuan Zamuanga chu vengthlang nuthlawi Kungite inah a awm a rin avangin Kungi te inlam chu an pan nghal a. An zuk thlen chuan an beiseiloh tak maiin Zamuanga chu alo awm hauhlo mai le. Ngula chuan mak tih hml tak hian,"U Kung,Zamuanga chu a lokal miahlo amaw?" a han ti a. Kungi chuan,"Kal teh nang. Zan hmasa khan nakzan chu kalo leng hman lo ang. Ngula nupui tur zawn angai e atia nih kha. I bulah a awm ka rin vei nen" alo ti var a. Ngula chuan,"Kan Zamuanga țhin hi chu aw. A kalna lam tur te sawi thawi deuh anei em?" a'n ti leh a. Kungi chuan,"Tluangpuii te in lamah anih hmel e a. Nupui țha tak inei thuai dawn e" nui var var chung hian alo ti leh a. Ngula chuan thutak hmel fe hian,"Zamuanga chu a chaklo viau ang. Kan kal leh nghal ange" tihpahin a inher vut a. An Tlangaute in awmna vengchhak lam pan tur chuan an chho ta nghal a.

     Kawtthlera an kal chho hnak hnak lai chuan Darzika chuan,"Ngula i nupui man turah chuan buaina a awm hauhlo ang. Kan sial pawh i kai hawng mai dawn nia. I pa a boral tawh bawk nen,nupui neih thuai i ngai ani" a rawn ti hlawl mai a. Ngula chuan,"UDarzik,nupui neih ngaihna ala awmlo. Kum te han thar phawt sela. Buh leh balah kan hmuingil chhote anih chuan a neihte pawh kan la nei mahna le" tiin a han chhang a. Darzika chuan,"Kha chu nangma remchan dan dan ani mai. I nupui man tur chu kan lo tum vek ang" a'n ti leh a. Țawng mawlh mawlh chunga rei vaklo an kal leh hnu chuan an Tlangaute in chu an han thleng ta a. Inleng an tam vaklo nge thawm alo awm mang hauhlo mai. Ngulate chuan kawmchhak ațangin,"In awm em" an han ti a. An awm tih an chian hnu chuan inchhung lamah an va lut zui a. An va luh chuan Zamuanga bakah tlangval dang pathum hian Tluangpuii La kai lai chu an lo vil a. Ngulate rawn lut a han hmuh chuan Tluangpuii chuan,"Ehe,Ngulate lah ni rengin. Kan inah te ilo leng duh ani maw. A remchang laiah khan lo țhu mai rawh u" alo ti var a. Ngula chuan țhuthmun rem pah hian,"Nia,hei u Saii u alo zin a. Kan khaw nula hmelțha kan rim pui ve reng reng ange ka tia. Kan lo tek lut hlawl mai anih hi" a han ti a. Zamuanga chuan Darzika chu alo be mawlh mawlh a. Tluangpuii bawk chuan,"Keini ang te zawng hmel chhuantlak kan nei ve hlei nem a. Mikhual tlangval han kawm hlim thiam tur pawh kan nih loh hi" alo ti zui a. Chu veleh Darzika chuan,"Ngula hian a lo len duh chhuanlamah min hmang mai mai alawm. Mahni chauha lo len kha zawng a zahthlak ati deuh ani ange" alo ti vei ham ham a. An vai nuih dar dar a. Rei vaklo an țhut hnu chuan Zamuanga chuan Darzika alo kal avangin thil pawimawh deuh a awm ngei anih a ring a. Chuvangin Tluangpuii hnenah chuan,"Tluangpui,kan țin san tawh ang che. Nakzan lamah kan lo leng zawk dawn nia" a rawn ti a. Ngula pawh chuan,"Ni e Tluangpui ,hei mikhual tlangvalte kan hruai ve bawk sia. Zawlbuk lamah anlo infiampui duh takin kan va phei ange" alo tive a. Tluangpuii chuan,"A mak em em e. In lo lut ve chauh a. A len pawh in leng rei peihlo ani maw. In lung kan tiawi zo meuhlo em ni" a rawn ti a. Ngula chuan,"Tluangpuii,chhungkaw thilah han ihhmuhkhawm kan duh mai ania. Kan țin phawt anga. Zan dangah kan lo leng fo dawn alawm" a han ti a. Tichuan in mangțhain Tluangpuiite in chu an chhuahsan ta nghal a.

     Tluangpuii te in ațanga an chhuah hnu chuan Zamuanga chuan,"U Darzik,eng thu hlaah nge kan khuate i rawn chuankai tak mai ni. A pawimawh viau ani ang maw?" tiin alokal chhan chu n zawt a. Darzika chuan,"Hei Saii pasal neihnaa lo tel ve turin Ngula hi ka rawn sawm vang vang anih hi" a rawn ti a. Zamuanga chuan,"Chuti ani maw. Ngula pawh alo kal ngei angai dawn anih chu. Hei ani pawhin nupui a neih thuai ka ring" nui cuhung chuan a han ti leh a. Ngula chuan,"Ngawi mai mai țhin rawh. Miin an hre tam ange" alo ti hluk a. Darzika chuan,"A hmel pawh a chhiatloh kha. Ngula nen pawh an inhmeh phian ang chu" alo ti zawm zat a. Zan te ala rei loh avangin Ngula te in lamah chhukin eng engemaw an sawi ho a. Rei fe an titi ho hnu chuan Zamuanga chuan,"Chutia Ngula a zin dawn tak siah chuan Tluangpuii pawh kalo han hrilh anga. In lo nghak sela a țha ange" fiamthu titak deuh chuan a rawn ti a. Ngula chuan,"Zamuang,nupui neih lampang chu ila hmanhmawh vaklo teh ang" alo ti mai a. Zamuanga bawk chuan,"Ni e,keini pathum chauh kan nia,kan sawi mawp mawp mai anih kha. Dik taka sawi chuan nupui la nei mai rihlo la țha ka ti" a rawn ti leh a. Darzika pawh chuan,"Ni e Ngula,nupui neih zawng a hmanhmawhthlak vakloh e. Nidangah kan la sawiho ang chu" a lo tive bawk a. Zanrei tak thlenga an inkawm hnu chuan a tuk lama Tualcheng khaw lam pan tura kal nghal mai chu an rel ta a. Tichuan Zawlbuk lama riak turin an in zui chhuak leh a. A zin tur thu chu Ngula chuan pasalțha Chawna hriattir a duh avangin Zawlbuk tualah engkim a hrilh vek a. Chawna pawh chuan hrethiam takin tluang taka kal tur leh in lam ngaihtuahlo turin a chah ve mawlh mawlh bawk ani.

      A tuk zing varțianah chuan Ngulate chu hma takah thoin in lam an pan nghal a. Zamuanga pawh Ngulate in lamah chuan alo kal ve bawk a. Zan lamah Ngula thil ken turte anlo siam vek tawh avangin hmanhmawh takin in te an ti fel sawk sawk a. Kawtchhuah lam pan turin an inzui chhuak ta hnak hnak mai a. Chutia kawtchhuah lampan a an kal lai chuan Tluangpuii zing tui chawi tur nen an in tawk nawlh mai le. Ngula chuan be hmasain,"Kha Tluangpui,tui i chawi dawn elo. I harhvang hle mai" a han ti a. Tluangpuii chuan Ngulate in ak bawr luk a han hmuh chuan mak tih hmel tak hian,"Kha zing zingah in va in ak bawr ve. Khawiah nge in kal dawn a??"a lo ti ve nghal a. Ngula chuan,"U Saii te khaw lamah ka va zin ve lawk ange ka tia. A hla tham deuh bawk nen kan han chhuak hma deuh anih hi" tiin alo chhang a. Tluangpuii chuan,"Tluang deuhin in va kal dawn nia aw" a rawn ti leh a. Ngula pawh chuan,"Kan lawm lutuk e. Nangpawh dam takin ilo awm dawn nia" a han ti leh a. Tichuan kawtchhuah lam panin an kal zui leh mai a. Kawtchhuah an thlen chuan Zamuanga chu khaw lamah kir lehin Ngulate erawh Tualcheng khaw lam pan turin a kal thung a.

      Tlangval chak țhalai ve ve an ni bawk a. Chawl khawmuangloa nilenga an kal hnu chuan tlai lam ni tlak hma hret hian Khawlian ram an thleng ta der mai. Fur ruahtui tlak a hun chho deuh tawh avangin ram pa lailenga riah aiah tiin Khawlian khua chu an pan zui ta zel a. Tluang taka kal zelin lenghawn ar khuan hnu hret chuan Khawlian khua chu an lut dawn ta reng mai a. An kal hah em avangin kawtchhuah lamah an han chawl hahdam te te a. Rei vaklo an chawlh hnu chuan khaw chhung lam panin an kal leh a. Khua an va thlen chuan alo reh deuh țhap tawh a. Tlangval țhenkhat nula rim hawng an tawk zauh zauh tihlohah chuan midang chhuak vak hmuh tur an awm tawh meuhlo . Ngulate chuan a hma pawha alo in nghah fo tawhna Zarkimi te in lam chu an va pan vang vang a. Zarkimi te kawmchhak an va thlen chuan thawm an han ngaithla phawt a. Inchhung lamah chuan mei a la en avang leh zawi te te a țawng thawm ala awm avang chuan Ngula chuan ring vaklo hian,"In awm em? Mikhual in thleng thei angem?" a han ti a. Rei vaklo chu thawm a reh vang vang a. An rawn chhang tawh dawnlo emaw an tih hnuin inchhung lam ațang chuan,"Khual țha nge khual chhia" an rawn ti a. Chu veleh Ngula chuan,"Khual țha kan ni e. Khuaah hian zankhat riakin naktuk lama kan chhuak leh nghal ang" a lo ti leh a. Inchhung lam ațang chuan,"Lo lut phawt teh u" an rawn tih takah chuan Ngulate chu in thlahrung deuh tak chung hian luhkaah chuan an han kai chhoa. Kawngkapuiah chuan pu Kalhkhama chu meichher nen hian alo ding ran mai a. A beiseiloh tak maia Ngula hmel a han hmuh chuan hlim tak mai hian,"Khaih khaih khaih,Ngulate an nih hi mawle. Lo lut thuai teh u" a lo ti hlut a. Inchhung an va luh chuan Zarkimite unau mu tawh pawh chu anlo țhu chhuak hlawl mai a. Ngulaten an iptepui an khai fel lai chuan Zarkimi chuan,"Khatia hmelhriat ngailoh in ang maia mikhual thlen kan phal leh phalloh te i rawn zawh vel tak chiam chu. Nangmah ini tih hria ila ka luh tir malek tur che a" alo ti bawrh bawrh a. Ngula chuan,"Zan a rei tawh em a. In lo mut vek kan ring tawh atin alawm. In lo dam țha maw?" a han ti a. Zarkimi chuan,"Dam țha ani mai e. Zin lah ilo zin duh mang silo a" alo ti leh a. Ngulan a chhan hma chuan pu Kalhkhama chuan,"Ngula,engti tura lokal ngei innih reng reng a?" alo ti a. Ngula chuan,"Hei Tualcheng lamah inneihna chhim turin kal ka tum anih hi. Hetah zankhat riakin naktuk zingah kan chhuak leh nghal mai ang chu kalo ti a" a han ti a. Pu Kalhkhama chuan,"Ekhai,tukțhuan ei khamah in chhuak ang chu le. Kha Zarkimi te khan in mutna tur an phahsak ang che u. Kei zawng kalo mutsan mai ang che u. ka chau ta deuh e" tihpahin Khumpui lamah a kai san ta a. Chutia Ngula an han hmuh tak thutah chuan Zarkimite unau chu an phul hlut mai a. Ngulate mutna tur pawh phah ta mailo chuan an țawng an țawng ta mai . Mahse Zarkimi chuan Ngula chu nidangin a țawngkam a zan loh bakah a hmel pawh a dangin a taksa pawh a chhe deuh tih hre thei mai a. Chutah mawi leh mawilo lam pawh ngaihtuahlo hian,,"Ngula,tun țuma i hmel ka hmu chu nidang i anglo riauin ka hria. I hlim loh hmelin i taksate hi ava chhe em em ve" a ti ta phawng mai a. Ngula chu an ngawi deuh vang vang a. Zarkimi te pawh an hrilhhai hman lek lek tihah chuan Ngula chuan,"Nia,a hma ang kha chu ka al ni thei rihlo anih hi. Ka pa in min boral sana. Ka tuar deuh pawh ani ang. Ngai ka awh thei meuhlo" zawi sap chuan a han ti a. Zarkimite unau chu sawi tur pawh hreloin an ngawi reng mai a. A tawpah chuan Țhatlingi chuan,"Ngula kan tihpalh anih kha. Enhmah kan lo hrelo a" a rawn ti a. Ngula chuan,"A,a pawi hlei nem. Ka tuar a zuau ve deuh hrim hrim anih hi" a'n ti a. Zarkimi chua ,"Ngula,i pa te boral chu tunge tuarlo bik ang ni. Mahse lungngai reng reng suh. Keini pawh kan la awm alawm. Kan kiangah lo awmve daih la a țha ang" a rawn ti a. Ngula chua nui chung hian,"Ka lo awm tak tak mai tur nia" alo ti zat a. Zarkimi chuan,"Lo awm ngat la ka duat viau ang che" nui hak hak chung chuan a rawn tive bawk a. Hlim taka titi zuiin zanrei deuh tak hnu thleng chuan an meng a. Tlaivar ngawt thu awm heklo e. Zarkimiten Ngulate mutna tur an phahsak hnu chuan mut zai an rel ve ta a.

     An kawng kal an chau deuh bawk nen Ngulate chu an mu nghet ngang mai a. Zing lama Zarkimite buh deng ri tlat tlat thawm chuan Ngula chu a tiharh zawk a. An mutna ațanga țhuchhuakin a mit an nuai nawk nawk a. Tapchhakah chuan mei an lo nun hlat hlat tawh a. Ngula chuan Darzika chu sawi nawk nawk pah hian,"U Darzik,thawh kan hai ania" a han ti . Darzika pawh rawn tho ve nghalin an pahnih chuan an mutna vel chu an han thlep fel sawk sawk a. An hmaite an phih fai hnu chuan Ngula chu Sumhmun ah ava chhuak phei a. Zarkimi leh a nau chuan Buhhum anlo la deng tlat tlat a. Zarkimi an den sa chu alo țhap ve bawk a. Zarkimi chuan,"Ngual in mutui bawk maw" alo ti nghal a. Ngula chuan,"Tui ngang mai. Min kaih thawh ve tur che lawm. U Tawnluia te Zawlbuk kai anlo la hawng nange" a han ti a. Zarkimi chuan,,"Lal in sak hnatlangah an thawk chhuak alawm. In thawh hma daih khan" alo ti a. Ngula leh Darzika chuan tihtur em em an hriatloh avangin leikapuiah dingin an titi vel mai mai a. Tukțhuan ei hun velah chuan Hluta leh Tawnluia hnatlang pawh anlo hawng ve tawh a. In anlo thlen chuan Tawnluia chuan,"Ngula,kha thawhna changte in hria maw" nui vur vur pah hian a rawn ti a. Ngula chuan,"U Zarkimi ten Sukin min rawn hawl tho alawm mawle. A khat tawkin hmungphiah in kan hmai an rawn hrut thuak thuak a" alo ti sam et a. Ngula bawk chuan,"A enga zing zingah te in hnatlan le" a han ti zawm zat a. Tawnluia chuan,"Kan lal insak tur hi a lian deuh atin ani. Vawiin lamah zawh hman hram kan duh sia. A dung hlam sawmhnih,a vang hlam riatin kan rel a. Khitiang reng renga lal in lian khi kala hmu ngailo. Vawiinah a chung kan chih anga. Kan zo fel ani mai" a rawn ti leh a. Darzika chuan,"A khuaa in awm zat en chuan a awm tawk vel tho mai a. Kan kal dawnah en ve chhin reng reng tur anih chu" a han ti a. Tukțhuan ei te alo hun chuan puar takin an kil tlang a. Ngulate pawh tukțhuan ei khamah rei vaklo an țhut leh hnuin Tualcheng khaw lam pan turin an kal leh ta a. Khua an chhuahsan hma ngeiin Darzika chuan Khawlian khaw lal in hmuh aduh tlat avangin lal mual lamah an han kal leh phawt a. An han thlen chuan Lal in tur ,a chung la chih loh ,a bang leh a ruhrel dang zawng zawng kim biai tawh chu alo ding ruau mai a. Darzika chuan,"A va lian țha hem hem ve le. Midang hnenah han sawi leh ta ila awih pawh an awih dawn mawni le. Khawlian khua zet zawng anlo ropui hle mai" a tichhuak phawng mai a. Ngula chuan,"Keipawh hetiang em em a lal in lian hi kala hmu ngailo. A dung hlam sawmhnih,a vang hlam riat lai mai. A luah pawh an luah seng dawn mawni" a han ti a. Darzika chuan,"Khawlian lal zawng ala hausa viau dawn anih hi.Hawh teh i kal thuai teh ang.Anih loh zawngin an sak zawh ka nghak duh mai ang" nui chung hian a rawn ti a . Tichuan Tualcheng khaw lam pan turin an kal leh ta nghal a.

      Ngulate chu tluang taka kal zelin Khawlian ațangin Ngopa khua an bana. Zankhat an riah hnuiin Tualcheng lam panin an kal zel a. Kawlbem leh Selam an paltlang hnuin Chhun ni sat vanglai tak hian Tualcheng khaw kawtchhuah an thleng ve ta hlawl mai le. Khuaa lut tluk annih tawh avangin kawtchhuahah chuan an la han țhu hahdam phawt a. Rei ngial an chawlh hnuin khaw lam pan chuan an kal leh ta a. Khua an va luh chuan alo reh țhap mai a. Mi veivak an vang viau mai lehnghal. Ngula leh Darzika ngaih țhalo chuan hmanhmawh takin Darzika te in lam panin an kal nghal hlawk hlawk mai a. Thui pawh an kal hma chua naupang pakhat hi hmanhmawh tak hian alo tlan hlawk hlawk mai a. Darzika chuan lo ti dingin,"Vala,khua hi ava reh ve. Eng thil nge thlenga" tiin alo zawt a. Chu naupange reuh chuan,"U Saii kha misualin Silaiin an tin tlat a. Kan khaw tlangvalte pawhin an en tawp. U Saii chu hruai an tum a. Mikhualte chu an sual lutuk. U Saii Silaia kah te an tum a" a ti ta mai le. Chu veleh Ngula leh Darzika chu hmanhmawh takin an tlan pheia hlawk hlawk mai a. Darzika te in leh a velah chuan mipui anlo pung khawm țeuh a. Darzika te leikapuiah chuan Tlangval panga lai mai hi anlo dinga. Saii chu Tlangval pakhat chuan Silai hian alo tin ran mai bawk a. Darzika thinrim lutuk chu va tlanphei nghal mai a han tum a. Mahse Ngula chuan alo man bet hman hlauh a. Mipui hnung lama awmte chuan Darzika chu thil awmzia anlo hrilh mawlh mawlh mai a. Ngula chuan,"U Darzik a khawi ber saw nge U Saii pasal hlui Neihdula chu" a han ti a. Darzika chuan,"Silaia Saii tin tu saw mawle. Tin,pakhat saw Ngur khaw pasalțha Thanruala anih saw. Abak saw chu ka hrelo e. Midang chu an him vek a. Neihdula sawn ka nau saw rawn hruai luih a tum ani awm e. Engtin nge a dam tih pawh alo hriat ni" a a han ti a. A sawi zawh velah chuan Saii Silaia tin mek tu Neihdula chuan,"Tualcheng tlangvalte u,min kal tir mai mai rawh u. Anih loh chuan Saii hi ka kap ang. Ka nupui ani a. Ka duh hun hunah ka hruai thei alawm" a rawn ti lang lang a. Mahse Tualcheng tlangvalte chuan Saii te in chu an hual tlat a. Neihdulaten Saii an kah mai an hlauh avang erawh chuan tumahin hriam an lek ngam lo ani. Chutah Neihdula bawk chuan,"Ka nupui hi a man pawh ka pe vek tawh. Sehnih leh Țhi leh Dar tamtak ka pe asin. Chutah a rukin min tlan bosan a,ka ro an duh vang chauhin min lo nei anih dawn hi. Tunah chuan ka nupui hi ka hruai hawng leh dawn ani" a han ti a. Ngula leh Darzika chuan Mipui hnunglam ațang chuan Saii chhanchhuah dan tur anlo rel ve a. Ngula chuan zawite hian,"U Darzik,Neihdula tihloh midang zawng saw chuan Silaiin Saii saw an tin ve miahlo mai a. Neihdula saw ka kap anga. Tichuan midang ho saw chu a dan beh dan a awm mai ang a" a han ti a. Mahse Darzika chuan,"Neihdula saw keimah ngeiin sawisak ka duh ani. Chuvangin amah saw chu a nungin kan man angai ang" a lo ti a. Chu veleh Ngula chuan,"Anih leh ti hian i ti zawk teh ang. Tlangval ho saw va hrilh ru ila. Neihrula Silai saw ka kahthlak sak anga. Chumi rual chuan kan zim huk mai dawn nia. An inring hman hauhlo ang" a han ti leh a. Mahse chupawh chu ala him chuanglo . Tihdan tur an ngaihtuah lai mek chuan Neihdula bawk chuan,"He hmeichhe lepchiah lutuk hi ka hruai in phallo amaw. Ka lak ațanga tlan boin a hming țhat nana a rawn in sawi khawngaihthlak vel em ni. Puk pakhata in hmelhriatloh ten an va hmu tih vel mai mai chu a awih pawh in awih meuh amaw. A duh ang taka a chanchin miin an sawi theih nan a in phalrai mai mai pawh ani thei asin" a han ti lang lang a. A sawi zo chiah tihah chuan mipui zing ațangin Silai alo puak pawp mai a. Neihdula Silai chu a kut ațanga a per sawn nawlh bakah a kutzungțang pahnih lai mai a per chhuak tel bawk a. Mipui chu an tlan darh huk a. Tualcheng tlangvalten an han chim hma chuan Ngur khaw pasalțha Thanruala chuan Saii chu a samah kekin Chempuiin a nghawngah a chuktuah hman ta tlat mai. Chutah ring deuh mai hian,"Tumahin min rawn hnaih suh u. Anih loh chuan in nula hi a hnuk ka chhat nghal ang" a han ti a. Tualcheng tlangvalte chu thinrim takin an ding leh a. Saii pasal hlui Neihdula erawh a kut hliam dawmin a kun ngawih ngawih a. Ta țhiante chuan anlo bawisawm vel bawk a. Thanruala bawk chuan,"Tunah chuan țha takin ka sawi ang. Min kal tir dawn nge in nula hi kan that dawn" a rawn ti leh a. Chutih lai chuan mipui zing ațang chuan tlangval pakhat hi Silai lekkawh va chung hian a rawn ding chhuaka. Tualcheng khaw tlangval ten chupa chu tunge anih an hai hauhlo. Ngula chuan leikapui lam chu pan phei zelin Thanruala chu Silaia tin vang pah hian,"Silai nge Chempui thawk rang zawk kan en dawn em ni ang. Eng thil pawh ti la,nung dama i chhuah chu ka ring ta hauhlo mai" a rawn ti a. Saii chuan thei leh theilo hian Ngula chu alo melh țawk țawk a. Chutih lai chuan Darzika chu Silai lek kawh va chung bawkin alo chhuak ve bawk a. Mahse Ngur khaw pasalțha Tharuala pawh ala zam biklo. Ngula en vang vang pah chuan,"I aw phawi ațang chuan he khaw mi leh sa inilo chiang mai. A tupawh chu lo ni la. Ka thil tum hi min țhulh tir.theilo ang" a rawn ti leh a. Chu veleh Ngula chuan,"Kei chuan ka theilo ani thei e. Mahse ka Silai ken hi chuan a thei ngeiin ka ring ani. A tawpna atan ka sawi nawn leh ang. Hmeichhia kha i kal tir dawn nge ka kap dawn che" a han ti leh a. Tharuala pawh chuan amah rawn betu tlangval chuan a ti mai mai loh tih a hre reng mai a. Mahse tlawm mai chu a duh bik hauhlo a. Ngula hnenah chuan,"Nula hi ka kaltir chuan himdam taka kan chhuah tur thu min tiam rawh" a'n ti a. Mahse Ngula chuan,"Kei zawng he khaw mi leh sa hi ka nilo a. In chungchang thu chu ka rel ve tur a awmlo e. Amaherawh chu tuna i hmeihchhe vawn lai mek kha puk thim hrehawm tak a misual kut ațanga kan chhanchhuah ani a. A tir chuan mi a ang mai ani,mahse kan theih ang anga kan enkawl hnu chuan alo pangngai chho ve ta a. Ka unaunu ani asin. Tin,a pasal Neihdulan a sawisak dan zawng zawng pawh nang tluka hrechiang an awmlo ang. Engvanga i luhluh la chhuah tlat nge maw inih le. Ka unaunu kha i kaltir loh chun ka kap tho ang che. I kaltir anih pawhin mipui hian an chil hlum tho chein ka ring. I duh i thlang thei ang" a han ti dap dap mai a. Thanruala leh ahote tan chuan duhthlan tur avang ta ngei mai. Neihdula lah chuan harsa ti tak chung hian a Silai chu lo lak leh phet an tum a. Mahse Darzika chuan,"Neihdul,tum buai duh suh. Anih loh chuan i thluak darh vek khawpin ka kap ang che" alo tive bawk a. Neihdula leh Thanruala bak Silai keng an awmloh avangin midangho zawng chu an ding zum ringawt mai a. A tawpah chuan beisei tihbo nan hrim hrim tiin Thanruala chuan Ngula hnenah,"Awle,tunah chuan a chan țha zawk in chang anih hi. Mahsela pasalțha ka nih angin zahawm taka thih ka duh ani. Nang nen hian kan in bei anga. Ka chak zawk anih hlauh chuan kei leh ka mite hi zalen takin min kal tir ang tih intiam rawh u" a rawn ti ta a. Mipui chuan Ngula chu an en țhap a. Chutah Darzika chuan,"In beih a țulna a awmlo e. Kan kap hlum vek law law ang che u" alo ti a. Mahse Ngula chuan,"Pasalțha ngenna chu kan zahsak tur ani ang chu. I tih tlat chuan kan inbei ni hmiang. Tunah Saii kha kal tir rawh le"a han ti a. Tharuala pawh chuan Saii vawnna chu a thlah ve mai a. Saii chu hmanhmawh takin a chhungte awmna lamah a tlanphei nghala a. A nau Thangpuii nen chuan inkuahin an țap dun hawm hawm a. Ngula pawh chuan a Silai dahthlain a Chempui chu an phawrh a. Mipui chu hrilh ngai loin an kiang duak mai a. Chutah Tharuala chu leikapui ațanga lo chhukin Saii te kawmchhak zawl lai deuaha chuan Chempui nen a rawn ding kak teu mai a. Neihdula leh midangho chuam leikapui ațangin anlo thlirve bawk. Ngula pawh chuan a Silai leh iptepui chu Darzika hnenah chuan an dah a. Darzika chuan,"Ngula,hetia tih kher hi angailo ania. Awlsam takin kan zo theih ani" alo ti a. Mahse Ngula chuan,"Min ngaihtuah suh. Damchhan tur ka nei tawh hlei nem. Ka thi anih pawhin chhungte min țah tur pawh ka neih tawhloh hi" a lo ti mai a. Mahse a ruk tak chuah thih mai ala duh bik hauhlo. A hmanruate a dah fel hnu chuan Ngur khaw pasalțha Tharuala lam pan chuan Chempui nen a phei ta nghal a. Saii leh midangte chuan Ngula chu athi mai ang tih hlauthawng takin anlo thlir țhap a .

      Mipui thawm chu a reh duk mai a. Ngula leh Thanruala chu a inhmachhawn zawng hian Chempui nen an ding ka teu mai a. Thanruala chuan,"Tlangval,ila naupang hle awm si a. Mahse kan dam khawchhuah nan kan bei ve ve ani ang chu. Theihtawp chhuah la aw. Kha le" tihpahin Ngula chu a rawn veh phei țhem țhem mai a. Rei vaklo an in hel zak zak hnu chuan vawilehkhatah Thanruala chuan Ngula chu Sahhlum ngei tum hian a rawn zuan zawk mai a. Mahse Ngula chu lo in her hmanin a Chem phek chuan Tharuala zang ah tak a hlap ri pawp mai a. Thanruala chu a er zawk a. Rawn hawi let leh nghalin Ngula chu a rawn zuan chhunzawm leh nghal mai a. Rei ve an inbeih hnu pawh chuan a tu zawk mah chu an in sat fuh theilo a. Tharuala erawh thih thaa bei anih avangin a chau țan der tawh a. A tir lamah Ngula kha awlsamte a thah theih a inrin avangin a tha tawp tawpin a Chempui a vai ta kha ani a. Mahse a tum ang ngawtin thil kal ta silo a. A beihpa tlangval la naupang tak lah chuan awlsam te te a lo bumin a tha lah a khek thiam ngang mai si a. Mahse Tharuala pawh chuti maia beidawng chi ziazang anilo. A chet dan phung thlakin Ngula chu a rawn zuan zauh a. Sah phak loh tawk vel lekah hian tawpin a zuang sawn leh țhin a. Chutianga vawihnih thum vel a tih hnu chuan Ngula chu a rawn zuan leh thuta a. Tun țum chu zuang let leh lovin Ngula sah fuh ngei tum chuan a Chempui a rawn vai a. Ngula pawh a chesual teuh ngei mai. Thanruala Chempui chu a lo khak per hman hlauh nain a ban chu tlema hrut thler hman tho mai. Thanruala chu a phur tawlh tawlh a. Ngula chu rawn zuan chhunzawm lehin a Chempui chu a rawn vai kual leh pawp pawp mai a. Mahse Ngula pawh mi a ni bik heklo le. Lo tawlh kiang hret zelin Thanrualan a Chem vai a lakkir leh lai tak chuan va zuan thutin a theih patawp hian a dulah ava tlawh pawp mai a. Thanruala chu hnunglamah leng phei dawrin leicharah a tlu thal tawp a,a Chempui a la thlauh zui lehnghal. A tlawhtu tha pek anat bakah a insawhna deuh bawk nen a thawh pawh a thochhuak mai theilo a. Ngula lah chuan beih chhunzawmlo in a thawh hun alo nghak reng a. Thanruala chu rawn thochhuakin a chempui chu an la leh ngat a. Țe tuarh chung chuan Ngula chu a rawn zuan leh ta a. Chu zawng a tisual chiang ngei mai. Tharualan a rawn zuan leh chiah khan Ngula chu lo tawlh sawnin Thanruala ban dinglamah tak chuan Chempui hriam lo lam hian alo sat nghek mai a. Thanruala chuan a Chempui a thlauh leh rawk a. Chutih rual deuh thaw chuan Ngula chuan Thanruala nak thawlah chuan an tlawh leh pawp mai a. Thanruala chu tlu leh rawkin a nak chu a hup ngawi ngawi mai a. A tum pui pa chu a hneh chuang dawnlo tih a hriat vang nge Thanruala chuan lo din chhuah leh țauh țauh pah hian,"Tlangval ,a tawk tawh e. Ka Chempui ngei mai kha ka lu hi i la dawn nia. Ka hneh nganglo che ani. Pialralah kan la i tawng leh ani ang chu" a rawn ti ta a. Mahse Ngula chuan,"Kei chuan ka that lo ang che. Tualcheng khaw mipuite kutah i nunna chu a awm e" a han ti a. Tualcheng tlangvalte chuan Tharuala chu an rawn man nghal a. Darzika pawh leikapui lamah kai chhoin Neihdula chu alo han chhir ve zawt zawt mai a. Saii erawhin țap pur chungin Ngula chu a rawn kuah vawng vawng a. Inhnit feih feih chung hian,"Ngula,min chhanhim leh ta ani" a ti mawlh mawlh a.

                     Ṭhen-35

     Tualcheng khaw mipui hmaah chuan Saii pasal hlui Neihdula leh a hote chu an țhingțhi țhap mai a. Mipui chuan khuaa buaina n rawn siam avanga han chil zui duh viau mahsela an upaten an phalloh avangin an insum hram hram ani. Amaherawhchu a tir lama tlangval țhenkhatin kut anlo thlak nual hman avangin an hmate chu a vung ber bur a,an hnar leh ka vel te a thi sung mai bawk a. Lal in lamah pawh hruai chho lemloin Saiite kawmchhakah chuan an țhingțhit tir a. Darzika chuan Neihdula chu Silaia tin ran chung hian,"Tunah chuan ka nau Saii chunga i thiltih dan zawng zawg heng mipui hmaah hian han sawi ta che. Anih loh chuan ka kap hlum.nghal ang che" a han ti chang fal mai a. Mahse Neihdula pawhin a sawi leh sawilohin awmzia a nei tam vak dawnlo tih a hria ni ngei tur ani. Darzika vauna chu engah mah ngailo ni awm tak hian a ngawi ngal mai a. Chutah Darzika thinrim insum zolo chuan Neihdula chu tual lei chara intauh bur khawp chuan an hnek thal tawp mai a. Khawih chhunzawm zel a tum lai chuan Ngula chuan lo dawm bet vatin a sir lam deuah va din tir . Chumi hnu chuan Ngula chuan Neidulate hnenah chuan,"Engkim i sawi hi in tana damkhawchhuah theihna ani zawk ang. Neihdulan Saii chunga a thil tihdan zawng zawng chu țha takin min han hrilh teh u" a va ti a. Mahse Ngur khaw pasalțha Thanruala chuan,"Tlangval,chu chuan enge sawtna neih ang. Tunah hian kan lu hi la nghal law law mai teh u" alo ti hluk a. Ngula chuan,"Thah che u hi kan duh hauhlo ania. Amaherawhchu kan tih anga in awm duh tlat siloh cuuan mipui kutah kan pe mai ang che u. Awlsam taka in thih zawng kan phalsak theilo che u ni" a han ti let salh a. A Sawi zawh velah chuan Tualcheng tlangval țhenkhat chu an rawn tawlh hnaih huk a. Neihdula te rawn hruai tlangval pakhat chuan a ngaingam nganglo nge ring deuh mai hian,"Awle,min zuah dawn chuan engkim ka hrillh vek ang che u" a rawn ti ta a. Ngula chuan rang tak mak hian,"Thudik i sawi leh sawiloh a thu ani ang chu" a lo ti nghal a. Tlanngval chuan,"Thudik tak ka sawi ange. U Neihdula leh Saii kha atir chuan in ngeih takin an awm a. Mahse rei vaklo an inneih hnu khan U Neihdula hian kan khaw nula pakhat chu a nupui atan a hruai leh ta mai a. Tichuan Saii hi a hmei anga awm tirin an tinduhdah em em a. Chaw pawh an pe mumal ngailo. Zanah lah vawi tamtak khum ațanga tlawh thlain pawn khaw vawta an sah zankhua țhin a. Mi in țanpui an tum lahin an phal lova. Mi awmthei leh mite chung en an nih avangin leh lal pawhin a sawisel duhloh avanngin tumahin an khak ngam ngailo a. Saii lah chu kutthak hnawihnan a hmangin a chang apiangin a vaw leh țhin a. Nikhat chu Saii kha a awmna chin an hre ta miahlo a. Zawn tumna pawh an nei chuanglo. Khaw tlangval țhenkhat amah lainattu deuh ten an han zawng ve a. Mahse lalin alo hriat chuan a ko kir leh nghal vek ani. Thil awmdan zawng zawng chu a kip a kawiinn va hmu veklo a. Neihdulate khab Saii kha an ranvulh pakhat ang lekah an ngai ani" a rawn ti ta dap dap mai a. Chu thu an han hriat chuan Tualcheng khaw mipuite chu an thinur zual sauh mai a. Neihdulate chu rawn chil hlu. tumin an rawn zim huk a. Mahsela tlangvalte leh val upate chuan an lo dang thei ta hram a. Pawn lama an dah reng chuan an in veng zo dawnlo tih hriain Tualcheng tlangvalte chuan Neihdulate chu lal in lamah an chho puii lal thupek angin kawl an bun tir a. Rip chhungah an khung ta phawt a.

     Mipui an țin dar hnu chuan Ngulate pawh inchhung lamah lutin thil awmziate an sawiho nak nak a. Saii u Darzika leh Thangțhuama chuan Neihdula chu thah an duh thu an sawi chamchi mai a. Mahse Saii pa Suakkunga chuan a remti hauhlo a. Lal thutlukna mgaichang rih phawt tura tiin lal in lamah a chhohsan ta daih a. Pu Suakkunga a kal liam hnu chuan Darzika chuan,"Ka nu,Neihdulate khan engtin nge Saii ala dam ani tih anlo hriat reng reng le?" tiin han zawt a. Anu in alo chhan hma chuan Thangțhuama chuan,"Chu erawh tumahin kan hrelo. Tukinah khan khuaa an rawn lut ve chauha. Tikhan an rawn che ta nghal buan buan mai ani. Țha taka thu kan sawipui duhloh avangin Saii kha an kek chhuak ta anih kha. Lo thleng vat lo ula zawng Saii kha an hruai hman ang mawle" a rawn ti a. Darzika chuan,"Ngula Silai kah thiam azarah kan che thei hram anih kha. Hei Saii lah thi bo daih tawh tura kan ngaih hnuin dam takin kan hmuh leh phah a. Tunah a nunna min la chhanhim sak lehzel bawk nen. A lakah hian bat kan ngah khawp mai" a rawn ti a. Saii nu pawh chuan,"Ni e Ngula,in lokal tirh khan in thusawi kha awih ngaihna reng kan hrelo a. Saii kha a dam turah kan ngai tawhlo hrim hrim. A hmel kan hmuh ni a kan hlimzia kha . Khami ni khan awmve ni lang chuan kan engkim kha pek vek mai che kan duh hial ang Hei vawiinah lah kan buaina min rawn chinfel sak leh a. Kan lawmthu hi kan sawi seng dawnlo anih ber hi" a rawn ti a. Ngula chuan,"Lawmthu sawi angai reng renglo. Hei ka damchhung pawha ka neih phakloh tur Silaite min pe a. Ka phulo em em zawk ani" a han ti ve leh a. Chutah Saii chuan,"Ngula,ka pa a dam maw. A hmel hmuh kalo beisei vei nen. Ka ngai țhin lutuk asin" a rawn ti a. Ngulan a chhan hma chuan Darzika chuan,"Ngula pa chu ka va thlen hma lawk khan ral kut tuarin a boral ani" alo ti a. Pu Chala boral thu Saiin a han hriat chuan hnuk ulh țeuh hian,"Awi ka pa chu ka va lainat tak aw. A hmel hmu leh loa kan awm tur chu" a ti vawng vawng mai a. Tichuan tlai lam thlengin hlim takin an inkawm ho a. Saii nau Thangpuii chuan Ngula chu a ngai zual bik em em hian a hriat mai a. Saii erawh chua thil awmzia a man thiam vek thung. Tlai lampang deuaha chuan Tlangval pakhat hian Neihdula te chungchang sawipui turin Darzika leh Thangțhuam chu lal in lama kal turi a rawn koh a. Darzikate unau pawh an chhuak ta nghal a.

      Darzika te an chhuah hnu chuan Ngula chuan,"U Sai,tun thut thuta pasal neih i tum pawh kalo ringlo a. I va hmanhmawh teh thut ve"fiamthu ti tak deuh hian a'n ti a. Saii chuan nui chung hian,"Nuthlawi tan chuan hmuh hma sak apiang an țha ani mai. Miin min iai tak tak hmaa neih vat angai alawm" alo ti var a. Ngula a țawng leh hmain Thangpuii chuan,"Mawiah dawt vek. U Kapthanga nen hian ahma pawhin n in ngaizawng daih tawh. Ka u in pasal dang anei daih a. U Kapa hian tun thlengin ala hmangaih nia mawle. Ngula,a mak iti em"a rawn ti a. Ngula chuan,"Mipa diktak anih chu. A fel pawh a fel reng reng e"alo ti mai a. Thangpuii bawk chuan,"Kei chu ka duhloh chungin ka nu tepawhin pasal min neih tir ve lo ang. Ka hmangaih ber ka nei dawn ani tawp mai" a rawn ti leh a. Anu chuan tapchhaka chawhhmeh bel vil pah chuan,,"Thangpuii mai mai țhin hi aw. Nu leh pate hian fate tana țhalo tur kan ngaihtuah ngai hlei nem" a rawn ti vat a. Ngula chuan,"Anih Thangpui nang khualrala pasal neih te i ngam ve angem?" a han ti a. Thangpuii chuan Ngula rawn nuih seih pah chuan,"Ka hmangai ber te chu kawlkil thleng rak pawhin ka zui mai ang chu" a lo ti sam et a. Rei fe an titi hnu chuan khuate pawh lo thim țan tawhin Darzikate pawh lal in ațangin an lo hawng a. An lalin Neihdulate an khaw lama him taka a haw tir leh avanga an lungnihloh thu an sawi nang nang mai a. Pu Suakkungate nupa chuan an fapa pahnihte chu lal rorelna pawm thiam hram hram tur leh nunna lak chu buaina dang thlen belhtu mai anih thu an hrilh mawlh mawlh a. Darzikate unau pawhin engmah sawi zui loin ngawih an chuh ta a.

      Zanriah eikham hnua rei vaklo an țhut hahdam leh hnu chuan upa Suakkunga chu lal in lama leng turin a chhuak a. Darzika leh Thangțhuama pawh engmah sawi lem hlei lo hian an chhuak ve daih mai a. Ngula chuan Darzika te an chhuah tak daihah chuan pawi tih hmel fe hian,"U Darzika te chu nula rimnaa min hruaive pawh an tumlo ni maw. Ngawi hle hle in an chhuak daih a. Ka zui an hlauh hmel hle mai" han ti a. Thangpuii chuan,"A enga nangpawh chu hetah nula kan awm ve reng a. Hmun danga nula rima kal in tum vel ni" a rawn ti a. Ngula chuan,"Tuman thlenin nula te an țhutchilh run ngailo e a. Bakah han vah harh deuhte pawh a chakawm ve a" a lo ti a. Thangpuii bawk chuan,"Chuti anih leh ka țhiante inah ka va lenpui mai dawn che mi" nui hak hak chung hian a rawn ti a. Ngula chuan,"A,zanin zawng lenchhuak rihlo ila nimai" a han ti leh a. Chutihlai chuan Saiite chhuungkhat laina hnai țhenkhat an hma lawka inneihna tura thil țul vel buaipui turin anlo leng khawm sap sap mai a. Ngula leh Thangpuii chu an titi siam siam reng a. An chhungkhat laina hnaite anlo thlen kim deuh hnu chuan Saii nu chuan,"Thangpui,Ngula nen khan pawn lamah lova inkawm teh u" a rawn ti a. Thangpuii pawh chuan thiltihlai dahin Ngula nen chuan leikapuiah an va țhu dun ta a.

      Chumi zan kher kher chuan khua a thiangin Thla a eng no nghulh mai a. Ngula leh Thangpuii lah chu in nel em em hian insi rialin an țhu dun a. Zawite te hian an phun sep sep mai lehnghal. Ngula lama tawlh hnaih deuh sat sat pah chuan Thangpuii chuan,"Ngua,ka u kha i pa nen chauha awm innih thu a sawi a. Tunah lah i pa a boral ta sia. Mahni chauha awm zawng a hrehawm duhawm mange. Kan khaw lamah hian lo pem phei daih la. Kan inah i awm ve anga"a hani sa sa a. Ngula chuan,"Ka pa khan min ngaihtuah em avangin a boral hma khan nupui nei turin min ti fo a. Mahse kei lahin ka hnial tlat a. Ka ngaihtuah kir chang hian ka inchhir rum rum țhin mai. Mahse khang hunlai khan ngaihzawng pawh ka neilo a" a han ti a. Thangpuii chuan,"Chu nupui minlo neihsan țep ani maw. Ka u khan in khaw nula an hmelțhat theih zia te a sawi a. I lawmnu pawh khawkhat nula hmelțha ani hial ang a" a rawn ti leh a. Ngula chuan Thangpuii han nek deuh salh pah chuan,"Hmelțhate chu an awm ve bawk na a. Mahse an tluklo viau chein ka hria. Nanghi ka nula hmuh tawh zingah chuan a hmelțha ber pawl ila ni" a'n ti leh a. Thangpuii chuan,"A nih tunge hmelțha ila tih ber a" a rawn ti a . Ngula chuan,"Khawlian nula hmelțha Zikpuii maw le. Keini aiin an u hratin ka ring a. Ka nula hmuh tawh azawngah chuan ala hmelțha berin ka hria. Mahse nang zawng i țhat dan hi a dang a" nui hak hak chung hian an ti a. Thangpuii chuan Ngula chum taih taih pah hian,"Hmelțha pawh min tilo. Min fiam mai mai nih kha" a'n ti a. Mahse Ngula chuan,"Fiam lah love Kan khaw nula atan ka it khawp mai che. Hnathawh hah deuh chang pawha i hmel hmuh apianga hah a dam sawng sawng țhin tur hi" a han ti a. An pahnih chuan an nui dun ar ar mai a. Chutah Thangpuii chuan,"Naktuk lamh mo lawmnaa thingtuah tur phurin kan hnatlang dawn a. Ka pain khawtlang hrai aduh avangin khaw nula leh tlangval ten min pui dawn ani. Ka rualin ilo kal ve dawn nia. Kan lal fanu Sangpuii pawh alo kal ve dawn lehnghal" a han ti zat zat a. Ngula chuan,"In lal fanu Sangpuii ve kha a sual sual nen. A bawih te a chhawr rim em em lehnghal a. A hmel pawh khi pu tlak niin ka hrelo . A nun a chhe em mai" a ti ta zat zat mai a. Thangpuii chuan,"I va han țawng thei zawt zawt tak. Vawikhat i hmuh vang mai khan thutlukna siam nghal mah ta che. Naktuk chu ilo kal mah anga. A felzia i hre mai ang" tiin an lal fanu chu alo chhan a. Ngula chuan,"Thangpui,in lal fanu ang hlir sawm ai pawhin nang hi chu ka duh zawk daih ang che" nui chung hian a han ti a. Thangpuii chuan Ngul a sam ziala pawh nawk pah chuan,"I dawthei em mai a. Țawngthei zeh zuah si" a han ti a. Tichuan lenghawn arkhuan hma thleng chuan an inkawm a. Saiite inleng ho an țin hnu chuan inchhung lamah an va lut ta a. Darzkika leb Thangțhuama hmel alo lan tak mailoah chuan Ngula chuan,"U Darzikate mai mai chu aw. Zawlbukah pawh min kai san anih dawn hi. Min va han thlah thlam em em ve. Naktukah ka hawng leh daih dawn mawni" a'n ti nang nang a. Saii chuan,"Ngula mai mai țhin hi aw. Tualcheng khuaah chuan mikhual pawh ini hlei nem. Zawlbuk kai pui ngai pawh inih loh kha" a lo ti vat a. Ngula tan han tihvak ngaihna awm heklo le. Tualcheng Zawlbuk lam pan chuan mahniin a kal chho ta a.

      Zawlbuk tual a han thlen chuan Tlangval țhenkhat chu tual meichhem aiin an lo ding bial laih mai a. Ngula hmel anlo hmuh chuan an khaw tana thih ngama ral bei tawh anih avangin hawihhawm takin anlo bia a. Zawlbuka an va luh hnu pawh chuan a mutna tur te meilum hnaih deuh lamah chuan an han phahsak a. Ngula chuan a hnial deuh nain a hnial hneh ngangloh avangin an mutna siam saah chuan a han inthawlh ve ta mai a. Muthmuna rei ve a men hnu pawh chuan Darzika leh Thangțhuama hmel reng reng ala hmulo mai a. Zawlbuka tlangval lo haw tlai deuh chu an awm ngei mai a. A thim em avangin an hmel a hmuh theih siloh a. Ngula chuan Darzika tepawh anlo lawi ve mai turah ngaiin a mutthilh san ta a.

      A tuk zing varțianah Ngula chu thochhuakin Zawlbuk bawhbel chu a bawhliam a.A thlenin lam panin a kal nghal vang vang a. In a zuk thlen chuan Saii leh Thanpuii chua sumhmunah buh anlo deng tlat tlat mai a. Ngula chuan Darzika leh Thangțhuama hmel ala hmuhloh avang chuan mak a ti deuh a. Emgmah a sawi lem chuanglo a. Inchhung lamah lutin a hmaite an phih fai thuak thuak a. Saiite pawh chuan buh den lai deng zoin an han țhap leh nghal mawlh mawlh a. Midang aia chhuak tlai bik nih hlauin ei rawng an bawl zui nghal mawlh mawlh mai a Mak tak maiin tukțhuan ei hun velah chuan Darzika leh Thangțhuama chu Silai nen anlo thleng ve hlawl mai le. Ngula chuan mak tih hmel tak hian,"U Dara te chu min thlim ani maw. Ngawi hle hlein in chhuak bo daih a" alo ti vat a. Darzika chuan,"Sanghal kan zuk chang e kan ti a. Kan chang chhuak talo anih hi. I hah deuh kan rin vangin kan sawm ngamlo che a" a rawn ti a. Ngula chuan,"Sa chan te chu engtiklai pawhin ka hman reng asin le" alo ti vat a. Darzika chuan,"Saiite inneih zawh hnu lamah kan la ramvak ang chu" alo ti mai a. Chutihlai chua Saiite chuan Tukțhuan tur anlo buatsaih mek a. An peihfel hnu chuan an kil tlang ta a.

     Tukțhuan eikhamah chuan Thangpuii leh Ngula chu mo lawmna a hman tur thingphura hnatlang turin kawtchhuah lam pan chuan an chhuak ta a. Saii erawh in lamah buaipui tur atam avangin a kal ve lo thung. Kawtchhuah an thlen chuan Tualcheng nula leh tlangval țhenkhat pawh anlo awm nak nak tawh a. An lal fanu Sangpuii pawh alo țhu ve vang mai lehnghal. Kawtchhuaha awmte chuan Ngula leh Thangpuii rawn inzui chho chu uluk tak mai hian anlo en a. Thangpuii an khaw nula chhuanvawrte zinga mi leh Ngula,an khual ral lak a chhan himtu leh a hma ni maia Ngur khaw pasalțha Thanruala tukzal tu rawn inzui chho chu inhmeh ngawih ngawih hian an hmu a. Kawtchhuah an han thlen chho chuan Thangpuii țhiante chuan anlo fiam nak nak hlawm a. Ngula chu a zah deuh hlek avangin engmah a sawi ngam vaklo a. Midang anlo thlen kim hnu chuan an thingphurh na tur hmun lam pan tur chuan an inzui thla ta dam dam mai a. Nula leh tlangval rual ramkal ani bawk a thawm an dimlo tlang hle mai a. Kawng lakah chua fiamthute thawhin an nui ri chel chul a. Țhenkhat chuan Ngula huaisen zia leh insual thiamziate chu hahipin an lo sawi ve thung a. An thingphurhna hmun tur an zuk thlen chuan reilote an han țhu hah chawl leh a. Chumi hnu chuan a hma a an lo kih ro tawhsa Fah thing leh Khiang thing te chu Tlangvalte chuan an han tan mawlh mawlh a . An tan zawh sa apiang chu țhenkhatin anlo ek mawlh mawlh bawk a. Ngula chuan a hma zana Thangpuiin a lo sawi kha adik nge diklo hriat tumin Tualcheng lal fanu Sangpuii che zia chu alo thlothlai reng a. Mak tak maiin lal fanu chuan a bawihte a rawn hruai miahlo mai.Nula dang ho zingah chuan thlan tla zawih zawih a lo che ve char mai a. Mahse Ngula chua lan mawi a tumna ang maiah a ngaiin eng teh ualah a ngai lemlo a. Mahse Sangpuii chu tlangvalho chuan an fiam bawrh bawrh a. Amah lah alo nu ve uar uar mai lehnghal a. Chutia lal fanu Ngulan alo thlir reng lai chuan Thangpuii chuan Ngula tukkhum chu thingfaka rawn khawn zauh pah hian zawitein,"Khatin nula an thlir reng ngailo. Mi mit i ti kham ange" a rawn ti a. Ngula chuan,"A lo inthlak tak tak tawh anih hmel saw mawle" alo ti ve mai a Chutia lal fanu en chunga an țawng duh mawlh mawlh lai chuan lal fanu Sangpuii chuan rawn hmuin an lam panin a rawn kal ta tlat mai le. An kiang alo thlen chuan Sangpuii chuan,"Nangni pahnih chu in va hlim awm ve kha. Enge inlo ngaihtuah a" a rawn ti ta mai a. Ngula chuan han chhan dan tur a hre hauhlo a. Mahse Thangpuii chuan,"Hei U sangpui Ngula hian a hmaa a hmuh lai ai khan ilo danglam viau tawh ni in a sawi a. Mak a ti viau ani awm e" a ti ta mai a. Ngula zak lutuk chu a sen ap ap mai a. Sangpuii chuan nui chung hian,"Ngula,ilo kal hmasaka kan thingphurh tur min laksak kha ila hre reng ani maw. Nia,khang hunlai kha chuan ka nun a chhe ve alawm. Mahse tunah chuan kan bawihte pawh ka tiduhdah ngai tawh hauhlo nia" a rawn ti a. Ngula chuan,"Lal fanu,ka tihpalh ani. I sual viau turah ka lo ngai alawm. Min ngaidam dawn nia"a han ti a. Sangpuii chuan,"Ngaihdam dil angai hleinem. Mahse Pasalțha meuhin ngaihdam te min han dil takah chuan kan ngaidam ani mai ang chu" a rawn ti leh a. Ngula chu kal sawn mai a han tum a. Mahse Sangpuii chuan,"Ngula,ngaihdam min dilna tur ila nei ania" a rawn ti leh a. Ngula chuan mak tih hmel taka Sangpuii en pah chuan,"Lal fanu,eng thilah chuan nge ni?" a ti nghal a Sangpuii chuan nui var var pah hian,"Tui a min phuh khum vangin mawle. I la hre thei em" a rawn ti ta kauh mai a. Ngula chuan Tualcheng khaw lalin ripa a khung laia zan thimtham hnuaia tui rawn petu kha an ngaihtuah chhuak zawk a. Chu veleh inthiamlo tak chung hian,"Lal fanu min ngaidam mawlh teh. Ka hriatloh vang ani e. Min țanpuina avang khan ka lawm lutuk ania" a han ti a. Sangpuii chuan,"Lal fanu ni lovin Sangpui tiin min ko tawh dawn nia. Tui pe tur apiang che hnenah fimkhur turin kalo hrilh tawh ang" a han ti . Sangpuii bawk chuan,"Kan khuaa i cham chhungin kan ina ilo len ngei kalo beisei dawn nia" a han ti leh a. Ngula chuan,"Ka lo tum dawn nia lal fanu" tihpahin thinglakna lamah a kalsan leh ta daih mai a. Ngula a kal sawn hnu chuan Sangpuii chuan,"Thangi,nang zawng ila vannei dawn mange" ahan ti sap a . Thangpuii chuan,"Unau ang chiahin asin min en ni" alo ti mai a. Mahse Sangpuii chuan,"Anih ka ring chiahlo" a lo ti leh a. An pahnih chuan an nui dun ta vel a..

      Nula leh tlangval in ti hlim paha kal annih avang chuan an inpeih fel meuh chuan nisa pawh tlak lamah a her liam bawih tawh a. Nulate chuan Tuichawikawng khat țalha thingphurin tlangvalte erawh chuan a tlawn sei pui pui an pu thung a. Tichuan hlim takin khaw lam panin an kal ta a. Rit an lak hnu pawh chuan hah pawh sawilo hian infiam chho zuiin an nui ri hawk hawk reng mai a. Nula leh tlangval tana hun nuam ber pawl ani awm e. Muangchanga kal zelin behliang mun hun velah khua chu an lut tawh a. Khua an han luh chuan lal mual ruai an buatsaihna lai turah chuan an thing phurhte chu nula ho chuan an han keuh dap dap a. A fanu pasal neih lawmna tur a hnatlang zawng zawngte chhawl hal dawm nan upa Suakkunga chuan nula leh tlangvalte chu zu tuitling an chhawp sak hlawm a. Hnatlanga kal ho zawng chuan tlem te tein an han tem liam liam a. An chhawl hal tihreh nana zu no an dawm.hnu chuan mahni in lam panin an haw darh leh ta hlawm a.

      Ngula leh Thangpuii pawh titi malh malh pah hian an inzui thla rek rek a. In an thleng vel chiah tihah chuan tlangau hi a rawn au lauh lauh mai a.Tlangau chuan,"Tunah hian khuaa tlangval awm zawng zawng lal mualah kal khawm nghal vek tur ani" a rawn ti lauh lauh a. Ngula chuan,"Uai,enge ni ta ang le. Khawnge ka la han kal chho ve reng reng ange" tihpahin inah pawh lut hmanlo chuan lal mual lam chu a pan chho leh ta nghal a.

      Lal mual ahan thlenchhoh chuan tlangval dang pawh anlo pungkhawm nual tawh a. An thleng kim ta maw tihah chuan leikapuiah Tualcheng lal Vanhnea chu a rawn dingchhuak ta vang mai a. Tlangvalte an ngawih țhap hnu chuan Vanhnea chuan,"Awle,hei vawiinah chanchin thințhawng tak mai kan dawng hlauh mai a. Kan pasalțha Liankeua leh ahote ramvak chuan kan kan khaw zau Hniarcheng muala tunge annih tih hriatloh mitthi ruang panga lai mai an rawn hmu tlat mai a. Kan pasalțhate lahin tute nge annih an hre silo a. Chuvangin vawiin la la hian ruang te chu zuk fiahin kan khaw lamah in rawn zawn hawng dawn nia" a han ti a. Thil pawimawh dang dang an sawi zawh hnu chuan Tualcheng tlangvalte chu an khaw zau lam panin an inzui chhuak leh ta dam dam a. Ngula chuan thil tamtak angaihtuah a. Ruang panga anih chuan Neihdula te kha ani mai angem tih ngaihtuahna te anei a. Mahse a hmun zuk thlen huna a chian tho dawn avangin midang hnena sawi chhuak ta lemlo chuan a kal ve ta zel a.

      Ngulate chu hmanhmawh taka kal zelin Tualcheng khaw zau Hniarcheng mual an zuk thlen chuan khua a thim hle tawh a. Ruang awmna laiah chuan pasalțha Liankeua chuan an val upate leh an pasalțha dangte chu a han hruai hlawm a. Midang pawh chuan zui ve zelin ruang awmna an han thlen chuan mipa ruang panga zet mai chu kawrte kama hmun zawl deuh laiah hian anlo thal phung a. An taksa ah te chuan Chema sahna hnuhma leh Silaia kahna hnuhma a chik hrep hrup mai lehnghal a. An hmel takngial pawh hmuh tlak a awm heklo. Val upate pawhin an han belchiang that that țhin na a. Tute nge annih an hre chuuak thei ta hauhlo mai le. A tawpah chuan Ngula chu ruang awmna laiah chuan han chho vein Tualcheng val upate chu ruang enfiah chu a han dil ta a. Val upate pawh chuan lo remti nghalin Ngula chuan meichher eng hnuaiah ruang te chu an hai let vel . A thattute lah chuan an lu takngial pawh an la lo .Rei ngial a hai leh hnu chuan Ngula chuan ruang pakhat ,a kutzungțang pahnih bung chu a hmu ta hlauh mai le. Chutah uluk le zuala en in a kutzungțang bunna lai te chu n thlek kual leh a. Chupa kutzungțang chu Silaia kah bun ani tih leh a bunna pawh ala reilo tih ahre thei ta tlat mai. A aia chiang zawkin ruangte chu an thlek kual leh a. A tawpah chuan chung mitthi ruangte chu tudang niloin Saii pasal hlui Neihdula leh a hote anni ngei tih a chiang ta a. Chutah val upate hnenah chuan va kalin,,"Pute u,kan mitthi te hi nimin lama Tualcheng khuaa buaina rawn siamtute kha annih ngei hi" a va ti ta a. Val upa pakhat chuan,"An hmel lah hmuhtlak a awm silo a. Engting nge Ngur khaw pasalțha Thanrualate anni.tih i hriat theih a" alo ti vat a. Ngula chuan,"Ruang pakhat hi a kuzungțang pahnih ka kah bun sak pa kha ani a. Tin pakhat hi ka in mal beihpui pa ngei kha ani tih ka chiang e. A taksa ka hliamna zawng zawng pawh ka en vek ani" a han ti ta mai . Chutah meuh zawng val upate chuan mak an ti ngang mai . Chung lai hmuna Ngur khaw ho lo that duh tur awm ang chu tute nge annih ang tih ah an buai hle mai a. Ngula erawh chuan zan hmasa lama Darzika te unau an bo daih chhan te kha a ngaihtuah let a. Amaherawhchu Darzika te unau pahnih chauh tana Ngur khaw pasalțha Tharuala leh midang pali te han hneh ngaihna awmin a hrelo mai bakah Darzika te chu chutiang em em a nunrawng turin a ring lo a. In a thlen veleh a zawh tawp mai chu a tum ta a. Tute nge annih an hriat hnu chuan Tualcheng khaw tlangvalte chuan hlang an han siam zung zung a. Ruangte chu an khaw lam panin an zawn hawng ta a.

                    Ṭhen-36

     Zanlai pelh hretah chuan Tualcheng tlangval rual ruang zawn tute pawhin an khua an lut țan tawh a. Zan te arei tawh deuh avangin tumahin thawm bengchheng siam lovin lal in lamah ruang te chu an zawn phei a. Lal in tualah chuan tlangval țhenkhat hian mei lo chhemin tui in tur vel anlo hung tlar dul bawk a. Tlangval ruang zawna kalte chuan hlang chu nghat thlain tuisik an han lem zui khawlh khawlh mai a. Tualcheng pasalțha Liankeua leh an val upa Rochhuakate chuan thil awmzia lal hnena thlen turin lal in lamah an kal zui a. Ngula pawh mitthi te chu tute nge annih tih hrechiang ber tu anih avangin an hruai ve bawk a. Lal in an luh chuan lal Vanhnea leh a upate chu anlo țhu țhap mai a. A tlangvalte a han hmuh chuan Vanhnea chuan,"Ekhai, pawn lama rawn chhuah kan tum lai taka inlo luh hman chu le. Kha in chhawl tepawh a hãl ange" tihpahin a zu ni dawm lai chu a rawn pe a. Ngulate chuan tlem tete an lem zauh hnuin lal hnenah bawk chuan zu no chu an hlan leh a. Chutah lal bawk chuan,,"Anih pasalțha Liankeu,kan mitthite chu tute nge annih in hre thei em?" a han ti a. Liankeua chuan,"Lalpa,a lan dan chuan nimin lama kan khuaa buaina rawn chawk chhuaktute kha annih hmel hle mai" alo ti vat a. Lal chuan mak tih hmel tak hian,"Chu chu engtin nge anih theih" a rawn ti leh a. Liankeua leh Rochhuakan Ngula an rawn en deuh avang chuan Ngula chuan,"Lalpa,an tlangval pakhat Neihdula kha a kutzungțang pahnih ka kah bun sak a.Ruang pakhat hi chu amah ngei ani tih ka chiang ani. Tin,Ngur khaw pasalțha Thanruala kha inbeihpuiin ka hliam nual a. Ruang zinga pakhat hi amah ani ngei tih ka chiang bawk ani. Bakah an vai hian panga chiah anni bawk a. Ngur khaw ho ngei kha anni" a han ti a. Chu veleh lal chuan,"Ka rei le maw. Leido kan insiam ta anih chu le. Ka upate u engtia hma han lak chi nge ni ang" a rawn ti ta a. Upa suakkunga chuan,"Lal pa,pawikhawih tute hi kan zawnchhuah ngei angai dawn ani. Ngur khaw ho hnenah kan kut tuara thi annilo tih kan hriat theih nan" a rawn ti a. Lal chuan,"Saii pa,Neihdula te hnenah khan Saii man Țhi leh Dar zawng zawng kha in pe kir leh vek tiraw?" a rawn ti nghal a. Suakkunga chuan,"Aw,Lal pa,a vaiin kan pe leh ngei alawm" a lo ti leh mai a. Lal chuan Ngulate lam en leh pah chuan,"Anih Liankeu,Ngur khaw ho thawmhnaw zingah chuan Țhi leh Dar te in hmu mial em?" tiin a'n zawt a. Liankeua chuan,"Lal pa,a Silai leh an Chempui takngial pawh anmahni thattu te hian an la vek ani. An puanthuah te leh kawng laka an eitur buhfai leh chi ilo bak engmah an hnutchhiah lo" a han ti a. Vanhnea chu a rilru a buai ngang mai a. A ngawih vang vang lai chuan a upa Lawikhawsiama chuan,"Lal pa,upa Suakkunga hian min lo hrethiam sela. Nimin zan khan Darzika leh Thangțhuama hi Silai nena ram lama an kal lai ka hmu ani" a rawn ti ta tlat mai a. Chu veleh lal chuan,"Saii pa,upa Lawikhawsiama thusawi chu a dik em?" a han ti a. Upa Suakkunga chuan,"Aw Lal pa,ka fapate chu Sanghal chang turin kan khaw chul lamah an kal ngei alawm. Mahsela zanriah eikhamah daih ania an kal ni" a lo ti a. Lal in a chhan hma chuan upa Lawikhawsiama bawk chuan,"Lal pa,Ngur khaw ho chungthu kan rel danah khan Darzika te unau hi an lungnilo ani mailo maw. An ro tamtak lah an chân ta si a" a lo ti hmanhmawh a. Mahse lal chuan,"Upa Lawikkhawsiam,lo ngawi rih lawk teh. Darzika chungchang chu kan la sawi țha dawn nia. Bakah Ngur khaw ho kha tlai ni tlak hmain ka chhuah tir a. Darzikate lah zanriah eikhama chhuak chauh anni a. A engapawh chu nise Darzikate chu thu zawhfiah turin kan ko hrim hrim dawn nia" a rawn ti ta a. Lal bawk chuan Val upa Rochhuaka hnenah chuan,"Kan tlangvalte chuan ruang chu zanin la la hian lo va phum mai sela. Khaw mipuite hmuh atân pawh a țhalo e. Tin Darzika leh Thangțhuama kha lal in lamah i rawn tir dawn nia" a'n ti leh a. Tichuan Ngulate chu lal in ațangin an chhuak leh ta nghâl a.

      An lal thupek ang chuan Tualcheng tlangvalte chuan ruangte chu thlanmual lam panpui leh nghalin a phumna tur chu thuk lutuk lo hian an lai a. Thlan khur te chu zau deuh taka laiin ruang panga chu thlan pahnihah an zalh ta a. An phum fel meuh chuan khuan khawvar lam ar a khuang al al tawh a. Tlangvalte pawh in lama hawng tawh lemloin Zawlbuk lamah an lut tlang leh ta dial a. Darzika leh Thangțhuama erawh lal thupek angin lal inah chuan an la ding ran mai a. Lal in a han dawp chiam țhin tak na a Darzikate chuan Saii pasal hlui Neihdulate chu an thah loh thu bakin an chhang lo. Lal khawnbawl Lawikhawsiama lah chuan Darzikate unau thah anga lantir țalh chu alo tum ve bawk a. A tawpah chuan Darzika chuan a ning ta deuh ani ang lal hnenah chuan,"Lal pa,Ngur khaw ho kha ka farnu an lo sawisak dan avang leh khuaa an rawn chet dan avang khan thah ka chak lutuk. Khuaa kan lo luh ni phei kha chuan kah hlum nghal law law kha ka duh dan ani. Khatia man an nih hnu pawh a him taka ila kaltir leh avang pawh khân ka lungawilo nasa mai a. Mahse kan lal ini a,keini aia thil hrezawk leh rorelthiam zawk inih bawk avangin i thutlukna te kha hreh takin kan pawm ani. Amaherawhchu tuna thilthlengah hi chuan inrawlhna pakhatmah kan nei love. Min ringhlel a min hrem i duh anih erawh chuan sawitheih kan neilo" a'n ti dap dap mai a. Lal in chu a reh țhap a. Lal pa chuan a zu no tuai hliau hliau pah chuan,"Awle,zanin atan chuan kan duhtawk rih ang. Pawikhawihtu kan hriat hma chuan Darzika leh Thangțhuama hian khua in chhuahsan tur anilo a,In farnu Saii tepawh thil engkim a fel hma chuan an inneih a remlo ang. Tunah chuan zan te a rei tawh a. Naktuk lamah kan sawi chhunzawm dawn nia. Zanin atan chuan tawk rih teh se" a rawn ti ta a. Tichuan khawnbawl upate leh Darzikate unau chuan lal in chu an chhuahsan ta a.

     Darzikate unau chu an lungawilo hle mai a. Zawlbuk lamah pawh lawi loin a pa ho chuan in lamah an tlang thla a. In an zuk thlen chuan Darzika chuan,"Ka pa,Neihdulate kha ka lo that law law lo ani. Engvanga kan lal pawh hian kan thusawi hi ringlo nge maw anih le" a ti pang pang mai a. Mahse apa chuan,"Darzik,ngawih a hun e. Kan lal tan pawh nangni lo chu han rinhlelh tur dang an awm hlei nem .Zan lamah sa changin inlo la chhuak zui bawk nen. Mi pangngai tan chuan han rinhlelh loh rual inni nem. Engpawh ni sela thudik hai lan anih hma chuan kan la tuar hram hram ani ang chu" a han ti a. Thangțhuama chuan,"Ka nau Saiite inneih thlenga a nghawng tur chu a pawi khawp mai. He thil titu te hi zawng an va chaklo dawn rua em" a lo ti ve a. Darzika erawh a lungawi thei nganglo ni ang e,țhuthmunah chuan a ang a ang ta mai a. A tawpah phei chuan midang muhil tawh pawh lo tho chhuakin thil awmdan chu an han inhrilh a. Saii chuan amah vanga chutiang thil zawng zawng a thleng ta chu pawi a ti em em mai a. A unaute chuan Saii chu an hnem mawlh mawlh a. Ngula pawh chumi zan kher chuan a mu mumal hauhlo mai. Mut hmunah chuan thil tamtak ngaihtuahin Neihdulate lo thattute chu Darzikate unau an nih a ring theilo tlat mai a. An buaina chu misual tuten emaw Saiite chhungkaw tihchhiatna tur remchangah hman an tum a ang riaua hriatna a nei ta a. Chuvangin a ruka Neihdula te thihna hmun chu zuk en chiana pawikhawihtute chhui chu a tum ta a.

      A tukah chuan Ngula chu varțianah thoin Saiite in lam chu a pan nghal vang vang mai a. A zuk thlen chuan Saiite chu an vaiin an lo tho vek tawh a. Ngula alo thlen chuan hlim hmel tak hian anlo be na a Ngula chuan a hmel enin an lungngai hle ani tih a hre thei mai. Ngulan a hmai a phih mawlh mawlh lai chuan Darzika chuan,"Ngula,Zawlbuk lamah kan chanchin an sawi nasa viau lo maw" a rawn ti ta a. Ngula chuan,"A sawi chu an sawi alawm. Mahse tlangvalho chuan Ngur khhaw ho kha in thah pawh nisela an dem hauhlo che u. Mahse kei chuan in thah anih ka ring chuanglo a" a'n ti a. Darzika chuan,"Ngula,kan mitmei ven angai lo nia. I ngaihdan diktak han sawi teh" a rawn ti leh a. Ngula chuan,"Anih aw. Ka ngaihdan chuan in chhiatna tur duhtu tu emaw thil tih anih ka ring ani. In khuaah hian nagmahni lo er ve em em tu che u an awm ani mai lo maw?" a han ti ta a. Chu veleh upa Suakkunga chuan,"Thil ni thei awm tak pawh ani e a. Mahse chutianga min han haw em em tur hi an awmin ka hrelo" a rawn ti a. Ngula chuan,"An lo awm palh pawh ani mahna. Engpawh nise,he thil titute hi kan chhui zui an ngai ani. Nakin zelah in tan a pawi thei dawnin k hria" a han ti leh a. Chutia an titi lai mek chuan an lal fanu Sangpuii chu Tuium phur țeuh chung hian alo lut hlawl mai a. Saiiten an lo biak hma chuan,"Ka pa Suak,ka pa in tunah a be duh lawk che u nia. U Darzika leh Thangțhuama pawh kha aw. E,Ngula pawh kha" a rawn ti phawng mai a. Chutiang anih leh tak avangin Ngulate chu upa Suakkunga hoin lal in lamah an chho ta nghal a.

     Lal in an han luh chuan lal leh lal nu bakah an khaw pasalțha Liankeua leh val upa Rochhuaka chu anlo țhu tlat mai a. Upa Suakkunga chuan,"Lal pa,min mamawhna i nei em ni?" a han ti a. Chu veleh lal chuan,"Ekhai,Saii pa lo țhu teh u. Thil pawimawh tak sawiho tur kan nei ania" a lo ti var a. An țhut fel hnu chuan Lal chuan,"Saii pa,hei Ngur khaw ho thihna chungchanga hian Darzikate hi rinhlelhawm ber anni ta mai a. Amaherawhchu he thil hi Darzikate unau hian an tih ka ring hauhlo ani. Chuvangin he thil titute hi kan hriatchhuah ngei angai dawn a. Chumi atan chuan a ruka ruahmanna kan siam angai dawn ani" a'n ti a. Upa Suaka chuan,"Ekhai Lalpa a va lawmawm dawn ve. Engang ruahmanna ngei ilo neih a?" tiin a han zawt a. Lal chuan,"Ngur khaw ho misualin anlo thahna hmunah khan ka pasalțha Liankeua leh val upa Rochhuaka bakah hei Ngula hi tuma hriatlohin an zuk kal anga. Misualte hnu chu an chhui dawn ani. Mahse he thil hi tuman an hre tur anilo. Ka upa dangte pawhin an hre hauh tur anilo. Keimahni ho zawng bakin hrelo sela a him ber ani. Darzika leh Thangțhuama erawh khuaah awm char char sela. Nangni pawh rinhlelhawmlo thei ang ber turin Saii pasal neihna atan in i.buatsaih chhunzawm reng dawn nia. Hei midangin lal in an rawn kai hmain thu tam sawina hman a awmlo. Upa Suaka tihloh kha chu chhuak leh nghal mai ula. Liankeu nangni pawh ramvak tur angin in chhuak dawn nia" a han ti zawm zat a. An chhuan dawn chuan Liankeua chuan,"Ngula,tukțhuan ei khamah kawtchhuah lama in nghah tur aw" a rawn ti zauh a. Tichuan lal in ațangin hmanhmawh takin an chhuak nghal a.

     Ngulate pawh hmanhmawh angreng takin in lamah an hawng leh nghal a.In an zuk thlen chuan Saii chuan,"Ka u,lal chuan enge alo sawi" alo ti vat a. Darzika chuan,"Kan in buatsaih chhunzawm thei ang. Mahse Ngula erawh kan lal sa tur zawngin a ramriah angai dawn anih hmel" a ti mai a. Saii nu chuan,"Ngula ber kher chu a. Kan lal chuan ava ti mak ve" a lo tive a. Darzika bawk chuan,"A ring miau alawm. Keini lah kan chhuak ve thei dawn silo a. Ngula mamawh tur ang ang kha han siamsak rawh u" a han ti zui a. Thangpuii chuan phur tak mai hian Ngula buhfai ken tur chu faiipah alo thun mawlh mawlh a. Ngula chuan,"Thangpui,tam lutuk angai lo nia. Faithlak nga vel kha a tawk mai. A rit mai mai" a han ti a. Thangpuii chuan,"Ei tur neilo te hian in zuk awm reu reu anga min haw viau mai tur nia" alo ti mai a. Chutia Saiite unauin Ngula ken tur thil vel an buaipui lai chuan Ngula leh Darzika chu leikapuiah dingin zawite te hian an titi a. Darzika chuan,"Ngula,he thil avanga i nunna in a tawrh phah chuan ka in thiamlo kumkhua dawn ani. Mahsela kal ngei turin ka duh bawk si che a. Nang lo chu midang tumah han rin zawh ka nei lo ani" a'n ti a. Ngula chuan,"Hlau thawng mah ta che. Dam takin kalo let leh dawn alawm. Pawi khawih tute hi kan zawnchhuah ngei angai ani. Khawchhung lamah pawh inlo fimkhur viau dawn nia. In beng leh mit te len nasa deuh ula" a han ti ve a. Chutia an țawng malh malh lai chuan Thangpuii chuan ngawi hle hle hian hnunglam ațangin an țawng chu alo ngai thla reng mai a. A u leh Ngula tui taka an titi lai chuan,"Nangni kha in sawi ka hre vek ania" a rawn ti ta mai a. Ngula leh Darzika chu an hawi let rual țhawt a. Chutah Thangpuii chuan,"Min hrilh țha duhlo vel a. Dawt min hrilh a" ti lang lang a. Inchhung lam ațang chuan Saii chuan,"Thangi ka u te chuan enge anlo sawi ruk a" alo ti ve nghal zat a. Darzika chuan,"Engmah anilo. Tukțhuan kil pahin kan sawi dawn nia" alo ti mai a. Inchhunga an luh leh hnu chuan Darzika chuan Saiite hnenah chuan thilawmzia zawng zawng chu an sawi ta vek mai a. Saiin Ngula ramriah chhan tur a han hriat chuan pawi a ti em em a. A chhungte hnenah chuan,"Ngula hi a kal.tur anilo. Duh leh pasal chu ka neilo anga nimai. Keimah vangin tumahin an tawrh ka phal tawhlo e" a han ti a. Mahse Ngula chuan,"U Sai,ka thi dawn hlei nem. He thil titute hi kan zawnchhuah a ngai ani. Anihloh chuan nakin zelah in tan a pawi thei ania" a han ti a. Saii chuan,"Nilo,keini chu kan pem mai dawn lawm. Ngula,i kal theilo ang" a ti leh a. Darzika chuan,"Saii,insum teh khai,keini pawhin Ngula hi kal turin kan duh bik hleinem. Dam takin alo hawng leh dawn alawm" tiin a han hnem a. Ngulaten Ngur khaw ho thattu te an chhuizui dawn tih an hriat avang chuan Saii leh Thangpuii chu an hlauthawngin Tukțhuan pawh an ei mumal thei ta der lo mai a. Ngula chuan a theih ang angin an țawng thlamuan tak na a awmzia anei tamlo hle mai. Tukțhuan ei khamah chuan Ngula chu an in ak mawlh mawlh mai . Saii leh Thangpuii chuan kilkhat ațang hian mittui parawl kiang chungin anlo en ngawih ngawih a. Ngula chuan nui chung hian,"U Saii te chu thi tur thlaha min thlah in tum a. Hlim takin min han vai liam ve ula mawle" a han ti a. Thangpuii chuan,"Hlimna tur a awm hlei nem" alo ti bung nghat mai a. Ngula chuan,"In lo in enkawl țha dawn nia. Ka kal phawt ange" tihpahin pawn lamah an chhuak zui a. Darzikate bakah upa Suaka te nupa chuan țawngkam țha tinreng nen Ngula chu thlah liamin a kal liam thleng chuan an thlir ta reng a. Ngula akal liam hnu chuan Saii chuan,"Ka pa,a hmel kan hmu leh tawh awm silo a" țah aw țuauh hian a rawn ti a. Darzika chuan,"Saii,dam takin alo hawng leh dawn alawm. Ngula zawng ngaihtuahawm ani lo e" a lo ti mai a. Saiite chhungkua chuan Ngula chu a damin an hmu tawhlo mai ang tih an hlau em em a. Thangpuii ngat phei chuan Ngula chu a hlauhthawn pui em em a. Dam taka alo hawng lehlo anih chuan a rilru a thil awm zawng zawng pawh a hrilh thei dawn lo ani.

     Ngula erawh pheikhai zang vah hian Tualcheng kawtthlerah chuan a kal thauh thauh mai a. Lal in mual a kal pelh dawn lai chuan upa Lawikhawsiama nen an in tawk ta hlauh mai le. Upa Lawikhawsiama chuan,"Kha tlangval khawi lam kal tur nge inih le. Saiite inneih lawmpui tura lokal ini sia" alo ti var a. Ngula chuan,"Nia,mahse hei nimin lama thil thleng vang khan an inneih theih hun tur a chiang ta silo a. In lamah hna kan ngah ve bawk nen kalo va hawng leh phawt mai dawn anih hi. Khaw karte a hla tham sia. Kalo kal leh theih pawh ka ring tawhlo e a" tiin a'n chhang a. Upa Lawikhawsiama chuan,"A pawi ngawt mai. Pawikhawihtute kha Darzikate annih pawhin ka dem hranlo. An la hrechhuak thuai turah ngai ila. Tluang takin i kal dawn nia" a rawn ti leh a. Ngula chuan,"Ni e,thil diklo taka titu te an lo awm anih phei chuan thudik zawng alo lang chhuak leh em anga. Chumi hma zawng chuan pu Suakate pawhin hrehawm an ti deuh dawn ani mai"a'n ti leh zauh a. Lawikhawsiama chuan,"Anni zawng mi.nei chhungkua an ni a. Kan lal pawhin eng tin mah a tilo ang. Ngaihtuah duh suh an mi lenna hian an hmingchhe tur pawh a dal hneh khawp ang" a'n ti leh ta a. Ngula chuan tifuh inti tak hian,"Anih ka ring ani. A nei fate hi zawng mi hian a tlawnin an tlawn anih ber mai hi" a'n ti leh zel a. Lawikhawsiama bawk chuan,"A dik chiah mai. Upa Suakate pawh fimkhur turin ka hrilh fo na a keini ang thusawite chu an ngai pawimawh lem hlei lo a. A vanneih theih reng bikloh anih hi" a ti leh a. Ngula chuan,"A pawi zo ta anih hi. Hei lam hla kal tur te ka ni sia. Ka kal tawh ange. Dam takin aw" a han ti a. kawtchhuah lam panin a kal leh ta zela . A kal pah chuan upa Lawikhawsiama țawng dan zawng zawng chu an ngaihtuah a. A rin aiin thil a awlsam dawn ta riau te hian a hria a. Saii te chhungkua chu Lawikhawsiama chuan alo er ru hle ani tih chu rin hlelh rual anilo.

     Kawtchhuah a han thlen chuan pasalțha Liankeua pawh alo țhu vang tawha . Rei vaklo an țhut leh hnu chuan val upa Rochhuaka pawh lo thleng zuiin Hniarcheng mual lam pan chuan an inzui chuuak ta nghal a. Hmanhmawh taka kal zelin chhun chawfak hun hma hian Ngur khaw ho thah annih na hmun Hniarcheng mual chu an zuk thleng thla ta a. Hniarcheng mual țhenkhat leh a piah lam mualte chu Tualcheng khaw zau vek ani a. Ngur khaw mite thah annih na hi zaupui va luh hma hreta kawrte kamah ani. A hmun an zuk thlen chuan val upa Rochhuaka chuan,"Chawl khaw muangloin i han chhui țan nghal mai ila a țha ange" a tih takah chuan Ngulate chuan mihring chetna hnuhma vel chu an han zawng kual ta a. Reipawh chhui ngailo chuan kawngchhak lama Țhifang lo tla darh niai leh Thingbul kianga Silai zen lo baw nuaih mai chu an han hmu ta a. Liankeua chuan,"Helai ah hian lo changin anlo lambun anih ngei dawn hi.Țhi fangte lah chu an la ti țil nual mai lehnghal. Hei ngaw lama an luh chhohna pawh a awm hi. I zui nghal teh ang u" a'n ti a. Tichuan pawikhawhtu te ni ngei tura an rin te hniak chu an chhui zui ta a. Ngaw hnuaia reilote an kual hnuin an hnuchhui chuan zau lam a pan leh tlat mai a. Ngula te chuan zau lamah chuan an chhui zui zel a. Fur ruahtui tlak tawh hnu anih avangin hnuchhui a harsa lo riau maina. Zau chhungah pawh chhui lut zelin thui vakloah chuan hniak chu kawng ruh pangngai zawmin lo hla lam panin a kal ta zel a. zaupui an pal chhuah dawn țepah chuan hniak chu kawng pangngai ațanga pengin ram lamah a lut leh ta a. A lan dan chuan Ngur khaw ho lo thattute chu mi panga vel lai anni tih a hriat mai a. Ngula te chuan chhuizui zelin behliang mun hun velah chuan Selam leh Tualcheng khaw inrina luite ah hian an chhuilut ta hlawl mai a. Pawihkhawitute hniak lah Selam ram lamah chuan a la lut ta deuh deuh mai lehnghal. Val upa Rochhuaka chuan,"Selam ram kan thlen ta der mai. A lan dan chuan kan hnuchhui hi Selam ram lamah a lut ani a. Tunah chuan ngaihdan siam a har ka ti ta deuh mange" a'n ti a. Liankeua chuan,"Selam ho chuan hetiang thil an ti duh in ka ringlo. I chhui zel phawt ang u" a rawn ti.a. Tichuan Selam ram lamah chuan an chhui zui ta a. Tlai ni tlak hma hret chuan kawng pangngaiah bawk chhui lut lehin Selam lam an pan ta zel a. Chutia Selam lam pana an kal zel lai chuan Selam khaw lam ațanga mi tute emaw rawn kal thawm hi an hre ta a. Hmanhmawh taka kawngchhak lama hnimbuk zinga biru nghalin kawnga rawn kal te chu tute nge annih hriat tumin anlo chang ta ran mai le. Rei vaklo an nghah hnu chuan an rinloh tak maiin tlangval panga vel hi Sial pahnin kaiin an rawn kal hnak hnak mai a. Liankeua leh Rochhuaka chuan Sial kai tute chu tute nge annih an hrechiang ngang mai a. Ngula erawh chuan engmah a hre ve lo a. Sial kai te an kal liam hnu chuan Liankeua chuan,"Upa Lawikhawsiama fapa Vankhumate annih kha mawle. Selam khuaah enge an va tih ang le aw. Sial an la kai zui lehnghal a" a rawn ti hlawl mai a. Ngula chuan,"Kan chhhui mekte hi anni mai lo maw" alo ti vat a. Rochhuaka chuan,"Khuaah lutin kan zawh chian phawt angai dawn ani" a han ti a. Tichuan Selam khaw lam pan chuan an kal ta nghal a.

     Selam khua an han luh chuan khua a thim fel der tawh a. Ngulate chuan lal in lam an pan ding ta nghal a. Lal in an han thlen chuan lal in a lawi luh an han dil te te a. Rei vakloah chuan pa pakhat hi lo chhuakin lal ina lut tur chuan a rawn ko ta a. Lal in an han luh chuan Selam lal Chhingvunga leh a upa țhenkhatte chu anlo țhu far mai a. Chhingvunga chuan Paite țawng hian,"Khawi lam ațanga lokal nge innih a. Enge induh" alo ti nghal a. Liankeua ah leh Rochhuaka chuan Paite țawng an thiamloh avangin an ngawi ta kar mai a. Mahse Ngula chuan Paite țawng ngei mai hian fiah takin,"Lal pa,Tualcheng khua ațanga lokal kan ni e. Kan khaw mi leh vawiin lama i khuaa lo zin an awm mial em.Min hirlh theih chuan kan lawm ngawt ang?" a han ti tlawng mai a. Chhingvunga chuan,"Ka khua a lut leh chhuak zawng zawng ka hriat i ring em ni. Bakah lo hre ta reng pawh ni ila,chu chuan in tan enge pawimawhna a neih le" a rawn ti a. Ngula chuan,"A Lalpa,kan unaupa in nupui ruin he lamah alo tlanpui daih alawm mawle. A nupui lah kan duhpui silo a. Kan neih rohlu țhenkhat ala tlanchhuahpui zui nen kan rawn umzui ta vang vang ani" tiin dawt an sawi ta a. Selam lal chu a nui kiah kiah mai a. Ngula te en vung vung pah chuan,"In unaupa chuan a Țhi leh Dar rawn ken te kha ka upa Gina sial pahnih thleng nan a rawn hman kha mawle. A huihphai deuh anilo maw"a rawn ti ta a. Upa Gina pawh chuan nui chung hian,"Sial te kha inlo va vulh pung tawh aniang chu. Thleng mir leh ka phal awm tawp silo a" a alo tive a. Ngula chuan,"Lal pa, thlengkir leh min phalsak hram ta che u. Kan neih zawng zawng ani si a" a han ti leh a. Mahse Chhingvunga chuan,"Kan upa Gina hian a phalin ka ringlo. In duh chuan in unaupa chu va umzuiin a Sial te chu va laksak ula ti nia" a lo ti sam et mai a. An thil hriat duh ber an hriat tawh avangin Ngula pawh chuan lal hnenah lawmthu te an sawi vel luama. Tichuan lal in chu chhuahsanin an khaw lam panin an kal leh ta nghal a.

      Selam khawdai an thlen chuan Rochhuaka chuan,"Ngula,hei engmah sawiloin min kal pui ringawta. Selam lal khan enge a sawi a" a rawn ti a. Ngula chuan,"Vankhumate khan Selam lal upa Gina Sial pahnih an va lei anih awm kha. Țhi leh Dar engemawzatin an thleng ani awm e" a han ti a. Rochhuaka chuan,"Chu zawngte chauh chu maw. In țawng hnem em em nen" a rawn ti leh a. Ngula chuan,"Thlengkir an phal leh pahlloh te ka la dil mawle. Ka la chhimbudawi zui bawk a." a'n ti a. Liankeua chuan,"Tunah chuan engkim a chiang ta uar mai. Vankhumate an lo fing ziktluaklo hlauha. Ka rin ai daiha hmain engkim kan tifel dawn e" a rawn ti a. Ngula chuan,"Engvanga in khaw țhenawm maia Țhi leh Dar kha va ti riral duh nge annih ang le. Ngur khaw ho ro kha anilo maithei nia" a n ti a. Mahse Rochhuaka chuan,"Ngur khaw ho ta ngei kha ani ang. Vankhumate kha pawikhawihtu ani bawk ang. Selam khua nen hian kan in rem vakloh avangin țul feah lo chuan kan in tlawhpawh zen zen lo a. Vankhumate tan pawh an thil lakte va tih riral nan a țha tawk viau alawm. Tunah chuan Vankhumate kha i umzui vat teh ang u. Zaninah chuan kawng lakah an riakin ka ring ani. Anmahni ka ngei ațang khan thudik ka hre duh ani" a han ti piap piap mai a. Liankeua pawh chuan,"Vankhumate ang tan zankhuaa kal peih thu awm hek suh.I umzui thuai teh ang u" a rawn tive bawk a. Tichuan Ngur khaw lo lam buna lo that vektu ni ngeia an rin an khaw upa Lawikhawsiama fapa Vankhuma leh a țhiante um tur chuan hmanhmawh takin an kal leh ta a.

                    Ṭhen-37

      Selam khua an chhuahsan hnu chuan Ngulate chu hmanhmawh taka kal zelin Tualcheng tlangval Vankhumate chu an um ta zel a. Thla a en avang leh Vankhumate lamin an meichher eng anlo hmuh palh an hlauh avangin Meichher pawh an chhi ngamlo a. Kawng pangngai a kal annih tawh avang chuan thla eng hnuaiah pawh kal a a harsa chuang lo ani. Kawng laka chawl khawmuang hauhlo kal zelin lenghawn arkhuan hun awm velah chuan Tualcheng khaw ram lama mei de va va chu an hmu thei ta a. Ding meuhin mei eng chu an han thlir phawt a. Mei eng chu a enna ngaiah a en reng avanhin Liankeua chuan,"Riahbuk an sual anih ngei dawn saw. Kan khaw lamah kal tlang law law sela an tan a țha zawk tur" a rawn ti a. Rochhuaka chuan,"Khuaa an luh pawhin an him chuang dawn hlei nem. I va umzui thuai teh ang u" a lo ti vat a. Tichuan hmanhmawh takin an kal chhunzawm ta a. Selam leh Tualcheng inkar hi hla lo te mai ani a. Tlangval chak țha pangngai tan chuan chawhma țha zet kal bak anilo. Amaherawh chu Vankhumate hian Sial pahnih an kaih avang leh khuaa luh vat an duhloh avangin kawng lakah an la riak rih ani. Ngula te chu chawl lovin an kal zel a. Mei eng an hmuhna mual an thlen ațang chuan a hma aia fimkhur lehzual hian mual chu an tuam chho ta a. Mei eng an hmuhna zawn an thlen chho chuan mihring țawng thawm pawh an hre thei tawh a. Mual chhak lam deuaha chuan hmun zawl rem deuh mai hi lo awmin Vankhumate chuan meipui anlo chhep hluah mai a. Buk lian ve pangngai tak lo zarin an Sial kaih pahnihte chu anlo thlung ran mai bawk. Ngulaten an hnaih chho hret hret lai chuan Vankhumate țhianho chu hlawhtling inti fe hian an lo titi bawrh bawrh mai a. Ngulate chu mei engin a chhun phakloh chin ngaw.hnuaiah chuan biru in Vankhumate thilsawi chu an ngaithla a. Vankhumate lah chuan an mi thah te chanchin reng reng an sawilo mai a Ngulate chuan va țhawn thuta,a dawp a dawp chhuah mai an tum lai tak chuan tlangval pakhat chuan,"Vankhum,Min rawn umzui tu an awm ni a kan hriat tlat chu le. Kan hniak lah kan thup lo nasa mai si a" a rawn ti a. Vankhuma chuan,"Tun thleng chuan tuman minla rawn umzui lo chu anih.hi. Bakah tumahin Ngur khaw ho kha kan thah anni tih rin ngaihna an hre hauhlo ang. Selama lamah kan la kal zui bawk nen . Zawlbuk lamah pawh Sial kai akal turin ania ka insawi ni. Kan chhuah zan khan Darzikate unau pawh sa chang turin an chhuak ve chiah bawk a.Darzikate unau bak tumahin an ringlo ang" alo ti a. Tlangval pakhat chuan,"Anih hei Sial pahnih kan kai hawng ve thawr mai a Silai pahnih kan nei bawk a. Hengte hi engtia han insem chi nge mawni dawn le" a rawn tive leh a. Vankhuma chuan,"Silai hi chu kan la thukru rih anga. Sial pawh hi tuman min rinhlelh loh nan keiman ka kai hawng phawt anga. Boruak a zia deuh hunah kan la rel țha leh dawn alawm" a han ti a. Vankhuma bawk chuan,"Ngur khaw ho kha chu tuman kan thah anih an ring dawnlo a. Darzika te unau te chungah a tal ani mai ang chu. Anni pawh khawtlangin an dem vakin ka ringlo. Chuvang tak chuan Ngur khawho thihna hi an ngai thupui vak dawnlo a. Keini tan vanneihna ani mai" a han ti vei ham ham a. Tichuan thildang dang dangte sawiin zanrei tak thlengin an meng a. Zanlai arkhuan hun velah chuan an Sial thlunte en fel thuak thuakin mut zai an rel ta a.

      Vankhumate an mut reh hnu chuan Ngulate chuan chet lak dan tur an han sawi ho nak nak a. Liankeua leh Rochhuaka chuan an mutthilh laia va hup barh an duh laiin Ngula chuan,"Pu te u,ti hian i ti zawk teh ang u. Anmahni ti harh hauhloin an hmanruate saw kan va laksak vek anga. Sial tepawh kan lo thlung sawn dawn nia. Zing lamah kan phuar hlawm anga nimai lawm" tiin a ngaihdan chu a han sawi ta a. Liankeua leh Rochhuaka pawm zawng tak mai niin an han nghak leh ta rih a.

      Khuan hmasa khuan hun vel ani a. Vankhumate lah an muttui lai tak ani tih hriat tak hian an hnar ri bawrh bawrh mai a. Chutih lai chuan Ngula leh Liankeua chuan Buk lam chu an pan phei țhem țhem a. Hmanhmawh taka an zar anih avang leh zankhay riah nan chauha hman tur anih avang chuan Vankhumate pawh chuan an Buk zar chu anlo uluk loin a bang pawh an siam mumal lo hlauh mai. Chu tak chu Ngulate tân vanneihna niin Vankhumate mutna lu lama Silai intung tepawh chu awlsam taka la in Ngaw hnuaiah an luhpui ta nghal a. An Sial thlun te erawh thawm an chhuah palh an hlauh avangin an kai sawn duh talo a. An tum anga engkim an tihfel hnu chuan khawvar hun an nghak ta a.

     Zing khua alo var a. Vankhumate pawh phak cher chur hian an rawn zi țalh țalh hlawm a. Mut khamloh hmel fahran chuan an mut hmunah an la han let kual vel a. Ngulate chuan nui tet tet chung hian anlo thlir reng mai a. Chutia an thlir reng lai chuan Vankhuma chuan ring leng lawng hian,"Ehe,Kan Silaite ta khawnge a awm zawh tak" a ti lang lang mai a. Buka tlangval mu ho zawng zawng chu zuang tho nghalin an Buk chhehvelah chuan an han vak kual thuak thuak a. Mahse an Silai awm reng reng an hmu hauhlo mai le. Vankhumate chu an hlauhthawn hmel tawh hle mai a. An Sial thlun te lah a ngai ngaiin alo la awm vek bawk nen mak an ti hle mai. A ngaihna hrelo tak chuan Buk kiang velah chuan an vei an vei mai a. A tawpah chuan Vankhuma beidawng thinrim bawk si chuan,"Tu emaw zan laiah thoin kan Silai te hi inlo thukru chiang mai. Tupawh ni ula,ka that duh mai ang che u. Tunge kan Silaite kha lo dahbo a" tiin a naute chu an hrawk tak tak mai a. A naute chu an ngawi țhap mai a.Vankhuma vek chuan,"Ngur khaw ho Silai zawng kha lo dah bo ni ula zawng ka hrethiam. Ka Silai leh ka pute Silai tepawh in la thukru duh ania. Inlo va han tenawm hlawm em em ve" a han ti leh a. Tlangval pakhat chuan,"Vankhum,insum teh khai. Tumahin kan Silai ken te a bo dan kan hre bik hlei nem. Buk khatah kan riak ho vek a. A tu chuan nge maw rilru chhia puin kan Silaite chu lo dah bo ngawt ang le" tiin a rawn khak ta a. Vankhuma thinrim chuan a Chempui phawrh pah hian,"Nanga lo hnial phak pawh ka nilo e. Nangmah hi ilo ni reu reu ang a" tihpaha amah lo chhangtu tlangval chu han sah mai a tum ta a. Mahse midangho chuan anlo dawm bet vat a. Chutia an buai laih laih lai chuan an Buk sir lam ațang chuan Liankeua chuan,"Naute u,khatia buai vak na tur a awm love. In Silaite kha keimahni lak ania lawm" a rawn ti ta mai a. Vankhumate chuan mak tih hmel tak hian an khaw pasalțha Liankeua chu an rawn en țhap mai a. An pasalțha hmel an hmuh takah chuan anmahni a rawn umzui ngei ani tih ring ngalin tlangval țhenkhat chu tlanchhiat mai an han tum a. Mahse chutih lai chuan Silai alo puak dur mai a. Vankhumate chu chet pawh chechang ngamlo in an ding khawng ta reng a. Liankeua bawk chuan,"Eng vangin nge min hlauh viau a. Engvanga tlanchhiat tum mai nge innih. Ka rawn fiam mai mai che u lawm. Hlauh tur ka awmlo e" a han ti a. A sawi zawh velah chuan Ngula leh Rochhuaka pawh Silai lek vang chung hian Buk lamah chuan anlo chhuak phei ta a. Vankhumaten Ngula hmel an hmuh hnu phei chuan engmah thup theih niin an hrelo a. Mahse Rochhuaka chuan,"Vankhum,he lamah hian tlangval sawm rual vel lo kal inhmu mial lo maw. Ngur khaw ho lo lambun tute ni ngei kan hriat te kha kan rawn umzui a. Helaia Buk kan hmuh khan tute nge innih kan hre silo a. Fimkhur thu hlaah in Silaite kan lo la mai alawm" a rawn ti ta a.Chutiang anih takah chuan Vankhuma pawh chuan tlangngnel tak mai hian,"Tumah reng kanlo hmulo mai. Hei Selam khaw lamah ka pa in Sial kai.turin min tir a. Kawng lakah kan thim ta sia,riahbuk kan sual ta mai ani" a lo ti vat a. Rochhuaka bawk chuam,"Hei in Sial kaih tepawh an țhat viau hlawm hi. Mahse Sial kai tura kal si engatan nge Silai Pali em em in ken a?" a'n ti leh kauh a. Vankhuma chuan,"Selam khawho nen hian kan inmil vak silo a. In ven nan ani deuh ber mai" a lo ti leh a. Chutah Rochhuaka chuan nui kiah kiah chung hian,"A nih ka ring ani. Anih leh Ngur khaw ho chu engtiang takin nge in sawisak a" a han ti thut mai le. Vankhuma chuan nui chung hian,"A ,u Rova chu i timak em mai. Ngur khawho te chu keini thah rual pawn va ni suh" a lo ti ve mai a. Mahse Rochhuaka chuan,"Vankhum,tunah ka zawt nawn leh ang che. Engvanga Ngur khaw ho kha that nge innih" a'n ti chang fal mai le. Vankhuma chuan,"Ngur khaw ho thattuah te min puh.mai mai a maw. Khuaah hawng ila,lal hnenah kan la sawi dawn nia" a rawn ti a. Mahae Liankeua chuan,"Vankhum,lal hmaah chuan ila ding dawn chiang alawm. Nizan lama in thil sawi zawng zawngte kha kan hre vek asin. Tunah zawng tlanchhiatna tur innei tawhlo e" a rawn ti ta a. Vankhuma chuan thirim tak chung hian,"Ni e ni e,Ngur khaw ho kha kan thah ania lawm. Tumahin min demlo ang. Lam țang pawh kan nghah tawk" ala rawn ti vei ham ham a. Liankeua chuan,"Ni e,lam țang chu i nghah viau tak ang a. Mahse lalin a chhuah zalen tawh hnu kut inlo thlak kha in tisual der ani. Ngula,va phuar hlawm teh khai" a han ti a. Ngula chuan hnahbial hrui keng bawr luih chungin Vankhumate lam chu a va pan a. Awlsam taka phuar mai atum lai chuan Vankhama chuan,"Nanga mikhual satliah phuar mi ka ni lo e" tihpaha Ngula chu lo sah tumin a Chempui alo vai fua mai a. Ngula chu rang taka zuang sawnin a hrui tel ken chuan Vankhuma hmaiah tak an vawm siah mai a. Chutih rual deuhthaw chuan zuan zuiin Vankhuma chu lei chara thal huang khawpin an bawh phei ta rawk mai a. Vankhuma chu a zi țalh țalh mai a. Tlangval dangte erawh chet thawh ngamloin an ding ngawi kar mai a. Liankeua chuan Vankhuma chu rawn pan hnai in,"Khatianga chet i thawh leh anih chuan keimah ngeiin ka that ang che" a rawn ti a. An phuar zawh hnu chuan Liankeuate chuan Ngur khaw ho an lo beih na chhan leh an beih dan zawng zawng chu an dawp chhuakta vek a. Tichuan hlawhtling inti takin Tualcheng khaw lam pan chuan an kal ta a.

      Fehrehsan velah chuan Ngulate chuan Tualcheng khua an lut dawn tawh a. Ngula chuan Sial pahnih te chu khalha hma hruaiin a hnung lamah chuan pasalțha Liankeua leh val upa Rochhuakan Vankhumate chu an rawn chhawm ve thung a. Khua an luh chuan alo hmu apiang mai chuan mak tiin an lo en ha ha hlawm a. Chutia an khaw tlangval,an upa fapa Vankhuma leh a țhiante phuar anni mai chu thil awmzia hriat chakin lal in lamah an zui ve ta zel mai a. Lal in an han thlen chuan Tualcheng lal Vanhnea leh a upa țhenkhatte chu leikapuiah khawthlir pahin anlo inkawma. Vankhuma pa Lawikhawsiama pawh alo awm ve ran mai le. Chutah Vanhnea chuan,"Chhei raw,kha pasalțha Liankeu,engvanga Vankhumate kha rawn phuar mai nge innih le" alo ti a. Liankeua chuan,"Lal pa,thil tamtak sawi tur anneiin ka ring ani" a han ti a. Chutah lal chuan,"Anih chuan inchhung lama rel chi anih dawn chu. I lut teh ang u" a han ti a. A sawi zo chiah tihah chuan upa Lawikhawsiama chuan,"Lal pa,ka fapa hian engmah a tisual lo ang" alo ti vat a. Vanhnea chuan,"Phuar ngai khawpa awm chuan engemaw tihsual an nei ani mahna" alo ti mai a. Lal in lamah chuan an lut ta dial a.

       Lal leh.upate chuan țhut hmun an han rem sauh sauh a. An țhut fel hnuin Vanhnea chuan,"Le,eng thu nge ngaihthlak tur kan neih le" a han ti a. Val upa Rochhuaka chuan,"Lal pa,kan khua ațanga Ngur khaw ho an chhuah hnu khan Vankhumate hian anmahni Silai leh a pu te Silai hawhin an va umzui char char a. Hniarcheng mual lamah hian lo lehkhalhin anlo lambun ta ani. Tichuan an thil ken zawng zawng an laksak hnuah Selam khaw lamah tlangin Țhi leh Dar te chu Selam khawnbawl upa Gina Sial pahnih thleng nan an hmanga. Silai erawh an la kawl rih thung. Selam leh kan khaw inkara riahbuk an sual laii kan rawn um pha ta ani. An thil sawi zawng zawng kan ngaithla ru mai bakah anmahni kan dawp hnuin Ngur khaw ho thattu te ngei anni tih kan chianga. Phuar hlawm sain kan rawn kai hawng ta ani" tiin thil awmdan chu an sawi zar zar a. Lal in a chhan hma chuan upa Lawikhawsiama chuan,"Lal pa,dawt phuahchawp a sawi mai ani. Ka fapa hi Selam khuaa Sial lei turin ka tir alawm" alo ti vat a. Mahse lal chuan,"Khuma pa, lo la ngawi rih teh" a lo ti vat a. Lal bawk chuan Vankhumate hnenah chuan,"Kan val upa sawi chu a dik em? Thudik tak min han hrilh teh u" a han ti a. Vankhumate chu an ngawi renga. Vanhnea chuan,"Țawng luih tir in ngai dawn ani maw. In lal in thil ka zawh che u hi" a han ti leh a. Vankhumate zinga pakhat chuan,"Lal pa,kan val upa sawi zawng zawng kha thudik tak vek ani e" a rawn ti ta a. Chutah meuh chuan upa Lawikhawsiama chu awm ngaihna pawh a hre tawhlo a. Lal chuan Vankhumate hnenah chuan,"Engvanga ka rorelna zahlo a he thil hi ti nge innih. In thil tih avang hian thi tlak inni" a han ti ta phiar phiar mai a. Chutah pasalțha Liankeua chuan,"Lal pa,an sawi dan chuan Ngur khaw ho thil.ken te kha an awt hle ani awm e. Chu a chhapah anmahni hming lang hauh loin hmingchhiatna chu Darzikate unau in an khum hlauh dawn ani" a rawn ti ta a. Vanhnea chu a thinrim ngang mai a. Insehruh țeuh chung hian,"Upa Lawikhawsiam,he thil hi hriatpui em?" tiin a'n zawt a. Upa Lawikhawsiama chu a ngawi ta ta reng mai. Lal bawk chuan,"Anih Vankhum,engvanga he thil hi ti nge innih. Tu thupekin nge Ngur khaw ho kha inlo lambun" tiin a'n zawt leh a. Vankhuma pawh chuan lal chu a chhang duh ta tlat lo mai le. Tualcheng lal Vanhnea thinrim chuan,"Liankeu,heng mite hi hruaichhuak ula. Tuma midangin an hmuh lohna tur hmunah va that ang che u. A enga ka zawhna pawh min han chhan duhloh chu le. Tualcheng lal hnuaia kun an duh talo ani ange" a ti ta mai a. Chutah Liankeua chuan,"Ngula,minlo pui mai ani ang chu" tihpahin Vankhumate chu pawn lama kaih chhuah a han tum a. Mahse a kaihchhuah hma chuan tlangval pakhat chuan an lal hmaa țhingțhi rawp chung hian,"Lal pa,min ngaidam mawlh teh. Kan nunna em chu min zuahsak hram rawh. Ngur khaw ho lambun a kal tura min tirtu chu Vankhuma pa hi ani. Țhi tam tham tak pek min tiam ani" a rawn tichhuak phawng mai a. Chutah zet zawng upa Lawikhawsiama tan hawi ngaihna a awm talo . Lal chuan upa Lawikhawsiama lam hawi pah chuan,"Khuma pa,ka upa zinga ka rin ber pawlin ka rorelna kalhin thil i ti a maw. Minlo phiarru reng zu nia. Ka lakah hian lungawilohna i nei em ni" a han ti a. Upa Lawikhawsiama chu țawng nachang pawh hrelo hian ala ngawi reng mai a. Lal bawk chuan,"Awle, i thil tihsual puanzar anih meuh chuan hawi ngaihna i hre talo ani maw. Mahse ka thah vek hma cheuin engvanga ka rorelna kalh zawnga thil ti mai nge inih. I lal hi phiarru hi lalțhutthleng chan mai.te hi ilo tum ani hial ang a" a'n ti leh a. Chu veleh upa Lawikhawsiama chu lal hmaa țhingțhi hnawkin an lal ke vawn pah chuan,"Lal pa,min nun hram teh khai. Engkim ka sawi vek ange" a han ti a. Lal pawh chuan engkim a sawi vek chuan an nunna a zuah sak tur thu a tiam ta a. Tichuan upa Lawikhawsiama chuan Ngur khaw ho lambun tura a fapate a tirh chhan chu upa Suakkunga te tih hmingchhiat a duh vang leh a upa nihna hial pawh hlih anih theih nana a tih anih thute an sawi ta vek mai a. A sawi zawh chuan lal chuan,"Engkim a chiang ta kuar mai le. Tunah chuan i nunna ka zuahsak ang che u. Amaherawhchu ka rorelna min țawmpui tlak ini tawhlo e. In thil tihsual avang hian lei in chawi ngei angai anga. Ka khuaa in la awmduh anih ngai chuan vawiin la la hian Sial pahnih bakah Salam in rawn dah tel tur ani . Chuti anih loh chuan tunah hian khua in chhuahsan nghal thei ang" a han ti a. Vankhuma thurualpui tlangvalte hnenah pawh lal chuan,"In pawi khawih nasat zia hi in hria ang maw. Nangni pawh ka khuaa in la awm duh anih ngai chuan Salam in chawi angai anga. Tin,Fathang pawh midang aiin in chhung hnem bik dawn ani" a ti ta a.Lal in an nunna a zuahsak avang chuan Vankhuma thurualpui te chu an lawm ngang mai a. Lal hnenah chuan lawmthute sawiin lal in chu an chhuahsan a. Upa Lawikhawsiama te pawhin hrilhhai tak leh zak tak chungin lal in chu an chhuahsan a. Tualcheng khua chhuahsan meuh zawng an ngam lo deuh ani ange. Hmingchhiatna zawng zawng pawh phurh huamin lalin a tuk ang ang chu chumi ni la la chuan an tlak ta vek mai ani.

      An buaina te chinfel anih takah chuan upa Suakkungate pawh Saiite inneihna tur lam hawiin an inbuatsaih leh sauh sauh mai a. An chhungkaw tana a thiltih zawng zawng avangin Ngula chu Saiite chuan lawmthu an hrilh bang lo. Lawikhawsiamate chhungkaw tan erawh hun hrehawm.ber ani hial awm e. Tlang rel leh sawichhiar an phur ani ber a. An tan chuan hawi ngaihna a vangin an thiltih dikloh avanga indawm kun chungin tapchhakah an tawm nitin ani deuh mai.

       An inbuatsaihna zawng zawng an peih fel tawh hnu chuan chhungkaw pahnihte inbiak remni chu a lo thleng ta der mai . Chumi ni chuan Kapthanga te palai chu Saii in lamah chuan anlo kal deuh reng a. Hmasang ațanga anlo chin fo tawh angin Saii te lam lah chuan an fanu chu an lo phal mai duh bik lo a. Palaite chu an kal kual an kal kual mai a. Kapthangate lam chuan an palaite chu zu tuitling nen an chhawlhal an lo dawm sak mek a. Ngula leh Thangpuii erawh engthawl.fahran hian leikapuiah țhuin anlo inkawm a. Ngula chuan,"U Saii pasal tur kha Kapthanga ani maw kha" tiin Thangpuii chu a han zawt a. Thangpuii chuan,"Aw ,ni e. Tlangval fel tak ani" alo ti nghal a. Ngula chuan,"Kapthangate palai ho chu an hah tawh teh ang chu aw..Ti hian nilengin an vei tawn sek awm sia leh" nui vur vur chung hian a'n ti a. Thangpuii chuan,"A hmain an inremlo pawh ani lo a. A inbiakremni tih tak avanga hetia an palaite han tih hah vak hi zawng a zialo mange aw. Ka pa te pawh hian an aw lo pawh ve mai sela. Inremlohna kan nei azeng pawh ani silo" a'n ti a. Ngula chuan,"Mi zawng zawng tihdan ania lawm. Tlai lamah an inrem fel mai ang. Bakah palaite pawhin chanpual an nei vek țhin tho a. A thlawnin engmah an ti bik hlei nem" a lo ti a. Thangpuii chuan,"Ka u in pasal min neihsan tur hi ka ngai ngamlo. Keipawh pasal um vemai ka duh" nui hak hak pah hian a han ti a. Ngula chuan,"Lungngai mah ta che. Pasal țha tak ila nei dawn alawm. Nangni anga nula hmelțha tan hi chuan khawi lam lal fapa emaw an lo lang hlawl mai ang. A lawmnaah kalo kal leh ani ang chu" a'n ti a. Thangpuii chuan Ngula en vawng vawng pah chuan,"Kei zawng ka hmangaih tak chauh ania ka neih dawn ni"a ti sap a.Ngula chuan,"Keipawh chutiang chu ka duhdan" alo ti ve a. Tichuan rilru inpawh tak si,engmah tlang taka sawi silo chuan tlai lam thlengin an inkawm a. Saii nu leh pa ten Kapthanga palaite aw an lo pawh tak hnuah chuan Ngulate pawh inchhung lamah an lut ta a.A tuk mai chu Saiite inneih ni anih avang chuan Saii te in lamah chhungkaw puipa te lenhkhawmin Saii pa chuan zu alo zuk hlawm a. A ruih tawh hnu phei chuan a bengchhengin lam chitin mai an thai vel a. Ngula erawh Darzika hoin a tuk lama an mamawh tur thil buaipuiin an buai zankhua țhak thung.

       A tuk fehrehsan velah chuan Tualcheng lal in tualah a khaw mipui zawng zawng chu an kim vek emaw tihmai tur hian an tlim hmur mai a. Saii leh Kapthanga pawh an thuam famkim nen lal in tuala an inneihna tur bik dawhsanah chuan an țhu vang mai. An kiangah chuan an nu leh pate ve ve leh Sadawt an lo ding ve bawk. Ngula leh Thangpuii erawh dawhsan kiangah chuan insi chial hian anlo ding ve a. A khat tawk hian an inbe leh zauh zauh țhin a. Saii leh kapthangate ai mah chuan Ngula leh Thangpuii ding dun chu mi tamtak mit la tu zawk ani. Ngula lahin chutiang lam reng a ngaihtuahlo a. Sadawt pa in Saii leh Kapthanga sam a suihkaihhlihsak lai leh ar zantuak a atalh lai te chu hmuhnawm ti tak hian alo thlir dauh dauh a.. Thangpuii nena an ding dun thik rilru tak chunga lo en ngawih ngawih tu an awm reng ani tihpawh a hrelo. Inneihna serh leh sang zawng zawng an zawhfel hnu chuan mo leh moneitu lamte chu anmahni in lam ve ve ah hawng lehin in lamah pawh zu nen an ri bung bung mai a. Ngula chu Thangpuii leh upa Suakkunga farnuten Saii thuam chhawm tur an buaipui lai chu alo pui ve mai mai a.

       Tlai lam alo nih chuan lal mualah mo lawmna ruai țheh turin an kal khawm sang sang a. Khawtual tlangvalte chuan Saii chu rawn kaiin,"Kan hluiah rawn kil tawh. Nang zawng nuthai i chang dawn ta si" an rawn ti a. A khat tawkin tlangvalho chuan Saii chu an kai leh dawr dawr țhin a. A chang leh Kapthanga awmna lamahte chuan va zawn pheiin ,"Kapthang,i nula puan kan zawn khalh dawn che" te an va ti leh țhin a. Midangin ruai an țheh mawlh mawlh lai pawh chuan Saii leb Kapthanga erawh hlui ngaiah an țhu rei thei meuhlo hian an hnuk kual reng mai a. Ngula erawh Thangpuii te nen hlui khatah țhuin an bar mawlh mawlh a. Sa hrang lian deuh an hmuh changin in fiamna ni pahfawmin an han inthehchuuah sak leh nawlh nawlh țhin a. Chumi ni zet zawng a tu mai pawh chu an hlim tlang em em vek ani.

       Ruai țheh zawh hnu chuan in lamah an hawng leh phawta. Zan lamah chuan Lawichhiat zan anih angin Saii chu thawmhnaw engmah kenglo hian Kapthanga te in lama va in lan zawk turin an va hruai phei dawn ta a. A farnute leh a țhianțha ten hma lamah kal puiin an hnung lamah a Lawichal chuan mau tlawn kengin a rawn veng bawk a. Kapthanga te in an thlen hma chuan naupang thingnawi fawm rual vel hian Se ek leh Chirdiak ilo vel hian Saiite chu lo vawmin an rak chel chul mai a. Lawichal chuan naupangte chu han hnawt darhin a tawpah naupangho chuan Lawichala pawh chu an rawn um leh dawr dawr țhin . Kapthangate in an va thlen meuh chuan a berh hian an berh vek tawh mai a. Inchhung an lut dawn ta maw tihah inchung lam ațangin naupang harh rual țhenkhatin tuiin anlo leih ve leh bawk a. Inchhung an luh meuh chuan chirh leh se ek an kai lei luai mai a. Lawichhiat zan chu ani tak meuh mai e. Hemi zan hian rei pawh awmloin Saiite chu an in lamah an hawng phei leh ta a.

      A tuk lamah pawh chuan Saii thlahna ni pahfawmin an in lamah chuan nilengin zu leh sa an chen ni ber mai. Ngula erawh inchhung lama awmlovin pawn lamah Thangpuii nen bawk chuan an inkawm a. Ni a her liama,Lawițhat zan leh Saii Kapthangate ina a luh hlen hun tur anih avang chuan mo thlah turin an han inbuatsaih leh țan ta . Hemi zan hi chuan chhungkaw puipa ten hma hruaiin Saii chu Kapthangate in lamah bawk chuan an hruai leh ta a. Saii țhiante chuan chumi zana an phah tur leh an sin tur puan tlemazawng an ken sak bawk a. Kapthanga te in an va thlen chuan Chhungkaw puipate chuan an fanu chu Kapthangate kutah hlanin thutiam te an han laktir vel a. An inhlan fel hnu chuan mo leh mo neitu lam nen hlim takin zu an in ta a. Chutianga zanrei tak thleng an awm hnu chuan mipui pawh an țin darha,Saii leh Thangpuii pawh țap țuauh chunga inthlahin an in lamah an hawng phei ta a.

      Chumi zan chuan Ngula pawh Thangpuii nen reilote an inkawm hnuin Zawlbuk lam panin a kal ta a. Zawlbuk a han thlen chuan tlangval rual chu an lo ri hulh hulh mai a. Zawlbuk ațanga Kapthangate in thleng chuan Vawkthleng hi an dawn thla zui mai lehnghal. Tualcheng tlangvalten Ngula hmel anlo hmuh chuan ,"Ngula,zanin zawng kan mu meuh dawnlo ania" an lo ti sap sap a. Ngula pawh chuan an thil tih tum chu hriain a vawikhatna turte ani bawk nen telve ngei a tum ta a. Zan alo rei a,mi an mu reh ta maw tihah chuan Zawlbuk a tlangval rual chuan Kapthanga te in lam an pan ta sung sung mai a. An kal pah chuan Vawkkuang chu an vaw ri thla chuah chuah a. Kapthangate in an zuk thlen chuan țhenkhat chuan,"Kapthang,kan lo leng dawn e,kawngka min va hawn tawh" an han ti a. Kapthanga te lah chuan lo hawng ve mai a. Chu veleh tlangval phur fal ho chuan Kapthanga chu puan a phuar hlawmin chhutlaiah chuan an chhuahsan ta a. Kawngkapui chu kharin Saii leh Kapthanga chezia vel hmuh tum chuan bang awng ațangin an han bih a. Chhuatlaia mu chung chuan Kapthanga chuan,"Saii min va phelh tawh" a han ti a. Chu veleh pawn lama tlangval lo awmte chuan,"Le le,a phelh anih chuan a nep zolo ani ang" an lo ti țhin a. Chutianga rei fe an tih hnu chuan tlangvalte pawhin zahngaiin an țin san a. Mahsela a phur fal deuhte chuan Kapthangate Archhiarte chu hawngin Lawiarte an ru chhuak a. Țhenkhatin Sumhmuna Sumte pawn lamah zawn chhuakin an suk tepawh Zawlbuk lamah an pu chho ta vek mai a. Saii chuan Kapthanga chu a phelh ngei awm si a. Le le le...

      A tuk zing varțianah Ngula thovin a thlenin lam pan chuan a kal nghal ta vang vang a. In a zuk thlen chuan Thangpuii chu lo tho tawhin tuichawi tur hian alo in siam mawlh mawlh mai a. Ngula chuan,"Thangpui,ka lo kalpui ang che" a han ti a. Thangpuii chuan a chhang hauhlo mai a. Ngula pawh chuan engmah sawi zui loin Thangpuii chu tuikhur lamah chuan a zui ta tho a. Tuikhur an zuk thlen chuan Ngula chuan,"Thangpui,i u chu i ngai viau ani maw" a han ti a. Thangpuii chuan,"Ngai ve bawk e. A thi daih tawh emaw kan tih hnuah alo let leh a. Tunah lah pasal anei leh daih a" alo ti a. Ngula chuan,"A neih angai tlat sia lawm. Lungngai suh,ti khan a reh ve mai ang" a ti sam et a. Thangpuii chuan,"Engmah i hrethiam velo nih kha" alo ti hlak a. Tuium an thal khah hnu chuan in lam panin an hawng ta a.

      Chhun lamah chuan Thangpuii chu a u ngaia a lung a alen em avangin a chhungte pawh chuan eng ti tur maha phut lovin an awm tir vel mai mai a. Tlai lam deuah chuan Thangpuii leh Ngula chauh chu inah awmin midang zawng chu thil pawimawh buapuiin an chhuak hlawm a. Chutia an pahnih chauha an awm lai chuan Thangpuii chuan,"Ngula,kan khuaah hian cham hlen mai la" a rawn ti hlawl mai a. Ngula chuan,"Thangpui,cham hlen chu ka duh viau mai a. Mahse a la theih rih siloh anih hi. Min rawn zui ve mai dawn em ni" nui chung hian a han ti a. Thangpuii chuan,"Fiamthu mai mai țhinlo la. Bakah rawn zui che chak viau mah ila in khaw lamah min lo vawhlum duhtu an awm awm sia" a lo ti ve a. Chutah Ngula chuan,"Thangpui thil engemaw sawi duh ka nei ani" a han ti a. Thangpuii chuan,"Sawi ta che" alo ti vat a. Ngula chuan inchung lam en vang vang chung hian,"Thangpui, ka thusawi avang hian min hmuhdan pawh a dang vek mai thei a. Mahse hun țha dang ka ngak thei ta ngang lo ani. Ka hmuh tirh phat ațang che khan ka ngaina che in ka thinlung i luah nghal a. Ka hmangaih che niin ka hria" a han ti phawng mai a. Ngula vek chuan,"Ka laka i rilru put hmang hi min hrilh ve thei em" a 'n ti leh a. Thangpuii chuan Ngula en pah chuan,"Ngula,mipa thusawi hi chu rin ahar viau mai a. Bakah nang zawng i zinkual nasa in keimah aia hmelțha leh fel pawh tam tak i tawng ngei anga. Tun maia han chhan che chu anharsa ka ti ani. Kalo in ngaihtuah ange" a han ti a. Ngula chuan zawite hian,"Ka tihpalh ani. I duhloh zawng ka sawi anih chuan min ngaidam dawn nia. Ka lo hawi sang mah mah ani ang e" a han ti a. Chu veleh Thangpuii chuan,"Ngula,chutiang lam anilo. Tu pawi mah i sawilo e. Pangngai takin inkawm teh ang" a'n ti a. Ngula chuan,"Khatiang hnuah pangngai takin engmah kan sawi thei tawh nang. I hmel pawh ka en țha ngam tawh hlei nem" alo ti a. Thangpuii chuan nui ar ar chung hian,"I zah theihloh zia hi ka hria lawm" a'n ti a. Tichuan hlim takin an inkawm zui leh ta a. Thangpuii chuan Ngulaan a hnena a thilsawi chu a u Saii Sawpui ngei a tum ta a.